Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "munaafiq"

Nazm MATCHES FOR "munaafiq"

Nazm

siyasat

mukaddar hai fazaa-e-aalam-e-imkaa.n siyaasat se
bahut be-aabruu hai aaj-kal insaa.n siyaasat se
zamiir-o-zarf kii us ke yahaa.n qiimat nahii.n ko.ii
jahaa.n me.n dar-ba-dar hai.n saahab-e-iimaa.n siyaasat se
ye ehsaasaat-e-tahziib-o-tamaddun ko miTaatii hai
siyaasat aaj-kal kii kaise kaise gul khilaatii hai
nahii.n sheva siyaasat kaa mohabbat aur ravaadaarii
sikhaatii hai parastaaro.n ko apne ye riyaa-kaarii
na is kaa ko.ii maslak hai na is kaa ko.ii maz.hab hai
dil-e-hirs-o-havas me.n ban ke rahtii hai ye chingaarii
kisii kaa ghar giraatii hai kisii kaa ghar sajaatii hai
siyaasat aaj-kal kii kaise kaise gul khilaatii hai
la.Daatii hai yahii ik duusre ko zaat-o-mazhab par
isii kii shah pe qatl-e-aam hotaa hai yahaa.n aksar
ra.uunat ye sikhaatii hai munaafiq hukmaraano.n ko
isii ke batn se hote hai.n paidaa jabr-o-zulm-o-shar
ye apne muhsino.n kaa KHuun pii kar muskuraatii hai
siyaasat aaj-kal kii kaise kaise gul khilaatii hai
sadaa ye ittihaad-e-baahamii par vaar kartii hai
ta.assub ko havaa detii hai dil bezaar kartii hai
kahii.n ta.amiir kartii hai ibaadat-gaah fitno.n se
kahii.n KHud hii ibaadat-gaah ko mismaar kartii hai
fareb-o-makr se apne ye har-suu qahr Dhaatii hai
siyaasat aaj-kal kii kaise kaise gul khilaatii hai
isii ke dam se fasle.n lahlahaatii hai.n fasaado.n kii
yahii takmiil kartii hai hukuumat ke iraado.n kii
isii kii maslahat se buGz ke paude panapte hai.n
giraa detii hai ye diivaar baaham e'timaado.n kii
havaa de kar ye bad-unvaaniyo.n kii lau ba.Dhaatii hai
siyaasat aaj-kal kii kaise kaise gul khilaatii hai
ishaare par isii ke shahr qasbe gaa.nv jalte hai.n
isii kii aastii.n me.n saazisho.n ke naag palte hai.n
sitamgaaro.n pe kartii hai ye saaya apne aa.nchal kaa
isii kii aa.D me.n ashraar-o-qaatil bach nikalte hai.n
ye qaanuun-o-adaalat ko bhii ab aa.nkhe.n dikhaatii hai
siyaasat aaj-kal kii kaise kaise gul khilaatii hai
jasaarat ko yahii dahshat-garii kaa naam detii hai
ye ham-saa.e ko KHud hii jang kaa paiGaam detii hai
badaltii hai yahii taqdiir arbaab-e-qayaadat kii
ye apne vaariso.n ko sarKHushii kaa jaam detii hai
ye va.ado.n ke gharau.nde regzaaro.n me.n banaatii hai
siyaasat aaj-kal kii kaise kaise gul khilaatii hai

Rahbar Jaunpuri
Nazm

aaj ke munafiq

ye KHvaahisho.n ke pujaarii ye maslahat ke Gulaam
fareb-o-makr ke qisse munaafiqat ke naam

