Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "naddii"

Nazm MATCHES FOR "naddii"

Nazm

ek aarzu

duniyaa kii mahfilo.n se uktaa gayaa huu.n yaa rab
kyaa lutf anjuman kaa jab dil hii bujh gayaa ho
shorish se bhaagtaa huu.n dil Dhuu.nDtaa hai meraa
aisaa sukuut jis par taqriir bhii fidaa ho
martaa huu.n KHaamushii par ye aarzuu hai merii
daaman me.n koh ke ik chhoTaa saa jho.npa.Daa ho
aazaad fikr se huu.n uzlat me.n din guzaaruu.n
duniyaa ke Gam kaa dil se kaa.nTaa nikal gayaa ho
lazzat sarod kii ho chi.Diyo.n ke chahchaho.n me.n
chashme kii shorisho.n me.n baajaa saa baj rahaa ho
gul kii kalii chaTak kar paiGaam de kisii kaa
saaGar zaraa saa goyaa mujh ko jahaa.n-numaa ho
ho haath kaa sirhaanaa sabze kaa ho bichhaunaa
sharmaa.e jis se jalvat KHalvat me.n vo adaa ho
maanuus is qadar ho suurat se merii bulbul
nanhe se dil me.n us ke khaTkaa na kuchh miraa ho
saf baa.ndhe dono.n jaanib buuTe hare hare ho.n
naddii kaa saaf paanii tasviir le rahaa ho
ho dil-fareb aisaa kohsaar kaa nazaara
paanii bhii mauj ban kar uTh uTh ke dekhtaa ho
aaGosh me.n zamii.n kii soyaa hu.aa ho sabza
phir phir ke jhaa.Diyo.n me.n paanii chamak rahaa ho
paanii ko chhuu rahii ho jhuk jhuk ke gul kii Tahnii
jaise hasiin ko.ii aa.iina dekhtaa ho
meh.ndii lagaa.e suuraj jab shaam kii dulhan ko
surKHii liye sunahrii har phuul kii qabaa ho
raato.n ko chalne vaale rah jaa.e.n thak ke jis dam
ummiid un kii meraa TuuTaa hu.aa diyaa ho
bijlii chamak ke un ko kuTiyaa mirii dikhaa de
jab aasmaa.n pe har suu baadal ghiraa hu.aa ho
pichhle pahr kii koyal vo sub.h kii mo.azzin
mai.n us kaa ham-navaa huu.n vo merii ham-navaa ho
kaano.n pe ho na mere dair o haram kaa ehsaa.n
rauzan hii jho.npa.Dii kaa mujh ko sahar-numaa ho
phuulo.n ko aa.e jis dam shabnam vazuu karaane
ronaa miraa vazuu ho naala mirii du.aa ho
is KHaamushii me.n jaa.e.n itne buland naale
taaro.n ke qaafile ko merii sadaa diraa ho
har dardmand dil ko ronaa miraa rulaa de
behosh jo pa.De hai.n shaayad unhe.n jagaa de

Allama Iqbal
Nazm

suna hai

sunaa hai jangalo.n kaa bhii ko.ii dastuur hotaa hai
sunaa hai sher kaa jab peT bhar jaa.e to vo hamla nahii.n kartaa
daraKHto.n kii ghanii chhaa.nv me.n jaa kar let jaataa hai
havaa ke tez jho.nke jab daraKHto.n ko hilaate hai.n
to mainaa apne bachche chho.D kar
kavve ke anDo.n ko paro.n se thaam letii hai
sunaa hai gho.nsle se ko.ii bachcha gir pa.De to saaraa jangal jaag jaataa hai
sunaa hai jab kisii naddii ke paanii me.n
ba.e ke gho.nsle kaa gandumii saaya laraztaa hai
to naddii kii rupahlii machhliyaa.n us ko pa.Dosan maan letii hai.n
kabhii tuufaan aa jaa.e, ko.ii pul TuuT jaa.e to
kisii lak.Dii ke taKHte par
gilahrii, saa.np, bakrii aur chiitaa saath hote hai.n
sunaa hai jangalo.n kaa bhii ko.ii dastuur hotaa hai
KHudaavandaa! jaliil o mo'tabar! daanaa o biinaa munsif o akbar!
mire is shahr me.n ab jangalo.n hii kaa ko.ii qaanuun naafiz kar!
ko.ii dastuur naafiz kar

Zehra Nigaah
Nazm

parchhaiyan

ravaa.n hai chhoTii sii kashtii havaa.o.n ke ruKH par
nadii ke saaz pe mallaah giit gaataa hai

Sahir Ludhianvi
Nazm

samundar ka bulawa

ab aa.nkho.n me.n jumbish na chehre pe ko.ii tabassum na tevarii
faqat kaan sunte chale jaa rahe hai.n
ye ik gulistaa.n hai havaa lahlahaatii hai kaliyaa.n chaTaktii hai.n
Gunche mahakte hai.n aur phuul khilte hai.n khil khil ke murjhaa ke
girte hai.n ik farsh-e-maKHmal banaate hai.n jis par
mirii aarzuu.o.n kii pariyaa.n ajab aan se yuu.n ravaa.n hai.n
ki jaise gulistaa.n hii ik aa.iina hai
isii aa.iine se har ik shakl nikhrii sa.nvar kar miTii aur miT hii ga.ii phir na ubhrii
ye parbat hai KHaamosh saakin
kabhii ko.ii chashma ubalte hu.e puuchhtaa hai ki us kii chaTaano.n ke us paar kyaa hai
magar mujh ko parbat kaa daaman hii kaafii hai daaman me.n vaadii hai vaadii me.n naddii
hai naddii me.n bahtii hu.ii naav hii aa.iina hai
isii aa.iine me.n har ik shakl nikhrii magar ek pal me.n jo miTne lagii hai to
phir na ubhrii
ye sahraa hai phailaa hu.aa KHushk be-barg sahraa
baguule yahaa.n tund bhuuto.n kaa aks-e-mojassam bane hai.n

