Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "istiKHaara"

Nazm MATCHES FOR "istiKHaara"

Nazm

chhuara dekhna

mai.n tumhaarii laaTrii me.n jab nikal aayaa to phir
apnii ammii se kaho kyaa istiKHaaraa dekhnaa

Khalid Irfan
Nazm

ashk tara karo

vaqt kii aastiino.n me.n palte hu.e qahqahe
jhaa.D do
apne lab gaa.D do
aa.ino.n me.n bikhartii hu.ii
apnii be-chehragii ke Tahalte hu.e saa.e par
muskuraahaT ujaalo na.ii sub.h ta.amiir karne kaa chaara karo
istiKHaara karo
saarii afsurdagii aur saraasiimgii
sansanaate hu.e
apnii qaamat se ghaT kar ka.ii
munhadim daa.ero.n me.n badal jaa.egii
ye jo haalaat kii dasht-aa.nkho.n se ham par lapaktii hu.ii
luu hai kaT jaa.egii
pyaas chhaT jaa.egii
be-amaa.n mausamo.n ke badan par chahakte hu.e silsile
karb-aaluud lahje bhii khul jaa.e.nge
hausle gaa.e.nge
vaqt ke zard maathe pe bal aa.egaa
naa-umiidii kaa har ek imkaan jal jaa.egaa
raushnii kaa shajar
apnii shaaKHo.n ko phailaa.egaa
aasmaa.n apne daaman se pinhaa.n guhar
sab pe barsaa.egaa
ziist ko nuurii KHushbuu se mahkaa.egaa
muskuraahaT ujaalo na.ii sub.h ta.amiir karne kaa chaara karo
ashk taaraa karo

nawed malik
Nazm

wo rasta adam-abaad ki taraf jata tha

duniyaa kaa nasiib likhne vaale
us ke saa.nvle haatho.n me.n
shumaalii misr ke sarsabz baaGo.n ke
avvaliin phal the
jise vo
boTo shahar ke
sab se qadiim daarul-istiKHaara ko
bhe.nT karne aa.ii thii

Jawaz Jafri
Nazm

mohabbat ki ek nazm

mohabbat kii ek nazm
agar kabhii merii yaad aa.e
to chaa.nd raato.n kii narm dil-giir raushnii me.n
kisii sitaare ko dekh lenaa
agar vo naKHl-e-falak se u.D kar
tumhaare qadmo.n me.n aa gire
to ye jaan lenaa vo isti.aara thaa mere dil kaa
agar na aa.e
magar ye mumkin hii kis tarah hai
ki tum kisii par nigaah Daalo
to us kii diivaar-e-jaa.n na TuuTe
vo apnii hastii na bhuul jaa.e
agar kabhii merii yaad aa.e
gurez kartii havaa kii lahro.n pe haath rakhnaa
mai.n KHushbu.o.n me.n tumhe.n miluu.ngaa
mujhe gulaabo.n kii pattiyo.n me.n talaash karnaa
mai.n os-qatro.n ke aa.iino.n me.n tumhe.n miluu.ngaa
agar sitaaro.n me.n os-qatro.n me.n KHushbu.o.n me.n na paa.o mujh ko
to apne qadmo.n me.n dekh lenaa mai.n gard hotii masaafato.n me.n tumhe.n miluu.ngaa
kahii.n pe raushan charaaG dekho
to jaan lenaa ki har pata.nge ke saath mai.n bhii bikhar chukaa huu.n
tum apne haatho.n se un pata.ngo.n kii KHaak dariyaa me.n Daal denaa
mai.n KHaak ban kar samundaro.n me.n safar karuu.ngaa
kisii na dekhe hu.e jaziire pe
ruk ke tum ko sadaa.e.n duu.ngaa
samundaro.n ke safar pe niklo
to us jaziire pe bhii utarnaa

