Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "mudda.aa"

Nazm MATCHES FOR "mudda.aa"

Nazm

march 1907

zamaana aayaa hai be-hijaabii kaa aam diidaar-e-yaar hogaa
sukuut thaa parda-daar jis kaa vo raaz ab aashkaar hogaa
guzar gayaa ab vo daur-e-saaqii ki chhup ke piite the piine vaale
banegaa saaraa jahaan mai-KHaana har ko.ii baada-KHvaar hogaa
kabhii jo aavaara-e-junuu.n the vo bastiyo.n me.n phir aa base.nge
barahna-paa.ii vahii rahegii magar nayaa KHaarzaar hogaa
sunaa diyaa gosh-e-muntazir ko hijaaz kii KHaamushii ne aaKHir
jo ahd sahraa.iyo.n se baa.ndhaa gayaa thaa phir ustuvaar hogaa
nikal ke sahraa se jis ne ruumaa kii saltanat ko ulaT diyaa thaa
sunaa hai ye qudsiyo.n se mai.n ne vo sher phir hoshiyaar hogaa
kiyaa miraa tazkira jo saaqii ne baada-KHvaaro.n kii anjuman me.n
to piir-e-mai-KHaana sun ke kahne lagaa ki mu.nh-phaT hai KHvaar hogaa
dayaar-e-maGrib ke rahne vaalo KHudaa kii bastii dukaa.n nahii.n hai
kharaa jise tum samajh rahe ho vo ab zar-e-kam-ayaar hogaa
tumhaarii tahziib apne KHanjar se aap hii KHud-kushii karegii
jo shaaKH-e-naazuk pe aashiyaana banegaa naa-paa.edaar hogaa
safiina-e-barg-e-gul banaa legaa qaafila mor-e-naa-tavaa.n kaa
hazaar maujo.n kii ho kashaakash magar ye dariyaa se paar hogaa
chaman me.n laala dikhaataa phirtaa hai daaG apnaa kalii kalii ko
ye jaantaa hai ki is dikhaave se dil-jalo.n me.n shumaar hogaa
jo ek thaa ai nigaah tuu ne hazaar kar ke hame.n dikhaayaa
yahii agar kaifiyat hai terii to phir kise e'tibaar hogaa
kahaa jo qumrii se mai.n ne ik din yahaa.n ke aazaad paa-ba-gil hai.n
tuu Gunche kahne lage hamaare chaman kaa ye raazdaar hogaa
KHudaa ke aashiq to hai.n hazaaro.n bano.n me.n phirte hai.n maare maare
mai.n us kaa banda banuu.ngaa jis ko KHudaa ke bando.n se pyaar hogaa
ye rasm-e-bazm-e-fanaa hai ai dil gunaah hai jumbish-e-nazar bhii
rahegii kyaa aabruu hamaarii jo tuu yahaa.n be-qaraar hogaa
mai.n zulmat-e-shab me.n le ke nikluu.ngaa apne dar-maa.nda kaarvaa.n ko
sharar-fishaa.n hogii aah merii nafas miraa shola-baar hogaa
nahii.n hai Gair-az-numuud kuchh bhii jo mudda.aa terii zindagii kaa
tuu ik nafas me.n jahaa.n se miTnaa tujhe misaal-e-sharaar hogaa
na puuchh 'iqbaal' kaa Thikaanaa abhii vahii kaifiyat hai us kii
kahii.n sar-e-raah-guzaar baiThaa sitam-kash-e-intizaar hogaa

Allama Iqbal
Nazm

pyar karte raho

mudda.aa ek hai
ik hamaarii hai kyaa
saarii duniyaa kaa hii
silsila ek hai
ek aa.e the ham
ek aa.e the tum
ek hai ye safar
bhii.D kitnii bhii ho
apnii apnii jagah
har ko.ii ek hai
naam hai.n go judaa
par KHudaa ek hai