Meeraji
Nazm

mirza ghaalib

fikr-e-insaa.n par tirii hastii se ye raushan hu.aa
hai par-e-murG-e-taKHayyul kii rasaa.ii taa-kujaa
thaa saraapaa ruuh tuu bazm-e-suKHan paikar tiraa
zeb-e-mahfil bhii rahaa mahfil se pinhaa.n bhii rahaa
diid terii aa.nkh ko us husn kii manzuur hai
ban ke soz-e-zindagii har shai me.n jo mastuur hai
mahfil-e-hastii tirii barbat se hai sarmaaya-daar
jis tarah naddii ke naGmo.n se sukuut-e-kohsaar
tere firdaus-e-taKHayyul se hai qudrat kii bahaar
terii kisht-e-fikr se ugte hai.n aalam sabza-vaar
zindagii muzmar hai terii shoKHi-e-tahriir me.n
taab-e-goyaa.ii se jumbish hai lab-e-tasviir me.n
nutq ko sau naaz hai.n tere lab-e-ejaaz par
mahv-e-hairat hai surayyaa rif.at-e-parvaaz par
shaahid-e-mazmuu.n tasadduq hai tire andaaz par
KHanda-zan hai Guncha-e-dillii gul-e-shiiraaz par
aah tuu uj.Dii hu.ii dillii me.n aaraamiida hai
gulshan-e-viimar me.n teraa ham-navaa KHvaabiida hai
lutf-e-goyaa.ii me.n terii ham-sarii mumkin nahii.n
ho taKHayyul kaa na jab tak fikr-e-kaamil ham-nashii.n
haa.e ab kyaa ho ga.ii hindostaa.n kii sar-zamii.n
aah ai nazzaara-aamoz-e-nigaah-e-nukta-bii.n
gesu-e-urduu abhii minnat-paziir-e-shaana hai
sham.a ye saudaa.i-e-dil-sozi-e-parvaana hai
ai jahaanaabaad ai gahvaara-e-ilm-o-hunar
hai.n saraapaa naala-e-KHaamosh tere baam dar
zarre zarre me.n tire KHvaabiida hai.n shams o qamar
yuu.n to poshiida hai.n terii KHaak me.n laakho.n guhar
dafn tujh me.n ko.ii faKHr-e-rozgaar aisaa bhii hai
tujh me.n pinhaa.n ko.ii motii aabdaar aisaa bhii hai

Allama Iqbal
Nazm

taj-mahal si lagti ho

sar pe apne juu.Daa baa.ndhe
maa.njhii kii ummiid lagaa.e
bhiigii ujlii sub.h me.n tum
kohre kii chaadar me.n lipTii
nadii kinaare soch me.n gum
taaj-mahal sii lagtii ho

Abu Bakr Abbad
Nazm

yani

lekin phir soch ye aatii hai
jab naddii bahtii jaatii hai
aur apnii anant kahaanii me.n
yuu.n be-dhyaanii me.n ravaanii me.n
maanaa har mo.D pe mu.Dtii hai
par jii kii kah ke guzartii hai
sar par aa.ii sah jaatii hai
aur mu.nh aa.ii kah jaatii hai
dhartii ke siine pe cha.Dhtii hai
aur aage hii aage ba.Dhtii hai
yuu.n mai.n bhii dil kii baat kahuu.n
jii me.n aa.e to nazm likhuu.n
chaahe ik baat me.n sau baate.n
jiite.n le aa.e.n yaa maate.n
chaahe ko.ii baat bane na bane
chaahe sukh ho.n yaa dukh apne
chaahe ko.ii mujh se aa ke kahe
kyuu.n bol uThe kyuu.n chup na rahe

Meeraji
Nazm

wo lamha jo mera tha

ik din
tum ne mujh se kahaa thaa
dhuup ka.Dii hai
apnaa saaya saath hii rakhnaa
vaqt ke tarkash me.n jo tiir the khul kar barse hai.n
zard havaa ke pathriile jho.nko.n se
jism kaa panchhii ghaayal hai
dhuup kaa jangal pyaas kaa dariyaa
aise me.n aa.nsuu kii ik ik buu.nd ko
insaa.n tarse hai.n
tum ne mujh se kahaa thaa
samay kii bahtii naddii me.n
lamhe kii pahchaan bhii rakhnaa
mere dil me.n jhaa.nk ke dekho
dekho saato.n rang kaa phuul khilaa hai
vo lamha jo meraa thaa vo meraa hai
vaqt ke paikaa.n be-shak tan par aan lage
dekho us lamhe se kitnaa gahraa rishta hai

