Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "iltifaat"

Nazm MATCHES FOR "iltifaat"

Nazm

saza

mai.n ne ye kab kahaa thaa mohabbat me.n hai najaat
mai.n ne ye kab kahaa thaa vafaadaar hii raho
apnii mataa-e-naaz luTaa kar mire liye
baazaar-e-iltifaat me.n naadaar hii raho

Jaun Eliya
Nazm

shayad

mashaam-e-jaa.n me.n mere aashtii-mandaana aatii ho
judaa.ii me.n balaa kaa iltifaat-e-mehramaana hai

Jaun Eliya
Nazm

ummid-e-sahar ki baat suno

jigar-dariida huu.n chaak-e-jigar kii baat suno
alam-rasiida huu.n daamaan-e-tar kii baat suno
zabaa.n-buriida huu.n zaKHm-e-guluu se harf karo
shikasta-paa huu.n malaal-e-safar kii baat suno
musaafir-e-rah-e-sahraa-e-zulmat-e-shab se
ab iltifaat-e-nigaar-e-sahar kii baat suno
sahar kii baat umiid-e-sahar kii baat suno

Faiz Ahmad Faiz
Nazm

dildar dekhna

tuufaa.n ba-dil hai har ko.ii dildaar dekhnaa
gul ho na jaa.e mish.al-e-ruKHsaar dekhnaa
aatish ba-jaa.n hai har ko.ii sarkaar dekhnaa
lau de uThe na turra-e-tarraar dekhnaa
jazb-e-musaafiraan-e-rah-e-yaar dekhnaa
sar dekhnaa, na sa.ng, na diivaar dekhnaa
kuu-e-jafaa me.n qaht-e-KHariidaar dekhnaa
ham aa ga.e to garmi-e-baazaar dekhnaa
us dil-navaaz shahr ke atvaar dekhnaa
be iltifaat bolnaa, bezaar dekhnaa
KHaalii hai.n garche masnad o mimbar, niguu.n hai KHalq
ro.ab-e-qabaa o haibat-e-dastaar dekhnaa
jab tak nasiib thaa tiraa diidaar dekhnaa
jis samt dekhnaa, gul-o-gulzaar dekhnaa
phir ham tamiiz-e-roz-o-mah-o-saal kar sake.n
ai yaad-e-yaar phir idhar ik baar dekhnaa

Faiz Ahmad Faiz
Nazm

mastana hijDa

ik dam se
chalte chalte
us ne kamar ke jhaTke se
raah chalne vaale
shohdo.n, haraam-KHoro.n
se iltifaat maa.ngaa
aur da.avat-e-nazar dii
us ke zaKHiim
kuulho.n ne
aag aur lazzat
KHaalii dilo.n me.n bhar dii

Saqi Faruqi
Nazm

husn-e-bimar

chuu.Diyaa.n Dhiilii dilaa.ii par shikan maathe pe haat
lab pe KHushkii ruKH pe suu.ndhaa-pan nazar me.n iltifaat

Josh Malihabadi
Nazm

aawaz ke sae

ajab paagal sii la.Dkii thii
vo mere iltifaat-e-chashm par naazaa.n
kabhii kahtii tumhaaraa mujh se yuu.n milnaa
mirii KHush-baKHtii kaa zaamin
achaanak
guftuguu ke darmiyaa.n u-turn letii thii
mujhe hairaan hone kii bhii vo mohlat na detii thii
vo kah uThtii
suno ik baat kahnii hai
ijaazat ho tumhaarii gar
to bas ik tiin lafzii kalima kahnaa hai mujhe tum se
suno alfaaz kii duniyaa se kaisii chashm-poshii ye
mai.n KHud me.n muskuraataa aur phir mauzuu.a badal detaa
labo.n se us ke ik jharne kii qulqul jaarii hotii thii
mai.n us jumle se jitnaa hii gurezaa.n
vo utnii hii kamar-basta
vo har din muskuraatii aa.nkhe.n apnii
tasavvur kii nigaaho.n se
mirii aa.nkho.n me.n Daale
sharaarat se bhare jumle yuu.n merii nazr kartii thii
ijaazat hai mire hamdam
kaho ab kah bhii duu.n
ye karb-e-jaan-levaa kab talak
rihaa.ii kab milegii is ummiid-o-naa-umiidii se
mai.n kah uThtaa agar isbaat me.n radd-e-amal zaahir kiyaa mai.n ne
to phir tum chaar-harfii lafz kii paagal sii KHvaahish paal baiThogii

