Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "hamsaa.e"

Nazm MATCHES FOR "hamsaa.e"

Nazm

zohd aur rindi

ik maulvii saahab kii sunaataa huu.n kahaanii
tezii nahii.n manzuur tabii.at kii dikhaanii
shohra thaa bahut aap kii suufii-manushii kaa
karte the adab un kaa a.aalii o adaanii
kahte the ki pinhaa.n hai tasavvuf me.n sharii.at
jis tarah ki alfaaz me.n muzmar ho.n ma.aanii
labrez mai-e-zohd se thii dil kii suraahii
thii tah me.n kahii.n durd-e-KHayaal-e-hama-daanii
karte the bayaa.n aap karaamaat kaa apnii
manzuur thii taadaad muriido.n kii ba.Dhaanii
muddat se rahaa karte the ham-saa.e me.n mere
thii rind se zaahid kii mulaaqaat puraanii
hazrat ne mire ek shanaasaa se ye puuchhaa
'iqbaal' ki hai qumri-e-shamshaad-e-ma.aanii
paabandi-e-ahkaam-e-sharii.at me.n hai kaisaa
go sher me.n hai rashk-e-kaliim-e-hamdaanii
suntaa huu.n ki kaafir nahii.n hinduu ko samajhtaa
hai aisaa aqiida asar-e-falsafa-daanii
hai us kii tabii.at me.n tashayyo bhii zaraa saa
tafziil-e-alii ham ne sunii us kii zabaanii
samjhaa hai ki hai raag ibaadaat me.n daaKHil
maqsuud hai maz.hab kii magar KHaak u.Daanii
kuchh aar use husn-faraamosho.n se nahii.n hai
aadat ye hamaare shoraa kii hai puraanii
gaanaa jo hai shab ko to sahar ko hai tilaavat
is ramz ke ab tak na khule ham pe ma.aanii
lekin ye sunaa apne muriido.n se hai mai.n ne
be-daaG hai maanind-e-sahar us kii javaanii
majmu.a-e-azdaad hai 'iqbaal' nahii.n hai
dil daftar-e-hikmat hai tabii.at KHafaqaanii
rindii se bhii aagaah sharii.at se bhii vaaqif
puuchho jo tasavvuf kii to mansuur kaa saanii
us shaKHs kii ham par to haqiiqat nahii.n khultii
hogaa ye kisii aur hii islaam kaa baanii
al-qissa bahut tuul diyaa vaaz ko apne
taa-der rahii aap kii ye naGz-bayaanii
is shahr me.n jo baat ho u.D jaatii hai sab me.n
mai.n ne bhii sunii apne ahibbaa kii zabaanii
ik din jo sar-e-raah mile hazrat-e-zaahid
phir chhi.D ga.ii baato.n me.n vahii baat puraanii
farmaayaa shikaayat vo mohabbat ke sabab thii
thaa farz miraa raah sharii.at kii dikhaanii
mai.n ne ye kahaa ko.ii gila mujh ko nahii.n hai
ye aap kaa haq thaa ze-rah-e-qurb-e-makaanii
KHam hai sar-e-tasliim miraa aap ke aage
piirii hai tavaazo ke sabab merii javaanii
gar aap ko maaluum nahii.n merii haqiiqat
paidaa nahii.n kuchh is se qusuur-e-hamaadaanii
mai.n KHud bhii nahii.n apnii haqiiqat kaa shanaasaa
gahraa hai mire bahr-e-KHayaalaat kaa paanii
mujh ko bhii tamannaa hai ki 'iqbaal' ko dekhuu.n
kii us kii judaa.ii me.n bahut ashk-fishaanii
'iqbaal' bhii 'iqbaal' se aagaah nahii.n hai
kuchh is me.n tamasKHur nahii.n vallaah nahii.n hai

Allama Iqbal
Nazm

kaun si uljhan ko suljhate hain ham?

