Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "duud"

Nazm MATCHES FOR "duud"

Nazm

saqi-nama

hu.aa KHema-zan kaarvaan-e-bahaar
iram ban gayaa daaman-e-koh-saar
gul o nargis o sosan o nastaran
shahiid-e-azal laala-KHuunii.n kafan
jahaa.n chhup gayaa parda-e-ra.ng me.n
lahuu kii hai gardish rag-e-sang me.n
fazaa niilii niilii havaa me.n suruur
Thaharte nahii.n aashiyaa.n me.n tuyuur
vo juu-e-kohistaa.n uchaktii hu.ii
aTaktii lachaktii saraktii hu.ii
uchhaltii phisaltii sambhaltii hu.ii
ba.De pech khaa kar nikaltii hu.ii
ruke jab to sil chiir detii hai ye
pahaa.Do.n ke dil chiir detii hai ye
zaraa dekh ai saaqii-e-laala-faam
sunaatii hai ye zindagii kaa payaam
pilaa de mujhe vo mai-e-parda-soz
ki aatii nahii.n fasl-e-gul roz roz
vo mai jis se raushan zamiir-e-hayaat
vo mai jis se hai masti-e-kaa.enaat
vo mai jis me.n hai soz-o-saaz-e-azal
vo mai jis se khultaa hai raaz-e-azal
uThaa saaqiyaa parda is raaz se
la.Daa de mamuule ko shahbaaz se
zamaane ke andaaz badle ga.e
nayaa raag hai saaz badle ga.e
hu.aa is tarah faash raaz-e-fara.ng
ki hairat me.n hai shiisha-baaz-e-fara.ng
puraanii siyaasat-garii KHvaar hai
zamii.n miir o sultaa.n se be-zaar hai
gayaa daur-e-sarmaaya-daarii gayaa
tamaashaa dikhaa kar madaarii gayaa
giraa.n KHvaab chiinii sambhalne lage
himaala ke chashme ubalne lage
dil-e-tuur-e-siinaa-o-faaraan do-niim
tajallii kaa phir muntazir hai kaliim
musalmaa.n hai tauhiid me.n garam-josh
magar dil abhii tak hai zunnaar-posh
tamaddun tasavvuf sharii.at-e-kalaam
butaan-e-ajam ke pujaarii tamaam
haqiiqat KHuraafaat me.n kho ga.ii
ye ummat rivaayaat me.n kho ga.ii
lubhaataa hai dil ko kalaam-e-KHatiib
magar lazzat-e-shauq se be-nasiib
bayaa.n is kaa mantiq se suljhaa hu.aa
luGat ke bakhe.Do.n me.n uljhaa hu.aa
vo suufii ki thaa KHidmat-e-haq me.n mard
mohabbat me.n yaktaa hamiiyat me.n fard
ajam ke KHayaalaat me.n kho gayaa
ye saalik maqaamaat me.n kho gayaa
bujhii ishq kii aag andher hai
musalmaa.n nahii.n raakh kaa Dher hai
sharaab-e-kuhan phir pilaa saaqiyaa
vahii jaam gardish me.n laa saaqiyaa
mujhe ishq ke par lagaa kar u.Daa
mirii KHaak jugnuu banaa kar u.Daa
KHirad ko Gulaamii se aazaad kar
javaano.n ko piiro.n kaa ustaad kar
harii shaaKH-e-millat tire nam se hai
nafas is badan me.n tire dam se hai
ta.Dapne pha.Dakne kii taufiiq de
dil-e-murtazaa soz-e-siddiiq de
jigar se vahii tiir phir paar kar
tamannaa ko siino.n me.n bedaar kar
tire aasmaano.n ke taaro.n kii KHair
zamiino.n ke shab zinda-daaro.n kii KHair
javaano.n ko soz-e-jigar baKHsh de
miraa ishq merii nazar baKHsh de
mirii naav girdaab se paar kar
ye saabit hai to is ko sayyaar kar
btaa mujh ko asraar-e-marg-o-hayaat
ki terii nigaaho.n me.n hai kaa.enaat
mire diida-e-tar kii be-KHvaabiyaa.n
mire dil kii poshiida betaabiyaa.n
mire naala-e-niim-shab kaa niyaaz
mirii KHalvat o anjuman kaa gudaaz
uma.nge.n mirii aarzuu.e.n mirii
ummiide.n mirii justuju.e.n mirii
mirii fitrat aa.iina-e-rozgaar
Gazaalaan-e-afkaar kaa murG-zaar
miraa dil mirii razm-gaah-e-hayaat
gumaano.n ke lashkar yaqii.n kaa sabaat
yahii kuchh hai saaqii mataa-e-faqiir
isii se faqiirii me.n huu.n mai.n amiir
mire qaafile me.n luTaa de ise
luTaa de Thikaane lagaa de ise
damaa-dam ravaa.n hai yam-e-zindagii
har ik shai se paidaa ram-e-zindagii
isii se hu.ii hai badan kii numuud
ki sho'le me.n poshiida hai mauj-e-duud
giraa.n garche hai sohbat-e-aab-o-gil
KHush aa.ii ise mehnat-e-aab-o-gil
ye saabit bhii hai aur sayyaar bhii
anaasir ke phando.n se be-zaar bhii
ye vahdat hai kasrat me.n har dam asiir
magar har kahii.n be-chugo.n be-naziir
ye aalam ye but-KHaana-e-shash-jihaat
isii ne taraashaa hai ye somnaat
pasand is ko takraar kii KHuu nahii.n