Adeel Zaidi
Nazm

tum se shikayat kya karun

tum to ho dil kaa mudda.aa
tum se shikaayat kyaa karuu.n

Behzad Lakhnavi
Nazm

tere KHaton ki KHushbu

tere KHato.n kii KHushbuu
haatho.n me.n bas ga.ii hai saa.nso.n me.n rach rahii hai
KHvaabo.n kii vus.ato.n me.n ik dhuum mach rahii hai
jazbaat ke gulistaa.n mahkaa rahii hai har suu
tere KHato.n kii KHushbuu
tere KHato.n kii mujh par kyaa kyaa inaayate.n hai.n
be-mudda.aa karam hai bejaa shikaayate.n hai.n
apne hii qahqaho.n par barsaa rahii hai aa.nsuu
tere KHato.n kii KHushbuu
terii zabaan ban kar aksar mujhe sunaa.e
baate.n banii banaa.ii jumle raTe-raTaa.e
mujh par bhii kar chukii hai apnii vafaa kaa jaaduu
tere KHato.n kii KHushbuu
samjhe hai.n kuchh usii ne aadaab chaahato.n ke
sab ke liye vahii hai.n alqaab chaahato.n ke
sab ke liye baraabar phailaa rahii hai baazuu
tere KHato.n kii KHushbuu
apne sivaa kisii ko mai.n jaantaa nahii.n thaa
suntaa thaa laakh baate.n aur maantaa nahii.n thaa
ab KHud nikaal laa.ii begaanagii ke pahluu
tere KHato.n kii KHushbuu
kyaa jaane kis taraf ko chupke se mu.D chukii hai
gulshan ke par lagaa kar sahraa ko u.D chalii hai
rokaa hazaar mai.n ne aa.ii magar na qaabuu
tere KHato.n kii KHushbuu

Qateel Shifai
Nazm

sayyad ki lauh-e-turbat

ai ki teraa murG-e-jaa.n taar-e-nafas me.n hai asiir
ai ki terii ruuh kaa taa.ir qafas me.n hai asiir
is chaman ke naGma-pairaao.n kii aazaadii to dekh
shahr jo uj.Daa hu.aa thaa us kii aabaadii to dekh
fikr rahtii thii mujhe jis kii vo mahfil hai yahii
sabr-o-istiqlaal kii khetii kaa haasil hai yahii
sa.ng-e-turbat hai miraa girviida-e-taqriir dekh
chashm-e-baatin se zaraa is lauh kii tahriir dekh
mudda.aa teraa agar duniyaa me.n hai ta.aliim-e-dii.n
tark-e-duniyaa qaum ko apnii na sikhlaanaa kahii.n
vaa na karnaa firqa-bandii ke liye apnii zabaa.n
chhup ke hai baiThaa hu.aa ha.ngaama-e-mahshar yahaa.n
vasl ke asbaab paidaa ho.n tirii tahriir se
dekh ko.ii dil na dukh jaa.e tirii taqriir se
mahfil-e-nau me.n puraanii daastaano.n ko na chhe.D
ra.ng par jo ab na aa.e.n un fasaano.n ko na chhe.D
tuu agar ko.ii mudabbir hai to sun merii sadaa
hai dilerii dast-e-arbaab-e-siyaasat kaa asaa
arz-e-matlab se jhijak jaanaa nahii.n zebaa tujhe
nek hai niyyat agar terii to kyaa parvaa tujhe
banda-e-momin kaa dil biim-o-riyaa se paak hai
quvvat-e-farmaa.n-ravaa ke saamne bebaak hai
ho agar haatho.n me.n tere KHaam-e-mojiz raqam
shiisha-e-dil ho agar teraa misaal-e-jaam-e-jam
paak rakh apnii zabaa.n tilmiiz-e-rahmaanii hai tuu
ho na jaa.e dekhnaa terii sadaa be-aabruu
sone vaalo.n ko jagaa de sher ke e.ajaaz se
KHirman-e-baatil jalaa de sho.ala-e-aavaaz se

Allama Iqbal
Nazm

mir ho mirza ho mera ji ho

dil-KHaraashii o jigar-chaakii o KHuu.n-afshaanii
huu.n to naakaam pe hote hai.n mujhe kaam bahut
mudda.aa mahv-e-tamaashaa-e-shikast-e-dil hai
aa.ina-KHaane me.n ko.ii liye jaataa hai mujhe
raat ke phaile a.ndhere me.n ko.ii saayaa na thaa
chaa.nd ke aane pe saa.e aa.e
saa.e hilte hu.e ghulte hu.e kuchh bhuut se ban jaate hai.n
miir ho mirzaa ho miiraa jii ho
apnii hii zaat kii Girbaal me.n chhan jaate hai.n
dil-KHaraashiida ho KHuu.n-daada rahe
aa.ina-KHaane ke rezo.n pe ham istaada rahe
chaa.nd ke aane pe saa.e bahut aa.e bhii
ham bahut saayo.n se ghabraa.e bhii
miir ho mirzaa ho miiraa jii ho
aaj jaa.n ik na.e ha.ngaame me.n dar aa.ii hai
maah-e-be-saaya kii daaraa.ii hai
yaad vo ishrat-e-KHuu.n-naab kise
fursat-e-KHvaab kise