Amjad Islam Amjad
Nazm

aadha kamra

us ne itnii kitaabe.n chaaT Daalii.n
ki us kii aurat ke pair kaaGaz kii tarah ho ga.e
vo roz kaaGaz pe apnaa chehra likhtaa aur ganda hotaa
us kii aurat jo KHaamoshii kaa.Dhe baiThii thii
kaaGazo.n ke bhuu.nkne par sartre ke paas ga.ii
tum rambo aur freud se bhii mil aa.e ho kyaa
saifuu merii saifuu miiraabaa.ii kii tarah mat bolo
mai.n samajh ga.ii ab us kii aa.nkhe.n
keats kii aa.nkhe.n hu.ii jaatii hai.n
mai.n jo sohnii kaa gha.Daa uThaa.e hu.e thii
apnaa naam lailaa bataa chukii thii
mai.n ne kahaa
lailaa majme kii baate.n mere saamne mat dohraayaa karo
tanhaa.ii bhii ko.ii chiiz hotii hai
shakespeare ke Daraamo.n se chun chun kar us ne Thumke lagaa.e
mujhe tanhaa dekh kar
saartar freud ke kamre me.n chalaa gayaa
vo apnii theory se gir gir pa.Dtaa
mai.n samajh ga.ii us kii kitaab kitnii hai
lekin bahr haal sartre thaa
aur kal ko majme me.n bhii milnaa thaa
mai.n ne bhii.D kii taraf ishaara kiyaa to bolaa
itne saare saatro.n se mil kar tumhe.n kyaa karnaa hai
agar ziyaada zid kartii ho to apne vaaris 'shaah'
hiir sayyaal ke kamro.n me.n chale chalte hai.n
sartre se isti.aara milte hii
mai.n ne ek tanqiidii nashist rakkhii
mai.n ne aadhaa kamra bhii ba.Dii mushkil se haasil kiyaa thaa
so pahle aadhe freud ko bulaayaa
phir aadhe rambo ko bulaayaa
aadhii aadhii baat puuchhnii shuruu.a kii
john Donne kyaa kar rahaa hai
second hand shaa.iro.n se najaat chaahtaa hai
choro.n se saKHt naalaa.n hai
daa.nte is vaqt kahaa.n hai
vo jahannam se bhii faraar ho chukaa hai
us ko shub.ha thaa
vo KHvaaja-saraa.o.n se ziyaada der muqaabla nahii.n kar saktaa
apne pas-manzar me.n
ek kuttaa musalsal bhuu.nkne ke liye chho.D gayaa hai
is kutte kii KHaslat kyaa hai
biyatarche kii yaad me.n bhuu.nk rahaa hai
tumhaaraa tasavvur kyaa kahtaa hai
saatro.n kii tasavvur ke lihaaz se
ab us kaa ruKH go.eTe ke ghar kii taraf ho gayaa hai

