Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "kone"

Nazm MATCHES FOR "kone"

Nazm

wo kamra yaad aata hai

mai.n jab bhii
zindagii kii chilchilaatii dhuup me.n tap kar
mai.n jab bhii
duusro.n ke aur apne jhuuT se thak kar
mai.n sab se la.D ke KHud se haar ke
jab bhii us ek kamre me.n jaataa thaa
vo halke aur gahre kattha.ii ra.ngo.n kaa ik kamra
vo behad mehrbaa.n kamra
jo apnii narm muTThii me.n mujhe aise chhupaa letaa thaa
jaise ko.ii maa.n
bachche ko aa.nchal me.n chhupaa le
pyaar se Daa.nTe
ye kyaa aadat hai
jaltii dopahar me.n maare maare ghuumte ho tum
vo kamra yaad aataa hai
dabiiz aur KHaasaa bhaarii
kuchh zaraa mushkil se khulne vaalaa vo shiisham kaa darvaaza
ki jaise ko.ii akkha.D baap
apne khurdure siine me.n
shafqat ke samundar ko chhupaa.e ho
vo kursii
aur us ke saath vo ju.Dvaa.n bahan us kii
vo dono.n
dost thii.n merii
vo ik gustaaKH mu.nh-phaT aa.iina
jo dil kaa achchhaa thaa
vo be-ha.ngam sii almaarii
jo kone me.n kha.Dii
ik buu.Dhii annaa kii tarah
aa.iine ko tambiih kartii thii
vo ik gul-daan
nanhaa saa
bahut shaitaan
un dino.n pe ha.nstaa thaa
dariicha
yaa zehaanat se bharii ik muskuraahaT
aur dariiche par jhukii vo bel
ko.ii sabz sargoshii
kitaabe.n
taaq me.n aur shelf par
sanjiida ustaanii banii baiThii.n
magar sab muntazir is baat kii
mai.n un se kuchh puuchhuu.n
sirhaane
nii.nd kaa saathii
thakan kaa chaara-gar
vo narm-dil takiya
mai.n jis kii god me.n sar rakh ke
chhat ko dekhtaa thaa
chhat kii ka.Diyo.n me.n
na jaane kitne afsaano.n kii ka.Diyaa.n thii.n
vo chhoTii mez par
aur saamne diivaar par
aavezaa.n tasviire.n
mujhe apnaa.iyat se aur yaqii.n se dekhtii thii.n
muskuraatii thii.n
unhe.n shak bhii nahii.n thaa
ek din
mai.n un ko aise chho.D jaa.uu.ngaa
mai.n ik din yuu.n bhii jaa.uu.ngaa
ki phir vaapas na aa.uu.ngaa