Nasira Zuberi
Nazm

munafiq shair

mai.n munaafiq huu.n har ik kaa dost ban jaataa huu.n mai.n
dost ban kar dosto.n me.n phuuT Dalvaataa huu.n mai.n
intihaa kii chi.D hai mujh ko do dilo.n ke qurb se
dekhtaa huu.n jab ye fauran jaal phailaataa huu.n mai.n
mai.n buraa.ii raam kii kartaa huu.n jaa kar shaam se
shaam ne jo kuchh kahaa vo raam tak laataa huu.n mai.n
piiTh piichhe sab ko detaa huu.n muGallaz gaaliyaa.n
saamne lekin adab se sar ke bal jaataa huu.n mai.n
halqa-e-ahl-e-suKHan me.n jo mirii tauqiir hai
chhin na jaa.e har na.e shaa.ir se ghabraataa huu.n mai.n
mujh ko apnii shaa.erii par kis tarah ho e'timaad
KHud to kam kahtaa huu.n auro.n se kahalvaataa huu.n mai.n
daad dene ke liye rakhtaa huu.n kuchh ahbaab saath
sher un ke vaaste bhii maa.ng kar laataa huu.n mai.n
bazm me.n pa.Dhtaa huu.n mai.n nathune phulaa kar chiiKH kar
aur is se peshtar taqriir farmaataa huu.n mai.n
ye samajhtaa huu.n ki ko.ii sher KHud kahtaa nahii.n
ye KHabar har ek ke baare me.n phailaataa huu.n mai.n
aur ko.ii sher kah letaa hai achchhaa bhii agar
kal kaa lau.nDaa kah ke KHaatir me.n nahii.n laataa huu.n mai.n
KHud to naa-mauzuu.n bhii kah letaa huu.n mauzuu.n bhii magar
duusre ke sher par tanqiid farmaataa huu.n mai.n
shaa.erii se vaasta mujh ko na urdu se Garaz
sirf shohrat ke liye un se ulajh jaataa huu.n mai.n
kuchh buzurgo.n se mujhe bhii qurb haasil thaa kabhii
naam ho un se miraa yuu.n un ke gun gaataa huu.n mai.n
zikr kartaa huu.n puraanii sohbato.n kaa baar baar
aur daur-e-haal ko maazii se Thukraataa huu.n mai.n
baavajuud is ke agar hotii nahii.n shohrat nasiib
gaaliyaa.n detaa huu.n sab ko baukhlaa jaataa huu.n mai.n
jis se mai.n vaaqif huu.n vo shohrat me.n aage ba.Dh gayaa
dekh kar us ko bahut ku.Dhtaa huu.n bal khaataa huu.n mai.n
jaantaa hii kaun thaa mash.huur mai.n ne kar diyaa
bas yahii kah kah ke apne dil ko samajhtaa huu.n mai.n
ilm-o-fan kii chand baate.n jo mujhe ma.aluum hai.n
daad paane ke liye har baar dohraataa huu.n mai.n
daad denii ho to yuu.n detaa huu.n ik ik lafz par
lafz puuraa bhii nahii.n hotaa pha.Dak jaataa huu.n mai.n
kuchh na the ash.aar mu.nh dekhe kii dii thii mai.n ne daad
vaqt-e-Giibat daad kii tardiid farmaataa huu.n mai.n
jab kisii bazm-e-suKHan me.n sher pa.Dhtaa hai ko.ii
ik taraf baiThaa hu.aa tashiih farmaataa huu.n mai.n
saath vaalo.n par yuu.n kartaa huu.n faziilat aashkaar
ho na ho har sher me.n kuchh aib ginvaataa huu.n mai.n
yaa kabhii phir daad detaa huu.n ba-aavaaz-e-duhal
saath vaalo.n kii taraf phir aa.nkh michkaataa huu.n mai.n
saamne jab tak rahuu.n mai.n huu.n Gulaamo.n kaa Gulaam
aasmaa.n se varna taare to.D kar laataa huu.n mai.n
jo nahii.n laate hai.n KHaatir me.n KHushaamad ko mirii
vo jhi.Dak dete hai.n mujh ko un se ghabraataa huu.n mai.n
yaa samajh jaate hai.n jo in mere hathkando.n kaa raaz
saamne aate hu.e un ke bhii katraataa huu.n mai.n
kamtarii kaa hai 'shifaa' ehsaas in sab kaa sabab
dushmanii auro.n ke dil me.n to nahii.n paataa huu.n mai.n

Prem Lal Shifa Dehlvi
Nazm

ajib log hain

ajiib log the
suuraj kii raushnii ke tale
KHud apne-aap ko pahchaan bhii rahe the
aur
labo.n pe da.avaa-e-inkaar-e-aaftaab bhii thaa
vo jaante the ki suuraj kii raushnii ke sivaa
ko.ii charaaG mayassar nahii.n hai aisaa jo
talaash-e-asl-e-haqiiqat ke ziine cha.Dhte hu.e
be-imtiyaazii me.n is aaftaab jaisaa ho
ajiib log the
suuraj ke nuur-KHaane me.n
kiraa.e-daar bhii the aur sar-niguu.n nahii.n the
kisii sharaar-e-munaafiq ne un ke siino.n me.n
zabaa.n-daraazii kii us aag ko havaa dii thii
jise qabiila-e-Gaflat ke KHushk logo.n ne
anaa ke KHabt pe aflaak se nikaale hu.e
kisii darinda-e-be-shakl kii tasallii par
baraa.e-nashsha-e-haivaaniyat uThaa liyaa thaa
magar ye kyaa
ki phir aaj is hamaarii bastii me.n
ajiib log hai.n
suuraj kii raushnii ke tale
KHud apne-aap ko pahchaan bhii rahe hai.n
aur
labo.n pe da.avaa-e-inkaar-e-aaftaab bhii hai
ajiib log hai.n
suuraj ke nuur-KHaane me.n
kiraa.e-daar bhii hai.n
aur sar-niguu.n nahii.n hai.n

Sarfraz Arish
Nazm

be-yaqini ka phailta dhuan

mai.n daftar kii kursii pe baiThaa hu.aa
gaaliyaa.n bak rahaa huu.n
mausam kii hiddat ko
hiddat me.n shiddat ko
hiddat kii shiddat me.n pakte hu.e aam ko
jo ki meraa nahii.n hai
Table pe rakkhe hu.e kaam ko
jo abhii tak pa.Daa hai
havaa ko
havaa me.n munaafiq suro.n kii aamezish ko
kaar-e-mohabbat ko
kaar-e-mohabbat me.n tapte hu.e husn ko bhii
jise dekh kar qais kii aa.nkh
juftii ke sapno.n me.n Duubii
Table pe au.ndhaa pa.Daa hai jo cigarette kaa packet
mai.n kahtaa huu.n yuu.nhii pa.Daa hai
mai.n piitaa nahii.n huu.n
kisii din piyuu.ngaa jiyuu.ngaa
magar vo mirii baat par muskuraatii hai
aur us kii aa.nkho.n me.n ik be-yaqiinii hai
mujhe qatl kartii hu.ii be-yaqiinii
mai.n daftar kii kursii pe baiThaa hu.aa
be-yaqiinii se us be-yaqiinii ko
gaaliyaa.n bak rahaa huu.n
mujhe ek cigarette hii sulgaa do ko.ii

