Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "majnuu.n"

Nazm MATCHES FOR "majnuu.n"

Nazm

aaj ek harf ko phir DhunDta phirta hai KHayal

aaj har sur se har ik raag kaa naataa TuuTaa
Dhuu.nDtii phirtii hai mutrib ko phir us kii aavaaz
joshish-e-dard se majnuu.n ke garebaa.n kii tarah
chaak-dar-chaak hu.aa aaj har ik parda-e-saaz
aaj har mauj-e-havaa se hai savaalii KHilqat
laa ko.ii naGma ko.ii saut tirii umr daraaz
nauha-e-Gam hii sahii shor-e-shahaadat hii sahii
suur-e-mahshar hii sahii baa.ng-e-qayaamat hii sahii

Faiz Ahmad Faiz
Nazm

yaaden

KHvaar hu.e dam.Dii ke piichhe aur kabhii jholii-bhar maal
aise chho.D ke uTThe jaise chhu.aa to kar degaa ka.ngaal
syaane ban kar baat bigaa.Dii Thiik pa.Dii saada sii chaal
chhaanaa dasht-e-mohabbat kitnaa aabla-paa majnuu.n kii misaal
kabhii sikandar kabhii qalandar kabhii baguula kabhii KHayaal
svaa.ng rachaa.e aur guzar kii is aabaad KHaraabe me.n
dekho ham ne kaise basar kii is aabaad KHaraabe me.n

Akhtarul Iman
Nazm

nala-e-firaq

tuu kahaa.n hai ai kaliim-e-zarra-e-siinaa-e-ilm!
thii tirii mauj-e-nafas baad-e-nashaat-afzaa-e-ilm
ab kahaa.n vo shauq-e-rah-paimaa.ii-e-sahraa-e-ilm
tere dam se thaa hamaare sar me.n bhii saudaa-e-ilm
''shor-e-lailaa ko ki baaz-aaraa.ish-e-saudaa kunad
KHaak-e-majnuu.n-raa Gubaar-e-KHaatir-e-sahraa kunad''

Allama Iqbal
Nazm

ai matawalo! naqon walo!!

ai matavaalo naaqo.n vaalo dete ho kuchh us kaa pataa
najd ke andar majnuu.n naamii ek hamaaraa bhaa.ii thaa
aaKHir us par kyaa kuchh biitii jaano to ahvaal kaho
maut milii yaa lailaa paa.ii? diivaane kaa ma.aal kaho
aql kii baate.n kahne vaale dosto.n ne use samjhaayaa
us ko to lekin chup sii lagii thii naa bolaa naa baaz aayaa
KHair ab us kii baat ko chho.Do diivaanaa phir diivaanaa
jaate jaate ham logo.n kaa ek sandesaa le jaanaa

Ibn۔e۔Insha
Nazm

wasiyyat

mire beTe mirii aa.nkhe.n mire baa'd un ko de denaa
jinho.n ne ret me.n sar gaa.D rakkhe hai.n
aur aise mutma.in hai.n jaise un ko
na ko.ii dekhtaa hai aur na ko.ii dekh saktaa hai
magar ye vaqt kii jaasuus nazre.n
jo piichhaa kartii hai.n sab kaa zamiiro.n ke a.ndhere tak
a.ndheraa nuur par rahtaa hai Gaalib bas savere tak
saveraa hone vaalaa hai
(2)
mire beTe mirii aa.nkhe.n mire baa'd un ko de denaa
kuchh andhe suurmaa jo tiir a.ndhere me.n chalaate hai.n
sadaa dushman kaa siina taakte KHud zaKHm khaate hai.n
lagaa kar jo vatan ko daav par kursii bachaate hai.n
bhunaa kar khoTe sikke dharm ke jo pun kamaate hai.n
jataa do un ko aise Thag kabhii pak.De bhii jaate hai.n
(3)
mire beTe unhe.n tho.Dii sii KHuddaarii bhii de denaa
jo haakim qarz le ke is ko apnii jiit kahte hai.n
jahaa.n rakhte hai.n sonaa rehn KHud bhii rehn rahte hai.n
aur is ko bhii vo apnii jiit kahte hai.n
shariik-e-jurm hai.n ye sun ke jo KHaamosh rahte hai.n
qusuur apnaa ye kyaa kam hai ki ham sab un ko sahte hai.n
(4)
mire beTe mire baa'd un ko meraa dil bhii de denaa
ki jo shar rakhte hai.n siine me.n apne dil nahii.n rakhte
hai un kii aastii.n me.n vo bhii jo qaatil nahii.n rakhte
jo chalte hai.n unhii.n rasto.n pe jo manzil nahii.n rakhte
ye majnuu.n apnii nazro.n me.n ko.ii mahmil nahii.n rakhte
ye apne paas kuchh bhii faKHr ke qaabil nahii.n rakhte
taras khaa kar jinhe.n jantaa ne kursii par biThaayaa hai
vo KHud se to na uTThe.nge unhe.n tum hii uThaa denaa
ghaTaa.ii hai jinho.n ne itnii qiimat apne sikke kii
ye zimma hai tumhaaraa un kii qiimat tum ghaTaa denaa
jo vo phailaa.e.n daaman ye vasiyyat yaad kar lenaa
unhe.n har chiiz de denaa par un ko vote mat denaa