Javed Akhtar
Nazm

muflisi

jab aadmii ke haal pe aatii hai muflisii
kis kis tarah se us ko sataatii hai muflisii
pyaasaa tamaam roz biThaatii hai muflisii
bhuukaa tamaam raat sulaatii hai muflisii
ye dukh vo jaane jis pe ki aatii hai muflisii
kahiye to ab hakiim kii sab se ba.Dii hai shaa.n
ta.aziim jis kii karte hai.n to ab aur KHaa.n
muflis hu.e to hazrat-e-luqmaa.n kiyaa hai yaa.n
iisaa bhii ho to ko.ii nahii.n puuchhtaa miyaa.n
hikmat hakiim kii bhii Dubaatii hai muflisii
jo ahl-e-fazl aalim o faazil kahaate hai.n
muflis hu.e to kalma talak bhuul jaate hai.n
vo jo Gariib-Gurabaa ke la.Dke pa.Dhaate hai.n
un kii to umr bhar nahii.n jaatii hai muflisii
muflis kare jo aan ke mahfil ke biich haal
sab jaane.n roTiyo.n kaa ye Daalaa hai is ne jaal
gir gir pa.De to ko.ii na liye use sambhaal
muflis me.n hove.n laakh agar ilm aur kamaal
sab KHaak bech aa ke milaatii hai muflisii
jab roTiyo.n ke baTne kaa aa kar pa.De shumaar
muflis ko deve.n ek tava.ngar ko chaar chaar
gar aur maa.nge vo to use jhi.Dke.n baar baar
muflis kaa haal aah bayaa.n kyaa karuu.n mai.n yaar
muflis ko is jagah bhii chabaatii hai muflisii
muflis kii kuchh nazar nahii.n rahtii hai aan par
detaa hai apnii jaan vo ek ek naan par
har aan TuuT pa.Dtaa hai roTii ke KHvaan par
jis tarah kutte la.Dte hai.n ik ustuKHvaan par
vaisaa hii mufliso.n ko la.Daatii hai muflisii
kartaa nahii.n hayaa se jo ko.ii vo kaam aah
muflis kare hai us ke ta.ii.n insiraam aah
samjhe na kuchh halaal na jaane haraam aah
kahte hai.n jis ko sharm-o-hayaa na.ng-o-naam aah
vo sab hayaa-o-sharm u.Daatii hai muflisii
ye muflisii vo shai hai ki jis ghar me.n bhar ga.ii
phir jitne ghar the sab me.n usii ghar ke dar ga.ii
zan bachche rote hai.n goyaa naanii guzar ga.ii
ham-saaya puuchhte hai.n ki kyaa daadii mar ga.ii
bin murde ghar me.n shor machaatii hai muflisii
laazim hai gar Gamii me.n ko.ii shor-Gul machaa.e
muflis baGair Gam ke hii kartaa hai haa.e haa.e
mar jaave gar ko.ii to kahaa.n se use uThaa.e
is muflisii kii KHvaariyaa.n kyaa kyaa kahuu.n mai.n haa.e
murde ko be kafan ke ga.Daatii hai muflisii
kyaa kyaa muflisii kii kahuu.n KHvaarii phaka.Diyaa.n
jhaa.Duu baGair ghar me.n bikhartii hai.n jhaka.Diyaa.n
kone me.n jaale lapTe hai.n chhappar me.n maka.Diyaa.n
paisaa na hove jin ke jalaane ko lak.Diyaa.n
dariyaa me.n un ke murde bahaatii hai muflisii
biibii kii nath na la.Dko.n ke haatho.n ka.De rahe
kap.De miyaa.n ke baniye ke ghar me.n pa.De rahe
jab ka.Diyaa.n bik ga.ii.n to kha.nDar me.n pa.De rahe
zanjiir ne kivaa.D na patthar ga.De rahe
aaKHir ko ii.nT ii.nT khudaatii hai muflisii
naqqaash par bhii zor jab aa muflisii kare
sab rang dam me.n kar de musavvir ke kirkire
suurat bhii us kii dekh ke mu.nh khi.nch rahe pare
tasviir aur naqsh me.n kyaa rang vo bhare
us ke to mu.nh kaa rang u.Daatii hai muflisii
jab KHuub-ruu pe aan ke pa.Dtaa hai din siyaah
phirtaa hai bose detaa hai har ik ko KHvaah-maKHvaah
hargiz kisii ke dil ko nahii.n hotii us kii chaah
gar husn ho hazaar ruupe kaa to us ko aah
kyaa kau.Diyo.n ke mol bikaatii hai muflisii
us KHuub-ruu ko kaun de ab daam aur diram
jo kau.Dii kau.Dii bose ko raazii ho dam-ba-dam
Topii puraanii do to vo jaane kulaah-e-jism
kyuu.nkar na jii ko us chaman-e-husn ke ho Gam
jis kii bahaar muft luTaatii hai muflisii
aashiq ke haal par bhii jab aa muflisii pa.De
ma.ashuuq apne paas na de us ko baiThne
aave jo raat ko to nikaale vahii.n use
is Dar se ya.anii raat o dhannaa kahii.n na de
tohmat ye aashiqo.n ko lagaatii hai muflisii
kaise hii dhuum-dhaam kii ranDii ho KHush-jamaal
jab muflisii ho kaan pa.De sar pe us ke jaal
dete hai.n us ke naach ko ThaTThe ke biich Daal
naache hai vo to farsh ke uupar qadam sambhaal
aur us ko u.ngliyo.n pe nachaatii hai muflisii
us kaa to dil Thikaane nahii.n bhaav kyaa bataa.e
jab ho phaTaa dupaTTa to kaahe se mu.nh chhupaa.e
le shaam se vo sub.h talak go ki naache gaa.e
auro.n ko aaTh saat to vo do Take hii paa.e
is laaj se ise bhii lajaatii hai muflisii