Saqib Nadeem
Nazm

shair

tumhe.n kyaa lagtaa hai allaah kii shaa'ir se ko.ii dushmanii hai
vo shaa'ir kii mazammat kis liye kartaa hai aur tum aayate.n sar par uThaa kar shaa'irii par thuukte ho
tumhe.n kyaa lagtaa hai tum vah.y ke maa'nii samajhte ho tumhe.n ilhaam kaa matlab pata hai
tumhe.n vo log hassaan-ibn-e-saabit kaa ta'aaruf kyo.n nahii.n karvaate jo tum ko bataate hai.n ki shaa'ir shar hai jhuuTaa hai fasaadii hai
vo hassaan-ibn-e-saabit mimbar-e-nabvii pe apnii shaa'irii gaataa hu.aa shaa'ir
tumhe.n maa'luum hai hassaan kii KHaatir du'aa.e.n kaun kartaa thaa
are iqbaal ke iqbaal ko sar par uThaane vaalo jab 'iqbaal' kahtaa hai
ye duniyaa daa’vat-e-diidaar hai farzand-e-aadam ko
ki har mastuur ko baKHshaa gayaa hai zauq-e-‘uryaanii
to tum mu.nh kyo.n chhupaate ho munaafiq ho
tumhe.n kyaa lagtaa hai tum she'r kii buniyaad par ash'aar ko dhutkaar doge shaa'iro.n ko maar doge
tumhe.n kyaa lagtaa hai mai.n tum pe kyo.n rotaa huu.n jab tum shaa'iro.n ke katbe Gaa.eb karte ho
tumhe.n kyaa lagtaa hai mai.n tum pe kyo.n ha.nstaa huu.n jab tum shaa'iro.n kii qabro.n ko raddii banaa kar bechte ho
tumhe.n maa'luum hai ye KHizr us ko bhii amar kar dete hai.n jis se mohabbat karte hai.n
tumhe.n kyaa lagtaa hai taKHliiq-kaarii kis kaa sheva hotaa hai
ilhaam kis pe hotaa hai aur vah.y kis pe aatii hai
tumhe.n kyaa lagtaa hai shaa'ir pe jab ilhaam hotaa hai to us ke zehn me.n aane se pahle misre kis ke haath me.n hote hai.n
un kaa kaun nahlaa kar na.e kap.Do.n me.n kanghii kar ke maathaa chuumtaa hai
tumhe.n kyaa lagtaa hai tum shaa'iro.n ke sochne kii had ko jaa sakte ho bachche ho
jahaa.n tum achchhaa ban.ne ke liye ghis ke pahu.nchte ho vahaa.n par shaa'iro.n kii mashq ke matruuk misre baasii ho kar marte hai.n
shaa'ir vahaa.n maayuus rahtaa hai jahaa.n tum muktii ke chakkar me.n jaanaa chaahte ho
tumhe.n kyaa lagtaa hai shaa'ir ke baare me.n tumhe.n jo lagtaa hai vo Thiik hai
kyaa Thiik hai aur kyaa nahii.n hai kaun jaane par mai.n itnaa jaantaa huu.n
ek achchhe aadmii se ik buraa shaa'ir ba.Daa hotaa hai 'mehtar'

Shahbaz Mehter
Nazm

karwan-e-hayat

siyaahii jaise samundar kii thaah me.n pinhaa.n
siyaahii jaise KHam-e-duud-e-aah me.n pinhaa.n
siyaahii jaise ghaTaa-Top raat se zaahir
siyaahii jaise munaafiq kii baat se zaahir

Amjad Najmi
Nazm

shattul-arab

ye surKH dhaare qadiim vaqto.n kii daastaano.n ke surKH-raavii
kanaar-e-aab-e-falak hai.n dastaar ban.ne vaale naKHiil-zaade
navaah-e-basra me.n phailtii bad-gumaan sub.he.n
fazaa me.n be-naam siskiyo.n kii shikasta-lahre.n
jinhe.n munaafiq sifaarato.n ke hisaar ne qatl kar diyaa thaa
yahii.n kahii.n hai.n
ye shahr-e-basara jahaa.n pe faaras kii apsaraa.e.n
qadiim uu.nTo.n kii ja.ng me.n kaam aa ga.ii thii.n
KHilaafato.n aur hijrato.n ke asiil shaahid
ye surKH dhaare
ajab nahii.n KHaamushii kii tasbiih kartii raate.n
kisii zamaane me.n chiiKH uTThii.n
ki kaise abbaasiyo.n ke ahd-e-muvaafaqat me.n
siyaah-sanjii ubal pa.De the
Gulaam-gardish kii daastaano.n me.n raKHna pa.Dnaa kahaa.n likhaa thaa
ye surKH dhaare mo.arriKHo.n kii taraash-karda
qabiih girhe.n kabhii to khole.nge sach kii KHaatir
ai ahal-e-basra ye e.atizaalo.n kii daastaane.n kahaa.n likhii thii.n
to vaasil-ibn-e-ataa kii baate.n jo razm-gaah-e-kalaam-andar
chunii ga.ii thii.n samaa.ato.n ne kabhii sunii hai.n
to ahal-e-basra hasan jo basrii the jaante ho
muhaasba kii naved le kar tumhaarii KHaatir tumhaarii miTTii pe aa ga.e the
tumhe.n KHabar hai jab ahal-e-basra namaaz pa.Dhnaa hii bhuul baiThe
hasan jo basrii the yaa.n kii shorish se duur jangal me.n
taar-e-anfaas ke tajallii se bahra-var the magar jo is roz
qahr TuuTaa janaaza-gah me.n the ahal-e-basra
ko.ii nahii.n thaa KHudaa ke ghar me.n
to ahal-e-basra ye surKH dhaare KHamosh the kyaa