Kaifi Azmi
Nazm

kahani

ham jangal jangal phirte the us ke liye diivaane
rishii bane, majnuu.n kahlaa.e, lekin haar na maane

Mustafa Zaidi
Nazm

tark-e-mohabbat ke baad

Gair kii ho ke bhii tum merii mohabbat chaaho
is ghaTaa-Top a.ndhere me.n ye taare kaise
farsh par jis ko abhii tak na milii jaa.e panaah
arsh se chaa.nd kaa aivaan utaare kaise
jis kii raaho.n pe bhaTakte hu.e jag biite hai.n
phir usii dasht ko bad-baKHt sudhaare kaise
qaafile aa.e ga.e gard uThii baiTh ga.ii
ab musaafir ko ufuq par se ishaare kaise
jin kii taqdiir me.n thaa daaman-e-gulchii.n kaa mazaar
vo shaguufe to paraa.e hai.n hamaare kaise
pesh kar saktaa huu.n lekin tujhe bahlaane ko
chaa.ndnii-raat me.n machle hu.e ruumaan kii yaad
bed-e-majnuu.n ke tilismaat se pal-pal chhantii
aasmaano.n ko lapaktii hu.ii ik taan kii yaad
merii vaaraftagii-e-shauq kii sun kar ruudaad
tirii aa.nkho.n me.n damakte hu.e armaan kii yaad
dono.n chehro.n pe shafaq dono.n jabiino.n pe araq
dono.n siino.n me.n dha.Dakte hu.e haijaan kii yaad
kaun hai.n aap mirii ziist kii tanhaa.ii saathii
pahlii pahchaan kii yaad aaKHirii paimaan kii yaad

Ahmad Nadeem Qasmi
Nazm

maqule par amal

na paagal huu.n na majnuu.n huu.n na hai ko.ii maraz mujh ko
amal pairaa huu.n mai.n jis par puraanaa ik maquula hai

Syed Hashmat Sohail
Nazm

bulbul

chaman me.n laa.ii hai phuulo.n kii aarzuu tujh ko
milaa kahaa.n se ye ehsaas-e-ra.ng-o-buu tujh ko
tirii tarah ko.ii sar-gashta-e-jamaal nahii.n
gulo.n me.n mahv hai kaa.nTo.n kaa kuchh KHayaal nahii.n
KHizaa.n kaa KHauf na hai baaGbaa.n kaa Dar tujh ko
ma.aal-e-kaar kaa bhii kuchh KHatar nahii.n tujh ko
KHush-e'tiqaad o KHush-aaha.ng KHush-navaa bulbul
jigar ke daaG ko pur-nuur kar diyaa kis ne
tujhe is aag se ma.amuur kar diyaa kis ne
ye dil ye dard ye saudaa kahaa.n se laa.ii hai
kahaa.n kii tuu ne ye tarz-e-fuGaa.n u.Daa.ii hai

