Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "nyi"

Nazm MATCHES FOR "nyi"

Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

nisar main teri galiyon ke

yuu.nhii hamesha ulajhtii rahii hai zulm se KHalq
na un kii rasm na.ii hai na apnii riit na.ii
yuu.nhii hamesha khilaa.e hai.n ham ne aag me.n phuul
na un kii haar na.ii hai na apnii jiit na.ii
isii sabab se falak kaa gila nahii.n karte
tire firaaq me.n ham dil buraa nahii.n karte

Faiz Ahmad Faiz
Nazm

itna malum hai!

naam bhuule se jo meraa kahii.n aayaa hogaa
Gair-mahsuus tariiqe se vo chau.nkaa hogaa
ek jumle ko ka.ii baar sunaayaa hogaa
baat karte hu.e sau baar vo bhuulaa hogaa
ye jo la.Dkii na.ii aa.ii hai kahii.n vo to nahii.n
us ne har chehra yahii soch ke dekhaa hogaa
jaan-e-mahfil hai magar aaj faqat mere baGair
haa.e kis darja vahii bazm me.n tanhaa hogaa
kabhii sannaaTo.n se vahshat jo hu.ii hogii use
us ne be-saaKHta phir mujh ko pukaaraa hogaa
chalte chalte ko.ii maanuus sii aahaT paa kar
dosto.n ko bhii kis uzr se rokaa hogaa
yaad kar ke mujhe nam ho ga.ii ho.ngii palke.n
''aa.nkh me.n pa.D gayaa kuchh'' kah ke ye Taalaa hogaa
aur ghabraa ke kitaabo.n me.n jo lii hogii panaah
har satar me.n miraa chehra ubhar aayaa hogaa
jab milii hogii use merii alaalat kii KHabar
us ne aahista se diivaar ko thaamaa hogaa
soch kar ye ki bahal jaa.e pareshaanii-e-dil
yuu.nhii be-vaj.h kisii shaKHs ko rokaa hogaa!

Parveen Shakir
Nazm

ye baat samajh mein aai nahin

kyuu.n lambe baal hai.n bhaaluu ke
kyuu.n us kii Tu.nD karaa.ii nahii.n
kyaa vo bhii ganda bachcha hai
yaa us ke abbuu bhaa.ii nahii.n
ye us kaa hair style hai
yaa jangal me.n ko.ii naa.ii nahii.n