Ada Jafarey
Nazm

himala

ai himaala ai fasiil-e-kishvar-e-hindustaan
chuumtaa hai terii peshaanii ko jhuk kar aasmaa.n
tujh me.n kuchh paidaa nahii.n deriina rozii ke nishaa.n
tuu javaa.n hai gardish-e-shaam-o-sahar ke darmiyaa.n
ek jalva thaa kaliim-e-tuur-e-siinaa ke liye
tuu tajallii hai saraapaa chashm-e-biinaa ke liye
imtihaan-e-diida-e-zaahir me.n kohistaa.n hai tuu
paasbaa.n apnaa hai tuu diivaar-e-hindustaa.n hai tuu
matla-e-avval falak jis kaa ho vo diivaa.n hai tuu
suu-e-KHalvat-gaah-e-dil daaman-kash-e-insaa.n hai tuu
barf ne baa.ndhii hai dastaar-e-faziilat tere sar
KHanda-zan hai jo kulaah-e-mehr-e-aalam-taab par
terii 'umr-e-rafta kii ik aan hai ahd-e-kuhan
vaadiyo.n me.n hai.n tirii kaalii ghaTaa.e.n KHema-zan
choTiyaa.n terii surayyaa se hai.n sargarm-e-suKHan
tuu zamii.n par aur pahnaa-e-falak teraa vatan
chashma-e-daaman tiraa aa.iina-e-sayyaal hai
daaman-e-mauj-e-havaa jis ke liye ruumaal hai
abr ke haatho.n me.n rahvaar-e-havaa ke vaaste
taaziyaana de diyaa barq-e-sar-e-kohsaar ne
ai himaala ko.ii baazii-gaah hai tuu bhii jise
dast-e-qudrat ne banaayaa hai 'anaasir ke liye
haa.e kyaa fart-e-tarab me.n jhuumtaa jaataa hai abr
fiil-e-be-zanjiir kii suurat u.Daa jaataa hai abr
jumbish-e-mauj-e-nasiim-e-sub.h gahvaara banii
jhuumtii hai nashsha-e-hastii me.n har gul kii kalii
yuu.n zabaan-e-barg se goyaa hai us kii KHaamushii
dast-e-gul-chii.n kii jhaTak mai.n ne nahii.n dekhii kabhii
kah rahii hai merii KHaamoshii hii afsaana miraa
kunj-e-KHalvat KHaana-e-qudrat hai kaashaana miraa
aatii hai naddii faraaz-e-koh se gaatii hu.ii
kausar o tasniim kii maujo.n ko sharmaatii hu.ii
aa.iina saa shaahid-e-qudrat ko dikhlaatii hu.ii
sa.ng-e-rah se gaah bachtii gaah Takraatii hu.ii
chhe.Dtii jaa is iraaq-e-dil-nashii.n ke saaz ko
ai musaafir dil samajhtaa hai tirii aavaaz ko
laila-e-shab kholtii hai aa ke jab zulf-e-rasaa
daaman-e-dil khii.nchtii hai aabshaaro.n kii sadaa
vo KHamoshii shaam kii jis par takallum ho fidaa
vo daraKHto.n par tafakkur kaa samaa.n chhaayaa hu.aa
kaa.nptaa phirtaa hai kyaa rang-e-shafaq kohsaar par
KHush-numaa lagtaa hai ye Gaaza tire ruKHsaar par
ai himaala daastaa.n us vaqt kii ko.ii sunaa
maskan-e-aabaa-e-insaa.n jab banaa daaman tiraa
kuchh bataa us siidhii-saadhii zindagii kaa maajraa
daaG jis par Gaaza-e-ra.ng-e-taklluf kaa na thaa
haa.n dikhaa de ai tasavvur phir vo sub.h-o-shaam tuu
dau.D piichhe kii taraf ai gardish-e-ayyaam tuu

Allama Iqbal
Nazm

ek gae aur bakri

kisii naddii ke paas ik bakrii
charte charte kahii.n se aa niklii

Allama Iqbal
Nazm

jaane kyun aisa hun main

lambe vaqt se soch rahaa huu.n
jaane kyuu.n aisaa huu.n mai.n
milne se ghabraataa huu.n mai.n jhuuT nahii.n kah paataa huu.n
us ke shikve us kii shikaayat jhag.De se Dar jaataa huu.n
idhar-udhar kii baate.n mujh ko zaraa na KHush kar paatii hai.n
jaane kyuu.n aisaa huu.n mai.n
dost nahii.n ban paate mere
rishte nahii.n sambhalte hai.n
bejaa mohabbat bejaa takalluf
dono.n ochhe lagte hai.n
auro.n kii kamiyo.n ko bilkul
achchhaa nahii.n kah paataa huu.n
jaane kyuu.n aisaa huu.n mai.n
achchhe bhale kaamo.n me.n aksar
der bahut kar detaa huu.n
ammii se baate.n karnii huu.n beTii ke school ho jaanaa
ko.ii nayaa novel pa.Dhnaa ho ko.ii kahaanii likhnii ho
sab ko Taaltaa rahtaa huu.n
jaane kyuu.n aisaa huu.n mai.n
bhii.D bhare shahro.n se mujh ko
vahshat sii ho jaatii hai
gaa.nv jangal sunsaan jag.he.n
aksar KHush aa jaatii hai.n
ko.ii alha.D chehra dekhuu.n man ko vo bhaa jaataa hai
jaane kyuu.n aisaa huu.n mai.n
pe.Do.n ke pairaahan dekhuu.n phuulo.n kii KHushbuu ko suu.nghuu.n
ra.ng-bira.ngii titliyaa.n pak.Duu.n halkii halkii buu.nde.n bhii
ThanDii naram havaa.e.n jab jab chupke se chhuu jaatii hai.n
yaa koyal kii bolii sun luu.n man byaakul ho jaataa hai
jaane kyuu.n aisaa huu.n mai.n
naT banjaaran sanyaasii aur khel-tamaashe vaale log
kha.nDar viiraana jaltii dhuup phuulii sarso.n dhaan ke khet
laal pata.ng aur piilii mainaa indr-dhanush aur nadii kii dhaar
aate hai.n jab KHvaab me.n mere diivaana ho jaataa huu.n
jaane kyuu.n aisaa huu.n mai.n
bahut mujhe achchhaa kahte hai.n buraa bhii ko.ii kahtaa hai
saamne merii mad.h-saraa.ii piichhe gaalii detaa hai
hamdardii hai ko.ii dikhaataa ko.ii saazish kartaa hai
phir bhii chup chup saa rahtaa huu.n jaise bahut anjaan huu.n mai.n
jaane kyuu.n aisaa huu.n mai.n
tho.Dii sii aazaadii mujh ko tho.Daa bahut vaqt kaa ziyaa.n
kabhii kabhaar kii achchhii baate.n kisii kisii kaa sachchaa pyaar
chhoTii-moTii ko.ii sharaarat khilkhilaa kar ha.nsnaa bhii
ye sab KHush kar jaate hai.n jab to
lagtaa hai ki zinda huu.n
jaane kyuu.n aisaa huu.n mai.n

