Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "raahbarii"

Nazm MATCHES FOR "raahbarii"

Nazm

aql-o-dil

'aql ne ek din ye dil se kahaa
bhuule-bhaTke kii rahnumaa huu.n mai.n
huu.n zamii.n par guzar falak pe miraa
dekh tuu kis qadar rasaa huu.n mai.n
kaam duniyaa me.n rahbarii hai miraa
misl-e-KHizr-e-KHajista-paa huu.n me.n
huu.n mufassir kitaab-e-hastii kii
maz.har-e-shaan-e-kibriyaa huu.n mai.n
buu.nd ik KHuun kii hai tuu lekin
Gairat-e-laa'l-e-be-bahaa huu.n mai.n
dil ne sun kar kahaa ye sab sach hai
par mujhe bhii to dekh kyaa huu.n mai.n
raaz-e-hastii ko tuu samajhtii hai
aur aa.nkho.n se dekhtaa huu.n mai.n
hai tujhe vaasta mazaahir se
aur baatin se aashnaa huu.n mai.n
'ilm tujh se to maa'rifat mujh se
tuu KHudaa jo KHudaa-numaa huu.n mai.n
'ilm kii intihaa hai betaabi
us maraz kii magar davaa huu.n mai.n
sham' tuu mahfil-e-sadaaqat kii
husn kii bazm kaa diyaa huu.n mai.n
tuu zamaan-o-makaa.n se rishta bapaa
taa.ir-e-sidra-aashnaa huu.n mai.n
kis bulandii pe hai maqaam miraa
'arsh rabb-e-jaliil kaa huu.n mai.n

