Search result for "hifz-e-maqsad" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "hifz-e-maqsad"

Nazm MATCHES FOR "hifz-e-maqsad"

Nazm

main abhi nakaam sahi

duur se hii sahii manzil ye sadaa detii hai
dil me.n manzil kii tamanna ho to chalnaa hogaa
raah me.n dhuup baras jaa.e ki sho'le dahke.n
rahrav-e-manzil-e-maqsuud ko chalnaa hogaa

Ashhar Nadeemi

Nazm

lashkar-e-hind

uTTho is tarh ki maidaa.n me.n balii uThte hai.n
amn kaa le ke vo 'unvaan-e-jalii uThte hai.n
haq-parastii ke liye jaise valii uThte hai.n
hifz-e-dii.n ke liye farzand-e-'alii uThte hai.n

Gulzar Dehlvi

Nazm

kutub-KHana

aur ek din mirii saa.nso.n pe ko.ii chaa.nd ugaa
mai.n ne ik manzil-e-maqsad kaa nishaa.n paa hii liyaa
ek muddat se jo ojhal thaa nazar se merii
vahii ehsaas ujaalo.n me.n ravaa.n paa hii liyaa

Naseer Parwaz

Nazm

hum to shair hain hum sach nahin bolte

fasl aatii hai jab hifz-e-pindaar kii
sach ke iz.haar kii
ham haqaa.eq se nazre.n churaa.e hu.e
maslahat ke janaaze uThaa.e hu.e
sar jhukaa.e hu.e
lauT jaate hai.n maazii ke sahraa.o.n me.n
baiTh kar phir Gam-e-zaat kii chhaa.nv me.n
sochte bhii nahii.n bolte bhii nahii.n
sahme sahme hu.e log milte ho.n jab
har taraf zaKHm ke phuul khilte ho.n jab
jaan-e-jaa.n kam se kam aise mausam me.n ham
harf-e-haq to kujaa lab nahii.n kholte
ham to shaa.ir hai.n ham sach nahii.n bolte

Suroor Barabankvi

Nazm

abu-talib ke beTe

jabiin-e-vaqt par likkhii hu.ii sachchaa.iyaa.n raushan rahii hai.n
taa-abad raushan rahe.ngii
KHudaa shaahid hai aur vo zaat shaahid hai ki jo vaj.h-e-asaas-e-anafas-o-aafaaq hai
aur KHair kii taariiKH kaa vo baab-e-avval hai
abad tak jis kaa faizaan-e-karam jaarii rahegaa
yaqii.n ke aagahii ke raushnii ke qaafile har daur me.n aate rahe hai.n
taa-abad aate rahe.nge
abuu-taalib ke beTe hifz-e-naamuus-e-risaalat kii rivaayat ke amii.n the
jaan denaa jaante the
vo muslim ho.n ki vo abbaas ho.n aun o mohamaad ho.n alii-akbar ho.n qaasim ho.n alii-asGar ho.n
haq pahchaante the
lashkar-e-baatil ko kab gardaante the
abuu-taalib ke beTe sar-buriida ho ke bhii ailaan-e-haq karte rahe hai.n
abuu-taalib ke beTe paa-ba-jaulaa.n ho ke bhii ailaan-e-haq karte rahe hai.n
abuu-taalib ke beTe sarf-e-zindaa.n ho ke bhii ailaan-e-haq karte rahe hai.n
madiina ho najaf ho karbalaa ho kaazimain o saamira ho mash.had o baGdaad ho
aal-e-abuu-taalib ke qadmo.n ke nishaa.n
insaaniyat ko us kii manzil kaa pata dete rahe hai.n taa-abad dete rahe.nge
abuu-taalib ke beTo.n aur Gulmaan-e-alii-ibn-e-abii-taalib me.n ik nisbat rahii hai
mohabbat kii ye nisbat umar bhar qaa.em rahegii
taa-abad qaa.em rahegii

Iftikhar Arif

Nazm

ek shararat

janam se maut kaa vaqfa vujuud kaa partav
hazaaro.n KHvaab jagaa.e hu.e tasavvur me.n
'ajiib karb se labrez apnii zaat liye
bhaTak rahaa hai KHalaa me.n
azal se aise hii
baGair maa'nii-o-maqsad balaa kaa shor liye
nahiif paikar-e-hastii KHizaa.n-rasiida hai
mirii hayaat kaa maqsad agar chuniida hai
rahaa vo kis liye maKHfii
'ajab tamaashaa hai
husuul-e-ziist se kyo.n 'nuur' naa-shanaasaa hai
baqaa kii raah yahaa.n duur tak nadaarad hai
har ek lamha yahaa.n maut se 'ibaarat hai
mire vujuud kaa ehsaas kyaa sharaarat hai

Noor Dehlvi

Nazm

mera watan

aiman kaa nuur agar hai to mere vatan me.n hai
ab tak bhii shaan-e-tuur isii uj.De chaman me.n hai
dono.n hai.n terii yaad me.n aaluuda-e-Garaz
jo aib shaiKH me.n hai vahii barhaman me.n hai
lipTaa hu.aa hai daur-e-KHizaa.n bhii bahaar se
dono.n kaa rang laala-e-KHuunii.n-kafan me.n hai
kyuu.n dil me.n Dhuu.nDte ho shagufta-mizaajiyaa.n
pahlii sii ab bahaar kahaa.n is chaman me.n hai
zarre chamak rahe hai.n tirii rahguzaar ke
hai teraa naqsh-e-paa ki charaaG anjuman me.n hai
naakaam hasrato.n kii yahii to hai yaadgaar
daaGo.n kaa jo hujuum dil-e-pur-mehan me.n hai
ye bhii KHabar hai gauhar-e-maqsad nahii.n yahaa.n
dil teraa phir bhii Garq furaat-o-jaman me.n hai
azm-e-safar bahaar me.n ai 'arsh' kis liye
duniyaa kii har bahaar bahaar-e-vatan me.n hai

