Search result for "po.nchh" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "po.nchh"

Nazm MATCHES FOR "po.nchh"

Nazm

nau-jawan KHatun se

hijaab-e-fitna-parvar ab uThaa letii to achchhaa thaa
KHud apne husn ko pardaa banaa letii to achchhaa thaa
tirii niichii nazar KHud terii ismat kii muhaafiz hai
tuu is nashtar kii tezii aazmaa letii to achchhaa thaa
tirii chiin-e-jabii.n KHud ik sazaa qaanuun-e-fitrat me.n
isii shamshiir se kaar-e-sazaa letii to achchhaa thaa
ye teraa zard ruKH ye KHushk lab ye vahm ye vahshat
tuu apne sar se ye baadal haTaa letii to achchhaa thaa
dil-e-majruuh ko majruuh-tar karne se kyaa haasil
tuu aa.nsuu po.nchh kar ab muskuraa letii to achchhaa thaa
tire zer-e-nagii.n ghar ho mahal ho qasr ho kuchh ho
mai.n ye kahtaa huu.n tuu arz-o-samaa letii to achchhaa thaa
agar KHalvat me.n tuu ne sar uThaayaa bhii to kyaa haasil
bharii mahfil me.n aa kar sar jhukaa letii to achchhaa thaa
tire maathe kaa Tiikaa mard kii qismat kaa taaraa hai
agar tuu saaz-e-bedaarii uThaa letii to achchhaa thaa
ayaa.n hai.n dushmano.n ke KHanjaro.n par KHuun ke dhabbe
unhe.n tuu ra.ng-e-aariz se milaa letii to achchhaa thaa
sanaane.n khii.nch lii hai.n sar-phire baaGii javaano.n ne
tuu saamaan-e-jaraahat ab uThaa letii to achchhaa thaa
tire maathe pe ye aa.nchal bahut hii KHuub hai lekin
tuu is aa.nchal se ik parcham banaa letii to achchhaa thaa

Asrarul Haq Majaz

Nazm

lekin baDi der ho chuki thi

mai.n us ke gale lagii hu.ii thii
vo po.nchh rahaa thaa mire aa.nsuu
lekin ba.Dii der ho chukii thii!