Allama Iqbal
Nazm

mere pyare watan

mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan
gul-posh terii vaadiyaa.n
farhat-nishaa.n raahat-rasaa.n
tere chaman-zaaro.n pe hai
gulzaar-e-jannat kaa gumaa.n
har shaaKH phuulo.n kii chha.Dii
har naKHl-e-tuubaa hai yahaa.n
kausar ke chashme jaa-ba-jaa
tasniim har aab-e-ravaa.n
har barg ruuh-e-taazgii
har phuul jaan-e-gulsitaa.n
har baaG baaG-e-dil-kashii
har baaG baaG-e-be-KHizaa.n
dilkash charaagaahe.n tirii
Dhoro.n ke jin me.n kaarvaa.n
anjum-sifat gulhaa-e-nau
har taKHta-e-gul aasmaa.n
naqsh-e-surayyaa jaa-ba-jaa
har har ravish ik kahkashaa.n
terii bahaare.n daa.imii
terii bahaare.n jaavedaa.n
tujh me.n hai ruuh-e-zindagii
paiham ravaa.n paiham davaa.n
dariyaa vo tere tund-KHuu
jhiile.n vo terii be-karaa.n
shaam-e-avadh ke lab pe hai
husn-e-azal kii daastaa.n
kahtii hai raaz-e-sarmadii
sub.h-e-banaras kii zabaa.n
u.Dtaa hai haft-aflaak par
un kaar-KHaano.n kaa dhu.aa.n
jin me.n hai.n laakho.n mehnatii
san.at-garii ke paasbaa.n
terii banaras kii zarii
rashk-e-hariir-o-parniyaa.n
biidar kii fankaarii me.n hai.n
san.at kii sab baariikiyaa.n
azmat tire iqbaal kii
tere pahaa.Do.n se ayaa.n
dariyaa.o.n kaa paanii, tarii
taqdiis kaa andaaza-daa.n
kyaa 'bhaarte.ndu' ne kiyaa
ga.ngaa kii lahro.n kaa bayaa.n
'iqbaal' aur chakbast hai.n
azmat ke terii naGma-KHvaa.n
'josh' o 'firaaq' o 'pant' hai.n
tere adab ke tarjumaa.n
'tulsii' o 'KHusrav' hai.n terii
taariif me.n ratb-ul-lisaa.n
gaate hai.n naGma mil ke sab
uu.nchaa rahe teraa nishaa.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tere nazaaro.n ke nagii.n
duniyaa kii KHaatam me.n nahii.n
saare jahaa.n me.n muntaKHab
kashmiir kii arz-e-hasii.n
fitrat kaa ra.ngii.n mo.ajaza
firdaus bar-ruu-e-zamii.n
firdaus bar-ruu-e-zamii.n
haa.n haa.n hamii.n ast o hamii.n
sarsabz jis ke dasht hai.n
jis ke jabal hai.n surmagii.n
meve ba-kasrat hai.n jahaa.n
shiirii.n misaal-e-a.ngbii.n
har za.afaraa.n ke phuul me.n
aks-e-jamaal-e-huura.ii.n
vo maalve kii chaa.ndnii
gum jis me.n ho.n duniyaa-o-dii.n
is KHitta-e-naira.ng me.n
har ik fazaa husn-aafrii.n
har shai me.n husn-e-zindagii
dilkash makaa.n dilkash zamii.n
har mard mard-e-KHuub-ruu
har ek aurat naaznii.n
vo taaj kii KHush-paikarii
har zaaviye se dil-nashii.n
san.at-garo.n ke daur kii
ik yaadgaar-e-marmarii.n
hotii hai jo har shaam ko
faiz-e-shafaq se ahmarii.n
dariyaa kii maujo.n se alag
yaa ik bat-e-nazzaara-bii.n
yaa taa.er-e-nuurii ko.ii
parvaaz karne ke qarii.n
yaa ahl-e-duniyaa se alag
ik aabid-e-uzlat-guzii.n
naqsh-e-ajantaa kii qasam
jachtaa nahii.n arzha.ng-e-chii۔n
shaan-e-ellora dekh kar
jhuktii hai aazar kii jabii.n
chittau.D ho yaa aagara
aise nahii.n qil.e kahii.n
but-gar ho yaa naqqaash ho
tuu sab kii azmat kaa amii.n
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
dilkash tire dasht o chaman
ra.ngii.n tire shahr o chaman
tere javaa.n raa.anaa javaa.n
tere hasii.n gul pairahan
ik anjuman duniyaa hai ye
tuu is me.n sadr-e-anjuman
tere muGannii KHush-navaa
shaa.er tire shiirii.n-suKHan
har zarra ik maah-e-mubii.n
har KHaar rashk-e-nastarii.n
Guncha tire sahraa kaa hai
ik naafa-e-mushk-e-KHutan
ka.nkar hai.n tere be-bahaa
patthar tire laal-e-yaman
bastii se jangal KHuub-tar