Sara Shagufta
Nazm

jaun-eliya se aaKHri mulaqat

vo ek tarz-e-suKHan kii KHushbuu
vo ek mahkaa hu.aa takallum
labo.n se jaise gulo.n kii baarish
ki jaise jharnaa saa gir rahaa ho
ki jaise KHushbuu bikhar rahii ho
ki jaise resham ulajh rahaa ho
ajab balaaGat thii guftuguu me.n
ravaa.n thaa dariyaa fasaahato.n kaa
vo ek maktab thaa aagahii kaa
vo ilm-o-daanish kaa mai-kada thaa
vo qalb aur zehn kaa tasaadum
jo guftuguu me.n ravaa.n-davaa.n thaa
vo us ke alfaaz kii ravaanii
vo us kaa ruk ruk ke baat karnaa
vo sho.ala-e-lafz aur ma.aanii
kahii.n lapaknaa kahii.n Thaharnaa
Thahar ke phir vo kalaam karnaa
bahut se jazbo.n kii parda-daarii
bahut se jazbo.n ko aam karnaa
jo mai.n ne puuchhaa
guzishta shab ke mushaa.ere me.n bahut se shaidaa.ii muntazir the
mujhe bhii ye hii pata chalaa thaa ki aap tashriif laa rahe hai.n
magar hu.aa kyaa
zaraa tavaqquf ke baa'd bole nahii.n gayaa mai.n
na jaa sakaa mai.n
suno hu.aa kyaa
mai.n KHud ko maa.il hii kar na paayaa
ye merii haalat merii tabii.at
phir us pe merii ye bad-mizaajii-o-bad-havaasii
ye vahshat-e-dil
miyaa.n haqiiqat hai ye bhii sun lo ki ab hamaare mushaa.ere bhii
nahii.n hai.n un vahshato.n ke haamil
jo merii taqdiir ban chukii hai.n
jo merii tasviir ban chukii hai.n
jo merii taqsiir ban chukii hai.n
phir ik tavaqquf
ki jis tavaqquf kii kaifiyat par garaa.n samaa.at guzar rahii thii
us ek saa.at kaa haath thaame ye ik vazaahat guzar rahii thii
adab-farosho.n ne jaahilo.n ne mushaa.ere ko bhii ik tamaasha banaa diyaa hai
Gazal kii taqdiis luuT lii hai adab ko mujraa banaa diyaa hai
suKHan-varo.n ne bhii jaane kyaa kyaa hamaare hisse me.n rakh diyaa hai
sitam to ye hai ki chiiKH ko bhii suKHan ke zumre me.n rakh diyaa hai
ilaahii tauba
samaa.ato.n me.n KHaraashe.n aane lagii hai.n ab aur shigaaf zehno.n me.n pa.D ga.e hai.n
miyaa.n hamaare qadam to kab ke zamii.n me.n KHiffat se ga.D ga.e hai.n
KHamoshiyo.n ke dabiiz kohre se chand lamho.n kaa phir guzarnaa
vo jaise KHud ko udaasiyo.n ke samundaro.n me.n talaash karnaa
vo jaise phir surma.ii ufuq par sitaare alfaaz ke ubharnaa
ye zindagii se jo be-niyaazii hai kis liye hai
ye roz-o-shab kii jo bad-havaasii hai kis liye hai
bas itnaa samjho
ki KHud ko barbaad kar chukaa huu.n
suKHan to aabaad KHair kyaa ho
magar jahaa.n dil dha.Dak rahe ho.n vo shahr aabaad kar chukaa huu.n
bachaa hii kyaa hai
thaa jis ke aane kaa KHauf mujh ko vo ek saa.at guzar chukii hai
vo ek saf.ha ki jis pe likkhaa thaa zindagii ko vo kho chukaa hai
kitaab-e-hastii bikhar chukii hai
pa.Dhaa thaa mai.n ne bhii zindagii ko
magar tasalsul nahii.n thaa us me.n
idhar-udhar se yahaa.n vahaa.n se ajab kahaanii ga.Dhii ga.ii thii
samajh me.n aa.ii na is liye bhii ke darmiyaa.n se pa.Dhii ga.ii thii
samajhtaa kaise
na falsafii mai.n na ko.ii aalim
uquubato.n ke safar pe niklaa mai.n ik sitaara huu.n aagahii kaa
ajal ke haatho.n me.n haath Daale ik isti.aara huu.n zindagii kaa
itaab naazil hu.aa hai jis par mai.n vo hii ma.atuub aadmii huu.n
sitamgaro.n ko talab hai jis kii mai.n vo hii matluub aadmii huu.n
kabhii mohabbat ne ye kahaa thaa mai.n ek mahbuub aadmii huu.n
magar vo zarb-e-jafaa pa.Dii hai ki ek mazruub aadmii huu.n
mai.n ek bekal saa aadmii huu.n bahut hii bojhal saa aadmii huu.n
samajh rahii hai ye duniyaa mujh ko mai.n ek paagal saa aadmii huu.n
magar ye paagal ye niim-vahshii KHirad ke maaro.n se muKHtalif hai
jo kahnaa chaahaa thaa kah na paayaa
kahaa gayaa jo use ye duniyaa samajh na paa.ii
na baat ab tak kahii ga.ii hai
na baat ab tak sunii ga.ii hai
sharaab-o-sh.er-o-shu.uur kaa jo ik ta'alluq hai us ke baare me.n raa.e kyaa hai
sunaa hai ham ne ki aap par bhii bahut se fatve lage hai.n lekin
sharaab-noshii haraam hai to
ye mas.ala bhii ba.Daa ajab hai
mai.n ek mai-kash huu.n ye to sach hai
magar ye mai-kash kabhii kisii ke lahuu se sairaab kab hu.aa hai
hamesha aa.nsuu piye hai.n us ne hamesha apnaa lahuu piyaa hai
ye bahs chho.Do haraam kyaa hai halaal kyaa hai azaab kyaa hai savaab kyaa hai
sharaab kyaa hai
aziyyato.n se najaat hai ye hayaat hai ye
sharaab-o-shab aur shaa.irii ne ba.Daa sahaaraa diyaa hai mujh ko