Noon Meem Rashid
Nazm

tur

yahii.n kii thii mohabbat ke sabaq kii ibtidaa mai.n ne
yahii.n kii jur.at-e-iz.haar-e-harf-e-mudda.aa mai.n ne
yahii.n dekhe the ishva-e-naaz o andaaz-e-hayaa mai.n ne
yahii.n pahle sunii thii dil dha.Dakne kii sadaa mai.n ne
yahii.n kheto.n me.n paanii ke kinaare yaad hai ab bhii

Makhdoom Mohiuddin
Nazm

wo abhi apne chehre mein utra nahin

naa-rasaa.ii mirii naa-rasaa.ii mirii!
jis ko paayaa na thaa us ko khone kaa Gam
merii KHvaahish ke siine kaa naasuur hai
kis ko aavaaz duu.n kis kaa maatam karuu.n
vo abhii apne chehre me.n utraa nahii.n
kis se puuchhuu.n miraa mudda.aa kaun hai!
naa-rasaa kaun hai!

Amjad Islam Amjad
Nazm

nanha qasid

tiraa nanhaa saa qaasid jo tire KHat le kar aataa thaa
na thaa ma.aluum use kis tarah ke paiGaam laataa thaa
samajh saktaa na thaa vo KHat me.n kaise raaz pinhaa.n hai.n
huruuf-e-saada me.n kis hashr ke andaaz pinhaa.n hai.n
use kyaa ilm in ra.ngii.n lifaafo.n me.n chhupaa kyaa hai
kisii mahvash kaa in ke bhejne se mudda.aa kyaa hai

Akhtar Shirani
Nazm

id

jo bayaa.n iz.haar-e-harf-e-mudda.aa par KHatm ho
us kii bilkul muKHtasar tamhiid honii chaahiye

Maikash Akbarabadi
Nazm

laghzish

KHvaab dekhaa thaa kisii daaman kii chhaa.nv me.n kabhii
ek aisaa KHvaab jis kaa mudda.aa ko.ii nahii.n
mai.n akelaa jaa rahaa huu.n aur zamii.n hai sa.nglaaKH
ajnabii vaadii me.n meraa aashnaa ko.ii nahii.n
raaste kaTte hu.e gum ho ga.e hai.n dhu.nd me.n
dhu.nd se aage KHalaa hai raasta ko.ii nahii.n

Akhtarul Iman
Nazm

ek harf-e-muddaa

ik harf-e-mudda.aa thaa labo.n pe khaTaktaa thaa phaa.ns saa
ik naam thaa zabaan kaa chhaalaa banaa hu.aa
lo mai.n zabaa.n taraash ke KHaamosh ho ga.ii
lo ab to merii aa.nkh me.n aa.nsuu nahii.n ko.ii
bas ek meraa gung miraa harf-e-mudda.aa