Ahmad Hatib Siddiqi
Nazm

masjid-e-qurtuba

silsila-e-roz-o-shab naqsh-gar-e-haadsaat
silsila-e-roz-o-shab asl-e-hayaat-o-mamaat
silsila-e-roz-o-shab taar-e-hariir-e-do-ra.ng
jis se banaatii hai zaat apnii qabaa-e-sifaat
silsila-e-roz-o-shab saaz-e-azal kii fuGaa.n
jis se dikhaatii hai zaat zer-o-bam-e-mumkinaat
tujh ko parakhtaa hai ye mujh ko parakhtaa hai ye
silsila-e-roz-o-shab sairafi-e-kaa.enaat
tuu ho agar kam ayaar mai.n huu.n agar kam ayaar
maut hai terii baraat maut hai merii baraat
tere shab-o-roz kii aur haqiiqat hai kyaa
ek zamaane kii rau jis me.n na din hai na raat
aani-o-faanii tamaam mojaza-haa-e-hunar
kaar-e-jahaa.n be-sabaat kaar-e-jahaa.n be-sabaat
avval o aaKHir fanaa baatin o zaahir fanaa
naqsh-e-kuhan ho ki nau manzil-e-aaKHir fanaa
hai magar is naqsh me.n ra.ng-e-sabaat-e-davaam
jis ko kiyaa ho kisii mard-e-KHudaa ne tamaam
mard-e-KHudaa kaa amal ishq se saahab faroG
ishq hai asl-e-hayaat maut hai us par haraam
tund o subuk-sair hai garche zamaane kii rau
ishq KHud ik sail hai sail ko letaa hai thaam
ishq kii taqviim me.n asr-e-ravaa.n ke sivaa
aur zamaane bhii hai.n jin kaa nahii.n ko.ii naam
ishq dam-e-jibra.iil ishq dil-e-mustafaa
ishq KHudaa kaa rasuul ishq KHudaa kaa kalaam
ishq kii mastii se hai paikar-e-gil taabnaak
ishq hai sahbaa-e-KHaam ishq hai kaas-ul-karaam
ishq faqiih-e-haram ishq amiir-e-junuuud
ishq hai ibnus-sabiil is ke hazaaro.n maqaam
ishq ke mizraab se naGma-e-taar-e-hayaat
ishq se nuur-e-hayaat ishq se naar-e-hayaat
ai haram-e-qurtuba ishq se teraa vajuud
ishq saraapaa davaam jis me.n nahii.n raft o buud
ra.ng ho yaa KHisht o sang cha.ng ho yaa harf o saut
mojaza-e-fan kii hai KHuun-e-jigar se numuud
qatra-e-KHuun-e-jigar sil ko banaataa hai dil
KHuun-e-jigar se sadaa soz o suruur o suruud
terii fazaa dil-faroz merii navaa siina-soz
tujh se dilo.n kaa huzuur mujh se dilo.n kii kushuud
arsh-e-mo.allaa se kam siina-e-aadam nahii.n
garche kaf-e-KHaak kii had hai sip.har-e-kabuud
paikar-e-nuurii ko hai sajda mayassar to kyaa
us ko mayassar nahii.n soz-o-gudaaz-e-sajuud
kaafir-e-hindi huu.n mai.n dekh miraa zauq o shauq
dil me.n salaat o duruud lab pe salaat o duruud
shauq mirii lai me.n hai shauq mirii nai me.n hai
naGma-e-allaah-huu mere rag-o-pai me.n hai
teraa jalaal o jamaal mard-e-KHudaa kii daliil
vo bhii jaliil o jamiil tuu bhii jaliil o jamiil
terii binaa paa.edaar tere sutuu.n be-shumaar
shaam ke sahraa me.n ho jaise hujuum-e-nuKHiil
tere dar-o-baam par vaadii-e-aiman kaa nuur
teraa minaar-e-buland jalva-gah-e-jibra.iil
miT nahii.n saktaa kabhii mard-e-musalmaa.n ki hai
us kii azaano.n se faash sirr-e-kaliim-o-KHaliil
us kii zamii.n be-huduud us kaa ufuq be-saGuur
us ke samundar kii mauj dajla o danyuub o niil
us ke zamaane ajiib us ke fasaane Gariib
ahd-e-kuhan ko diyaa us ne payaam-e-rahiil
saaqi-e-rabaab-e-zauq faaras-e-maidaan-e-shauq
baada hai us kaa rahiiq teG hai us kii asiil
mard-e-sipaahii hai vo us kii zirah laa-ilaah
saaya-e-shamshiir me.n us kii panah laa-ilaah