Iliyas Babar Aawan
Nazm

munafiq

nahii.n thii vo
to jaane
us ko
kyaa kyaa
kah diyaa us ne
magar
jab saamne aa.ii
kahaa
ghar tum se jannat hai
mujhe tum se mohabbat hai

Rafia Shabnam Abidi
Nazm

beTi ke nam

magar ham jis munaafiq 'ahd kii taKHliiq hai.n us me.n
agar 'aurat kahii.n sahvan saraapaa zehn ho jaa.e
to goyaa ik qayaamat hai

Ishrat Afreen
Nazm

talluq

are paglii
tujhe mujh se mohabbat thii
to phir mujh se kahaa hotaa
ye kyaa ki raat bhar jagnaa
yuu.nhii bechain sii rahnaa
magar sab kuchh chhupaa lenaa
kabhii jaanaa jo sakhiyo.n me.n
munaafiq ban ke ha.ns lenaa
kisii se yuu.n bhii kah denaa
ki 'daanish' mujh pe 'aashiq hai
bahut hii chaahtaa hai vo
magar mai.n kyaa karuu.n hamdam
ki mai.n majbuur sii la.Dkii
zamaane ke rivaajo.n se ba.ndhii mahbuus baiThii huu.n
mai.n kuchh bhii kar nahii.n saktii
agar vo mujh ko chaahe hai to phir us par ye laazim thaa
ki mujh ko jiit letaa aa ke maidaa.n me.n muqaabil se
vo mujh ko khii.nch letaa shauq se pahluu-e-aa'daa se
zamaane ke rivaajo.n se kabhii mujh ko churaa letaa
yaa mere zimma-daaro.n se vo mujh ko maa.ng hii letaa
magar vo kuchh nahii.n kahtaa
KHafaa saa mujh se rahtaa hai
tumhaarii ye kahaanii kal bayaa.n kii ek la.Dkii ne
to mere dil me.n bhii ik shauq kii aatish hu.ii paidaa
mai.n is se qabl tum ko jaantaa tak bhii na thaa jaanaa.n
magar ik shauq thaa ki kaun hai jo yuu.n bhii chaahe hai
ki 'aashiq KHud hai lekin mujh ko vo 'aashiq bataa.e hai
so kuchh lamho.n kii KHaatir mai.n galii me.n terii dar aayaa
tujhe dekhaa tujhe jaanaa to mai.n ne tujh ko pahchaanaa
ye achchhii baat hai ki sharm se tuu kuchh na kah paa.ii
magar jaanaa.n zaraa saa ik ishaara kar diyaa hotaa
bharam mai.n teraa rakh letaa
magar ye kyaa ki tuu ne mujh ko majnuu.n naam kar Daalaa
mujhe mahbuub kar ke haa.e kyo.n badnaam kar Daalaa
zamaana mujh se puuchhe hai ki kyo.n us se KHafaa ho tum
bataa mai.n kyaa bataa.uu.n dosto.n ko mas.ala kyaa hai
mujhe bhii to mohabbat kaa bharam rakhnaa hai naa paglii
mai.n kaise kah duu.n logo.n se ki tuu hii mujh pe 'aashiq hai
magar sun jab tuu apnaa zabt kho baiThe kabhii ro kar
to mobile uThaa kar ek message mujh ko kar denaa
mai.n tujh ko thaam bhii luu.ngaa
tujhe luTne nahii.n duu.ngaa
ki tuu mere liye ik mohtaram mahbuub hastii hai
magar ye 'ishq kaa saudaa aur aise 'ishq kaa saudaa
mai.n hargiz kar nahii.n saktaa
mujhe jab tak tirii chaahat kaa kuchh ehsaas ho hii naa
to mai.n kaise bhalaa tujh se ko.ii rishta rakhuu.n paglii
Guruur-e-husn ko taj de
to phir 'daanish' bhii teraa hai
ye lafz-o-lauh tere hai.n
zamaana bhii mohabbat bhii

Danish Asari
Nazm

muhasara

miraa qalam nahii.n kirdaar us muhaafiz kaa
jo apne shahr ko mahsuur kar ke naaz kare
miraa qalam nahii.n kaasa kisii subuk-sar kaa
jo Gaasibo.n ko qasiido.n se sarfaraaz kare

Ahmad Faraz
Nazm

dil-e-man musafir-e-man

mire dil, mire musaafir
hu.aa phir se hukm saadir
ki vatan-badar ho.n ham tum
de.n galii galii sadaa.e.n
kare.n ruKH nagar nagar, kaa
ki suraaG ko.ii paa.e.n
kisii yaar-e-naama-bar kaa
har ik ajnabii se puuchhe.n
jo pataa thaa apne ghar kaa
sar-e-kuu-e-naa-shanaayaa.n
hame.n din se raat karnaa
kabhii is se baat karnaa
kabhii us se baat karnaa
tumhe.n kyaa kahuu.n ki kyaa hai
shab-e-Gam burii balaa hai
hame.n ye bhii thaa Ganiimat
jo ko.ii shumaar hotaa
hame.n kyaa buraa thaa marnaa
agar ek baar hotaa!