Abu Bakr Abbad
Nazm

baz-amad --- ek muntaj

ik parinda kisii ik pe.D kii Tahnii pe chahaktaa hai kahii.n
ek gaataa hu.aa yuu.n jaataa hai dhartii se falak kii jaanib
puurii quvvat se ko.ii ge.nd uchhaale jaise
ik phudaktaa hai sar-e-shaaKH pe jis tarah ko.ii
aamad-e-fasl-e-bahaarii kii KHushii me.n naache
guu.ndnii bojh se apne hii jhukii pa.Dtii hai
naaznii.n jaise hai ko.ii ye bharii mahfil me.n
aur kal haath hu.e hai.n piile
koyale.n kuuktii hai.n
jaamune.n pakkii hai.n, aamo.n pe bahaar aa.ii hai
arGanuu.n bajtaa hai yakjaa.ii kaa
niim ke pe.Do.n me.n jhuule hai.n jidhar dekho udhar
saavanii gaatii hai.n sab la.Dkiyaa.n aavaaz milaa kar har-suu
aur is aavaaz se guu.nj uTThii hai bastii saarii
mai.n kabhii ek kabhii duusre jhuule ke qarii.n jaataa huu.n
ek hii kam hai, vahii chehra nahii.n
aaKHirash puuchh hii letaa huu.n kisii se ba.Dh kar
kyuu.n habiiba nahii.n aa.ii ab tak?
khilkhilaa pa.Dtii hai.n sab la.Dkiyaa.n sun kar ye naam
lo ye sapne me.n hai.n, ik kahtii hai
baaolii sapnaa nahii.n, shahr se aa.e hai.n abhii
duusrii Toktii hai
baat se baat nikal chaltii hai
ThaaT kii aa.ii thii baaraat, chambelii ne kahaa
band-baajaa bhii thaa, diipaa bolii
aur dulhan pe hu.aa kitnaa bikher
kuchh na kuchh kahtii rahii.n sab hii magar mai.n ne sirf
itnaa puuchhaa vo nadii bahtii hai ab bhii, ki nahii.n
jis se vaabasta hai.n ham aur ye bastii saarii?
kyuu.n nahii.n bahtii, chambelii ne kahaa
aur vo bargad kaa ghanaa pe.D kinaare us ke?
vo bhii qaa.em hai abhii tak yuu.nhii
va.ada kar ke jo 'habiiba' nahii.n aatii thii kabhii
aa.nkhe.n dhotaa thaa nadii me.n jaakar
aur bargad kii ghanii chhaa.nv me.n so jaataa thaa

