Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "gaal"

Nazm MATCHES FOR "gaal"

Nazm

kangan

kaash mai.n tere hasii.n haath kaa ka.ngan hotaa
tuu ba.De pyaar se chaav se ba.De maan ke saath
apnii naazuk sii kalaa.ii me.n cha.Dhaatii mujh ko
aur betaabii se furqat ke KHizaa.n lamho.n me.n
tuu kisii soch me.n Duubii jo ghumaatii mujh ko
mai.n tire haath kii KHushbuu se mahak saa jaataa
jab kabhii mood me.n aa kar mujhe chuumaa kartii
tere ho.nTo.n kii me.n hiddat se dahak saa jaataa
raat ko jab bhii tuu nii.ndo.n ke safar par jaatii
marmarii.n haath kaa ik takiya banaayaa kartii
mai.n tire kaan se lag kar ka.ii baate.n kartaa
terii zulfo.n ko tire gaal ko chuumaa kartaa
jab bhii tuu band-e-qabaa kholne lagtii jaanaa.n
apnii aa.nkho.n ko tire husn se KHiira kartaa
mujh ko betaab saa rakhtaa tirii chaahat kaa nasha
mai.n tirii ruuh ke gulshan me.n mahaktaa rahtaa
mai.n tire jism ke aa.ngan me.n khanaktaa hotaa
kuchh nahii.n to yahii be-naam saa bandhan hotaa
kaash mai.n tere hasii.n haath kaa ka.ngan hotaa

Wasi Shah
Nazm

chal aa ek aisi nazm kahun

bas ashk kahuu.n to ik aa.nsuu
tire gore gaal ko dho jaa.e

Amir Ameer
Nazm

sone se pahle ek KHayal

mujhe november kii dhuup kii tarah mat chaaho
ki is me.n Duubo to tamaazat me.n nahaa jaa.o
aur is se alag ho to
ThanDak ko por por me.n utartaa dekho
mujhe saavan ke baadal kii tarah chaaho
ki us kaa saaya bahut gahraa
nas nas me.n pyaas bujhaane vaalaa
magar us kaa vajuud pal me.n havaa
pal me.n paanii kaa Dher
mujhe shaam kii shafaq kii tarah mat chaaho
ki aasmaan ke qurmuzii ra.ngo.n kii tarah
mere gaal surKH
magar lamha-bhar ba.ad
hijr me.n nahaa kar, raat sii mailii mailii
mujhe chaltii havaa kii tarah mat chaaho
ki jis ke qayaam se dam ghuTtaa hai
aur jis kii tez-ravii qadam ukhe.D detii hai
mujhe Thahre paanii kii tarah mat chaaho
ki mai.n is me.n ka.nval ban ke nahii.n rah saktii huu.n
mujhe bas itnaa chaaho
ki mujh me.n chaahe jaane kii KHvaahish jaag uThe!

Kishwar Naheed
Nazm

rishwat

jab talak rishvat na le.n ham daal gal saktii nahii.n
naav tanKHvaaho.n ke paanii me.n to chal saktii nahii.n

Josh Malihabadi
Nazm

mujrim

haDDiyaa.n jism kii niklii hu.ii pichke hu.e gaal
maile sar me.n ju.e.n, a.azaa se Tapaktaa hu.aa ko.Dh
ruuh biimaar, badan sust, nigaahe.n paamaal
haath phailaa.e pa.De rahte hai.n rogii insaan

Shakeb Jalali
Nazm

zindagi

zindagii kahne ko be-maaya sahii
Gam kaa sarmaaya sahii
mai.n ne is ke liye kyaa kyaa na kiyaa
kabhii aasaanii se ik saa.ns bhii yamraaj ko apnaa na diyaa
aaj se pahle bahut pahle
isii aa.ngan me.n
dhuup-bhare daaman me.n
mai.n kha.Daa thaa mire talvo.n se dhu.aa.n uThtaa thaa
ek be-naam saa be-ra.ng saa KHauf
kachche ehsaas pe chhaayaa thaa ki jal jaa.uu.ngaa
mai.n pighal jaa.uu.ngaa
aur pighal kar miraa kamzor saa ''mai.n''
qatra qatra mire maathe se Tapak jaa.egaa
ro rahaa thaa magar ashko.n ke baGair
chiiKHtaa thaa magar aavaaz na thii
maut lahraatii thii sau shaklo.n me.n
mai.n ne har shakl ko ghabraa ke KHudaa maan liyaa
kaaT ke rakh diye sandal ke pur-asraar daraKHt
aur patthar se nikaalaa sho.ala
aur raushan kiyaa apne se ba.Daa ek alaav
jaanvar zab.h kiye itne ki KHuu.n kii lahre.n
paa.nv se uTh ke kamar tak aa.ii.n
aur kamar se mire sar tak aa.ii.n