Arsh Malsiyani

Nazm

nazr-e-iqbaal

'aql tahriir-e-nigaah 'ishq dil kaa tarjumaa.n
'aql tafsiir-e-kitaab 'ishq maa'nii kaa bayaa.n
'aql paaband-e-zamaa.n 'ishq aazaad-e-makaa.n
ik hayaat-e-‘aarzii ik hayaat-e-jaavedaa.n
'aql kii vus'at hai tang 'ishq kii vus'at faraaKH
'aql dariyaa-e-furaat 'ishq bahr-e-be-karaa.n
'ishq gauhar tamkanat 'aql be-gauhar sadaf
ye hai faKHr-e-rozgaar vo hai rusvaa-e-zamaa.n
'aql kii bhii saltanat 'ishq kii bhii saltanat
us kii baa-teG-o-sinaa.n is kii be-teG-o-sinaa.n
dono.n hai.n garm-e-jihaad farq itnaa hai magar
ek ko jaa.n kaa KHayaal ek be-parvaa-e-jaa.n
'aql naa-farmaan-e-haq 'ishq KHaaliq kaa mutii’
ik to us se koso.n duur ek us kaa raaz-daa.n
'aql Garq-e-sail-e-nuuh 'ishq ko us se najaat
'aql maahii kaa shikaar 'ishq ko hifz-o-amaa.n
'aql yazdaa.n kaa KHaliil 'aql aazar kii Gulaam
ye hai me'maar-e-haram vo hai naqqaash-e-butaa.n
'aql hai fir'aun-e-misr 'ishq hai muusaa-e-tuur
ek maa'tuub-e-ilaah ek par haq mehrbaa.n
'aql baal-e-jibra.iil 'ishq parvaaz-e-rasuul
us kii manzil muntahaa is kii manzil laa-makaa.n
'aql sajda-rez-e-'ishq 'ishq sajda-gaah-e-'aql
'aql hai laat-o-manaat 'ishq haq kaa aastaa.n
'aql juuyaa-e-bahisht 'ishq juuyaa-e-KHudaa
ek ko yazdaa.n 'aziiz ek ko huur-e-jinaa.n
'ishq se 'irfaan-e-zaat 'aql se nafy-e-sifaat
'ishq sar-taa-paa yaqii.n 'aql sar-taa-sar gumaa.n

Maqsood Ahmad Maqsood

Nazm

KHarabaat

sunahrii shaam hai saaqii
shafaq gulfaam hai saaqii
ba.Dhaa saaGar ki mai-noshii
mubaarak kaam hai saaqii
hai.n KHaalii jis qadar pyaale
sharaab-e-surKH se bhar de
tujhe kyaa zarf-e-zarrii.n yaa
sifaalii jaam hai saaqii
ye KHum kyo.n kyo.n ye paimaana
luTaa de saaraa mai-KHaana
masarrat jis ko kahte hai.n
mataa’-e-‘aam hai saaqii
na hushyaarii na be-hoshii
ho kuchh mastii kuchh aagaahii
KHirad-mandaan-e-‘aalam kaa
yahii paiGaam hai saaqii
gale milte the jo baaham
hai.n KHanjar bar-guluu paiham
lab-e-e’jaaz bhii goyaa
lab-e-dushnaam hai saaqii
ba-har-jaa hirs ke phande
havasnaakii ke sab bande
giraftaar-e-KHam-e-kaakul
'abas badnaam hai saaqii
‘uqaab-e-charKH-paimaa ho
humaa ho yaa ki 'anqaa ho
riyaaz-e-rang-o-nik.hat me.n
asiir-e-daam hai saaqii
ruKH-o-gesuu kaa nazzaara
muraqqa' nuur-o-zulmat kaa
mukaddar sub.h yaa shaayad
munavvar shaam hai saaqii
shabaab o husn dilbar kaa
tamaashaa hai gha.Dii-bhar kaa
davaamii nashsha-e-ulfat
KHayaal-e-KHaam hai saaqii
yahii ik lamha-e-'ishrat
yahii ik 'aish kii saa'at
yahii aaGaaz hastii kaa
yahii anjaam hai saaqii
talaash-e-be-KHudii me.n ab
huu.n vaqf-e-baada roz-o-shab
isii ik kaam ke laa.iq
dil-e-naakaam hai saaqii
idhar hai kulfat-e-maazii
udhar ummiid fardaa kii
'ajab biim-o-rajaa hai kuchh
'ajab hangaam hai saaqii
bachaa aafat se har dil ko
nigaah-e-bad se mahfil ko
ki jo tiir-e-nazar hai yaa.n
vo KHuu.n-aashaam hai saaqii
kaliid-e-maKHzan-e-‘irfaa.n
naved-e-rauza-e-rizvaa.n
qadah kii sham' raushan rakh
shab-e-auhaam hai saaqii
kaliisaa ho ki mandir ho
dar-e-masjid ki mimbar ho
na ho gar justujuu-e-haq
Galat iqdaam hai saaqii
tire ratl-e-giraa.n kii hai
jo qiimat zindagii sii shai
to naqd-e-hosh-o-diin-o-dil
tiraa in'aam hai saaqii
jahaa.n tuu jalva-farmaa ho
jahaa.n tuu chehra-aaraa ho
dam-e-raahat se vaa.n KHush-tar
dil-e-aalaam hai saaqii
suruur-e-jaavedaanii tuu
faroG-e-zindagaanii tuu
bahaar-e-aarzuu tujh bin
baraa.e naam hai saaqii
niraa saa hai jahaa.n kab se
hai pyaasaa kaarvaa.n kab se
qariib-e-chashma-e-haivaa.n
ye tishna-kaam hai saaqii
hayaat-e-taaza kaa sadqa
pilaa de jur'a par jur'a
shaguufe nau-shagufta gul
saman-andaam hai saaqii
bayaabaa.n me.n hai.n barsaate.n
chaman me.n chaa.ndnii raate.n
zamii.n sahbaa-e-mausam se
ba-rang-e-jaam hai saaqii
KHushii ke chahchahe har-suu
ha.nsii aur qahqahe har-suu
dilo.n me.n kis liye aaKHir
Gam-e-ayyaam hai saaqii
nasheman shaaKH-e-tuubaa par
banaa sakte nahii.n taa.ir
ki baazuu par shikasta aur
falak-ras baam hai saaqii
'ataa ho 'azm hikmat ko
bulandii fikr-o-himmat ko
to raah-e-jaada-e-maqsad
faqat ik gaam hai saaqii

