Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "naamo.n"

Nazm MATCHES FOR "naamo.n"

Nazm

daraKHt-e-zard

vo shajra jo kanaana fahr Gaalib ka.ab marra se
qusai o haashim o sheba abuu-taalib tak aataa thaa
vo ik andoh thaa taariiKH kaa andoh-e-sozinda
vo naamo.n kaa daraKHt-e-zard thaa aur us kii shaaKHo.n ko
kisii tannuur ke haizam kii KHaakistar hii ban.naa thaa
use sho.ala-zada buudash kaa ik bistar hii ban.naa thaa

Jaun Eliya
Nazm

abhi hum KHub-surat hain

abhii ham KHuub-suurat hai.n
hamaare jism auraaq-e-KHizaanii ho ga.e hai.n
aur ridaa-e-zaKHm se aaraasta hai.n
phir bhii dekho to
hamaarii KHush-numaa.ii par ko.ii harf
aur kashiida-qaamtii me.n KHam nahii.n aayaa
hamaare ho.nT zahriilii ruto.n se kaasnii hai.n
aur chehre ratjago.n kii sho.alagii se
aabnuusii ho chuke hai.n
aur zaKHmii KHvaab
naadiida jaziiro.n kii zamii.n par
is tarah bikhre pa.De hai.n
jis tarah tuufaa.n-zada kashtii ke Tuk.Do.n ko
samundar saahilo.n par phe.nk detaa hai
lahuu kii baarishe.n
yaa KHud-kushii kii KHvaahishe.n thii.n
is aziyyat ke safar me.n
kaun saa mausam nahii.n aayaa
magar aa.nkho.n me.n nam
lahje me.n sam
ho.nTo.n pe ko.ii naGma-e-maatam nahii.n aayaa
abhii tak dil hamaare
KHanda-e-tiflaa.n kii suurat be-kuduurat hai.n
abhii ham KHuub-suurat hai.n
zamaane ho ga.e
ham kuu-e-jaanaa.n chho.D aa.e the
magar ab bhii
bahut se aashnaa naa-aashnaa hamdam
aur un kii yaad ke maanuus qaasid
aur un kii chaahato.n ke hijr-naame
duur deso.n se hamaarii or aate hai.n
gulaabii mausamo.n kii dhuup
jab naurasta sabze par qadam rakhtii hu.ii
ma.muura-e-tan me.n dar aatii hai
tuu barfaanii badan me.n
juu-e-KHuu.n aahistagii se gungunaatii hai
udaasii kaa parinda
chup ke jangal me.n
sar-e-shaaKH-e-nihaal-e-Gam chahaktaa hai
ko.ii bhuulaa hu.aa bisraa hu.aa dukh
aabla bin kar Tapaktaa hai
to yuu.n lagtaa hai
jaise harf apne
zinda aavaazo.n kii suurat hai.n
abhii ham KHuub-suurat hai.n
hamaarii KHush-numaa.ii harf-e-haq kii ruu-numaa.ii hai
usii KHaatir to ham aashufta-jaa.n
ushshaaq kii yaado.n me.n rahte hai.n
ki jo un par guzartii hai vo kahte hai.n
hamaarii harf-saazii
ab bhii mahbuub-e-jahaa.n hai
shaa.erii shoriid-gaan-e-ishq ke vird-e-zabaa.n hai
aur gulaabo.n kii tarah shaadaa.n chehre
la.al o marjaa.n kii tarah lab
sandalii.n haatho.n se
chaahat aur aqiidat kii bayaazo.n par
hamaare naam likhte hai.n
sabhii dard-aashnaa
iisaar mashrab
ham-nafas ahl-e-qafas
jab maqtalo.n kii samt jaate hai.n
hamaare bait gaate hai.n
abhii tak naaz karte hai.n sab ahl-e-qaafila
apne hudii-KHvaano.n par aashufta-kalaamo.n par
abhii ham dastaKHat karte hai.n apne qatl-naamo.n par
abhii ham aasmaano.n kii amaanat
aur zamiino.n kii zaruurat hai.n
abhii ham KHuub-suurat hai.n