jis kasbii ranDii kaa ho halaakat se dil hazii.n
rakhtaa hai us ko jab ko.ii aa kar tamaash-bii.n
ik paun paise tak bhii vo kartii nahii.n nahii.n
ye dukh usii se puuchhiye ab aah jis ke ta.ii.n
sohbat me.n saarii raat jagaatii hai muflisii
vo to ye samjhe dil me.n ki Dhelaa jo paa.uu.ngii
dam.Dii ke paan dam.Dii ke missii ma.ngaa.uu.ngii
baaqii rahii chhadaam so paanii bharaa.uu.ngii
phir dil me.n sochtii hai ki kyaa KHaak khaa.uu.ngii
aaKHir chabiinaa us kaa bhunaatii hai muflisii
jab muflisii se hove kalaavant kaa dil udaas
phirtaa hai le tambuure ko har ghar ke aas-paas
ik paav ser aane kii dil me.n lagaa ke aas
gorii kaa vaqt hove to gaataa hai vo babhaas
yaa.n tak havaas us ke u.Daatii hai muflisii
muflis biyaah beTii kaa kartaa hai bol bol
paisaa kahaa.n jo jaa ke vo laave jahez mol
joruu kaa vo galaa ki phuuTaa ho jaise Dhol
ghar kii halaal-KHorii talak kartii hai ThiThol
haibat tamaam us kii uThaatii hai muflisii
beTe kaa biyaah ho to na byaahii na saathii hai
ne raushnii na baaje kii aavaaz aatii hai
maa.n piichhe ek mailii chadar o.Dhe jaatii hai
beTaa banaa hai duulhaa to baavaa baraatii hai
muflis kii ye baraat cha.Dhaatii hai muflisii
gar byaah kar chalaa hai sahar ko to ye balaa
shahdaar naanaa hiij.Daa aur bhaaT mu.nDcha.Daa
khii.nche hu.e use chale jaate hai.n jaa-ba-jaa
vo aage aage la.Dtaa hu.aa jaataa hai chalaa
aur piichhe Tap.Diyo.n ko bajaatii hai muflisii
darvaaze par zanaane bajaate hai.n taaliyaa.n
aur ghar me.n baiThii Domnii detii hai.n gaaliyaa.n
maalan gale kii haar ho dau.Dii le Daaliyaa.n
saqqaa kha.Daa sunaataa hai baate.n razaaliyaa.n
ye KHvaarii ye KHaraabii dikhaatii hai muflisii
ko.ii shuum be-hayaa ko.ii bolaa nikhaTTuu hai
beTii ne jaanaa baap to meraa nikhaTTuu hai
beTe pukaarte hai.n ki baabaa nikhaTTuu hai
biibii ye dil mai.n kahtii hai achchhaa nikhaTTuu hai
aaKHir nikhaTTuu naam dharaatii hai muflisii
muflis kaa dard dil me.n ko.ii Thaantaa nahii.n
muflis kii baat ko bhii ko.ii maantaa nahii.n
zaat aur hasab-nasab ko ko.ii jaantaa nahii.n
suurat bhii us kii phir ko.ii pahchaantaa nahii.n
yaa.n tak nazar se us ko giraatii hai muflisii
jis vaqt muflisii se ye aa kar hu.aa tabaah
phir ko.ii is ke haal pa kartaa nahii.n nigaah
daaliidarii kahe ko.ii Thahraa de ruu-siyaah
jo baate.n umr bhar na sunii hove.n us ne aah
vo baate.n us ko aa ke sunaatii hai.n muflisii
chuulhaa tavaanaa paanii ke maTke me.n aabii hai
piine ko kuchh na khaane ko aur ne rakaabii hai
muflis ke saath sab ke ta.ii.n be-hijaabii hai
muflis kii joruu sach hai ki yaa.n sab kii bhaabii hai
izzat sab us ke dil kii ga.nvaatii hai muflisii
kaisaa hii aadmii ho par iflaas ke tufail
ko.ii gadhaa kahe use Thahraa de ko.ii bail
kap.De phaTe tamaam ba.Dhe baal phail phail
mu.nh KHushk daa.nt zard badan par jamaa hai mail
sab shakl qaidiyo.n kii banaatii hai muflisii
har aan dosto.n kii mohabbat ghaTaatii hai
jo aashnaa hai.n un kii to ulfat ghaTaatii hai
apne kii mehr Gair kii chaahat ghaTaatii hai
sharm-o-hayaa o izzat-o-hurmat ghaTaatii hai
haa.n naaKHun aur baal ba.Dhaatii hai muflisii
jab muflisii hu.ii to sharaafat kahaa.n rahii
vo qadr zaat kii vo najaabat kahaa.n rahii
kap.De phaTe to logo.n me.n izzat kahaa.n rahii
ta.aziim aur tavaazo.a kii baabat kahaa.n rahii
majlis kii juutiyo.n pe biThaatii hai muflisii
muflis kisii kaa la.Dkaa jo le pyaar se uThaa
baap us kaa dekhe haath kaa aur paa.nv kaa ka.Daa
kahtaa hai ko.ii juutii na leve kahii.n churaa
naT-khaT uchakkaa chor daGaabaaz gaTh-kaTaa
sau sau tarah ke aib lagaatii hai muflisii
rakhtii nahii.n kisii kii ye Gairat kii aan ko
sab KHaak me.n milaatii hai hurmat kii shaan ko
sau mehnato.n me.n us kii khapaatii hai jaan ko
chorii pe aa ke Daale hii muflis ke dhyaan ko
aaKHir nadaan bhiik ma.ngaatii hai muflisii
duniyaa me.n le ke shaah se ai yaar taa-faqiir
KHaaliq na muflisii me.n kisii ko kare asiir
ashraaf ko banaatii hai ik aan me.n faqiir
kyaa kyaa mai.n muflisii kii KHaraabii kahuu.n 'naziir'
vo jaane jis ke dil ko jalaatii hai muflisii

