Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "daa.ntaa"

Nazm MATCHES FOR "daa.ntaa"

Nazm

laDkon ka zindagi-nama

kyaa zindagii hamaarii
sab kuchh hai apne bas me.n
aazaad hai.n fazaa.e.n
duniyaa hai dastaras me.n
kyaa kyaa hame.n milaa hai
kuchh vaqt kuchh baras me.n
lekin jo mu.D ke dekhe.n
thii ik ajab kahaanii
dushvaar kaisaa jiinaa
mushkil thii zindagaanii
ik aafat-e-musalsal
aalaam-e-naa-gahaanii
rozaana sub.h uThnaa
aasaan thaa na itnaa
har roz Daa.nT khaanaa
har roz kaa sisaknaa
har baat ke tamaashe
har baat par jhaga.Dnaa
abbaa vahii.n kha.De hai.n
aKHbaar pa.Dh rahe hai.n
kyaa kaam ham ko de de.n
har vaqt sochte hai.n
aulaad ko to apnii
naukar samajh rahe hai.n
ammii ke saamne to
bilkul na mu.nh ko khole.n
ham bad-tamiiz Thahre
go achchhii baat bole.n
chup-chaap hii rahe.n bas
kitnaa bhii KHvaar ho le.n
paanii baras rahaa hai
par dil taras rahaa hai
vo cycle kha.Dii hai
maa.njhaa vahii.n rakhaa hai
kanche yahaa.n pa.De hai.n
ballaa vahaa.n kha.Daa hai
lekin nahii.n hame.n kyaa
laade kamar pe basta
school jaa rahe hai.n
taariiKH kaa hai parcha
achchhaa nahii.n hu.aa to
bas band jeb KHarcha
urdu kaa kaam puuraa
kal raat kar liyaa thaa
lekin hame.n riyaazii
bilkul samajh na aayaa
allaah ke hai.n bande
ham se hai vaasta kyaa
ammii ne sirf Daa.nTaa
baalo.n me.n tel Daalaa
bhayyaa ne sirf jhi.Dkaa
baajii ne KHuub Taalaa
sab ke liye hai jii me.n
nafrat kaa ek jaalaa
bhayyaa kii cycle kii
kis ne havaa nikaalii
ham ko bhalaa KHabar kyaa
har shaKHs hai savaalii
us ne hamaarii chi.Diyaa
us din jo to.D Daalii
sach hai bahut sitam thaa
goyaa the ik khilaunaa
jaise ho sab baraabar
ghar me.n na honaa honaa
dekhaa nahii.n kisii ne
chhup chhup hamaaraa ronaa
ab ho gayaa hai apnaa har chiiz par ijaara
sab apnii zimmedaarii
sab faisle hamaare
har chiiz iKHtiyaarii
lekin vo bachpane kii hai yaad pyaarii pyaarii
kyaa zindagii hamaarii
kyaa zindagii hamaarii

Asna Badr
Nazm

ek buDha

ik buu.Dhaa bistar-e-marg pe hai
biimaar badan laachaar badan
saa.nse.n bhii kuchh bojhal sii hai.n
aur aa.nkhe.n bhii jal-thal sii hai.n
aisaa bhii nahii.n tanhaa hai vo
paanii hai magar pyaasaa hai vo
ghar me.n bahuuve.n beTe bhii hai.n
hai.n potiyaa.n bhii pote bhii hai.n
lekin ko.ii paas nahii.n aataa
sab jhaa.nkte hai.n chale jaate hai.n
jaise ye is kaa ghar hii nahii.n
jaise vo sab begaane hai.n
jis bahuu kaa number hotaa hai
khaane ke nivaale Thuu.ns ke vo
farz apnaa mukammal kartii hai
phir vaqt pe ko.ii ik beTaa
vo jis ko tho.Dii fursat ho
pahle to aa kar Daa.nTtaa hai
detaa hai davaa.ii phir aise
jaise ehsaan kare ko.ii
jaise apmaan kare ko.ii
har din ye buu.Dhaa sochtaa hai
ko.ii baat na.ii ho aaj ke din
ko.ii do miiThe alfaaz kahe
kabhii mahfil us ke paas saje
kabhii ha.nsne kii ko.ii baat chale
magar aisaa pichhle barso.n me.n
kabhii ho paayaa nahii.n ho paayaa
apne us begaane-pan par
apne us viiraane-pan par
ye buu.Dhaa inkishaaf rahtaa hai
ye buu.Dhaa rotaa rahtaa hai
ik buu.Dhaa bistar-e-marg pe hai