lab bayaabaa.n, bose be-jaa.n
kaun sii uljhan ko suljhaate hai.n ham?
jism kii ye kaar-gaahe.n
jin kaa haizam aap ban jaate hai.n ham!
niim-shab aur shahr-e-KHvaab-aaluudaa, ham-saa.e
ki jaise duzd-e-shab-gardaa.n ko.ii!
shaam se the hasrato.n ke banda-e-be-daam ham
pii rahe the jaam par har jaam ham
ye samajh kar jur.a-e-pinhaa.n ko.ii
shaayad aaKHir ibtidaa-e-raaz kaa iimaa bane!
matlab aasaa.n harf be-ma.anii
tabassum ke hisaabii zaaviye
matn ke sab haashiye
jin se aish-KHaam ke naqsh-e-riyaa bante rahe!
aur aaKHir bu.ad jismo.n me.n sar-e-muu bhii na thaa
jab dilo.n ke darmiyaa.n haa.il the sa.ngii.n faasle
qurb-e-chashm-o-gosh se ham kaun sii uljhan ko suljhaate rahe!
kaun sii uljhan ko suljhaate hai.n ham?
shaam ko jab apnii Gam-gaaho.n se duzdaanaa nikal aate hai.n ham?
yaa zavaal-e-umr kaa dev-e-subuk-paa ruu-ba-ruu
yaa anaa ke dast o paa ko vus.ato.n kii aarzuu
kaun sii uljhan ko suljhaate hai.n ham?

Noon Meem Rashid
Nazm

ham-sae ke nam

kuchh tum ne kahaa
kuchh mai.n ne kahaa
aur ba.Dhte ba.Dhte baat ba.Dhii
dil uub gayaa
dil Duub gayaa
aur gahrii kaalii raat ba.Dhii

Javed Akhtar
Nazm

kale safed paron wala parinda aur meri ek sham

gurgal u.D kar vo pilkhan par jaa baiThii
piipal me.n tote ne bachche de rakhe hai.n
guldum jo pak.Dii thii kal be-chaarii mar ga.ii
'najma' ke bele me.n kitnii kaliyaa.n aa.e.n hai.n
phuulo.n kii KHushbuu se kyaa kyaa yaad aataa hai
ye jab kaa qissa hai sa.Dko.n par na.ii na.ii bijlii aa.ii thii
aur mujhe siine me.n dil hone kaa ehsaas hu.aa thaa
iid ke din ham ne laTThe kii shalvaare.n silvaa.ii thii.n
aur sivayyo.n kaa zarda ham-saa.e me.n bhejvaayaa thaa
sab niiche baiThak me.n baiThe the
mai.n uupar ke kamre me.n baiThaa
khi.Dkii se 'zainab' ke ghar me.n phuulo.n ke guchchhe phe.nk rahaa thaa
kal 'zainab' kaa ghar niilaam ho rahaa hai
sarkaarii tahviil me.n thaa ik muddat se

Akhtarul Iman
Nazm

aql baDi ya bhains

ek thaa raaja mehdii alii KHaa.n ek thii us kii raanii
raanii kii ik maa.n thii ya.anii bachcha log kii naanii
karnaa KHudaa kaa aisaa hu.aa ik roz ko.ii ham-saaya
raaja ke darbaar me.n ik chhoTii sii chuhiyaa laayaa
dekhaa jab us chuhiyaa ko hairaan hu.e darbaarii
piitii thii vo coca-cola khaatii thii tarkaarii
a.ngrezii me.n baate.n kar ke filmii gaane gaatii
rang bira.nge Dance dikhaa kar sab kaa jii bahlaatii
parde se ye manzar dekhaa jab raanii kii maa.n ne
sochaa ham-saa.e se le le chuhiyaa kisii bahaane
bu.Dhiyaa ne sar piiTaa apnaa KHuub kiyaa vaavailaa
o.Dh liyaa phir vo dopaTTa rang thaa jis kaa mailaa
kahne lagii chillaa chillaa kar raaja terii duhaa.ii
ye hai meraa chor ki is ne merii bhai.ns churaa.ii
chhiin lo is se bhai.nse.n merii aur mu.nh par maaro chaa.nTaa
dekho dekho suukh ke merii bhai.nse.n hu.ii hai kaa.nTaa
raaja meh.ndii alii KHaa.n jo the raajaa.o.n ke raaja
kaam na kuchh bhii karte aaTho.n-pahar bajaate baajaa
garaj ke bole o marduud bataa kyuu.n bhai.ns churaa.ii
ham ne to us bhai.ns ke aage barso.n biin bajaa.ii
raaja kii ye baat sunii to kahne lagaa ham-saayaa
jiye vo saas ki chuhiyaa ko bhii jis ne bhai.ns banaayaa
raaj hai teraa is nagrii me.n KHuub sazaa de mujh ko
aql ba.Dii yaa bhai.ns bas itnii baat bataa de mujh ko