baaGo.n se husn afroz ban
vo mor vo kabk-e-darii
vo chauk.Dii bharte hiran
ra.ngii.n-adaa vo titliyaa.n
baa.nbnii me.n vo naago.n ke phan
vo sher jin ke naam se
larze me.n aa.e ahrman
kheto.n kii barkat se ayaa.n
faizaan-e-rabb-e-zul-minan
chashmo.n ke shiirii.n aab se
lazzat-kashaa.n kaam-o-dahan
taabinda teraa ahd-e-nau
raushan tiraa ahd-e-kuhan
kitno.n ne tujh par kar diyaa
qurbaan apnaa maal dhan
kitne shahiido.n ko mile
tere liye daar-o-rasan
kitno.n ko teraa ishq thaa
kitno.n ko thii terii lagan
tere jafaa-kash mehnatii
rakhte hai.n azm-e-kohkan
tere sipaahii suurmaa
be-misl yaktaa-e-zaman
'bhisham' saa jin me.n hausla
'arjun' saa jin me.n baa.nkpan
aalim jo faKHr-e-ilm hai.n
fankaar naazaa.n jin pe fan
'raa.e' o 'bos' o 'shergil'
'dinkar,' 'jigar' 'maithli-sharan'
'vallathol' 'maahir', bhaartii
'bachchan', 'mahaadevii' 'suman'
'krishnan', 'niraalaa', 'prem-chand'
'tagore' o 'aazaad' o 'raman'
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
khetii tirii har ik harii
dilkash tirii KHush-manzarii
terii bisaat-e-KHaak ke
zarre hai.n mahr-o-mushtarii
jhelum kaveri naag vo
ga.ngaa kii vo ga.ngotarii
vo narbadaa kii tamkanat
vo shaukat-e-godaavarii
paakiizgii sarjuu kii vo
jamunaa kii vo KHush-gauharii
dullarba aab-e-niil-guu.n
kashmiir kii niilam-parii
dilkash papiihe kii sadaa
koyal kii taane.n mad-bharii
tiitar kaa vo haq sirrahu
tuutii kaa vo vird-e-harii
suufii tire har daur me.n
karte rahe paiGambarii
'chishtii' o 'nanak' se milii
faqr-o-Ginaa ko bartarii
adl-e-jahaa.ngiirii me.n thii
muzmar re.aayaa-parvarii
vo nau-ratan jin se hu.ii
tahziib-e-daur-e-akbarii
rakhte the afGaan-o-muGal
ik saulat-e-askandarii
raanaa.on ke iqbaal kii
hotii hai kis se ham-sarii
saava.nt vo yodhdhaa tire
tere jiyaale vo jarii
niiatii vidur kii aaj tak
kartii hai terii rahbarii
ab tak hai mash.huur-e-zamaa.n
'chanakya' kii daanish-varii
vayaas aur vishvamitr se
muniyo.n kii shaan-e-qaisarii
paatanjalii o saa.nkh se
rishiyo.n kii hikmat-parvarii
baKHshe tujhe in.aam-e-nau
har daur charKH-e-chambarii
KHush-gauharii de aab ko
aur KHaak ko KHush-jauharii
zarro.n ko mahr-afshaaniyaa.n
qatro.n ko dariyaa-gustarii
mere vatan, pyaare vatan
raahat ke gahvaare vatan
har dil ke ujiyaare vatan
har aa.nkh ke taare vatan
tuu rahbar-e-nau-e-bashar
tuu amn kaa paiGaam-bar
paale hai.n tuu ne god me.n
saahib-KHirad saahib-e-nazar
afzal-tarii.n in sab me.n hai
baapuu kaa naam-e-mo'tabar
har lafz jis kaa dil-nashii.n
har baat jis kii pur-asar
jis ne lagaayaa dahr me.n
na.ara ye be-KHauf-o-KHatar
be-kaar hai.n tiir-o-sinaa.n
be-suud hai.n teG-o-tabar
hinsaa kaa rasta jhuuT hai
haq hai ahinsaa kii Dagar
darmaa.n hai ye har dard kaa
ye har maraz kaa chaara-gar
ja.ngaah-e-aalam me.n ko.ii
is se nahii.n behtar sipar
kartaa huu.n mai.n tere liye
ab ye du.aa-e-muKHtasar
raunaq pe ho.n tere chaman
sarsabz ho.n tere shajar
naKHl-e-umiid-e-behtarii
har fasl me.n ho baarvar
koshish ho duniyaa me.n ko.ii
KHitta na ho zer-o-zabar
teraa har ik baasii rahe
neko-sifat neko-siyar
har zan saliiqa-ma.nd ho
har mard ho saahib-hunar
jab tak hai.n ye arz o falak
jab tak hai.n ye shams o qamar
mere vatan, pyaare vatan
raahat ke gahvaare vatan
har dil ke ujyaare vatan
har aa.nkh ke taare vatan