Kaifi Azmi
Nazm

ai mere soch-nagar ki rani

tujh se jo mai.n ne pyaar kiyaa hai tere liye? nahii.n apne liye
vaqt kii be-unvaan kahaanii kab tak be-unvaan rahe
ai mire soch-nagar kii raanii ai mire KHuld-e-KHayaal kii huur
itne dino.n jo mai.n ghultaa rahaa huu.n tere binaa yuu.nhii duur hii duur
soch to kyaa phal mujh ko milaa mai.n man se gayaa phir tan se gayaa
shahr-e-vatan me.n ajnabii Thahraa aaKHir shahr-e-vatan se gayaa
ruuh kii pyaas bujhaanii thii par yahaa.n ho.nTo.n kii pyaas bhii bujh na sakii
bachte sambhalte bhii ek sulagtaa rog banii mire jii kii lagii
duur kii baat na soch abhii mire haat me.n tuu zaraa haat to de
tujh se jo mai.n ne pyaar kiyaa hai tere liye? nahii.n apne liye
baaG me.n hai ik bele kaa taKHta bhiinii hai is bele kii sugandh
ai kaliyo kyuu.n itne dino.n tum rakkhe rahii.n ise god me.n band
kitne hii ham se ruup ke rasiyaa aa.e yahaa.n aur chal bhii diye
tum ho ki itne husn ke hote ek na daaman thaam sake
sehn-e-chaman par bhau.nro.n ke baadal ek hii pal ko chhaa.e.nge
phir na vo jaa kar lauT sake.nge phir na vo jaa kar aa.e.nge
ai mire soch-nagar kii raanii vaqt kii baate.n rang aur buu
har ko.ii saath kisii kaa Dhuu.nDe gul ho.n ki bele mai.n huu.n ki tuu
jo kuchh kahnaa hai abhii kah le jo kuchh sun.naa hai sun le
tujh se jo mai.n ne pyaar kiyaa hai tere liye? nahii.n apne liye

Ibn۔e۔Insha
Nazm

apne ghar mein

saabun kii bhiinii KHushbuu se mahak gayaa daalaan
uf un bhiigii bhiigii aa.ankho.n me.n dil ke armaan
motiyo.n jaise daa.nto.n me.n vo gahrii surKH zabaan
dekh ke gaal pe naaKHun kaa maddham saa laal nishaan
ko.ii bhii hotaa merii jagah par ho jaataa hairaan

Muneer Niyazi
Nazm

holi

ghu.ngruu kii pa.Dii aan ke phir kaan me.n jhankaar
saara.ngii hu.ii biin tambuuro.n kii madad-gaar
tablo.n ke Thuke tabl ye saazo.n ke baje taar
raago.n ke kahii.n Gul kahii.n naacho.n ke ba.ndhe taar
Dholak kahii.n jhankaare hai mirda.ng zamii.n par
holii ne machaayaa hai ajab rang zamii.n par

Nazeer Akbarabadi
Nazm

aamadgi

lohe kii zanjiire.n gal kar
ab himmat hii chho.D chukii hai.n

Akhtarul Iman
Nazm

ab KHub hansega diwana

zor-aavarii se kamzoro.n kii
ab jeb kaTegii choro.n kii
aur manDii saahuu-kaaro.n kii
ab bhuukii ''huu-haq'' sair karegii
manDiyo.n aur baazaaro.n kii
gat dekh ke duniyaa-daaro.n kii
ab KHuub ha.nsegaa diivaana