Parveen Shakir

Nazm

ramayan ka ek scene

ruKHsat hu.aa vo baap se le kar KHudaa kaa naam
raah-e-vafaa kii manzil-e-avval hu.ii tamaam
manzuur thaa jo maa.n kii ziyaarat kaa intizaam
daaman se ashk po.nchh ke dil se kiyaa kalaam
iz.haar-e-be-kasii se sitam hogaa aur bhii
dekhaa hame.n udaas to Gam hogaa aur bhii
dil ko sa.nbhaaltaa hu.aa aaKHir vo naunihaal
KHaamosh maa.n ke paas gayaa suurat-e-KHayaal
dekhaa to ek dar me.n hai baiThii vo KHasta-haal
saktaa saa ho gayaa hai ye hai shiddat-e-malaal
tan me.n lahuu kaa naam nahii.n zard rang hai
goyaa bashar nahii.n ko.ii tasviir-e-sa.ng hai
kyaa jaane kis KHayaal me.n gum thii vo be-gunaah
nuur-e-nazar ye diida-e-hasrat se kii nigaah
jumbish hu.ii labo.n ko bharii ek sard aah
lii gosha-ha-e-chashm se ashko.n ne ruKH kii raah
chehre kaa rang haalat-e-dil kholne lagaa
har muu-e-tan zabaa.n kii tarah bolne lagaa
aaKHir asiir-e-yaas kaa qufl-e-dahan khulaa
afsaana-e-shadaa.id-e-ra.nj-o-mehan khulaa
ik daftar-e-mazaalim-e-charKH-e-kuhan khulaa
vaa thaa dahaan-e-zaKHm ki baab-e-suKHan khulaa
dard-e-dil-e-Gariib jo sarf-e-bayaa.n hu.aa
KHuun-e-jigar kaa rang suKHan se 'ayaa.n hu.aa
ro kar kahaa KHamosh kha.De kyuu.n ho merii jaa.n
mai.n jaantii huu.n jis liye aa.e ho tum yahaa.n
sab kii KHushii yahii hai to sahraa ko ho ravaa.n
lekin mai.n apne mu.nh se na hargiz kahuu.ngii haa.n
kis tarah ban me.n aa.nkho.n ke taare ko bhej duu.n
jogii banaa ke raaj-dulaare ko bhej duu.n
duniyaa kaa ho gayaa hai ye kaisaa lahuu sapiid
andhaa kiye hu.e hai zar-o-maal kii umiid
anjaam kyaa ho ko.ii nahii.n jaantaa ye bhed
soche bashar to jism ho larzaa.n misaal-e-biid
likkhii hai kyaa hayaat-e-abad in ke vaaste
phailaa rahe hai.n jaal ye kis din ke vaaste
letii kisii faqiir ke ghar me.n agar janam
hote na merii jaan ko saamaan ye baham
Dastaa na saa.np ban ke mujhe shaukat-o-hasham
tum mere laal the mujhe kis saltanat se kam
mai.n KHush huu.n phuu.nk de ko.ii is taKHt-o-taaj ko
tum hii nahii.n to aag lagaa duu.ngii raaj ko
kin kin riyaazato.n se guzaare hai.n maah-o-saal
dekhii tumhaarii shakl jab ai mere naunihaal
puuraa hu.aa jo byaah kaa armaan thaa kamaal
aafat ye aa.ii mujh pe hu.e jab safed baal
chhaTtii huu.n un se jog liyaa jin ke vaaste
kyaa sab kiyaa thaa mai.n ne isii din ke vaaste
aise bhii naa-muraad bahut aa.e.nge nazar
ghar jin ke be-charaaG rahe aah 'umr bhar
rahtaa miraa bhii naKHl-e-tamannaa jo be-samar
ye jaa-e-sabr thii ki du'aa me.n nahii.n asar
lekin yahaa.n to ban ke muqaddar biga.D gayaa
phal phuul laa ke baaG-e-tamannaa uja.D gayaa
sarzad hu.e the mujh se KHudaa jaane kyaa gunaah
ma.njdhaar me.n jo yuu.n mirii kashtii hu.ii tabaah
aatii nazar nahii.n ko.ii amn-o-amaa.n kii raah
ab yaa.n se kuuch ho to 'adam me.n mile panaah
taqsiir merii KHaaliq-e-aalam bahal kare
aasaan mujh Gariib kii mushkil ajal kare
sun kar zabaa.n se maa.n kii ye fariyaad-e-dard-KHez
us KHasta-jaa.n ke dil pe chalii Gam kii teG-e-tez
'aalam ye thaa qariib ki aa.nkhe.n ho.n ashk-rez
lekin hazaar zabt se rone se kii gurez
sochaa yahii ki jaan se bekas guzar na jaa.e
naashaad ham ko dekh ke maa.n aur mar na jaa.e
phir arz kii ye maadar-e-naashaad ke huzuur
maayuus kyuu.n hai.n aap alam kaa hai kyuu.n vafuur
sadma ye shaaq 'aalam-e-piirii me.n hai zaruur
lekin na dil se kiijiye sabr-o-qaraar duur
shaayad KHizaa.n se shakl 'ayaa.n ho bahaar kii
kuchh maslahat isii me.n ho parvardigaar kii
ye jaa'l ye fareb ye saazish ye shor-o-shar
honaa jo hai sab us ke bahaane hai.n sar-ba-sar
asbaab-e-zaahirii me.n na in par karo nazar
kyaa jaane kyaa hai parda-e-qudrat me.n jalva-gar
KHaas us kii maslahat ko.ii pahchaantaa nahii.n
manzuur kyaa use hai ko.ii jaantaa nahii.n
raahat ho yaa ki ranj KHushii ho ki intishaar
vaajib har ek rang me.n hai shukr-e-kird-gaar
tum hii nahii.n ho kushta-e-naira.ng-e-rozgaar
maatam-kade me.n dahr ke laakho.n hai.n sogvaar
saKHtii sahii nahii.n ki uThaa.ii ka.Dii nahii.n
duniyaa me.n kyaa kisii pe musiibat pa.Dii nahii.n