Arsh Malsiyani
Nazm

ishq aur maut

suhaanii numuud-e-jahaa.n kii gha.Dii thii
tabassum-fashaa.n zindagii kii kalii thii
kahii.n muhr ko taaj-e-zar mil rahaa thaa
ataa chaa.nd ko chaa.ndnii ho rahii thii
siyah pairahan shaam ko de rahe the
sitaaro.n ko ta.aliim-e-taabindagii thii
kahii.n shaaKH-e-hastii ko lagte the patte
kahii.n zindagii kii kalii phuuTtii thii
farishte sikhaate the shabnam ko ronaa
ha.nsii gul ko pahle-pahal aa rahii thii
ataa dard hotaa thaa shaa.ir ke dil ko
KHudii tishna-kaam mai-e-be-KHudii thii
uThii avval avval ghaTaa kaalii kaalii
ko.ii huur choTii ko khole kha.Dii thii
zamii.n ko thaa da.avaa ki mai.n aasmaa.n huu.n
makaa.n kah rahaa thaa ki mai.n laa-makaa.n huu.n
Garaz is qadar ye nazaara thaa pyaaraa
ki nazaargii ho saraapaa nazaaraa
malak aazmaate the parvaaz apnii
jabiino.n se nuur-e-azal aashkaaraa
farishta thaa ik ishq thaa naam jis kaa
ki thii rahbarii us kii sab kaa sahaaraa
farishta ki putlaa thaa be-taabiyo.n kaa
malak kaa malak aur paare kaa paaraa
pa.e sair firdaus ko jaa rahaa thaa
qazaa se milaa raah me.n vo qazaa-raa
ye puuchhaa tiraa naam kyaa kaam kyaa hai
nahii.n aa.nkh ko diid terii gavaaraa
hu.aa sun ke goyaa qazaa kaa farishta
ajal huu.n miraa kaam hai aashkaaraa
u.Daatii huu.n mai.n raKHt-e-hastii ke purze
bujhaatii huu.n mai.n zindagii kaa sharaaraa
mirii aa.nkh me.n jaaduu-e-niistii hai
payaam-e-fanaa hai usii kaa ishaaraa
magar ek hastii hai duniyaa me.n aisii
vo aatish hai mai.n saamne us ke paaraa
sharar ban ke rahtii hai insaa.n ke dil me.n
vo hai nuur-e-mutlaq kii aa.nkho.n kaa taaraa
Tapaktii hai aa.nkho.n se ban ban ke aa.nsuu
vo aa.nsuu ki ho jin kii talKHii gavaaraa
sunii ishq ne guftuguu jab qazaa kii
ha.nsii us ke lab par hu.ii aashkaaraa
girii is tabassum kii bijlii ajal par
a.ndhere kaa ho nuur me.n kyaa guzaaraa
baqaa ko jo dekhaa fanaa ho ga.ii vo
qazaa thii shikaar qazaa ho ga.ii vo

Allama Iqbal
Nazm

KHwab-e-sahar

mahr sadiyo.n se chamaktaa hii rahaa aflaak par
raat hii taarii rahii insaan ke idraak par
aql ke maidaan me.n zulmat kaa Deraa hii rahaa
dil me.n taariikii dimaaGo.n me.n a.ndheraa hii rahaa
ik na ik maz.hab kii sa.ii-e-KHaam bhii hotii rahii
ahl-e-dil par baarish-e-ilhaam bhii hotii rahii
aasmaano.n se farishte bhii utarte hii rahe
nek bande bhii KHudaa kaa kaam karte hii rahe
ibn-e-maryam bhii uThe muusii-e-imraa.n bhii uThe
raam o gautam bhii uThe fir.aun o haamaa.n bhii uThe
ahl-e-saif uThte rahe ahl-e-kitaab aate rahe
ii.n janaab uThte aur aa.n-janaab aate rahe
hukmaraa.n dil par rahe sadiyo.n talak asnaam bhii
abr-e-rahmat ban ke chhaayaa dahr par islaam bhii
masjido.n me.n maulvii KHutbe sunaate hii rahe
mandiro.n me.n barhaman ashlok gaate hii rahe
aadmii minnat-kash-e-arbaab-e-irfaa.n hii rahaa
dard-e-insaanii magar mahruum-e-darmaa.n hii rahaa
ik na ik dar par jabiin-e-shauq ghistii hii rahii
aadamiyyat zulm kii chakkii me.n pastii hii rahii
rahbarii jaarii rahii paiGambarii jaarii rahii
diin ke parde me.n ja.ng-e-zargarii jaarii rahii
ahl-e-baatin ilm se siino.n ko garmaate rahe
jahl ke taariik saa.e haath phailaate rahe
ye musalsal aafate.n ye yorish ye qatl-e-aam
aadmii kab tak rahe auhaam-e-baatil kaa Gulaam
zehan-e-insaanii ne ab auhaam ke zulmaat me.n
zindagii kii saKHt tuufaanii a.ndherii raat me.n
kuchh nahii.n to kam se kam KHvaab-e-sahar dekhaa to hai
jis taraf dekhaa na thaa ab tak udhar dekhaa to hai