sambhaal rakkhaa sharaab ne aur rahii hai mohsin ye raat merii
isii ne mujh ko diye dilaase sunii hai is ne hii baat merii
hamesha mere hii saath jaagii hamesha mere hii saath so.ii
mai.n KHush hu.aa to ye muskuraa.ii mai.n ro diyaa to ye saath ro.ii
ye sher-go.ii hai KHud-kalaamii kaa ik zariiya
isii zariiye isii vasiile se mai.n ne KHud se vo baate.n kii hai.n
jo duusro.n se mai.n kah na paayaa
haraam kyaa hai halaal kyaa hai ye sab tamaashe hai.n muftiyo.n ke
ye saare fitne hai.n maulvii ke
haraam kar dii thii KHud-kushii bhii ki apnii marzii se mar na paa.e
ye mai-kashii bhii haraam Thahrii ki ham ko apnaa lahuu bhii piine kaa haq nahii.n hai
ki apnii marzii se ham ko jiine kaa haq nahii.n hai
kise bataa.e.n
zamiir-o-zarf-e-bashar pe mauquuf hai.n masaa.il
samundaro.n me.n u.nDel jitnii sharaab chaahe
na harf paanii pe aa.egaa aur na us kii taqdiis KHatm hogii
to mai-kashii ko haraam kahne se pahle dekho
ki piine vaale kaa zarf kyaa hai hai.n kis ke haatho.n me.n jaam-o-miinaa
ye nukta-sanjii ye nukta-daanii jo maulvii kii samajh me.n aatii to baat bantii
na diin-o-maz.hab ko jis ne samjhaa na jis ne samjhaa hai zindagii ko
tahuuraa piine kii baat kar ke haraam kahtaa hai mai-kashii ko
jo diin-o-maz.hab kaa zikr aayaa to mai.n ne puuchhaa
ki is havaale se raa.e kyaa hai
ye KHud-parastii KHudaa-parastii ke darmiyaa.n kaa jo faasla hai
jo ik KHalaa hai ye kyaa balaa hai
ye diin-o-maz.hab faqat kitaabe.n
ba-juz kitaabo.n ke aur kyaa hai
kitaabe.n aisii jinhe.n samajhne kii koshishe.n kam hai.n aur ziyaada pa.Dhaa gayaa hai
kitaabe.n aisii ki aam insaa.n ko in ke pa.Dhne kaa haq hai lekin
inhe.n samajhne kaa haq na hargiz diyaa gayaa hai
ki in kitaabo.n pe diin-o-maz.hab ke Thekedaar ijaara-daaro.n kii dastaras hai
isii liye to ye diin-o-maz.hab fasaad-o-fitna bane hu.e hai.n
ye diin-o-maz.hab
jo ilm-o-hikmat ke saath ho to sukuun hogaa
jo dastaras me.n ho jaahilo.n kii junuun hogaa
ye ishq kyaa hai ye husn kyaa hai
ye zindagii kaa javaaz kyaa hai
ye tum ho jii jii ke mar rahe ho ye mai.n huu.n mar mar ke jii rahaa huu.n
ye raaz kyaa hai
hai kyaa haqiiqat majaaz kyaa hai
sivaa.e KHvaabo.n ke kuchh nahii.n hai
ba-juz saraabo.n ke kuchh nahii.n hai
ye ik safar hai tabaahiyo.n kaa udaasiyo.n kii ye rahguzar hai
na is ko duniyaa kaa ilm ko.ii na is ko apnii ko.ii KHabar hai
kabhii kahii.n par nazar na aa.e kabhii har ik shai me.n jalva-gar hai
kabhii ziyaa.n hai kabhii zarar hai
na KHauf is ko na kuchh KHatar hai
kabhii KHudaa hai kabhii bashar hai
hu.aa haqiiqat se aashnaa to ye suu-e-daar-o-rasan gayaa hai
kabhii ha.nsaa hai ye zer-e-KHanjar kabhii ye suulii pe ha.ns diyaa hai
kabhii ye gulnaar ho gayaa hai sinaa.n pe guftaar ho gayaa hai
kabhii hu.aa hai ye Garq-e-dariyaa
kabhii ye taqdiir-e-dasht-o-sahraa
raqam hu.aa hai ye aa.nso.o.n me.n
kabhii lahuu ne hai is ko likkhaa
hikaayat-e-dil hikaayat-e-jaa.n hikaayat-e-zindagii yahii hai
agar saliiqe se likkhii jaa.e ibaarat-e-zindagii yahii hai
ye husn hai us dhanak kii suurat
ki jis ke ra.ngo.n kaa falsafa hii kabhii kisii par nahii.n khulaa hai
ye falsafa jo fareb-e-paiham kaa silsila hai
ki is ke ra.ngo.n me.n ik ishaara hai be-ruKHii kaa
ik isti.aara hai zindagii kaa
kabhii alaamat hai shoKHiyo.n kii
kabhii kinaaya hai saadgii kaa
badalte mausam kii kaifiyat ke hai.n rang pinhaa.n isii dhanak me.n
kashish sharaarat-o-jaazbiyyat ke shoKH ra.ngo.n ne is dhanak ko ajiib paikar ataa kiyaa hai ik aisaa manzar ataa kiyaa hai
ki jis ke sehr-o-asar me.n aa kar
lahuu bahut aa.nkhe.n ro chukii hai.n bahut to biinaa.ii kho chukii hai.n
basaarte.n kyaa basiirate.n bhii to aql-o-daanaa.ii kho chukii hai.n
na jaane kitne hii rang maKHfii hai.n is dhanak me.n
bas ek ra.ng-e-vafaa nahii.n hai.n
is ek ra.ngat kii aarzuu ne lahuu rulaayaa hai aadmii ko
yahii bataayaa hai aagahii ko
ye ik chhalaavaa hai zindagii kaa
hasiin dhoka hai zindagii kaa
magar muqaddar hai aadmii kaa
fareb-e-gandum samajh me.n aayaa to mai.n ne jaanaa
ye ishq kyaa hai ye husn kyaa hai
ye ek laGzish hai jis ke dam se hayaat-e-nau kaa bharam khulaa hai