ki tuu mai.n nahii.n aur mai.n tuu nahii.n
man o tuu se hai anjuman-aafrii.n
magar ain-e-mahfil me.n KHalvat-nashii.n
chamak us kii bijlii me.n taare me.n hai
ye chaa.ndii me.n sone me.n paare me.n hai
usii ke bayaabaa.n usii ke babuul
usii ke hai.n kaa.nTe usii ke hai.n phuul
kahii.n us kii taaqat se kohsaar chuur
kahii.n us ke phande me.n jibra.iil o huur
kahii.n jaza hai shaahiin siimaab ra.ng
lahuu se chakoro.n ke aaluuda chang
kabuutar kahii.n aashiyaane se duur
pha.Daktaa hu.aa jaal me.n naa-subuur
fareb-e-nazar hai sukuun o sabaat
ta.Daptaa hai har zarra-e-kaa.enaat
Thahartaa nahii.n kaarvaan-e-vajuud
ki har lahz hai taaza shaan-e-vajuud
samajhtaa hai tuu raaz hai zindagii
faqat zauq-e-parvaaz hai zindagii
bahut us ne dekhe hai.n past o buland
safar us ko manzil se ba.Dh kar pasand
safar zindagii ke liye barg o saaz
safar hai haqiiqat hazar hai majaaz
ulajh kar sulajhne me.n lazzat use
ta.Dapne pha.Dakne me.n raahat use
hu.aa jab use saamnaa maut kaa
kaThin thaa ba.Daa thaamnaa maut kaa
utar kar jahaan-e-makaafaat me.n
rahii zindagii maut kii ghaat me.n
mazaaq-e-du.ii se banii zauj zauj
uThii dasht o kohsaar se fauj fauj
gul is shaaKH se TuuTte bhii rahe
isii shaaKH se phuuTte bhii rahe
samajhte hai.n naadaa.n use be-sabaat
ubhartaa hai miT miT ke naqsh-e-hayaat
ba.Dii tez jaulaa.n ba.Dii zuud-ras
azal se abad tak ram-e-yak-nafs
zamaana ki zanjiir-e-ayyaam hai
damo.n ke ulaT-pher kaa naam hai
ye mauj-e-nafs kyaa hai talvaar hai
KHudii kyaa hai talvaar kii dhaar hai
KHudii kyaa hai raaz-daruun-hayaat
KHudii kyaa hai bedaari-e-kaa.enaat
KHudii jalva badmast o KHalvat-pasand
samundar hai ik buu.nd paanii me.n band
a.ndhere ujaale me.n hai taabnaak
man o tuu me.n paidaa man o tuu se paak
azal us ke piichhe abad saamne
na had us ke piichhe na had saamne
zamaane ke dariyaa me.n bahtii hu.ii
sitam us kii maujo.n ke sahtii hu.ii
tajassus kii raahe.n badaltii hu.ii
damaa-dam nigaahe.n badaltii hu.ii
subuk us ke haatho.n me.n sa.ng-e-giraa.n
pahaa.D us kii zarbo.n se reg-e-ravaa.n
safar us kaa anjaam o aaGaaz hai
yahii us kii taqviim kaa raaz hai
kiran chaa.nd me.n hai sharar sang me.n
ye be-ra.ng hai Duub kar rang me.n
ise vaasta kyaa kam-o-besh se
nasheb o faraaz o pas-o-pesh se
azal se hai ye kashmakash me.n asiir
hu.ii KHaak-e-aadam me.n suurat-paziir
KHudii kaa nasheman tire dil me.n hai
falak jis tarah aa.nkh ke til me.n hai
KHudii ke nigahbaa.n ko hai zahr-naab
vo naa.n jis se jaatii rahe us kii aab
vahii naa.n hai us ke liye arjumand
rahe jis se duniyaa me.n gardan buland
KHudii faal-e-mahmuud se darguzar
KHudii par nigah rakh ayaazii na kar
vahii sajda hai laa.iq-e-ehtimaam
ki ho jis se har sajda tujh par haraam
ye aalam ye ha.ngaama-e-ra.ng-o-saut
ye aalam ki hai zer-e-farmaan-e-maut
ye aalam ye but-KHaana-e-chashm-o-gosh
jahaa.n zindagii hai faqat KHurd o nosh
KHudii kii ye hai manzil-e-avvalii.n
musaafir ye teraa nasheman nahii.n
tirii aag is KHaak-daa.n se nahii.n
jahaa.n tujh se hai tuu jahaa.n se nahii.n
ba.Dhe jaa ye koh-e-giraa.n to.D kar
tilism-e-zamaan-o-makaa.n to.D kar
KHudii sher-e-maulaa jahaa.n us kaa said
zamii.n us kii said aasmaa.n us kaa said
jahaa.n aur bhii hai.n abhii be-numuud
ki KHaalii nahii.n hai zamiir-e-vajuud
har ik muntazir terii yalGaar kaa
tirii shauKHi-e-fikr-o-kirdaar kaa
ye hai maqsad gardish-e-rozgaar
ki terii KHudii tujh pe ho aashkaar
tuu hai faatah-e-aalam-e-KHuub-o-zisht
tujhe kyaa bataa.uu.n tirii sarnavisht
haqiiqat pe hai jaama-e-harf-e-ta.ng
haqiiqat hai aa.iina-e-guftaar-e-za.ng
farozaa.n hai siine me.n sham-e-nafas
magar taab-e-guftaar rakhtii hai bas
agar yak-sar-e-muu-e-bartar param
faroG-e-tajallii ba-sozad param