Asrarul Haq Majaz
Nazm

sab jaante hain ilm se hai zindagi ki ruh

sab jaante hai.n ilm se hai zindagii kii ruuh
be-ilm hai agar to vo insaa.n hai naa tamaam
be-ilm-o-be-hunar hai jo duniyaa me.n ko.ii qaum
nature kaa iqtizaa hai rahe ban ke vo Gulaam
ta.aliim agar nahii.n hai zamaane ke hasb-o-haal
phir kyaa umiid-e-daulat-o-aaraam-o-ihteraam
sayyad ke dil me.n naqsh ho is KHayaal kaa
Daalii binaa-e-madrasa le kar KHudaa kaa naam
sadme uThaa.e ranj sahe gaaliyaa.n sunii.n
lekin na chho.Daa qaum ke KHaadim ne ye kaam
dikhlaa diyaa zamaane ko zor-e-dil-o-dimaaG
batlaa diyaa vo karte hai.n karne vaale kaam
niyyat jo thii ba-KHair to barkat KHudaa ne dii
collage hu.aa durust ba-sad shaan-o-ehtishaam
sarmaa.e me.n kamii thii sahaaraa ko.ii na thaa
sayyad kaa dil thaa darpai takmiil-e-intizaam
aaKHir uThaa safar ko vo mard KHasta paye
ahbaab chand saath the zii-ilm-o-KHush-kalaam
qismat ki rahbarii se milii manzil-e-muraad
farmaa.n-ravaa-e-mulk-e-dakan ko kiyaa salaam
haalat dikhaa.ii aur zaruurat bayaan kii
KHuubii se iltimaas kiyaa qaum kaa payaam
rahm aa gayaa huzuur ko haalat pe qaum kii
phir kyaa thaa maujzan hu.aa dariyaa-e-faiz-e-aam
maahaana do hazaar kiyaa ik hazaar se
ummiid se ziyaada ataa thii ye laa-kalaam
'akbar' kii ye du.aa hai KHudaa kii janaab me.n
taa-hashr is ra.iis-o-riyaasat ko ho qayaam
kyaa vaqt par hu.ii hai ki be-ehtijjaj-e-fikr
taariik apnii aap hai fayyazii-e-nizaam

Akbar Allahabadi
Nazm

main nashe mein hun

badmast ho ga.e ho election me.n 'ja.afarii'
sar me.n nashe ke saath hai saudaa-e-rahbarii
tum kas jagah ke pa.nch ho kyaa hai briaadrii
kyuu.n Dhuu.nDte ho mulk me.n jo vote ho free
tum hosh me.n nahii.n ho to hai baat duusrii
ye kah ke ghar me.n baiTh raho mai.n nashe me.n huu.n

Syed Mohammad Jafri
Nazm

meri rahon ke ab tum musafir nahin

tum jo nuuraanii chehro.n pe marte ho yuu.n
un ke miiThe suro.n me.n ulajhte ho yuu.n
jaa.o ab se tumhaare vahii rahnumaa
jaa.o mai.n ne tumhe.n kar diyaa hai vidaa.a
phir jo socho kabhii zindagii na milii
un kii aavaaz me.n rahbarii na milii
jhiil aa.nkho.n me.n apnii chhavii na milii
merii chaahat mirii aajizii na milii
aur chaaho kabhii is taraf lauTnaa
merii TuuTii zabaa.n kii yahii ho sadaa