Fahmida Riaz
Nazm

ashab-e-girya

husain-aabaad saaraa
ta.aziya-daaro.n kii bastii thii
moharram ke dino.n me.n shaam hote hii
husain-aabaad ke mard-o-zan kaale libaaso.n me.n
azaa-KHaano.n ke daalaano.n me.n
shab bhar marsiya pa.Dhte
saf-e-maatam bichhaate aur apnii chhaatiyo.n ko laal kar lete
nauvii.n kii shab vo sab apne gharo.n se aag laate
aur dahaktii aag kii chaaro.n taraf ii.nTe.n bichhaa dete
hazaaro.n aa.nkhe.n mushtaaqaana ik jaanib ko uTh jaatii.n
fazaa me.n guu.nj sii hotii
ko.ii na.ara lagaataa aur husain-ibn-e-alii kaa naam le kar
aag kii ii.nTo.n pe yuu.n chaltaa hu.aa aataa
ki jaise farsh-e-gul ho yaa ko.ii sabze kii chaadar ho
vo phir na.ara lagaataa dau.Dtaa bijlii kii tezii se
muqaddas aayato.n vaalaa alam haatho.n me.n le letaa
kamar se apnii kas letaa
hazaaro.n log us ke gard halqa baa.ndh lete
aur use kashf-o-karaamat kaa KHaziina jaan kar
apne dilo.n kaa mudda.aa kahte
vo paiham aag kii ii.nTo.n pe yuu.nhii naachtaa rahtaa
muraado.n minnato.n kaa maajraa suntaa
magar jab aag kii ii.nTo.n kii surKHii maa.nd ho jaatii
to saare log halqa to.D dete aur muqaddas aayato.n vaalaa alam
is shaKHs ke haatho.n se le lete
azaa-KHaano.n ke daalaano.n me.n vaapas lauT kar aate
saf-e-maatam bichhaate
aur apnii chhaatiyo.n ko laal kar lete

Zubair Rizvi
Nazm

dharm-o-iman

bahut din se vatan me.n ik mahaaz-e-ja.ng qaa.em hai
kahii.n hai dharm ko KHatra kahii.n iimaan ko KHatra
bapaa hai saKHt tuufaa.n ruunumaa hai.n saKHt ha.ngaame
kahii.n hai ved ko KHatra kahii.n qur.aan ko KHatra
kahii.n masjid ko KHatra hai shivaale ke mahanto.n se
kahii.n hai KHaanqah vaalo.n se dev asthaan ko KHatra
kahii.n muslim ko KHatra apne iimaanii tahaffuz kaa
kahii.n hinduu ke puujaa-paaT ke sammaan ko KHatra
kahii.n shuddhii ke parchaarak ko KHatra dharm rakshaa kaa
kahii.n tabliiG ke jhanDe kii aan-baan ko KHatra
nahii.n hotaa ko.ii aisaa minute chaubiis ghanTe me.n
na rahtaa ho vatan vaalo.n ke maal-o-jaan ko KHatra
ye saarii pesh-ba.ndii hai faqat is baat kii KHaatir
ki laahaq ho na british raaj ke aivaan ko KHatra
ye Thekedaar diin aur dharm ke is ke bhii zaamin hai.n
na paidaa ho mafaad-e-ahal-e-inglistaan ko KHatra
ye KHaana-ja.ngiyaa.n jitnii hai.n sab kaa mudda.aa ye hai
na hargiz ruunumaa ho jaan bal kii jaan ko KHatra
Gulaamaan-e-azal ya.anii ye jhuuTe peshvaa-e-dii.n
lagaa rahtaa hai har dam jin ke dastar-KHvaan ko KHatra
vo kab chaahe.nge ko.ii is tarah kaa inqalaab aa.e
ki ho mahsuus un ke amn-o-itmiinaan ko KHatra
hamaaraa farz hai ham un lafango.n ko fanaa kar de.n
ki hai un sab ke sab se aam hindostaan ko KHatra

Ahmaq Phaphoondvi
Nazm

aagahi ki dua

ai KHudaa ai KHudaa
mai.n huu.n masruuf-e-tasbiih-o-hamd-o-sanaa
go ba-zaahir ibaadat kii aadat nahii.n hai
ri.nd-mashrab huu.n zohd-o-riyaazat se raGbat nahii.n hai
magar jab bhii chaltaa hai meraa qalam
jab bhii khultii hai merii zabaa.n
kuchh kahuu.n kuchh likhuu.n
terii taKHliiq kaa zamzama mudda.aa muntahaa
harf ju.D kar bane.n lafz to karte hai.n terii hamd-o-sanaa
yaa KHudaa yaa KHudaa
mere atraaf hai.n peT KHaalii badan-e-niim-jaa.n
ko.ii taktaa hai jab meraa dast-e-tahii
sharm aatii hai mujh ko KHudaa-e-Ganii
sochtaa huu.n mai.n apnii zabaa.n rehn rakh duu.n kahii.n
rizq se KHaalii peTo.n ko bhar duu.n
jo hai.n niim-jaa.n un me.n jaan phuu.nk duu.n
aur apne liye tho.Dii aasaa.ishe.n mol le aa.uu.n baazaar se
apne bachcho.n kii zid puurii kar duu.n
jo vaaqif nahii.n hai.n ma.iishat ke andaaz-o-raftaar se
phir yahii sochtaa huu.n
KHudaa ai KHudaa
kyaa zabaa.n rehn ho kar bhii terii itaa.at karegii
kyaa qalam bik ke bhii naam teraa hii legaa
duusro.n ko KHudaa maan kar
vo na karne lage.n maa-sivaa kii bhii hamd-o-sanaa
ai KHudaa ai KHudaa hai du.aa
aaKHirii saa.ns tak
ye qalam ye zabaa.n
likhte rahte hai.n laa-ilaaha

