Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "pastii"

Nazm MATCHES FOR "pastii"

Nazm

jawab-e-shikwa

dil se jo baat nikaltii hai asar rakhtii hai
par nahii.n taaqat-e-parvaaz magar rakhtii hai
qudsi-ul-asl hai rif.at pe nazar rakhtii hai
KHaak se uThtii hai garduu.n pe guzar rakhtii hai
ishq thaa fitnagar o sarkash o chaalaak miraa
aasmaa.n chiir gayaa naala-e-bebaak miraa
piir-e-garduu.n ne kahaa sun ke kahii.n hai ko.ii
bole sayyaare sar-e-arsh-e-barii.n hai ko.ii
chaa.nd kahtaa thaa nahii.n ahl-e-zamii.n hai ko.ii
kahkashaa.n kahtii thii poshiida yahii.n hai ko.ii
kuchh jo samjhaa mire shikve ko to rizvaa.n samjhaa
mujh ko jannat se nikaalaa hu.aa insaa.n samjhaa
thii farishto.n ko bhii hairat ki ye aavaaz hai kyaa
arsh vaalo.n pe bhii khultaa nahii.n ye raaz hai kyaa
taa-sar-e-arsh bhii insaa.n kii tag-o-taaz hai kyaa
aa ga.ii KHaak kii chuTkii ko bhii parvaaz hai kyaa
Gaafil aadaab se sukkaan-e-zamii.n kaise hai.n
shoKH o gustaaKH ye pastii ke makii.n kaise hai.n
is qadar shoKH ki allaah se bhii barham hai
thaa jo masjuud-e-malaa.ik ye vahii aadam hai
aalim-e-kaif hai daanaa-e-rumuuz-e-kam hai
haa.n magar ijz ke asraar se naa-mahram hai
naaz hai taaqat-e-guftaar pe insaano.n ko
baat karne kaa saliiqa nahii.n naa-daano.n ko
aa.ii aavaaz Gam-a.ngez hai afsaana tiraa
ashk-e-betaab se labrez hai paimaana tiraa
aasmaa.n-giir hu.aa naara-e-mastaana tiraa
kis qadar shoKH-zabaa.n hai dil-e-diivaana tiraa
shukr shikve ko kiyaa husn-e-adaa se tuu ne
ham-suKHan kar diyaa bando.n ko KHudaa se tuu ne
ham to maa.il-ba-karam hai.n ko.ii saa.il hii nahii.n
raah dikhlaa.e.n kise rah-rav-e-manzil hii nahii.n
tarbiyat aam to hai jauhar-e-qaabil hii nahii.n
jis se ta.amiir ho aadam kii ye vo gil hii nahii.n
ko.ii qaabil ho to ham shaan-e-ka.ii dete hai.n
Dhuu.nDne vaalo.n ko duniyaa bhii na.ii dete hai.n
haath be-zor hai.n ilhaad se dil KHuugar hai.n
ummatii baa.is-e-rusvaa.i-e-paiGambar hai.n
but-shikan uTh ga.e baaqii jo rahe but-gar hai.n
thaa braahiim pidar aur pisar aazar hai.n
baada-aashaam na.e baada nayaa KHum bhii na.e
haram-e-kaaba nayaa but bhii na.e tum bhii na.e
vo bhii din the ki yahii maaya-e-raanaa.ii thaa
naazish-e-mausam-e-gul laala-e-sahraa.ii thaa
jo musalmaan thaa allaah kaa saudaa.ii thaa
kabhii mahbuub tumhaaraa yahii harjaa.ii thaa
kisii yakjaa.ii se ab ahd-e-Gulaamii kar lo
millat-e-ahmad-e-mursil ko maqaamii kar lo
kis qadar tum pe giraa.n sub.h kii bedaarii hai
ham se kab pyaar hai haa.n nii.nd tumhe.n pyaarii hai
tab-e-aazaad pe qaid-e-ramazaa.n bhaarii hai
tumhii.n kah do yahii aa.iin-e-vafaadaarii hai
qaum maz.hab se hai maz.hab jo nahii.n tum bhii nahii.n
jazb-e-baaham jo nahii.n mahfil-e-anjum bhii nahii.n
jin ko aataa nahii.n duniyaa me.n ko.ii fan tum ho
nahii.n jis qaum ko parvaa-e-nasheman tum ho
bijliyaa.n jis me.n ho.n aasuuda vo KHirman tum ho
bech khaate hai.n jo aslaaf ke madfan tum ho
ho niko naam jo qabro.n kii tijaarat kar ke
kyaa na bechoge jo mil jaa.e.n sanam patthar ke
safha-e-dahr se baatil ko miTaayaa kis ne
nau-e-insaa.n ko Gulaamii se chhu.Daayaa kis ne
mere ka.abe ko jabiino.n se basaayaa kis ne
mere qur.aan ko siino.n se lagaayaa kis ne
the to aabaa vo tumhaare hii magar tum kyaa ho
haath par haath dhare muntazir-e-fardaa ho
kyaa kahaa bahr-e-musalmaa.n hai faqat vaada-e-huur
shikva bejaa bhii kare ko.ii to laazim hai shu.uur
adl hai faatir-e-hastii kaa azal se dastuur
muslim aa.ii.n hu.aa kaafir to mile huur o qusuur
tum me.n huuro.n kaa ko.ii chaahne vaalaa hii nahii.n
jalva-e-tuur to maujuud hai muusaa hii nahii.n
manfa.at ek hai is qaum kaa nuqsaan bhii ek
ek hii sab kaa nabii diin bhii iimaan bhii ek
haram-e-paak bhii allaah bhii qur.aan bhii ek
kuchh ba.Dii baat thii hote jo musalmaan bhii ek
firqa-bandii hai kahii.n aur kahii.n zaate.n hai.n
kyaa zamaane me.n panapne kii yahii baate.n hai.n
kaun hai taarik-e-aa.iin-e-rasuul-e-muKHtaar
maslahat vaqt kii hai kis ke amal kaa me.aar
kis kii aa.nkho.n me.n samaayaa hai shi.aar-e-aGyaar
ho ga.ii kis kii nigah tarz-e-salaf se be-zaar
qalb me.n soz nahii.n ruuh me.n ehsaas nahii.n
kuchh bhii paiGaam-e-mohammad kaa tumhe.n paas nahii.n
jaa ke hote hai.n masaajid me.n saf-aaraa to Gariib
zahmat-e-roza jo karte hai.n gavaaraa to Gariib
naam letaa hai agar ko.ii hamaaraa to Gariib
parda rakhtaa hai agar ko.ii tumhaaraa to Gariib
umaraa nashsha-e-daulat me.n hai.n Gaafil ham se
zinda hai millat-e-baizaa Gorabaa ke dam se
vaa.iz-e-qaum kii vo puKHta-KHayaalii na rahii
barq-e-tab.ii na rahii shola-maqaalii na rahii
rah ga.ii rasm-e-azaa.n ruuh-e-bilaalii na rahii
falsafa rah gayaa talqiin-e-Gazaalii na rahii
masjide.n marsiyaa.n-KHvaa.n hai.n ki namaazii na rahe
yaanii vo sahib-e-ausaaf-e-hijaazii na rahe
shor hai ho ga.e duniyaa se musalmaa.n naabuud
ham ye kahte hai.n ki the bhii kahii.n muslim maujuud
vaz.a me.n tum ho nasaaraa to tamaddun me.n hunuud
ye musalmaa.n hai.n jinhe.n dekh ke sharmaa.e.n yahuud
yuu.n to sayyad bhii ho mirzaa bhii ho afGaan bhii ho
tum sabhii kuchh ho bataa.o to musalmaan bhii ho
dam-e-taqriir thii muslim kii sadaaqat bebaak
adl us kaa thaa qavii laus-e-maraa.aat se paak
shajar-e-fitrat-e-muslim thaa hayaa se namnaak
thaa shujaa.at me.n vo ik hasti-e-fauq-ul-idraak