Akhtarul Iman
Nazm

aadhi raat

1
siyaah pe.D hai.n ab aap apnii parchhaa.ii.n
zamii.n se taa-mah-o-anjum sukuut ke miinaar
jidhar nigaah kare.n ik athaah gum-shudgii
ik ek kar ke fasurda charaaGo.n kii palke.n
jhapak ga.ii.n jo khulii hai.n jhapakne vaalii hai.n
jhalak rahaa hai pa.Daa chaa.ndnii ke darpan me.n
rasiile kaif bhare manzaro.n kaa jaagtaa KHvaab
falak pe taaro.n ko pahlii jamaahiyaa.n aa.ii.n
2
tamoliyo.n kii dokaane.n kahii.n kahii.n hai.n khulii
kuchh uu.nghtii hu.ii ba.Dhtii hai.n shaah-raaho.n par
savaariyo.n ke ba.De ghu.ngruu.o.n kii jhankaare.n
kha.Daa hai os me.n chup-chaap har si.ngaar kaa pe.D
dulhan ho jaise hayaa kii sugandh se bojhal
ye mauj-e-nuur ye bharpuur ye khilii hu.ii raat
ki jaise khiltaa chalaa jaa.e ik safed ka.nval
sipaah-e-ruus hai ab kitnii duur berlin se
jagaa rahaa hai ko.ii aadhii raat kaa jaaduu
chhalak rahii hai KHum-e-Gaib se sharaab-e-vajuud
fazaa-e-niim-shabii nargis-e-KHumaar-aaluud
ka.nval kii chuTkiyo.n me.n band hai nadii kaa suhaag
3
ye ras kaa sej ye sukumaar ye sukomal gaat
nayan kamal kii jhapak kaam-ruup kaa jaaduu
ye rasmasaa.ii palak kii ghanii ghanii parchhaa.ii.n
falak pe bikhre hu.e chaa.nd aur sitaaro.n kii
chamaktii u.ngliyo.n se chhi.D ke saaz fitrat ke
taraane jaagne vaale hai.n tum bhii jaag uTho
4
shu.aa-e-mahr ne yuu.n un ko chuum chuum liyaa
nadii ke biich kumudnii ke phuul khil uTThe
na muflisii ho to kitnii hasiin hai duniyaa
ye jhaa.e.n jhaa.e.n sii rah rah ke ek jhii.ngur kii
hinaa kii Tattiyo.n me.n narm sarsaraahaT sii
fazaa ke siine me.n KHaamosh sansanaahaT sii
ye kaa.enaat ab ik nii.nd le chukii hogii
5
ye mahv-e-KHvaab hai.n ra.ngiin machhliyaa.n tah-e-aab
ki hauz-e-sehn me.n ab in kii chashmake.n bhii nahii.n
ye sar-niguu.n hai.n sar-e-shaaKH phuul gu.Dhal ke
ki jaise be-bujhe a.ngaare ThanDe pa.D jaa.e.n
ye chaa.ndnii hai ki umDaa hu.aa hai ras-saagar
ik aadmii hai ki itnaa dukhii hai duniyaa me.n
6
qariib chaa.nd ke ma.nDlaa rahii hai ik chi.Diyaa
bha.nvar me.n nuur ke karvaT se jaise naav chale
ki jaise siina-e-shaa.ir me.n ko.ii KHvaab pale
vo KHvaab saa.nche me.n jis ke na.ii hayaat Dhale
vo KHvaab jis se puraanaa nizaam-e-Gam badle
kahaa.n se aatii hai madmaaltii lataa kii lipaT
ki jaise saik.Do.n pariyaa.n gulaabiyaa.n chhi.Dkaa.e.n
ki jaise saik.Do.n ban-deviyo.n ne jhuule par
adaa-e-KHaas se ik saath baal khol diye
lage hai.n kaan sitaaro.n ke jis kii aahaT par
is inqalaab kii ko.ii KHabar nahii.n aatii
dil-e-nujuum dha.Dakte hai.n kaan bajte hai.n
7
ye saa.ns letii hu.ii kaa.enaat ye shab-e-maah
ye pur-sukuu.n ye pur-asraar ye udaas samaa.n
ye narm narm havaa.o.n ke niil-guu.n jho.nke
fazaa kii oT me.n mardo.n kii gungunaahaT hai
ye raat maut kii be-ra.ng muskuraahaT hai
dhu.aa.n dhu.aa.n se manaazir tamaam nam-diida
KHunuk dhundalke kii aa.nkhe.n bhii niim KHvaabiida
sitaare hai.n ki jahaa.n par hai aa.nsu.o.n kaa kafan
hayaat parda-e-shab me.n badaltii hai pahluu
kuchh aur jaag uThaa aadhii raat kaa jaaduu
zamaana kitnaa la.Daa.ii ko rah gayaa hogaa
mire KHayaal me.n ab ek baj rahaa hogaa
8
gulo.n ne chaadar-e-shabnam me.n mu.nh lapeT liyaa
labo.n pe so ga.ii kaliyo.n kii muskuraahaT bhii
zaraa bhii sumbul-e-turkii laTe.n nahii.n hiltii.n
sukuut-e-niim-shabii kii hade.n nahii.n miltii.n
ab inqalaab me.n shaayad ziyaada der nahii.n
guzar rahe hai.n ka.ii kaarvaa.n dhundalke me.n
sukuut-e-niim-shabii hai unhii.n ke paa.nv kii chaap
kuchh aur jaag uThaa aadhii raat kaa jaaduu
9
na.ii zamiin nayaa aasmaa.n na.ii duniyaa
na.e sitaare na.ii gardishe.n na.e din raat
zamii.n se taa-ba-falak intizaar kaa aalam
fazaa-e-zard me.n dhu.ndle Gubaar kaa aalam
hayaat maut-numaa intishaar kaa aalam
hai mauj-e-duud ki dhundlii fazaa kii nabze.n hai.n
tamaam KHastagii-o-maa.ndgii ye daur-e-hayaat
thake thake se ye taare thakii thakii sii ye raat
ye sard sard ye be-jaan phiikii phiikii chamak
nizaam-e-saaniya kii maut kaa pasiinaa hai
KHud apne aap me.n ye kaa.enaat Duub ga.ii
KHud apnii kokh se phir jagmagaa ke ubhregii
badal ke kechulii jis tarah naag lahraa.e
10
KHunuk fazaa.o.n me.n raqsaa.n hai.n chaa.nd kii kirne.n
ki aabgiino.n pe pa.Dtii hai narm narm phuvaar
ye mauj-e-Gaflat-e-ma.asuum ye KHumaar-e-badan
ye saa.ns nii.nd me.n Duubii ye aa.nkh madmaatii
ab aa.o mere kaleje se lag ke so jaa.o
ye palke.n band karo aur mujh me.n kho jaa.o