Allama Iqbal
Nazm

walida marhuma ki yaad mein

zarra zarra dahr kaa zindaanii-e-taqdiir hai
parda-e-majbuurii o bechaargii tadbiir hai
aasmaa.n majbuur hai shams o qamar majbuur hai.n
anjum-e-siimaab-paa raftaar par majbuur hai.n
hai shikast anjaam Gunche kaa subuu gulzaar me.n
sabza o gul bhii hai.n majbuur-e-numuu gulzaar me.n
naGma-e-bulbul ho yaa aavaaz-e-KHaamosh-e-zamiir
hai isii zanjiir-e-aalam-giir me.n har shai asiir
aa.nkh par hotaa hai jab ye sirr-e-majbuurii ayaa.n
KHushk ho jaataa hai dil me.n ashk kaa sail-e-ravaa.n
qalb-e-insaanii me.n raqs-e-aish-o-Gam rahtaa nahii.n
naGma rah jaataa hai lutf-e-zer-o-bam rahtaa nahii.n
ilm o hikmat rahzan-e-saamaan-e-ashk-o-aah hai
ya.anii ik almaas kaa Tuk.Daa dil-e-aagaah hai
garche mere baaG me.n shabnam kii shaadaabii nahii.n
aa.nkh merii maaya-daar-e-ashk-e-unnaabii nahii.n
jaantaa huu.n aah me.n aalaam-e-insaanii kaa raaz
hai navaa-e-shikva se KHaalii mirii fitrat kaa saaz
mere lab par qissa-e-naira.ngi-e-dauraa.n nahii.n
dil miraa hairaa.n nahii.n KHanda nahii.n giryaa.n nahii.n
par tirii tasviir qaasid girya-e-paiham kii hai
aah ye tardiid merii hikmat-e-mohkam kii hai
girya-e-sarshaar se buniyaad-e-jaa.n paa.inda hai
dard ke irfaa.n se aql-e-sa.ng-dil sharminda hai
mauj-e-duud-e-aah se aa.iina hai raushan miraa
ganj-e-aab-aavrd se maamuur hai daaman miraa
hairatii huu.n mai.n tirii tasviir ke e.ajaaz kaa
ruKH badal Daalaa hai jis ne vaqt kii parvaaz kaa
rafta o haazir ko goyaa paa-ba-paa is ne kiyaa
ahd-e-tiflii se mujhe phir aashnaa is ne kiyaa
jab tire daaman me.n paltii thii vo jaan-e-naa-tavaa.n
baat se achchhii tarah mahram na thii jis kii zabaa.n
aur ab charche hai.n jis kii shoKHii-e-guftaar ke
be-bahaa motii hai.n jis kii chashm-e-gauhar-baar ke
ilm kii sa.njiida-guftaarii bu.Dhaape kaa shu.uur
dunyavii e.azaaz kii shaukat javaanii kaa Guruur
zindagii kii auj-gaaho.n se utar aate hai.n ham
sohbat-e-maadar me.n tifl-e-saada rah jaate hai.n ham
be-takalluf KHanda-zan hai.n fikr se aazaad hai.n
phir usii kho.e hu.e firdaus me.n aabaad hai.n
kis ko ab hogaa vatan me.n aah meraa intizaar
kaun meraa KHat na aane se rahegaa be-qaraar
KHaak-e-marqad par tirii le kar ye fariyaad aa.uu.ngaa
ab du.aa-e-niim-shab me.n kis ko mai.n yaad aa.uu.ngaa
tarbiyat se terii me.n anjum kaa ham-qismat hu.aa
ghar mire ajdaad kaa sarmaaya-e-izzat hu.aa
daftar-e-hastii me.n thii zarrii.n varaq terii hayaat
thii saraapaa diin o duniyaa kaa sabaq terii hayaat
umr bhar terii mohabbat merii KHidmat-gar rahii
mai.n tirii KHidmat ke qaabil jab hu.aa tuu chal basii
vo javaa.n-qaamat me.n hai jo suurat-e-sarv-e-buland
terii KHidmat se hu.aa jo mujh se ba.Dh kar bahra-mand
kaarobaar-e-zindagaanii me.n vo ham-pahluu miraa
vo mohabbat me.n tirii tasviir vo baazuu miraa
tujh ko misl-e-tiflak-e-be-dast-o-paa rotaa hai vo
sabr se naa-aashnaa sub.h o masaa rotaa hai vo
tuKHm jis kaa tuu hamaarii kisht-e-jaa.n me.n bo ga.ii
shirkat-e-Gam se vo ulfat aur mohkam ho ga.ii
aah ye duniyaa ye maatam-KHaana-e-barnaa-o-piir
aadmii hai kis tilism-e-dosh-o-fardaa me.n asiir
kitnii mushkil zindagii hai kis qadar aasaa.n hai maut
gulshan-e-hastii me.n maanind-e-nasiim arzaa.n hai maut
zalzale hai.n bijliyaa.n hai.n qaht hai.n aalaam hai.n
kaisii kaisii duKHtaraan-e-maadar-e-ayyaam hai.n
kalba-e-iflaas me.n daulat ke kaashaane me.n maut
dasht o dar me.n shahr me.n gulshan me.n viiraane me.n maut
maut hai ha.ngaama-aaraa qulzum-e-KHaamosh me.n
Duub jaate hai.n safiine mauj kii aaGosh me.n
ne majaal-e-shikva hai ne taaqat-e-guftaar hai
zindagaanii kyaa hai ik tauq-e-guluu-afshaar hai
qaafile me.n Gair fariyaad-e-diraa kuchh bhii nahii.n
ik mataa-e-diida-e-tar ke sivaa kuchh bhii nahii.n
KHatm ho jaa.egaa lekin imtihaa.n kaa daur bhii
hai.n pas-e-noh parda-e-garduu.n abhii daur aur bhii
siina chaak is gulsitaa.n me.n laala-o-gul hai.n to kyaa
naala o fariyaad par majbuur bulbul hai.n to kyaa
jhaa.Diyaa.n jin ke qafas me.n qaid hai aah-e-KHizaa.n
sabz kar degii unhe.n baad-e-bahaar-e-jaavedaa.n
KHufta-KHaak-e-pai sipar me.n hai sharaar apnaa to kyaa
aarzii mahmil hai ye musht-e-Gubaar apnaa to kyaa
zindagii kii aag kaa anjaam KHaakistar nahii.n
TuuTnaa jis kaa muqaddar ho ye vo gauhar nahii.n
zindagii mahbuub aisii diida-e-qudrat me.n hai
zauq-e-hifz-e-zindagii har chiiz kii fitrat me.n hai
maut ke haatho.n se miT saktaa agar naqsh-e-hayaat