Zia Zameer
Nazm

chand ki fariyaad

chaa.nd ne mujh se kahaa ai shaa.er-e-fikr-e-azal
mere baare me.n bhii likh de ko.ii sanjiida Gazal
har ta'alluq to.D rakkhaa hai hilaal-e-iid se
tujh ko fursat hii nahii.n hai mah-vasho.n kii diid se
rasm-e-diidaar-e-hilaal-e-iid, afsaana hu.ii
baam par us dam cha.Dhe, jis vaqt farzaana hu.ii
le ke nazraana kametii ne ujaalaa hai mujhe
gar nahii.n niklaa, zabardastii nikaalaa hai mujhe
me.n jo be-marzii nikal aayaa to Daa.nTaa hai bahut
maulvii ne muKHtalif KHaano.n me.n baa.nTaa hai bahut
is ko mat follow karo, is kii tariiqat maa.nd hai
tum bareilly ke ho aur ye deobandi chaa.nd hai
ye jo KHuu.n-aaluud hai, afGaaniyo.n kaa chaa.nd hai
muKHtalif Tuk.Do.n me.n pakistaniyo.n kaa chaa.nd hai
ik karachi se hai niklaa ik pas-e-lahore hai
sindh kaa chaa.nd aur hai punjab kaa chaa.nd aur hai
vo jo ham-saa.e kii biivii hai Gazaalaa chaa.nd hai
aur us ke saath jo rahtaa hai kaalaa chaa.nd hai
shaa.ero.n ne apne shero.n me.n bahut pelaa mujhe
'miir' o 'Gaalib' ne bhii samjhaa KHaak kaa Dhelaa mujhe
sher me.n, rashk-e-qamar lailaa ko farmaane lage
tube-light ko hilaal-e-iid batlaane lage
apnii biivii se kahaa untiisvii.n kaa chaa.nd ho
aur pa.Dosan se kahaa tum chaudhvii.n kaa chaa.nd ho
aam sii aurat ko mah-paara banaa kar rakh diyaa
chaa.nd ko TuuTaa hu.aa taara banaa kar rakh diyaa
chaa.nd par jis din se insaa.n ke qadam pa.Dne lage
chaa.ndnii jin se ho aaise balb kam pa.Dne lage
mai.n zamii.n se duur huu.n lekin bahut nazdiik huu.n
ai zamii.n vaalo mai.n tum se duur rah kar Thiik huu.n
mai.n zamii.n par aa gayaa to har bashar le jaa.egaa
sab se pahle ten-parsenT apne ghar le jaa.egaa

Khalid Irfan
Nazm

dulhan

dulhan ganjii hai dulhan ganjii hai
la.Dkiyaa.n taaliyaa.n bajaate hu.e bolii.n
aur der tak zor zor se ha.nstii rahii.n
kuchh aurato.n ne unhe.n aahista se Daa.nTaa
aur dulhan ke paas jaa ke use chup karaane lagii.n
vo ro rahii thii
us din se le kar puure tiin baras tak vo
aahista aahista khaa.nste khaa.nste aur rote rote mar ga.ii
us kii beTii ab sola baras kii hai
zamiin ko chhuute hu.e us ke
siyaah reshmii baal sab ko hairaan karte hai.n
un la.Dkiyo.n ko bhii jo apne baalo.n bhare
safed sar kii vaj.h se
ab dulhan nahii.n ban sake.ngii

