Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "khote"

Nazm MATCHES FOR "khote"

Nazm

ek laDka

ma.iishat duusro.n ke haath me.n hai mere qabze me.n
juz ik zehn-e-rasaa kuchh bhii nahii.n phir bhii magar mujh ko
KHarosh-e-umr ke itmaam tak ik baar uThaanaa hai
anaasir muntashir ho jaane nabze.n Duub jaane tak
navaa-e-sub.h ho yaa naala-e-shab kuchh bhii gaanaa hai
zafar-mando.n ke aage rizq kii tahsiil kii KHaatir
kabhii apnaa hii naGma un kaa kah kar muskuraanaa hai
vo KHaama-sozii shab-bedaariyo.n kaa jo natiija ho
use ik khoTe sikke kii tarah sab ko dikhaanaa hai
kabhii jab sochtaa huu.n apne baare me.n to kahtaa huu.n
ki tuu ik aabla hai jis ko aaKHir phuuT jaanaa hai
Garaz gardaa.n huu.n baad-e-sub.h-gaahii kii tarah lekin
sahar kii aarzuu me.n shab kaa daaman thaamtaa huu.n jab
ye la.Dkaa puuchhtaa hai aKHtar-ul-iimaan tum hii ho
ye la.Dkaa puuchhtaa hai jab to mai.n jhallaa ke kahtaa huu.n
vo aashufta-mizaaj andoh-parvar iztiraab-aasaa
jise tum puuchhte rahte ho kab kaa mar chukaa zaalim
use KHud apne haatho.n se kafan de kar farebo.n kaa
isii kii aarzuu.o.n kii lahad me.n phe.nk aayaa huu.n
mai.n us la.Dke se kahtaa huu.n vo sho.ala mar chukaa jis ne
kabhii chaahaa thaa ik KHaashaak-e-aalam phuu.nk Daalegaa
ye la.Dkaa muskuraataa hai ye aahista se kahtaa hai
ye kizb-o-iftiraa hai jhuuT hai dekho mai.n zinda huu.n