Fazlurrahman

Nazm

tifli ke KHwab

tiflii me.n aarzuu thii kisii dil me.n ham bhii ho.n
ik roz soz-o-saaz kii mahfil me.n ham bhii ho.n
dil ho asiir gesuu-e-ambar-sarisht me.n
uljhe inhii.n hasiin salaasil me.n ham bhii ho.n
chhe.Daa hai saaz hazrat-e-'saadii' ne jis jagah
us bostaa.n ke shoKH anaadil me.n ham bhii ho.n
gaa.e.n taraane dosh-e-surayyaa pe rakh ke sar
taaro.n se chhe.D ho mah-e-kaamil me.n ham bhii ho.n
aazaad ho ke kashmakash-e-ilm se kabhii
aashuftagaan-e-ishq kii manzil me.n ham bhii ho.n
diivaana-vaar ham bhii phire.n koh-o-dasht me.n
dil-daadgaan-e-shola-e-mahmil me.n ham bhii ho.n
dil ko ho shaahzaadii-e-maqsad kii dhun lagii
hairaa.n suraaG-e-jaada-e-manzil me.n ham bhii ho.n
sahraa ho, KHaar-zaar ho, vaadii ho, aag ho
ik din inhii.n muhiib manaazil me.n ham bhii huu.n
dariyaa-e-hashr-KHez kii maujo.n ko chiir kar
kashtii samet daaman-e-saahil me.n ham bhii ho.n
ik lashkar-e-aziim ho masruuf kaar-zaar
lashkar ke pesh pesh muqaabil me.n ham bhii ho.n
chamke hamaare haath me.n bhii teG-e-aabdaar
ha.ngaam-e-ja.ng narGa-e-baatil me.n ham bhii ho.n
qadmo.n pe jin ke taaj hai.n iqliim-e-dahr ke
un chand kushtagaan-e-Gam-e-dil me.n ham bhii ho.n

Asrarul Haq Majaz

Nazm

kyon na ho

aa.nkh vaalo husn-e-vahdat kaa tamaashaa kyo.n na ho
dil hai to raaz-e-haqiiqat kii tamanna kyo.n na ho
apnii manzil kii taraf garm-e-safar hai kaa.enaat
aadmii phir manzil-e-maqsad kaa joyaa kyo.n na ho
dil me.n har zarra ke pinhaa.n hai tamanna kaa sharaar
qalb-e-insaa.n haamil-e-soz-e-tamanna kyo.n na ho
ik na ik ummiid kii mash.al jalaanaa hai to phir
sham.a-e-iimaa.n hii kaa dil-afroz ujaalaa kyo.n na ho
ik na ik dar kii jabii.n-saa.ii pe qismat ziist kii
kar de sab se be-niyaaz ik aisaa sajda kyo.n na ho
jab guzarnaa hai sahaaro.n hii par apnii zindagii
jo na de saktaa ho dhokaa vo sahaaraa kyo.n na ho
tishnagii me.n chand qatro.n par qanaa.at kis liye
daaman-e-himmat hariif-e-josh-e-dariyaa kyo.n na ho
aarzii partav hai jis kaa Guncha-o-gul se ayaa.n
us bahaar-e-jaa.n-fazaa hii kii tamanna kyo.n na ho
muntazir jab ek fardaa ke hai.n sab imroz-o-dosh
zindagii ko ehtimaam-e-fikr-e-fardaa kyo.n na ho
aa.nkh ke jalvo.n ko jab haasil hai auj-e-e.atibaar
hosh vaalo e.atibaar-e-qalb-e-biinaa kyo.n na ho
naaKHudaa bhii jis pe rakhtaa hai nazar tuufaan me.n
naav vaalo ruKH usii kii samt apnaa kyo.n na ho
dil ke har zarra me.n hai ik aalam-e-nau jalva-gar
aa.nkh vaalo is jahaa.n kaa bhii tamaashaa kyo.n na ho
jaan hii Thahrii bahaa-e-naaz to ai dosto
chho.D kar zarro.n ko suuraj hii kaa saudaa kyo.n na ho
jab kisii an-dekhii taaqat par bharosa hai zaruur
dahr vaalo phir KHudaa hii kaa bharosa kyo.n na ho