Zeeshan Sahil
Nazm

marsiya

vo ik pe.D jo is 'ilaaqe kii sab se ba.Dii shaKHsiyat thaa
apne chaaro.n taraf ke makaano.n ko jis ne
thaam kar unglii chalnaa sikhaayaa
use sab KHabar thii
ki kis ghar me.n kis kii la.Daa.ii hu.ii hai
magar chup rahaa
aur har ghar ke har raaz ko us ne sab se chhupaayaa
kachchii diivaare.n aksar
koTharii kii shikaayat jo kartii thii.n us se
to un ko biThaa kar
pyaar se muskuraa kar
zaraa Daa.nTtaa thaa
sadr darvaazo.n kaa
saare daalaano.n se faasla thaa magar
cha.nd jho.nko.n se vo faasla paaTtaa thaa
vahii pe.D ab sar jhukaa.e kha.Daa hai
kachchii diivaaro.n ke chhoTe chhoTe makaa.n
pakkii ii.nTo.n ke do-manzile ho ga.e hai.n
pe.D KHaamosh hai
vo makaa.n us ke hisse kii dhuupo.n ko ghere kha.De hai.n

Ameer Imam
Nazm

ek anokha hat

chuuhe ne billii ko dau.Daayaa
bhaag ke mere hat me.n aa.ii
chyuu.nTii ne Daa.nTaa haathii ko
bolaa ham bhii hai.n bhaa.ii
kuttaa bolaa chuu.n chuu.n chuu.n
chi.Diyaa bolii bhau.n bhau.n bhau.n bhau.n
saat samundar hat ke andar
dolphin ne Gazal sunaa.ii
aa.o bhaa.ii hat me.n aa.o
sab paraanii hai.n bhaa.ii bhaa.ii

Zakia Mashhadi
Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

shayad

tumhaare rang mujh me.n aur gahre hote jaate hai.n
mai.n Dartaa huu.n

Jaun Eliya
Nazm

muhasara

miraa qalam nahii.n auzaar us naqab-zan kaa
jo apne ghar kii hii chhat me.n shigaaf Daaltaa hai
miraa qalam nahii.n us duzd-e-niim-shab kaa rafiiq
jo be-charaaG gharo.n par kamand uchhaaltaa hai

Ahmad Faraz
Nazm

KHuda ka sawal

falak kaa tujhe shaamiyaana diyaa
zamii.n par tujhe aab-o-daana diyaa

Abrar Ahmad Kashif
Nazm

suna hai

sunaa hai jangalo.n kaa bhii ko.ii dastuur hotaa hai
sunaa hai sher kaa jab peT bhar jaa.e to vo hamla nahii.n kartaa
daraKHto.n kii ghanii chhaa.nv me.n jaa kar let jaataa hai
havaa ke tez jho.nke jab daraKHto.n ko hilaate hai.n
to mainaa apne bachche chho.D kar
kavve ke anDo.n ko paro.n se thaam letii hai
sunaa hai gho.nsle se ko.ii bachcha gir pa.De to saaraa jangal jaag jaataa hai
sunaa hai jab kisii naddii ke paanii me.n
ba.e ke gho.nsle kaa gandumii saaya laraztaa hai
to naddii kii rupahlii machhliyaa.n us ko pa.Dosan maan letii hai.n
kabhii tuufaan aa jaa.e, ko.ii pul TuuT jaa.e to
kisii lak.Dii ke taKHte par
gilahrii, saa.np, bakrii aur chiitaa saath hote hai.n
sunaa hai jangalo.n kaa bhii ko.ii dastuur hotaa hai
KHudaavandaa! jaliil o mo'tabar! daanaa o biinaa munsif o akbar!
mire is shahr me.n ab jangalo.n hii kaa ko.ii qaanuun naafiz kar!
ko.ii dastuur naafiz kar

