Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "milne-milaane"

Nazm MATCHES FOR "milne-milaane"

Nazm

waba ke dinon mein 6

haath milaane kii rasm
tab iijaad hu.ii
jab hathiyaar phe.nknaa
siikhaa jaa chukaa thaa
aur baGlo.n me.n chhuriyaa.n
aam hone lagii thii.n
zindagiyo.n me.n badlaav aayaa
jaapaaniyo.n ne duur se jhuk kar salaam kahnaa siikhaa
dushman aur dost se munaasib faasla
hamesha banaa.e rakkhaa
atomii taaqat se tabaah kiye ga.e
zindagiyo.n me.n badlaav aayaa
ahal-e-faaras ne chuuhe se
taa.uun kaa ta'alluq pahchaanaa
na.ash ko kaaT kar a.azaa kaa naqsha banaayaa
pahlii jarraahii kii
aur murdo.n kii be-hurmatii kii paadaash me.n
buu-alii-siinaa ko sazaa dii
zindagiyo.n me.n badlaav aayaa
francisiyo.n ne chaaliis din kaa quarantine iijaad kiyaa
bandar-gaaho.n par biimaariyo.n kaa visa cancel hu.aa
sehat-mand insaano.n ko visa milne lagaa
zindagiyo.n me.n badlaav aayaa
yahuud kii manDii me.n
sone ke sikke insaano.n se kam pa.D ga.e
kaaGaz kaa note iijaad hu.aa
aur phir sab adyaan kii
e'tibaar kii aayaat ko
noTo.n par likh diyaa gayaa
zindagiyo.n me.n badlaa.o aayaa
agle na.e badlaa.o ke liye
stage tayyaar karne me.n
vabaa kii madad karo

Arsalan Ahmad
Nazm

dost ki pahchan

bachcho nizaam-ul-mulk vaziir
daanaa.ii kii thaa tasviir
us se milne ko sad.haa
aate the adnaa a.alaa
achchhii jagah par biThlaataa
aur mohabbat farmaataa
ik buu.Dhaa aataa har din
had se ziyaada jis kaa sin
logo.n ne us se puuchhaa
aataa kyo.n hai ye buDDhaa
karte ho kyo.n us kii izzat
is buDDhe kii ye azmat
bolaa un sab se ye vaziir
hai achchhaa tum se ye faqiir
tum to KHushaamad karte ho
merii KHushii par marte ho
lekin ye buDDhaa daanaa
mere aib hai batlaataa
dost ye hai meraa aslii
maanaa huu.n har baat is kii
is ko na dushman jaano tum
meraa kahnaa maano to tum
dost vahii hai ai 'jauhar'
baat kahe sachchii mu.nh par