Qateel Shifai
Nazm

chand ki fariyaad

chaa.nd ne mujh se kahaa ai shaa.er-e-fikr-e-azal
mere baare me.n bhii likh de ko.ii sanjiida Gazal
har ta'alluq to.D rakkhaa hai hilaal-e-iid se
tujh ko fursat hii nahii.n hai mah-vasho.n kii diid se
rasm-e-diidaar-e-hilaal-e-iid, afsaana hu.ii
baam par us dam cha.Dhe, jis vaqt farzaana hu.ii
le ke nazraana kametii ne ujaalaa hai mujhe
gar nahii.n niklaa, zabardastii nikaalaa hai mujhe
me.n jo be-marzii nikal aayaa to Daa.nTaa hai bahut
maulvii ne muKHtalif KHaano.n me.n baa.nTaa hai bahut
is ko mat follow karo, is kii tariiqat maa.nd hai
tum bareilly ke ho aur ye deobandi chaa.nd hai
ye jo KHuu.n-aaluud hai, afGaaniyo.n kaa chaa.nd hai
muKHtalif Tuk.Do.n me.n pakistaniyo.n kaa chaa.nd hai
ik karachi se hai niklaa ik pas-e-lahore hai
sindh kaa chaa.nd aur hai punjab kaa chaa.nd aur hai
vo jo ham-saa.e kii biivii hai Gazaalaa chaa.nd hai
aur us ke saath jo rahtaa hai kaalaa chaa.nd hai
shaa.ero.n ne apne shero.n me.n bahut pelaa mujhe
'miir' o 'Gaalib' ne bhii samjhaa KHaak kaa Dhelaa mujhe
sher me.n, rashk-e-qamar lailaa ko farmaane lage
tube-light ko hilaal-e-iid batlaane lage
apnii biivii se kahaa untiisvii.n kaa chaa.nd ho
aur pa.Dosan se kahaa tum chaudhvii.n kaa chaa.nd ho
aam sii aurat ko mah-paara banaa kar rakh diyaa
chaa.nd ko TuuTaa hu.aa taara banaa kar rakh diyaa
chaa.nd par jis din se insaa.n ke qadam pa.Dne lage
chaa.ndnii jin se ho aaise balb kam pa.Dne lage
mai.n zamii.n se duur huu.n lekin bahut nazdiik huu.n
ai zamii.n vaalo mai.n tum se duur rah kar Thiik huu.n
mai.n zamii.n par aa gayaa to har bashar le jaa.egaa
sab se pahle ten-parsenT apne ghar le jaa.egaa