KHud-gudaazii nam-e-kaifiyat-e-sahbaa-yash buud
KHaalii-az-KHesh shudan suurat-e-miinaa-yash buud
har musalmaa.n rag-e-baatil ke liye nashtar thaa
us ke aa.iina-e-hastii me.n amal jauhar thaa
jo bharosaa thaa use quvvat-e-baazuu par thaa
hai tumhe.n maut kaa Dar us ko KHudaa kaa Dar thaa
baap kaa ilm na beTe ko agar azbar ho
phir pisar qaabil-e-miiraas-e-pidar kyuu.nkar ho
har ko.ii mast-e-mai-e-zauq-e-tan-aasaanii hai
tum musalmaa.n ho ye andaaz-e-musalmaanii hai
haidarii faqr hai ne daulat-e-usmaanii hai
tum ko aslaaf se kyaa nisbat-e-ruuhaanii hai
vo zamaane me.n mu.azziz the musalmaa.n ho kar
aur tum KHvaar hu.e taarik-e-qur.aa.n ho kar
tum ho aapas me.n Gazabnaak vo aapas me.n rahiim
tum KHataa-kaar o KHataa-bii.n vo KHataa-posh o kariim
chaahte sab hai.n ki ho.n auj-e-surayyaa pe muqiim
pahle vaisaa ko.ii paidaa to kare qalb-e-saliim
taKHt-e-faGfuur bhii un kaa thaa sariir-e-ka.e bhii
yuu.n hii baate.n hai.n ki tum me.n vo hamiyat hai bhii
KHud-kushii sheva tumhaaraa vo Gayuur o KHuddaar
tum uKHuvvat se gurezaa.n vo uKHuvvat pe nisaar
tum ho guftaar saraapaa vo saraapaa kirdaar
tum taraste ho kalii ko vo gulistaa.n ba-kanaar
ab talak yaad hai qaumo.n ko hikaayat un kii
naqsh hai safha-e-hastii pe sadaaqat un kii
misl-e-anjum ufuq-e-qaum pe raushan bhii hu.e
but-e-hindii kii mohabbat me.n birhman bhii hu.e
shauq-e-parvaaz me.n mahjuur-e-nasheman bhii hu.e
be-amal the hii javaa.n diin se bad-zan bhii hu.e
in ko tahziib ne har band se aazaad kiyaa
laa ke ka.abe se sanam-KHaane me.n aabaad kiyaa
qais zahmat-kash-e-tanhaa.i-e-sahraa na rahe
shahr kii khaa.e havaa baadiya-paimaa na rahe
vo to diivaana hai bastii me.n rahe yaa na rahe
ye zaruurii hai hijaab-e-ruKH-e-lailaa na rahe
gila-e-zaur na ho shikva-e-bedaad na ho
ishq aazaad hai kyuu.n husn bhii aazaad na ho
ahd-e-nau barq hai aatish-zan-e-har-KHirman hai
aiman is se ko.ii sahraa na ko.ii gulshan hai
is na.ii aag kaa aqvaam-e-kuhan ii.ndhan hai
millat-e-KHatm-e-rusul shola-ba-pairaahan hai
aaj bhii ho jo braahiim kaa iimaa.n paidaa
aag kar saktii hai andaaz-e-gulistaa.n paidaa
dekh kar ra.ng-e-chaman ho na pareshaa.n maalii
Kaukab-e-Guncha se shaaKHe.n hai.n chamakne vaalii
KHas o KHaashaak se hotaa hai gulistaa.n KHaalii
Gul-bar-andaaz hai KHuun-e-shohdaa kii laalii
ra.ng garduu.n kaa zaraa dekh to unnaabii hai
ye nikalte hu.e suuraj kii ufuq-taabii hai
ummate.n gulshan-e-hastii me.n samar-chiida bhii hai.n
aur mahruum-e-samar bhii hai.n KHizaa.n-diida bhii hai.n
saik.Do.n naKHl hai.n kaahiida bhii baaliida bhii hai.n
saik.Do.n batn-e-chaman me.n abhii poshiida bhii hai.n
naKHl-e-islaam namuuna hai birau-mandii kaa
phal hai ye saik.Do.n sadiyo.n kii chaman-bandii kaa
paak hai gard-e-vatan se sar-e-daamaa.n teraa
tuu vo yuusuf hai ki har misr hai kan.aa.n teraa
qaafila ho na sakegaa kabhii viiraa.n teraa
Gair yak-baa.ng-e-daraa kuchh nahii.n saamaa.n teraa
naKHl-e-shama astii o dar shola do-resha-e-tuu
aaqibat-soz bavad saaya-e-andesha-e-tuu
tuu na miT jaa.egaa iiraan ke miT jaane se
nashsha-e-mai ko ta'alluq nahii.n paimaane se
hai ayaa.n yurish-e-taataar ke afsaane se
paasbaa.n mil ga.e ka.abe ko sanam-KHaane se
kashti-e-haq kaa zamaane me.n sahaaraa tuu hai
asr-e-nau-raat hai dhundlaa saa sitaaraa tuu hai
hai jo ha.ngaama bapaa yurish-e-bulGaarii kaa
Gaafilo.n ke liye paiGaam hai bedaarii kaa
tuu samajhtaa hai ye saamaa.n hai dil-aazaarii kaa
imtihaa.n hai tire iisaar kaa KHuddaarii kaa
kyuu.n hiraasaa.n hai sahiil-e-faras-e-aadaa se
nuur-e-haq bujh na sakegaa nafas-e-aadaa se
chashm-e-aqvaam se maKHfii hai haqiiqat terii
hai abhii mahfil-e-hastii ko zaruurat terii
zinda rakhtii hai zamaane ko haraarat terii
kaukab-e-qismat-e-imkaa.n hai KHilaafat terii
vaqt-e-fursat hai kahaa.n kaam abhii baaqii hai
nuur-e-tauhiid kaa itmaam abhii baaqii hai
misl-e-buu qaid hai Gunche me.n pareshaa.n ho jaa
raKHt-bar-dosh havaa-e-chamanistaa.n ho jaa
hai tunak-maaya tuu zarre se bayaabaa.n ho jaa
naGma-e-mauj hai ha.ngaama-e-tuufaa.n ho jaa
quvvat-e-ishq se har past ko baalaa kar de
dahr me.n ism-e-mohammad se ujaalaa kar de
ho na ye phuul to bulbul kaa tarannum bhii na ho
chaman-e-dahr me.n kaliyo.n kaa tabassum bhii na ho
ye na saaqii ho to phir mai bhii na ho KHum bhii na ho
bazm-e-tauhiid bhii duniyaa me.n na ho tum bhii na ho
KHema-e-aflaak kaa istaada isii naam se hai
nabz-e-hastii tapish-aamaada isii naam se hai
dasht me.n daaman-e-kohsaar me.n maidaan me.n hai
bahr me.n mauj kii aaGosh me.n tuufaan me.n hai
chiin ke shahr maraaqash ke bayaabaan me.n hai
aur poshiida musalmaan ke iimaan me.n hai
chashm-e-aqvaam ye nazzaara abad tak dekhe
rif.at-e-shaan-e-rafaanaa-lakaa-zikrak dekhe
mardum-e-chashm-e-zamii.n yaanii vo kaalii duniyaa
vo tumhaare shohdaa paalne vaalii duniyaa
garmii-e-mehr kii parvarda hilaalii duniyaa
ishq vaale jise kahte hai.n bilaalii duniyaa
tapish-andoz hai is naam se paare kii tarah
Gota-zan nuur me.n hai aa.nkh ke taare kii tarah
aql hai terii sipar ishq hai shamshiir tirii
mire darvesh KHilaafat hai jahaa.ngiir tirii
maa-sivaa-allaah ke liye aag hai takbiir tirii
tuu musalmaa.n ho to taqdiir hai tadbiir tirii
kii mohammad se vafaa tuu ne to ham tere hai.n
ye jahaa.n chiiz hai kyaa lauh-o-qalam tere hai.n