tujh se hu.aa aashkaar banda-e-momin kaa raaz
us ke dino.n kii tapish us kii shabo.n kaa gudaaz
us kaa maqaam-e-buland us kaa KHayaal-e-aziim
us kaa suruur us kaa shauq us kaa niyaaz us kaa naaz
haath hai allaah kaa banda-e-momin kaa haath
Gaalib o kaar-aafrii.n kaar-kushaa kaarsaaz
KHaakii o nuurii-nihaad banda-e-maulaa-sifaat
har do-jahaa.n se Ganii us kaa dil-e-be-niyaaz
us kii umiide.n qaliil us ke maqaasid jaliil
us kii adaa dil-fareb us kii nigah dil-navaaz
aaj bhii is des me.n aam hai chashm-e-Gazaal
aur nigaaho.n ke tiir aaj bhii hai.n dil-nashii.n
buu-e-yaman aaj bhii us kii havaa.o.n me.n hai
ra.ng-e-hijaaz aaj bhii us kii navaa.o.n me.n hai
diida-e-anjum me.n hai terii zamii.n aasmaa.n
aah ki sadiyo.n se hai terii fazaa be-azaa.n
kaun sii vaadii me.n hai kaun sii manzil me.n hai
ishq-e-balaa-KHez kaa qaafla-e-saKHt-jaa.n
dekh chukaa almanii shorish-e-islaah-e-dii.n
jis ne na chho.De kahii.n naqsh-e-kuhan ke nishaa.n
harf-e-Galat ban ga.ii ismat-e-piir-e-kunisht
aur hu.ii fikr kii kashti-e-naazuk ravaa.n
chashm-e-faraansiis bhii dekh chukii inqalaab
jis se digar-guu.n hu.aa maGrabiyo.n kaa jahaa.n
millat-e-ruumii-nizhaad kohna-parastii se piir
lazzat-e-tajdiida se vo bhii hu.ii phir javaa.n
ruuh-e-musalmaa.n me.n hai aaj vahii iztiraab
raaz-e-KHudaa.ii hai ye kah nahii.n saktii zabaa.n
narm dam-e-guftuguu garm dam-e-justujuu
razm ho yaa bazm ho paak-dil o paak-baaz
nuqta-e-parkaar-e-haq mard-e-KHudaa kaa yaqii.n
aur ye aalam tamaam vahm o tilism o majaaz
aql kii manzil hai vo ishq kaa haasil hai vo
halqa-e-aafaaq me.n garmi-e-mahfil hai vo
kaaba-e-arbaab-e-fan satvat-e-diin-e-mubii.n
tujh se haram martabat undulusiyo.n kii zamii.n
hai tah-e-garduu.n agar husn me.n terii naziir
qalb-e-musalmaa.n me.n hai aur nahii.n hai kahii.n
aah vo mardaan-e-haq vo arabii shahsavaar
haamil-e-KHalq-e-aziim saahab-e-sidq-o-yaqii.n
jin kii hukuumat se hai faash ye ramz-e-Gariib
saltanat-e-ahl-e-dil faqr hai shaahii nahii.n
jin kii nigaaho.n ne kii tarbiyat-e-sharq-o-Garb
zulmat-e-europe me.n thii jin kii KHirad-raah-bii.n
jin ke lahuu ke tufail aaj bhii hai.n undulusii
KHush-dil o garam-iKHtilaat saada o raushan-jabii.n
dekhiye is bahr kii tah se uchhaltaa hai kyaa
gumbad-e-niilofarii rang badaltaa hai kyaa
vaadi-e-koh-saar me.n Garq-e-shafaq hai sahaab
laal-e-badaKHshaa.n ke Dher chho.D gayaa aaftaab
saada o pur-soz hai duKHtar-e-dahqaa.n kaa giit
kashtii-e-dil ke liye sail hai ahd-e-shabaab
aab-e-ravaan-e-kabiir tere kinaare ko.ii
dekh rahaa hai kisii aur zamaane kaa KHvaab
aalam-e-nau hai abhii parda-e-taqdiir me.n
merii nigaaho.n me.n hai us kii sahar be-hijaab
parda uThaa duu.n agar chehra-e-afkaar se
laa na sakegaa fara.ng merii navaa.o.n kii taab
jis me.n na ho inqalaab maut hai vo zindagii
ruuh-e-umam kii hayaat kashmakash-e-inqilaab
suurat-e-shamshiir hai dast-e-qazaa me.n vo qaum
kartii hai jo har zamaa.n apne amal kaa hisaab
naqsh hai.n sab naa-tamaam KHuun-e-jigar ke baGair
naGma hai saudaa-e-KHaam KHuun-e-jigar ke baGair