Ahmad Faraz
Nazm

kali diwar

kal washington shahr kii ham ne sair bahut kii yaar
guu.nj rahii thii sab duniyaa me.n jis kii jai-jai-kaar
mulko.n mulko.n ham ghuume the banjaaro.n kii misl
lekin is kii saj-dhaj sach-much dil-daaro.n kii misl
raushniyo.n ke rang bahe.n yuu.n rasta nazar na aa.e
man kii aa.nkho.n vaalaa bhii yaa.n andhaa ho ho jaa.e
uu.nche baam charaaGaa.n raste ruup-bhare baazaar
jaagtii aa.nkho.n se dekhaa hai KHvaabo.n kaa sansaar
ek safed imaarat jis kii nagar nagar me.n dhuum
andar duniyaa bhar kii kaalak baahar se ma.asuum
yahii safed imaarat jis me.n bahut ba.Dii sarkaar
yahii.n kare.n saudaagar chhoTii qaumo.n kaa bevpaar
yahii.n pe jaaduu-gar baiThaa jab kahii.n kii Dor hilaa.e
har bastii nagasaki hiroshima ban jaa.e
isii imaarat se kuchh duur hii ik kaalii diivaar
logo.n kaa mela aisaa lagaa thaa jaise ko.ii tyauhaar
is kaalii diivaar pe kanda dekhe hazaaro.n naam
un naamo.n ke biich likhaa thaa shohdaa-e-vietnam
aas-paas to jam.a hu.aa thaa KHilqat kaa amboh
sab kii aa.nkho.n me.n sannaaTaa chehro.n par andoh
bekal bahne.n ghaayal maa.e.n aur dukhii bevaaye.n
saajan tum kis des sidhaare soche.n mahbuubaa.e.n
apne pyaaro.n dil-daaro.n kaa ojhal mukh.Daa Dhuu.nDe.n
is kaalii diivaar pe un ke naam kaa Tuk.Daa Dhuu.nDe.n
dilo.n me.n dukh aa.nkho.n me.n shabnam haatho.n me.n phuul uThaa.e
is naamo.n ke qabristaan kaa bhed ko.ii kyaa paa.e
naa turbat naa katba ko.ii naa haDDii naa maas
phir bhii paagal nainaa.n ko thii piyaa milan kii aas
kahii.n kahii.n is kaalii sil par ko.ii safed gulaab
yuu.n be-taab pa.Daa thaa jaise andhii aa.nkh kaa KHvaab
kaa.nTaa ban kar sabhii ke dil me.n khaTke ek savaal
kis kaaran miTTii me.n milaa.e hiiro.n jaise laal
Ho-chi-minh ke des me.n ham ne kyaa kyaa sitam na Dhaa.e
us ke jiyaale to aazaadii kaa suuraj le aa.e
lekin itne chaa.nd ga.nvaa kar ham ne bhalaa kyaa paayaa
ham bad-qismat aise jin ko dhuup milii naa saayaa
mukh motii de kar haasil kii ye kaalii diivaar
ye kaalii diivaar jo hai bas ik KHaalii diivaar
ye kaalii diivaar jo hai naamo.n kaa qabristaan
washington ke shahr me.n dafn hai.n kis kis ke armaan

Ahmad Faraz
Nazm

KHatun-e-mashriq

terii aa.nkho.n kii kiran se ai jahaan-e-e'tibaar
jagmagaa.egii nasab-naamo.n kii lauh-e-zar-nigaar