Qamar Jahan Naseer
Nazm

Dimensions

vahii bahaar o KHizaa.n hai mujh me.n bhii
mujh se baahar bhii
(aadmii se alag nahii.n huu.n)
shaguufe phuuTe.n to KHuun me.n giit bolte hai.n
kabhii kabhii KHaar kii khaTak Tiis ban ke ho.nTo.n se jhaa.nktii hai
na-jaane kitne hii giit the jo bahaar se pahle
shaaKH kii rag me.n jii rahe the
ja.Do.n kaa buKHl un ko khaa gayaa hai
ye KHaar, sautele beTe shaaKHo.n ke
in tak aayaa nahii.n hai nam
phir bhii jii rahe hai.n
(chamakte suuraj kaa saaraa sach un ke batn me.n hai)
tapish kii shiddat ko pii ke suukhe sa.De hu.e hai.n
pa jii rahe hai.n
mujhe KHizaa.n aur bahaar ke raabto.n me.n jiinaa hai
phuul kaa iltifaat kaa.nTe ke talKH ta.ane
mire havaale hai.n
ja.D kaa nam, aaftaab kii tab
mire hunar me.n hii boltii hai
mai.n kitnii sat.ho.n pe jii rahaa huu.n
kabhii ko.ii phuul muskuraa.e
kabhii ko.ii KHaar dil dukhaa.e
to mujh tak aanaa
ye nazm dono.n kaa maajraa hai

Tabish Kamal
Nazm

hadsat

zaKHm siine me.n chho.D jaatii hai
jo ha.nsii iltifaat lagtii hai

Ashraf Baqri
Nazm

kabhi kabhi

yaa un ke iltifaat se mai.n aashnaa hu.aa yuu.n hii
yaa ittifaaq se hu.e vo gul-nishaa.n kabhii kabhii

Ashraf Baqri
Nazm

waqt ki chiz

tere huduud me.n kahii.n aa.ii.n nazar na pastiyaa.n
laa.eq-e-e'tinaa na ho.n Gairo.n kii chiira-dastiyaa.n
darKHor-e-iltifaat ho.n kyo.n ye zaliil hastiyaa.n
jis kii KHudii pe chhiin lii.n qaum kii KHud-parastiyaa.n
aise KHudii-navaaz ko qaum kaa rahnumaa samajh

Ali Manzoor Hyderabadi
Nazm

tanhai tumhein yaad karti hai

adab se jhuk ke 'aqiidat bharii nigaaho.n se
falak ne tum ko sar-e-shaaKH-saar dekhaa hai
mah-e-tamaam ne 'aks-e-ruKH-e-tajallii me.n
qadam qadam pe tumhe.n jalva-baar dekhaa hai
KHud apne saa.e se Dar kar badan churaa.e hu.e
tumhe.n sitaaro.n ne diivaana-vaar dekhaa hai
shafaq ne tum ko akele me.n kasmasaa.e hu.e
hazaar baar nahii.n laakh baar dekhaa hai
KHud apne husn kii tanviir me.n nahaa.e hu.e
sahar ne tum ko saraapaa bahaar dekhaa hai
tumhe.n chaman me.n Tahalte hu.e adaa.o.n se
gulo.n ne dekhaa hai aur baar-baar dekhaa hai
nasiim-e-sub.h kii aThkheliyo.n ne roz-o-shab
sharaarato.n se tumhe.n ham-kanaar dekhaa hai
magar qariib se us roz tum ko 'bismil' ne
bas ek baar faqat ek baar dekhaa hai
samajh lo phir mujhe tum iltifaat ke qaabil
banaa do merii KHushii ko hayaat ke qaabil
tumhaare ras bhare ho.nTo.n kii muskuraahaT ko
shab-e-daraaz kii tanhaa.ii yaad kartii hai
hayaa ke saa.e me.n guftaar kii halaavat ko
javaa.n umango.n kii raa'naa.ii yaad kartii hai
nigaah-e-naaz se aa.ii thii jis me.n rangiinii
tumhe.n vo anjuman-aaraa.ii yaad kartii hai
nazar kii god me.n phir ek baar aa jaa.o
dil-e-girafta kii a.ng.Daa.ii yaad kartii hai
tumhe.n sa.nvarte hu.e aa.ine me.n ha.nste hu.e
mire KHayaal kii gahraa.ii yaad kartii hai
mai.n jaantaa huu.n javaanii kii laGzishe.n kyaa hai.n
shab-e-visaal kii dilkash guzaarishe.n kyaa hai.n