Firaq Gorakhpuri
Nazm

raat aur rail

phir chalii hai rail station se lahraatii hu.ii
niim-shab kii KHaamushii me.n zer-e-lab gaatii hu.ii
Dagmagaatii jhuumtii siiTii bajaatii kheltii
vaadii o kohsaar kii ThanDii havaa khaatii hu.ii
tez jho.nko.n me.n vo chham chham kaa suruud-e-dil-nashii.n
aa.ndhiyo.n me.n me.nh barasne kii sadaa aatii hu.ii
jaise maujo.n kaa tarannum jaise jal-pariyo.n ke giit
ek ik lai me.n hazaaro.n zamzame gaatii hu.ii
naunihaalo.n ko sunaatii miiThii miiThii loriyaa.n
naazniino.n ko sunahre KHvaab dikhlaatii hu.ii
Thokare.n khaa kar lachaktii gungunaatii jhuumtii
sarKHushii me.n ghu.ngru.o.n kii taal par gaatii hu.ii
naaz se har mo.D par khaatii hu.ii sau pech-o-KHam
ik dulhan apnii adaa se aap sharmaatii hu.ii
raat kii taariikiyo.n me.n jhilmilaatii kaa.nptii
pTriyo.n par duur tak siimaab jhalkaatii hu.ii
jaise aadhii raat ko niklii ho ik shaahii baraat
shaadyaano.n kii sadaa se vajd me.n aatii hu.ii
muntashir kar ke fazaa me.n jaa-ba-jaa chi.ngaariyaa.n
daaman-e-mauj-e-havaa me.n phuul barsaatii hu.ii
tez-tar hotii hu.ii manzil-ba-manzil dam-ba-dam
rafta rafta apnaa aslii ruup dikhlaatii hu.ii
siina-e-kohsaar par cha.Dhtii hu.ii be-iKHtiyaar
ek naagan jis tarah mastii me.n lahraatii hu.ii
ik sitaara TuuT kar jaise ravaa.n ho arsh se
rif.at-e-kohsaar se maidaan me.n aatii hu.ii
ik baguule kii tarah ba.Dhtii hu.ii maidaan me.n
ja.ngalo.n me.n aa.ndhiyo.n kaa zor dikhlaatii hu.ii
raasa-bar-andaam kartii anjum-e-shab-taab ko
aashiyaa.n me.n taa.ir-e-vahshii ko chau.nkaatii hu.ii
yaad aa jaa.e puraane devtaa.o.n kaa jalaal
un qayaamat-KHeziyo.n ke saath bal khaatii hu.ii
ek raKHsh-e-be-inaa.n kii barq-raftaarii ke saath
KHandaqo.n ko phaa.ndtii Tiilo.n se katraatii hu.ii
murG-zaaro.n me.n dikhaatii juu-e-shiirii.n kaa KHiraam
vaadiyo.n me.n abr ke maanind ma.nDlaatii hu.ii
ik pahaa.Dii par dikhaatii aabshaaro.n kii jhalak
ik bayaabaa.n me.n charaaG-e-tuur dikhlaatii hu.ii
justujuu me.n manzil-e-maqsuud kii diivaana-vaar
apnaa sar dhuntii fazaa me.n baal bikhraatii hu.ii
chhe.Dtii ik vajd ke aalam me.n saaz-e-sarmadii
Gaiz ke aalam me.n mu.nh se aag barsaatii hu.ii
re.ngtii mu.Dtii machaltii tilmilaatii haa.nptii
apne dil kii aatish pinhaa.n ko bha.Dkaatii hu.ii
KHud-ba-KHud ruuThii hu.ii biphrii hu.ii bikhrii hu.ii
shor-e-paiham se dil-e-giitii ko dha.Dkaatii hu.ii
pul pe dariyaa ke damaa-dam kau.ndtii lalkaartii
apnii is tuufan-a.ngezii pe itraatii hu.ii
pesh kartii biich naddii me.n charaaGaa.n kaa samaa.n
saahilo.n par ret ke zarro.n ko chamkaatii hu.ii
mu.nh me.n ghustii hai sura.ngo.n ke yakaayak dau.D kar
dandanaatii chiiKHtii chi.nghaa.Dtii gaatii hu.ii
aage aage justujuu-aamez nazre.n Daaltii
shab ke haibatnaak nazzaaro.n se ghabraatii hu.ii
ek mujrim kii tarah sahmii hu.ii simTii hu.ii
ek muflis kii tarah sardii me.n tharraatii hu.ii
Tez-e-raftaar ke sikke jamaatii jaa-ba-jaa
dasht o dar me.n zindagii kii lahar dau.Daatii hu.ii
Daal kar guzre manaazir par andhere kaa naqaab
ik nayaa manzar nazar ke saamne laatii hu.ii
safha-e-dil se miTaatii ahd-e-maazii ke nuquush
haal o mustaqbil ke dilkash KHvaab dikhlaatii hu.ii
Daaltii be-his chaTaano.n par haqaarat kii nazar
koh par ha.nstii falak ko aa.nkh dikhlaatii hu.ii
daaman-e-taariki-e-shab kii u.Daatii dhajjiyaa.n
qasr-e-zulmat par musalsal tiir barsaatii hu.ii
zad me.n ko.ii chiiz aa jaa.e to us ko piis kar
irtiqaa-e-zindagii ke raaz batlaatii hu.ii
zo.am me.n peshaani-e-sahraa pe Thokar maartii
phir subuk-raftaariyo.n ke naaz dikhlaatii hu.ii
ek sarkash fauj kii suurat alam khole hu.e
ek tuufaanii garaj ke saath Daraatii hu.ii
ek ik harkat se andaaz-e-baGaavat aashkaar
azmat-e-insaaiyat ke zamzame gaatii hu.ii
har qadam par top kii sii ghan-garaj ke saath saath
goliyo.n kii sansanaahaT kii sadaa aatii hu.ii
vo havaa me.n saika.Do.n ja.ngii duhal bajte hu.e
vo bigul kii jaa.n-fazaa.n aavaaz lahraatii hu.ii
al-Garaz u.Dtii chalii jaatii hai be-KHauf-o-KHatar
shaa.ir-e-aatish-nafas kaa KHuun khaulaatii hu.ii

Asrarul Haq Majaz
Nazm

masjid

ek viiraan sii masjid kaa shikasta saa kalas
paas bahtii hu.ii naddii ko takaa kartaa hai
aur TuuTii hu.ii diivaar pe chanDol kabhii
giit phiikaa saa ko.ii chhe.D diyaa kartaa hai

Akhtarul Iman
Nazm

pyara hindostan

jaal bichhaa.e jaal sambhaale
kamsin sa.Dke.n maa.ng nikaale
baal bikhere naddii naale