Nazeer Akbarabadi
Nazm

kisan

chiir ke saal me.n do baar zamii.n kaa siina
dafn ho jaataa huu.n
gudgudaate hai.n jo suuraj ke sunahre naaKHun
phir nikal aataa huu.n
ab nikaltaa huu.n to itnaa ki baTore jo ko.ii daaman me.n
daaman phaT jaa.e
ghar ke jis kone me.n le jaa ke ko.ii rakh de mujhe
bhuuk vahaa.n se haT jaa.e
phir mujhe piiste hai.n, guu.ndhte hai.n, se.nkte hai.n
guu.ndhne se.nkne me.n shakl badal jaatii hai
aur ho jaatii hai mushkil pahchaan
phir bhii rahtaa huu.n kisaan
vahii KHasta, bad-haal
qarz ke panja-e-KHuunii.n me.n niDhaal
is daraa.ntii ke tufail
kuchh hai maazii se Ganiimat miraa haal
haal se hogaa hasii.n istiqbaal
uThte suuraj ko zaraa dekho to
ho gayaa saaraa ufuq laal.n-laal

Kaifi Azmi
Nazm

mohabbat

pahle vo rang thii
phir ruup banii
ruup se jism me.n tabdiil hu.ii
aur phir jism se bistar ban kar
ghar ke kone me.n lagii rahtii hai
jis ko
kamre me.n ghaTaa sannaaTaa
vaqt-be-vaqt uThaa letaa hai
khol letaa hai bichhaa, letaa hai

Nida Fazli
Nazm

barsat ki bahaaren

phuulo.n kii sej uupar sote hai.n kitne ban-ban
so hai.n gulaabii jo.De phuulo.n ke haar abran
kitno.n ke ghar hai khaanaa sonaa lage hai aa.ngan
kone me.n pa.D rahii hai.n sar mu.nh lapeT sogan
kyaa kyaa machii hai.n yaaro barsaat kii bahaare.n