Hafeez Jalandhari
Nazm

madrase ka ek hi kamra

master jii baahar ga.e hai.n
master jii ga.e zaraa baahar
ab nazar kyaa rahe kitaabo.n par
dil hii dil me.n hai.n saare la.Dke shaad
goyaa qaidii the ab hu.e aazaad
ab kitaabe.n kahaa.n sabaq kis kaa
pa.Dhnaa-va.Dhnaa KHayaal se khiskaa
ek ha.nstaa hai ek gaataa hai
aur ik chuTkiyaa.n bajaataa hai
ek baiThe hii baiThe sotaa hai
aur ik jhuuT-muuT rotaa hai
mashvare kar rahe hai.n do baaham
aa.o chupke se uTh ke chal de.n ham
ek goshe me.n goliyaa.n khele.n
yaa ground me.n chal ke Da.nD pele.n
copy ik jald jald bhartaa hai
duusraa us se naqal kartaa hai
ghar se laa.e nahii.n hai.n kar ke savaal
master jii se ab kare.nge chaal
ik ne baa.ndhaa hai gaal par ruumaal
taaki puuchhe.n na is se ko.ii savaal
daa.Dh ke dard kaa bahaanaa hai
chhuTTii lenii hai ghar ko jaanaa hai
saath baate.n bhii hotii jaatii hai.n
shoKH ghaate.n bhii hotii jaatii hai.n
ek kahtaa hai nazm yaad nahii.n
master saahab aa na jaa.e.n kahii.n
yuu.n hii TarKHaa.uu.ngaa sune.nge jab
aataa-vaataa mujhe nahii.n matlab
ma.anii mujh ko sujhaate jaanaa tum
chupke chupke bataate jaanaa tum
aur geograph chup are chup kar
miim alif siin maas Te re Tar

Hafeez Jalandhari
Nazm

nannhi pari

mere ghar aa.ii ek nannhii parii
chaa.ndnii ke hasiin rath pe savaar
mere ghar aa.ii ek nannhii parii

Sahir Ludhianvi
Nazm

farsi urdu sabaq

aa.o bachcho sabaq pa.Dhaa.e.n faarsii aur urdu
gaay ko bolo gaav hamesha hirnii ko aahuu
ghaas gayaah aur aab hai paanii aur nadii hai juu
munshii jii ne sabaq pa.Dhaayaa faarsii aur urdu
huu haa huu haa huu
huu huu huu huu huu huu
aa.o bachcho sabaq pa.Dhaa.e.n faarsii aur urdu
aa.nkh ko diida kaan ko gosh aur aa.nkh kii bhau.n abruu
KHaal hai til aur gaal hai aariz choTii hai gesuu
munshii jii ne sabaq pa.Dhaayaa faarsii aur urdu
huu haa huu haa huu
huu huu huu huu huu
aa.o bachcho sabaq pa.Dhaa.e.n faarsii aur urdu
bachcho piir ke ma.anii buu.Dhaa baalaa bachcha tifl
rang hai ruup aur Diil hai qaamat shaana hai baazuu
munshii jii ne sabaq pa.Dhaayaa faarsii aur urdu
huu haa huu haa huu
huu huu huu huu huu
aa.o bachcho sabaq pa.Dhaa.e.n faarsii aur urdu
shab kii urdu raat hai bachcho din kii faarsii roz
raah hai rasta jangal sahraa samt ke ma.anii suu
munshii jii ne sabaq pa.Dhaayaa faarsii aur urdu
huu haa huu haa huu
huu huu huu huu huu
aa.o bachcho sabaq pa.Dhaa.e.n faarsii aur urdu
tuu tuu mai.n mai.n chho.D ke bachcho yaad karo ye lafz
man ke ma.anii mai.n hote hai.n tuu ke ma.anii tuu
munshii jii ne sabaq pa.Dhaayaa faarsii aur urdu
huu haa huu haa huu
huu huu huu huu huu

Rais Amrohvi
Nazm

chikan-fried halal rakhna

bharii hu.ii rail me.n cha.Dho to tum apnii hurmat sambhaal rakhnaa
na.e zamaano.n kaa hai taqaazaa paraa.e ho.nTo.n pe gaal rakhnaa