Josh Malihabadi
Nazm

zindagi ka waqfa

raat sannaaTe kii chaadar me.n pa.Dii hai lipTii
pattiyaa.n sa.Dko.n kii sab jaag rahii hai.n jaise
dekhnaa chaahtii hai.n shahr me.n kyaa hotaa hai
mai.n hamesha kii tarah ho.nTo.n me.n cigarette ko dabaa.e
sone se pahle KHayaalaat me.n khoyaa hu.aa huu.n
din me.n kyaa kuchh kiyaa ik jaa.eza letaa hai zamiir
ek saada saa varaq naama-e-aamaal hai sab
kuchh nahii.n likkhaa ba-juz is ke pise jaa.o yuu.nhii
kuchh nahii.n likhaa bas ik itnaa ki insaa.n kaa nasiib
giilii guu.ndhii hu.ii miTTii kaa hai ik toda saa
din me.n sau shakle.n banaa kartii hai.n is miTTii se
kuchh nahii.n likhaa bas ik itnaa ki chyuu.nTii dil hai
jauq-dar-jauq jo insaan nazar aate hai.n
daana le kar kisii diivaar pe cha.Dhnaa girnaa
aur phir cha.Dhnaa cha.Dhe jaanaa yuu.nhii shaam o sahar
kuchh nahii.n likkhaa bas itnaa ki pise jaa.o yuu.nhii
aur andoh ta.assuf KHushii aalaam nashaat
KHud ko sau naamo.n se bahlaate raho chalte raho
saa.ns ruk jaa.e jahaa.n samjho vahii.n manzil hai
aur is dau.D se thak jaa.o to cigarette pii lo

Akhtarul Iman
Nazm

aqd-name

aaj unho.n ne ailaan kar hii diyaa
dekho!
ham ne tumhaarii sab kii sab quvvato.n kaa faisla kiyaa thaa
qiil-o-qaal kii gunjaa.ish baaqii nahii.n hai
tumhaare iqraar-naame hamaare paas mahfuuz hai.n
tum se pahle vaalo.n kii KHataa yahii thii
ki unhe.n,
apnii naaf ke niiche sarsaraahaT kaa ehsaas
kuchh ziyaada hii ho chalaa thaa
unhe.n shahr-badar kar diyaa gayaa
un ke pachhtaave aur gi.Dgi.DaahaTe.n
aaj bhii hamaare kaano.n me.n mahfuuz hai.n
tumhe.n itnii chhuuT dii hii kyuu.n jaa.e
ki tum
kal hamaare muqaable par utar aa.o
ham tumhe.n hoshiyaar kiye dete hai.n
diivaare.n phalaa.ngne vaale
itaab se bach nahii.n sakte
aqd-naamo.n par tumhaare dastaKHat
tumhaarii naa-muraadii kaa khulaa e'tiraaf hai.n
is ke baGair
hamaarii haram-saraa me.n
daaKHil hone ke ijaazat-naame
tumhe.n mil bhii kaise sakte the
is se pahle ki hamaare najiibut-tarafain shajre mashkuuk ho jaa.e.n
aur hamaare hasab-nasab par aa.nch aa jaa.e
ham!
tum se pahle guluu-KHalaasii kaa raasta Dhuu.nD nikaale.nge!!

Aashufta Changezi
Nazm

kitabi kiDe

vo bahut tez tez chalte hu.e
sadaa bahaar phuulo.n ke naamo.n se
KHizaa.n me.n girne vaale
aaKHirii pate tak jaa pahu.nchte hai.n