Majnoon Gorakhpuri
Nazm

id ka mela

dhu.ndle tarpaalii ma.nDve me.n naaTak nauTa.nkii aa.ii hai
naubat naqqaaraa saara.ngii Dholak jhaa.njan shahnaa.ii hai
kal sola teddy paiso.n me.n kis dhuum kii raas rachaa.ii hai
lailaa ke labo.n par surKHii hai majnuu.n ke gale me.n tie hai
ye ha.nsne me.n man mojan hai vo gaane me.n albelaa hai
yaaro ye iid kaa mela hai

Syed Zameer Jafri
Nazm

abstract art

abstract art kii dekhii thii numaa.ish mai.n ne
kii thii az-raah-e-muravvat bhii sataa.ish mai.n ne
aaj tak dono.n gunaaho.n kii sazaa paataa huu.n
log kahte hai.n ki kyaa dekhaa to sharmaataa huu.n
sirf kah saktaa huu.n itnaa hii vo tasviire.n thii.n
yaar kii zulf ko suljhaane kii tadbiire.n thii.n
ek tasviir ko dekhaa jo kamaal-e-fan thii
bhai.ns ke jism par ik uu.nT kii sii gardan thii
Taa.ng khii.nchii thii ki misvaak jise kahte hai.n
naak vo naak KHatarnaak jise kahte hai.n
naqsh-e-mahbuub musavvir ne sajaa rakkhaa thaa
mujh se puuchho to tipaa.ii pe gha.Daa rakkhaa thaa
bolii tasviir jo mai.n ne use ulTaa palTaa
mai.n vo jaama huu.n ki jis kaa nahii.n siidhaa ulTaa
us ko naqqaad to ik chashma-e-haivaa.n samjhaa
mai.n use hazrat-e-majnuu.n kaa garebaa.n samjhaa
ek tasviir ko dekhaa ki ye kyaa rakkhaa hai
varaq-e-saaf pe ra.ngo.n ko giraa rakkhaa hai
aa.Dii-tirchhii sii lakiire.n thii.n vahaa.n jalva-figan
jaise TuuTe hu.e aa.iine pe suuraj kii kiran
thaa kiub-izm mai.n kaaGaz pe jo ik rashk-e-qamar
mujh ko ii.nTe.n nazar aatii thii.n ise husn-e-bashar
bolaa naqqaad nazar aate yahii kuchh ham tum!
KHuld me.n hazrat-e-aadam jo na khaate gandum
abstract art ke malbe se ye daulat niklii
jis ko samjhaa thaa anannaas vo aurat niklii
abstract art kii is chiiz pe dekhii hai asaas
''tan kii uryaanii se behtar nahii.n duniyaa me.n libaas''
is numaa.ish me.n jo atfaal chale aate the
Dar ke maa.o.n ke kalejo.n se lipaT jaate the