Akhtarul Iman
Nazm

munajat-e-bewa

(1)
ai sab se avval aur aaKHir
jahaa.n-tahaa.n, haazir aur naazir
ai sab daanaa.o.n se daanaa
saare tavaanaa.o.n se tavaanaa
ai baalaa, har baalaa-tar se
chaa.nd se suuraj se ambar se
ai samjhe buujhe bin suujhe
jaane-pahchaane bin buujhe
sab se anokhe sab se niraale
aa.nkh se ojhal dil ke ujaale
ai andho.n kii aa.nkh ke taare
ai la.ng.De luulo.n ke sahaare
naatiyo.n se chhoTo.n ke naatii
saathiyo.n se bichh.Do.n ke saathii
naav jahaa.n kii khene vaale
dukh me.n tasallii dene vaale
jab ab tab tujh saa nahii.n ko.ii
tujh se hai.n sab tujh saa nahii.n ko.ii
jot hai terii jal aur thal me.n
baas hai terii phuul aur phal me.n
har dil me.n hai teraa baseraa
tuu paas aur ghar duur hai teraa
raah tirii dushvaar aur suk.Dii
naam tiraa rah-giir kii lak.Dii
tuu hai Thikaanaa miskiino.n kaa
tuu hai sahaaraa Gamgiino.n kaa
tuu hai akelo.n kaa rakhvaalaa
tuu hai a.ndhere ghar kaa ujaalaa
laaguu achchhe aur bure kaa
KHvaahaa.n khoTe aur khare kaa
bed niraase biimaaro.n kaa
gaahak mande baazaaro.n kaa
soch me.n dil bahlaane vaale
biptaa me.n yaad aane vaale
(2)
ai be-vaaris gharo.n ke vaaris
be-baazuu be-paro.n ke vaaris
be-aaso.n kii aas hai tuu hii
jaagte sote paas hai tuu hii
bas vaale hai.n yaa be-bas hai.n
tuu nahii.n jin kaa vo be-kas hai.n
saathii jin kaa dhyaan hai teraa
dusraayat kii vahaa.n nahii.n parvaa
dil me.n hai jin ke terii ba.Daa.ii
ginte hai.n vo parbat ko raa.ii
bekas kaa Gam-KHvaar hai tuu hii
burii banii kaa yaar hai tuu hii
dukhiyaa dukhii yatiim aur beva
tere hii haath un sab kaa hai khevaa
tuu hii maraz de tuu hii davaa de
tuu hii davaa-daaruu me.n shifaa de
tuu hii pilaa.e zahr ke pyaale
tuu hii phir amrit zahr me.n Daale
tuu hii dilo.n me.n aag lagaa.e
tuu hii dilo.n kii lagii bujhaa.e
chumkaare chumkaar ke maare
maare maar ke phir chumkaare
pyaar kaa tere puuchhnaa kyaa hai
maar me.n bhii ik terii mazaa hai
(3)
ai rahmat aur haibat vaale
shafqat aur dabaaGat vaale
ai aTkal aur dhyaan se baahar
jaan se aur pahchaan se baahar
aql se ko.ii paa nahii.n saktaa
bhed tire hukmo.n me.n hai.n kyaa kyaa
ek ko tuu ne shaad kiyaa hai
ek ke dil ko daaG diyaa hai
us se na teraa pyaar kuchh aisaa
us se na tuu bezaar kuchh aisaa
har dam terii aan na.ii hai
jab dekho tab shaan na.ii hai
yahaa.n pachhu.aa hai vahaa.n purvaa hai
ghar ghar teraa hukm nayaa hai
phuul kahii.n kumlaa.e hu.e hai.n
aur kahii.n phal aa.e hu.e hai.n
khetii ek kii hai lahraatii
ek kaa har dam KHuun sukhaatii
ek pa.De hai.n dhan ko Dubo.e
ek hai.n gho.De bech ke so.e
ek ne jab se hosh sambhaalaa
ra.nj se us ko pa.Daa na paalaa
ek ne is janjaal me.n aa kar
chain na dekhaa aa.nkh uThaa kar
me.nh kahii.n daulat kaa hai barastaa
hai ko.ii paanii tak ko tarastaa
ek ko marne tak nahii.n dete
ek uktaa gayaa lete lete
haal Garaz duniyaa kaa yahii hai
Gam pahle aur baa'd KHushii hai
ra.nj kaa hai duniyaa ke gilaa kyaa
tohfa yahii le de ke hai yaa.n kaa
yahaa.n nahii.n bantii ranj sahe bin
ra.nj nahii.n sab ek se lekin
ek se yahaa.n ranj ek hai baalaa
ek se hai dard ek niraalaa
ghaav hai go naasuur kii suurat
par use kyaa naasuur se nisbat
tap vahii diq kii shakl hai lekin
diq nahii.n rahtii jaan liye bin
diq ho vo yaa naasuur ho kuchh ho
de na jo ab ummiid kisii ko
roz kaa Gam kyuu.n-kar sahe ko.ii
aas na jab baaqii rahe ko.ii
tuu hii kar insaaf ai mire maulaa
kaun hai jo be-aas hai jiitaa
go ki bahut bande hai.n pur-armaa.n
kam hai.n magar maayuus hai.n jo yaa.n
KHvaah dukhii hai KHvaah sukhii hai
jo hai ik ummiid us ko ba.ndhii hai
khetiyaa.n jin kii kha.Dii hai.n suukhii
aas vo baa.ndhe baiThe hai.n me.nh kii
ghaTaa jin kii asaa.Dii me.n hai
saavanii kii ummiid nahii.n hai
Duub chukii hai un kii agetii
detii hai Dhaaras un ko pachhetii
ek hai is ummiid pe jiitaa
ab hu.ii beTii ab hu.aa beTaa
ek ko jo aulaad milii hai
us ko uma.ng shaadiyo.n kii hai
ra.nj hai yaa qismat me.n KHushii hai
kuchh hai magar ik aas ba.ndhii hai
Gam nahii.n un ko Gamgii.n hai.n
jo dil naa-umiid nahii.n hai.n
kaal me.n kuchh saKHtii nahii.n aisii
kaal me.n hai jab aas samay.n kii
sahal hai maujo.n se chhuTkaaraa
jab ki nazar aataa hai kinaaraa
par nahii.n uTh saktii vo musiibat
aa.egii jis ke baa'd na raahat
shaad ho us rah-giir kaa kyaa dil?
mar ke kaTegii jis kii manzil
un uj.Do.n ko kal pa.De kyuu.n-kar
ghar na basegaa jin kaa janam bhar
un bichh.Do.n kaa kyaa hai Thikaanaa?
jin ko na milne degaa zamaana
ab ye balaa Taltii nahii.n Taalii