aam yuu.n us ko na kar detaa nizaam-e-kaa.enaat
hai agar arzaa.n to ye samjho ajal kuchh bhii nahii.n
jis tarah sone se jiine me.n KHalal kuchh bhii nahii.n
aah Gaafil maut kaa raaz-e-nihaa.n kuchh aur hai
naqsh kii naa-paa.edaarii se ayaa.n kuchh aur hai
jannat-e-nazaara hai naqsh-e-havaa baalaa-e-aab
mauj-e-muztar to.D kar ta.amiir kartii hai habaab
mauj ke daaman me.n phir us ko chhupaa detii hai ye
kitnii bedardii se naqsh apnaa miTaa detii hai ye
phir na kar saktii habaab apnaa agar paidaa havaa
to.Dne me.n us ke yuu.n hotii na be-parvaa havaa
is ravish kaa kyaa asar hai haiyat-e-taamiir par
ye to hujjat hai havaa kii quvvat-e-taamiir par
fitrat-e-hastii shahiid-e-aarzuu rahtii na ho
KHuub-tar paikar kii us ko justujuu rahtii na ho
aah siimaab-e-pareshaa.n anjum-e-garduu.n-faroz
shoKH ye chi.ngaariyaa.n mamnuun-e-shab hai jin kaa soz
aql jis se sar-ba-zaanuu hai vo muddat in kii hai
sarguzisht-e-nau-e-insaa.n ek saa.at un kii hai
phir ye insaa.n aa.n suu-e-aflaak hai jis kii nazar
qudsiyo.n se bhii maqaasid me.n hai jo paakiiza-tar
jo misaal-e-sham.a raushan mahfil-e-qudrat me.n hai
aasmaa.n ik nuqta jis kii vus.at-e-fitrat me.n hai
jis kii naadaanii sadaaqat ke liye betaab hai
jis kaa naaKHun saaz-e-hastii ke liye mizraab hai
sho.ala ye kam-tar hai garduu.n ke sharaaro.n se bhii kyaa
kam-bahaa hai aaftaab apnaa sitaaro.n se bhii kyaa
tuKHm-e-gul kii aa.nkh zer-e-KHaak bhii be-KHvaab hai
kis qadar nashv-o-numaa ke vaaste betaab hai
zindagii kaa sho.ala is daane me.n jo mastuur hai
KHud-numaa.ii KHud-fazaa.ii ke liye majbuur hai
sardi-e-marqad se bhii afsurda ho saktaa nahii.n
KHaak me.n dab kar bhii apnaa soz kho saktaa nahii.n
phuul ban kar apnii turbat se nikal aataa hai ye
maut se goyaa qabaa-e-zindagii paataa hai ye
hai lahad is quvvat-e-aashufta kii shiiraaza-band
Daaltii hai gardan-e-garduu.n me.n jo apnii kamand
maut tajdiid-e-mazaaq-e-zindagii kaa naam hai
KHvaab ke parde me.n bedaarii kaa ik paiGaam hai
KHuugar-e-parvaaz ko parvaaz me.n Dar kuchh nahii.n
maut is gulshan me.n juz sanjiidan-e-par kuchh nahii.n
kahte hai.n ahl-e-jahaa.n dard-e-ajal hai laa-davaa
zaKHm-e-furqat vaqt ke marham se paataa hai shifaa
dil magar Gam marne vaalo.n kaa jahaa.n aabaad hai
halqa-e-zanjiir-e-sub.h-o-shaam se aazaad hai
vaqt ke afsuu.n se thamtaa naala-e-maatam nahii.n
vaqt zaKHm-e-teG-e-furqat kaa ko.ii marham nahii.n
sar pe aa jaatii hai jab ko.ii musiibat naa-gahaa.n
ashk paiham diida-e-insaa.n se hote hai.n ravaa.n
rabt ho jaataa hai dil ko naala o fariyaad se
KHuun-e-dil bahtaa hai aa.nkho.n kii sarishk-aabaad se
aadmii taab-e-shakebaa.ii se go mahruum hai
us kii fitrat me.n ye ik ehsaas-e-naa-maaluum hai
jauhar-e-insaa.n adam se aashnaa hotaa nahii.n
aa.nkh se Gaa.eb to hotaa hai fanaa hotaa nahii.n
raKHt-e-hastii KHaak-e-Gam kii sho.ala-afshaanii se hai
sard ye aag is latiif ehsaas ke paanii se hai
aah ye zabt-e-fuGaa.n Gaflat kii KHaamoshii nahii.n
aagahii hai ye dilaasaa.ii faraamoshii nahii.n
parda-e-mashriq se jis dam jalva-gar hotii hai sub.h
daaG shab kaa daaman-e-aafaaq se dhotii hai sub.h
laala-e-afsurda ko aatish-qabaa kartii hai ye
be-zabaa.n taa.ir ko sarmast-e-navaa kartii hai ye
siina-e-bulbul ke zindaa.n se sarod aazaad hai
saik.Do.n naGmo.n se baad-e-sub.h-dam-aabaad hai
KHuftagaan-e-laala-zaar o kohsaar o ruud baar
hote hai.n aaKHir uruus-e-zindagii se ham-kanaar
ye agar aa.iin-e-hastii hai ki ho har shaam sub.h
marqad-e-insaa.n kii shab kaa kyuu.n na ho anjaam sub.h
daam-e-siimiin-e-taKHayyul hai miraa aafaaq-giir
kar liyaa hai jis se terii yaad ko mai.n ne asiir
yaad se terii dil-e-dard aashnaa maamuur hai
jaise ka.abe me.n du.aa.o.n se fazaa maamuur hai
vo faraa.ez kaa tasalsul naam hai jis kaa hayaat
jalva-gaahe.n us kii hai.n laakho.n jahaan-e-be-sabaat
muKHtalif har manzil-e-hastii ko rasm-o-raah hai
aaKHirat bhii zindagii kii ek jaulaa.n-gaah hai
hai vahaa.n be-haasilii kisht-e-ajal ke vaaste
saazgaar aab-o-havaa tuKHm-e-amal ke vaaste
nuur-e-fitrat zulmat-e-paikar kaa zindaanii nahii.n
ta.ng aisaa halqa-e-afkaar-e-insaanii nahii.n
zindagaanii thii tirii mahtaab se taabinda-tar
KHuub-tar thaa sub.h ke taare se bhii teraa safar
misl-e-aivaan-e-sahar marqad farozaa.n ho tiraa
nuur se maamuur ye KHaakii shabistaa.n ho tiraa
aasmaa.n terii lahad par shabnam-afshaanii kare
sabza-e-nau-rasta is ghar kii nigahbaanii kare