Faiz Ahmad Faiz
Nazm

saqi-nama

hu.aa KHema-zan kaarvaan-e-bahaar
iram ban gayaa daaman-e-koh-saar
gul o nargis o sosan o nastaran
shahiid-e-azal laala-KHuunii.n kafan
jahaa.n chhup gayaa parda-e-ra.ng me.n
lahuu kii hai gardish rag-e-sang me.n
fazaa niilii niilii havaa me.n suruur
Thaharte nahii.n aashiyaa.n me.n tuyuur
vo juu-e-kohistaa.n uchaktii hu.ii
aTaktii lachaktii saraktii hu.ii
uchhaltii phisaltii sambhaltii hu.ii
ba.De pech khaa kar nikaltii hu.ii
ruke jab to sil chiir detii hai ye
pahaa.Do.n ke dil chiir detii hai ye
zaraa dekh ai saaqii-e-laala-faam
sunaatii hai ye zindagii kaa payaam
pilaa de mujhe vo mai-e-parda-soz
ki aatii nahii.n fasl-e-gul roz roz
vo mai jis se raushan zamiir-e-hayaat
vo mai jis se hai masti-e-kaa.enaat
vo mai jis me.n hai soz-o-saaz-e-azal
vo mai jis se khultaa hai raaz-e-azal
uThaa saaqiyaa parda is raaz se
la.Daa de mamuule ko shahbaaz se
zamaane ke andaaz badle ga.e
nayaa raag hai saaz badle ga.e
hu.aa is tarah faash raaz-e-fara.ng
ki hairat me.n hai shiisha-baaz-e-fara.ng
puraanii siyaasat-garii KHvaar hai
zamii.n miir o sultaa.n se be-zaar hai
gayaa daur-e-sarmaaya-daarii gayaa
tamaashaa dikhaa kar madaarii gayaa
giraa.n KHvaab chiinii sambhalne lage
himaala ke chashme ubalne lage
dil-e-tuur-e-siinaa-o-faaraan do-niim
tajallii kaa phir muntazir hai kaliim
musalmaa.n hai tauhiid me.n garam-josh
magar dil abhii tak hai zunnaar-posh
tamaddun tasavvuf sharii.at-e-kalaam
butaan-e-ajam ke pujaarii tamaam
haqiiqat KHuraafaat me.n kho ga.ii
ye ummat rivaayaat me.n kho ga.ii
lubhaataa hai dil ko kalaam-e-KHatiib
magar lazzat-e-shauq se be-nasiib
bayaa.n is kaa mantiq se suljhaa hu.aa
luGat ke bakhe.Do.n me.n uljhaa hu.aa
vo suufii ki thaa KHidmat-e-haq me.n mard
mohabbat me.n yaktaa hamiiyat me.n fard
ajam ke KHayaalaat me.n kho gayaa
ye saalik maqaamaat me.n kho gayaa
bujhii ishq kii aag andher hai
musalmaa.n nahii.n raakh kaa Dher hai
sharaab-e-kuhan phir pilaa saaqiyaa
vahii jaam gardish me.n laa saaqiyaa
mujhe ishq ke par lagaa kar u.Daa
mirii KHaak jugnuu banaa kar u.Daa
KHirad ko Gulaamii se aazaad kar
javaano.n ko piiro.n kaa ustaad kar
harii shaaKH-e-millat tire nam se hai
nafas is badan me.n tire dam se hai
ta.Dapne pha.Dakne kii taufiiq de
dil-e-murtazaa soz-e-siddiiq de
jigar se vahii tiir phir paar kar
tamannaa ko siino.n me.n bedaar kar
tire aasmaano.n ke taaro.n kii KHair
zamiino.n ke shab zinda-daaro.n kii KHair
javaano.n ko soz-e-jigar baKHsh de
miraa ishq merii nazar baKHsh de
mirii naav girdaab se paar kar
ye saabit hai to is ko sayyaar kar
btaa mujh ko asraar-e-marg-o-hayaat
ki terii nigaaho.n me.n hai kaa.enaat
mire diida-e-tar kii be-KHvaabiyaa.n
mire dil kii poshiida betaabiyaa.n
mire naala-e-niim-shab kaa niyaaz
mirii KHalvat o anjuman kaa gudaaz
uma.nge.n mirii aarzuu.e.n mirii
ummiide.n mirii justuju.e.n mirii
mirii fitrat aa.iina-e-rozgaar
Gazaalaan-e-afkaar kaa murG-zaar
miraa dil mirii razm-gaah-e-hayaat
gumaano.n ke lashkar yaqii.n kaa sabaat
yahii kuchh hai saaqii mataa-e-faqiir
isii se faqiirii me.n huu.n mai.n amiir
mire qaafile me.n luTaa de ise
luTaa de Thikaane lagaa de ise
damaa-dam ravaa.n hai yam-e-zindagii
har ik shai se paidaa ram-e-zindagii
isii se hu.ii hai badan kii numuud
ki sho'le me.n poshiida hai mauj-e-duud
giraa.n garche hai sohbat-e-aab-o-gil
KHush aa.ii ise mehnat-e-aab-o-gil
ye saabit bhii hai aur sayyaar bhii
anaasir ke phando.n se be-zaar bhii
ye vahdat hai kasrat me.n har dam asiir
magar har kahii.n be-chugo.n be-naziir
ye aalam ye but-KHaana-e-shash-jihaat
isii ne taraashaa hai ye somnaat
pasand is ko takraar kii KHuu nahii.n
ki tuu mai.n nahii.n aur mai.n tuu nahii.n