Allama Iqbal
Nazm

ai ishq-e-junun-pesha

har raah me.n Tapkaa hai
KHuunaaba baham jo thaa
rasto.n me.n luTaayaa hai
vo besh ki kam jo thaa
nai ranj-e-shikast-e-dil
nai jaan kaa andesha
.
kuchh ahl-e-riyaa bhii to
hamraah hamaare the
rahrav the ki rahzan the
jo ruup bhii dhaare the kuchh sahl-talab bhii the
vo bhii hame.n pyaare the
apne the ki begaane
ham KHush the ki saare the

Ahmad Faraz
Nazm

KHwab jo bikhar gae

KHuluus-e-be-shu.uur kii vo zuud-etabaariyaa.n
vo shauq-e-saada-lauh kii hasiin KHaam-kaariyaa.n
na.ii sahar ke KHaal-o-KHad, nigaah me.n base hu.e
KHayaal hii KHayaal me.n, vo haashiya-nigaariyaa.n
jo de gayaa fareb vo, shabaab Dhuu.nDhtaa huu.n mai.n
jinhe.n sahar nigal ga.ii vo KHvaab Dhuu.nDhtaa huu.n mai.n
kahaa.n ga.ii vo nii.nd kii sharaab Dhuu.nDhtaa huu.n mai.n

Amir Usmani
Nazm

chalo chhoDo

chalo chho.Do
mohabbat jhuuT hai
ahd-e-vafaa ik shaGl hai be-kaar logo.n kaa
talab suukhe hu.e patto.n kaa be-raunaq jaziira hai
KHalish diimak-zada auraaq par bosiida satro.n kaa zaKHiira hai
KHummaar-e-vasl taptii dhuup ke siine pe u.Dte baadalo.n kii raa.egaa.n baKHshish!
Gubaar-e-hijr-e-sahraa me.n saraabo.n se aTe mausam kaa KHamyaaza
chalo chho.Do
ki ab tak mai.n a.ndhero.n kii dhamak me.n saa.ns kii zarbo.n pe
chaahat kii binaa rakh kar safar kartaa rahaa huu.ngaa
mujhe ehsaas hii kab thaa
ki tum bhii mausamo.n ke saath apne pairahan ke rang badlogii
chalo chho.Do
vo saare KHvaab kachchii bharbharii miTTii ke be-qiimat gharau.nde the
vo saare zaa.iqe merii zabaa.n par zaKHm ban kar jam ga.e ho.nge
tumhaarii u.ngliyo.n kii naram pore.n pattharo.n par naam likhtii thii.n miraa lekin
tumhaarii u.ngliyaa.n to aadatan ye jurm kartii thii.n
chalo chho.Do
safar me.n ajnabii logo.n se aise haadse sarzad hu.aa karte hai.n sadiyo.n se
chalo chho.Do
miraa honaa na honaa ik baraabar hai
tum apne KHaal-o-KHad ko aa.iine me.n phir nikharne do
tum apnii aa.nkh kii bastii me.n phir se ik nayaa mausam utarne do
mire KHvaabo.n ko marne do
na.ii tasviir dekho
phir nayaa maktuub likho
phir na.e mausam na.e lafzo.n se apnaa silsila jo.Do
mire maazii kii chaahat raa.egaa.n samjho
mirii yaado.n se kachche raabte to.Do
chalo chho.Do
mohabbat jhuuT hai
ahd-e-vafaa ik shaGl hai be-kaar logo.n kaa

Mohsin Naqvi
Nazm

bahut dinon ki baat hai

mai.n shahar se phir aa gayaa
KHayaal thaa ki paa gayaa
use jo mujh se duur thii
magar mirii zaruur thii
aur ik hasiin shaam ko
mai.n chal pa.Daa salaam ko
galii kaa rang dekh kar
na.ii tara.ng dekh kar
mujhe ba.Dii KHushii hu.ii

Salam Machhli shahri
Nazm

lakDi ki kaThi

gho.Daa pahu.nchaa chauk me.n chauk me.n thaa naa.ii
gho.De jii kii naa.ii ne hajaamat jo banaa.ii
dau.Daa dau.Daa dau.Daa gho.Daa dum uThaa ke dau.Daa

Gulzar
Nazm

urdu ka janaza hai zara dhum se nikle

is laash ko chupke se ko.ii dafn na kar de
pahle ko.ii 'sirsayyad'-e-a.azam ko KHabar de
vo mard-e-KHudaa ham me.n na.ii ruuh to bhar de
vo ruuh ki maujuud na maa'duum se nikle
urdu kaa janaaza hai zaraa dhuum se nikle

Rais Amrohvi
Nazm

nai tahzib

ye maujuuda tariiqe raahi-e-mulk-e-adam ho.nge
na.ii tahziib hogii aur na.e saamaa.n baham ho.nge