Mariya Muzaffar
Nazm

jaen kahan hum

tabii.at jo andar se jhunjhlaa rahii hai
to baahar se aavaaz ye aa rahii hai
ki ai faazil-e-dars-gaah-e-himaaqat
hijaabaat-e-daanish uThaa kar bhii dekho
sharaafat ke piichhe jigar ho gayaa KHuu.n
sharaafat se piichhaa chhu.Daa kar bhii dekho
azal se mohabbat KHudii kaa hai zindaa.n
ab is se zaraa baahar aa kar bhii dekho
muravvat ne pahnaa.ii hai.n be.Diyaa.n jo
zaraa un kaa lohaa ghulaa kar bhii dekho
tasavvur kii vaadii me.n bhaTkoge kab tak
kabhii shahr-e-imkaa.n me.n jaa kar bhii dekho
Garaz 'maz.harii' is dayaar-e-junuu.n me.n
milaa, kuchh na khone se paa kar bhii dekho
sunaa mashvara teraa ai saut-e-Gaibii
zalaalat kii sarhad me.n aa kar bhii dekhaa
rizaalat kii gardan me.n baa.nhe.n bhii Daalii.n
sharaafat se piichhaa chhu.Daa kar bhii dekhaa
hamiyyat kaa gho.nTaa galaa rafta rafta
mohabbat ko phaa.nsii cha.Dhaa kar bhii dekhaa
kaf-e-mor se us kaa luqma bhii chhiinaa
haq-e-ahl-e-KHidmat churaa kar bhii dekhaa
shu.uur o KHirad ko Guruur o hasad ko
sulaa kar bhii dekhaa jagaa kar bhii
phire kuu-ba-kuu aql kii rahbarii me.n
Garaz ye ki kho kar bhii, paa kar bhii dekhaa
na khone se haasil, na paane se haasil
jise suud kahte hai.n vo bhii ziyaa.n hai
yahii bas ki taqdiir-e-aql o junuu.n hai
yahii KHisht-e-ta.amiir-e-kaun-o-makaa.n hai
mohabbat jahannam hai, nafrat jahannam
jidhar jaa.e.n ik aag shola-fishaa.n hai
dayaar-e-vafaa yaa dayaar-e-havas ho
na raahat yahaa.n hai na raahat vahaa.n hai
sharaafat bhii Gam-gii.n rizaalat bhii Gam-gii.n
bas ab mu.nh na khulvaa KHudaa darmiyaa.n hai
samak se samaa tak tapish hii tapish hai
fazaa se KHalaa tak fuGaa.n hii fuGaa.n hai
KHudii paa.nv pak.De hai jaa.e.n kahaa.n ham
tasavvur kii jannat banaa.e.n kahaa.n ham

Jameel Mazhari
Nazm

ek sitara aadarsh ka

raah me.n aa.nkhe.n bichhaa.e
phuul nargis ke mile
raah me.n mahke gulaab aur raah me.n laale khile
diid kii lekin unhe.n raftaar fursat bhii to de
munkashif kartii hu.ii
be-naam jal-pariyo.n ko
gahre paaniyo.n me.n ek lamhaatii tara.ng
be-nishaan ban-baasiyo.n par
Tahniyo.n me.n aas ke maaman kisii
bhuule bhaTke zamzama kii raah takte
dvaar khole jaagte hai.n
raat kaalii barshgaalii
jugnu.o.n kii naa-gahaa.n yalGaar
phir gahraa a.ndheraa
aur jibillat kii athaah
shaktiyo.n kaa
ban me.n Deraa
man me.n Deraa
saahilo.n kii ret me.n sau.npe hu.e
ik vadii.at kii tarah hashraat-e-aab
KHol apne to.Dte hai.n
aur be-rahbarii hii aahista-KHiraam
apne man kii chaa.ndnii me.n
re.ngne lagte hai.n
shor-e-aab bhii kahte hai.n vo
ik samt hai
ik samt hai sehr-e-kashish bhii
sab dishaa.e.n naa-gahaa.n
ik saath bhartii hai.n hu.nkaaraa
bhuulne lagte hai.n jab ma.asuum zaa.er
jal dishaa
kitne KHuu.n-aaluud panje
kitne KHanjar ghaat me.n hai.n
phir bhii jaarii yaatraa