Banne Miyan Jauhar
Nazm

raqqasa

uTThii hai maGrib se ghaTaa
piine kaa mausam aa gayaa
hai raqs me.n ik mah-laqaa
naazuk adaa naaz-aafrii.n
haa.n naachtii jaa gaa.e jaa
nazro.n se dil barmaa.e jaa
ta.Dpaa.e jaa ta.Dpaa.e jaa
o dushman-e-duniyaa-o-dii.n!
teraa thiraknaa KHuub hai
terii adaa.e.n dil-nashii.n
lekin Thahar tuu kaun hai
o niim-uryaa.n naaznii.n
kyaa mashriqii aurat hai tuu
hargiz nahii.n hargiz nahii.n
terii ha.nsii bebaak hai
terii nazar chaalaak hai
uff kis qadar dil-soz hai
taqriir baazaarii tirii
kitnii havas-aamoz hai
ye saada purkaarii tirii
sharm aur izzat vaaliyaa.n
hotii hai.n iffat vaaliyaa.n
vo husn kii shahzaadiyaa.n
parde kii hai.n aabaadiyaa.n
chashm-e-falak ne aaj tak
dekhii nahii.n un kii jhalak
sarmaaya-e-sharm-o-hayaa
zevar hai un ke husn kaa
shauhar ke dukh sahtii hai.n vo
mu.nh se nahii.n kahtii hai.n vo
kab saamne aatii hai.n vo
Gairat se kaT jaatii hai.n vo
e.azaaz-e-millat un se hai
naam-e-sharaafat un se hai
iimaan par qaa.em hai.n vo
paakiiza-o-saa.em hai.n vo
tujh me.n nahii.n sharm-o-hayaa
tujh me.n nahii.n mehr-o-vafaa
sach sach bataa tuu kaun hai
o be-hayaa tuu kaun hai
ehsaas-e-izzat kyuu.n nahii.n
sharm aur Gairat kyuu.n nahii.n
ye pur-fusuu.n Gamze tire
naa-mahramo.n ke saamne
haT saamne se duur ho
marduud ho maqhuur ho
taqdiir kii heTii hai tuu
shaitaan kii beTii hai tuu
jis qaum kii aurat hai tuu
us qaum par la.anat hai tuu
lekin Thahar jaanaa zaraa
terii nahii.n ko.ii KHataa
mardo.n me.n Gairat hii nahii.n
qaumii hamiiyat hii nahii.n
vo millat-e-baizaa ki thii
saare jahaa.n kii raushnii
jam.iyyat-e-islaamiyaa.n
shaahanshah-e-hindostaa.n
ab is me.n dam kuchh bhii nahii.n
ham kyaa hai.n ham kuchh bhii nahii.n
millii siyaasat uTh ga.ii
baazuu kii taaqat uTh ga.ii
shaan-e-hijaazii ab kahaa.n
vo turktaazii ab kahaa.n
ab Gaznavii himmat ga.ii
ab baabarii shaukat ga.ii
iimaan aalamgiir kaa
muslim ke dil se uTh gayaa
qaum ab jafaa-pesha hu.ii
izzat gadaa-pesha hu.ii
ab rang hii kuchh aur hai
be-Gairatii kaa daur hai
ye qaum ab miTne ko hai
ye nard ab piTne ko hai
afsos ye hindostaa.n!
ye gulshan-e-jannat-nishaa.n!
iimaan-daaro.n kaa vatan
taa.at-guzaaro.n kaa vatan
rah jaa.egaa viiraana phir
ban jaa.egaa but-KHaana phir
lekin mujhe kyaa KHabt hai
taqriir kyuu.n be-rabt hai
aisaa bahak jaataa huu.n mai.n
mu.nh aa.ii bak jaataa huu.n mai.n
itnaa sharaabii ho gayaa
aql-o-KHirad ko kho gayaa
mujh ko zamaane se Garaz
miTne miTaane se Garaz
hindostaa.n se kaam kyaa
andesha-e-anjaam kyaa
jiine do jiine do mujhe
piine do piine do mujhe
jab hashr kaa din aa.egaa
us vaqt dekhaa jaa.egaa
haa.n naachtii jaa gaa.e jaa
nazro.n se dil barmaa.e jaa
ta.Dpaa.e jaa ta.Dpaa.e jaa
o dushman-e-duniyaa-o-dii.n

Hafeez Jalandhari
Nazm

mohabbat

tumhe.n pahlii nazar me.n
dekh kar
aise lagaa jaise
tumhe.n milne se pahle hii
mujhe tum se
mohabbat thii

Suman Shah
Nazm

saza

ai achchhe la.Dke
tujhe terii peshaanii ke chaa.nd kii qasam
bas ek baar milne zaruur aanaa tum
mai.n jis kii sazaa kaaT rahii huu.n
vo KHataa bhii to karuu.n

Seema Bhardwaj
Nazm

dost

murda sannaaTo.n
aur ghup a.ndhero.n ko chiir kar
le chalaa ek haath mujhe KHud hii se milaane

Harshlata
Nazm

KHushi

kyaa pahan.ne ko us parii ke paas
ek bhii Dhang kaa nahii.n hai libaas
jab bhii mujh se vo milne aatii hai
sogvaar
maatamii rang o.Dhe aatii hai

Faisal Azeem
Nazm

nae zaKHm ki justuju

aaj
phir mai.n tum se milne ke liye
bechain huu.n
aaj phir vo saare dukh
vo zaKHm saare
jo ki pichhlii baar
tum se milne par mile
dhu.ndlaa ga.e
dard ke chalte hu.e tiiro.n ke ghaav
jo guzishta baar mil kar mai.n ne paa.e
bhar chale

Mohammad Hasan
Nazm

jab tum mujhse milne aao

tumhaarii apnii duniyaa hai
tumhaare roz-o-shab shaam-o-sahar apne
tum ik aazaad panchhii ho
mirii jaagiir kaa hissa nahii.n ho tum
magar kal shaam jab tum mujh se milne aa.o
(jaisaa tum ne likkhaa hai)
to aa.nkho.n me.n
zaraa kaajal lagaa aanaa

Shahram Sarmadi
Nazm

saliqa

devtaa hai ko.ii ham me.n
na farishta ko.ii
chhuu ke mat dekhnaa
har rang utar jaataa hai
milne-julne kaa saliiqa hai zaruurii varna
aadmii chand mulaaqaato.n me.n mar jaataa hai

Nida Fazli
Nazm

hum waqt ke sahra mein

ham vaqt ke sahraa me.n
u.Dte hu.e baadal hai.n
kis vaqt mile.n kab tak
ham saath rahe.n kyaa ho
shaayad kisii jho.nke se
milne ko taras jaa.e.n
behtar hai yahii.n aa.o
ik saath baras jaa.e.n