Syed Mohammad Jafri
Nazm

basti ki laDkiyon ke nam

chal ai nasiim-e-sahraa ruuh-o-ravaan-e-sahraa
meraa payaam le jaa suu-e-butaan-e-sahraa
sahraa.ii mahvasho.n kii KHidmat me.n jaa ke kahnaa
bhuule nahii.n tumhe.n ham ai duKHtaraan-e-sahraa
gar bas chale to aa.e.n aur dard-e-dil sunaa.e.n
tum ko gale lagaa.e.n ham phir miyaan-e-sahraa
tum najd me.n pareshaa.n shahro.n me.n ham hai.n hairaa.n
allaah kii amaa.n ho tum par butaan-e-sahraa
tum is tarah Gamo.n se behaal ho rahii ho
ham is taraf hai.n muztar daaman-kushaan-e-sahraa
ham paas aa.e.n kyuu.n kar tum ko bulaa.e.n kyuu.n kar
ye dukh miTaa.e.n kyuu.n kar vaamaa.ndgaan-e-sahraa
betaab hai.n alam se be-KHvaab ranj-o-Gam se
kyaa puuchhtii ho ham se ai dil-baraan-e-sahraa
tum yaad kar rahii ho bedaad kar rahii ho
barbaad kar rahii ho ai gul-ruKHaan-e-sahraa
ye kyaa kahaa ki tum ho ra.ngiiniyo.n ke KHuugar
Gamgii.n hai.n tum se ba.Dh kar ai Gam-kushaan-e-sahraa
ye raat ye ghaTaa.e.n ye shor ye havaa.e.n
bichh.De hu.e mile.nge kyuu.nkar miyaan-e-sahraa
shahro.n kii zindagii se ham ta.ng aa chuke hai.n
sahraa me.n phir bulaa lo ai sakinaan-e-sahraa
yaad-e-sumuum ho yaa sarsar ke tund tuufaa.n
Darte nahii.n kisii se dil-daadgaan-e-sahraa
aabaadiyo.n me.n haasil aazaadiyaa.n nahii.n hai.n
aa jaa.o tum hii u.D kar o taa.iraan-e-sahraa
sahraa kii vus.ato.n me.n ham ko na bhuul jaanaa
o duKHtaraan-e-sahraa o aahuvaan-e-sahraa
ai abr chup na rahnaa meraa fasaana kahnaa
mil jaa.e gar kahii.n vo sarv-e-ravaan-e-sahraa
dashtii kii dhun me.n saaqii ik naGma-e-iiraaqii
haa.n phir sunaa ba-yaad-e-gul-chehargaan-e-sahraa
aa.nkho.n me.n bas rahaa hai naqsh-e-butaan-e-sahraa
o daastaa.n-saraa chhe.D ik daastaan-e-sahraa
mastaana jaa rahaa hai phir karvaan-e-sahraa
haa.n jhuum kar hudii-KHvaa.n ik daastaan-e-sahraa
dehaat kii fazaa.e.n aa.nkho.n me.n phir rahii hai.n
dil me.n samaa rahii hai yaad-e-butaan-e-sahraa
nazro.n pe chhaa rahaa hai vo chaa.ndnii kaa manzar
sahraa me.n kheltii thii.n jab huuryaan-e-sahraa
vo chaa.ndnii kaa mausam vo be-KHudii kaa aalam
vo nuur kaa samundar reg-e-ravaan-e-sahraa
jalve mah-e-javaa.n ke vo ra.ng-e-kaarvaa.n ke
vo naGme saarbaa.n ke raqsaa.n miyaan-e-sahraa
kyuu.nkar na yaad aa.e.n vo siim-guu.n fazaa.e.n
vo aasmaan-e-sahraa maah-e-ravaan-e-sahraa
vo kam-sino.n ke gaane vo khel vo taraane
be-fikrii ke fasaane vird-e-zabaan-e-sahraa
kheto.n me.n ghuumte the har gul ko chuumte the
mastii me.n jhuumte the jab mai-kashaan-e-sahraa
vo gaa.nv vo fazaa.e.n vo fasl vo havaa.e.n
vo khet vo ghaTaa.e.n vo aasmaan-e-sahraa
phir yaad aa rahii hai.n phir dil dukhaa rahii hai.n
majnuu.n banaa rahii hai.n lailaa-vashaan-e-sahraa
raato.n ko chhup ke aanaa aur shaane ko hilaanaa
hai yaad vo jagaanaa ham ko miyaan-e-sahraa
vo un kii shoKH aa.nkhe.n vo un kii saada nazre.n
be-KHud banaa rahii hai.n doshiizgaan-e-sahraa
vo ishq-pesha huu.n mai.n jis ke javaan naGme
gaataa hai chaa.ndnii me.n har naujavaan-e-sahraa
ik badviyat kaa aashiq sahraa.iyat se be-KHud
'aKHtar' bhii apnii dhun me.n hai ik javaan-e-sahraa