Allama Iqbal
Nazm

taswir-e-dard

nahii.n minnat-kash-e-taab-e-shuniidan daastaa.n merii
KHamoshii guftuguu hai be-zabaanii hai zabaa.n merii
ye dastuur-e-zabaa.n-bandii hai kaisaa terii mahfil me.n
yahaa.n to baat karne ko tarastii hai zabaa.n merii
uThaa.e kuchh varaq laale ne kuchh nargis ne kuchh gul ne
chaman me.n har taraf bikhrii hu.ii hai daastaa.n merii
u.Daa lii qumriyo.n ne tuutiyo.n ne andaliibo.n ne
chaman vaalo.n ne mil kar luuT lii tarz-e-fuGaa.n merii
Tapak ai sham.a aa.nsuu ban ke parvaane kii aa.nkho.n se
saraapaa dard huu.n hasrat bharii hai daastaa.n merii
ilaahii phir maza kyaa hai yahaa.n duniyaa me.n rahne kaa
hayaat-e-jaavedaa.n merii na marg-e-naa-gahaa.n merii
miraa ronaa nahii.n ronaa hai ye saare gulistaa.n kaa
vo gul huu.n mai.n KHizaa.n har gul kii hai goyaa KHizaa.n merii
darii.n hasrat saraa umriist afsuun-e-jaras daaram
z faiz-e-dil tapiidan-haa KHarosh-e-be-nafas daaram
riyaaz-e-dahr me.n naa-aashnaa-e-bazm-e-ishrat huu.n
KHushii rotii hai jis ko mai.n vo mahruum-e-masarrat huu.n
mirii big.Dii hu.ii taqdiir ko rotii hai goyaa.ii
mai.n harf-e-zer-e-lab sharminda-e-gosh-e-samaa.at huu.n
pareshaa.n huu.n mai.n musht-e-KHaak lekin kuchh nahii.n khultaa
sikandar huu.n ki aa.iina huu.n yaa gard-e-kuduurat huu.n
ye sab kuchh hai magar hastii mirii maqsad hai qudrat kaa
saraapaa nuur ho jis kii haqiiqat mai.n vo zulmat huu.n
KHaziina huu.n chhupaayaa mujh ko musht-e-KHaak-e-sahraa ne
kisii ko kyaa KHabar hai mai.n kahaa.n huu.n kis kii daulat huu.n
nazar merii nahii.n mamnuun-e-sair-e-arsa-e-hastii
mai.n vo chhoTii sii duniyaa huu.n ki aap apnii vilaayat huu.n
na sahbaa huu.n na saaqii huu.n na mastii huu.n na paimaana
mai.n is mai-KHaana-e-hastii me.n har shai kii haqiiqat huu.n
mujhe raaz-e-do-aalam dil kaa aa.iina dikhaataa hai
vahii kahtaa huu.n jo kuchh saamne aa.nkho.n ke aataa hai
ataa aisaa bayaa.n mujh ko hu.aa ra.ngii.n-bayaano.n me.n
ki baam-e-arsh ke taa.ir hai.n mere ham-zabaano.n me.n
asar ye bhii hai ik mere junuun-e-fitna-saamaa.n kaa
miraa aa.iina-e-dil hai qazaa ke raaz-daano.n me.n
rulaataa hai tiraa nazzaara ai hindostaa.n mujh ko
ki ibrat-KHez hai teraa fasaana sab fasaano.n me.n
diyaa ronaa mujhe aisaa ki sab kuchh de diyaa goyaa
likhaa kalk-e-azal ne mujh ko tere nauha-KHvaano.n me.n
nishaan-e-barg-e-gul tak bhii na chho.D us baaG me.n gulchii.n
tirii qismat se razm-aaraa.iyaa.n hai.n baaGbaano.n me.n
chhupaa kar aastii.n me.n bijliyaa.n rakkhii hai.n garduu.n ne
anaadil baaG ke Gaafil na baiThe.n aashiyaano.n me.n
sun ai Gaafil sadaa merii ye aisii chiiz hai jis ko
vaziifa jaan kar pa.Dhte hai.n taa.ir bostaano.n me.n
vatan kii fikr kar naadaa.n musiibat aane vaalii hai
tirii barbaadiyo.n ke mashvare hai.n aasmaano.n me.n
zaraa dekh us ko jo kuchh ho rahaa hai hone vaalaa hai
dharaa kyaa hai bhalaa ahd-e-kuhan kii daastaano.n me.n
ye KHaamoshii kahaa.n tak lazzat-e-fariyaad paidaa kar
zamii.n par tuu ho aur terii sadaa ho aasmaano.n me.n
na samjhoge to miT jaa.oge ai hindostaa.n vaalo
tumhaarii daastaa.n tak bhii na hogii daastaano.n me.n
yahii aa.iin-e-qudrat hai yahii usluub-e-fitrat hai
jo hai raah-e-amal me.n gaam-zan mahbuub-e-fitrat hai
huvaidaa aaj apne zaKHm-e-pinhaa.n kar ke chho.Duu.ngaa
lahuu ro ro ke mahfil ko gulistaa.n kar ke chho.Duu.ngaa
jalaanaa hai mujhe har sham-e-dil ko soz-e-pinhaa.n se
tirii taariik raato.n me.n charaaGaa.n kar ke chho.Duu.ngaa
magar Guncho.n kii suurat huu.n dil-e-dard-aashnaa paidaa
chaman me.n musht-e-KHaak apnii pareshaa.n kar ke chho.Duu.ngaa
pironaa ek hii tasbiih me.n in bikhre daano.n ko
jo mushkil hai to is mushkil ko aasaa.n kar ke chho.Duu.ngaa
mujhe ai ham-nashii.n rahne de shaGl-e-siina-kaavii me.n
ki mai.n daaG-e-mohabbat ko numaayaa.n kar ke chho.Duu.ngaa
dikhaa duu.ngaa jahaa.n ko jo mirii aa.nkho.n ne dekhaa hai
tujhe bhii suurat-e-aa.iina hairaa.n kar ke chho.Duu.ngaa
jo hai pardo.n me.n pinhaa.n chashm-e-biinaa dekh letii hai
zamaane kii tabii.at kaa taqaazaa dekh letii hai
kiyaa rif.at kii lazzat se na dil ko aashnaa tuu ne
gizaarii umr pastii me.n misaal-e-naqsh-e-paa tuu ne
rahaa dil-basta-e-mahfil magar apnii nigaaho.n ko
kiyaa bairuun-e-mahfil se na hairat-aashnaa tuu ne
fidaa kartaa rahaa dil ko hasiino.n kii adaa.o.n par
magar dekhii na us aa.iine me.n apnii adaa tuu ne
ta.assub chho.D naadaa.n dahr ke aa.iina-KHaane me.n
ye tasviire.n hai.n terii jin ko samjhaa hai buraa tuu ne
saraapaa naala-e-bedaad-e-soz-e-zindagii ho jaa
sapand-aasaa girah me.n baa.ndh rakkhii hai sadaa tuu ne
safaa-e-dil ko kyaa aaraa.ish-e-ra.ng-e-ta.alluq se
kaf-e-aa.iina par baa.ndhii hai o naadaa.n hinaa tuu ne
zamii.n kyaa aasmaa.n bhii terii kaj-biinii pe rotaa hai
Gazab hai satr-e-qur.aa.n ko chaliipaa kar diyaa tuu ne
zabaa.n se gar kiyaa tauhiid kaa daavaa to kyaa haasil
banaayaa hai but-e-pindaar ko apnaa KHudaa tuu ne
ku.e.n me.n tuu ne yuusuf ko jo dekhaa bhii to kyaa dekhaa
are Gaafil jo mutlaq thaa muqayyad kar diyaa tuu ne
havas baalaa-e-mimbar hai tujhe ra.ngii.n-bayaanii kii
nasiihat bhii tirii suurat hai ik afsaana-KHvaanii kii
dikhaa vo husn-e-aalam-soz apnii chashm-e-pur-nam ko
jo ta.Dpaataa hai parvaane ko rulvaataa hai shabnam ko
zaraa nazzaara hii ai bul-havas maqsad nahii.n us kaa
banaayaa hai kisii ne kuchh samajh kar chashm-e-aadam ko
agar dekhaa bhii us ne saare aalam ko to kyaa dekhaa
nazar aa.ii na kuchh apnii haqiiqat jaam se jam ko
shajar hai firqa-aaraa.ii ta.assub hai samar us kaa
ye vo phal hai ki jannat se nikalvaataa hai aadam ko
na uTThaa jazba-e-KHurshiid se ik barg-e-gul tak bhii
ye rif.at kii tamannaa hai ki le u.Dtii hai shabnam ko
phiraa karte nahii.n majruuh-e-ulfat fikr-e-darmaa.n me.n
ye zaKHmii aap kar lete hai.n paidaa apne marham ko
mohabbat ke sharar se dil saraapaa nuur hotaa hai
zaraa se biij se paidaa riyaaz-e-tuur hotaa hai
davaa har dukh kii hai majruuh-e-teG-e-aarzuu rahnaa
ilaaj-e-zaKHm hai aazaad-e-ehsaan-e-rafuu rahnaa
sharaab-e-be-KHudii se taa-falak parvaaz hai merii
shikast-e-ra.ng se siikhaa hai mai.n ne ban ke buu rahnaa
thame kyaa diida-e-giryaa.n vatan kii nauha-KHvaanii me.n
ibaadat chashm-e-shaa.ir kii hai har dam baa-vazuu rahnaa
banaa.e.n kyaa samajh kar shaaKH-e-gul par aashiyaa.n apnaa
chaman me.n aah kyaa rahnaa jo ho be-aabruu rahnaa
jo tuu samjhe to aazaadii hai poshiida mohabbat me.n
Gulaamii hai asiir-e-imtiyaaz-e-maa-o-tuu rahnaa
ye istiGnaa hai paanii me.n niguu.n rakhtaa hai saaGar ko
tujhe bhii chaahiye misl-e-habaab-e-aabjuu rahnaa
na rah apno.n se be-parvaa isii me.n KHair hai terii
agar manzuur hai duniyaa me.n o begaana-KHuu rahnaa
sharaab-e-ruuh-parvar hai mohabbat nau-e-insaa.n kii
sikhaayaa is ne mujh ko mast be-jaam-o-subuu rahnaa
mohabbat hii se paa.ii hai shifaa biimaar qaumo.n ne
kiyaa hai apne baKHt-e-KHufta ko bedaar qaumo.n ne
bayaabaan-e-mohabbat dasht-e-Gurbat bhii vatan bhii hai
ye viiraana qafas bhii aashiyaana bhii chaman bhii hai
mohabbat hii vo manzil hai ki manzil bhii hai sahraa bhii
jaras bhii kaarvaa.n bhii raahbar bhii raahzan bhii hai
maraz kahte hai.n sab is ko ye hai lekin maraz aisaa
chhupaa jis me.n ilaaj-e-gardish-e-charKH-e-kuhan bhii hai
jalaanaa dil kaa hai goyaa saraapaa nuur ho jaanaa
ye parvaana jo sozaa.n ho to sham-e-anjuman bhii hai
vahii ik husn hai lekin nazar aataa hai har shai me.n
ye shiirii.n bhii hai goyaa be-sutuu.n bhii kohkan bhii hai
ujaa.Daa hai tamiiz-e-millat-o-aa.ii.n ne qaumo.n ko
mire ahl-e-vatan ke dil me.n kuchh fikr-e-vatan bhii hai
sukuut-aamoz tuul-e-daastaan-e-dard hai varna
zabaa.n bhii hai hamaare mu.nh me.n aur taab-e-suKHan bhii hai
namii-gardiid ko tah rishta-e-ma.anii rihaa kardam
hikaayat buud be-paayaa.n ba-KHaamoshii adaa kardam