Chakbast Braj Narayan

Nazm

zindagi

agnii maa.n se bhii na jiine kii sanad jab paa.ii
zindagii ke na.e imkaan ne lii a.ng.Daa.ii
aur kaano.n me.n kahii.n duur se aavaaz aa.ii
buddham shara.Dam gachhamii
dhammam shara.Dam gacchami
sangham shara.Dam gacchami
chaar abruu kaa safaayaa kar ke
be-sile vastr se Dhaa.npaa ye badan
po.nchh ke patnii ke maathe se damaktii bi.ndiyaa
sote bachcho.n ko binaa pyaar kiye
chal pa.Daa haath me.n kashkol liye
chaahtaa thaa kahii.n bhikshaa hii me.n jiivan mil jaa.e
jo kabhii band na ho dil ko vo dha.Dkan mil jaa.e
mujh ko bhikshaa me.n magar zahr milaa
ho.nT tharraane lage jaise kare ko.ii gila
jhuk ke suulii se usii vaqt kisii ne ye kahaa
tere ik gaal pe jis pal ko.ii thappa.D maare
duusraa gaal bhii aage kar de
terii duniyaa me.n bahut hinsaa hai
us ke siine me.n ahinsaa bhar de
ki ye jiine kaa tariiqa bhii hai andaaz bhii hai
terii aavaaz bhii hai merii aavaaz bhii hai
mai.n uThaa jis ko ahinsaa kaa sabaq sikhlaane
mujh ko laTkaa diyaa suulii pe usii duniyaa ne

Kaifi Azmi

Nazm

shafaq

roz saahil pe kha.De ho ke yahii sochaa hai
mai.n jo pighlii hu.ii ra.ngiin shafaq kaa roGan
po.nchh luu.n haatho.n pe aur chupke se ik baar kabhii
tere gulnaar se ruKHsaaro.n pe chhap se mal duu.n

Gulzar

Nazm

aamadgi

yuu.n chaaho to aa saktii ho
mai.n ne aa.nsuu po.nchh liye hai.n

Akhtarul Iman

Nazm

main rakh deti hun tumhaara nam photographer

aur dikhaa.o apne aa.nsuu
taaki mai.n unhe.n tasviir hii se po.nchh duu.n
aur ko.ii duusraa na dekhe

Tanveer Anjum

Nazm

irtiqa

qadam qadam par janaaze rakkhe hu.e hai.n in ko uThaa.o jaa.o
ye dekhte kyaa ho kaam meraa nahii.n tumhaaraa ye kaam hai aaj aur kal kaa
tum aaj me.n mahv ho ke shaayad ye sochte ho
na biitaa kal aur na aane vaalaa tumhaaraa kal hai
magar yuu.nhii soch me.n jo Duube to kuchh na hogaa
janaaze rakkhe hu.e hai.n in ko uThaa.o jaa.o
chalo janaazo.n ko ab uThaa.o
ye bahte aa.nsuu bahe.nge kab tak uTho aur ab in ko po.nchh Daalo