Shafiq Fatima Shera
Nazm

fasana-e-adam

mai.n thaa zamiir-e-mashiyyat me.n ek azm-e-jaliil
hanuuz shauq kii karvaT bhii lii na thii mai.n ne
ki daf.atan mut.harrik hu.e lab-e-taKHliiq
paka.D lii suurat-e-zaahir vajuud kii mai.n ne
vo sub.h-e-aalam-e-hairat vo jalva-zaar-e-bahisht
havaa chaman kii lagii aa.nkh khol dii mai.n ne
vo tarbiyat-gah-zauq-e-nazar, vo vaadii-e-nuur
jahaa.n se paa.ii mohabbat kii raushnii mai.n ne
vo unfuvaan-e-tamannaa vo ibtidaa-e-junuun
vo ik KHalish jise samjhaa thaa zindagii mai.n ne
kiyaa suruur ne ik aalam-e-digar paidaa
churaa ke pii jo mai-e-sarkash-e-KHudiii mai.n ne
KHudii ke nashshe me.n allaah re be-KHudii merii
badan se chaadar-e-ismat bhii phe.nk dii mai.n ne
hu.aa huduud-e-nazar se nikal ke aavaara
havaa-e-shauq me.n jannat bhii chho.D dii mai.n ne
farishte rah ga.e hairat se dekhte mujh ko
na kii qubuul mashiyyat kii rahbarii mai.n ne
daliil-e-raah banii apnii garmii-e-parvaaz
ki taaqat-e-par-e-jibriil chhiin lii mai.n ne
ba.Dhii.n sitaaro.n kii duniyaa.e.n mere lene ko
utar ke arsh se niiche nazar jo kii mai.n ne
magar zamii.n kii kashish ne suu-e-zamii.n khii.nchaa
kiyaa pasand ye zindaan-e-unsurii mai.n ne
jagah milii jo ta.Dapne kii be-qaraarii ko
to phir huduud me.n vus.at kii daad dii mai.n ne
hu.aa talaatum-e-hastii ba-aalam-e-zarraat
chhi.Dak dii KHaak-e-bayaabaa.n pe zindagii mai.n ne
numuu ke josh se saudaa-e-ra.ng-o-buu niklaa
zamii.n ke dil kii tamannaa nikaal dii mai.n ne
hu.ii.n jahaan-e-amal me.n sharii.ate.n paidaa
KHudaa ke naam pe barpaa jo kii KHudii mai.n ne
kabhii jalaa.ii a.ndhere me.n sham.a-e-ilm-o-amal
kabhii bujhaa dii hidaayat kii raushnii mai.n ne
kabhii bigaa.D ke rakh dii.n savaab kii shakle.n
kabhii badal dii haqiiqat gunaah kii mai.n ne
ba.Dhaa to rah gayaa piichhe mire zamaana-e-haal
rukaa to vaqt kii rafta rok dii mai.n ne
zamii.n pe shauq ke fitne bichhaa diye har suu
fazaa me.n nii.nd kii mastii bikher dii mai.n ne
kabhii jagaa dii qayaamat nafas kii Thokar se
uThaa ke suur-e-saraafiil-e-zindagii mai.n ne
junuu.n ke josh me.n parde nazar ke chaak kiye
naqaab noch ke fitrat kii phe.nk dii mai.n ne
qabaa-e-laila-e-tahziib chaak kar Daalii
ridaa-e-maryam-e-ismat utaar lii mai.n ne
mizaaj-e-aatish-e-sozaa.n ko kar diyaa ThanDaa
machaa dii bazm-e-anaasir me.n khalbalii mai.n ne
liyaa shahanshah-e-KHaavar se raushnii kaa KHiraaj
kiyaa asiir tabii.at ko barq kii mai.n ne
ba-inqalaab-e-tabii.at mizaaj-e-aahan ko
havaa kii garmii-e-parvaaz baKHsh dii mai.n ne
bulandiyo.n kaa tasavvur bhii rah gayaa piichhe
pahu.nch ke itnii bulandii pe saa.ns lii mai.n ne
ThiThuk ga.ii.n jo nigaahe.n qariib hujla-e-quds
pas-e-hijaab-e-adab ye sadaa sunii mai.n ne
ki ai hariif-e-mashiyyat ba-va.ada-gaah-e-azal
Thahar Thahar tirii parvaaz dekh lii mai.n ne