Khalid Irfan
Nazm

siyasat

mukaddar hai fazaa-e-aalam-e-imkaa.n siyaasat se
bahut be-aabruu hai aaj-kal insaa.n siyaasat se
zamiir-o-zarf kii us ke yahaa.n qiimat nahii.n ko.ii
jahaa.n me.n dar-ba-dar hai.n saahab-e-iimaa.n siyaasat se
ye ehsaasaat-e-tahziib-o-tamaddun ko miTaatii hai
siyaasat aaj-kal kii kaise kaise gul khilaatii hai
nahii.n sheva siyaasat kaa mohabbat aur ravaadaarii
sikhaatii hai parastaaro.n ko apne ye riyaa-kaarii
na is kaa ko.ii maslak hai na is kaa ko.ii maz.hab hai
dil-e-hirs-o-havas me.n ban ke rahtii hai ye chingaarii
kisii kaa ghar giraatii hai kisii kaa ghar sajaatii hai
siyaasat aaj-kal kii kaise kaise gul khilaatii hai
la.Daatii hai yahii ik duusre ko zaat-o-mazhab par
isii kii shah pe qatl-e-aam hotaa hai yahaa.n aksar
ra.uunat ye sikhaatii hai munaafiq hukmaraano.n ko
isii ke batn se hote hai.n paidaa jabr-o-zulm-o-shar
ye apne muhsino.n kaa KHuun pii kar muskuraatii hai
siyaasat aaj-kal kii kaise kaise gul khilaatii hai
sadaa ye ittihaad-e-baahamii par vaar kartii hai
ta.assub ko havaa detii hai dil bezaar kartii hai
kahii.n ta.amiir kartii hai ibaadat-gaah fitno.n se
kahii.n KHud hii ibaadat-gaah ko mismaar kartii hai
fareb-o-makr se apne ye har-suu qahr Dhaatii hai
siyaasat aaj-kal kii kaise kaise gul khilaatii hai
isii ke dam se fasle.n lahlahaatii hai.n fasaado.n kii
yahii takmiil kartii hai hukuumat ke iraado.n kii
isii kii maslahat se buGz ke paude panapte hai.n
giraa detii hai ye diivaar baaham e'timaado.n kii
havaa de kar ye bad-unvaaniyo.n kii lau ba.Dhaatii hai
siyaasat aaj-kal kii kaise kaise gul khilaatii hai
ishaare par isii ke shahr qasbe gaa.nv jalte hai.n
isii kii aastii.n me.n saazisho.n ke naag palte hai.n
sitamgaaro.n pe kartii hai ye saaya apne aa.nchal kaa
isii kii aa.D me.n ashraar-o-qaatil bach nikalte hai.n
ye qaanuun-o-adaalat ko bhii ab aa.nkhe.n dikhaatii hai
siyaasat aaj-kal kii kaise kaise gul khilaatii hai
jasaarat ko yahii dahshat-garii kaa naam detii hai
ye ham-saa.e ko KHud hii jang kaa paiGaam detii hai
badaltii hai yahii taqdiir arbaab-e-qayaadat kii
ye apne vaariso.n ko sarKHushii kaa jaam detii hai
ye va.ado.n ke gharau.nde regzaaro.n me.n banaatii hai
siyaasat aaj-kal kii kaise kaise gul khilaatii hai

Rahbar Jaunpuri
Nazm

maine raat se pucha

mai.n ne raat se puuchaa
''mere ghar se chorii ho jaane vaalaa KHvaab
tumhaare paas to nahii.n
mere ham-saa.e ke bachcho.n kaa KHvaab
gharo.n me.n baiThii javaa.n la.Dkiyo.n ke KHvaab
shahr se hijrat kar jaane vaale saare KHvaab
tumhaare paas to nahii.n''?
raat merii aa.nkho.n me.n jhaa.nk kar bolii
''itne saare KHvaabo.n kaa chorii ho jaanaa
aur shor na machnaa
itne saare KHvaabo.n kaa qatl ho jaanaa
aur suraaG na chalnaa
itnii saarii laasho.n kaa dariyaa me.n bahaa diyaa jaanaa
aur paanii kaa rang na badalnaa
kaise mumkin hai
tumhaarii marzii ke baGair
tumhaarii shirkat ke baGair''
phir vo god me.n uThaayaa hu.aa chaa.nd
merii taraf ba.Dhaa kar bolii:
''is ke sar par haath rakho
aur qasam khaa.o
apnii be-gunaahii kii
apnii ma.asuumiyat kii''
aur mai.n us kaa mu.nh taktaa rah gayaa

Javed Shaheen
Nazm

mere gham-KHwar

kitne pyaare hamsaa.e hai.n
alag alag bhii shaiKH-o-barahman

Abul Fitrat Meer Zaidi
Nazm

kasrat-e-aulad

duusraa biimaar hai laa.uu.ngaa mai.n us kii davaa
Dhuu.nDhtaa huu.n tiisare ke daaKHle ko madrasa
jaa ke chauthe ne jo ham-saa.e se jhag.Daa kar liyaa
is ko nekii de KHudaa se kar rahaa huu.n ye du.aa
''ai Gam-e-dil kyaa karuu.n, ai vahshat-e-dil kyaa karuu.n''

Syed Mohammad Jafri
Nazm

chor

mere tan par bhuuk ugii thii
merii aa.nkhe.n na.ngii thii
aur mere aa.ngan me.n har-jaa
Gurbat bhuuk aur mahruumii ke
phuul uge the
mere kaa.nTe haatho.n ne
un phuulo.n ko to.Dnaa chaahaa
aur ham-saa.e ke ghar se
jis ke ghar me.n
sone chaa.ndii aur paiso.n kii
diivaare.n thii.n
apne ne kuchh KHushiyaa.n chun lii.n
chor chor chor chor
kuchh aavaaze.n
phir zanjiire.n
phir mere hii ghar kii maanind
badbuu-daar a.ndheraa kamra
jis ke baahar
mujh jaise be-chehra log
mere liye pahre pe kha.De the