Meeraji

Nazm

yaadon ka lams

nahii.n tanhaa nahii.n huu.n mai.n
tumhaare sehr ke dhaago.n ne
mere jism-o-jaa.n ko baa.ndh rakhaa hai
hasii.n yaado.n kaa shiirii.n lams
merii ruuh ko chhuu kar
mirii aa.nkho.n se bahtaa hai
tum apnii u.ngliyo.n kii narm poro.n se
mire haatho.n ko chhuute ho
bahut dhiire se
tum apne dahakte lab mire gaalo.n pe rakh kar
aa.nsu.o.n ko po.nchh dete ho
mai.n apnii band aa.nkho.n me.n
hasii.n qaus-e-quzah aur titliyo.n ke rang taktii huu.n
mohabbat ke parinde giit gaate hai.n
fazaa.e.n gungunaatii hai.n
tumhaare baazu.o.n ne mere tan ko
thaam rakkhaa hai
tumhaarii saa.ns kii KHushbuu
mirii saa.nso.n me.n uljhii hai
tumhe.n chhuutii
tumhe.n mahsuus kartii huu.n
mai.n tum se pyaar kartii huu.n
jidhar dekhuu.n tumhii tum ho
har ik pal me.n tumhii tum ho
jahaa.n tum ho vahii.n huu.n mai.n
nahii.n tanhaa nahii.n huu.n mai.n

Laeeq Akbar Sahaab

Nazm

pura din aur aadha main

aa.nkh khulii to
silvaT silvaT bistar se
KHud ko chun chun ke
kap.Do.n kii gaTh.Dii me.n baa.ndhaa
pairo.n kii baisaakhii lii aur baahar nikle
daftar ke darvaaze par
ik kaaGaz kaalaa karne ke sikke lene ko daftar pahu.nche
ilm kii raddii aadhii bechii
aadhii baa.nT ke logo.n par ehsaan dharaa
aur apnaa aap uThaa kar nikle
shaam hu.ii thii
qahva-KHaane me.n pahu.nche to
kuchh zyaada chhoTe sar vaale bahas rahe the
aadmii aaj adhuuraa kyo.n hai
un par apne puure sar kaa ro.ab jamaayaa
chabaa chabaa ke lafz thuukte raat utaarii
mahfil jab barKHaast hu.ii to
agle din ke baare sochaa
ugaaldaan ko ulTaa palTaa
lafz uThaa.e
jhaa.D po.nchh ke phir se nigale
Thokar Thokar rasta chalte ghar tak aa.e
botal kholii
apne tan kii baa.D phalaa.ngii
tere naam ik nazm likhii to
har misre me.n apnii zaat ke Tuk.De baa.ndhe
tere hijr kii chaadar me.n hame.n apne Tuk.De chunte dekhtaa chaa.nd kabhii kaa Duub gayaa

Salman Haider

Nazm

apni miTTi ki KHushbu

mai.n jab bastii kii sarhad par kha.Daa ho kar
ufuq me.n Duubtii raaho.n ko taktaa thaa
to vo ro ro ke kahtii thii
mujhe Dar hai
tujhe ye naa-taras raahe.n na kar Daale.n judaa mujh se
mai.n apnii niim tarsaa.n u.ngliyo.n se us ke aa.nsuu po.nchh kar kahtaa thaa
ab kaisaa judaa honaa
magar mai.n dil me.n Dartaa thaa
ki in raaho.n se vaaqif thaa
inhii raaho.n pe chal kar is dayaar-e-Gair me.n aayaa thaa aur ye soch baiThaa thaa
ki ye mere safar kii aaKHirii manzil hai ye in.aam hai meraa
magar har-dam ufuq me.n Duubtii raahe.n
sunahre baadalo.n kii raushnaa.ii se
havaa me.n kuchh puraanii bastiyo.n ke naam likhtii thii.n
use ik roz mai.n ne kah diyaa mujh ko mare ajdaad kaa madfan bulaataa hai
mirii jaa.n mujh ko jaanaa hai
magar tujh bin na jaa.uu.ngaa
vo ik but kii tarah sar ko jhukaa.e chup rahii lekin
KHamoshii ko zabaa.n kahte to sab kuchh kah ga.ii mujh se
jo aa.nsuu us kii palko.n se gire the KHushk miTTii par
unhe.n mai.n ne ta.Dapte sochte aur bolte dekhaa
phir ik shab us ke pahluu se mai.n uTThaa aur ufuq me.n
Duubtii raaho.n pe chaltaa apne aabaa
kii us miTTii kii KHushbuu ke ta.aaqub
me.n chalaa aayaa jo mere KHvaabo.n me.n
paltii thii
mujhe pahluu se gum paa kar vo saada be-zabaa.n la.Dkii magar kyaa sochtii hogii