Zehra Nigaah
Nazm

banjara-nama

har manzil me.n ab saath tire ye jitnaa Deraa-Daa.nDaa hai
zar daam-diram kaa bhaa.nDaa hai banduuq sipar aur khaa.nDaa hai
jab naayak tan kaa nikal gayaa jo mulko.n mulko.n haa.nDaa hai
phir haa.nDaa hai na bhaa.nDaa hai na halvaa hai na maa.nDaa hai
sab ThaaTh pa.Daa rah jaavegaa jab laad chalegaa banjaaraa

Nazeer Akbarabadi
Nazm

KHun phir KHun hai

tum ne jis KHuun ko maqtal me.n dabaanaa chaahaa
aaj vo kuucha o baazaar me.n aa niklaa hai
kahii.n sho.ala kahii.n na.ara kahii.n patthar ban kar
KHuun chaltaa hai to ruktaa nahii.n sangiino.n se
sar uThaataa hai to dabtaa nahii.n aa.iino.n se

Sahir Ludhianvi
Nazm

wo kamra yaad aata hai

mai.n jab bhii
zindagii kii chilchilaatii dhuup me.n tap kar
mai.n jab bhii
duusro.n ke aur apne jhuuT se thak kar
mai.n sab se la.D ke KHud se haar ke
jab bhii us ek kamre me.n jaataa thaa
vo halke aur gahre kattha.ii ra.ngo.n kaa ik kamra
vo behad mehrbaa.n kamra
jo apnii narm muTThii me.n mujhe aise chhupaa letaa thaa
jaise ko.ii maa.n
bachche ko aa.nchal me.n chhupaa le
pyaar se Daa.nTe
ye kyaa aadat hai
jaltii dopahar me.n maare maare ghuumte ho tum
vo kamra yaad aataa hai
dabiiz aur KHaasaa bhaarii
kuchh zaraa mushkil se khulne vaalaa vo shiisham kaa darvaaza
ki jaise ko.ii akkha.D baap
apne khurdure siine me.n
shafqat ke samundar ko chhupaa.e ho
vo kursii
aur us ke saath vo ju.Dvaa.n bahan us kii
vo dono.n
dost thii.n merii
vo ik gustaaKH mu.nh-phaT aa.iina
jo dil kaa achchhaa thaa
vo be-ha.ngam sii almaarii
jo kone me.n kha.Dii
ik buu.Dhii annaa kii tarah
aa.iine ko tambiih kartii thii
vo ik gul-daan
nanhaa saa
bahut shaitaan
un dino.n pe ha.nstaa thaa
dariicha
yaa zehaanat se bharii ik muskuraahaT
aur dariiche par jhukii vo bel
ko.ii sabz sargoshii
kitaabe.n
taaq me.n aur shelf par
sanjiida ustaanii banii baiThii.n
magar sab muntazir is baat kii
mai.n un se kuchh puuchhuu.n
sirhaane
nii.nd kaa saathii
thakan kaa chaara-gar
vo narm-dil takiya
mai.n jis kii god me.n sar rakh ke
chhat ko dekhtaa thaa
chhat kii ka.Diyo.n me.n
na jaane kitne afsaano.n kii ka.Diyaa.n thii.n
vo chhoTii mez par
aur saamne diivaar par
aavezaa.n tasviire.n
mujhe apnaa.iyat se aur yaqii.n se dekhtii thii.n
muskuraatii thii.n
unhe.n shak bhii nahii.n thaa
ek din
mai.n un ko aise chho.D jaa.uu.ngaa
mai.n ik din yuu.n bhii jaa.uu.ngaa
ki phir vaapas na aa.uu.ngaa