Bismil Dehlavi
Nazm

asas

hamaarii saarii zaruurate.n bhii hai.n ek jaisii
mohabbate.n bhii sadaaqate.n bhii
numaa.ishe.n bhii rifaaqate.n bhii
hamaare siino.n me.n zau-fishaa.n hai.n
lahuu kii suurat hamaare andar ravaa.n-davaa.n hai.n
tumhe.n jo Gam hai usii ne aksar mujhe chhu.aa hai
hayaat kaa kaa.enaat kaa Gam
tahaarat-e-vaajibaat kaa Gam
taqaddus-e-iltifaat kaa Gam
magar ye lagtaa hai har qadam par
tamaam sachchaa.iyaa.n pahan kar
dilo.n kii gahraa.iyaa.n pahan kar
vafaa kii parchhaa.iyaa.n pahan kar
hamaare andar hazaar-haa faasle to ab tak bichhe hu.e hai.n
kahii.n usuulo.n kii dhuup dil ko tapaa rahii hai
kahii.n aqaa.ed kii aa.ndhiyaa.n hai.n
kahii.n KHudii raaste kaa patthar
anaa kahii.n sar pe saaya-afgan
na tum hamaare na ham tumhaare
ghuTan hamaare nasiib me.n hai
na jii rahe hai.n na mar rahe hai.n
KHud apne saa.e se Dar rahe hai.n
qariib rah kar judaa judaa hai.n
Gamo.n me.n Duubii ko.ii sadaa hai.n
KHud apne idraak se KHafaa hai.n
pas-e-vafaa naqsh-e-bevafaa hai.n
hamaare andar
abhii bhii sadiyo.n kii duuriyaa.n hai.n
abhii bhii sadiyo.n ke faasle hai.n
adhuure tum bhii adhuure ham bhii
na aas ko.ii sukuun dil kii
na raushnii kaa ko.ii asaasa
kahii.n nahii.n silsila yaqii.n kaa
nasiib hogaa kise KHiraaj-e-nigaah-e-ulfat
kise pata ki kahaa.n milegii zamii.n pe qurbat
tum apne ghar me.n ham apne ghar me.n
udaas tum bhii udaas ham bhii
barahna-paa be-libaas ham bhii
hai.n be-karaa.n faaslo.n kii zad me.n
Gamo.n kii zad me.n
na tum salaamat na ham salaamat
yahii muqaddar yahii sadaaqat
yahii hai bas aaKHirii haqiiqat
ki KHvaab sii lag rahii hai ab raushnii kii saa.at

Naseer Parwaz
Nazm

pas-e-KHayal

magar ab jo bikhrii sadaaqate.n
banii KHvaab saarii haqiiqate.n
ko.ii naqsh-e-yaas bujhaa hu.aa
kahii.n sarfaraaz rivaayate.n
miraa e.atibaar na chhuu sakaa
tire iltifaat kii raahate.n
jo mire yaqii.n kaa libaas thii.n
hu.ii.n be-hisaar vo lazzate.n
vo gayaa to aisaa gayaa ki phir
na palaT ke aaya mirii taraf
na hii us ne sochaa kabhii mujhe
na hii sar jhukaayaa mirii taraf
vo latiif jho.nkaa bahaar kaa
jo na dekh paayaa mirii taraf
mire dil ke armaa.n bikhar ga.e
vo kabhii to aataa mirii taraf