Allama Iqbal
Nazm

kisan

dasht ke kaam-o-dahan ko din kii talKHii se faraaG
duur dariyaa ke kinaare dhu.ndle dhu.ndle se charaaG

Josh Malihabadi
Nazm

aadhi raat

1
siyaah pe.D hai.n ab aap apnii parchhaa.ii.n
zamii.n se taa-mah-o-anjum sukuut ke miinaar
jidhar nigaah kare.n ik athaah gum-shudgii
ik ek kar ke fasurda charaaGo.n kii palke.n
jhapak ga.ii.n jo khulii hai.n jhapakne vaalii hai.n
jhalak rahaa hai pa.Daa chaa.ndnii ke darpan me.n
rasiile kaif bhare manzaro.n kaa jaagtaa KHvaab
falak pe taaro.n ko pahlii jamaahiyaa.n aa.ii.n
2
tamoliyo.n kii dokaane.n kahii.n kahii.n hai.n khulii
kuchh uu.nghtii hu.ii ba.Dhtii hai.n shaah-raaho.n par
savaariyo.n ke ba.De ghu.ngruu.o.n kii jhankaare.n
kha.Daa hai os me.n chup-chaap har si.ngaar kaa pe.D
dulhan ho jaise hayaa kii sugandh se bojhal
ye mauj-e-nuur ye bharpuur ye khilii hu.ii raat
ki jaise khiltaa chalaa jaa.e ik safed ka.nval
sipaah-e-ruus hai ab kitnii duur berlin se
jagaa rahaa hai ko.ii aadhii raat kaa jaaduu
chhalak rahii hai KHum-e-Gaib se sharaab-e-vajuud
fazaa-e-niim-shabii nargis-e-KHumaar-aaluud
ka.nval kii chuTkiyo.n me.n band hai nadii kaa suhaag
3
ye ras kaa sej ye sukumaar ye sukomal gaat
nayan kamal kii jhapak kaam-ruup kaa jaaduu
ye rasmasaa.ii palak kii ghanii ghanii parchhaa.ii.n
falak pe bikhre hu.e chaa.nd aur sitaaro.n kii
chamaktii u.ngliyo.n se chhi.D ke saaz fitrat ke
taraane jaagne vaale hai.n tum bhii jaag uTho
4
shu.aa-e-mahr ne yuu.n un ko chuum chuum liyaa
nadii ke biich kumudnii ke phuul khil uTThe
na muflisii ho to kitnii hasiin hai duniyaa
ye jhaa.e.n jhaa.e.n sii rah rah ke ek jhii.ngur kii
hinaa kii Tattiyo.n me.n narm sarsaraahaT sii
fazaa ke siine me.n KHaamosh sansanaahaT sii
ye kaa.enaat ab ik nii.nd le chukii hogii
5
ye mahv-e-KHvaab hai.n ra.ngiin machhliyaa.n tah-e-aab
ki hauz-e-sehn me.n ab in kii chashmake.n bhii nahii.n
ye sar-niguu.n hai.n sar-e-shaaKH phuul gu.Dhal ke
ki jaise be-bujhe a.ngaare ThanDe pa.D jaa.e.n
ye chaa.ndnii hai ki umDaa hu.aa hai ras-saagar
ik aadmii hai ki itnaa dukhii hai duniyaa me.n
6
qariib chaa.nd ke ma.nDlaa rahii hai ik chi.Diyaa
bha.nvar me.n nuur ke karvaT se jaise naav chale
ki jaise siina-e-shaa.ir me.n ko.ii KHvaab pale
vo KHvaab saa.nche me.n jis ke na.ii hayaat Dhale
vo KHvaab jis se puraanaa nizaam-e-Gam badle
kahaa.n se aatii hai madmaaltii lataa kii lipaT
ki jaise saik.Do.n pariyaa.n gulaabiyaa.n chhi.Dkaa.e.n
ki jaise saik.Do.n ban-deviyo.n ne jhuule par
adaa-e-KHaas se ik saath baal khol diye
lage hai.n kaan sitaaro.n ke jis kii aahaT par
is inqalaab kii ko.ii KHabar nahii.n aatii
dil-e-nujuum dha.Dakte hai.n kaan bajte hai.n
7
ye saa.ns letii hu.ii kaa.enaat ye shab-e-maah
ye pur-sukuu.n ye pur-asraar ye udaas samaa.n
ye narm narm havaa.o.n ke niil-guu.n jho.nke
fazaa kii oT me.n mardo.n kii gungunaahaT hai
ye raat maut kii be-ra.ng muskuraahaT hai
dhu.aa.n dhu.aa.n se manaazir tamaam nam-diida
KHunuk dhundalke kii aa.nkhe.n bhii niim KHvaabiida
sitaare hai.n ki jahaa.n par hai aa.nsu.o.n kaa kafan
hayaat parda-e-shab me.n badaltii hai pahluu
kuchh aur jaag uThaa aadhii raat kaa jaaduu
zamaana kitnaa la.Daa.ii ko rah gayaa hogaa
mire KHayaal me.n ab ek baj rahaa hogaa
8
gulo.n ne chaadar-e-shabnam me.n mu.nh lapeT liyaa
labo.n pe so ga.ii kaliyo.n kii muskuraahaT bhii
zaraa bhii sumbul-e-turkii laTe.n nahii.n hiltii.n
sukuut-e-niim-shabii kii hade.n nahii.n miltii.n
ab inqalaab me.n shaayad ziyaada der nahii.n
guzar rahe hai.n ka.ii kaarvaa.n dhundalke me.n
sukuut-e-niim-shabii hai unhii.n ke paa.nv kii chaap
kuchh aur jaag uThaa aadhii raat kaa jaaduu
9
na.ii zamiin nayaa aasmaa.n na.ii duniyaa
na.e sitaare na.ii gardishe.n na.e din raat
zamii.n se taa-ba-falak intizaar kaa aalam
fazaa-e-zard me.n dhu.ndle Gubaar kaa aalam
hayaat maut-numaa intishaar kaa aalam
hai mauj-e-duud ki dhundlii fazaa kii nabze.n hai.n
tamaam KHastagii-o-maa.ndgii ye daur-e-hayaat
thake thake se ye taare thakii thakii sii ye raat
ye sard sard ye be-jaan phiikii phiikii chamak
nizaam-e-saaniya kii maut kaa pasiinaa hai
KHud apne aap me.n ye kaa.enaat Duub ga.ii
KHud apnii kokh se phir jagmagaa ke ubhregii
badal ke kechulii jis tarah naag lahraa.e
10
KHunuk fazaa.o.n me.n raqsaa.n hai.n chaa.nd kii kirne.n
ki aabgiino.n pe pa.Dtii hai narm narm phuvaar
ye mauj-e-Gaflat-e-ma.asuum ye KHumaar-e-badan
ye saa.ns nii.nd me.n Duubii ye aa.nkh madmaatii
ab aa.o mere kaleje se lag ke so jaa.o
ye palke.n band karo aur mujh me.n kho jaa.o

Firaq Gorakhpuri
Nazm

aaj ki duniya

duniyaa ko inqalaab kii yaad aa rahii hai aaj
taariiKH apne aap ko dohraa rahii hai aaj
vo sar uThaa.e mauj-e-fanaa aa rahii hai aaj
mauj-e-hayaat maut se Takraa rahii hai aaj
kaano.n me.n zalzalo.n kii dhamak aa rahii hai aaj
har chiiz kaa.enaat kii tharraa rahii hai aaj
jhapkaa rahii hai der se aa.nkhe.n havaa-e-dahr
kaun-o-makaa.n ko nii.nd sii kuchh aa rahii hai aaj
har lafz ke ma.aanii-o-matlab badal chuke
har baat aur baat hu.ii jaa rahii hai aaj
yaksar jahaan-e-husn bhii badlaa hu.aa saa hai
duniyaa-e-ishq aur nazar aa rahii hai aaj
har har shikast-e-saaz me.n hai lahn-e-sarmadii
yaa zindagii ke giit ajal gaa rahii hai aaj
ye daaman-e-ajal hai ki tahriik-e-Gaib hai
kyaa shai havaa-e-dahr ko sankaa rahii hai aaj
abnaa-e-dahr lete hai.n yuu.n saa.ns garm-o-tez
jiine me.n jaise der hu.ii jaa rahii hai aaj
aflaak kii jabii.n bhii shikan-dar-shikan sii hai
tyorii zamiin kii bhii cha.Dhii jaa rahii hai aaj
phir chhe.Dtii hai maut hayaat-e-fasurda ko
phir aatish-e-KHamosh ko uksaa rahii hai aaj
barham saa kuchh mizaaj-e-anaasir hai in dino.n
aur kuchh tabii.at apnii bhii ghabraa rahii hai aaj
ik mauj-e-duud siine me.n larzaa.n hai is tarah
naagin sii jaise shiishe me.n lahraa rahii hai aaj
biite jugo.n kii chhaa.nv hai imroz par 'firaaq'
har chiiz ik fasaana hu.ii jaa rahii hai aaj