Javed Akhtar
Nazm

iblis ki majlis-e-shura

ibliis
ye anaasir kaa puraanaa khel ye duniyaa-e-duu.n
saakinaan-e-arsh-e-aazam kii tamannaa.o.n kaa KHuu.n
is kii barbaadii pe aaj aamaada hai vo kaarsaaz
jis ne is kaa naam rakhaa thaa jahaan-e-kaaf-o-nuu.n
mai.n ne dikhlaayaa fara.ngii ko muluukiyat kaa KHvaab
mai.n ne to.Daa masjid-o-dair-o-kaliisaa kaa fusuu.n
mai.n ne naadaaro.n ko sikhlaayaa sabaq taqdiir kaa
mai.n ne mun.im ko diyaa sarmaaya daarii kaa junuu.n
kaun kar saktaa hai is kii aatish-e-sozaa.n ko sard
jis ke ha.ngaamo.n me.n ho ibliis kaa soz-e-daruu.n
jis kii shaaKHe.n ho.n hamaarii aabiyaarii se buland
kaun kar saktaa hai is naKHl-e-kuhan ko sar-niguu.n
pahlaa mushiir
is me.n kyaa shak hai ki mohkam hai ye ibliisii nizaam
puKHta-tar is se hu.e KHuu-e-Gulaamii me.n avaam
hai azal se in Gariibo.n ke muqaddar me.n sujuud
in kii fitrat kaa taqaazaa hai namaaz-e-be-qayaam
aarzuu avval to paidaa ho nahii.n saktii kahii.n
ho kahii.n paidaa to mar jaatii hai yaa rahtii hai KHaam
ye hamaarii sa.ii-e-paiham kii karaamat hai ki aaj
suufii-o-mullaa muluukiyyat ke bande hai.n tamaam
tab-e-mashriq ke liye mauzuu.n yahii afyuun thii
varna qavvaalii se kuchh kam-tar nahii.n ilm-e-kalaam
hai tavaaf-o-haj kaa ha.ngaama agar baaqii to kyaa
kund ho kar rah ga.ii momin kii teG-e-be-niyaam
kis kii nau-miidii pe hujjat hai ye farmaan-e-jadiid
hai jihaad is daur me.n mard-e-musalmaa.n par haraam
duusraa mushiir
KHair hai sulataanii-e-jamhuur kaa GauGaa ki shar
tuu jahaa.n ke taaza fitno.n se nahii.n hai baa-KHabar
pahlaa mushiir
huu.n magar merii jahaa.n-biinii bataatii hai mujhe
jo muluukiyat kaa ik parda ho kyaa is se KHatar
ham ne KHud shaahii ko pahnaayaa hai jamhuurii libaas
jab zaraa aadam hu.aa hai KHud-shanaas-o-KHud-nigar
kaarobaar-e-shahryaarii kii haqiiqat aur hai
ye vajuud-e-miir-o-sultaa.n par nahii.n hai munhasir
majlis-e-millat ho yaa parvez kaa darbaar ho
hai vo sultaa.n Gair kii khetii pe ho jis kii nazar
tuu ne kyaa dekhaa nahii.n maGrib kaa jamhuurii nizaam
chehra raushan andaruu.n cha.ngez se taariik-tar
tiisraa mushiir
ruuh-e-sultaanii rahe baaqii to phir kyaa iztiraab
hai magar kyaa is yahuudii kii sharaarat kaa javaab
vo kaliim-e-be-tajallii vo masiih-e-be-saliib
niist paiGambar va-lekin dar baGal daarad kitaab
kyaa bataa.uu.n kyaa hai kaafir kii nigaah-e-parda-soz
mashriq-o-maGrib kii qaumo.n ke liye roz-e-hisaab
is se ba.Dh kar aur kyaa hogaa tabii.at kaa fasaad
to.D dii bando.n ne aaqaa.o.n ke KHemo.n kii tanaab
chauthaa mushiir
to.D is kaa ruumat-ul-kubraa ke aivaano.n me.n dekh
aal-e-ceaser ko dikhaayaa ham ne phir ceaser kaa KHvaab
kaun bahr-e-ruum kii maujo.n se hai lipTaa hu.aa
gaah baalad-chuu.n-sanobar gaah naalad-chuu.n-rubaab
tiisraa mushiir
mai.n to is kii aaqibat-biinii kaa kuchh qaa.il nahii.n
jis ne afra.ngii siyaasat ko kyaa yuu.n be-hijaab
paa.nchvaa.n mushiir ibliis ko muKHaatab kar ke
ai tire soz-e-nafas se kaar-e-aalam ustuvaar
tuu ne jab chaahaa kiyaa har pardagii ko aashkaar
aab-o-gil terii haraarat se jahaan-e-soz-o-saaz
ablah-e-jannat tirii ta.aliim se daanaa-e-kaar
tujh se ba.Dh kar fitrat-e-aadam kaa vo mahram nahii.n
saada-dil bando.n me.n jo mash.huur hai parvardigaar
kaam thaa jin kaa faqat taqdiis-o-tasbiih-o-tavaaf
terii Gairat se abad tak sar-niguu.n-o-sharmsaar
garche hai.n tere muriid afra.ng ke saahir tamaam
ab mujhe un kii faraasat par nahii.n hai e'tibaar
vo yahuudii fitna-gar vo ruuh-e-mazdak kaa buruuz
har qabaa hone ko hai is ke junuu.n se taar taar
zaaG dashtii ho rahaa hai ham-sar-e-shaahiin-o-charG
kitnii sur.at se badaltaa hai mizaaj-e-rozgaar
chhaa ga.ii aashufta ho kar vus.at-e-aflaak par
jis ko naadaanii se ham samjhe the ik musht-e-Gubaar
fitna-e-fardaa kii haibat kaa ye aalam hai ki aaj
kaa.npte hai.n kohsaar-o-murG-zaar-o-juu.ebaar
mere aaqaa vo jahaa.n zer-o-zabar hone ko hai
jis jahaa.n kaa hai faqat terii siyaadat par madaar