Waheed Akhtar
Nazm

jaanan

phuul se ruuThtii hai kab KHushbuu
raat se ruuThtaa hai kab jugnuu
nain se duur kab rahaa jaaduu
ha.nste ha.nste nikal ga.e aa.nsuu
yuu.n to har shai ko hai fanaa ya.anii
rah gayaa apnaa mudda.aa ya.anii
is tarah se ko.ii nahii.n jaataa
jis tarah ruuTh kar ga.e jaanaa.n

Khursheed Akbar
Nazm

baz-gasht

mai.n terii bastii se bhaag kar duur ik KHaraabe me.n aa gayaa huu.n
ye vo KHaraaba hai jis me.n hastii kii raushnii kaa guzar nahii.n hai
yahaa.n na tuu hai na ra.ng-o-buu hai na zindagii hai
yahaa.n hai vo aalam-e-KHamoshii ki dil kii dha.Dkan bhii be-sadaa hai
ki merii tanhaa.iyo.n ke daaman-e-ufuq ke daaman se jaa mile hai.n
tire nagar ke hasiin kuuche shafiiq galiyaa.n jo ziist kii raushnii kaa ghar hai.n
mire liye merii bebasii ne inhe.n shab-aaluud kar diyaa hai
vo rahguzar tere naqsh-e-paa par jahaa.n hazaar aastaa.n bane hai.n
vo rahguzar ajnabii hu.e hai.n
jahaa.n mai.n ab huu.n vahaa.n agarche hai be-karaa.n tiirgii fazaa me.n
magar yahaa.n bhii mire KHayaalo.n me.n mahr ban kar tiraa saraapaa damak rahaa hai
havaa ke be-kaif sard jho.nke jo zard patto.n se khelte hai.n
to merii be-aab KHushk aa.nkhe.n tujhe KHalaa.o.n me.n Dhuu.nDhtii hai.n
miraa taKHayyul ki is KHaraabe se bad-gumaa.n hai
mire junuu.n ko jhi.njho.Dtaa hai to sochtaa huu.n
agarche tuu ek vo haqiiqat hai jis kaa iqraar laa-budii hai
magar ye teraa vajuud mere liye faqat ek vaahima hai
ki terii zulfo.n ko mere shaano.n ne apnii duniyaa se duur paayaa
ki mere ashko.n ko tere daaman kii aarzuu hii rahii hamesha
magar ye KHush thaa
ki mere Gam ne tire taKHayyul me.n vo sitaare se bhar diye the
charaaG jin ke na bujh sake hai.n na bujh sake.nge
ye sab thaa lekin junuu.n pe kuchh aisii qadGane.n thii.n
ki jazb-e-dil harf-e-mudda.aa ko na paa sakaa thaa
kabhii ko.ii dard lafz bin kar marii zabaa.n par na aa sakaa thaa
magar na jaane vo kyaa thaa jis ne dilo.n ke parde uThaa diye the
junuu.n ke asraar vaaqiye the
tahii-zabaa.n ham hu.e the lekin zabaa.n ke muhtaaj kab rahe the
ki ham nigaaho.n se dil ke paiGaam bhejte the
ye sab thaa lekin mai.n karb-e-jaa.n-soz kaa amii.n thaa
vo karb-e-jaa.n-soz thaa ki merii hayaat se nii.nd bad-gumaa.n thii
aur is KHaraabe me.n jis me.n hastii kii raushnii kaa guzar nahii.n hai
jahaa.n na tuu hai na ra.ng-o-buu hai na zindagii hai
miraa gumaa.n thaa yahaa.n tujhe KHud se duur paa kar mai.n karb se jaa.n bachaa sakuu.ngaa
tujhe kabhii to dimaaG-o-dil se haTaa sakuu.ngaa
tujhe kabhii to bhulaa sakuu.ngaa
magar ye ik aur vaahima thaa
qayaamate.n soz-e-dard-e-dil me.n nihaa.n vahii hai.n
abas Gam-e-zindagii se mai.n ne faraar chaahaa
isii tarah karab-e-jaa.n-guzaa se mai.n ab bhii aatish-e-ba-jaa huu.n har-dam
ki ab tiraa shahr chho.Dne kaa ik aur Gam hai
agarche teraa vajuud mere liye faqat ek vaahima thaa
agarche teraa vajuud mere liye faqat ek vaahima hai
magar tiraa paikar-e-misaalii mire KHayaalo.n me.n jaaguzii.n hai
ki vo kisii dil-kushaa haqiiqat kaa bhii amii.n hai
aur us se mujh ko mafar nahii.n hai