Neelma Naheed Durrani
Nazm

siyasat

jab ham chhoTe chhoTe se the
ham-saa.e me.n ek ba.Dii bii rahtii thii
galii mahle ke sab bachche us ko maasii kahte the

Mansoora Ahmad
Nazm

hawwa ki beTi ka pahla dukh

raato.n ko
jab ham-saa.e ke ghar se
bachche ke rone kii aavaaze.n aatii hai.n
to mirii aa.nkhe.n bhiigne lagtii hai.n
aur mere andar
ik bhuukaa ehsaas bha.Dakne lagtaa hai
tab merii maryamiyat us ko bahlaatii hai
aur mere andar kii saara
in pyaasii aashaa.o.n ke liye
kahii.n saagar Dhuu.nDne jaatii hai
mujhe apnii maa.n yaad aatii hai

Ishrat Afreen
Nazm

kai-bhare gumbad ka nauha

kaash na hotaa to achchhaa thaa
aisaa bhii hotaa hai jag me.n
rab ke ham-saa.e kii aise
rab ke pujaarii jaa.n lete hai.n
din ba.Daa Gamgii.n saa thaa vo
suuraj bhii royaa thaa pahro.n
sadiyo.n kii vo raat ajab thii
jaise ruuhe.n chiiKH rahii huu.n
sub.h kii chanchal havaa jo aa.ii
jaane kis ko Dhuu.nD rahii thii
baulaa.ii baulaa.ii sii
phuul parinde sab gum-sum the
pe.Do.n ke patte tak saakit
faslo.n kii baalii.n bhii chup thii.n
saryuu kii aa.nkho.n ke aa.nsuu
jaane kyuu.n na thamte the
naarii baalak piir faqiir
giyaanii aur updeshak bhii
sab hairaa.n the sahme the sab
dubidhaa me.n thaa har ko.ii
kaise kis ko mu.nh dikhlaa.e
mard-e-muqaddas lauh-purush
tiir dhanush jab le kar lauTaa
TuuT chukaa ho KHud vo jaise
sharminda afsurda thaa
zaalim ko paraaje karne vaalaa
ismat-e-siitaa kaa rakhvaalaa
apnaa sab kuchh tyaagne vaalaa
raaj dharm kaa rakshak KHud hii
KHud apnii nagrii ke andar
bebas aur ranjiida thaa
kyuu.n ki KHud is ke apno.n ne
us kii hii nagrii me.n aa kar
us kaa hii dil to.D diyaa thaa
aaj bhii jab vo din aataa hai
suuraj chandaa din aur raat
phuul parinde khet kii fasle.n
baalak giyaanii piir faqiir
sab gum-sum ho jaate hai.n
suuraj saryuu siitaa mil kar
pahro.n niir bahaate hai.n
ki raaj-dharm ke rakshak kaa dil
phir se to.Daa jaataa hai

Abu Bakr Abbad
Nazm

do paDosi

pa.Dosii un ke hai.n mu.nh-zor bhaa.ii
idhar vo aur udhar saarii KHudaa.ii
KHudaa lagtii kabhii kahte nahii.n hai.n
vo ghul-mil kar kabhii rahte nahii.n hai.n
sabhii hamsaa.e un ke bolte hai.n
maraasim me.n vo talKHii gholte hai.n
hamesha piichhe vo paise ke bhaage
zabaa.n tezii me.n hai nashtar se aage
kaleje par chalaa kar tiir chho.De.n
sabhii ko kar ke vo dil-giir chho.De.n
zabaa.n kab vo shakar-aamez karte
vo is miiThe se bhii parhez karte
bachaa.e har shanaasaa apnaa daaman
ki hai bezaar viiraane se gulshan

Mateen Achalpuri
Nazm

bigDa TV

mire vo dost ab shaam-o-sahar Gamgiin rahte hai.n
uThaa kar sar pe T-V dard ke dariyaa me.n bahte hai.n
vo che-mii-go.iiyaa.n ik ek ham-saa.e kii sahte hai.n
ruKH-e-barham ke aage T-V rakh kar ab ye kahte hai.n
ki is T-V se to mahruumii-e-T.v hii behtar hai
takalluf bartaraf is se mirii biivii hii behtar hai