Allama Iqbal
Nazm

KHizr-e-rah

kyaa sunaataa hai mujhe turk-o-arab kii daastaa.n
mujh se kuchh pinhaa.n nahii.n islaamiyo.n kaa soz-o-saaz
le ga.e tasliis ke farzand miiraas-e-KHaliil
KHisht-e-buniyaad-e-kaliisaa ban ga.ii KHaak-e-hijaaz
ho ga.ii rusvaa zamaane me.n kulaah-e-laala-ra.ng
jo saraapaa naaz the hai.n aaj majbuur-e-niyaaz
le rahaa hai mai-faroshaan-e-fara.ngistaan se paars
vo mai-e-sarkash haraarat jis kii hai miinaa-gudaaz
hikmat-e-maGrib se millat kii ye kaifiyyat hu.ii
Tuk.De Tuk.De jis tarah sone ko kar detaa hai gaaz
ho gayaa maanind-e-aab arzaa.n musalmaa.n kaa lahuu
muztarib hai tuu ki teraa dil nahii.n daanaa-e-raaz
guft ruumii har banaa-e-kuhanaa ki-aabaadaa.n kunand
mii na-daanii avval aa.n buniyaad raa viiraa.n kunand
mulk haatho.n se gayaa millat kii aa.nkhe.n khul ga.ii.n
haq tiraa chashme 'ataa kar dast-e-Gaafil dar nigar
momyaa.ii kii gadaa.ii se to behtar hai shikast
mor-e-be-par haajate pesh-e-sulaimaane mabar
rabt-o-zabt-e-millat-e-baizaa hai mashriq kii najaat
asia vaale hai.n is nukte se ab tak be-KHabar
phir siyaasat chho.D kar daaKHil hisaar-e-dii.n me.n ho
mulk-o-daulat hai faqat hifz-e-haram kaa ik samar
ek huu.n muslim haram kii paasbaanii ke liye
niil ke saahil se le kar taa-ba-KHaak-e-kaashGar
jo karegaa imtiyaaz-e-ra.ng-o-KHuu.n miT jaa.egaa
turk-e-KHargaahii ho yaa aaraabii-e-vaalaa-guhar
nasl agar muslim kii maz.hab par muqaddam ho ga.ii
u.D gayaa duniyaa se tuu maanind-e-KHaak-e-raah-guzar
taa-KHilaafat kii binaa duniyaa me.n ho phir ustuvaar
laa kahii.n se Dhuu.nD kar aslaaf kaa qalb-o-jigar
ai ki na-shinaasii KHafii raa az jalii hushiyaar baash
ai giraftaar-e-abuu-bakr-o-alii hushiyaar-baash
'ishq ko fariyaad laazim thii so vo bhii ho chukii
ab zaraa dil thaam kar fariyaad kii taasiir dekh
tuu ne dekhaa satvat-e-raftaar-e-dariyaa kaa 'uruuj
mauj-e-muztar kis tarah bantii hai ab zanjiir dekh
'aam hurriyat kaa jo dekhaa thaa KHvaab islaam ne
ai musalmaa.n aaj tuu us KHvaab kii taa'biir dekh
apnii KHaakistar samundar ko hai saamaan-e-vajuud
mar ke phir hotaa hai paidaa ye jahaan-e-piir dekh
khol kar aa.nkhe.n mire aa.iina-e-guftaar me.n
aane vaale daur kii dhundlii sii ik tasviir dekh
aazmuuda fitna hai ik aur bhii garduu.n ke paas
saamne taqdiir ke rusvaa.ii-e-tadbiir dekh
muslim astii siina raa az aarzuu-aabaad daar
har zamaa.n pesh-e-nazar laa-yuKHlif-ul-mii.aad daar