Akbar Allahabadi
Nazm

ai nae sal bata tujh mein naya-pan kya hai

tuu nayaa hai to dikhaa sub.h na.ii shaam na.ii
varna in aa.nkho.n ne dekhe hai.n na.e saal ka.ii

Faiz Ludhianvi
Nazm

nau-jawan se

jalaal-e-aatish-o-barq-o-sahaab paidaa kar
ajal bhii kaa.np uThe vo shabaab paidaa kar
tire KHiraam me.n hai zalzalo.n kaa raaz nihaa.n
har ek gaam par ik inqalaab paidaa kar
sadaa-e-tiisha-e-mazduur hai tiraa naGma
tuu sa.ng-o-KHisht se cha.ng-o-rubaab paidaa kar
bahut latiif hai ai dost teG kaa bosa
yahii hai jaan-e-jahaa.n is me.n aab paidaa kar
tire qadam pe nazar aa.e mahfil-e-anjum
vo baa.nkpan vo achhuutaa shabaab paidaa kar
tiraa shabaab amaanat hai saarii duniyaa kii
tuu KHaar-zaar-e-jahaa.n me.n gulaab paidaa kar
sukuun-e-KHaab hai be-dast-o-paa za.iifii kaa
tuu iztiraab hai KHud iztiraab paidaa kar
na dekh zohd kii tuu ismat-e-gunah-aaluud
gunah me.n fitrat-e-ismat-ma.aab paidaa kar
tire jilau me.n na.ii jannate.n na.e dozaKH
na.ii jazaa.e.n anokhe azaab paidaa kar
sharaab khii.nchii hai sab ne Gariib ke KHuu.n se
tuu ab amiir ke KHuu.n se sharaab paidaa kar
giraa de qasr-e-tamaddun ki ik fareb hai ye
uThaa de rasm-e-mohabbat azaab paidaa kar
jo ho sake hame.n paamaal kar ke aage ba.Dh
jo ho sake to hamaaraa javaab paidaa kar
bahe zamii.n pe jo meraa lahuu to Gam mat kar
isii zamii.n se mahakte gulaab paidaa kar
tuu inqalaab kii aamad kaa intizaar na kar
jo ho sake to abhii inqalaab paidaa kar

Asrarul Haq Majaz
Nazm

tin aawazen

zaalim
jashn hai maatam-e-ummiid kaa aa.o logo
marg-e-amboh kaa tyauhaar manaa.o logo
adam-aabaad ko aabaad kiyaa hai mai.n ne
tum ko din raat se aazaad kiyaa hai mai.n ne
jalva-e-sub.h se kyaa maa.ngte ho
bistar-e-KHvaab se kyaa chaahte ho
saarii aa.nkho.n ko tah-e-teG kiyaa hai mai.n ne
saare KHvaabo.n kaa galaa ghuu.nT diyaa hai mai.n ne
ab na lahkegii kisii shaaKH pe phuulo.n kii hinaa
fasl-e-gul aa.egii namruud ke a.ngaar liye
ab na barsaat me.n barsegii guhar kii barkhaa
abr aa.egaa KHas-o-KHaar ke ambaar liye
meraa maslak bhii nayaa raah-e-tariiqat bhii na.ii
mere qaanuu.n bhii na.e merii sharii.at bhii na.ii
ab faqiihaan-e-haram dast-e-sanam chuume.nge
sarv-qad miTTii ke bauno.n ke qadam chuume.nge
farsh par aaj dar-e-sidq-o-safaa band hu.aa
arsh par aaj har ik baab-e-du.aa band hu.aa