man o tuu se hai anjuman-aafrii.n
magar ain-e-mahfil me.n KHalvat-nashii.n
chamak us kii bijlii me.n taare me.n hai
ye chaa.ndii me.n sone me.n paare me.n hai
usii ke bayaabaa.n usii ke babuul
usii ke hai.n kaa.nTe usii ke hai.n phuul
kahii.n us kii taaqat se kohsaar chuur
kahii.n us ke phande me.n jibra.iil o huur
kahii.n jaza hai shaahiin siimaab ra.ng
lahuu se chakoro.n ke aaluuda chang
kabuutar kahii.n aashiyaane se duur
pha.Daktaa hu.aa jaal me.n naa-subuur
fareb-e-nazar hai sukuun o sabaat
ta.Daptaa hai har zarra-e-kaa.enaat
Thahartaa nahii.n kaarvaan-e-vajuud
ki har lahz hai taaza shaan-e-vajuud
samajhtaa hai tuu raaz hai zindagii
faqat zauq-e-parvaaz hai zindagii
bahut us ne dekhe hai.n past o buland
safar us ko manzil se ba.Dh kar pasand
safar zindagii ke liye barg o saaz
safar hai haqiiqat hazar hai majaaz
ulajh kar sulajhne me.n lazzat use
ta.Dapne pha.Dakne me.n raahat use
hu.aa jab use saamnaa maut kaa
kaThin thaa ba.Daa thaamnaa maut kaa
utar kar jahaan-e-makaafaat me.n
rahii zindagii maut kii ghaat me.n
mazaaq-e-du.ii se banii zauj zauj
uThii dasht o kohsaar se fauj fauj
gul is shaaKH se TuuTte bhii rahe
isii shaaKH se phuuTte bhii rahe
samajhte hai.n naadaa.n use be-sabaat
ubhartaa hai miT miT ke naqsh-e-hayaat
ba.Dii tez jaulaa.n ba.Dii zuud-ras
azal se abad tak ram-e-yak-nafs
zamaana ki zanjiir-e-ayyaam hai
damo.n ke ulaT-pher kaa naam hai
ye mauj-e-nafs kyaa hai talvaar hai
KHudii kyaa hai talvaar kii dhaar hai
KHudii kyaa hai raaz-daruun-hayaat
KHudii kyaa hai bedaari-e-kaa.enaat
KHudii jalva badmast o KHalvat-pasand
samundar hai ik buu.nd paanii me.n band
a.ndhere ujaale me.n hai taabnaak
man o tuu me.n paidaa man o tuu se paak
azal us ke piichhe abad saamne
na had us ke piichhe na had saamne
zamaane ke dariyaa me.n bahtii hu.ii
sitam us kii maujo.n ke sahtii hu.ii
tajassus kii raahe.n badaltii hu.ii
damaa-dam nigaahe.n badaltii hu.ii
subuk us ke haatho.n me.n sa.ng-e-giraa.n
pahaa.D us kii zarbo.n se reg-e-ravaa.n
safar us kaa anjaam o aaGaaz hai
yahii us kii taqviim kaa raaz hai
kiran chaa.nd me.n hai sharar sang me.n
ye be-ra.ng hai Duub kar rang me.n
ise vaasta kyaa kam-o-besh se
nasheb o faraaz o pas-o-pesh se
azal se hai ye kashmakash me.n asiir
hu.ii KHaak-e-aadam me.n suurat-paziir
KHudii kaa nasheman tire dil me.n hai
falak jis tarah aa.nkh ke til me.n hai
KHudii ke nigahbaa.n ko hai zahr-naab
vo naa.n jis se jaatii rahe us kii aab
vahii naa.n hai us ke liye arjumand
rahe jis se duniyaa me.n gardan buland
KHudii faal-e-mahmuud se darguzar
KHudii par nigah rakh ayaazii na kar
vahii sajda hai laa.iq-e-ehtimaam
ki ho jis se har sajda tujh par haraam
ye aalam ye ha.ngaama-e-ra.ng-o-saut
ye aalam ki hai zer-e-farmaan-e-maut
ye aalam ye but-KHaana-e-chashm-o-gosh
jahaa.n zindagii hai faqat KHurd o nosh
KHudii kii ye hai manzil-e-avvalii.n
musaafir ye teraa nasheman nahii.n
tirii aag is KHaak-daa.n se nahii.n
jahaa.n tujh se hai tuu jahaa.n se nahii.n
ba.Dhe jaa ye koh-e-giraa.n to.D kar
tilism-e-zamaan-o-makaa.n to.D kar
KHudii sher-e-maulaa jahaa.n us kaa said
zamii.n us kii said aasmaa.n us kaa said
jahaa.n aur bhii hai.n abhii be-numuud
ki KHaalii nahii.n hai zamiir-e-vajuud
har ik muntazir terii yalGaar kaa
tirii shauKHi-e-fikr-o-kirdaar kaa
ye hai maqsad gardish-e-rozgaar
ki terii KHudii tujh pe ho aashkaar
tuu hai faatah-e-aalam-e-KHuub-o-zisht
tujhe kyaa bataa.uu.n tirii sarnavisht
haqiiqat pe hai jaama-e-harf-e-ta.ng
haqiiqat hai aa.iina-e-guftaar-e-za.ng
farozaa.n hai siine me.n sham-e-nafas
magar taab-e-guftaar rakhtii hai bas
agar yak-sar-e-muu-e-bartar param
faroG-e-tajallii ba-sozad param