Firaq Gorakhpuri
Nazm

sham ko raste par

mirii aa.nkho.n me.n magar chhaayaa hai baadal ban kar
ek diivaar kaa rauzan isii rauzan se nikal kar kirne.n
mirii aa.nkho.n se lipaTtii hai.n machal uThtii hai.n
aarzu.e.n dil-e-Gam-diida ke aasuuda nihaa.n-KHaane se
aur mai.n sochtaa huu.n nuur ke is parde me.n
kaun be-baak hai aur bholii sii mahbuuba kaun
soch ko rok hai diivaar kii vo kaise chale
kaise jaa pahu.nche kisii KHalvat-e-mahjuub ke maKHmuur sanam-KHaane me.n
vo sanam-KHaana jahaa.n baiThe hai.n do but KHaamosh
aur nigaaho.n se har ik baat kahe jaate hai.n
zehn ko un ke dhundalke ne banaayaa hai ik aisaa akkaas
jo faqat apne hii man-maane manaazir ko giraftaar kare
mai.n kha.Daa dekhtaa huu.n sochtaa huu.n jab dono.n
chho.D kar dil ke sanam-KHaane ko ghar jaa.e.nge
sehn me.n talKH haqiiqat ko kha.Daa paa.e.nge
ek sochegaa mirii jeb ye duniyaa ye samaaj
ek dekhegaa vahaa.n aur hii tayyaarii hai
mujh ko uljhan hai ye kyuu.n mai.n to nahii.n huu.n maujuud
raat kii KHalvat-e-mahjuub ke maKHmuur sanam-KHaane me.n
mirii aa.nkho.n ko nazar aataa hai rauzan kaa dhu.aa.n
aur dil kahtaa hai ye duud-e-dil-e-soKHta hai
ek ghanghor sukuu.n ek ka.Dii tanhaa.ii
meraa andoKHta hai
mujh ko kuchh fikr nahii.n aaj ye duniyaa miT jaa.e
mujh ko kuchh fikr nahii.n aaj ye be-kaar samaaj
apnii paabandii se dam ghuT ke fasaana ban jaa.e
mirii aa.nkho.n me.n to markuuz hai rauzan kaa samaa.n
apnii hastii ko tabaahii se bachaane ke liye
mai.n isii rauzan-e-be-ra.ng me.n ghus jaa.uu.ngaa
lekin aise to vahii but na kahii.n ban jaa.uu.n
jo nigaaho.n se har ik baat kahe jaataa hai
chho.D kar jis ko sanam-KHaane kii mahjuub fazaa
ghar ke bebaak alamnaak siyah-KHaane me.n
aarzuu.o.n pe sitam dekhnaa hai ghulnaa hai
mai.n to rauzan me.n nahii.n jaa.uu.ngaa duniyaa miT jaa.e
aur dam ghuT ke fasaana ban jaa.e
sa.ng-dil KHuun sukhaatii hu.ii be-kaar samaaj
mai.n to ik dhyaan kii karvaT le kar
ishq ke taa.ir-e-aavaara kaa bahruup bharuu.ngaa pal me.n
aur chalaa jaa.uu.ngaa us jangal me.n
jis me.n tuu chho.D ke ik qalb-e-fasurda ko akele chal dii
raasta mujh ko nazar aa.e na aa.e phir kyaa
an-ginat pe.Do.n ke miinaaro.n ko
mai.n to chhuutaa hii chalaa jaa.uu.ngaa
aur phir KHatm na hogii ye talaash
justujuu rauzan-e-diivaar kii marhuun nahii.n ho saktii
mai.n huu.n aazaad mujhe fikr nahii.n hai ko.ii
ek ghanghor sukuu.n ek ka.Dii tanhaa.ii
miraa andoKHta hai

Meeraji
Nazm

koi KHwab KHwab sa fasla

la-e-zard par
ko.ii hamd hai ki gila
kaho
mirii piilii aa.nkh me.n
bujhte KHuu.n kaa
alaav hai ki tilaa
kaho
mire dast-o-baazuu
me.n aaj bhii
ko.ii lams qaid hai
aur siine kii
be-vaqaarii
ke andaruu.n
ko.ii harf apnaa hii said hai
ki jise rasaa.ii
na mil sakii
ye mirii jhijhak kii
buriid hai ki sila
kaho
kabhii ek baat na kah sakuu.n
kabhii ab ki chiiKH
mujhe chaahiye vahii
duud duud saa
ek qurb ke darmiyaa.n
ko.ii KHvaab KHvaab saa
faasla
ko.ii aaj mujh se
vo baat puuchhe
ki jis ke ma.anii-e-duur
jaantaa huu.n mai.n ab
ki hazaar sho.alo.n
kii raakh par
kisii buu.nd aa.nsuu
ke sail me.n
ye ga.nvaa.e rishto.n
kaa sard phuul khilaa
kaho
lab-e-zard par
ko.ii hamd hai ki gila
kaho!

Rajinder Manchanda Bani
Nazm

waqt-e-murawwat

gulo.n ke rang me.n thii shaan-e-KHanda-e-yuusuf
kalii ke saaz me.n thaa lutf-e-naGma-e-daa.uud

Josh Malihabadi
Nazm

zindagi ke darwaze par

paa-barhana-o-saraasima saa ik jamm-e-Gafiir
apne haatho.n me.n liye mash.al-e-be-sho.ala-o-duud

Akhtarul Iman
Nazm

faisla

ek ahraam na chun luu.n sifat-e-duud-e-hariir
ko.ii aa.e to bas ik gumbad-e-dar-bastaa mile
raaz-e-sar-basta mile
laakh sar pho.De sadaa ko.ii na mujh tak pahu.nche
qaasid-e-mauj-e-havaa ko.ii na mujh tak pahu.nche
ab ke diivaar me.n darvaaza rakkhuu.n yaa na rakhuu.n
saare andeshe magar ek taraf
ek taraf terii ummiid
jaane kis vaqt idhar terii savaarii aa jaa.e
ajnabii laakh ko.ii merii fasiile.n Dhaa jaa.e
mujh ko diivaar me.n darvaaza lagaanaa hogaa