Nazeer Akbarabadi
Nazm

ham-sae ke nam

kuchh tum socho
kuchh mai.n sochuu.n
kyuu.n uu.nchii hai.n ye diivaare.n
kab tak ham in par sar maare.n
kab tak ye a.ndhere rahne hai.n
kiina ke ye ghere rahne hai.n
chalo apne darvaaze khole.n
aur ghar ke baahar aa.e.n ham
dil Thahre jahaa.n hai.n barso.n se
vo ik nukka.D hai nafrat kaa
kab tak is nukka.D par Thahre.n
ab is ke aage jaa.e.n ham
bas tho.Dii duur ik dariyaa hai
jahaa.n ek ujaalaa bahtaa hai
vaa.n lahro.n lahro.n hai.n kirne.n
aur kirno.n kirno.n hai.n lahre.n
in kirno.n me.n
in lahro.n me.n
ham dil ko KHuub nahaane de.n
siino.n me.n jo ik patthar hai
us patthar ko ghul jaane de.n
dil ke ik kone me.n bhii chhupii
gar tho.Dii sii bhii nafrat hai
is nafrat ko dhul jaane de.n
dono.n kii taraf se jis din bhii
iz.haar nadaamat kaa hogaa
tab jashn mohabbat kaa hogaa

Javed Akhtar
Nazm

nind pure bistar mein nahin hoti

niind puure bistar me.n nahii.n hotii
vo pala.ng ke ek kone me.n
daa.e.n
yaa baa.e.n
kasii maKHsuus takiye kii
to.D-mo.D me.n chhupii hotii hai
jab takiye aur gardan me.n
samjhauta ho jaataa hai
to aadmii chain se
so jaataa hai

Nida Fazli
Nazm

chhoTi si hansi

suunii suunii thii fazaa
mai.n ne yuu.nhii
us ke baalo.n me.n gu.ndhii KHaamoshiyo.n ko chhuu liyaa
vo mu.Dii
tho.Daa ha.nsii
mai.n bhii ha.nsaa
phir hamaare saath
nadiyaa.n vaadiyaa.n
kohsaar baadal
phuul ko.npal
shahr ja.ngal
sab ke sab ha.nsne lage
ik mohalle me.n
kisii ghar ke
kisii kone kii
chhoTii sii ha.nsii ne
duur tak phailii hu.ii duniyaa ko
raushan kar diyaa hai
zindagii me.n
zindagii kaa rang phir se bhar diyaa hai

Nida Fazli
Nazm

mahatma-gandhi ka qatl

us lutf-o-karam ke aa.ii.n me.n mar kar bhii na kuchh tarmiim hu.ii
is mulk ke kone kone me.n miTTii bhii tirii taqsiim hu.ii

Anand Narayan Mulla
Nazm

subh-e-nau-ruz

phuuT pa.Dii.n mashriq se kirne.n
haal banaa maazii kaa fasaana
guu.njaa mustaqbil kaa taraana
bheje hai.n ahbaab ne tohfe
aTe pa.De hai.n mez ke kone
dulhan banii hu.ii hai.n raahe.n
jashn manaa.o saal-e-nau ke

Sahir Ludhianvi
Nazm

be-parwah umr

dekho tum gintii numbero.n ke hisaab
kitaab me.n mat jaa.o
sab dikhaavaa chhalaavaa saa hai
mai.n to abhii bhii vahii sTaapuu khelne kii baarii
ke intizaar me.n huu.n
ghar par pair paTaktii nannhii bachchii sii
moTe moTe aa.nsuu liye kone me.n baiThii sii huu.n
baarisho.n me.n chhap chhap kar miTTii me.n sane paa.nv
se be-parvaah havaa sii huu.n
kohre se bhare shiishe par kuchh ulTaa kuchh
siidhaa kuchh sachchaa jhuuTaa likhtii miTaatii
sii huu.n
KHayaal me.n
apne is kesarii printed phuulo.n se bhare firaaq me.n
titlii ke piichhe dau.D lagaatii
baavlii sii ho
tum baar baar janm-din par call kar
umr kaa havaala na do
mere liye to dil abhii bhii ruuh kii baa.e.n taraf hai
jo biisvii.n saal me.n thaa shaayad