Allama Iqbal
Nazm

hiras

mai.n sulagte hu.e raazo.n ko ayaa.n to kar duu.n
lekin un raazo.n kii tash.hiir se jii Dartaa hai
raat ke KHvaab ujaale me.n bayaa.n to kar duu.n
un hasii.n KHvaabo.n kii taabiir se jii Dartaa hai

Sahir Ludhianvi
Nazm

lenin

ai anfus o aafaaq me.n paidaa tirii aayaat
haq ye hai ki hai zinda o paa.inda tirii zaat
mai.n kaise samajhtaa ki tuu hai yaa ki nahii.n hai
har dam mutaGayyar the KHirad ke nazriyaat
mahram nahii.n fitrat ke suruud-e-azlii se
biinaa-e-kavaakib ho ki daanaa-e-nabaataat
aaj aa.nkh ne dekhaa to vo 'aalam hu.aa saabit
mai.n jis ko samajhtaa thaa kaliisaa ke KHuraafaat
ham band-e-shab-o-roz me.n jak.De hu.e bande
tuu KHaaliq-e-aasaar-o-nigaaranda-e-aanaat
ik baat agar mujh ko ijaazat ho to puuchhuu.n
hal kar na sake jis ko hakiimo.n ke maqaalaat
jab tak mai.n jiyaa KHema-e-aflaak ke niiche
kaa.nTe kii tarah dil me.n khaTaktii rahii ye baat
guftaar ke usluub pe qaabuu nahii.n rahtaa
jab ruuh ke andar mutalaatum ho.n KHayaalaat
vo kaun saa aadam hai ki tuu jis kaa hai maa'buud
vo aadam-e-KHaakii ki jo hai zer-e-samaavaat
mashriq ke KHudaavand safedaan-e-ra.ngii
maGrib ke KHudaavand daraKHshanda filizzaat
europe me.n bahut raushni-e-ilm-o-hunar hai
haq ye hai ki be-chashma-e-haivaa.n hai ye zulmaat
raa.naa.i-e-taamiir me.n raunaq me.n safaa me.n
girjo.n se kahii.n ba.Dh ke hai.n banko.n kii imaaraat
zaahir me.n tijaarat hai haqiiqat me.n ju.aa hai
suud ek kaa laakho.n ke liye marg-e-mufaajaat
ye 'ilm ye hikmat ye tadabbur ye hukuumat
piite hai.n lahuu dete hai.n taaliim-e-musaavaat
bekaarii o 'uryaanii o mai-KHvaarii o iflaas
kyaa kam hai.n fara.ngii madniyat kii futuuhaat
vo qaum ki faizaan-e-samaavii se ho mahruum
had us ke kamaalaat kii hai barq o buKHaaraat
hai dil ke liye maut mashiino.n kii hukuumat
ehsaas-e-muravvat ko kuchal dete hai.n aalaat
aasaar to kuchh kuchh nazar aate hai.n ki aaKHir
tadbiir ko taqdiir ke shaatir ne kiyaa maat
mai-KHaana kii buniyaad me.n aayaa hai tazalzul
baiThe hai.n isii fikr me.n piiraan-e-KHaraabaat
chehro.n pe jo surKHii nazar aatii hai sar-e-shaam
yaa Gaaza hai yaa saaGar o miinaa kii karaamaat
tuu qaadir o 'aadil hai magar tere jahaa.n me.n
hai.n talKH bahut banda-e-mazduur ke auqaat
kab Duubegaa sarmaaya-parastii kaa safiina
duniyaa hai tirii muntazir-e-roz-e-mukaafaat