Nazeer Banarasi
Nazm

dar-ul-makafat

hai duniyaa jis kaa naa.nv miyaa.n ye aur tarah kii bastii hai
jo ma.nhgo.n ko ye mah.ngii hai aur sasto.n ko ye sastii hai
yaa.n har-dam jhag.De uThte hai.n har-aan adaalat bastii hai
gar mast kare to mastii hai aur past kare to pastii hai
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai
jo aur kisii kaa maan rakhe to us ko bhii armaan mile
jo paan khilaa de paan mile jo roTii de to naan mile
nuqsaan kare nuqsaan mile ehsaan kare ehsaan mile
jo jaisaa jis ke saath kare phir vaisaa us ko aan mile
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai
jo aur kisii kii jaa.n baKHshe to us kii bhii haq jaan rakhe
jo aur kisii kii aan rakhe to us kii bhii haq aan rakhe
jo yaa.n kaa rahne vaalaa hai ye dil me.n apne jaan rakhe
ye turat-phirat kaa naqsha hai is naqshe ko pahchaan rakhe
kuchh der nahii.n andher nahii.n insaaf aur adl parastii hai
is haath karo us haath mile yaa.n saudaa dast-ba-dastii hai
jo paar utaare auro.n ko us kii bhii paar utarnii hai
jo Garq kare phir us ko bhii Dubko.n Dubko.n karnii hai
shamshiir tabar banduuq sinaa.n aur nashtar tiir nahrnii hai
yaa.n jaisii jaisii karnii hai phir vaisii vaisii bharnii hai
kuchh der nahii.n andher nahii.n insaaf aur adl-parastii hai
is haath karo is haath mile yaa.n saudaa dast-ba-dastii hai
jo uupar uu.nchaa bol kare to us kaa bol bhii baalaa hai
aur de paTke to us ko bhii ko.ii aur paTakne vaalaa hai
be-zulm-o-KHataa jis zaalim ne mazluum zabah kar Daalaa hai
us zaalim ke bhii lohuu kaa phir bahtaa naddii-naalaa hai
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai
jo misrii aur ke mu.nh me.n de phir vo bhii shakkar khaataa hai
jo aur ta.ii.n ab Takkar de phir vo bhii Takkar khaataa hai
jo aur ko Daale chakkar me.n phir vo bhii chakkar khaataa hai
jo aur ko Thokar maar chale phir vo bhii Thokar khaataa hai
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai
jo aur kisii ko naahaq me.n ko.ii jhuuTii baat lagaataa hai
aur ko.ii Gariib aur bechaara haq naa-haq me.n luT jaataa hai
vo aap bhii luuTaa jaataa hai aur laaThii-paaThii khaataa hai
jo jaisaa jaisaa kartaa hai phir vaisaa vaisaa paataa hai
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai
jo aur kii pag.Dii le bhaage us kaa bhii or uchakkaa hai
jo aur pe chaukii biThlaave us par bhii dho.ns-dha.Dakkaa hai
yaa.n pushtii me.n to pushtii hai aur dhakke me.n yaa.n dhakkaa hai
kyaa zor maze kaa jamghaT hai kyaa zor ye bhii.D-bha.Dakkaa hai
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai
hai khaTkaa us ke haath lagaa jo aur kisii ko de khaTkaa
aur Gaib se jhaTkaa khaataa hai jo aur kisii ke de jhaTkaa
chiire ke biich me.n chiiraa hai aur paTke biich jo hai paTkaa
kyaa kahiye aur 'naziir' aage hai zor tamaashaa jhaT-paTkaa
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai

Nazeer Akbarabadi
Nazm

ek thi aurat

ko.ii sard chashma ubaltaa hu.aa aur machaltaa hu.aa yaad aa.e
jo ho dekhne me.n Tapaktii hu.ii chand buu.nde.n
magar apnii had se ba.Dhe to bane ek naddii bane ek dariyaa bane ek saagar
ye jii chaahtaa hai ki ham aise saagar kii lahro.n pe aisii havaa se bahaa.e.n vo kashtii jo bahtii nahii.n hai
musaafir ko lekin bahaatii chalii jaatii hai aur palaT kar nahii.n aatii hai ek gahre sakuu.n se milaatii chalii jaatii hai
ye jii chaahtaa hai ki ham bhii yuu.nhii chiiKHe.n chillaa.e.n ha.ns de.n yuu.nhii haath uThaa.e.n
havaa me.n hilaa.e.n hilaa kar giraa de.n
kabhii aise jaise ko.ii baat kahne lage hai.n
magar tum hame.n god me.n le ke apnii biThaa lo
machalne lage.n to sambhaalo
kabhii muskuraate hu.e shor karte hu.e phir gale se lipaT kar kare.n aisii baate.n
tumhe.n sarsaraatii havaa yaad aa.e
vahii sarsaraatii havaa jis ke miiThe fusuu.n se dupaTTa phisal jaataa hai
vahii sarsaraatii havaa jo har anjaan aurat ke bikhre hu.e gesu.o.n ko
kisii so.e jangal pe ganghor kaalii ghaTaa kaa nayaa bhes de kar
jagaa detii hai