divya maheshwari
Nazm

parinda kamre mein rah gaya

ek aadmii puraane calender par nishaan lagaa rahaa thaa
duusraa nayaa calender haath me.n maro.D rahaa thaa
tiisare kaa chehra chauthe aadmii ke chehre par lag gayaa thaa
aadmii tiin the
ye tiin samte.n chaukor kamre ke KHaalii kone ko
dekh rahii thii.n
inhii tiin samto.n ko kal saaraa shahr ban.naa thaa
vo tiino.n
kamre ke tiino.n kono.n me.n jaa kar kha.De ho ga.e
aur sochne lage
kis kaa konaa hai jo KHaalii rah gayaa hai
achaanak parda hilaa
aur ek parinda
is kone me.n aa kar baiTh gayaa
tiino.n ke mu.nh se niklaa
ma.asuum
unhe.n pataa chalaa ki vo tiino.n vaqt kii qaid me.n the
tiino.n ne aag jalaa.ii
aur bole
aag jalne tak ye samte.n hamaarii rahe.ngii
aag chauthe kone me.n lagaa.ii ga.ii thii
zindagii ke ruKH ba.Dhte jaa rahe the
suuraj ne chaar kirne.n kamre ke andar phe.nkii.n
unho.n ne paa.nch paa.nch gaz kaa sunahrii-pan apne gird lapeTaa
suuraj kii tiin baa.nhe.n TuuT ga.ii.n
unho.n ne apnii ek ek u.nglii kaaTii
aur bole
''ham ne apnii u.ngliyo.n se zindagii kaa sukuut to.Daa
parinda kamre me.n rah gayaa

Sara Shagufta
Nazm

tum hanste kyun ho

kyaa ab raat aise hii
guzar jaa.egii
ye raat hii to hai
jo tahliil ho jaatii hai ek nuqte me.n
aur ghuumtii hai
mere gird kaale bhinbhinaate hu.e
bha.nvre kii tarah
vo mere kaano.n mirii aa.nkho.n
merii gardan aur mere ro.e.n ro.e.n me.n
bhinbhinaatii hai
merii baGlo.n ke baalo.n se ulajhtii hu.ii
mere jism ke kone khudro.n me.n
gudgudaatii hu.ii
ye raat mere uupar phail jaatii hai
achaanak
o.Dh letii hai mujhe
mere jism kii por por me.n
ek jal-tara.ng chhe.D detii hai
mai.n nii.nd me.n uThtii huu.n
miraa halq KHushk ho rahaa hai
paanii kaa ek gilaas ThanDaa yaKH
mere ho.nTo.n mere halq mere siine
ko tar kartaa hu.aa
mere jism kii jal-tara.ng me.n mil jaataa hai
mai.n darvaaze par dastak detii huu.n
tum sun rahe ho
raat kii jal-tara.ng mere jism se
phuuT rahii hai
darvaaza khultaa hai
mai.n tumhaare aadhe na.nge badan ko
daboch letii huu.n
tumhaarii naaf ke ga.Dhe me.n
naak kii nok ghuse.Dtii huu.n
tum muskuraa rahe ho
raat kii sharaarat mere jism par
phaile hu.e dekh kar
tum ha.nste
raat kono.n khudro.n me.n phail rahii hai
mai.n tumhaare kap.De utaar detii huu.n
aur vo khel kheltii huu.n
jo raat mere saath khel rahii thii
mai.n tumhaare jism ke gird
apnii zabaan apne daa.nto.n aur naaKHuno.n ke saath
bhinbhinaane lagtii huu.n
tum muskuraa rahe ho
tumhaarii muskuraahaT
mere jism kii poro.n ko aur khol rahii hai
mai.n zaKHmii kar detii huu.n tumhe.n
tum ha.ns rahe ho
raat ke paro.n pe savaar bha.nvre kii tarah
mujhe bhinbhinaate dekh kar
tumhaarii kushaada aa.nkho.n ke kone
phailne lagte hai.n
tumhaaraa jism aka.D jaataa hai
nahii.n aaj tum
tum khilkhilaate ho
mai.n tumhaare ak.De hu.e jism par
apnii khulii hu.ii poro.n ko rakh detii huu.n
tumhaaraa jism raat ke jhaag se bhar jaataa hai
tum ha.nste ho
ha.nste hii rahte ho