Allama Iqbal
Nazm

KHak-e-hind

ab tak vahii ka.Dak hai bijlii kii baadalo.n me.n
pastii sii aa ga.ii hai par dil ke hauslo.n me.n

Chakbast Braj Narayan
Nazm

dar-ul-makafat

hai duniyaa jis kaa naa.nv miyaa.n ye aur tarah kii bastii hai
jo ma.nhgo.n ko ye mah.ngii hai aur sasto.n ko ye sastii hai
yaa.n har-dam jhag.De uThte hai.n har-aan adaalat bastii hai
gar mast kare to mastii hai aur past kare to pastii hai
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai
jo aur kisii kaa maan rakhe to us ko bhii armaan mile
jo paan khilaa de paan mile jo roTii de to naan mile
nuqsaan kare nuqsaan mile ehsaan kare ehsaan mile
jo jaisaa jis ke saath kare phir vaisaa us ko aan mile
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai
jo aur kisii kii jaa.n baKHshe to us kii bhii haq jaan rakhe
jo aur kisii kii aan rakhe to us kii bhii haq aan rakhe
jo yaa.n kaa rahne vaalaa hai ye dil me.n apne jaan rakhe
ye turat-phirat kaa naqsha hai is naqshe ko pahchaan rakhe
kuchh der nahii.n andher nahii.n insaaf aur adl parastii hai
is haath karo us haath mile yaa.n saudaa dast-ba-dastii hai
jo paar utaare auro.n ko us kii bhii paar utarnii hai
jo Garq kare phir us ko bhii Dubko.n Dubko.n karnii hai
shamshiir tabar banduuq sinaa.n aur nashtar tiir nahrnii hai
yaa.n jaisii jaisii karnii hai phir vaisii vaisii bharnii hai
kuchh der nahii.n andher nahii.n insaaf aur adl-parastii hai
is haath karo is haath mile yaa.n saudaa dast-ba-dastii hai
jo uupar uu.nchaa bol kare to us kaa bol bhii baalaa hai
aur de paTke to us ko bhii ko.ii aur paTakne vaalaa hai
be-zulm-o-KHataa jis zaalim ne mazluum zabah kar Daalaa hai
us zaalim ke bhii lohuu kaa phir bahtaa naddii-naalaa hai
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai
jo misrii aur ke mu.nh me.n de phir vo bhii shakkar khaataa hai
jo aur ta.ii.n ab Takkar de phir vo bhii Takkar khaataa hai
jo aur ko Daale chakkar me.n phir vo bhii chakkar khaataa hai
jo aur ko Thokar maar chale phir vo bhii Thokar khaataa hai
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai
jo aur kisii ko naahaq me.n ko.ii jhuuTii baat lagaataa hai
aur ko.ii Gariib aur bechaara haq naa-haq me.n luT jaataa hai
vo aap bhii luuTaa jaataa hai aur laaThii-paaThii khaataa hai
jo jaisaa jaisaa kartaa hai phir vaisaa vaisaa paataa hai
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai
jo aur kii pag.Dii le bhaage us kaa bhii or uchakkaa hai
jo aur pe chaukii biThlaave us par bhii dho.ns-dha.Dakkaa hai
yaa.n pushtii me.n to pushtii hai aur dhakke me.n yaa.n dhakkaa hai
kyaa zor maze kaa jamghaT hai kyaa zor ye bhii.D-bha.Dakkaa hai
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai
hai khaTkaa us ke haath lagaa jo aur kisii ko de khaTkaa
aur Gaib se jhaTkaa khaataa hai jo aur kisii ke de jhaTkaa
chiire ke biich me.n chiiraa hai aur paTke biich jo hai paTkaa
kyaa kahiye aur 'naziir' aage hai zor tamaashaa jhaT-paTkaa
kuchh der nahii.n andher nahii.n insaaf aur adl-parastii hai
is haath karo us haath mile yaa.n saudaa dast-ba-dastii hai

Nazeer Akbarabadi
Nazm

bhaarat ke saputon se KHitab

bhaarat ke ai sapuuto himmat dikhaa.e jaa.o
duniyaa ke dil pe apnaa sikka biThaa.e jaa.o
murda-dilii kaa jhanDaa phe.nko zamiin par tum
zinda-dilii kaa har-suu parcham u.Daa.e jaa.o
laa.o na bhuul kar bhii dil me.n KHayaal-e-pastii
KHush-haalii-e-vatan kaa be.Daa uThaa.e jaa.o
tan-man miTaa.e jaa.o tum naam-e-qaumiyat par
raah-e-vatan me.n apnii jaane.n la.Daa.e jaa.o
kam-himmatii kaa dil se naam-o-nishaa.n miTaa do
jur.at kaa lauh-e-dil par naqsha jamaa.e jaa.o
ai hinduu.o musalmaa.n aapas me.n in dino.n tum
nafrat ghaTaa.e jaa.o ulfat ba.Dhaa.e jaa.o
'bikram' kii raaj-niitii 'akbar' kii policy kii
saare jahaa.n ke dil par azmat biThaa.e jaa.o
jis kashmakash ne tum ko hai is qadar miTaayaa
tum se ho jis qadar tum us ko miTaa.e jaa.o
jin KHaana-ja.ngiyo.n ne ye din tumhe.n dikhaa.e
ab un kii yaad apne dil me.n bhulaa.e jaa.o
be-KHauf gaa.e jaa.o ''hindostaa.n hamaaraa''
aur ''vande-maataram'' ke na.are lagaa.e jaa.o
jin desh sevako.n se haasil hai faiz tum ko
in desh sevako.n kii jai jai manaa.e jaa.o
jis mulk kaa ho khaate din raat aab-o-daana
us malak par saro.n kii bhe.nTe.n cha.Dhaa.e jaa.o
phaa.nsii kaa jail kaa Dar dil se 'falak' miTaa kar
Gairo.n ke mu.nh pe sachchii baate.n sunaate jaa.o