Khursheed Rizvi
Nazm

izhaar

dabii hu.ii hai mire labo.n me.n kahii.n pe vo aah bhii jo ab tak
na sho.ala ban ke bha.Dak sakii hai na ashk-e-be-suud ban ke niklii
ghuTii hu.ii hai nafas kii had me.n jalaa diyaa jo jalaa sakii hai
na sham.a ban kar pighal sakii hai na aaj tak duud ban ke niklii
diyaa hai be-shak mirii nazar ko vo ek partav jo dard baKHshe
na mujh pe Gaalib hii aa sakii hai na meraa masjuud ban ke niklii

Akhtarul Iman
Nazm

sati

ai satii ai jalva-gaah-e-shola-e-tanviir-e-husn
paak-daamaanii kaa naqsha hai tirii tasviir-e-husn
ye tan-e-naazuk tiraa ye shola-haa-e-aatshii.n
ye chitaa kii aatish-e-sozaa.n ye jism-e-naaznii.n
saa.iqa hai barq kaa tere dil-e-muztar kii aag
phuu.nk detii hai tujhe soz-e-Gam-e-shauhar kii aag
KHaak ho kar bhii tire daaG-e-jigar bujhte nahii.n
aah terii raakh ke barso.n sharar bujhte nahii.n
hind ko hai naaz terii himmat-e-mardaana par
tuu charaaG-e-kushta hai KHaakistar-e-parvaana par
aag me.n hai tuu sapind-e-shauq jalne ke liye
sham-e-maatam hai shab-e-Gam me.n pighalne ke liye
garmi-e-ha.ngaama-e-mahshar tirii mahfil me.n hai
sard jo hotii nahii.n vo aag tere dil me.n hai
kab gavaaraa aah hai soz-e-Gam-e-shauhar tujhe
hai har ik taar-e-nafas ik shola-e-muztar tujhe
uf rii shauhar kii chitaa par shola-afrozii tirii
jiite-jii soz-e-mohabbat me.n jigar-sozii tirii
jaa.n-gudaazii kii adaa ye sham-e-mahfil me.n kahaa.n
garmi-e-soz-e-vafaa ye sham-e-mahfil me.n kahaa.n
vo chitaa kii aatish-e-jaa.n-soz vo duud-e-siyaah
shauhar-e-murda kaa sar vo zaanuu-e-naazuk pe aah
aag ke vo haa.e shole aur vo mukh.Daa chaa.nd saa
lab pe kam kam shoKHi-e-barq-e-tabassum kii adaa
halkaa phulkaa jism-e-naazuk par dupaTTa surKH surKH
vasl-e-ruuhaanii kii shaadii se vo chehra surKH surKH
aalam-e-duud-e-siyah vo zulf-e-ambar-faam me.n
dau.Dne vaale vo shole halqa-haa-e-daam me.n
aatish-e-sozaa.n me.n bhii vo aah shauhar kaa KHayaal
aur vo dil me.n garmi-e-ha.ngaama-e-shauq-e-visaal
jal ke soz-e-iztiraab-e-shauq me.n parvaana-vaar
KHuld me.n shauhar se honaa uf vo KHush KHush ham-kanaar
Daal denaa vo gale me.n ha.ns ke baa.nhe.n pyaar se
dil lubhaa lenaa adaa-e-sheva-e-guftaar se
halkii halkii chaandnii kaifiyat-e-gul-gasht-e-baaG
vo lab-e-juu aah husn o ishq ke do shab charaaG
tujh pe ai naaz-aafrii.n shauhar-parastii KHatm hai
ik sharaar-e-aarzuu me.n terii hastii KHatm hai

Suroor Jahanabadi
Nazm

qatra-e-shabnam

aah ai shabnam ke qatre terii haalat dekh kar
paanii ho ho kar bahe jaate hai.n mere dil jigar
umr kam ko saath ai naadaan kyo.n laayaa hai tuu
ek shab ke vaaste duniyaa me.n kyaa aaya hai tuu
haa.e mil jaa.e.nge sab armaan tere KHaak me.n
sub.h ab nazdiik hai suuraj hai terii taak me.n
be-sabaatii aur phir aisii hazaar afsos hai
zindagii-e-muKHtasar par laakh baar afsos hai
dekh kar tujh ko nikal aa.e ye aa.nsuu kis liye
chal gayaa dil par hamaare teraa jaaduu kis liye
aab-daarii me.n hai ba.Dh-cha.Dh kar dur-e-Galtaa.n se tuu
kyaa mushaabah hai kisii ke gauhar-e-dandaa.n se tuu
yaa pasiina hai kisii maashuuq ke ruKHsaar kaa
yaa ko.ii qatra hai duud-e-aah-e-aatish-baar kaa
tujh me.n ye dil-bastagii aa.ii kahaa.n se kyaa hai tuu
baaG me.n jaa kar jo dekho husn kaa dariyaa hai tuu
god me.n lete hai.n tujh ko jaan tuu phuulo.n kii hai
tere dam se tere baa.is aabruu phuulo.n kii hai
zard pattaa ho gayaa thaa ruu-e-pur-anvaar-e-gul
sharm rakh lii tuu ne ban kar Gaaza-e-ruKHsaar-e-gul
laila-e-shab baaG me.n aatii hai din ko Taal kar
motiyo.n kaa tere haar apne gale me.n Daal kar
phuul patte sabza-e-KHvaabiida kii tuu jaan hai
aab-daarii tujh pe sadqe taazgii qurbaan hai
paltii hai har ik kalii terii baGal me.n raat bhar
rahtii bastii hai tire motii-mahal me.n raat bhar
al-Garaz baaliidgii paudo.n kii teraa kaam hai
chashma-e-aab-e-KHizar terii tarii kaa naam hai
saarii raunaq gulshan-e-aalam kii tere dam se hai
taazgii-e-sabza-o-gul qatra-e-shabnam se hai