Zafar Ahmad Siddiqi

Nazm

KHizr-e-rah

kyaa sunaataa hai mujhe turk-o-arab kii daastaa.n
mujh se kuchh pinhaa.n nahii.n islaamiyo.n kaa soz-o-saaz
le ga.e tasliis ke farzand miiraas-e-KHaliil
KHisht-e-buniyaad-e-kaliisaa ban ga.ii KHaak-e-hijaaz
ho ga.ii rusvaa zamaane me.n kulaah-e-laala-ra.ng
jo saraapaa naaz the hai.n aaj majbuur-e-niyaaz
le rahaa hai mai-faroshaan-e-fara.ngistaan se paars
vo mai-e-sarkash haraarat jis kii hai miinaa-gudaaz
hikmat-e-maGrib se millat kii ye kaifiyyat hu.ii
Tuk.De Tuk.De jis tarah sone ko kar detaa hai gaaz
ho gayaa maanind-e-aab arzaa.n musalmaa.n kaa lahuu
muztarib hai tuu ki teraa dil nahii.n daanaa-e-raaz
guft ruumii har banaa-e-kuhanaa ki-aabaadaa.n kunand
mii na-daanii avval aa.n buniyaad raa viiraa.n kunand
mulk haatho.n se gayaa millat kii aa.nkhe.n khul ga.ii.n
haq tiraa chashme 'ataa kar dast-e-Gaafil dar nigar
momyaa.ii kii gadaa.ii se to behtar hai shikast
mor-e-be-par haajate pesh-e-sulaimaane mabar
rabt-o-zabt-e-millat-e-baizaa hai mashriq kii najaat
asia vaale hai.n is nukte se ab tak be-KHabar
phir siyaasat chho.D kar daaKHil hisaar-e-dii.n me.n ho
mulk-o-daulat hai faqat hifz-e-haram kaa ik samar
ek huu.n muslim haram kii paasbaanii ke liye
niil ke saahil se le kar taa-ba-KHaak-e-kaashGar
jo karegaa imtiyaaz-e-ra.ng-o-KHuu.n miT jaa.egaa
turk-e-KHargaahii ho yaa aaraabii-e-vaalaa-guhar
nasl agar muslim kii maz.hab par muqaddam ho ga.ii
u.D gayaa duniyaa se tuu maanind-e-KHaak-e-raah-guzar
taa-KHilaafat kii binaa duniyaa me.n ho phir ustuvaar
laa kahii.n se Dhuu.nD kar aslaaf kaa qalb-o-jigar
ai ki na-shinaasii KHafii raa az jalii hushiyaar baash
ai giraftaar-e-abuu-bakr-o-alii hushiyaar-baash
'ishq ko fariyaad laazim thii so vo bhii ho chukii
ab zaraa dil thaam kar fariyaad kii taasiir dekh
tuu ne dekhaa satvat-e-raftaar-e-dariyaa kaa 'uruuj
mauj-e-muztar kis tarah bantii hai ab zanjiir dekh
'aam hurriyat kaa jo dekhaa thaa KHvaab islaam ne
ai musalmaa.n aaj tuu us KHvaab kii taa'biir dekh
apnii KHaakistar samundar ko hai saamaan-e-vajuud
mar ke phir hotaa hai paidaa ye jahaan-e-piir dekh
khol kar aa.nkhe.n mire aa.iina-e-guftaar me.n
aane vaale daur kii dhundlii sii ik tasviir dekh
aazmuuda fitna hai ik aur bhii garduu.n ke paas
saamne taqdiir ke rusvaa.ii-e-tadbiir dekh
muslim astii siina raa az aarzuu-aabaad daar
har zamaa.n pesh-e-nazar laa-yuKHlif-ul-mii.aad daar