Azra Abbas
Nazm

kal ki baat

aise hii baiThe idhar bhayyaa the daa.e.n jaanib
un ke nazdiik ba.Dii aapaa shabaana ko liye
apnii sasuraal ke kuchh qisse latiife baate.n
yuu.n sunaatii thii.n ha.nse pa.Dte the sab
saamne ammaa.n vahii.n khole piTaarii apnii
mu.nh bhare paan se samdhan kii inhii.n baato.n par
jhunjhlaatii thii.n kabhii tanz se kuchh kahtii thii.n
ham ko ghere hu.e baiThii thii.n na.iima shahnaaz
vaqfe vaqfe se kabhii dono.n me.n chashmak hotii
hasb-e-ma.amuul sambhaale hu.e KHaana-daarii
ma.njhlii aapaa kabhii aatii kabhii jaatii thii.n
ham se duur abbaa usii kamre ke ik kone me.n
kaaGzaat apne araazii ke liye baiThe the
yak-ba-yak shor hu.aa mulk nayaa mulk banaa
aur ik aan me.n mahfil hu.ii darham-barham
aa.nkh jo kholii to dekhaa ki zamii.n laal hai sab
taqviyat zehn ne dii Thahro nahii.n KHuun nahii.n
paan kii piik hai ye ammaa.n ne thuukii hogii

Akhtarul Iman
Nazm

yaum-e-mazdur

diivaar pe mazduur kii tasviir sajaa kar
aKHbaar ke kone me.n KHabar ek lagaa kar
kuchh card bhii mazduur ke haatho.n me.n uThaa kar
do-chaar Gariibo.n ko bhii dhartii pe biThaa kar
un me.n se kisii ek ko stage par laa kar
phir us kii kahaanii sabhii logo.n ko sunaa kar
taqriir karaa kar to kabhii taalii bajaa kar
mazduur ko mazduur kaa irfaan dilaa kar
aur apne ta.ii.n kaar-e-muqaddas ko nibhaa kar
har saal ye ehsaan jataate hai.n ba.De log
mazduur kaa phir jashn manaate hai.n ba.De log

Neel Ahmed
Nazm

wo moD

phir tirii titlii-numaa suurat mujhe yaad aa ga.ii
mujh ko vo lamha abhii bhuulaa nahii.n
ek kone me.n ka.ii logo.n ke saath
guftuguu me.n munhamik khoyaa hu.aa
merii aa.ankho.n ne kabhii tujh saa ko.ii dekhaa na thaa
mai.n tujhe takne lagaa
der tak taktaa rahaa
aa.nkh se kaano.n se ho.nTo.n se tujhe taktaa rahaa
kyaa ajab diivaangii thii
rashk aayaa baKHt pe apne mujhe
lafz ke asraar mujh pe vaa hu.e
ghanTiyaa.n sii mere kaano.n me.n bajii.n
nuur ke sailaab me.n Duubii hu.ii is shaam kii
ek ik saa.at tire ham-raah hai
ruk gayaa hai vaqt is ik mo.D par
mai.n judaa.ii ke liye majbuur thaa
tuu judaa.ii par jahaa.n masruur thaa

Shahryar
Nazm

chautha aadmi

baiThe baiThe yuu.nhii qalam le kar
mai.n ne kaaGaz ke ek kone par
apnii maa.n
apne baap ke do naam
ek gheraa banaa ke kaaT diye
aur
is gol daa.ere ke qariib
apnaa chhoTaa saa naam Taa.nk diyaa
mere uThte hii, mere bachche ne
puure kaaGaz ko le kar phaa.D diyaa!

Nida Fazli
Nazm

kal raat Dhale

almaarii kii chaabii kho ga.ii thii
vo za.ng bharii puraanii chaabii
mai.n ne use kone kone Dhuu.nDaa
mujh ko to nahii.n milii kahii.n bhii
mai.n ne jo nazar uThaa ke dekhaa
almaarii to band hii nahii.n thii
miTTii kii taho.n me.n lipTe jaale
ik KHaak kaa Dher lag rahe the