Allama Iqbal
Nazm

chakle

kahaa.n hai.n kahaa.n hai.n muhaafiz KHudii ke
sanaa-KHvaan-e-taqdiis-e-mashriq kahaa.n hai.n

Sahir Ludhianvi
Nazm

aadmi-nama

duniyaa me.n paadshah hai so hai vo bhii aadmii
aur muflis-o-gadaa hai so hai vo bhii aadmii
zardaar-e-be-navaa hai so hai vo bhii aadmii
nemat jo khaa rahaa hai so hai vo bhii aadmii
Tuk.De chabaa rahaa hai so hai vo bhii aadmii
abdaal, qutub o Gaus valii-aadmii hu.e
munkir bhii aadmii hu.e aur kufr ke bhare
kyaa kyaa karishme kashf-o-karaamaat ke liye
hattaa ki apne zohd-o-riyaazat ke zor se
KHaaliq se jaa milaa hai so hai vo bhii aadmii
fir.aun ne kiyaa thaa jo da.avaa KHudaa.ii kaa
shaddaad bhii bahisht banaa kar hu.aa KHudaa
namruud bhii KHudaa hii kahaataa thaa barmalaa
ye baat hai samajhne kii aage kahuu.n mai.n kyaa
yaa.n tak jo ho chukaa hai so hai vo bhii aadmii
kul aadmii kaa husn o qubah me.n hai yaa.n zuhuur
shaitaa.n bhii aadmii hai jo kartaa hai makr-o-zor
aur haadii rahnumaa hai so hai vo bhii aadmii
masjid bhii aadmii ne banaa.ii hai yaa.n miyaa.n
bante hai.n aadmii hii imaam aur KHutba-KHvaa.n
pa.Dhte hai.n aadmii hii qur.aan aur namaaziyaa.n
aur aadmii hii un kii churaate hai.n juutiyaa.n
jo un ko taa.Dtaa hai so hai vo bhii aadmii
yaa.n aadmii pe jaan ko vaare hai aadmii
aur aadmii pe teG ko maare hai aadmii
pag.Dii bhii aadmii kii utaare hai aadmii
chillaa ke aadmii ko pukaare hai aadmii
aur sun ke dau.Dtaa hai so hai vo bhii aadmii
chaltaa hai aadmii hii musaafir ho le ke maal
aur aadmii hii maare hai phaa.nsii gale me.n Daal
yaa.n aadmii hii said hai aur aadmii hii jaal
sachchaa bhii aadmii hii nikaltaa hai mere laal
aur jhuuT kaa bharaa hai so hai vo bhii aadmii
yaa.n aadmii hii shaadii hai aur aadmii biyaah
qaazii vakiil aadmii aur aadmii gavaah
taashe bajaate aadmii chalte hai.n KHvaah-maKHvaah
dau.De hai.n aadmii hii to mash.al jalaa ke raah
aur byaahane cha.Dhaa hai so hai vo bhii aadmii
yaa.n aadmii naqiib ho bole hai baar baar
aur aadmii hii pyaade hai.n aur aadmii savaar
huqqa suraahii juutiyaa.n dau.De.n baGal me.n maar
kaa.ndhe pe rakh ke paalkii hai.n dau.Dte kahaar
aur us me.n jo pa.Daa hai so hai vo bhii aadmii
baiThe hai.n aadmii hii dukaane.n lagaa lagaa
aur aadmii hii phirte hai.n rakh sar pe khuunchaa
kahtaa hai ko.ii lo ko.ii kahtaa hai laa re laa
kis kis tarah kii beche.n hai.n chiize.n banaa banaa
aur mol le rahaa hai so hai vo aadmii
table majiire daa.ere saara.ngiyaa.n bajaa
gaate hai.n aadmii hii har ik tarah jaa-ba-jaa
ranDii bhii aadmii hii nachaate hai.n gat lagaa
aur aadmii hii naache hai.n aur dekh phir mazaa
jo naach dekhtaa hai so hai vo bhii aadmii
yaa.n aadmii hii la.al-o-javaahar me.n be-bahaa
aur aadmii hii KHaak se bad-tar hai ho gayaa
kaalaa bhii aadmii hai ki ulTaa hai juu.n tavaa
goraa bhii aadmii hai ki Tuk.Daa hai chaa.nd-saa
bad-shakl bad-numaa hai so hai vo bhii aadmii
ik aadmii hai.n jin ke ye kuchh zarq-barq hai.n
ruupe ke jin ke paa.nv hai.n sone ke farq hai.n
jhamke tamaam Garb se le taa-ba-sharq hai.n
kam-KHvaab taash shaal do-shaalo.n me.n Garq hai.n
aur chiitha.Do.n lagaa hai so hai vo bhii aadmii
hairaa.n huu.n yaaro dekho to kyaa ye svaa.ng hai
aur aadmii hii chor hai aur aapii thaang hai
hai chhiinaa jhapTii aur baa.ng taa.ng hai
dekhaa to aadmii hii yahaa.n misl-e-raa.ng hai
faulaad se ga.Dhaa hai so hai vo bhii aadmii
marne me.n aadmii hii kafan karte hai.n tayaar
nahlaa-dhulaa uThaate hai.n kaa.ndhe pe kar savaar
kalma bhii pa.Dhte jaate hai.n rote hai.n zaar-zaar
sab aadmii hii karte hai.n murde ke kaarobaar
aur vo jo mar gayaa hai so hai vo bhii aadmii
ashraaf aur kamiine se le shaah-taa-vaziir
ye aadmii hii karte hai.n sab kaar-e-dil-paziir
yaa.n aadmii muriid hai aur aadmii hii piir
achchhaa bhii aadmii hii kahaataa hai ai 'naziir'
aur sab me.n jo buraa hai so hai vo bhii aadmii