Allama Iqbal

Nazm

gandhi ke baad

kaarvaa.n manzil-e-maqsuud pe pahu.nchaataa kyaa

Izhaar Malihabadi

Nazm

walida marhuma ki yaad mein

zarra zarra dahr kaa zindaanii-e-taqdiir hai
parda-e-majbuurii o bechaargii tadbiir hai
aasmaa.n majbuur hai shams o qamar majbuur hai.n
anjum-e-siimaab-paa raftaar par majbuur hai.n
hai shikast anjaam Gunche kaa subuu gulzaar me.n
sabza o gul bhii hai.n majbuur-e-numuu gulzaar me.n
naGma-e-bulbul ho yaa aavaaz-e-KHaamosh-e-zamiir
hai isii zanjiir-e-aalam-giir me.n har shai asiir
aa.nkh par hotaa hai jab ye sirr-e-majbuurii ayaa.n
KHushk ho jaataa hai dil me.n ashk kaa sail-e-ravaa.n
qalb-e-insaanii me.n raqs-e-aish-o-Gam rahtaa nahii.n
naGma rah jaataa hai lutf-e-zer-o-bam rahtaa nahii.n
ilm o hikmat rahzan-e-saamaan-e-ashk-o-aah hai
ya.anii ik almaas kaa Tuk.Daa dil-e-aagaah hai
garche mere baaG me.n shabnam kii shaadaabii nahii.n
aa.nkh merii maaya-daar-e-ashk-e-unnaabii nahii.n
jaantaa huu.n aah me.n aalaam-e-insaanii kaa raaz
hai navaa-e-shikva se KHaalii mirii fitrat kaa saaz
mere lab par qissa-e-naira.ngi-e-dauraa.n nahii.n
dil miraa hairaa.n nahii.n KHanda nahii.n giryaa.n nahii.n
par tirii tasviir qaasid girya-e-paiham kii hai
aah ye tardiid merii hikmat-e-mohkam kii hai
girya-e-sarshaar se buniyaad-e-jaa.n paa.inda hai
dard ke irfaa.n se aql-e-sa.ng-dil sharminda hai
mauj-e-duud-e-aah se aa.iina hai raushan miraa
ganj-e-aab-aavrd se maamuur hai daaman miraa
hairatii huu.n mai.n tirii tasviir ke e.ajaaz kaa
ruKH badal Daalaa hai jis ne vaqt kii parvaaz kaa
rafta o haazir ko goyaa paa-ba-paa is ne kiyaa
ahd-e-tiflii se mujhe phir aashnaa is ne kiyaa
jab tire daaman me.n paltii thii vo jaan-e-naa-tavaa.n
baat se achchhii tarah mahram na thii jis kii zabaa.n
aur ab charche hai.n jis kii shoKHii-e-guftaar ke
be-bahaa motii hai.n jis kii chashm-e-gauhar-baar ke
ilm kii sa.njiida-guftaarii bu.Dhaape kaa shu.uur
dunyavii e.azaaz kii shaukat javaanii kaa Guruur
zindagii kii auj-gaaho.n se utar aate hai.n ham
sohbat-e-maadar me.n tifl-e-saada rah jaate hai.n ham
be-takalluf KHanda-zan hai.n fikr se aazaad hai.n
phir usii kho.e hu.e firdaus me.n aabaad hai.n
kis ko ab hogaa vatan me.n aah meraa intizaar
kaun meraa KHat na aane se rahegaa be-qaraar
KHaak-e-marqad par tirii le kar ye fariyaad aa.uu.ngaa
ab du.aa-e-niim-shab me.n kis ko mai.n yaad aa.uu.ngaa
tarbiyat se terii me.n anjum kaa ham-qismat hu.aa
ghar mire ajdaad kaa sarmaaya-e-izzat hu.aa
daftar-e-hastii me.n thii zarrii.n varaq terii hayaat
thii saraapaa diin o duniyaa kaa sabaq terii hayaat
umr bhar terii mohabbat merii KHidmat-gar rahii
mai.n tirii KHidmat ke qaabil jab hu.aa tuu chal basii
vo javaa.n-qaamat me.n hai jo suurat-e-sarv-e-buland
terii KHidmat se hu.aa jo mujh se ba.Dh kar bahra-mand
kaarobaar-e-zindagaanii me.n vo ham-pahluu miraa
vo mohabbat me.n tirii tasviir vo baazuu miraa
tujh ko misl-e-tiflak-e-be-dast-o-paa rotaa hai vo
sabr se naa-aashnaa sub.h o masaa rotaa hai vo
tuKHm jis kaa tuu hamaarii kisht-e-jaa.n me.n bo ga.ii
shirkat-e-Gam se vo ulfat aur mohkam ho ga.ii
aah ye duniyaa ye maatam-KHaana-e-barnaa-o-piir
aadmii hai kis tilism-e-dosh-o-fardaa me.n asiir
kitnii mushkil zindagii hai kis qadar aasaa.n hai maut
gulshan-e-hastii me.n maanind-e-nasiim arzaa.n hai maut
zalzale hai.n bijliyaa.n hai.n qaht hai.n aalaam hai.n
kaisii kaisii duKHtaraan-e-maadar-e-ayyaam hai.n
kalba-e-iflaas me.n daulat ke kaashaane me.n maut
dasht o dar me.n shahr me.n gulshan me.n viiraane me.n maut
maut hai ha.ngaama-aaraa qulzum-e-KHaamosh me.n
Duub jaate hai.n safiine mauj kii aaGosh me.n
ne majaal-e-shikva hai ne taaqat-e-guftaar hai
zindagaanii kyaa hai ik tauq-e-guluu-afshaar hai
qaafile me.n Gair fariyaad-e-diraa kuchh bhii nahii.n
ik mataa-e-diida-e-tar ke sivaa kuchh bhii nahii.n
KHatm ho jaa.egaa lekin imtihaa.n kaa daur bhii
hai.n pas-e-noh parda-e-garduu.n abhii daur aur bhii
siina chaak is gulsitaa.n me.n laala-o-gul hai.n to kyaa
naala o fariyaad par majbuur bulbul hai.n to kyaa
jhaa.Diyaa.n jin ke qafas me.n qaid hai aah-e-KHizaa.n
sabz kar degii unhe.n baad-e-bahaar-e-jaavedaa.n
KHufta-KHaak-e-pai sipar me.n hai sharaar apnaa to kyaa
aarzii mahmil hai ye musht-e-Gubaar apnaa to kyaa
zindagii kii aag kaa anjaam KHaakistar nahii.n
TuuTnaa jis kaa muqaddar ho ye vo gauhar nahii.n
zindagii mahbuub aisii diida-e-qudrat me.n hai
zauq-e-hifz-e-zindagii har chiiz kii fitrat me.n hai