Akhtar Shirani
Nazm

ab aur tab

na puuchh ai ham-nashii.n college me.n aa kar ham ne kyaa dekhaa
zamii.n badlii hu.ii dekhii falak badlaa hu.aa dekhaa
na vo pahlii sii mahfil hai na miinaa hai na saaqii hai
kutub-KHaane me.n lekin ab talak talvaar baaqii hai
vahii talvaar jo baabar ke vaqto.n kii nishaanii hai
vahii marhuum baabar yaad jis kii Gair faanii hai
zamii.n par lecturer kuchh tairte phirte nazar aa.e
aur un kii ''gaun'' se kandho.n pe do shahpar nazar aa.e
magar in me.n mire ustaad-e-deriina bahut kam the
jo do ik the bhii vo masruuf-e-sad-afkaar-e-paiham the
vo ziine hii me.n Takraane kii hasrat rah ga.ii dil me.n
sunaa one-way traffic ho ga.ii uupar kii manzil me.n
agarche aaj-kal college me.n vaaqif hai.n hamaare kam
hame.n diivaar-o-dar pahchaante hai.n aur un ko ham
bulandii par alag sab se kha.Daa ''tower'' ye kahtaa hai
badaltaa hai zamaana meraa andaaz ek rahtaa hai
fanaa ta.aliim dars-e-be-KHudii huu.n is zamaane se
ki majnuu.n laam alif likhtaa thaa diivaar-e-dabistaa.n par
magar ''tower'' kii saa.at ke bhii baazuu KHuub chalte hai.n
kabuutar baiTh kar suu.iyo.n pe vaqt us kaa badalte hai.n
usii maalik ko phir halve kii daavat par bulaate hai.n
vo halva KHuub khaate hai.n use bhii kuchh khilaate hai.n
agar vo ye kahe is me.n to zahriilii davaa.ii hai
miraa dil jaantaa hai is me.n anDe kii miThaa.ii hai
phir is ke baa'd bahr-e-KHud-kushii tayyaar hote hai.n
vo halva biich me.n aur gard us ke yaar hote hai.n
vo puuchhe gar kahaa.n se kis tarah aayaa hai ye halva
to Dabbaa pesh kar ke kah diyaa is kaa hai sab jalva
kisii kanjuus ke kamre me.n jaa kar baiTh jaate hai.n
aur us ke naam par Tuk shaap se chiize.n ma.ngaate hai.n
bichaara 'ja.afarii' muddat ke baa'd aayaa hai college me.n
izaafa chaahtaa hai apnii a.ngrezii kii knowledge me.n
tire siine pe jab yaaraa-n-KHush aa.e.n kii mahfil ho
to ai 'oval' use mat bhuul jaanaa vo bhii shaamil ho

Syed Mohammad Jafri
Nazm

qurbani ke bakre

bakre ke piichhe piichhe hai.n majnuu.n kaa bhar ke svaa.ng
gar ho sake KHariidiy.e bakre kii ek Taa.ng
qiimat jo Taa.ng kii hai lagaa degii phir chhalaa.ng
''mujh se mire gunah kaa hisaab ai KHudaa na maa.ng''
''Te.Dhaa lagaa hai qat qalam-e-sarnavisht ko''
mah.ngaa.ii me.n chalaa hai ye bakraa bahisht ko

Syed Mohammad Jafri
Nazm

rang jo KHushbu na tha

vaadii-e-majnuun me.n
aabruu-e-KHuun me.n
ruu-e-sarshaar-o-hasii.n
manzar-e-shab ke qarii.n
mai.n tumhe.n tartiib duu.n
qurb kii tarGiib duu.n
'aks kii taariif me.n
rasm kii tahriif me.n
ek afsaana kahuu.n
sub.h tak jaltaa rahuu.n