mujh pe hai jo taqdiir ne Daalii
aa.ii.n bahut duniyaa me.n bahaare.n
aish kii ghar ghar pa.Dii.n pukaare.n
pa.De bahut baaGo.n me.n jhuule
Dhaak bahut jangal me.n phuule
ga.ii.n aur aa.e.n chaa.ndnii raate.n
barsii.n khulii.n bahut barsaate.n
par na khilii hargiz na khilegii
vo jo kalii murjhaa.ii thii dil kii
aas hii kaa bas naam hai duniyaa
jab na rahii yahii to rahaa kyaa?
aise bidesii kaa nahii.n Gam kuchh
jis ko na ho milne kii qasam kuchh
ronaa un ban-baasiyo.n kaa hai
des nikaalaa jin ko milaa hai
hukm se tere par nahii.n chaara
ka.Dvii miiThii sab hai gavaaraa
zor hai kyaa patte kaa havaa par
chaahe jidhar le jaa.e u.Daa kar
tinkaa ik aur saat samundar
jaa.e kahaa.n maujo.n se nikal kar
qismat hii me.n jab thii judaa.ii
phir Taltii kis tarah ye aa.ii?
aaj kii big.Dii ho to bane bhii
azal kii big.Dii KHaak banegii
tuu jo chaahe vo nahii.n Taltaa
bande kaa yaa.n bas nahii.n chaltaa
maare aur na de tuu rone
thapke aur na de tuu sone
Thahre ban aatii hai na bhaage
terii zabardastii ke aage
tujh se kahii.n gar bhaagnaa chaahe.n
band hai.n chaaro.n khuu.nT kii raahe.n
tuu maare aur KHvaah navaaze
pa.Dii hu.ii huu.n mai.n tere darvaaze
tujh ko apnaa jaantii huu.n mai.n
tujh se nahii.n to kis se kahuu.n mai.n
maa.n hii sadaa bachche ko maare
aur bachcha maa.n maa.n hii pukaare
(4)
ai mire zor aur qudrat vaale
hikmat aur hukuumat vaale
mai.n lau.nDii terii dukhyaare
darvaaze kii terii bhikaarii
maut kii KHvaahaa.n jaan kii dushman
jaan apnii hai aap ajiiran
apne paraa.e kii dhutkaarii
maike aur sasuraal pe bhaarii
sah ke bahut aazaar chalii huu.n
duniyaa se bezaar chalii huu.n
dil par mere daaG hai.n jitne
mu.nh me.n bol nahii.n hai.n utne
dukh dil kaa kuchh kah nahii.n saktii
is ke sivaa kuchh kah nahii.n saktii
tujh pe hai raushan sab dukh dil kaa
tujh se haqiiqat apnii kahuu.n kyaa
byaah ke dam paa.ii thii na lene
lene ke yaa.n pa.D ga.e dene
KHushii me.n bhii dukh saath na aayaa
Gam ke sivaa kuchh haat na aayaa
ek KHushii ne Gam ye dikhaa.e
ek ha.nsii ne gul hii khilaa.e
kaisaa thaa ye byaah ninaavaa.n
juu.nhii pa.Daa is kaa parchaavaa.n
chain se rahne diyaa na jii ko
kar diyaa maliyaameT KHushii ko
ro nahii.n saktii ta.ng huu.n yaa.n tak
aur ro.uu.n to ro.uu.n kahaa.n tak
ha.ns ha.ns dil bahlaa.uu.n kyuu.n-kar
oso.n pyaas bujhaa.uu.n kyuu.n-kar
ek kaa kuchh jiinaa nahii.n hotaa
ek na ha.nstaa bhalaa na rotaa
leTe gar sone ke bahaane
paa.entii kal hai aur na sirhaane
jaagiye to bhii ban nahii.n pa.Dtii
jaagne kii aaKHir ko.ii had bhii
ab kal ham ko pa.Degii mar kar
gor hai suunii sej se behtar
baat se nafrat kaam se vahshat
TuuTii aas aur bujhii tabii.at
aabaadii jangal kaa namuuna
duniyaa suunii aur ghar suunaa
din hai bhayaanak aur raat Daraanii
yuu.n guzrii saarii ye javaanii
bahne.n aur bahneliyaa.n merii
saath kii jo thii.n kheliyaa.n merii
mil na sakii.n jii khol ke mujh se
KHush na hu.ii.n ha.ns bol ke mujh se
jab aa.ii.n ro-dho ke ga.ii.n vo
jab ga.ii.n be-kal ho ke ga.ii.n vo
ko.ii nahii.n dil kaa bahlaavaa
aa nahii.n chuktaa meraa bulaavaa
aaTh pahar kaa hai ye julaapaa
kaaTuu.ngii kis tarah ra.nDaapaa
thak ga.ii dukh sahte sahte
tham ga.e aa.nsuu bahte bahte
aag khulii dil kii na kisii par
ghul ga.ii jaan andar hii andar
dekh ke chup jaanaa na kisii ne
jaan ko phuu.nkaa dil kii lagii ne
dabii thii bhobhal me.n chi.ngaarii
lii na kisii ne KHabar hamaarii
qaum me.n vo KHushiyaa.n biyaaho.n kii
shahr me.n vo dho.e.n saaho.n kii
tyauhaaro.n kaa aa.e din aanaa
aur sab kaa tyauhaar manaanaa
vo chait aur phaagun kii havaa.e.n
vo saavan bhaado.n kii ghaTaa.e.n
vo garmii kii chaa.ndnii raate.n
vo armaan bharii barsaate.n
kis se kahuu.n kis taur se kaaTe.n
KHair kaTe.n jis taur se kaaTe.n
chaav ke aur KHushiyo.n ke samay sab
aate hai.n KHush kal jaan ko ho jab
ra.nj me.n hai.n saamaan KHushii ke
aur jalaane vaale hii ke
ghar barkhaa aur piyaa bidesii
aa.iyo barkhaa kahii.n na aisii
din ye javaanii ke kaTe aise
baaG me.n panchhii qaid ho jaise
rut ga.ii saarii sar Takraate
u.D na sake par hote saare
kisii ne hogii kuchh kal paa.ii
mujhe to shaadii raas na aa.ii
aas ba.ndhii lekin na milaa kuchh
phuul aayaa aur phal na lagaa kuchh
rah gayaa de kar chaa.nd dikhaa.ii
chaa.nd hu.aa par iid na aa.ii
phal kii KHaatir barchhii khaa.ii
phal na milaa aur jaan ga.nvaa.ii
ret me.n zarre dekh chamakte
dau.D pa.Dii me.n jhiil samajh ke
chaaro.n khuu.nT nazar dau.Daa.ii
par paanii kii buu.nd na paa.ii