Lal Chand Falak
Nazm

KHwab-e-sahar

mahr sadiyo.n se chamaktaa hii rahaa aflaak par
raat hii taarii rahii insaan ke idraak par
aql ke maidaan me.n zulmat kaa Deraa hii rahaa
dil me.n taariikii dimaaGo.n me.n a.ndheraa hii rahaa
ik na ik maz.hab kii sa.ii-e-KHaam bhii hotii rahii
ahl-e-dil par baarish-e-ilhaam bhii hotii rahii
aasmaano.n se farishte bhii utarte hii rahe
nek bande bhii KHudaa kaa kaam karte hii rahe
ibn-e-maryam bhii uThe muusii-e-imraa.n bhii uThe
raam o gautam bhii uThe fir.aun o haamaa.n bhii uThe
ahl-e-saif uThte rahe ahl-e-kitaab aate rahe
ii.n janaab uThte aur aa.n-janaab aate rahe
hukmaraa.n dil par rahe sadiyo.n talak asnaam bhii
abr-e-rahmat ban ke chhaayaa dahr par islaam bhii
masjido.n me.n maulvii KHutbe sunaate hii rahe
mandiro.n me.n barhaman ashlok gaate hii rahe
aadmii minnat-kash-e-arbaab-e-irfaa.n hii rahaa
dard-e-insaanii magar mahruum-e-darmaa.n hii rahaa
ik na ik dar par jabiin-e-shauq ghistii hii rahii
aadamiyyat zulm kii chakkii me.n pastii hii rahii
rahbarii jaarii rahii paiGambarii jaarii rahii
diin ke parde me.n ja.ng-e-zargarii jaarii rahii
ahl-e-baatin ilm se siino.n ko garmaate rahe
jahl ke taariik saa.e haath phailaate rahe
ye musalsal aafate.n ye yorish ye qatl-e-aam
aadmii kab tak rahe auhaam-e-baatil kaa Gulaam
zehan-e-insaanii ne ab auhaam ke zulmaat me.n
zindagii kii saKHt tuufaanii a.ndherii raat me.n
kuchh nahii.n to kam se kam KHvaab-e-sahar dekhaa to hai
jis taraf dekhaa na thaa ab tak udhar dekhaa to hai

Asrarul Haq Majaz
Nazm

tawaif

apnii fitrat kii bulandii pe mujhe naaz hai kab
haa.n tirii past-nigaahii se gila hai mujh ko
tuu giraa degii mujhe apnii nazar se varna
tere qadmo.n pe to sajda bhii ravaa hai mujh ko

Moin Ahsan Jazbi
Nazm

mahatma-gandhi ka qatl

pastii-e-siyaasat ko tuu ne apne qaamat se rif.at dii
iimaa.n kii ta.ng-KHayaalii ko insaa.n ke Gam kii vus.at dii

Anand Narayan Mulla
Nazm

bhaarat ke musalman

'bastaamii'-o-'basarii'-o-'mu.arraa'-o-'Gazaalii'
jis ilm kii jis faqr kii duniyaa ke the vaalii
hairat hai tuu ab hai usii duniyaa me.n savaalii
hai gosha-e-pastii me.n tirii himmat-e-aalii