Arsh Siddiqui

Nazm

ummid ke karishme

uTh ke vo po.nchh kar pasiine ko
taan letaa hai apne siine ko

Naseem Amrohvi

Nazm

shana-ba-shana

mujhe kuchh nahii.n ma.aluum kyaa chaahtii ho tum mujh se
mere paas hai kyaa jo mai.n de saktaa huu.n kisii ko
tabl-o-alam hai paas apne na mulk-o-maal
aur phir ko.ii bahut KHaas chiiz hii honii chaahiye tumhe.n nazar karne ko to
kyaa nahii.n hai tumhaare paas pahle se
husn aisaa ki KHudaa bhii KHush ho gayaa hogaa tumhe.n banaa kar
raunaq sii lag jaatii hai baiTh jaatii ho jahaa.n
chaltii ho to saath chale.n sarv-o-sanobar
uupar se paayaa hai zehn-e-rasaa
mai.n to azal se martaa aayaa huu.n husn aur daanish ke imtizaaj par
mahz KHuub-suurat aurat kabhii na lubhaa sakii mujhe
na hii muta.assir kar sakii mujhe kam-shakl daanish-varii
mai.n aksar kahtaa huu.n tum me.n KHudaa ne jam.a kar diye hai.n chaa.nd aur suuraj
daastaano.n se maavaraa chande aaftaab chande mahtaab ko.ii hai to tum
aur phir tumhaarii aavaaz
pattharo.n ko pighlaa dene vaalaa gudaaz hai is me.n
boltii ho to charaaG se jal uThte hai.n mahfil me.n
kyuu.n sharminda kartii ho ye kah kar mujhe ki tumhe.n zaruurat hai merii
yaad aayaa ek roz kahaa thaa tum ne
har kisii ko ek shaana chaahiye jis par sar rakh ke ro sake vo
aur fikr na ho ki mazaaq u.Daayaa jaa.egaa is kaa yaa banaayaa jaa.egaa is baat kaa bata.nga.D
lekin merii jaan aisaa kaun saa dikh hai jo naubat aa ga.ii rone kii
kyaa kahte hai.n ro.e.n tumhaare dushman
go mai.n tumhaaraa dushman nahii.n lekin mai.n jo huu.n rone ke liye
mere shaane par sar rakh kar ro.ii.n agar tum
to tumhaare aa.nsuu na po.nchh sakuu.ngaa mai.n
mai.n to KHud bah jaa.uu.ngaa aa.nsu.o.n me.n
mujhe to is KHayaal hii se ronaa aa rahaa hai ki tumhaarii aa.nkho.n me.n bhare ho.n aa.nsuu
tumhe.n sach-much rotaa dekh kar kyaa haal hogaa meraa
haa.n ek suurat ho saktii hai albatta
tum ro lo mere shaane par sar rakh kar
aur mai.n ro luu.n tumhaare shaane par sar rakh kar
kyaa ye mumkin hai
shaana-ba-shaana