Zeeshan Sahil
Nazm

safir-e-laila-4

hariim-e-mahmil me.n aa gayaa huu.n salaam le lo
salaam le lo ki mai.n tumhaaraa amiin-e-qaasid KHajil musaafir azaa kii vaadii se lauT aayaa
mai.n lauT aayaa magar saraasiima is tarah se
ki pichhle qadmo.n palaT ke dekhaa na guzre rasto.n ke faaslo.n ko
jahaa.n pe mere nishaan-e-paa ab thake thake se gire pa.De the
hariim-e-mahmil me.n vo safiir-e-naved-parvar
jise zamaane ke past o baalaa ne itne qisse pa.Dhaa diye the
jo pahle qarno.n kii tiirgii ko ujaal dete
tumhe.n KHabar hai
ye meraa siina qadiim ahraam me.n akelaa vo ik haram thaa
aziim raazo.n ke kohna taabuut jis kii ka.Diyo.n me.n bas rahe the
unhii.n havaa.o.n kaa Dar nahii.n thaa
na sahraa-zaado.n ke naslii kaa hii un kii gird-e-KHabar ko pahu.nche
hariim-e-mahmil me.n vo amaanat kaa paasbaa.n huu.n
jo charm-e-aahuu ke narm kaaGaz pe likkhe naame ko le ke niklaa
vahii ki jis ke savaar hone ko tum ne baKHshaa jahaaz-e-sahraa
taviil raaho.n me.n KHaalii mashko.n kaa baar le kar hazaar sadiyaa.n safar me.n gardaa.n
kahii.n saraabo.n kii bahtii chaa.ndii kahii.n chaTaano.n kii saKHt qaashe.n
mayaan-e-raah-e-safar kha.De the jaka.Dne vaale nazar ke lobhii
magar na bhaTkaa bhaTakne vaalaa
jo dam liyaa to azaa me.n jaa kar
hariim-e-mahmil suno fasaane jo sun sako to
mai.n chalte chalte safar ke aaKHir pe aisii vaadii me.n jaa ke Thahraa
aur us pe guzre hariis lamho.n ke un nishaano.n ko dekh aayaa
jahaa.n ke naqshe biga.D ga.e hai.n
jahaa.n ke tabqe ulaT ga.e hai.n
vahaa.n kii fasle.n zaqquum kii hai.n
havaa.e.n kaalii hai.n raakh u.D kar kha.nDar me.n aise phunkaartii hai
ki jaise azhdar chahaar jaanib se jab.De khole Gadar machaate
zamii.n pe kiina nikaalte ho.n
kasiif zahro.n kii thailiyo.n ko Gazab se baahar uchhaalte ho.n
muhiib saa.e me.n devtaa.o.n kaa raqs jaarii thaa
TuuTe haatho.n kii haDDiyo.n se vo dohl-e-baatil ko piiTte the
za.iif kavvo.n ne ahl-e-qarya kii qabre.n khodii.n
tuu un ke naaKHun nahiif panjo.n se jha.D ke aise bikhar rahe the
chako.ndaro.n ne chabaa ke phe.nke ho.n jaise haDDii ke KHushk reze
hariim-e-mahmil vahii vo manzil thii jis ke siine pe mai.n tumhaarii nazar se pahu.nchaa uThaa.e mehr o vafaa ke naame
vahii.n pe baiThaa thaa sar-ba-zaanuu tumhaaraa mahram
kha.nDar ke bosiida pattharo.n par haziin o Gamgii.n
vahii.n pe baiThaa thaa
qatl-naamo.n ke mahzaro.n ko vo pa.Dh rahaa thaa
jo pastiyo.n ke kotaah haatho.n ne us kii qismat me.n likh diye the
hariim-e-mahmil mai.n apne naaqa se niiche utraa to mai.n ne dekhaa ki us kii aa.nkhe.n KHamosh o viiraa.n
Gubaar-e-sahraa mizha pe larzaa.n thaa ret diido.n me.n u.D rahii thii
magar sharaafat kii ek lau thii ki us ke chehre pe narm haala kiye hu.e thii
vo mere lahje ko jaantaa thaa
hazaar manzil kii duuriyo.n ke sataa.e qaasid ke ukh.De qadmo.n kii chaap sunte hii uTh kha.Daa thaa
dayaar-e-vahshat me.n bas rahaa thaa
pe terii saa.nso.n ke zer-o-bam se uThii haraarat se aashnaa thaa
vo kah rahaa thaa yahaa.n se jaa.o ki yaa.n KHaraabo.n ke kaar-KHaane hai.n
roz o shab ke jo silsile hai.n khule KHasaaro.n kii manDiyaa.n hai.n
vo Dar rahaa thaa tumhaaraa qaasid kahii.n KHasaaro.n me.n baT na jaa.e
hariim-e-mahmil mai.n kyaa bataa.uu.n vahii.n pe khoyaa thaa meraa naaqa
faqat KHaraabe ke chand lamhe hii us ke guude ko khaa ga.e the
usii maqaam-e-tilism-gar me.n vo ustaKHvaano.n me.n Dhal gayaa thaa
jahaa.n pe bikhraa pa.Daa thaa pahle tumhaare mahram kaa asp-e-taazii
aur ab vo naaqa ke ustuKHvaa.n bhii
tumhaare mahram ke asp-e-taazii ke ustaKHvaano.n me.n mil ga.e hai.n
hariim-e-mahmil vahii vo patthar the jin pe rakkhe the mai.n ne mehr o vafaa ke naame
jahaa.n pe zinda ruto.n me.n baa.ndhe the tum ne paimaan o ahd apne
magar vo patthar ki ab ajaa.ib kii kaargah hai.n
tumhaare naame kii us ibaarat ko khaa ga.e hai.n
shifaa ke haatho.n se jis ko tum ne raqam kiyaa thaa
so ab na naaqa na ko.ii naama na le ke aayaa javaab-e-naama
mai.n naa-muraad o KHajil musaafir
magar tumhaaraa amiin qaasid azaa kii vaadii se lauT aayaa
aur us najiib o kariim mahram-e-vafaa ke paikar ko dekh aayaa
jo aane vaale dino.n kii gha.Diyaa.n abad kii saa.nso.n se gin rahaa hai