Naseer Parwaz
Nazm

dashta

raat dhundlii tiirgii namnaak ghaas
Thahrii Thahrii muzmahil phuulo.n kii baas
tanhaa udaas
baaG kii dil-sard KHaamoshii se duur
an-ginat taaro.n kaa be-tartiib nuur
saamaan-e-tuur
uTh rahii hai jaise mauj-e-niim-taab
kahkashaa.n ye baarhaa dekhaa saraab
manzil kaa KHvaab
phuul kar apnii tamannaa kaa ma.aal
gosha-e-dil me.n vahii zohra-jamaal
laayaa KHayaal
jis ne vaa kii mujh pe chashm-e-iltifaat
mujh ko samjhaa apnii saarii kaa.enaat
har talKH raat
aaj us kii dilkashii piTtii lakiir
us kii ba.Dhtii tiirgii kaa ham-safiir
meraa zamiir
dekhtaa huu.n phir nujuum-e-KHush-KHiraam
jaane kab tak legaa mujh se intiqaam
ye husn-e-baam

Qayyum Nazar
Nazm

sharh-e-wardat

aap kaa har sitam bajaa lekin
ko.ii shai husn-e-iltifaat bhii hai

Mansha ur Rahman Khan Mansha
Nazm

hanuz yaad hai

zahe jamaal zahe aalam-e-shabaab tiraa
nazar kii chhe.D se bajtaa thaa jab rabaab tiraa
dam-e-vidaa.a vo rangii.n udaasiyaa.n terii
hanuuz yaad hai vo diida-e-pur-aab tiraa
vo jhuum-jhuum ke abr-e-bahaar kaa aanaa
vo bijliyo.n kii ta.Dap aur vo iztiraab tiraa
vo ibtidaa-e-mohabbat vo chaa.ndnii raate.n
vo sehn-e-baaG me.n ha.nstaa hu.aa shabaab tiraa
sa.nbhal-sa.nbhal ke mirii samt vo nigaah tirii
bachaa-bachaa ke nazar mujh se vo KHitaab tiraa
miraa hariim-e-tamannaa thaa aasmaa.n se buland
us aasmaa.n pe chamaktaa thaa aaftaab tiraa
abhii nazar me.n hai raaz-o-niyaaz kaa aalam
vo meraa ijz-e-mohabbat vo pech-o-taab tiraa
kabhii sitam ke liye aur kabhii karam ke liye
nigaah-e-shauq me.n Duubaa hu.aa hijaab tiraa
miraa savaal ba-qadr-e-hujuum-e-shauq-e-nihaa.n
hayaa kii aa.D me.n chhuptaa hu.aa javaab tiraa
hanuuz yaad hai 'jauhar' ko ai nigaar-e-jamiil
vo iltifaat ke parde me.n ijtinaab tiraa