Mohammad Haneef Rame

Nazm

lams-e-aKHiri

na rovo jabr kaa aadii huu.n mujh pe rahm karo
tumhe.n qasam mirii vaarafta zindagii kii qasam
na rovo baal bikhero na tum KHudaa ke liye
a.ndherii raat me.n jugnuu kii raushnii kii qasam
mai.n kah rahaa huu.n na rovo ki mujh ko hosh nahii.n
yahii to KHauf hai aa.nsuu mujhe bahaa de.nge
mai.n jaantaa huu.n ki ye sail bhii sharaare hai.n
mirii hayaat kii har aarzuu jalaa de.nge
na itnaa rovo ye qindiil bujh na jaa.e kahii.n
ise KHud apnaa lahuu de ke mai.n jalaataa huu.n
jo ham ne mil ke uThaa.e the vo mahal baiThe
ab apne haath se miTTii kaa ghar banaataa huu.n
tumhaare vaaste shabnam nicho.D saktaa huu.n
zar o javaahir o gauhar kahaa.n se laa.uu.n mai.n
tumhaare husn ko ash.aar me.n sajaa duu.ngaa
tumhaare vaaste zevar kahaa.n se laa.uu.n mai.n
hasiin mez subuk jaam qiimtii faanuus
mujhe ye shak hai mai.n kuchh bhii to de nahii.n saktaa
Gulaam aur ye shaa.er kaa jazba-e-aazaad
mai.n apne sar pe ye ehsaan le nahii.n saktaa
mujhe yaqiin hai tum mujh ko mu.aaf kar dogii
ki ham ne saath jalaa.e the zindagii ke ka.nval
ab is ko kyaa karuu.n dushman kii jiit ho jaa.e
hamaare sar pe baras jaa.e yaas kaa baadal
na rovo dekho mirii saa.ns thartharaatii hai
qariib aa.o mai.n aa.nsuu to po.nchh kar dekhuu.n
suno to so.ii hu.ii zindagii bhii chiiKH uTThe
qariib aa.o vahii baat kaan me.n kah duu.n
na rovo merii siyah-baKHtiyo.n pe mat rovo
tumhe.n qasam mirii aashufta-KHaatirii kii qasam
miTaa do aariz-e-taabaa.n ke bad-numaa dhabbe
tumhaare ho.nTo.n pe us lams-e-aaKHirii kii qasam

Akhtar Payami

Nazm

meri ek buri aadat thi

merii ek burii aadat thii
tuu merii aadat ke haatho.n kaisii zich aur kitnii diq thii
jab hairat kii u.nglii thaame tere saath chalaa kartaa thaa
ik shiirii.n muskaan kii bele.n mere tan buuTe ke uupar istehqaaq se cha.Dhtii thii.n
aur ik lams kaa gaataa paanii nas nas diip jalaataa thaa
lams ke jugnuu aur muskaan kii titlii mere khilaune the
in dono.n kii duurii sahnaa jiine jaisaa mushkil thaa
in ko palluu me.n baa.ndhe tuu jab bhii duur kahii.n jaatii thii
mai.n visvaas kii Dor se lipTaa piichhe piichhe aa jaataa thaa
sab logo.n se, har raste se teraa pata puuchhaa kartaa thaa
ab hairat kii u.nglii thaame tuu ik aise des ga.ii hai
jis ke sab baazaar aur galiyaa.n, saare ghar aur sab chaubaare
gahrii dhund me.n sar-basta hai.n, guzre kal se paivasta hai.n
mai.n is dhund ke chauraahe par nam aa.ankho.n ko po.nchh rahaa huu.n
rote rote soch rahaa huu.n
kis ko rokuu.n kis se puuchhuu.n kyaa merii maa.n ko dekhaa hai?
is raste se ho ke ga.ii thii
apnii ek burii aadat se kaisaa zich aur kitnaa diq huu.n