Tariq Qamar
Nazm

jitne alfaz hain sab kahe ja chuke

ek muddat hu.ii sochte sochte
tum se kahnaa hai kuchh par mai.n kaise kahuu.n
aarzuu hai mujhe aise alfaaz kii
jo kisii ne kisii se kahe hii na ho.n
sochtaa huu.n ki mauj-e-sabaa ke subuk paa.nv me.n ko.ii paazeb hii Daal duu.n
chaahtaa huu.n ki in titliyo.n ke paro.n me.n dhanak baa.ndh duu.n
surma.ii shaam ke gesu.o.n me.n ba.ndhii baarishe.n khol duu.n KHushbu.e.n ghol duu.n
phuul ke surKH ho.nTo.n pe afshaa.n rakhuu.n
KHvaab kii maa.ng me.n nuur sinduur kii kahkashaa.n khii.nch duu.n
ik taKHayyul kii be-rabtiyo.n ko tasalsul kii zanjiir duu.n
KHvaab ko jism duu.n jism ko ism duu.n
ko.ii ta.abiir duu.n ek tasviir duu.n aur tasviir ko ruu-ba-ruu rakh ke ik harf-e-tauqiir duu.n
kyaa kahuu.n ye kahuu.n yuu.n kahuu.n par mai.n kaise kahuu.n
jitne alfaaz hai.n sab kahe jaa chuke sab sune jaa chuke
tishna iz.haar ko mo'atabar saa ko.ii ab sahaaraa mile
ik kinaaya mile ik ishaara mile
KHuub-suurat anokhii alaamat mile an-kahaa an-sunaa isti.aara mile
aarzuu hai mujhe aise alfaaz kii justujuu hai mujhe aise alfaaz kii
jin se patthar ko paanii kiyaa jaa sake
KHvaab ko ik haqiiqat kiyaa jaa sake
ek zinda kahaanii kiyaa jaa sake
sarhad-e-jaavedaanii kiyaa jaa sake

Tariq Qamar
Nazm

man

tamaam lafzo.n me.n raushan har ik baab me.n maa.n
junuu.n ke shelf me.n hai ishq kii kitaab me.n maa.n
ai maa.n to KHushbuu kaa naayaab isti.aara hai
ai maa.n tuu uud me.n ambar me.n tuu gulaab me.n maa.n
KHud apnii mamtaa me.n hii nuur kaa samundar hai
nahii.n hai aur kisii raushnii kii taab me.n maa.n
vo jism kho ke badal sii ga.ii hai kuchh mujh me.n
thii pahle sirf savaal ab hai har javaab me.n maa.n
mire savaalo.n ke saare javaab le aa.ii
chalii ga.ii thii magar lauTii phir se KHvaab me.n maa.n
mai.n jab bhii zab.h hu.ii zindagii ke KHanjar se
dukhii hai KHvaabo.n me.n ik dasht-e-iztiraab me.n maa.n
ga.nvaa ke jism vo fursat se i mere paas
sisak sisak ke sunaayaa thii kis azaab me.n maa.n
mai.n maa.n kii zinda nigaaho.n ko KHud me.n jiitii huu.n
har inqalaab me.n har dam har aab-o-taab me.n maa.n
mire uruuj kaa vo silsila in.aam-o-sazaa
mire zavaal me.n har zinda inqalaab me.n maa.n
tujhe lubhaane ko mai.n satra.ngii banii thii maa.n
ye jaa chhupii hai tuu kis parda-e-Gayaab me.n maa.n
ba.ndhii hai.n aa.nkhe.n mirii ab bhii maut ke pul se
hai har sukuut me.n KHaamosh iztiraab me.n maa.n
umaD rahe hai.n har ik pal se maut ke ThaTThe
vo jaa rahii hai mirii panja-e-uqaab me.n maa.n
vo jism haar ga.ii maut se magar mujh me.n
vo jii ke goyaa hai phir maut se javaab me.n maa.n