Altaf Hussain Hali
Nazm

dil

dil vo sahraa thaa
ki jis sahraa me.n
hasrate.n
ret ke Tiilo.n kii tarah rahtii thii.n
jab havaadis kii havaa
un ko miTaane ke liye
chaltii thii
yahaa.n miTtii thii.n
kahii.n aur ubhar aatii thii.n
shakl khote hii
na.ii shakl me.n Dhal jaatii thii.n
dil ke sahraa pe magar ab kii baar
saaneha guzraa kuchh aisaa
ki sunaa.e na bane
aa.ndhii vo aa.ii ki saare Tiile
aise bikhre
ki kahii.n aur ubhar hii na sake
yuu.n miTe hai.n
ki kahii.n aur banaa.e na bane
ab kahii.n
Tiile nahii.n
ret nahii.n
ret kaa zarra nahii.n
dil me.n ab kuchh nahii.n
dil ko sahraa bhii agar kahiye
to kaise kahiye

Javed Akhtar
Nazm

aurat

qismat ke khoTe sikke ko qiimat nahii.n milii
aurat huu.n mai.n mujhe mirii azmat nahii.n milii

Meena Naqvi
Nazm

wasiyyat

mire beTe mirii aa.nkhe.n mire baa'd un ko de denaa
jinho.n ne ret me.n sar gaa.D rakkhe hai.n
aur aise mutma.in hai.n jaise un ko
na ko.ii dekhtaa hai aur na ko.ii dekh saktaa hai
magar ye vaqt kii jaasuus nazre.n
jo piichhaa kartii hai.n sab kaa zamiiro.n ke a.ndhere tak
a.ndheraa nuur par rahtaa hai Gaalib bas savere tak
saveraa hone vaalaa hai
(2)
mire beTe mirii aa.nkhe.n mire baa'd un ko de denaa
kuchh andhe suurmaa jo tiir a.ndhere me.n chalaate hai.n
sadaa dushman kaa siina taakte KHud zaKHm khaate hai.n
lagaa kar jo vatan ko daav par kursii bachaate hai.n
bhunaa kar khoTe sikke dharm ke jo pun kamaate hai.n
jataa do un ko aise Thag kabhii pak.De bhii jaate hai.n
(3)
mire beTe unhe.n tho.Dii sii KHuddaarii bhii de denaa
jo haakim qarz le ke is ko apnii jiit kahte hai.n
jahaa.n rakhte hai.n sonaa rehn KHud bhii rehn rahte hai.n
aur is ko bhii vo apnii jiit kahte hai.n
shariik-e-jurm hai.n ye sun ke jo KHaamosh rahte hai.n
qusuur apnaa ye kyaa kam hai ki ham sab un ko sahte hai.n
(4)
mire beTe mire baa'd un ko meraa dil bhii de denaa
ki jo shar rakhte hai.n siine me.n apne dil nahii.n rakhte
hai un kii aastii.n me.n vo bhii jo qaatil nahii.n rakhte
jo chalte hai.n unhii.n rasto.n pe jo manzil nahii.n rakhte
ye majnuu.n apnii nazro.n me.n ko.ii mahmil nahii.n rakhte
ye apne paas kuchh bhii faKHr ke qaabil nahii.n rakhte
taras khaa kar jinhe.n jantaa ne kursii par biThaayaa hai
vo KHud se to na uTThe.nge unhe.n tum hii uThaa denaa
ghaTaa.ii hai jinho.n ne itnii qiimat apne sikke kii
ye zimma hai tumhaaraa un kii qiimat tum ghaTaa denaa
jo vo phailaa.e.n daaman ye vasiyyat yaad kar lenaa
unhe.n har chiiz de denaa par un ko vote mat denaa