Zehra Nigaah
Nazm

mohabbat

tujh ko gar merii zaruurat hai
to phir jaan-e-hayaat
apne farsuuda mohabbat ke KHayaalaat badal
hijr o Gam ra.nj-o-alam vasl o firaaq
is kaThin vaqt me.n
bejaa sii shikaayaat na kar
dekh vo sab bhii to mai.n
dekh ki pahu.nchaa huu.n yahaa.n
jis ko tuu dekh le ik baar
to terii aa.nkhe.n
umr bhar sakte ke aalam se na nikal paa.e.n
dekh mai.n is ajab maqaam pe
aane se qabl
aisii raaho.n se guzar aayaa huu.n
jahaa.n se tuu
ek pal ko bhii jo guzre
to tere zaKHm-e-paa
ban ke naasuur tujhe
dard me.n rakkhe.n har dam
dekh mai.n chaahat-o-ulfat kaa to qaa.il magar
har ek chiiz har ek rishta zamaane me.n
mohabbat hai magar....
dekh is vaqt mere des me.n
phailii hu.ii hai
har taraf KHuun kii baaruud kii
nafrat kii phuvaar
sun zaraa kone me.n rote hu.e
bachche kii pukaar
dekh baaruud ke haatho.n se ye
luth.Daa hu.aa jism
dekh rozii ko bhaTaktaa hu.aa
bachcho.n kaa vo baap
dekh phir so ga.e
is des ke bachche bhuuke
dekh us maa.n kii taraf dekh
ki jis kii aa.nkhe.n
nazre.n kho baiThii hai.n rote hu.e
us aas pe ki
lauT aa.egaa vo us kaa
javaan la.al kabhii
ghar se niklaa thaa jo
haatho.n me.n degreeyo.n ko liye...
aaj tak lauT ke aayaa nahii.n
umre.n biitii.n...
mujh ko ye dard rakhaa karte hai.n
niindo.n se pare....
soch is dard me.n
chaahat kii kise KHvaahish ho
soch is dard me.n raahat kii
kise KHvaahish ho
mujh ko jo karnaa hai
vo ab un ke liye karnaa hai
mujh ko jiinaa hai to bas
un ke liye jiinaa hai
mai.n ne maanaa ki nahii.n aur ko.ii
tujh saa hasii.n...
par mujhe soch kii
is lahr ne aa gheraa hai
jis se chhuTkaaraa merii jaan
ab mumkin hii nahii.n
tujh ko gar merii zaruurat hai
to phir jaan-e-hayaat
apne farsuuda mohabbat ke KHayaalaat badal
haath me.n haath de
aur phir tuu mere saath me.n chal...

Nadeem Gullani
Nazm

chyunTi-bhar aaTa

ham kis dukh se apne makaan faroKHt karte hai.n
aur bhuuk ke liye chyuu.nTii-bhar aaTaa KHariidte hai.n
hame.n band kamro.n me.n kyuu.n piro diyaa gayaa hai
ek din kii umr vaale to abhii darvaaza taak rahe hai.n
chaal lahuu kii buu.nd buu.nd maa.ng rahii hai
kisii ko churaanaa ho to sab se pahle us ke qadam churaa.o
tum chiith.De par baiThe zabaan pe phuul ho
aur aavaaz kor sii kor
insaan kaa piyaala samundar ke pyaale se miTTii nikaaltaa hai
miTTii ke saa.np banaataa hai aur bhuuk paaltaa hai
tinke jab shu.aa.o.n kii pyaas na bujhaa sake to aag lagii
mai.n ne aag ko dhoyaa aur dhuup ko sukhaayaa
suuraj jo din kaa siina jalaa rahaa thaa
aasmaanii rang se bhar diyaa
ab aasmaan kii jagah koraa kaaGaz bichhaa diyaa gayaa
log mausam se dhokaa khaane lage
phir ek aadmii ko to.D kar mai.n ne suuraj banaayaa
logo.n kii pore.n ku.e.n me.n bhar dii.n
aur aasmaan ko dhaaga kiyaa
kaa.enaat ko na.ii karvaT nasiib hu.ii
logo.n ne ii.nTo.n ke makaan banaanaa chho.D diye
aa.nkho.n kii zabaan-daraazii rang laa.ii
ab ek qadam pe din aur ek qadam pe raat hotii
haal jur.at-e-guzishta hai
aa tere baalo.n se shu.aa.o.n ke ilzaam uThaa luu.n
tum apnii suurat pahaa.D kii khoh me.n ishaara kar aa.e
kund havaa.o.n kaa e'tiraaf hai
safar e.Dii pe kha.Daa hu.aa
samundar aur miTTii ne ronaa shuruu.a kar diyaa hai
belche aur baazuu ko do baazuu tasavvur karnaa
suuraj aasmaan ke kone ke saath laTkaa hu.aa thaa
aur apnii shu.aa.e.n apne jism ke gird lapeT rakhii thii.n
mai.n ne KHaalii kamre me.n mu.aafii rakhii
aur meraa siina duusro.n ke darvaaze par dha.Daktaa rahaa

Sara Shagufta
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now