Azra Parveen
Nazm

hawa ko aawara kahne walo

ab un ke saare safar me.n sub.h-e-yaqiin ko.ii
na shaam-e-sad-e'tibaar ko.ii
na un kii apnii zamiin ko.ii na aasmaa.n par ko.ii sitaara
na ko.ii mausam na ko.ii KHushbuu kaa isti.aara
na raushnii kii lakiir ko.ii, na un kaa apnaa safiir ko.ii

Noshi Gilani
Nazm

main intizar karungi

mai.n intizaar karuu.ngii
us vaqt kaa
jab kisii ja.ng me.n mohabbat judaa na hogii
jab mohabbat kaa daa.era laa-mahduud ho jaa.egaa
jab mohabbat
jism kii muhtaaj
nahii.n rahegii
jab tum mujhe
apnaa isti.aara banaa doge
aur mai.n KHud ko tumhaarii tashbiih banaa luu.ngii

Sheerin Ahmad
Nazm

long distance relationship

mai.n intizaar-e-musalsal kaa isti'aara nahii.n
tirii nigaah me.n tahriir honaa chaahtaa huu.n
jo faaslo.n ne ikaTThaa kiye hai.n Gam un par
bilak-bilak ke tire saath ronaa chaahtaa huu.n

Balmohan panday
Nazm

dasht-e-be-aman

ko.ii shaam aa rahii hai:
ko.ii KHushnumaa sitaara jo falak pe ha.ns rahaa hai kisii mah-jabii.n kii suurat
jo nazar ko Das rahaa hai
vahii ek isti.aara
tirii yaad rahguzar par miraa ham-safar banaa hai
vahii ik ziyaa salaamat
sar-e-shaam tiirgii me.n
mire kaam aa rahii hai
mire raaste ke aage
kisii raat kaa guzar hai
kahii.n vahm sar-ba-sar hai
kahii.n KHauf kaa asar hai
kahii.n sarsaraahaTe.n hai.n
kahii.n jhunjhunaahaTe.n hai.n
nahii.n dasht-e-huu me.n aahuu
nahii.n ja.ngalo.n me.n jugnuu

Khursheed Akbar
Nazm

man

vo kaun hai jo udaas raato.n kii chaa.ndnii hai.n
ka.ii du.aa.e.n labo.n pe le kar
maluul ho kar
bhulaa ke saarii thakaan din kii
ye sochtii hai
ki mai.n na jaane hazaar miilo.n pare jo baiThaa huu.n
kis tarah huu.n
vo kaun hai jo udaas raato.n ke rat-jage me.n
du.aa.o.n kii mish.ale.n jalaane kha.Dii hu.ii hai
du.aa.e.n jis kii mire liye hai.n
mai.n un du.aa.o.n ke zer-e-saaya
zamiin se aasmaan kii jaanib yuu.n mahv-e-parvaaz huu.n ki jaise
bashar-gaziida KHudaa se milne ko jaa rahaa ho
phir ek lamhe ko mere andar se itnii aavaaze.n guu.njtii hai.n
mai.n in se barso.n se aashnaa huu.n
ye haath jo ki buland ho kar laraz rahe hai.n
ye haath mere liye tahaffuz kaa isti.aara
ye haath mere liye jahaa.n kii
hazaar KHushbuu se baalaa-tar hai.n
yahii to hai.n vo jinho.n ne mujh ko
qadam uThaanaa qadam ba.Dhaanaa sikhaa diyaa hai

Baqa Baluch
Nazm

KHwab ek parinda hai

KHvaab ik parinda hai
aa.nkh ke qafas me.n ye
jab talak muqayyad hai
aks ban ke zinda hai
KHvaab ik parinda hai
KHvaab ik parinda hai
zard mausamo.n me.n bhii
KHush-gavaar yaado.n ko
taaza-kaar rakhtaa hai
aane vaale mausam ke
giit gungunaataa hai
shaaKH shaaKH par mahke
phuul chun ke laataa hai
aur phir havaa ke dosh
KHushbu.o.n kaa saathii hai
KHvaab ik parinda hai
KHvaab ik parinda hai
ziist ke samundar me.n
KHvaahishe.n jaziira hai.n
aur is jaziire me.n
KHauf kaa a.ndheraa hai
aur is a.ndhere me.n
KHvaab saa parinda hai
sub.h kaa sitaara hai
din kaa isti.aara hai