Ali Akbar Natiq
Nazm

ism-e-azam

ikkiis saal umr thii us kii bas
abhii us ne goyaa zindagii ko aa.nkh bhar ke dekhaa bhii na thaa
khelne kuudne ke din the ki zamaane kii riit ke mutaabiq
chaT ma.ngnii paT byaah ho gayaa
aur tiin saal me.n tiin bachche bhii paidaa ho ga.e
phir achaanak bechaarii ko vo biimaarii mil ga.ii
jis ke panje se ko.ii KHush-nasiib hii chhuTtaa hai
mujhe barso.n pahle gaa.nv me.n apnii chitkabrii bakrii yaad aa ga.ii
jis ne ek jholii me.n paa.nch bachche diye the
aur chand roz baa'd mar ga.ii thii
marii hu.ii bakrii ke thano.n se is ke paa.ncho.n bachche
duudh kii aaKHirii buu.nd tak nicho.D lene ke chakkar me.n
ek duusre se guttham-gutthaa ho rahe the
mai.n ne KHudaa se kahaa
Gazab ke sitam-zariif ho tum bhii
aadmii ko itnaa kamzor paidaa kiyaa hai
bakrii kaa bachcha to janm lete hii chaar Taa.ngo.n par kha.Daa ho jaataa hai
magar aadmii kaa bachcha baras-haa-baras tak yatiimo.n kii tarah sahaare Dhuu.nDhtaa phirtaa hai
aur phir tum ye sahaare bhii chhiin lete ho
chalo marhuum baap kii jagah to tum KHud pur kar lete ho
ki aasmaanii baap kahlaane kaa tumhe.n azal se shauq hai
lekin ye nau-mauluud aur nau-KHez bachcho.n ko tum maa.o.n se kis khaate me.n mahruum kar dete ho
ha.nsaa bahut ha.nsaa
mai.n kahe baGair na rah sakaa ki aafriin hai
duusre ke dukh par is tarah khile bando.n to saffaak siyaasat-daa.n bhii nahii.n ha.nste
achaanak meraa shaana jhi.njho.D kar bolaa zaraa merii taraf dekho
mujhe gumaan thaa ki to raat aur qur.aan ke auraaq se nikal kar
ek pur-jalaal mardaana paikar mere saamne hogaa
magar vahaa.n to ek harii-bharii aurat kha.Dii thii
jis kii chhaatiyo.n se duudh kii dhaare.n favvaare kii tarah phuuT rahii thii.n
qariib thaa ki mai.n Gash khaa kar gir jaataa
isii ne mujhe sambhaalaa diyaa
aur dhiire se kahaa
mai.n baap bhii huu.n aasmaano.n me.n
mai.n maa.n bhii huu.n zamiin par
dobaara us kii jaanib dekhaa
aa.nkho.n se do garm garm aa.nsuu mere chehre par Tapak pa.De
mai.n ne kahaa pahle tum ha.ns rahe the
ab tum ro rahii ho
kahaa ha.nsii aur rone kaa ek hii naam hai
zindagii
mai.n ne kahaa tumhaare mardaana naamo.n kaa to shumaar nahii.n
logo.n ko ninnaanve ke phere me.n Daal rakkhaa hai tum ne
murshido.n se ism-e-aazam puuchhte puuchhte behaal ho jaate hai.n
ab tumhaare zanaanaa naam bhii Dhuu.nDne pa.De.nge
zer-e-lab muskuraa ke kahaa
paidaa hote hii tum sab ke mu.nh par meraa ism-e-aazam aa jaataa hai
har ko.ii az-KHud pukaar uThtaa hai
maa.n
aur phir apnii maa.n kii chaahat me.n sab kii maa.n kii bhuul jaataa hai
naam bhii yaad nahii.n rahtaa us kaa