Jagan Nath Azad
Nazm

pand-nama

ai majaaz ai taraana-baar majaaz
zinda paiGambar-e-bahaar majaaz
ai baruu-e-saman-vishaa.n gul-posh
ai ba kuu-e-muGaa.n tamaam KHarosh
ai parastaar-e-mah-ruKHaan-e-jahaa.n
ai kamaa.n-daar-e-shaa.iraan-e-javaa.n
tujh se taabaa.n jabiin-e-mustaqbil
ai mire siina-e-umiid ke dil
ai majaaz ai mubassir-e-KHad-o-KHaal
ai shu.uur-e-jamaal o sham-e-KHayaal
ai surayyaa-fareb o zohra-navaaz
shaa.ir-e-mast o rind-e-shaahid-baaz
naaqid-e-ishva-e-shabaab hai tuu
sub.h-e-fardaa kaa aaftaab hai tuu
tujh ko aayaa huu.n aaj samjhaane
haif hai tuu agar buraa maane
KHud ko Garq-e-sharaab-e-naab na kar
dekh apne ko yuu.n KHaraab na kar
shaa.irii ko tirii zaruurat hai
daur-e-fardaa kii tuu amaanat hai
sirf terii bhalaa.ii ko ai jaa.n
ban ke aayaa huu.n naaseh-e-naadaa.n
ek Thahraav ik takaan hai tuu
dekh kis darja dhaan-paan hai tuu
na.ng hai mahz ustuKHaa.n honaa
saKHt ihaanat hai naa-tavaa.n honaa
ustuKHvaanii badan duKHaanii post
ek sa.ngiin jurm hai ai dost
sharm kii baat hai vajuud-e-saqiim
naa-tavaanii hai ik gunaah-e-aziim
jism aur ilm turfa taaqat hai
yahii insaan kii nubuvvat hai
jo za.iif-o-aliil hotaa hai
ishq me.n bhii zaliil hotaa hai
har hunar ko jo ek daulat hai
ilm aur jism kii zaruurat hai
kasrat-e-baada rang laatii hai
aadmii ko lahuu rulaatii hai
KHush-dilo.n ko rulaa ke ha.nstii hai
sham-e-aKHtar bujhaa ke ha.nstii hai
aur jab aafat jigar pe laatii hai
ri.nd ko maulvii banaatii hai
mai se hotaa hai maqsad-e-dil faut
mai hai buniyaad-e-maulviyyat-o-maut
kaan me.n sun ye baat hai nashtar
maulviyyat hai maut se bad-tar
is se hotaa hai kaar-e-umr tamaam
is se hotaa hai aql ko sarsaam
is me.n insaa.n kii jaan jaatii hai
is me.n shaa.ir kii aan jaatii hai
ye zamiin aasmaan kyaa shai hai
aan jaa.e to jaan kyaa shai hai
gauhar-e-shaah-vaar chun pyaare
mujh se ik gur kii baat sun pyaare
Gam to bantaa hai chaar din me.n nashaat
shaadmaanii se rah bahut mohtaat
Gam ke maare to jii rahe hai.n hazaar
nahii.n bachte hai.n aish ke biimaar
aan me.n dil ke paar hotii hai
pa.nkhu.Dii me.n vo dhaar hotii hai
juu-e-ishrat me.n Gam ke dhaare hai.n
yaKH-o-shabnam me.n bhii sharaare hai.n
haa.n sambhal kar lataafato.n ko barat
TuuT jaa.e kahii.n na ko.ii parat
dekh kar shiisha-e-nashaat uThaa
ye varaq hai varaq hai sone kaa
kaaGaz-e-baad ye nagiina hai
balki ai dost aabgiina hai
saaGar-e-shabnam-e-KHush-aab hai ye
aabgiina nahii.n habaab hai ye
rok le saa.ns jo qariib aa.e
Thes us ko kahii.n na lag jaa.e
teG-e-mastii ko ehtiyaat se chhuu
varna Tapkegaa u.ngliyo.n se lahuu
mastiyo.n me.n hai taab-e-jalva-e-maah
aur siyah mastiyaa.n KHudaa kii panaah
KHuub hai ek had pe qaa.em nasha
halkaa phulkaa subuk mulaa.em nasha
haa.n adab se uThaa adab se jaam
taaki aab-e-halaal ho na haraam
jaam par jaam jo cha.Dhaate hai.n
uu.nT kii tarah bilbilaate hai.n
zindagii kii havas me.n marte hai.n
mai ko rusvaa-e-dahr karte hai.n
yaad hai jab 'jigar' cha.Dhaate the
kyaa alif ho ke hin-hinaate the
merii gardan me.n bhar ke chand aahe.n
paa.nv se Daalte the vo baa.nhe.n
aql kii maut ilm kii pastii
al-amaa.n la.anat-e-siyah mastii
uf ghaTaa-Top nashshe kaa tuufaan
bhuut ifriit dev jin shaitaan
laat ghuu.nsa chha.Dii chhurii chaaquu
lib-libaahaT lu.aab kaf badbuu
tanz aavaaza barhamii ifsaad
ta.an tashnii.a maz.haka iiraad
shor huu-haq abe-tabe hai hai
aukhiyaa.n gaaliyaa.n dhamaake qai
mas-masaahaT Gashii tapish chakkar
soz sailaab sansanii sarsar
chal-chaKHe chiiKH chunaa.n-chunii.n chi.nghaa.D
chaKH-chaKHe chaa.uu.n chaa.uu.n chiil-chilhaa.D
lappaa-Dukki lataam laam la.Daa.ii
haul haijaan haa.nk haathaa-paa.ii
khalbalii kaa.o.n kaa.o.n khaT-manDal
hau.nk ha.ngaama hamhama halchal
uljhan aavaargii udham aiThan
bhau.nk bhau.n bhau.n bhinan bhinan bhan-bhan
dhaul-dhappaa dhaka.D-paka.D dhutkaar
tahlka tuu ta.Daaq tuf takraar
buu bhabhak bhay bikas barar bhau.nchaal
dabdabe dandanaahaTe.n dhammaal
gaah narmii o lutf o mehr o salaam
gaah talKHii o turshii o dushnaam
aql kii maut ilm kii pastii
al-amaa.n la.anat-e-siyah mastii
sirf nashshe kii bhiigne de mase.n
in ko ban.ne na de kabhii mo.nchhe.n
al-amaa.n KHaufnaak kaalaa nasha
oh riish-o-buruut vaalaa nasha
azhdar-e-marg o dev-e-KHuu.n-KHvaarii
al-amaa.n nashsha-e-''jaTaadhaarii''
nashshe kaa jhuT-puTaa hai nuur-e-hayaat
jhuTpuTe ko banaa na kaalii raat
nashshe kii tez raushnii bhii Galat
chaudhvii.n kii sii chaa.ndnii bhii Galat
zehn-e-insaa.n ko baKHshtaa hai jamaal
nashsha ho jab ye qadr-e-nuur-e-hilaal
Gurfa-e-aql bhe.D to akasr
par use kach-kachaa ke band na kar
raat ko lutf-e-jaam hai pyaare
din kaa piinaa haraam hai pyaare
din hai ifriit-e-aaz kii khankaar
raat paazeb naazukii jhankaar
din hai KHaashaak KHaak dhuul dhu.aa.n
raat aa.iina anjuman afshaa.n
din musallah davaa.n kamar basta
raat taaq-o-ravaaq-o-gul-dasta
din hai faulaad-e-sa.ng teG-e-alam
raat kam-KHvaab pa.nkhu.Dii shabnam
din hai shevan duhaa.iyaa.n dukh.De
raat mast a.nkh.Diyaa.n javaa.n mukh.De
din ka.Dii dhuup kii bad-aaha.ngii
raat pichhle pahar kii saara.ngii
din bahaadur kaa baan biir kii rath
raat champaa-kalii a.nguuThii nath
din hai tuufaan-e-jumbish-o-raftaar
raat miizaan-e-kaakul-o-ruKHsaar
aaftaab-o-sharaab hai.n bairii
botale.n din ko hai.n pachhal pairii
kar na paamaal hurmat-e-auqaat
raat ko din banaa na din ko raat
pii magar sirf shaam ke ha.ngaam
aur vo bhii ba-qadr-e-yak-do jaam
vahii insaa.n hai KHurram-o-KHursand
jo hai miqdaar o vaqt kaa paaband
mere piine hii par na jaa mirii jaa.n
mujh se jiinaa bhii siikh hai.n qurbaa.n
us ke piine me.n rang aataa hai
jis ko jiine kaa Dha.ng aataa hai
ye nasaa.eh bahut hai.n besh-bahaa
jald so jald jaag jald nahaa
baaG me.n jaa tuluu.a se pahle
taa nigaar-e-sahar se dil bahle
sarv-o-shamshaad ko gale se lagaa
har chaman-zaad ko gale se lagaa
mu.nh a.ndhere fazaa-e-gulshan dekh
saahil o sabza-zaar o sausan dekh
gaah aavaara abr-paare dekh
in kii raftaar me.n sitaare dekh
jaise kohre me.n taab-e-ruu-e-nikuu
jaise jangal me.n raat ko jugnuu
gul kaa mu.nh chuum ik tarannum se
nahr ko gudgudaa tabassum se
jism ko kar araq se nam-aaluud
taaki shabnam pa.Dhe lahak ke daruud
phe.nk sanjiidgii kaa sar se baar
naach uchhal dandanaa chhalaa.nge.n maar
dekh aab-e-ravaa.n kaa aa.iina
dau.D saahil pe taan kar siina
mast chi.Diyo.n kaa chahchahaanaa sun
mauj-e-nau-mashq kaa taraana sun
bostaa.n me.n sabaa kaa chalnaa dekh
sabza o sarv kaa machalnaa dekh
shabnam-aaluud kar suKHan kaa libaas
chakh dhundalke me.n buu-e-gul kii miThaas
shaa.irii ko khilaa havaa-e-sahar
is kaa nafqa hai terii gardan par
raqs kii lahr me.n ho gum lab-e-nahr
yuu.n adaa kar uruus-e-sher kaa mahr
jazb kar bostaa.n ke naqsh-o-nigaar
zehan me.n khol misr kaa baazaar
narm jho.nko.n kaa aab-e-haivaa.n pii
buu-e-gul ra.ng-e-shabnamistaa.n pii
gun-gunaa kar nazar uThaa kar pii
sub.h kaa shiir daGdaGa kar pii
taaki mujre ko aa.e.n kul barkaat
daulat jism o ilm o aql o hayaat
ye na ta.ana na ye ulahnaa hai
ek nukta bas aur kahnaa hai
Gaibat-e-nuur ho ki kasrat-e-nuur
zulmat-e-taam ho ki sho.ala-e-tuur
ek saa hai vabaal dono.n kaa
tiirgii hai ma.aal dono.n kaa
darKHur-e-saahab-e-ma.aal nahii.n
har vo shai jis me.n e'tidaal nahii.n
shaadmaanii se pii nahii.n saktaa
jis ko haukaa ho jii nahii.n saktaa
ai pisar ai baraadar ai hamraaz
ban na is tarah duur kii aavaaz
ko.ii biimaar tan nahii.n saktaa
KHaadim-e-KHalq ban nahii.n saktaa
KHidmat-e-KHalq farz hai tujh par
daur-e-maazii kaa qarz hai tujh par
asr-e-haazir ke shaa.ir-e-KHuddaar
qarz-daarii kii maut se hoshyaar
zehn-e-insaaniyat ubhaar ke jaa
zindagaanii kaa qarz utaar ke jaa
tujh pe hindostaan naaz kare
umr terii KHudaa daraaz kare

Josh Malihabadi
Nazm

chhabbis january

bhaarat kii bartarii me.n kis ko kalaam hai ab
thaa jo rahiin-e-pastii garduu.n-maqaam hai ab
jamhuuriyat pe qaa.em saaraa nizaam hai ab
aalaa hai yaa hai adnaa baa-ehtiraam hai ab
roz-e-sa.iid aayaa chhabbiis january kaa
daur-e-jadiid laayaa bhaarat kii bartarii kaa

Tilok Chand Mahroom
Nazm

tanhai

is pe kuchh buzurgo.n kii
mujrimaana KHaamoshii
laa.eq-e-nazaara hai
rif.ato.n kii pastii bhii