Arsh Siddiqui
Nazm

eid

ai jamaal-e-dost terii diid honii chaahiye
Gam-zado.n kii bhii to aaKHir eid honii chaahiye
jab nahii.n hai aap ko tark-e-ta.alluq kaa KHayaal
aap hii ke qaul se tardiid honii chaahiye
maantaa huu.n mai.n ki be-shak qaul ke sachche hai.n aap
lekin apne ahd kii tajdiid honii chaahiye
merii jaanib se sahii tahriik-e-takmiil-e-vafaa
lekin us ko aap kii taa.iid honii chaahiye
aap ne tanqiis kar dii daastaan-e-shauq kii
meraa ye armaan thaa tanqiid honii chaahiye
har qadam par rah-rav-e-ulfat ko manzil ke liye
shauq honaa chaahiye ummiid honii chaahiye
jo bayaa.n iz.haar-e-harf-e-mudda.aa par KHatm ho
us kii bilkul muKHtasar tamhiid honii chaahiye
ham ko bhii ma.aluum ho kin se hai raunaq bazm kii
aap ke ahbaab kii tafriid honii chaahiye
aap jab chaahe.n mire chulluu mai.n talchhaT Daal de.n
kab kahaa thaa mahfil-e-jamshed honii chaahiye
sajda-rezii ke liye is rahguzar me.n ai jabii.n
naqsh-e-paa-e-dost kii taqliid honii chaahiye

Maikash Hyderabadi
Nazm

kya hai

gehuu.n kyaa shai hai baajraa kyaa hai
aur chaaval hai kyaa chanaa kyaa hai
uf ye basta mire KHudaa kyaa hai
mirii taqdiir me.n likhaa kyaa hai
ye school aur madrasa kyaa hai
in ke khulne kaa mudda.aa kyaa hai
aaj tak ye samajh me.n aa na sakaa
likhne pa.Dhne se faa.eda kyaa hai
ye kitaabe.n ye copiyaa.n ye qalam
in me.n kuchh to kaho dharaa kyaa hai
bas kitaabo.n bharaa ba.Daa basta
aur maa.n baap ne diyaa kyaa hai
master mujh ko maarte kyo.n hai.n
mai.n ne un ko bhalaa kahaa kyaa hai
aadmii se banaa diyaa murGaa
aur is se ba.Dii sazaa kyaa hai
der chhuTTii me.n kyaa hai dekhuu.n to
ab gha.Dii me.n mirii bajaa kyaa hai
ham ko ammii ye pahle batlaa do
chaa.e ke saath naashta kyaa hai
jis ne khaa.e na ho.n vo kyaa jaane
ras bharii kyaa hai GalGala kyaa hai
sau gadho.n par shakiil hai bhaarii
saamne us ke ik gadhaa kyaa hai
sar mu.nDaa kar vo aa rahaa hai tufail
ba.Dh ke de Tiip dekhtaa kyaa hai
baat 'yaktaa' kii maan apne liye
soch achchhaa hai kyaa buraa kyaa hai

Yakta Amrohvi
Nazm

kya chahta hun

na takmiil-e-ahd-e-vafaa chaahtaa huu.n
na tajdiid-e-jaur-o-jafaa chaahtaa huu.n
mai.n ik qalb-e-be-mudda.aa chaahtaa huu.n
tire ishq kii intihaa chaahtaa huu.n
mirii saadgii dekh kyaa chaahtaa huu.n

Asghar Hasan Mujibi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now