Faiz Ahmad Faiz
Nazm

uTho

uTho hind ke baaGbaano uTho
uTho inqilaabii javaano uTho
kisaano.n uTho kaam-gaaro uTho
na.ii zindagii ke sharaaro uTho
uTho khelte apnii zanjiir se
uTho KHaak-e-ba.ngaal-o-kashmiir se
uTho vaadii o dasht o kohsaar se
uTho sindh o punjab o malbaar se
uTho maalve aur mevaat se
maharashtra aur gujraat se
avadh ke chaman se chahakte uTho
gulo.n kii tarah se mahakte uTho
uTho khul gayaa parcham-e-inqalaab
nikaltaa hai jis tarah se aaftaab
uTho jaise dariyaa me.n uThtii hai mauj
uTho jaise aa.ndhii kii ba.Dhtii hai fauj
uTho barq kii tarah ha.nste hu.e
ka.Dakte garajte baraste hu.e
Gulaamii kii zanjiir ko to.D do
zamaane kii raftaar ko mo.D do

Ali Sardar Jafri
Nazm

shahr-nama

ko.ii nai-navaaz thaa dam-ba-KHud
ki nafas se hiddat-e-jaa.n ga.ii
ko.ii sar-ba-zaanuu thaa 'baarbad'
ki sadaa-e-dost kahaa.n ga.ii

Ahmad Faraz
Nazm

hasan kuza-gar (4)

jahaa.n-zaad mai.n ne hasan kuuza-gar ne
bayaabaa.n bayaabaa.n ye dard-e-risaalat sahaa hai
hazaaro.n baras baa'd ye log
rezo.n ko chunte hu.e
jaan sakte hai.n kaise
ki mere gil o KHaak ke rang o roGan
tire naazuk aazaa ke ra.ngo.n se mil kar
abad kii sadaa ban ga.e the
mai.n apne masaamo.n se har por se
terii baa.nho.n kii pahnaa.iyaa.n
jazb kartaa rahaa thaa
ki har aane vaale kii aa.nkho.n ke maabad pe jaa kar cha.Dhaa.uu.n
ye rezo.n kii tahziib paa le.n to paa le.n
hasan kuuza-gar ko kahaa.n laa sake.nge
ye us ke pasiine ke qatre kahaa.n gin sake.nge
ye fan kii tajallii kaa saaya kahaa.n paa sake.nge
jo ba.Dhtaa gayaa hai zamaa.n se zamaa.n tak
KHizaa.n se KHizaa.n tak
jo har naujavaa.n kuuza-gar kii na.ii zaat me.n
aur ba.Dhtaa chalaa jaa rahaa hai!
vo fan kii tajallii kaa saayaa ke jis kii badaulat
hama ishq hai.n ham
hama kuuza-gar ham
hama-tan KHabar ham
KHudaa kii tarah apne fan ke KHudaa sar-ba-sar ham
aarzu.e.n kabhii paayaab to saryaab kabhii
tairne lagte hai.n behoshii kii aa.nkho.n me.n ka.ii chehre
jo dekhe bhii na ho.n
kabhii dekhe ho.n kisii ne to suraaG un kaa
kahaa.n se paa.e
kis se iifaa hu.e andoh ke aadaab kabhii
aarzu.e.n kabhii paayaab to saryaab kabhii

Noon Meem Rashid
Nazm

pahli baat hi aaKHiri thi

pahlii baat hii aaKHirii thii
is se aage ba.Dhii nahii.n
Darii hu.ii ko.ii bel thii jaise
puure ghar pe cha.Dhii nahii.n
Dar hii kyaa thaa kah dene me.n
khul kar baat jo dil me.n thii
aas-paas ko.ii aur nahii.n thaa
shaam thii na.ii mohabbat kii
ek jhijak sii saath rahii kyuu.n
qurb kii saa.at-e-hairaa.n me.n
had se aage ba.Dhne kii
phail ke us tak jaane kii
us ke ghar par cha.Dhne kii