Kaifi Azmi
Nazm

aur bhi dukh hain zamane mein mohabbat ke sawa

kitnaa dilkash thaa samaa.n aaj se pahle pahle
kitnaa rangii.n thaa jahaa.n aaj se pahle pahle
aaj nazdiik se dekhaa jo zamaana mai.n ne
is ke har taur ko har rang ko jaanaa mai.n ne
is ke sab raaz-e-nihaa.n mujh pe 'ayaa.n hone lage
zarre zarre se sitam is ke bayaa.n hone lage
is kii ye doGlii suurat bhii nazar aane lagii
is kii badlii hai jo fitrat bhii samajh aane lagii
ye jahaa.n tang hai taariik hai tah-KHaana hai
qissa-e-ranj-o-alam dard kaa afsaana hai
ashk aa.nkho.n se yahaa.n roz bahaa karte hai.n
kitne dil aatish-e-furqat me.n jalaa karte hai.n
maut kaa Gam hai bichha.Dne kii sazaa bhii hai yahaa.n
jiite jii roz hii marne kaa maza bhii hai yahaa.n
bevgii bhii hai yatiimii hai bu.Dhaapaa hai yahaa.n
har KHushii ranj-o-alam kaa hii saraapaa hai yahaa.n
bhaa.ii ne bhaa.ii kaa Gam haif uThaayaa hai yahaa.n
kitne apno.n ko tah-e-KHaak sulaayaa hai yahaa.n
muflisii bhii hai yahaa.n bhuuk hai laachaarii hai
nasl-e-insaan pe insaan kaa KHuu.n taarii hai
kitnii aa.nkho.n se javaa.n sapne yahaa.n TuuTe hai.n
kitne ghar ahl-e-siyaasat ne yahaa.n luuTe hai.n
kitne jismo.n kii lagaa kartii hai bolii har dam
khelii jaatii hai yahaa.n KHuun kii holii har dam
aisii duniyaa ki jahaa.n saa.ns bhii lenaa hai muhaal
aisii duniyaa hai jahaa.n harf-e-muravvat kaa akaal
aisii duniyaa ki jahaa.n Gam kaa hai saayaa har pal
aisii duniyaa ki jahaa.n zulm hai chhaayaa har pal
aisii duniyaa ki jise dekh ke Dar jaate hai.n
log Gurbat se kabhii bhuuk se mar jaate hai.n
aisii duniyaa me.n ai duniyaa mirii sansaar mire
aisii duniyaa me.n ai mahbuub ai Gam-KHvaar mire
kyaa hu.aa dil bhii agar meraa kabhii TuuT gayaa
kyaa hu.aa jaan se pyaaraa bhii agar chhuuT gayaa
zindagii yuu.n bhii guzarnii hai guzar jaa.egii
ek din yaad tirii dil se utar jaa.egii
apne pyaaro.n ko sabhii roz jahaa.n khote hai.n
aisii duniyaa me.n jahaa.n aur bhii Gam hote hai.n
tujh ko khonaa hii faqat Gam kii nishaanii to nahii.n
tujh ko paanaa hii masarrat kii kahaanii to nahii.n
terii furqat se qayaamat to nahii.n utregii
tujh ko paa kar bhii ye duniyaa to nahii.n badlegii
tuu na hogaa to ka.ii aur Gam-e-jaa.n ho.nge
dard ke roz na.e baab farozaa.n ho.nge
ai mirii jaan-e-Gazal ai mirii duniyaa ke sukuu.n
terii aur merii mohabbat hai faqat ek fusuu.n
merii aa.nkho.n ke sivaa bhii to bahut kuchh hai yahaa.n
tere aur mere binaa bhii to daraKHshaa.n hai jahaa.n
suurat-e-qais na ban KHud ko yuu.n farhaad na kar
ik mohabbat ke liye ziist ko barbaad na kar
aur bhii dukh hai.n zamaane me.n mohabbat ke sivaa
raahate.n aur bhii hai.n vasl kii raahat ke sivaa

Sahar Alig
Nazm

marsiya gopal krishn gokhle

dilo.n me.n naqsh hai.n ab tak tirii zabaa.n ke suKHan
hamaarii raah me.n goyaa charaaG hai.n raushan
faqiir the jo tire dar ke KHaadmaan-e-vatan
unhe.n nasiib kahaa.n hogaa ab tiraa daaman
tire alam me.n vo is tarah jaan khote hai.n
ki jaise baap se chhuT kar yatiim rote hai.n

Chakbast Braj Narayan
Nazm

ek paigham apne nam

hinduu muslim bhed miTaa
sab se apnii yaarii rakh
chaahe apnii jaan ga.nvaa
aan vatan kii pyaarii rakh
dushman se bhii yaarii rakh
aisii bhii dildaarii rakh
maayuusii se mat ghabraa
koshish apnii jaarii rakh
pahle denii farz nibhaa
piichhe duniyaa-daarii rakh
duur safar par jaanaa hai
chalne kii tayyaarii rakh
khoTe sikke mat apnaa
aa.nkho.n me.n bedaarii rakh
Tho.nk-bajaa kar sab ko dekh
itnii to hushyaarii rakh
tere kaam ye aa.e.ngii
baate.n dhyaan me.n saarii rakh
chaahe jitne diip jalaa
ek galii a.ndhiyaarii rakh
'nuur' Gazal ke phuul khilaa
mashq-e-suKHan ko jaarii rakh
lafzo.n ko gul-e-rez banaa
nazm-o-Gazal meyaarii rakh