Khalid Irfan
Nazm

duniya ko kahan tak jaana hai

duniyaa ko kahaa.n tak jaanaa hai
ye kitnaa ba.Daa afsaana hai
sab kaan lagaa.e baiThe hai.n
aur raat saraktii jaatii hai
ye raat kahaa.n tak jaanii hai
kuchh is kaa or-o-chhor nahii.n
ye raat samundar hai jis me.n
aavaaz bahut hai rone kii
bas duur tilak taariikii hai
kuchh duur zaraa sii raushaniyaa.n
phir taariikii phir raushaniyaa.n
ye raat balaa kii maayaa hai
jo kuchh kaa kuchh kar detii hai
aa.nkho.n ko jagaatii hai barso.n
phir nii.nd kaa dhakkaa detii hai
phir KHvaab dikhaatii hai barso.n
phir KHvaabo.n se chau.nkaatii hai
ye khel bhayaanak raato.n kaa
insaan kii nannhii zaato.n kaa
KHush honaa aur dahal jaanaa
phir aa.nsuu aa.nsuu gal jaanaa
is khel me.n jo bhii haar gayaa
phir muTThii se sansaar gayaa
is khel me.n pha.nsnaa hai pyaare
bas haath me.n jitnii miTTii hai
us miTTii se sansaar banaa
use apne aa.nsuu kaa paanii
use apne hijr kii garmii de
use mausam mausam narmii de
ise apne a.ng lagaa pyaare
use apne rang lagaa pyaare
duniyaa ko kahaa.n tak jaanaa hai
ye kitnaa ba.Daa afsaana hai
ye bhed na ko.ii jaan sakaa
is bhed kaa chakkar bhaarii hai

Farhat Ehsas
Nazm

naqsh-bar-ab

saal-haa-saal mohabbat jo banaa kartii hai
rishta-e-qalb-o-nazar palla-e-resham kii tarah
ek jho.nkaa bhii havaadis kaa use kaafii hai
pahlu-e-gul me.n dha.Daktii hu.ii shabnam kii tarah

Ada Jafarey
Nazm

main tumhaara hun

na jaane is december me.n
kise tum shaal pahnaa.o
aur apne sard haatho.n se
tum us ke gaal ko chhuu kar
tum us ke gaal ko chhuu kar
yaqii.n is kaa dilaa.oge
ki tum ho sirf merii
mai.n tumhaaraa huu.n

Almas Shabi
Nazm

guDDu

phuul saa naazuk bel saa komal
nanhaa munnaa guDDuu apnaa
duniyaa ke chehre kii raunaq
fitrat kii aa.nkho.n kaa sapnaa
suurat us kii bholii-bhaalii
gaal hai.n us ke gore gore
jism hai yaa phuulo.n kii Daalii
baal hai.n yaa resham kii Dore
us kii duniyaa pyaar kii duniyaa
us kii baate.n pyaar kii baate.n
bachpan ke hai.n samay suhaane
ha.nste din aur ha.nstii raate.n
kaash us kii shaffaaf jabii.n par
ra.nj-o-alam kii gard na chhaa.e
kaash ye duniyaa zaalim duniyaa
is par ko.ii zulm na Dhaa.e
mere bas kii baat agar ho
mai.n na javaa.n hone duu.n is ko
yuu.nhii KHushiyo.n ke jhuule me.n
ha.nstaa gaataa dekhuu.n is ko

Naresh Kumar Shad
Nazm

ajib hai ye zindagi

ajiib hai ye zindagii kabhii hai Gam kabhii KHushii
har ek shai hai be-yaqii.n har ek chiiz aarzii
ye kaarvaa.n ruke kahaa.n ki manzile.n hai.n be-nishaa.n
chhupe hu.e hai.n raaste yahaa.n vahaa.n dhu.aa.n dhu.aa.n
KHatar hai.n kitne raah me.n safar hai kitnaa ajnabii
ajiib hai ye zindagii
ye gaal zard zard se aTe hu.e hai.n gard se
sitam-rasiida dil yahaa.n ta.Dap rahe hai.n dard se
ye suurate.n ki jin pe hai sitam kii daastaa.n likhii
ajiib hai ye zindagii
hai.n behtarii ke vaaste to ye sitam qubuul hai.n
chune.nge phuul jaan kar jo raah me.n babuul hai.n
KHushii se Gam sahe.nge ham jo Gam ke baa'd hai KHushii
ajiib hai ye zindagii

Tanveer Naqvi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now