Asad Jafri
Nazm

nazm ki khiDki suni hai

nazm ko.ii doshiiza hogii
hamsaa.e ke ghar aa kar mehmaan banii hai
raat ke khaane kii daavat kaa soch rahaa huu.n

Muneer Jafri
Nazm

diye aankhon ki surat bujh chuke hain

vasl ke lamho.n kii gintii karne vaale haath hiddat se tahii hai.n
mauj me.n aa.e hu.e dariyaa me.n kashtii kaun Daale
maa.njhiyo.n ke giit lahro.n kii tarah saahil kii bhiigii ret par bikhre hu.e hai.n
ab kisii bu.Dhiyaa kii gaThrii ko.ii ahl-e-dil uThaa kar bastiyo.n kaa ruKH nahii.n kartaa
kisii ham-saa.e se ahvaal-e-dil ma.aluum karnaa kaar-e-be-ujrat hu.aa hai
nafsii nafsii kii havaa.e.n zaat ke taariik jangal me.n ba.Dii aasuudgii se chal rahii hai.n
KHaana-e-dil me.n vafaa.o.n ke diye aa.nkho.n kii suurat bujh chuke hai.n
bhii.D me.n rasta nahii.n miltaa charaaGo.n kii qataaro.n me.n charaaG-e-gul nahii.n miltaa ki jis par raushnii kaa gul khilaa ho
vasl ke lamho.n me.n ra.ng-e-nuur bharne vaalii aa.nkhe.n apnii narmii se tahii hai.n
vasl ke lamho.n me.n ra.ng-e-ishq bharne vaalii pore.n apnii garmii se tahii hai.n

Najeeb Ahmad
Nazm

dohri shahriyat

qissa dohrii shahriyat kaa
ek hijrat ne likkhaa hai
jism kii hijrat kahiye us ko
haatho.n aur pairo.n kii hijrat
naak kaan aur ho.nTo.n kii hijrat
meraa jism yahaa.n hai lekin
ruuh kaa Deraa aur kahii.n hai
mere puraane ham-saa.e sab
meraa chehra maa.ngte hai.n
aur na.e hai.n jitne bhii vo
jaan rahe hai.n mujh ko nayaa
aa.iine me.n mujh ko apnaa
dhundlaa KHaaka dikhtaa hai
apnii jeb me.n rakhtaa huu.n mai.n
dono.n KHato.n kii ik pahchaan
taaki bhuul na jaa.uu.n mai.n ye
apnii zaat aur naam-nishaan

Saeed Naqvi
Nazm

afsos

magar ham ne dekhaa
ki viiraan ghaaTii kaa daaman bharaa thaa
bahut saarii chiize.n
havaa.o.n ke paa.nv se uljhii hu.ii thii.n
du.aa.o.n kii
KHaalii aur au.ndhii pa.Dii shiishiyaa.n
aur TuuTii hu.ii panjgaana namaaze.n
navaafil-o-siyaam kii saKHt Dhaale.n
masaajid ke rasto.n me.n to.Dii ga.ii
juutiyo.n
aur qadm-dar-qadam
nekiyo.n kii qataare.n
vazaa.if-o-daruud-o-munaajaat ke
ik ribbon me.n ba.ndhe
KHudaavand-e-aalam kii rassii ke Tuk.De
aur aisii bahut saarii chiize.n
KHudaa kii KHudaa.ii me.n bikhrii hu.ii thii.n
ki jaise yahaa.n
raat Thahre hu.e kaarvaa.n ko
ab un kii zaruurat na thii
ki baKHshish kaa KHaalii kanastar
bahut bhar gayaa thaa
magar nek naamo.n kii phe.nkii hu.ii
bahut saarii chiizo.n ke
is Dher me.n
ko.ii hamsaa.e kaa dard
us par bahaayaa gayaa garm aa.nsuu nahii.n thaa
ko.ii bhuuk ko kaaTne vaalaa dildaar chaaquu nahii.n thaa
saKHaavat kaa KHaamosh haath
aur shaqaavat pe uThtaa hu.aa ko.ii baazuu nahii.n thaa
bahut saarii chiize.n thii.n
lekin kahii.n bhii taraazuu nahii.n thaa

Yameen
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now