Noor muneeri
Nazm

dukhti haDDiyon ki wakalat

dikhtii haDDiyaa.n kahtii hai aaraam karo ab
dil kahtaa hai abhii nahii.n abhii to kaam pa.Daa hai sab
magar ek aur hii bolii boltaa hai dimaaG
pahle kaun saa tiir maar liyaa thaa aap ne jo ab phir chale hai.n jauhar dikhaane
sarau.Te kaa don khote aur sarshaar kaa KHudaa.ii faujdaarii bhii
ta.Dapte ho.nge qabr me.n pa.De pa.De
aap kii be-qaraariyaa.n dekh kar
duniyaa hii to badal Daalii aap ne apnii tahriiro.n aur taqriiro.n se
aur kyaa kahne hai.n aap kii siyaasat ke
soto.n ko jagaa diyaa aap ne
zer-dasto.n ko uThaa diyaa zabardasto.n ko giraa diyaa aap ne
sach-much kaa inqilaab hii to barpaa kar ke rakh diyaa aap ne
chho.D jaane diijiye bahut ho ga.ii janaab
sunahre harfo.n me.n likhaa jaa chukaa hai aap kaa naam an-likhii taariiKH me.n
aap vo hero hai.n ko.ii giit nahii.n gaataa jis ke
vo gumnaam sipaahii hai.n jise sirf
aasmaan kii aa.nkh ne dekhaa hotaa hai daad-e-shujaa.at dete
agar aap ke haatho.n vaaqa.ii ko.ii achchhaa kaam sarzad ho gayaa thaa to
yaqiinan pataa hogaa us kaa KHudaa ko
vo is kaa zaruur ajr degaa aap ko
aur sabr se ba.Dh kar kyaa ho saktaa hai ajr
sabr kiijiye zaraa
dukhtii haDDiyo.n kii bhii sun liijiye zaraa
is KHaana-KHaraab-e-dil kii maan kar hii to aap hu.e hai.n KHaana-KHaraab
hamesha bahkaayaa hai us ne aap ko
Galat-salat raasto.n par chalaayaa hai aap ko
jahaa.n chup rahne me.n maslahat thii vahaa.n bolne par uksaayaa hai aap ko
jab haath ba.Dhaa kar jaam uThaane kaa vaqt thaa to
inkisaarii ke chakkar me.n pha.nsaayaa hai aap ko
zaraa apne badan se pochhiye apnii umr aur phir puuchh kar dekhiye dil se
aap sattar ke hai.n naa magar badan kahe gaa saal
aur dil bataa.egaa chaaliis saal
is dil par KHuun kii gulaabii ne
huliya bigaa.D kar rakh diyaa hai achchhe-bhale insaan kaa
pa.Dhe-likkhe shariif aadmii ko dhakel diyaa hai
siyaasat ke qassaab-KHaane me.n
bha.ii jis kaa kaam usii ko saaje aur kare to The.ngaa baaje
aap kyuu.n pareshaan hote hai.n har barii KHabar par
vaise kabhii KHair kii KHabar bhii aa.ii hai vatan-e-aziiz se
yaad nahii.n rahaa aap ke to murshid bhii kahte the baar baar
vo kaam hamaarii zimmedaarii nahii.n hotaa jis kii anjaam-dahii kaa saamaan na de KHudaa
umar-faaruuq ko zeb detaa thaa fikrmand honaa
furaat ke kinaare bhuuk se mar jaane vaale kutte ke liye
is liye ki vo the KHaliifa-a-vaqt
to kan me.n KHvaah-maKHvaah
aap to kotvaal bhii nahii.n kisii shahr ke
aur chale hai.n puure malak kii fikr karne
balki saarii insaaniyat kaa Gam paal rakhaa hai aap ne to
mai.n ne pahle bhii kahaa shaa.iro.n kii bak bak na sunaa kare.n aap ziyaada
ba-qaul-e-KHudaa vo to aadii hai.n Galat-bayaanii ke
haahaa kaa.nTaa chubhe kisii ko ta.Dapte hai.n ham amiir saare jahaa.n kaa dard hamaare jigar me.n hai
aap ko auro.n kii pa.Dii hai.n pahle apnii to nabe.D le.n aap
charity begins at home janaab
aa.iye sukuun se baiThe do gha.Dii
ziyaada der kha.De rahne se aur ba.Dh jaa.egaa ghuTne kaa dard
kyaa KHayaal hai sabz chaa.e ke baare me.n
yaa phir pii liijiye ThanDaa miiThaa ruuh-afzaa
siine aasmaanii mausiiqii baaKH aur motzaarT kii
Dhiilaa chho.Diye zaraa a.asaab ko
so jaa.iye so jaa.iye nii.nd aa jaa.e agar
lorii duu.n aap ko
raat-din gardish me.n hai.n saat aasmaa.n
ho rahegaa kuchh na kuchh ghabraa.e.n kyaa