Ali Asghar Abbas
Nazm

mulaqaten nahin phir bhi mulaqaten

subuu TuuTe
mohabbat kii namaazo.n me.n
vazuu TuuTe
du.aa ro.ii
du.aa ke aasmaano.n par
ka.ii chashmaan o lab ro.e
kabhii ko.ii sabab rone kaa niklaa hai
magar ham be-sabab ro.e
zamiino.n aur zamaano.n kii ajab
ra.njuu gardish me.n
havaa ke aastaane par
jhukaa.e sar pashiimaa.n be-zabaa.n
tanhaa.iyo.n ke qaafile utre
vahii ham the
mujassam bandagii zaKHmii tamaashe ke nishaane par
kabhii sahme hu.e KHvaahish kii
retiilii fazaa.o.n me.n
tumhe.n dekhaa tumhe.n chaahaa
kabhii mausam-e-faraamoshii ke narGe me.n
udaasii kii fasiilo.n par
azaan-e-KHud-kalaamii dii
tumhaare faaslo.n ko apnii mahruumii kii KHalvat me.n
biThaayaa baam-o-dar ko
ajnabiyat ke sitaaro.n se sajaayaa
vahii ham the
hamaarii baat ke raqs-e-junuu.n me.n
kho diyaa tum ko
vahii tum the
vidaa-e-lamha-e-ta.ajiil kii KHaatir
thake TuuTe hu.e aa kar lipaT jaane
kii KHvaahish me.n
bikharte apnii aa.nkho.n ke muqaddas motiyo.n me.n
lamha-e-aaKHir guzar jaane kii dhun me.n
umr-bhar KHud se gurezaa.n rah ga.e
ham tum hijaab-e-naa-shanaasaa.ii ke
mujrim ban ga.e
har faasla kitne adhuure faaslo.n kaa
isti.aara hai
samundar dekh terii aastiino.n me.n
fuGaa.n kartaa kinaara hai
mulaaqaate.n, nahii.n phir bhii mulaaqaate.n
mulaaqaato.n kii kuchh ummiid baaqii rah na jaa.e
ashk kaa ik aaKHirii qatra bhii
yuu.nhii bah na jaa.e

Ain Tabish
Nazm

chand

chupke chupke raat ko tashriif jab laataa hai chaa.nd
har taraf dhartii pe kaisaa nuur barsaataa hai chaa.nd
pahle din ke chaa.nd ko sab log kahte hai.n hilaal
chaudhvii.n taariiKH ho to badr kahlaataa hai chaa.nd
pur-sukuu.n maahaul taare kahkashaa.n ThanDii havaa
raat kii mahfil me.n aksar raqs farmaataa hai chaa.nd
jab ghaTaa ghanghor aatii hai kabhii barsaat me.n
o.Dh kar sapno.n kii chaadar shab me.n so jaataa hai chaa.nd
kahtii hai bachche ko meraa chaa.nd kahte pyaar se
isti.aara pyaar me.n ik maa.n ke ban jaataa hai chaa.nd
har gha.Dii betaab hai.n maamaa ke darshan ke liye
chhoTe bachcho.n ke dilo.n ko KHuub bahlaataa hai chaa.nd
tum ko bhii bachpan me.n ai 'abraar' kitnaa pyaar thaa
jis tarah 'daanish' miyaa.n ko aaj-kal bhaataa thaa chaa.nd

Abrar Kiratpuri
Nazm

hirs

auro.n kii kyaa kahiye KHud meraa dil bhii a.ngaaro.n kaa matbaKH hai
sadaa mirii aa.nkho.n me.n ik vo kashish dahaktii hai jo
sab ko apnii jaanib khii.nch kar mere vaar kii zad me.n le aatii hai
sab kuchh merii talab kii tishnagiyo.n ke dahaane par hai
a.ngaaro.n ke us matbaKH me.n girne ko hai
gaa.Dhaa lajz lahuu ik vo kailuus jo a.ngaaro.n kaa istihaala hai
us mere dil kii kaalii quvvat hai me.n jis ke pas me.n ho.n
ye quvvat mujh se kahtii hai
dekh mire a.ngaare merii ta.Dap kaa rang hai.n ab kuchh to un kii KHaatir bhii
aur a.ngaare ugaltii saa.nso.n ke saath ab me.n
is duniyaa ke andar apne shikaar kii talaash me.n
ik ik ruuh kii ghaat me.n
ik ik ruuh ke saamne savaalii ban ke kha.Daa huu.n
mere dil me.n a.ngaaro.n ke dandaane paiham ju.Dte aur khulte hai.n
baahar kisii karam kii banaavaT me.n ho.nT ek o.nkhaa Thahraa Thahraa Te.Dhaa zaaviya saa hai.n
ko.ii mujhe ab pahchaanegaa
kis tarah ha.ns ha.ns kar mujh se miltii hai duniyaa bad-baKHt