maut ke haatho.n se miT saktaa agar naqsh-e-hayaat
aam yuu.n us ko na kar detaa nizaam-e-kaa.enaat
hai agar arzaa.n to ye samjho ajal kuchh bhii nahii.n
jis tarah sone se jiine me.n KHalal kuchh bhii nahii.n
aah Gaafil maut kaa raaz-e-nihaa.n kuchh aur hai
naqsh kii naa-paa.edaarii se ayaa.n kuchh aur hai
jannat-e-nazaara hai naqsh-e-havaa baalaa-e-aab
mauj-e-muztar to.D kar ta.amiir kartii hai habaab
mauj ke daaman me.n phir us ko chhupaa detii hai ye
kitnii bedardii se naqsh apnaa miTaa detii hai ye
phir na kar saktii habaab apnaa agar paidaa havaa
to.Dne me.n us ke yuu.n hotii na be-parvaa havaa
is ravish kaa kyaa asar hai haiyat-e-taamiir par
ye to hujjat hai havaa kii quvvat-e-taamiir par
fitrat-e-hastii shahiid-e-aarzuu rahtii na ho
KHuub-tar paikar kii us ko justujuu rahtii na ho
aah siimaab-e-pareshaa.n anjum-e-garduu.n-faroz
shoKH ye chi.ngaariyaa.n mamnuun-e-shab hai jin kaa soz
aql jis se sar-ba-zaanuu hai vo muddat in kii hai
sarguzisht-e-nau-e-insaa.n ek saa.at un kii hai
phir ye insaa.n aa.n suu-e-aflaak hai jis kii nazar
qudsiyo.n se bhii maqaasid me.n hai jo paakiiza-tar
jo misaal-e-sham.a raushan mahfil-e-qudrat me.n hai
aasmaa.n ik nuqta jis kii vus.at-e-fitrat me.n hai
jis kii naadaanii sadaaqat ke liye betaab hai
jis kaa naaKHun saaz-e-hastii ke liye mizraab hai
sho.ala ye kam-tar hai garduu.n ke sharaaro.n se bhii kyaa
kam-bahaa hai aaftaab apnaa sitaaro.n se bhii kyaa
tuKHm-e-gul kii aa.nkh zer-e-KHaak bhii be-KHvaab hai
kis qadar nashv-o-numaa ke vaaste betaab hai
zindagii kaa sho.ala is daane me.n jo mastuur hai
KHud-numaa.ii KHud-fazaa.ii ke liye majbuur hai
sardi-e-marqad se bhii afsurda ho saktaa nahii.n
KHaak me.n dab kar bhii apnaa soz kho saktaa nahii.n
phuul ban kar apnii turbat se nikal aataa hai ye
maut se goyaa qabaa-e-zindagii paataa hai ye
hai lahad is quvvat-e-aashufta kii shiiraaza-band
Daaltii hai gardan-e-garduu.n me.n jo apnii kamand
maut tajdiid-e-mazaaq-e-zindagii kaa naam hai
KHvaab ke parde me.n bedaarii kaa ik paiGaam hai
KHuugar-e-parvaaz ko parvaaz me.n Dar kuchh nahii.n
maut is gulshan me.n juz sanjiidan-e-par kuchh nahii.n
kahte hai.n ahl-e-jahaa.n dard-e-ajal hai laa-davaa
zaKHm-e-furqat vaqt ke marham se paataa hai shifaa
dil magar Gam marne vaalo.n kaa jahaa.n aabaad hai
halqa-e-zanjiir-e-sub.h-o-shaam se aazaad hai
vaqt ke afsuu.n se thamtaa naala-e-maatam nahii.n
vaqt zaKHm-e-teG-e-furqat kaa ko.ii marham nahii.n
sar pe aa jaatii hai jab ko.ii musiibat naa-gahaa.n
ashk paiham diida-e-insaa.n se hote hai.n ravaa.n
rabt ho jaataa hai dil ko naala o fariyaad se
KHuun-e-dil bahtaa hai aa.nkho.n kii sarishk-aabaad se
aadmii taab-e-shakebaa.ii se go mahruum hai
us kii fitrat me.n ye ik ehsaas-e-naa-maaluum hai
jauhar-e-insaa.n adam se aashnaa hotaa nahii.n
aa.nkh se Gaa.eb to hotaa hai fanaa hotaa nahii.n
raKHt-e-hastii KHaak-e-Gam kii sho.ala-afshaanii se hai
sard ye aag is latiif ehsaas ke paanii se hai
aah ye zabt-e-fuGaa.n Gaflat kii KHaamoshii nahii.n
aagahii hai ye dilaasaa.ii faraamoshii nahii.n
parda-e-mashriq se jis dam jalva-gar hotii hai sub.h
daaG shab kaa daaman-e-aafaaq se dhotii hai sub.h
laala-e-afsurda ko aatish-qabaa kartii hai ye
be-zabaa.n taa.ir ko sarmast-e-navaa kartii hai ye
siina-e-bulbul ke zindaa.n se sarod aazaad hai
saik.Do.n naGmo.n se baad-e-sub.h-dam-aabaad hai
KHuftagaan-e-laala-zaar o kohsaar o ruud baar
hote hai.n aaKHir uruus-e-zindagii se ham-kanaar
ye agar aa.iin-e-hastii hai ki ho har shaam sub.h
marqad-e-insaa.n kii shab kaa kyuu.n na ho anjaam sub.h
daam-e-siimiin-e-taKHayyul hai miraa aafaaq-giir
kar liyaa hai jis se terii yaad ko mai.n ne asiir
yaad se terii dil-e-dard aashnaa maamuur hai
jaise ka.abe me.n du.aa.o.n se fazaa maamuur hai
vo faraa.ez kaa tasalsul naam hai jis kaa hayaat
jalva-gaahe.n us kii hai.n laakho.n jahaan-e-be-sabaat
muKHtalif har manzil-e-hastii ko rasm-o-raah hai
aaKHirat bhii zindagii kii ek jaulaa.n-gaah hai
hai vahaa.n be-haasilii kisht-e-ajal ke vaaste
saazgaar aab-o-havaa tuKHm-e-amal ke vaaste
nuur-e-fitrat zulmat-e-paikar kaa zindaanii nahii.n
ta.ng aisaa halqa-e-afkaar-e-insaanii nahii.n
zindagaanii thii tirii mahtaab se taabinda-tar
KHuub-tar thaa sub.h ke taare se bhii teraa safar
misl-e-aivaan-e-sahar marqad farozaa.n ho tiraa
nuur se maamuur ye KHaakii shabistaa.n ho tiraa
aasmaa.n terii lahad par shabnam-afshaanii kare
sabza-e-nau-rasta is ghar kii nigahbaanii kare