Balraj Komal
Nazm

bus ka safar

un hii se puuchhtaa huu.n mai.n safar karte hai.n jo bus me.n
ki de dete ho apnii zindagii kyuu.n Gair ke bas me.n
ye bus vo hai ki bas ho jaa.e jab motor to bantii hai
sa.Dak par ruuTh jaa.e to ba.Dii mushkil se mantii hai
ye akasr baiThne vaalo.n ke dhakko.n se khisaktii hai
kabhii kashtii me.n dariyaa hai kabhii dariyaa me.n kashtii hai
safar karte hai.n is me.n jab baraatii aur dulhan duulhaa
to ban jaatii hai motor jaa.idaad-e-Gair-manquula
aur is ke baa'd agar taariik hai shab duur manzil hai
to karte hai.n tavaaf is kaa vo majnuu.n jin kii mahmil hai
cleaner se yahii kahtaa hai shofer ho ke bechaaraa
''ki kas nakashuud-o-nakashaayad ba-hikmat ii.n mu.amma raa''
agar us vaqt me.n sardii bhii lag jaa.e to kyaa Gam hai
''ye fitna aadmii kii KHaana-viiraanii ko kyaa kam hai''
jo ruk jaa.e ravaa.n kyuu.n ho jo ba.Dhiyaa hai javaa.n kyuu.n ho
''hu.ii ye dost jin kii dushman un kaa aasmaa.n kyuu.n ho''
baraatii khii.nchte ye jaa.idaad aate hai.n shahro.n me.n
jo rasta chand gha.Diyo.n kaa hai vo kaTtaa hai pahro.n me.n
zaraa se ek pa.nkchar se biga.Dtaa hai si.nghaar is kaa
havaa par jis kii hastii ho bhalaa kyaa e'tibaar us kaa
Gubaar aur gard kaa aur tel kii buu kaa KHaziina hai
ye motor-car aur ''gaDDe'' kii aulaad-e-nariina hai
milii gaDDe se ra.anaa.ii o zebaa.ii viraasat me.n
KHar-e-dajjaal se miltii hai suurat me.n malaahat me.n
samaate hai.n phir us me.n Thas ke yuu.n be-lutf-o-aasaa.ish
nahii.n rahtii hai naalo.n ke nikalne kii bhii gunjaa.ish
baso.n kii chhat pe lad kar duudh ke bartan jo aate hai.n
saro.n par shiir kaa baaraan-e-rahmat vo giraate hai.n
vo naadaa.n hai.n jo is baarish pe naak aur bhau.n cha.Dhaate hai.n
sile me.n saKHt-jaanii ke ye juu-e-shiir paate hai.n
pa.Daa hogaa baso.n me.n aap ko aiso.n se bhii paalaa
uThii khujlii to apne saath saathii ko khujaa Daalaa

Syed Mohammad Jafri
Nazm

sher-o-shaeri

vo jo majnuu.n hai.n duudh piine ke
un se to shaa.erii nahii.n hotii

Dharmpal Aaqil
Nazm

shahr aur main

reza reza ho ga.e merii tarah kitne vajuud
ab nahii.n mumkin kisii sahraa me.n majnuu.n kaa varuud

Chandrabhan Khayal
Nazm

nuqton ki kashmakash

qaafiyo.n se ko.ii chhuTkaaraa dilaa.e
ban ga.ii takliif-e-jaa.n mujh ko radiif
bahr hai har vaqt dil me.n maujzan
(qaafiye kii aazmaa.ish se guzar
qaafiya-paimaa na ban
qaafiye ne aa dabochaa qaafiya-paimaa na ho)
khurdure-pan ko tarastii hai zabaa.n
kyuu.n ma.njhii hai.n is qadar nazme.n mirii
kyuu.n sajii hai is qadar merii Gazal
(qaafiye ko rok phir aane lagaa)
zehn hai majnuun-e-aadaab-e-suKHan
dil puraane ras kaa rasiyaa hai abhii
nikhat-e-maazi kaa basiyaa hai abhii
(qaafiya phir aa gayaa majbuur huu.n
qaafiye ko rok phir aane lagaa)
sochtaa huu.n bahr kii maujo.n me.n jak.Daa huu.n abhii
qaafiya to KHair kaafii ruk gayaa
bahr to TuuTii nahii.n
bahr ik bahr-e-basiit
bahr ik dev-e-tanomand-o-muhiit
is qadar jiddat se kyuu.n hai kad mujhe
zehn o dil hai.n kyuu.n rivaayat ke asiir

Krishna Mohan
Nazm

nazm

na tuu hiir na mai.n raa.njhaa
na mai.n majnuu.n na tuu lailaa
phir ham sach kyo.n bole.n
kyaa tum ne sachchii baate.n
kahne vaalo.n ko sukhii dekhaa hai
mai.n ne to un ko
janam janam se dukhii dekhaa hai

Arif Rana
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now