Majeed Amjad
Nazm

lahar ka Thahrao

mai.n ek lahar kaa Thahraa.o
jame hu.e KHuun kaa dauraan
kaTe hu.e haatho.n kii panja-aazmaa.ii meraa jihaad
nau-javaan buu.Dho.n kii naa-KHud-navisht
merii asriyat
taariiKH mere ghar kaa bujhaa hu.aa chuulhaa
roTiyo.n se ziyaada bhuuk pakaataa hai
meraa shahr us aurat kaa hamal
jo istiqraar se ziyaada isqaat Dhaaltaa hai
barso.n pahle
natshe ne kahaa thaa'' KHudaa mar gayaa''
aur aaj
jaamaa masjid ke piichhe vaalii bastii me.n
bosiida makaano.n aur taariik galiyo.n me.n
ek buu.Dhaa bhii
yahii chiiKHtaa hai
jaamaa masjid ke chaar miinaaro.n se
rone kii aavaaze.n
nashr ho rahii hai.n

Farhat Ehsas
Nazm

mohabbat ramz-e-hasti hai

mohabbat KHvaab-e-gul hai
shaaKH-e-dil kii suunii palko.n par
laraztaa KHvaab-e-gul
jo naKHl-e-jaa.n ke zard-ruu
girte hu.e patto.n kii
saa.nso.n me.n mahaktaa hai
mohabbat zindagii ke sabz ufuq par
duur tak phailii hu.ii KHushbuu kii lau hai
jo kabhii dil ke dariicho.n me.n
utar kar muskuraatii hai
to har-suu raushnii sii phail jaatii hai
mohabbat ramz-e-hastii hai
ye aisaa bhed hai jo kitne barso.n
balki umro.n kii
musalsal be-riyaa kaavish pe khultaa hai
to goyaa yuu.n mohabbat
zindagii kaa isti.aara hai
ki jis kaa har bayaa.n alfaaz kii chhab
aur lahjo.n kaa khanak se
maavaraa ho kar bhii
duniyaa-e-ma.aafii apnii KHaamoshii me.n rakhtaa hai
mohabbat KHvaab-e-gul bhii hai
mohabbat ramz-e-hastii bhii

Mubeen Mirza
Nazm

kahani

suno tum likh ke de do naa
kahaanii me.n kahaa.n sach hai
kahaa.n pe ruk ke tum ne Gaaliban kuchh jhuuT likhnaa hai
kahaa.n aisaa ko.ii ik mo.D aanaa hai
jahaa.n chaalaan mumkin hai
kahaa.n vo besh-qiimat saa
sunahrii chhoTaa saa Dibbaa jo apnii dha.Dkano.n se apne hone kii gavaahii de rahaa hai
TuuT jaanaa hai
kahaa.n qaarii ko samjhaanaa hai
dukh ke is alaav me.n jhulastii sii kahaanii rok denaa hii zaruurii hai
safar me.n ruk ke sab ko alvidaa.a kahne kaa lamha laazmii hai
kahaa.n taariiKH likh ke is qalam ko jeb me.n rakhnaa zaruurii ho gayaa hai
suno tum ye bataa.o naa
tumhaarii tilsmaatii sii kahaanii me.n ko.ii kirdaar to hogaa
jo zimmedaar hogaa
kahaa.n par markazii kirdaar ne dukh dard siine me.n chhupaanaa hai
falak ko bad-gumaa.n kar ke
zamii.n ko aasmaa.n hotaa dikhaanaa hai
nadaamat aur malaamat saath rakhnii hai
har ik saa.at ke saare dukh uThaane hai.n
nibhaane hai.n
bataanaa hai
mohabbat zindagii kaa isti.aara hai
mohabbat raat kaa pahlaa sitaara hai
yaa
dukh kaa aaKHirii ko.ii kinaara hai

Rabia Basri
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now