Mohammad Haneef Rame
Nazm

ek tilismi khel

kaise kaise naam likhe the
vaqt ne maah-o-saal ke ruKH par
tuufaano.n ne paalaa maaraa
saare ho ga.e tittar-bittar
saiqal kar ke rakhnaa chaahaa
ham ne kuchh naamo.n ko bachaa kar
umr kii mauje.n bahaa le ga.ii.n
saare la.al aur saare javaahir
tarz-e-KHiraam ke phuul khile the
aatii jaatii raahguzar par
aaj hai sirf Gubaar kaa parda
kaisii manzil kaisaa manzar
dhajjii dhajjii bikhar rahii hai
tanii hu.ii ehsaas kii chaadar
kuchh harfo.n kii maddham sii lau
kaa.np rahii hai laraz laraz kar
KHushbuu apnii kho baiThaa hai
sab shero.n kaa mushk aur ambar
suurat apnii badal chuke hai.n
ahd aqiide masjid mimbar
kaise KHaalii haath kha.De hai.n
shaah vaziir amiir gadaagar
uj.Dii KHvaab-o-KHayaal kii duniyaa
apne gharo.n me.n sab hai.n be-ghar
kyuu.n-kar jo.De.n apne Tuk.De
haar ga.e hai.n saare rafuugar
KHuunii baadal gahre gahre
chhaTe nahii.n hai.n baras baras kar
aur zamiine.n aa.nkhe.n muu.nde
mast hu.ii hai.n lahuu pii pii kar
ek tilismii khel rachaa hai
jaane kaun hai ye jaaduugar

Zehra Nigaah
Nazm

na marne ka dukh

ko.ii to chand lamho.n baa'd apne
baal bikhraane garebaa.n nochne kii fikr me.n thaa
ko.ii Gamgii.n chehra aur siyaah malbuus me.n
behad hasii.n ma.aluum detaa thaa
mere ajdaad ke naamo.n ko ga.nvaa kar
ko.ii mujh se ta'alluq jo.Dtaa thaa

Aabid Adeeb
Nazm

mera dost abul-haul

ye duniyaa to un shola saamaan logo.n ne aapas me.n taqsiim kar lii
jo hathiyaar kii shakl me.n ranj-o-Gam Dhaalte hai.n
yaa gola-baaruud ke kaar-KHaano.n ke maalik hai.n
yaa phir sanaa-KHvaa.n hai.n un ke
hamaare liye sirf naare bache hai.n
san.atii daur ke kaj-kulaaho.n kii daad-o-dahish ruuh-parvar ho yaa jaan-levaa
magar zindaabaad, aafrii.n, marhabaa, ke sivaa kuchh nahii.n paas apne
ye sab jaantaa hai hamaarii shujaa.at kii parvaaz kyaa hai
hamaarii javaa.n-mardii ik suuba-jaatii ta.assub se
yaa firqa-vaarii fasaadaat se aage kuchh bhii nahii.n hai
futuuhaat-e-askandarii ham ne taKHtii pe likh kar miTaa dii hai.n kab kii
hamaare baa'd zamii.n ke tale so rahe hai.n
ajaa.ib-gharo.n me.n laTaktii hai.n talvaare.n un kii
aur un ke zarrii.n libaado.n ko ghun khaa gayaa hai
zira-baktaro.n par clones aa ga.ii hai
ye sab jaantaa hai hamaarii tag-o-taaz kyaa hai
hamaare shikam gar hamaare suro.n pe na hote
aur chehro.n me.n aazaa-e-jinsii
to ham achchhe insaan bante
hamaare gharo.n ke kam o besh sab aqabii darvaaze paiham khule hai.n
hamaare lahuu me.n hare laal piile bahut saare parcham khule hai.n
kahii.n se magar haq kii aavaaz aatii nahii.n hai
hamaarii zabaa.n dil kii saathii nahii.n hai
hamaare liye khokhlaa lafz-e-jamhuuriyat hai, taqaariir hai.n leadero.n kii
hamaare liye roz-naamo.n ke safhaat hai.n, ishtihaaraat hai.n niim-jinsii
hamaare liye devtaa.o.n ke but hai.n, KHudaa ke faraamiin hai.n aur uqbaa
jo bad-ra.ng hai haal kii tarah aur kore laTThe kii buu se bharii hai
hamaare liye sirf roTii kii jidd-o-johd
aurato.n ke barhana badan kii tamannaa se aage kahii.n kuchh nahii.n hai
hamaarii rago.n me.n jo tezaab hai us kii shiddat kabhii kam na hogii!