Mohammad Haneef Rame
Nazm

zaruri hai

achchhe aur bure kii sohbat apnaa rang dikhaatii hai
khoTe aur khare kii tum ko ho pahchaan zaruurii hai

Ataur Rahman Tariq
Nazm

jagmaga uTTha hai rang manch

aa.o zindagii zindagii khele.n
ye jhuuT hai ki mai.n tumhaare liye chaa.nd to.D ke laa saktaa huu.n
par is KHayaal kii sachchaa.ii ko hii ishq kahte hai.n
ruuh jab jaltii hai to kundan bantaa hai
terii bevafaa.ii kii is se achchhii vaj.h aur kyaa ho saktii hai
sub.h se roTii kamaane me.n lagaa hu.aa huu.n
ab jab shaam ho ga.ii hai to sharaab piine kaa man hotaa hai
mere daaG-e-dil me.n ek charaaG aisaa bhii hai
jo amaavas kii raat me.n merii bujhtii saa.nso.n ko garmaahaT detaa hai
aadmii kii khudaa.ii kaa vaqt kyuu.n nahii.n aataa
duniyaa mar rahii hai ko.ii use bachaane kyuu.n nahii.n aataa
tere aane se vo tamaam adhuure KHvaab puure ho ga.e
jinhe.n dekhnaa naa merii taqdiir me.n thaa aur naa tadbiir me.n
mai.n ek mash.huur shaa.ir nahii.n
par us se merii shaa.erii me.n dard kam to nahii.n ho jaataa
kore kaaGaz par bhii kuchh shabd baste hai.n
ham bas unhe.n pa.Dh nahii.n paate
kaun kis ke KHilaaf gavaahii de
sab ke man me.n ek chor to hai hii
merii gavaahii us kii jaan le saktii hai
gavaahii naa dii to meraa zamiir mujhe maar degaa
chand dosto.n ke afsaane ab paraa.e ho ga.e hai.n
ab khoTe sikke jeb me.n rakhne kaa man nahii.n hotaa
jab bhii kisii shamshaan ke paas se guzartaa huu.n
apnii auqaat pata lag jaatii hai
kal raat aa.iina dekh kar kyuu.n nahii.n soyaa
sub.h apne hii ghar me.n paraayaa ban gayaa
har shahr har galii me.n sirf logo.n kii chiiKHe.n sunaa.ii detii.n hai.n
raam rahiim ke is jhag.De me.n un dono.n ke alaava sab hai.n

Amit Brij sha
Nazm

duri

ammii abbaa kaise hai.n
Te.Dhe hai.n yaa siidhe hai.n
gum-sum rahne vaale hai.n
baate.n karne vaale hai.n
zehn-o-dil ke kaise hai.n
garm hai.n yaa phir ThanDe hai.n
pyaar luTaane vaale hai.n
aa.nkh dikhaane vaale hai.n
naaz uThaane vaale hai.n
Daa.nT pilaane vaale hai.n
dillii me.n kyo.n rahte hai.n
dillii me.n kyaa karte hai.n
khaanaa kaun banaataa hai
un ko kaun khilaataa hai
kin se baate.n karte hai.n
kin kii baate.n sunte hai.n
tanhaa kaise rahte hai.n
tanhaa.ii kyo.n sahte hai.n
kyo.n sunday me.n aate hai.n
uncle jaise lagte hai.n
sunday me.n bhii sote hai.n
chhuTTii ko bhii khote hai.n
ammii un se bolo naa
ho.nT zaraa tum kholo naa
bolo un se paas rahe.n
ham se bhii kuchh baat kare.n
ham logo.n kaa haal sune.n
apnii ko.ii baat kahe.n
bolo naa ki chust rahe.n
aise bhii na sust rahe.n
ham ko le kar shahr chale.n
ghuume.n phire.n aur mauj kare.n
ham me.n kaisii duurii hai
ye kaisii majbuurii hai

Ghazanfar
Nazm

dil ka moamla

ham be-hisaab mohabbat karte hai.n
kisii ko is qadar chaahe jaanaa
diivaangii ka vaahima hai
phuul nagar ke khoTe hu.e logo.n kii talaash
shahar me.n ha.ngaama KHariidte logo.n ke iflaas

Ahmed Sohail
Nazm

amrud aur mulla ji

kisii qasbe me.n ek thaa amruud
biiso.n me.n vo nek thaa amruud
pa.Dhne jaataa thaa vo namaaz vahaa.n
aadmii ik nazar na aa.e jahaa.n
KHauf us ko hamesha rahtaa thaa
aadmii ko.ii mujh ko khaa legaa
shauq bolaa ki ek din jaa.o
kisii masjid me.n jaa namaaz pa.Dho
chhoTii sii masjid ik qariib hii thii
the vahaa.n DaT ke baiThe mullaa jii
chupke chupke KHudaa kii le kar aas
chal ke jaa baiThaa juutiyo.n ke paas
juu.nhii sajde me.n us ne rakhaa sar
aa.e mullaa jii us taraf uTh kar
aise mullaa nadiide hote hai.n
dekh ke khaane hosh khote hai.n
halva khaate hai.n naan khaate hai.n
jab mile kuchh na jaan khaate hai.n