Hamid Hasan Qadri
Nazm

ruswai

Tiikaa lagaa.uu.n maa.ng bhii sandal se bhar chukuu.n
dulhan banuu.n to chaahiye jo.Daa suhaag kaa
meh.ndii rachegii poro.n kahii.n jaa ke dair me.n
ka.nghii karuu.n to cha.Dhtii hai kaalo.n kii aur lahr
afshaa.n hai baKHt bhii ki rahaa un ke pher me.n
kahtii hai saa.njh bhor ke ab ghaaT utar chukuu.n
tum baiTho mai.n to aa.ii pe jii se guzar chukuu.n
itne dino.n to dil kii lagii ne KHudaa.ii kii
paa.el baje to bansii kii dhun naach naach uThe
bad-naamiyaa.n karishme mire devtaa ke hai.n
diide ghumaa ghumaa ke kahii.n kyuu.n na gopiyaa.n
un ke chalan to big.De hu.e ibtidaa ke hai.n
biptaa na hogii kal se lagaa.ii bujhaa.ii kii
dahke shafaq tuu dahke chitaa jag ha.nsaa.ii kii
2
chiiKHe.n sun sun ke sabhii nii.nd ke maate jaage
saamne dahkii hu.ii aag kaa paikar dekhaa
chal ke do-chaar qadam phir se palaT kar jaulaa.n
chiiKHe.n sho.alo.n ke dahakne pe lapak uThtii thii.n
duud ke halqe ravaa.n ho.e falak charKH zanaa.n
sab ye samjhe ki ko.ii Guul-e-bayaabaanii hai
yuu.nhii luukaa jo lagaane ko nikal aayaa yahaa.n
baad-paa aag thii yaa laal rasiilii saa.Dii
chhaayaa kaalo.n kii thii sho.alo.n kii zabaano.n kaa dhu.aa.n
yak-ba-yak kundanii baahe.n bhii uThii.n chiiKH ke saath
kaa.npte aa.e nazar phuul se meh.ndii bhare haath
ek ne ba.Dh ke vahii.n aag pe Daalaa paanii
aag yuu.n paanii kii shah paa.e to dozaKH na bane
jiite-jii ashko.n se kyaa dil kii lagii bujhtii thii
aag paanii me.n la.Daa.ii jo chitaa par bhii Thane
KHaak Daalii to hu.ii.n phir kahii.n maddham aa.nche.n
baKHt rusvaa ho to rusvaa.ii binaa kaise mane
puuchho jalne kii to jaane vahii jis tan laage
chiiKHe.n sun sun ke

Mukhtar Siddiqui
Nazm

bimar laDka

hukm-e-maadar ko mai.n tabdiil karuu.n
maa.n kii nafrat bharii aa.nkho.n se kahii.n duur chalaa jaa.uu.n mai.n
be-niyaazii se phiruu.n
paap ke kaa.nTe chun kar
ruuh naapaak karuu.n
giit shahvat ke havas ke sun kar
zehn be-baak karuu.n
aise jiivan kii hai hasrat ab tak
pyaar... sab kahte hai.n vo pyaar mujhe kartii hai
pyaar kii raakh tale soyaa pa.Daa huu.n kab se
jhuuT kahte hai.n mai.n bezaar hu.aa huu.n sab se
phir lapak uTThegaa vo sho.ala, pur-ummiid huu.n mai.n
pyaar kii raakh tale dab ke hai jo duud hu.aa

Zahid Dar
Nazm

karwan-e-hayat

siyaahii jaise samundar kii thaah me.n pinhaa.n
siyaahii jaise KHam-e-duud-e-aah me.n pinhaa.n
siyaahii jaise ghaTaa-Top raat se zaahir
siyaahii jaise munaafiq kii baat se zaahir

Amjad Najmi
Nazm

sukut-e-shab

fazaa-e-ziist pe chhaa.ii hai kaisii KHaamoshii
na ko.ii shor na shevan na girya-o-zaarii
na ko.ii shikva-ba-lab hai na ko.ii fariyaadii
na ko.ii dard kaa qissa na ko.ii zikr-e-alam
na siskiyo.n kaa ko.ii irti.aash zholiida
na duud-e-aah-o-fuGaa.n kii ko.ii giraa.nbaarii
na ko.ii harf-e-alam hai na isti.aara-e-Gam
na ko.ii qatra-e-KHuu.n hai siyaahii-e-qirtaas
sitam-kasho.n pe hai taarii ajiib aalam-e-yaas
nahii.n hai.n aish ke naGme to Gam ke giit sahii
kisii ke halqa-e-zanjiir hii ke saaz baje.n
kisii kaa zaKHm-e-jigar hii chaTak ke de aavaaz
kahii.n se dil ke dha.Dakne hii kii sadaa aa.e
rafiiqo kuchh to karo arz-e-haal kaa saamaa.n
kisii tarah to ko.ii dil-figaar le phuuTe
kisii tarah to fusuun-e-sukuut-e-shab TuuTe

Azhar Qadiri
Nazm

kenchuli badalti raat

chaaro.n or me.n
resham narm hu.aa kaa ja.ngal
duud gulaabii hariyal maKHmal
hauz kinaaraa
siimii.n paanii
jhal jhal kartaa jism
us par
ek siyaah tilism

Anwar Fitrat
Nazm

dhund ka safar

duur tak dhu.ndlake se pur hai fazaa vaadii kii
shai har ik duud ne aaGosh me.n le rakkhii hai
rahguzar golf kaa maidaan sabza-zaar-o-daraKHt
sabt tasviir kii maanind hu.e hai.n saare
shahr kii ko.ii imaarat nazar nahii.n aatii
ko.ii gul ko.ii haraarat nazar nahii.n aatii
KHaamushii sabt hai behosh sii be-hoshii hai
KHvaab KHvaabiida hai mad.hosh sii mad.hoshii hai
ko.ii haijaan nahii.n dukh nahii.n raahat bhii nahii.n
duur tak ko.ii nahii.n kuchh bhii nahii.n kuchh bhii nahii.n
ek jaanib ki jidhar dhund aur ziyaada hai
vo kisii saa.e ke maanind chalaa jaataa hai

Akhilesh Chandra Pandey
Nazm

bimar guDiya

ki shaayad KHizaa.n chhuu ga.ii use
aaj KHaamosh hai
chal ke dekhe.n kahii.n
aaj phir zer-e-dil
ek ma.asuum KHvaahish kii shiddat
phir kisii adh-jale KHvaab kii justujuu to nahii.n
titliyaa.n sabz-o-niilii
sar-phire raqs-o-buu ke jahaa.n se
kitnii maanuus-o-sarshaar hai.n
aur mai.n apne achchhe KHudaa se
kitnii bezaar huu.n
thak ga.ii huu.n
chaa.nd taaro.n ko chhuune kii KHvaahish
choTiyo.n tak pahu.nchne kii KHvaahish
ek be-naGma be-saaz vus.at
dil dha.Dakne se bhii hichkichaa.e
suurat-e-duud saa ye gurezaa.n
niilii taariikiyo.n se shagufta
qahqahe maartii mai.n jo niklii
mere KHvaabo.n ke bedaar chehre
saare saahil pe nauha-KHvaa.n hai.n

Ain Rashid
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now