Allama Iqbal
Nazm

ek laDka

KHudaa-e-izz-o-jal kii nemato.n kaa mo'tarif huu.n mai.n
mujhe iqraar hai us ne zamii.n ko aise phailaayaa
ki jaise bistar-e-kam-KHvaab ho diibaa-o-maKHmal ho
mujhe iqraar hai ye KHema-e-aflaak kaa saaya
usii kii baKHshishe.n hai.n us ne suuraj chaa.nd taaro.n ko
fazaa.o.n me.n sa.nvaaraa ik had-e-faasil muqarrar kii
chaTaane.n chiir kar dariyaa nikaale KHaak-e-asfal se
mirii taKHliiq kii mujh ko jahaa.n kii paasbaanii dii
samundar motiyo.n muu.ngo.n se kaane.n la.al-o-gauhar se
havaa.e.n mast-kun KHushbu.o.n se ma.amuur kar dii hai.n
vo haakim qaadir-e-mutlaq hai yaktaa aur daanaa hai
a.ndhere ko ujaale se judaa kartaa hai KHud ko mai.n
agar pahchaantaa huu.n us kii rahmat aur saKHaavat hai
usii ne khusravii dii hai la.iimo.n ko mujhe nakbat
usii ne yaava-goyo.n ko miraa KHaazin banaayaa hai
tava.ngar hirzah-kaaro.n ko kiyaa daryuuza-gar mujh ko
magar jab jab kisii ke saamne daaman pasaaraa hai
ye la.Dkaa puuchhtaa hai aKHtar-ul-iimaan tum hii ho

Akhtarul Iman
Nazm

ye bachcha kis ka bachcha hai

is bhuuk ke dukh kii duniyaa me.n
ye kaisaa sukh kaa sapnaa hai
vo kis dhartii ke Tuk.De hai.n
ye kis duniyaa kaa hissa hai
5
ham jis aadam ke beTe hai.n
ye us aadam kaa beTaa hai
ye aadam ek hii aadam hai
ye goraa hai yaa kaalaa hai
ye dhartii ek hii dhartii hai
ye duniyaa ek hii duniyaa hai
sab ik daataa ke bande hai.n
sab bando.n kaa ik daataa hai
kuchh puurab pachchham farq nahii.n
is dhartii par haq sab kaa hai
6
ye tanhaa bachcha be-chaara
ye bachcha jo yahaa.n baiThaa hai

Ibn۔e۔Insha
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now