Lateef Farooqi
Nazm

firing

hame.n pataa chaltaa hai
bahut ma.amuulii vaj.h se
firing hotii rahtii hai
do dost ek chi.Diyaa ko
kap.De se banii ek Darii hu.ii chi.Diyaa ko maarne ke liye nishaana baazii kii mashq kar rahe the
yaa do bhaa.ii chhat par rakhe hu.e
ghii ke KHaalii Dibbo.n sharbat kii botalo.n ko
aasaanii se niiche laanaa chaah rahe the
yaa diivaar par chipke hu.e
pachaas paise ke khoTe sikke ko
zamiin par giraane ke liye
itnii goliyaa.n chalaa.ii.n ga.ii.n
ki log Dar ga.e

Zeeshan Sahil
Nazm

chhink

mai.n ne puuchhaa hakiim daadaa se
chhii.k aaKHir kahaa.n se aatii hai
muskuraa kar javaab unho.n ne diyaa
naak ke darmiyaa.n se aatii hai
mai.n ne un se kahaa ki daadaa-jaan
is se matlab to hal nahii.n hotaa
tab vo bole ki naak kii ja.D me.n
ek hotaa hai chhii.k kaa khotaa
chhii.k rahtii hai apne khote me.n
apne anDe usii me.n detii hai
baahar aanaa ho jab kabhii us ko
ek bharpuur u.Daan letii hai
chhii.k ko chhe.Dte bhii hai.n kuchh log
le ke nasvaar Daal kar battii
is se vo kulbulaa ke uThtii hai
zor se jhaa.Dtii hai dolattii
jab nikalte hai.n chhii.k ke bachche
aadmii ko zukaam hotaa hai
aa.nkh jaltii hai naak bahtii hai
saa.ns lenaa haraam hotaa hai
sun ke ye daastaan-e-vahshat-naak
naak me.n chyuu.nTiyaa.n sii re.ng ga.ii.n
meraa saaraa vajuud Dol gayaa
ek bhau.nchaal aa gayaa haachii.n

Mohammad Yunus hargaanvii
Nazm

alamat

safar zindagii kii
alaamat hai lekin
sabhii raaste
khoTe sikko.n kii tarah
mirii jeb me.n
jaane kab se pa.De hai.n
havaa.o.n me.n piilaa
dhu.aa.n bhar gayaa hai
ka.ii saal pahle
mai.n un se milaa thaa
vo jin kii raaho.n me.n
thii raushnii
unho.n ne kahaa thaa
safar zindagii kii alaamat hai
chalte raho
magar aaj mai.n
us jagah aa gayaa huu.n
jahaa.n kuchh nahii.n hai
havaa.o.n me.n piile
dhu.e.n ke sivaa

Shahid Aziz
Nazm

khoTe sikke

kahte hai.n
khoTe sikke baazaar me.n hamesha nahii.n chalte
ham dekhte hai.n
khoTe sikke
hamesha baazaar me.n chalte rahte hai.n
khoTe sikko.n ke liye
hameshgii kii taariif
shaayad muKHtalif hai

Mohammad Aazam
Nazm

chhoTe qad ke log

buland baa.ng da.avo.n kii
aavaaze.n
khoTe sikko.n kii tarah
bajtii hai.n
phir bhii chhoTe qad ke log
in qad-aavar aavaazo.n ko
sunte rahte hai.n
kaaGaz ke Tuk.Do.n kii
ab ko.ii qiimat na rahii
phir bhii bhuukii aa.nkhe.n
unhe.n Dhuu.nDhtii hai.n
aur naakaam rahtii hai.n
aur be-rahm haath
unhe.n jam.a karte rahte hai.n
chhoTe qad ke log
apnii aavaaz kho chuke hai.n
vo sirf dekh sakte hai.n
aur sun sakte hai.n

Ehtisham Akhtar
Nazm

sukut

so rahii thii.n naddiyaa.n aur jhuk ga.e the barg-o-baar
bujh gayaa thaa KHaak kii nabzo.n me.n hastii kaa sharaar
chaa.ndnii maddham sii thii dariyaa kii lahre.n thii.n KHamosh
be-KHudii kii bazm me.n TuuTe pa.De the saaz-e-hosh
bhiinii bhiinii buu-e-gul raqs-e-havaa kuchh bhii na thaa
sehn-e-gulshan me.n udaasii ke sivaa kuchh bhii na thaa
ik hijaab-e-tiiragii thaa diida-e-bedaar par
kuchh dhu.aa.n saa chhaa rahaa thaa husn ke anvaar par
is dhu.e.n me.n ruuh kii taabindagii khote hu.e
mai.n ne dekhaa nau-e-insaanii ko gum hote hu.e

Jauhar Nizami
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now