Jauhar Nizami
Nazm

chand aansu

Gazal sadaa.o.n kaa ek jangal
taras rahaa hai
buland-o-baalaa ghanere bargad kii shaaKH-dar-shaaKH
sansanaahaT ke zamzamo.n ko ki dar-haqiiqat
buland-o-baalaa ghanere bargad kii infiraadii tanaavarii ko
fanaa kii diimak nigal ga.ii hai
Gazal jo urdu adab ke barr-e-saGiir par thii
na.e taqaazo.n na.e saliiqo.n kaa ik himaala-sifat saraapaa
vo apnii choTii se munqata.a hai
ki ab vo choTii nahii.n rahii hai
Gazal kii is aabruu ke badle
bas ab to yaado.n kii KHalvato.n me.n
sulagtii socho.n me.n saa.ns lete
chand ik fasaane
mataa.a-e-ahbaab rah ga.e hai.n
vo chand barso.n kii ik rifaaqat
jo rasm-o-rah ke
aTuuT sangam me.n Dhal chukii thii
bas ek lamhe kii tund karvaT ne chhiin lii hai
hariim-e-dil
karb-gaah-e-iz.haar ban ga.ii hai
labo.n pe ab mohr-e-KHaamushii hai
kise sunaa.e.n vo dil kii dha.Dkan
jise javaabo.n kaa iltifaat-e-shu.uur-a.ngez
be-mahaabaa jhi.njho.D kar
us kii fikriyaatii amiiq parto.n me.n so.ii so.ii sii
ruuh-e-ehsaas ko jagaa.e
junuu.n ko mahmez-e-Gam dikhaa.e
parind-e-taKH.iil ko u.Daa.e
KHalaa kii iqliim kaa musaafir
jahaa.n vo uTh kar chalaa gayaa hai
vahaa.n KHalaa kaa savaal kyaa hai
KHalaa to ab us ke piichhe piichhe hii rah gayaa hai
jahaa.n ham aise faqiir tahliil ho ke 'raahii'
vajuud bhii apnaa kho chuke hai.n
bahut mukaafaat-e-be-vajuudii ko ro chuke hai.n

Ram Parkash Rahi
Nazm

shair

ik mukammal zindagii hai shaa.ir-e-shiirii.n-bayaa.n
mahram-e-raaz-e-fanaa hai aur baqaa kaa tarjumaa.n
us kii hastii kii hai qiimat ik nigaah-e-iltifaat
hech KHuddaarii ke aage hai.n zamiin-o-aasmaa.n
vo kahii.n majbuur-e-mutlaq hai kahii.n muKHtaar-e-kul
husn kaa be-daam banda varna hai shaah-e-jahaa.n
KHam jabii.n hotii hai us kii naqsh-e-paa-e-dost par
aur jhuk jaate hai.n us ke paa.nv par dono.n jahaa.n
us se poshiida nahii.n hai.n raaz-haa-e-husn-o-ishq
tarjumaa.n hai ahl-e-ulfat kaa vo sirr-e-dil-baraa.n
phuul barsaataa hai apne dosto.n kii bazm me.n
aur giraataa hai saf-e-aGyaar par ye bijliyaa.n
us ke naazuk qalb me.n miltaa hai mazluumo.n kaa dard
be-kaso.n kaa hai vo haamii be-zabaano.n kii zabaa.n
fitratan aazaad be-KHauf-o-KHatar bebaak hai
zindagii detii hai.n us ko zindagii kii talKHiyaa.n
dil ke tuufaa.n me.n qalam us kaa hai kashtii nuuh kii
aur hai us kaa tasavvur ek bahr-e-be-karaa.n
qalb us kaa mulk ke haalaat kaa aa.iina-daar
qaum ke jazbaat kii tash.hiir hai us kaa bayaa.n
diin hai us kaa mohabbat us kii duniyaa shaa.erii
hai tashaddud kaa muKHaalif haami-e-amn-o-amaa.n
ai 'shifaa' un ko magar shaa.ir na kah denaa kahii.n
bazm me.n laa kar jo pa.Dhte hai.n kalaam-e-diigaraa.n

Prem Lal Shifa Dehlvi
Nazm

be-kaifi

husn-o-ulfat kaa vo fusuu.n na rahaa
dil hai dil ko magar junuu.n na rahaa
dil vahii dil ke vaardaat vahii
un kaa ab bhii hai iltifaat vahii
mahl diigar hai vaaqi.aat vahii
lekin ab ruuh ko sukuu.n na rahaa
be-ruKHii vajah-e-intiqaam nahii.n
is shikaayat kaa ko.ii naam nahii.n
sargiraanii hai aur dil maGmuum
gum hai kaifiyyato.n me.n har mafhuum
vajh-e-be-rabtii kuchh nahii.n ma.aluum
un se ab naama-o-payaam nahii.n

Nakhshab Jaarchawi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now