Nazeer Akbarabadi
Nazm

nau-jawan KHatun se

hijaab-e-fitna-parvar ab uThaa letii to achchhaa thaa
KHud apne husn ko pardaa banaa letii to achchhaa thaa
tirii niichii nazar KHud terii ismat kii muhaafiz hai
tuu is nashtar kii tezii aazmaa letii to achchhaa thaa
tirii chiin-e-jabii.n KHud ik sazaa qaanuun-e-fitrat me.n
isii shamshiir se kaar-e-sazaa letii to achchhaa thaa
ye teraa zard ruKH ye KHushk lab ye vahm ye vahshat
tuu apne sar se ye baadal haTaa letii to achchhaa thaa
dil-e-majruuh ko majruuh-tar karne se kyaa haasil
tuu aa.nsuu po.nchh kar ab muskuraa letii to achchhaa thaa
tire zer-e-nagii.n ghar ho mahal ho qasr ho kuchh ho
mai.n ye kahtaa huu.n tuu arz-o-samaa letii to achchhaa thaa
agar KHalvat me.n tuu ne sar uThaayaa bhii to kyaa haasil
bharii mahfil me.n aa kar sar jhukaa letii to achchhaa thaa
tire maathe kaa Tiikaa mard kii qismat kaa taaraa hai
agar tuu saaz-e-bedaarii uThaa letii to achchhaa thaa
ayaa.n hai.n dushmano.n ke KHanjaro.n par KHuun ke dhabbe
unhe.n tuu ra.ng-e-aariz se milaa letii to achchhaa thaa
sanaane.n khii.nch lii hai.n sar-phire baaGii javaano.n ne
tuu saamaan-e-jaraahat ab uThaa letii to achchhaa thaa
tire maathe pe ye aa.nchal bahut hii KHuub hai lekin
tuu is aa.nchal se ik parcham banaa letii to achchhaa thaa

Asrarul Haq Majaz
Nazm

urdu zaban

ye kaisaa ishq hai urdu zabaa.n kaa,
mazaa ghultaa hai lafzo.n kaa zabaa.n par
ki jaise paan me.n mah.ngaa qimaam ghultaa hai
ye kaisaa ishq hai urdu zabaa.n kaa....
nasha aataa hai urdu bolne me.n
gilaurii kii tarah hai.n mu.nh lagii sab istelaahe.n
lutf detii hai, halaq chhuutii hai urdu to, halaq se jaise mai kaa gho.nT utartaa hai
ba.Dii aristocracy hai zabaa.n me.n
faqiirii me.n navaabii kaa mazaa detii hai urdu
agarche ma.anii kam hote hai urdu me.n
alfaaz kii ifraat hotii hai
magar phir bhii, buland aavaaz pa.Dhiye to bahut hii mo'tabar lagtii hai.n baate.n
kahii.n kuchh duur se kaano.n me.n pa.Dtii hai agar urdu
to lagtaa hai ki din jaa.Do.n ke hai.n khi.Dkii khulii hai, dhuup andar aa rahii hai
ajab hai ye zabaa.n, urdu
kabhii kahii.n safar karte agar ko.ii musaafir sher pa.Dh de 'miir', 'Gaalib' kaa
vo chaahe ajnabii ho, yahii lagtaa hai vo mere vatan kaa hai
ba.Dii shaa.ista lahje me.n kisii se urdu sun kar
kyaa nahii.n lagtaa ki ek tahziib kii aavaaz hai, urdu

Gulzar
Nazm

maine chand aur sitaron ki tamanna ki thi

mai.n vo naGma huu.n jise pyaar kii mahfil na milii
vo musaafir huu.n jise ko.ii bhii manzil na milii

Sahir Ludhianvi
Nazm

hamare ustad

kitnii mehnat se pa.Dhaate hai.n hamaare ustaad
ham ko har ilm sikhaate hai.n hamaare ustaad
to.D dete hai.n jahaalat ke a.ndhero.n kaa tilism
ilm kii sham.a jalaate hai.n hamaare ustaad
manzil-e-ilm ke ham log musaafir hai.n magar
raasta ham ko dikhaate hai.n hamaare ustaad
zindagii naam hai kaa.nTo.n ke safar kaa lekin
raah me.n phuul bichhaate hai.n hamaare ustaad
dil me.n har lamha taraqqii kii du.aa karte hai.n
ham ko aage hii ba.Dhaate hai.n hamaare ustaad
sab ko tahziib-o-tamaddun kaa sabaq dete hai.n
ham ko insaan banaate hai.n hamaare ustaad
ham ko dete hai.n ba-har-lamha payaam-e-ta.aliim
achchhii baate.n hii bataate hai.n hamaare ustaad
KHud to rahte hai.n bahut ta.ng-o-pareshaan magar
daulat-e-ilm luTaate hai.n hamaare ustaad
ham pe laazim hai ki ham log kare.n un kaa adab
kis mohabbat se ba.Dhaate hai.n hamaare ustaad

Kaif Ahmed Siddiqui
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now