Akhtarul Iman
Nazm

hum donon

ham dino.n ikaTThe rahte hai.n
ikaTThe sote hai.n
hamaare dukh sukh ek hai.n
hamaarii aa.nhke.n ek duusre ke KHvaab
dekh letii hai.n
ham kahii.n bhii ho.n
ek duusre ke naamo.n se jaane jaate hai.n
hamaare ghar aane vaale
apnii dastak me.n dono.n kaa naam
shaamil kar lete hai.n
din ke pahle hisse me.n
hamaarii aa.nhke.n
ek duusre ko KHush-aamdiid kahtii hai.n
ab lafz hamaare darmiyaan
chup rahte hai.n
hamaarii saa.nso.n kaa rhythm
jism kii harakat se
ek duusre ke hone kaa itminaan dilaataa hai
ham akasr
ab ek duusre kii nii.nd so lete hai.n
lekin
is ke baavajuud akasr
gahrii raato.n me.n
hamaare dil
apne apne siino.n me.n
alag alag dha.Dakte hu.e
sunaa.ii dete hai.n

Azra Abbas
Nazm

tawaif

kabhii dil kulbulaataa hai ki puuchhuu.n aa.ino.n ke shahr me.n be-chehragii kaisii
vo vahshii jo pas-e-diivaar apne dast-e-jinsii se dur-e-naasufta kii paakiizgii ko taar karte hai.n
unhe.n din ke ujaale me.n unhe.n a.amaal-naamo.n ke havaalo.n se savaalo.n me.n pirone se bhalaa be-Gairatii kaisii

Asim Badr
Nazm

baadshah teri dahliz ka darban hai

to miinaara-e-baabul kii bulandii se
baa.njh zamiin ke naam
baar-aavrii kaa sandesa likhtii hai
ai bahut se naamo.n vaalii
terii hatheliyaa.n
tere tamavvuz ke haatho.n kii garmii se dahaktii hai.n
jis ke safed ma.abad ke sunahrii kalas
merii aa.nkho.n ko KHiira karte hai.n
tere maatam-daaro.n ke aaza-e-tanaasul
terii baargaah kaa cha.Dhaavaa hai.n

Jawaz Jafri
Nazm

sal nau ke liye ek nazm

du.aa.e.n aur du.aa.o.n se bharii
be-ant tahriire.n
mujhe har saal ke in aaKHirii
lamho.n me.n miltii hai.n
mere ahbaab ke naamo.n me.n
aksar darj hotaa hai
KHudaa mahfuuz rakkhe
saal bhar mujh ko balaa.o.n se
mujhe zahr ab mai.n lipTii havaa.e.n
chhuu ke na guzrii.n
mujhe maujuud aur aane vaale
saal ke lamhe
mubaarak dar mubaarak ho.n
yahii tahriir mai.n ahbaab ko
vaapas luTaataa huu.n
yahii jazbaat mere dosto.n
ke naam hote hai.n
magar phir vaqt ke haatho.n
na jaane kyaa guzartii hai
ki jo bhii tiir aataa hai
usii jaanib se aataa hai
jahaa.n se itr me.n Duubaa hu.aa
paiGaam aayaa thaa
jahaa.n se saal bhar
mahfuuz rahne kaa
hasii.n malfuuf
mere naam aayaa thaa