Bilal Ahmad

Nazm

apni apni raushni

vaise us taariik jangal ke safar ke qabl bhii
haath me.n us ke
yahii ik TimTimaataa kaa.nptaa nanhaa diyaa thaa
kuchh to shohrat kii havas ne
aur kuchh ahmaq bahii-KHvaaho.n ne
is kii saada-lauhii ko sazaa dii
us ke tiflaana iraada ko havaa dii
laa ke sarhad par KHudaa-haafiz kahaa
us ke KHizaab-aaluuda sar ko ye sa.aadat dii
dhu.aa.n khaa.ii hu.ii
bad-ra.ng dastaar-e-qayaadat dii
to vo siina phulaa.e
apnii dastaar-e-qayaamat ko sambhaale
kaa.npte nanhe diye ko
ek mash.al kii tarah uu.nchaa uThaa.e
chal pa.Daa thaa
Gaaliban vo do-qadam hii jaa sakaa hogaa
ki piilii aa.ndhiyo.n ne
dast-e-larzaa.n me.n larazte us diye ko
naza.a kii hichkii ataa kii
us pe teraa
chhiin lii dastaar us kii
us ne aaGaaz-e-safar kii saarii KHush-fahmii
bikhartii dekh kar
jab lauTnaa chaahaa
to ye mumkin nahii.n thaa
har taraf taariikiyaa.n thii.n
daf.atan kuchh duur piichhe
us ne dekhaa
aasmaa.n se baat kartii dhuul kii diivaar
ba.Dhtii aa rahii hai
aur kuchh qurbat hu.ii to us ne dekhaa
vo ka.ii the
un ke haatho.n me.n bha.Daktii mish.ale.n thii.n
kaasa-e-namnaak se us ne
Garaz kii gandagii
jo us ko fitrat me.n milii thii
po.nchh Daalii
aur fauran Gaaza-e-maasuum
ye us kii aadat ban chukii thii
apne chehre par cha.Dhaayaa
ek hii maqsad thaa ya.anii
dhuul u.Daate qaafile se
ek mash.al le sake vo
Gaaza-e-maasuumiyat phir kaam aayaa
qaafila vaalo.n ne us ko
ek mash.al de ke
apne saath chalne ko kahaa
lekin kahaa.n tak
vo nihaayat tez-rau aur yak-qadam the
us ke naaz paa.o.n
suukhii haDDiyo.n ke zor par kyaa saath dete
ek qadam yaa do-qadam
phir thak gayaa vo
rafta rafta
us kii vo maa.ngii hu.ii mash.al
KHud apne ra.ng-o-roGan khaa rahii thii
ab faqat bhe.nchii hu.ii mohtaat muTThii me.n
a.ndhere kii chha.Dii thii
baad-o-baaraa.n tez tuufaa.n
zehn-e-tiflak me.n safar ke qabl
un dushvaariyo.n kaa
ek halkaa saa tasavvur bhii nahii.n thaa
ab jo ye bar-aks suurat ho ga.ii thii
ro pa.Daa vo
us kii paspaa.ii me.n lekin hausla thaa
daaman-e-ummiid ab bhii haath me.n thaa
daf.atan us ne ye dekhaa
dhundlii gahrii raushniyo.n ke ka.ii haalo.n me.n
kuchh ba.Dhte qadam nazdiik hote jaa rahe the
un ke ho.nTo.n se KHamoshii chhin rahii thii
sust-rau the
phir bhii un kii chaal me.n ik tamkanat thii
us ne sochaa
un na.e logo.n kii tarah tez nahii.n hai
un kii hamraahii me.n
qadmo.n kii naqaahat be-asar hai
aur manzil ek sa.ii-e-muKHtasar hai
ik na.ii ummiid le kar
pusht par murda diye taariik mash.al ko chhupaa kar
guftuguu me.n maslahat aamez narmii ghol kar
us ne na.e logo.n se ik mash.al talab kii

Zaheer Siddiqui

Nazm

aanchal ke pallu ko ganTh nahin lagti

lauT rahii huu.n KHaalii aa.nkh aur KHaalii haath
duur ufuq par zard udaasii kii chaadar me.n lipTaa chaa.nd
bijlii ke taaro.n par baiThe kuchh KHaamosh parind
is chaltii gaa.Dii me.n jaise mai.n afsurda-jaa.n
ek taraf chi.Diyo.n kaa chamba pe.Do.n par vo shor machaataa
lekin jis kaa dil bujh jaa.e us ko in se kyaa
po.nchh rahii huu.n bhiigtii aa.nkhe.n