Allama Iqbal

Nazm

man

sukuu.n ke phuul har ik dil me.n maa.n khilaatii hai
vo uj.De ghar ko bhii rashk-e-jinaa.n banaatii hai
jahaa.n kahii.n bhii vo rakhtii hai apne paak qadam
vahii.n se KHuld ko ik raah siidhii jaatii hai
KHudaa bhii us ko giraataa hai qa.ar-e-pastii me.n
nazar se apnii jise pyaarii maa.n giraatii hai
KHushii me.n maa.n kii jo ThanDak hai us kaa kyaa kahnaa
vo qahr-e-rab ko bhii ik aan me.n bujhaatii hai
zabaan khultii hai jaise hii nanhe bachche kii
ba.De hii chaah se kalima use pa.Dhaatii hai
jo bachche raat me.n ho jaate hai.n kabhii bedaar
unhe.n vo nii.nd kii chaadar ma.an u.Dhaatii hai
vo parvarish hii nahii.n kartii apne bachcho.n kii
unhe.n vo saahib-e-kirdaar bhii banaatii hai
zaraa bhii khultii hai khi.Dkii jo maa.n kii yaado.n kii
to dil me.n KHuld se siidhe bahaar aatii hai
agar ho chashm-e-tasavvur me.n maa.n samaa.ii hu.ii
to jitnii duur ho utnii vo yaad aatii hai
mire vajuud me.n shaamil hai maa.n kaa bahr-e-karam
mirii hayaat kii kashtii vahii chalaatii hai
jo maa.n kii KHidmat-e-aalii me.n pesh hotaa huu.n
to maamtaa ke hasii.n farsh par biThaatii hai
shafiiq maa.n kii mai.n KHidmat ko.ii karuu.n na karuu.n
vo mere haq me.n du.aa.e.n kiye hii jaatii hai
qubuuliyat me.n ko.ii der bhii nahii.n lagtii
du.aa jo arsh pe 'maqsuud' maa.n kii jaatii hai

Maqsood Ahmad Maqsood

Nazm

baada-e-ishq se sarshaar guru-nanak the

vaasil-e-mazil-e-maqsuud na hote kyuu.nkar
faras-e-ishq pe asvaar guruu-naanak the