Iqbal Naazir
Nazm

nostalgia

phuul-patte aur jhaa.Diyaa.n
guzarte vaqt ko rok lete hai.n
pagDa.nDiyaa.n
galiyaa.n
puraane makaan
aavaaze.n dene lagte hai.n
dhuup chaa.ndnii aur a.ndheraa
par na.e dosto.n kii tarah baate.n karte hai.n
aabaa.ii qabristaano.n kii havaa
in la.Dkiyo.n kii payaambar ban jaatii hai
jin se log hamesha ke liye mohabbat karte hai.n
baat kiye baGair
chehro.n aur naamo.n me.n farq karne kii KHvaahish
aa.nkh kii putlii par jam jaatii hai
aur KHushbuu zaa.iqe ra.ng
rago.n me.n saraayat kar jaate hai.n
ruke hu.e vaqt kii taaqat
palaT kar dekhne ke dardnaak amal ko KHuub-suurat banaa detii hai
aur zindagii ko
maut par Gaalib kartii hai

Zahid Masood
Nazm

sunahri darwaze ke bahar

chaa.nd
aakaash ke gahre niile samundar me.n taaro.n kii indar-sabhaa se
bahut der tak
maut kii sarzamii.n par ujaalo.n kii gul-poshiyaa.n kar rahaa thaa
lahad-taa-lahad ko.ii saaya na KHaaka
qadam-taa-qadam manzilo.n ke nishaa.n gum
makiino.n se KHaalii makaano.n ke dar
taKHtiyaa.n rahne vaalo.n ke naamo.n kii le kar
bahut der tak muntazir the magar
ko.ii dastak na aahaT

Farooq Nazki
Nazm

abdiyat

aur phir dono.n faanuus siine ke bujh jaa.e.nge
o.Dh legii dhu.aa.n
duudh kii dhaar kii tarah ujlii nazar
naaKHun-e-paa se zulfo.n ke baadal talak
jagmagaatii hu.ii khaal se
KHvaahisho.n ke pur-asraar mahmil talak
ek tahriir likhegii diimak
fanaa
har taraf be-hisii
tiirgii tiirgii
haa.n magar sirf ruKHsaar o lab
sirf ruKHsaar o lab raakh me.n daabii chi.ngaariyo.n kii tarah
jagmagaa.e.nge
un par mire aur tire garm boso.n kii tahriir hai
zindagii
aur phir
vaqt kii lamha lamha ubhartii hu.ii saKHt diivaar gir jaa.egii
aur apne badan
aur maamuulii naamo.n me.n tahliil ho jaa.e.nge
nuur kaa pe.D ban jaa.e.nge
aane vaale na.e mausamo.n kii havaa
ho ke shaaKHo.n se guzregii aur
aasmaanii sadaa.o.n me.n gaayaa hu.aa
ek laa-faanii o be-karaa.n giit guu.njegaa
aur guu.njtaa hii rahegaa sadaa
aur guu.njtaa hii rahegaa sadaa

Bashar Nawaz
Nazm

lamhat-e-azadi

ghaTaa.o.n ke saayo.n kii mastii se ba.Dh kar
farishto.n kii paakiiza hastii se ba.Dh kar
hasii.n barbato.n ke tarannum se pyaare
lab-e-dil-nashii.n ke tabassum se pyaare
vatan ke hasiino.n ke naamo.n se miiThe
nigaaho.n ke pur-kaif jaamo.n se miiThe
mohabbat ke aavaara raago.n se pyaare
sulemaa kii zulfo.n ke naago.n se pyaare
sitaaro.n ke pur-nuur bistar se dilkash
mah-o-mehr ke siim-guu.n ghar se dilkash
bahaaro.n kii uThtii javaanii se shiirii.n
mirii aashiqii kii kahaanii se shiirii.n
vo lamhaat guzre.n jo aazaadiyo.n me.n
vo auqaat guzre.n jo aazaadiyo.n me.n

Altaf Mashhadi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now