Janan Malik

Nazm

KHwaja-sara

ab vo tho.Daa dam lene ko
zard ishaare ke saa.e me.n aa baiThaa hai
zard ishaara afsurda hai
aaj bhii us se puuchh rahaa hai
luule la.ng.De andhe bahre
kitne hii ma.azuur yahaa.n par roz aate hai.n
tum kaise ma.azuur ho jis kii jins nahii.n hai
taish me.n aa kar vo kahtaa hai
nahii.n nahii.n ye jhuuT hai bilkul
mai.n ik aadhaa mard huu.n lekin
apnii aadhii jins kahii.n par kho baiThaa huu.n
zard ishaare ta.ana-zan hai
gar tum aadhe mard the to phir
aaKHir tum ne aurat hii kaa ruup kyo.n dhaaraa
zahr-aaluud nigaaho.n se vo zard ishaare ko taktaa hai
aur tiikhe andaaz me.n yuu.n goyaa hotaa hai
jins-zada logo.n me.n ghir kar zinda rahnaa
kab aasaa.n hai
aurat hii kaa ruup hai jis se
havas ke maare in logo.n ko dilchaspii hai
aurat hii kii majbuurii kaa mol lagaa kar
in logo.n ko haz miltaa hai
tum kyaa jaano peT kaa ye dozaKH bharne ko
kaise KHud ko bech ke ye kaaGaz miltaa hai
zard ishaara ro pa.Dtaa hai
rote rote phir kahtaa hai
ye batlaa.o itnii zillat aur hiqaarat aaKHir kaise sah lete ho
sach kahnaa aise bhii insaan to ho.nge
jin se tum ne
insaa.n hone ke naate hii
kuchh to izzat paa.ii hogii
kajraarii aa.nkho.n se po.nchh ke apne aa.nsuu
ik talKHii se vo kahtaa hai
ham se asfal be-tauqiiro.n ko izz-o-takriim se kyaa hai
shukr KHudaa kaa muft kii saa.nse.n milii hu.ii hai.n
ham ko to itnaa bhii Ganiimat hai ki ham ne
apnii apnii an-dekhii maa.o.n kii muqaddas
kokh me.n puure nau mahiine izzat paa.ii

Mohammad Owais Malik

Nazm

tawil KHamushi

baato.n kaa martabaan achaanak chhuuT gayaa hai haatho.n se
baato.n ke naazuk jism ab lafzo.n kii kircho.n se
zaKHmii hai aur lahuuluhaan be-bas se hai.n
KHayaal aur ma.anii bhii uchhal kar duur pa.De hai.n kone me.n
rote se bilakhte se
saare ehsaas pa.De hai farsh pe mar kar
bhaar po.nchh kar sameT luu.n phir bhii chakhte to na miTe.nge

Varsha Gorchhia

Nazm

masiha

tajrabe garche ye bataate hai.n
vaqt be-rahm ik sipaahii hai
jis kaa mazbuut o aahanii panja
dil kaa aa.iina to.D detaa hai
dasht-e-hastii me.n aabla-paa ko
hama-dam raah-e-Gam dikhaataa hai
nau-ba-nau intishaar laataa hai
zindagii ko dukhii banaataa hai
lekin ai ham-safar Thahar to sahii
tajrabe ye bhii to bataate hai.n
vaqt ik narm-dil masiihaa hai
jis ke naazuk hasiin phuul se haath
TuuTe aa.iine jo.D dete hai.n
jaama-e-tan ke chaak sete hai.n
u.ngliyaa.n zaKHm-e-dil pe rakhte hai.n
ashk aa.nkho.n se po.nchh dete hai.n

Owais Ahmad Dauran

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now