Shyam Sunder Lal Barq

Nazm

yaaden

jab bhii bichh.Dii hu.ii dillii kaa samaa.n yaad aayaa
bhuulii-bisrii hu.ii yaado.n kaa jahaa.n yaad aayaa
apne aaGaaz-e-javaanii kaa samaa.n yaad aayaa
kuucha-e-ruud-garaa.n laal ku.aa.n yaad aayaa
usii phaaTak me.n to guzraa thaa la.Dak-pan apnaa
ek ik tifl to ek ek javaa.n yaad aayaa
chaachaa kallan kii miThaa.ii kii duukaa.n yaad aa.ii
us ke uupar kisii mahvash kaa makaa.n yaad aayaa
haa.e vo nuqra.ii aavaaz vo tiikhe KHad-o-KHaal
pas-e-chilman vo nazaaro.n kaa jahaa.n yaad aayaa
kyaa na yaad aayaa Gariib-ul-vatanii me.n ham ko
ek ik vahm to ek ek gumaa.n yaad aayaa
aa.ii hamdard davaa-KHaane kii jab yaad hame.n
ek taabinda-o-paa.inda jahaa.n yaad aayaa
al-jam'iyyat ke qarii.n ho ke tasavvur jo chalaa
hifz-e-rahmaan saa ik mard-e-jahaa.n yaad aayaa
jis kii taqriir rag-o-pai me.n utar jaatii thii
sab se thaa jis kaa judaa tarz-e-bayaa.n yaad aayaa
kaale saahib kaa ahaata bhii nazar me.n ghuumaa
mahfil-e-she'r-o-suKHan kaa bhii samaa.n yaad aayaa
ballimaaraan se pahle galii qaasim-jaa.n me.n
'Gaalib'-e-KHasta kaa bosiida makaa.n yaad aayaa
vahii.n yaad aayaa davaa-KHaana-e-hindustaanii
KHaan ajmal saa masiihaa-e-zamaa.n yaad aayaa
kuucha-e-'daaG' se ho kar jo chalaa husn-e-KHayaal
shaa'ir-e-ahl-e-nazar ahl-e-zabaa.n yaad aayaa
chaa.ndnii chauk kii yaad aa.ii jo gahmaa-gahmii
vo hasii.n shaam kaa pur-kaif samaa.n yaad aayaa
kaale burqa'o.n me.n vo malbuus hasiinaa.o.n ke Gol
chaa.nd ke Tuk.Do.n kaa ik sail-e-ravaa.n yaad aayaa
ghanTa-ghar log samajhte the jise dillii kii naak
puurii dillii kaa vo tanhaa nigaraa.n yaad aayaa
ho ke favvaare se jaa poh.nchaa dariibe me.n KHayaal
sone chaa.ndii kii dukaano.n kaa jahaa.n yaad aayaa
jaame' masjid nazar aa.ii to udhar ko lapke
KHvaanche vaalo.n kaa andaaz-e-bayaa.n yaad aayaa
sii.Dhiyo.n par vo kaToro.n kii sadaa guu.nj uThii
pech khaataa hu.aa huqqe kaa dhu.aa.n yaad aayaa
jaame' masjid ke minaaro.n se jise dekhaa thaa
vo nazaara ki jo thaa raahat-e-jaa.n yaad aayaa
kaabako.n jaise makaanaat nazar me.n ghuume
ek ik foot kaa har ik piir-o-javaa.n yaad aayaa
ik uchaTtii sii nazar laal qila par bhii pa.Dii
dil pe dhachkaa saa lagaa shaah-jahaa.n yaad aayaa
urdu baazaar kii yaad aa.ii is andaaz ke saath
ki sahaafat kaa ko.ii bahr-e-ravaa.n yaad aayaa
aa ga.e yaad vahii.n 'saa.il'-o-'beKHud' 'kaifii'
'daaG' vaalo.n kaa phir andaaz-e-bayaa.n yaad aayaa
‘miir-mushtaaq' kii mardaana-ravii yaad aa.ii
KHidmat-e-KHalq kaa ik 'azm-e-javaa.n yaad aayaa
yaad aa.ii vahii.n maulaanaa samii'ullaah kii
jaise baa-himmat-o-paamard javaa.n yaad aayaa
shaa'iro.n kii jahaa.n rahtii thii nishast-o-barKHaast
'jigar'-e-KHasta ko dekhaa thaa kahaa.n yaad aayaa
'bismil'-o-'bedii'-o-'mahruum'-o-'vafaa'-o-'gulzaar'
majma'-e-shaa'ir-o-saahib-nazaraa.n yaad aayaa
chaav.Dii phir ga.ii aa.nkho.n me.n javaanii kii tarah
kuucha-haa-e-sanam-e-siim-tanaa.n yaad aayaa
yak-ba-yak scene jo badlaa to samaa.n yaad aayaa
dahshat-o-KHauf kaa ek sail-e-ravaa.n yaad aayaa
KHaak u.Dne lagii dillii ke galii kuucho.n me.n
mutafakkir saa har ik piir-o-javaa.n yaad aayaa
chho.D kar dillii ko jaane lage dillii vaale
ik hujuum-e-ba-lab-e-aah-o-fuGaa.n yaad aayaa
paa.o.n tak jin kaa na dekhaa thaa khule sar dekhaa
nauhagar qaafila-e-laala-ruKHaa.n yaad aayaa
qaafile dillii se jaane lage ban ban ke jahaa.n
maqbare kaa vo humaayuu.n ke samaa.n yaad aayaa
thaa qayaamat kaa vo manzar ki thii nafsii-nafsii
haal par apne falak girya-kunaa.n yaad aayaa
yaa'nii barsaat ye kahtii thii ki barsuu.n barsuu.n
kitnaa us daur me.n allaah miyaa.n yaad aayaa
aur ik parda uThaa aur samaa.n yaad aayaa
aur ik manzar-e-dil-doz vahaa.n yaad aayaa
Gadr kii khi.nch ga.ii aa.nkho.n me.n mukammal tasviir
'zafar'-e-soKHta-tan soKHta-jaa.n yaad aayaa
shaahzaado.n ke jo sar pesh-e-'zafar' yaad aa.e
apnaa Gam bhuul ga.e jab vo samaa.n yaad aayaa
tere KHurshiid tire chaa.nd sitaare dillii
chhuuT kar tujh se muhaajir hai.n bichaare dillii
be-vatan ho ke tire raaj-dulaare dillii
jii rahe hai.n tirii yaado.n ke sahaare dillii

Kamil Chandpuri

Nazm

subh-e-shab-e-intizar

yahii vo manzil-e-maqsuud hai ki jis ke liye
ba.De hii azm se apne safar pe nikle the
isii gha.Dii kii tamanna me.n jaane kitne log
jo be-KHataa the magar suuliyo.n pe laTke the

Syeda Shan-e-Meraj

Nazm

urdu zaban

paa.egaa jald manzil-e-maqsuud bil-yaqii.n
jaarii jo kaarvaan hai urduu zabaan kaa

Shayar Ali Shayar

Nazm

payam

KHvaahish nahii.n hai qurbat-e-masnad kii kuchh mujhe
jamhuur kii hai sirf amaanat miraa kalaam

Sada Ambalvi

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now