Rahi Masoom Raza
Nazm

ilm ki zarurat

jahaa.n me.n har taraf hai ilm hii kii garm-baazaarii
zamii.n se aasmaa.n tak bas isii kaa faiz hai jaarii
yahii sar-chashma-e-aslii hai tahziib-o-tamaddun kaa
baGair is ke bashar honaa bhii hai ik saKHt biimaarii
banaataa hai yahii insaan ko kaamil-tariin insaa.n
sikhaataa hai yahii aKHlaaq o iisaar o ravaa-daarii
yahii qaumo.n ko pahu.nchaataa hai baam-e-auj-o-rif.at par
yahii mulko.n ke andar phuu.nktaa hai ruuh-e-bedaarii
isii ke naam kaa chaltaa hai sikka saare aalam me.n
isii ke sar pe rahtaa hai hamesha taaj-e-sardaarii
isii ke sab karishme ye nazar aate hai.n duniyaa me.n
isii ke dam se raunaq aalam-e-imkaa.n kii hai saarii
ye laa-silkii, ye telephone ye raile.n, ye tayyaare
ye zer-e-aab o baalaa-e-falak insaa.n kii tarraarii
huduud-e-istavaa qutbain se yuu.n ho ga.e mudGam
ki hai ab rub.a masko.n jaise ghar kii chaar-diivaarii
samundar ho ga.e paayaab sahraa bin ga.e gulshan
kiyaa science ne bhii e.ataraaf-e-ijz-o-naachaarii
buKHaar o barq kaa jarraar lashkar hai ab aamaada
ugalvaa le zamiin o aasmaa.n kii daulate.n saarii
Garaz chaaro.n taraf ab ilm hii kii baadshaahii hai
ki us ke baazuu.o.n me.n quvvat-e-dast-e-ilaahii hai
nigaah-e-Gaur se dekho agar haalaat-e-insaanii
to ho saktaa hai hal ye uqda-e-mushkil ba-aasaanii
vahii qaume.n taraqqii ke madaarij par hai.n faa.eq-tar
ki hai jin me.n tamaddun aur siyaasat kii faraavaanii
isii ke zo.am me.n hai germany charKH-e-tafaaKHur par
isii ke zor par mirriiKH kaa ham-sar hai jaapaanii
isii kii quvvat-e-baazuu pe hai maGruur america
isii ke bil par la.Dkii ho rahii hai rustam-e-saanii
ishaare par isii ke naql-o-harakat hai sab italy kii
isii ke taaba-e-farmaan hai.n ruusii o iiraanii
isii ke jumbish-e-abruu pe hai england kaa Garra
isii ke hai.n sab aavurde francisi o albaanii
ko.ii mulk ab nahii.n jin me.n ye jauhar ho na raKHshanda
na Gaafil is se chiinii hai.n na shaamii hai.n na afGaanii
baGair is ke jo rahnaa chaahte hai.n is zamaane me.n
samajh rakkhe.n fanaa un ke liye hai hukm-e-rabbaanii
zamaana phe.nk degaa KHud unhe.n qa.ar-e-halaakat me.n
vo apne haath se ho.nge KHud apnii qabr ke baanii
zamaane me.n jise ho saahib-e-fat.h-o-zafar honaa
zaruurii hai use ilm-o-hunar se bahra-var honaa
taraqqii kii khulii hai.n shaahraahe.n dahr me.n har suu
nazar aataa hai tahziib-o-tamaddun se jahaa.n mamluu
chale jaate hai.n u.Dte shahsavaaraan-e-falak-paimaa
KHiraaj-e-tahniyat lete hu.e karte hu.e jaaduu
guzarte jaa rahe hai.n duusro.n ko chho.Dte piichhe
kabhii hotaa hai sahraa mustaqar un kaa kabhii Taapu
kamar baa.ndhe hu.e din raat chalne par hai.n aamaada
dimaaG afkaar se aur dil vufuur-e-shauq se maluul
alag rah kar KHayaal-e-zahmat o ehsaas-e-raahat se
lage hai.n apnii apnii fikr me.n baa-KHaatir-e-yaksuu
magar ham hai.n ki aslan his nahii.n ham ko ko.ii is kii
hamaare paa-e-himmat in maraahil me.n hai.n be-qaabuu
jahaa.n pahlaa qadam rakkhaa thaa roz-e-avvalii.n ham ne
nahii.n sarke is apne aslii markaz se ba-qadr-e-muu
ye haalat hai ki ham par band hai har ek darvaaza
nazar aataa nahii.n hargiz ko.ii ummiid kaa pahluu
magar vaa-hasrataa phir bhii ham apne zo.am-e-baatil me.n
samajhte hai.n zamaane bhar se aage KHud ko manzil me.n
zaruurat hai ki ham me.n raushnii ho ilm kii paidaa
nazar aa.e hame.n bhii taaki asl-e-haalat-e-duniyaa
hame.n ma.aluum ho haalaat ab kyaa hai.n zamaane ke
hamaare saath kaa jo qaafila thaa vo kahaa.n pahu.nchaa
jo pastii me.n the ab vo jalva-gar hai.n baam-e-rif.at par
jo baalak be-nishaa.n the aaj hai in kaa alam barpaa
hamaarii KHuubiyaa.n sab duusro.n ne chhiin lii.n ham se
zamaane ne hame.n itnaa jhi.njho.Daa kar diyaa na.ngaa
ravaa-daarii, uKHuvvat, dostii, iisaar, hamdardii
KHayaal-e-mulk-o-millat dard-e-qaum, andesha-e-fardaa
ye sab jauhar hamaare the kabhii ai vaa.e-mahruumii
bane hai.n KHuubii-e-qismat se jo ab Gair kaa hissaa
agar ho jaa.e.n raaGib ab bhii ham ta.aliim kii jaanib
to kar sakte hai.n ab bhii mulk me.n ham zindagii paidaa
bahut kuchh vaqt ham ne kho diyaa hai lekin is par bhii
agar chaahe.n to kar de.n pesh-rau ko apne ham paspaa
nikammaa kar diyaa hai kaahilii ne go hame.n lekin
rago.n me.n hai hamaarii KHuun abhii tak dau.Dtaa phirtaa
ko.ii maKHfii haraarat gar hamaare dil ko garmaa de
hamaare jism me.n phir zindagii kii ruuh dau.Daa de
vatan vaalo bahut Gaafil rahe ab hosh me.n aa.o
uTho be-daar ho aql-o-KHirad ko kaam me.n laa.o
tumhaare qaum ke bachcho.n me.n hai ta.aliim kaa fuqdaa.n
ye gutthii saKHt pechiida hai is ko jald suljhaa.o
yahii bachche bil-aaKHir tum sabho.n ke jaa-nashii.n ho.nge
tum apne saamne jaisaa unhe.n chaaho banaa jaa.o
bahut hii ra.nj-dah ho jaa.egii us vaqt kii Gaflat
kahii.n aisaa na ho mauqa.a nikal jaane pe pachhtaa.o
ye hai kaar-e-aham do chaar is ko kar nahii.n sakte
KHudaa-raa tum bhii apne farz kaa ehsaas farmaa.o
ye bojh aisaa nahii.n jis ko uThaa le.n chaar chhe mil kar
sahaaraa do, sahaaraa duusro.n se is me.n dilvaa.o
jo zii-ehsaas hai.n haasil karo tum KHidmate.n un kii
jo zii-parvaa hai.n un ko jis tarah ho us taraf laa.o
Garaz jaise bhii ho jis shakl se bhii ho ye laazim hai
tum apne qaum ke bachcho.n ko ab ta.aliim dilvaa.o
agar tum musta.iddii ko banaa loge shi.aar apnaa
yaqii.n jaano ki mustaqbil hai behad shaandaar apnaa
KHudaavandaa! du.aa.o.n me.n hamaarii ho asar paidaa
shab-e-Gaflat hamaarii phir kare nuur-e-sahar paidaa
hamaare saare KHvaabiida qavaa be-daar ho jaa.e.n
sar-e-nau ho phir in me.n zindagii kii karr-o-farr paidaa
hame.n ehsaas ho ham kaun the aur aaj ham kyaa hai.n
kare.n maahaul-e-mulkii ke liye gahrii nazar paidaa
milaa rakkhaa hai apne jauhar-e-kaamil ko miTTii me.n
ham ab bhii KHaak se kar sakte hai.n la.al-o-guhar paidaa
agar chaahe.n to ham mushkil vatan kii dam me.n hal kar de.n
hazaaro.n suurate.n kar sakte hai.n ham kaargar paidaa
ba-zaahir go ham ik tuuda hai.n bilkul raakh kaa lekin
agar chaahe.n to KHaakistar se kar de.n sau sharar paidaa
vatan kaa nakbat o aflaas kho de.n ham ishaare me.n
jahaa.n Thokar lagaa de.n ho vahii.n se kaan-e-zar paidaa
ham is manzil ke aaKHir par pahu.nch kar bil-yaqii.n dam le.n
agar kuchh taaza-dam ho jaa.e.n apne ham-safar paidaa
jo koshish muttahid ho kar kahii.n ik baar ho jaa.e
yaqii.n hai mulk kii qismat kaa be.Daa paar ho jaa.e

Ahmaq Phaphoondvi
Nazm

meri shaeri

mirii shaa.erii KHaar-zaaro.n kii duniyaa
tahii-dastii o pastii o KHasta-haalii
baguulo.n se ma.amuur phuulo.n se KHaalii
vo besha ki hai mazra-e-KHushk-saalii
jahaa.n abr bhuulaa hai dariyaa-navaalii
na bhuulii use bhii mirii fikr-e-aalii
mirii shaa.erii KHaarzaaro.n kii duniyaa