Qazi Saleem
Nazm

duty

jaan
mujhe afsos hai
tum se milne shaayad is hafte bhii na aa sakuu.ngaa
ba.Dii aham majbuurii hai
jaan
tumhaarii majbuurii ko
ab to mai.n bhii samajhne lagii huu.n
shaayad is hafte bhii
tumhaare chief kii biivii tanhaa hogii

Parveen Shakir
Nazm

ultimatum

chalo jaldii sameTo sab
tumhaare KHaak me.n milne kaa mausam aan pahu.nchaa hai

shahbaaz husain
Nazm

sukut-e-iztirab

ek arsa hu.aa
tujh se bichh.De hu.e
tere mad.hosh haatho.n kii chaa.e liye
tere chehre kii be-laus ma.asuum apnaa.iyat
ajnabiyyat me.n hal ho ga.ii
tujh se ik baar milne ko machlaa
magar
apne laa-intihaa daa.ero.n me.n
simaTne lagaa aa.ina

Sohail Azad
Nazm

wahima

ye gumaan hotaa hai
paas hii kahii.n jaise
chuu.Diyaa.n khanaktii ho.n
aur ek sargoshii yuu.n sunaa.ii detii hai
jaise ko.ii kahtaa hai
tum se milne aa.e hai.n ab to jaag jaa.o tum
nii.nd jab nahii.n aatii

Iqbal Umar
Nazm

lockdown

ek 'arsa hu.aa
tujh se bichh.De hu.e
tere mad.hosh haatho.n kii chaa.e piye
tere chehre kii be-laus maa'suum apnaa.iyat
ajnabiyyat me.n hal ho ga.ii
tujh se ik baar milne ko machlaa
magar
apne laa-intihaa daa.ero.n me.n
simaTne lagaa aa.ina

Sohail Azad
Nazm

sarhad

kyaa KHuub ho gar is duniyaa se
sarhad kaa naam KHatm ho jaa.e
saare des.... sab ke des ho.n
ruuh ko jism
aur jism ko ruuh se milne ke liye
kisii viize kii zaruurat na ho
jo chaahe, jab chaahe, jahaa.n chaahe
jis se mile....
jo chaahe, jab chaahe, jahaa.n chaahe
chalaa jaa.e....
ko.ii paabandii na ho....
kaaGaz pe lagaa.ii hu.ii lakiiro.n se
duniyaa ke is naqshe par
nafrat baa.nTne vaalo.n ke
KHvaab adhuure rah jaa.e.n....
kyaa KHuub ho gar is duniyaa se
sarhad kaa naam KHatm ho jaa.e

Nadeem Gullani
Nazm

KHud se milne ki fursat kise thi

apnii pindaar kii kirchiyaa.n
chun sakuu.ngii
shikasta u.Daano.n ke TuuTe hu.e par sameTuu.ngii
tujh ko badan kii ijaazat se ruKHsat karuu.ngii
kabhii apne baare me.n itnii KHabar hii na rakkhii thii
varna bichha.Dne kii ye rasm kab kii adaa ho chukii hotii
miraa hausla
apne dil par bahut qabl hii munkashif ho gayaa hotaa
lekin yahaa.n
KHud se milne kii fursat kise thii!

Parveen Shakir
Nazm

surKH gulabon ke mausam mein

bahut be-rang se din hai.n
tire gulnaar gaalo.n ke gulaabii phuul khilte hai.n
na tere phuul ho.nTo.n se
milan kii shoKH baato.n ke sunahrii rang me.n lipTii
ko.ii titlii hii u.Dtii hai
na din ke zard kaaGaz par tirii tasviir bantii hai
na shab kii kaalii chaadar par tirii aa.nkhe.n chamaktii hai.n
na terii muskuraahaT kii kiran milne ko aatii hai
rago.n ke sard Gaaro.n me.n
udaasii jamtii jaatii hai

Shahzad Nayyar
Nazm

mere milne wale

vo dar khulaa mere Gam-kade kaa
vo aa ga.e mere milne vaale
vo aa ga.ii shaam apnii raaho.n me.n
farsh-e-afsurdagii bichhaane
vo aa ga.ii raat chaa.nd taaro.n ko
apnii aazurdagii sunaane
vo sub.h aa.ii damakte nashtar se
yaad ke zaKHm ko manaane
vo dopahar aa.ii, aastii.n me.n
chhupaa.e sho.alo.n ke taaziyaane
ye aa.e sab mere milne vaale
ki jin se din raat vaastaa hai
pe kaun kab aayaa, kab gayaa hai
nigaah o dil ko KHabar kahaa.n hai
KHayaal suu-e-vatan ravaa.n hai
samundaro.n kii ayaal thaame
hazaar vahm-o-gumaa.n sambhaale
ka.ii tarah ke savaal thaame

Faiz Ahmad Faiz
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now