Meeraji
Nazm

jatri

ek aayaa gayaa duusraa aa.egaa der se dekhtaa huu.n yuu.nhii raat us kii guzar jaa.egii
mai.n kha.Daa huu.n yahaa.n kis liye mujh ko kyaa kaam hai yaad aataa nahii.n yaad bhii TimTimaataa
hu.aa ik diyaa ban ga.ii jis kii ruktii hu.ii aur jhijaktii hu.ii har kiran be-sadaa qahqaha hai
magar mere kaano.n ne kaise use sun liyaa ek aa.ndhii chalii chal ke miT
bhii ga.ii aaj tak mere kaano.n me.n maujuud hai saa.e.n saa.e.n machaltii hu.ii aur
ubaltii hu.ii phailtii phailtii der se mai.n kha.Daa huu.n yahaa.n ek aayaa gayaa
duusraa aa.egaa raat us kii guzar jaa.egii ek ha.ngaama barpaa hai dekhe.n jidhar
aa rahe hai.n ka.ii log chalte hu.e aur Tahalte hu.e aur rukte hu.e phir se
ba.Dhte hu.e aur lapakte hu.e aa rahe jaa rahe hai.n idhar se udhar aur udhar se
idhar jaise dil me.n mire dhyaan kii lahar se ek tuufaan hai vaise aa.nkhe.n
mirii dekhtii hii chalii jaa rahii hai.n ki ik TimTimaate diye kii kiran zindagii ko phisalte
hu.e aur girte hu.e Dhab se zaahir kiye jaa rahii hai mujhe dhyaan
aataa hai ab tiirgii ik ujaalaa banii hai magar is ujaale se ristii chalii jaa rahii
hai.n vo amrit kii buu.nde.n jinhe.n mai.n hathelii pe apnii sambhaale rahaa huu.n hathelii
magar TimTimaataa hu.aa ik diyaa ban ga.ii thii lapak se ujaalaa hu.aa lau girii phir a.ndheraa saa
chhaane lagaa baiThtaa baiThtaa baiTh kar ek hii pal me.n uThtaa hu.aa jaise aa.ndhii ke
tiikhe thape.Do.n se darvaaze ke taaq khulte rahe.n band hote rahe.n
pha.D.pha.Daate hu.e taa.ir-e-zaKHm-KHurda kii maanind mai.n dekhtaa hii rahaa ek aayaa
gayaa duusraa aa.egaa soch aa.ii mujhe paa.nv ba.Dhne se inkaar karte
ga.e mai.n kha.Daa hii rahaa dil me.n ik buu.nd ne ye kahaa raat yuu.nhii guzar jaa.egii
dil kii ik buu.nd ko aa.nkh me.n le ke mai.n dekhtaa hii rahaa pha.D.pha.Daate hu.e taa.ir
zaKHm-KHurda kii maanind darvaaze ke taaq ik baar jab mil ga.e mujh ko aahista aahista
ehsaas hone lagaa ab ye zaKHmii parinda na ta.Dpegaa lekin mire dil ko har vaqt
ta.Dpaa.egaa mai.n hathelii pe apnii sambhaale rahuu.ngaa vo amrit kii buu.nde.n jinhe.n aa.nkh
se merii risnaa thaa lekin mirii zindagii TimTimaataa hu.aa ik diyaa ban ga.ii jis kii ruktii hu.ii
aur jhijaktii hu.ii har kiran be-sadaa qahqaha hai ki is tiirgii me.n ko.ii baat aisii nahii.n
jis ko pahle a.ndhere me.n dekhaa ho mai.n ne safar ye ujaale a.ndhere kaa chaltaa
rahaa hai to chaltaa rahegaa yahii rasm hai raah kii ek aayaa gayaa duusraa
aa.egaa raat aise guzar jaa.egii TimTimaate sitaare bataate the raste kii
naddii bahii jaa rahii hai bahe jaa is uljhan se aise nikal jaa ko.ii siidhaa manzil pe jaataa
thaa lekin ka.ii qaafile bhuul jaate the anjum ke daur-e-yagaanaa ke mub.ham ishaare magar vo
bhii chalte hu.e aur ba.Dhte hu.e shaam se pahle hii dekh lete the maqsuud kaa band
darvaaza khulne lagaa hai magar mai.n kha.Daa huu.n yahaa.n mujh ko kyaa kaam hai meraa darvaaza
khultaa nahii.n hai mujhe phaile sahraa kii so.ii hu.ii reg kaa zarra zarra yahii kah rahaa hai
ke aise KHaraabe me.n suukhii hathelii hai ik aisaa talvaa ke jis ko kisii KHaar kii nok chubhne pe bhii
kah nahii.n saktii mujh ko ko.ii buu.nd apne lahuu kii pilaa do magar mai.n kha.Daa huu.n yahaa.n kis liye
kaam ko.ii nahii.n hai to mai.n bhii in aate hu.e aur jaate hu.e ek do tiin
laakho.n baguulo.n me.n mil kar yuu.nhii chalte chalte kahii.n Duub jaataa ke jaise yahaa.n
bahtii lahro.n me.n kashtii har ek mauj ko thaam letii hai apnii hathelii ke phaile ka.nval
me.n mujhe dhyaan aataa nahii.n hai ki is raah me.n to har ik jaane vaale ke bas
me.n hai manzil mai.n chal duu.n chaluu.n aa.iye aa.iye aap kyuu.n is jagah
aise chup-chaap tanhaa kha.De hai.n agar aap kahiye to ham ik achhuutii sii Tahnii se
do phuul bas bas mujhe is kii ko.ii zaruurat nahii.n hai mai.n ik
dost kaa raasta dekhtaa huu.n magar vo chalaa bhii gayaa hai mujhe phir bhii
taskiin aatii nahii.n hai ki mai.n ek sahraa kaa baashinda maaluum hone lagaa huu.n KHud
apnii nazar me.n mujhe ab ko.ii band darvaaza khultaa nazar aa.e ye baat mumkin nahii.n hai
mai.n ik aur aa.ndhii kaa mushtaaq huu.n jo mujhe apne parde me.n yaksar chhupaa le
mujhe ab ye mahsuus hone lagaa hai suhaanaa samaa.n jitnaa bas me.n thaa mere
vo sab ek bahtaa saa jho.nkaa banaa hai jise haath mere nahii.n rok sakte
ki merii hathelii me.n amrit kii buu.nde.n to baaqii nahii.n hai.n faqat ek phailaa hu.aa
KHushk be-barg be-ra.ng sahraa hai jis me.n ye mumkin nahii.n mai.n kahuu.n
ek aayaa gayaa duusraa aa.egaa raat merii guzar jaa.egii

Meeraji
Nazm

KHuda ka ghar nahin koi

KHudaa kaa ghar nahii.n ko.ii
bahut pahle hamaare gaa.nv ke akasr buzurgo.n ne
use dekhaa thaa
puujaa thaa
yahii.n thaa vo
yahii.n bachcho.n kii aa.nkho.n me.n
lahakte sabz pe.Do.n me.n
vo rahtaa thaa
havaa.o.n me.n mahaktaa thaa
nadii ke saath bahtaa thaa
hamaare paas vo aa.nkhe.n kahaa.n hai.n
jo pahaa.Dii par
chamaktii
boltii
aavaaz ko dekhe.n
hamaare kaan bahre hai.n
hamaarii ruuh andhii hai
hamaare vaaste
ab phuul khilte hai.n
na ko.npal gungunaatii hai
na KHaamoshii akele me.n sunahre giit gaatii hai
hamaaraa ahd!
maa.n ke peT se andhaa hai bahraa hai
hamaare aage piichhe
maut kaa taariik pahraa hai

Nida Fazli
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now