Muneer Niyazi
Nazm

ai mere watan ke KHush-nawao

ik umr ke baa'd tum mile ho
ai mere vatan ke KHush-navaa.o
har hijr kaa din thaa hashr kaa din
dozaKH the firaaq ke alaa.o
ro.uu.n ki ha.nsuu.n samajh na aa.e
haatho.n me.n hai.n phuul dil me.n ghaa.o
tum aa.e to saath hii tumhaare
bichh.De hu.e yaar yaad aa.e
ik zaKHm pe tum ne haath rakkhaa
aur mujh ko hazaar yaad aa.e
vo saare rafiiq paa-ba-jaulaa.n
sab kushta-e-daar yaad aa.e
ham sab kaa hai ek hii qabiila
ik dasht ke saare ham-safar hai.n
kuchh vo hai.n jo duusro.n kii KHaatir
aashufta-nasiib o dar-ba-dar hai.n
kuchh vo hai.n jo KHil.at-o-qabaa se
aivaan-e-shahii me.n mo'tabar hai.n
suqraat o masiih ke fasaane
tum bhii to bahut sunaa rahe the
mansuur o husain se aqiidat
tum bhii to bahut jataa rahe the
kahte the sadaaqate.n amar hai.n
auro.n ko yahii bataa rahe the
aur ab jo hai.n jaa-ba-jaa saliibe.n
tum baa.nsuriyaa.n bajaa rahe ho
aur ab jo hai karbalaa kaa naqsha
tum mad.h-e-yaziid gaa rahe ho
jab sach tah-e-teG ho rahaa hai
tum sach se nazar churaa rahe ho
jii chaahtaa hai ki tum se puuchhuu.n
kyaa raaz is ijtinaab me.n hai
tum itne kaThor to nahii.n the
ye be-hisii kisii hisaab me.n hai
tum chup ho to kis tarah se chup ho
jab KHalq-e-KHudaa azaab me.n hai
socho to tumhe.n milaa bhii kyaa hai
ik luqma-e-tar qalam kii qiimat
Gairat ko faroKHt karne vaalo
ik kaasa-e-zar qalam kii qiimat
pindaar ke taajiro bataa.o
darbaan kaa dar qalam kii qiimat
naadaa.n to nahii.n ho tum ki samjhuu.n
Gaflat se ye zahr gholte ho
thaame hu.e maslahat kii miizaan
har sher kaa vazn taulte ho
aise me.n sukuut, chashm-poshii
aisaa hai ki jhuuT bolte ho
ik umr se adl o sidq kii laash
Gaasib kii saliib par ja.Dii hai
is vaqt bhii tum Gazal-saraa ho
jab zulm kii har gha.Dii ka.Dii hai
ja.ngal pe lapak rahe hai.n shole
taa.uus ko raqs kii pa.Dii hai
hai sab ko aziiz kuu-e-jaanaa.n
is raah me.n sab jiye mare hai.n
haa.n merii bayaaz-e-sher me.n bhii
barbaadi-e-dil ke marsiye hai.n
mai.n ne bhii kiyaa hai TuuT kar ishq
aur ek nahii.n ka.ii kiye hai.n
lekin Gam-e-aashiqii nahii.n hai
aisaa jo subuk-sarii sikhaa.e
ye Gam to vo KHush-ma.aal Gam hai
jo koh se juu-e-shiir laa.e
teshe kaa hunar qalam ko baKHshe
jo qais ko kohkan banaa.e
ai hiila-garaan-e-shahr-e-shiirii.n
aayaa huu.n pahaa.D kaaT kar mai.n
hai be-vatanii gavaah merii
har-chand phiraa huu.n dar-ba-dar mai.n
bechaa na Guruur-e-nai-navaazii
aisaa bhii na thaa subuk hunar me.n
tum bhii kabhii ham-navaa the mere
phir aaj tumhe.n ye kyaa hu.aa hai
miTTii ke vaqaar ko na becho
ye ahd-e-sitam jihaad kaa hai
daryuuza-garii ke maqbaro.n se
zindaa.n kii fasiil KHushnumaa hai
kab ek hii rut rahii hamesha
ye zulm kii fasl bhii kaTegii
jab harf kahegaa qum-be-iznii
martii hu.ii KHaak jii uThegii
lailaa-e-vatan ke pairahan me.n
baaruud kii buu nahii.n rahegii
phir baa.ndhe.nge abru.o.n ke dohe
phir mad.h-e-ruKH-o-dahan kahe.nge
Thahraa.e.nge un labo.n ko matlaa
jaanaa.n ke liye suKHan kahe.nge
afsaana-e-yaar o qissa-e-dil
phir anjuman anjuman kahe.nge

Ahmad Faraz
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now