Hafeez Jalandhari
Nazm

ek shaera ki shadi par

ai ki thaa uns tujhe ishq ke afsaano.n se
zindagaanii tirii aabaad thii ruumaano.n se
sher kii god me.n paltii thii javaanii terii
tere shero.n se ubaltii thii javaanii terii
rashk-e-firdaus thaa har husn bharaa KHvaab tiraa
ek paamaal khilaunaa thaa ye mahtaab tiraa
nik.hat-e-sher se mahkii hu.ii rahtii thii sadaa
nashshaa-e-fikr me.n bahkii hu.ii rahtii thii sadaa
shirkat-e-Gair se begaana the naGme tere
ismat-e-huur kaa afsaana the naGme tere
sher kii KHalvat-e-ra.ngii.n thii parii-KHaana tiraa
mast KHvaabo.n ke jaziiro.n me.n thaa kaashaana tiraa
Gaa.eb-az-chashm thii jannat kii bahaaro.n kii tarah
dast-e-insaa.n se thii mahfuuz sitaaro.n kii tarah
sohbat-e-Gair se ghabraatii thii tanhaa.ii tirii
aa.ii.ne se bhii to sharmaatii thii tanhaa.ii tirii
sub.h kii tarah se doshiiza thii hastii terii
buu-e-gul kii tarah paakiiza thii hastii terii
naGma-o-sher ke firdaus me.n tuu rahtii thii
yaksar ilhaam o tarannum thaa jo tuu kahtii thii
tere ash.aar the jannat kii bahaaro.n ke hujuum
tere afkaar the zarriin sitaaro.n ke hujuum
dard-e-sherii ke ta.assur se to maGmuum thii tuu
aasmaa.n kaa magar ik Guncha-e-ma.asuum thii tuu
mauj-e-kausar kaa chhalaktaa hu.aa paimaana thii
Gair ho.nTo.n ke tasavvur se bhii begaana thii

Akhtar Shirani
Nazm

piye ja

sharaab-KHaana hai bazm-e-hastii
har ek hai mahv-e-aish-o-mastii
ma.aal-biinii o mai-parastii
are ye zillat are ye pastii
shi.aar-e-rindaana kar piye jaa
agar ko.ii tujh ko Toktaa hai
sharaab piine se roktaa hai
samajh ise hosh me.n nahii.n hai
KHirad ke aaGosh me.n nahii.n hai
tuu is se jhag.Daa na kar piye jaa
KHayaal-e-roz-e-hisaab kaisaa
savaab kaisaa azaab kaisaa
bahisht o dozaKH ke ye fasaane
KHudaa kii baate.n KHudaa hii jaane
fuzuul sochaa na kar piye jaa
nahii.n jahaa.n me.n mudaam rahnaa
to kis liye tishna-kaam rahnaa
uThaa uThaa haa.n uThaa subuu ko
tamaam duniyaa kii haa.o huu ko
Gariiq-e-paimaana kar piye jaa
kisii se takraar kyaa zaruurat
fuzuul israar kyaa zaruurat
ko.ii piye to use pilaa de
agar na maane to muskuraa de
malaal-e-aslaa na kar piye jaa
tujhe samajhte hai.n ahl-e-duniyaa
KHaraab KHasta zaliil rusvaa
nahii.n ayaa.n un pe haal teraa
ko.ii nahii.n ham-KHayaal teraa
kisii kii parvaa na kar piye jaa
ye tujh par aavaaze kasne vaale
tamaam hai.n mere dekhe bhaale
nahii.n mazaaq un ko mai-kashii kaa
ye KHuun piite hai.n aadmii kaa
tuu un kaa shikvaa na kar piye jaa

Hafeez Jalandhari
Nazm

dilli ki ek sham

dhu.ndh hai zehn me.n
pastii kaa mujassam hai badan
ko.ii aavaaz-e-nihaa.n
mujh se dobaaraa na kahe
jaag kar bhii na uThe bistar-e-duniyaa se kyo.n
tum ma.aanii ke musaafir the
musaafir hii to the

Akash Arsh
Nazm

ai subh-e-watan

phir lauT ke aayaa sadiyo.n me.n iqbaal-o-tarab kaa sayyaara
kirno.n me.n ufuq par phir chamkaa pastii ke a.ndhero.n kaa maaraa

Saghar Nizami
Nazm

ek husn-farosh laDki ke nam

mirii jaa.n go tujhe dil se bhulaayaa jaa nahii.n saktaa
magar ye baat mai.n apnii zabaa.n par laa nahii.n saktaa
mai.n tujh ko chaahtaa huu.n vaalihaana pyaar kartaa huu.n
mai.n gaataa rahtaa huu.n par ye naGma gaa nahii.n saktaa
tujhe apnaa banaanaa maujib-e-raahat samajh kar bhii
tujhe apnaa banaa luu.n ye samajh me.n aa nahii.n saktaa
banaa saktaa huu.n shab ko apne bistar kii tujhe ziinat
magar din me.n tire qasr-e-hasii.n tak jaa nahii.n saktaa
hu.aa hai baar-haa ehsaas mujh ko is haqiiqat kaa
tire nazdiik rah kar bhii mai.n tujh ko paa nahii.n saktaa
mire dast-e-havas kii dastaras hai jism tak tere
mai.n terii ruuh kii gahraa.iyo.n tak jaa nahii.n saktaa
mai.n tere ras-bhare ho.nTo.n ko pyaarii chuum saktaa huu.n
magar mai.n tere dil par aah qabza paa nahii.n saktaa
tire dil kii tamannaa bhii karuu.n to kis bharose par
mai.n KHud dargaah me.n tere ye tohfa laa nahii.n saktaa
mirii majbuuriyo.n ko bhii bahut kuchh daKHl hai is me.n
tujhii ko morid-e-ilzaam mai.n Thahraa nahii.n saktaa
mai.n tujh se ba.Dh ke apnii aabruu ko pyaar kartaa huu.n
mai.n apnii izzat-o-naamuus ko Thukraa nahii.n saktaa
tire maahaul kii pastii kaa ta.ana duu.n tujhe kyuu.n-kar
mai.n KHud maahaul se apne rihaa.ii paa nahii.n saktaa

Gopal Mittal
Nazm

gandhi

shahiido.n kaa sartaaj jannat-maqaam
mohabbat kii me.araaj zii-ehtiraam
Gulaamaan-e-aalam kii pusht-o-panaah
ahinsaa ke bando.n kii ummiid-gaah
vo Gam bhii vatan kaa thaa Gam-KHvaar bhii
razaakaar bhii aur saalaar bhii
ahinsaa kaa pairav magar sher-e-mard
mohabbat me.n yaktaa sadaaqat me.n fard
hu.aa jis ke dam se ba-sad ehtishaam
siyaasat se uu.nchaa sadaaqat kaa naam
vo aadam kii azmat kaa aa.iina-daar
vo zarra ki chamkaa thaa KHurshiid-daar
vo jis ne diyaa aadamiyat ko auj
vo jis ne la.Daa.ii ahinsaa kii fauj
qafas hai ko.ii ab na sayyaad hai
vatan jis kii hikmat se aazaad hai
vo nuur-e-ziyaa-baar siimaa-e-KHair
vo juuyaa-e-KHair-o-shanaasaa-e-KHair
farishta-KHisaal-o-farishta-siyar
malak dar-haqiiqat ba-zaahir bashar
mohabbat kii vo ik shabiih-e-hasii.n
uKHuvvat kaa vo ek maah-e-mubii.n
vo haq aagahii kii kachhaaro.n kaa sher
sadaaqat ke maidaa.n kaa mard-e-diler
falak-aafrii.n aur garduu.n-taraaz
mariizaan-e-pastii kaa vo chaarasaaz
vo kotaah-biino.n kii sham-e-shu.uur
vo gumraahiyo.n me.n hidaayat kaa nuur
vo jis ne uThaayaa zamaane kaa baar
kiyaa jis ne jaabir ko be-iKHtiyaar
vo be-misl qaa.id mu.assar KHatiib
vo lashkar me.n jis ke amiir-o-Gariib
vo jis ne karo.Do.n ke kaaTe hai.n band
vo arfa.a vo a.alaa vo sab se buland
vo jis kii ataa hai niraalii ataa
vo jis ne diyaa ik nayaa falsafa
zamii.n par bahaa us jarii kaa lahuu
tafuubar tuu ai charKH-e-gardaa.n tafuu

Arsh Malsiyani
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now