Jameel Mazhari
Nazm

tulsidas

rahbaraan-e-raah-e-haq jab rahbarii farmaate hai.n
bhuule-bhaTke sab musaafir raah par aa jaate hai.n

Jagat Mohan Lal Ravan
Nazm

insan ki fariyaad

haa.n ai masaaf-e-hastii! mat puuchh mujh se kyaa huu.n
ik arsa-e-balaa huu.n ik luqma-e-fanaa huu.n
majbuuriyo.n ne Daalaa gardan me.n merii phandaa
KHud-karda-e-vafaa huu.n jaa.n-daada-e-razaa huu.n
sayyaad haadse kaa kartaa hai meraa piichhaa
murG-e-buriida-par huu.n said-e-shikasta-paa huu.n
hai zaat merii majma.a saarii buraa.iyo.n kaa
kahne ko mai.n ba.Daa huu.n lekin bahut buraa huu.n
aazaadiyo.n kii mujh par tohmat hii hai saraasar
mai.n qaidii-e-havas huu.n mai.n banda-e-havaa huu.n
ik baat ho bataa.uu.n ik dard ho sunaa.uu.n
ro.uu.n bhalaa kahaa.n tak kab tak pa.Daa karaahuu.n
kam-baKHt dil kuchh aisaa mai.n saath le ke aayaa
ik lamha jis ke haatho.n duniyaa me.n sukh na paayaa
jo josh is me.n uTThaa haalaat ne dabaayaa
jo sho.ala is me.n bha.Dkaa taqdiir ne bujhaayaa
ummiid kaa ye Guncha khilte kabhii na dekhaa
ye aarzuu kaa paudaa phaltaa nazar na aayaa
go is me.n maujzan thii qaum o vatan kii ulfat
lekin Garaz ne is ko kuchh aur hii sikhaayaa
hotii nahii.n rasaa.ii ummiid ke ufuq tak
tuul-e-amal ne is ko ik jaal me.n pha.nsaayaa
kii rahbarii KHirad ne har-chand rahnumaa.ii
is juhd par bhii lekin khultii nahii.n sachchaa.ii
paayaa na mai.n ne ab tak maqsad kaa apne saahil
kii bahr-e-ma.arfat me.n din raat aashnaa.ii
is justujuu me.n mai.n ne kii sair-e-tuur-o-aiman
parbat ko ghar banaayaa jangal se lau lagaa.ii
mandir ko jaa ke dekhaa girjaa me.n jaa ke Dhuu.nDaa
masjid ko chhaan maaraa us kii na diid paa.ii
jogii kaa ruup dhaaraa ban me.n kiyaa guzaaraa
tan par bhabhuut mal kar dhuunii bahut ramaa.ii
jap tap me.n umr apnii mai.n ne basar kii aksar
ban ban ke piir-e-raahib jaa KHaanqaah basaa.ii
suufii bhii ban ke dekhaa aur rind-e-be-riyaa bhii
kar naara-e-anaa-al-haq ik khalbalii machaa.ii
phirtii hai.n maarii maarii mushtaaq-e-jalva aa.nkhe.n
par ik jhalak se ba.Dh kar detaa nahii.n dikhaa.ii
uTh jaa nazar se merii haa.n ai hijaab-e-hastii
husn-e-azal nihaa.n hai zer-e-naqaab-e-hastii
ye zindagii-e-insaa.n ik KHvaab hai pareshaa.n
bedaarii-e-adam hai ta.abiir-e-KHvaab-e-hastii
dekhe.n agar to kyuu.n-kar ham jalva-e-ma.aarif
tuu zulmat-e-nazar hai ai aaftaab-e-hastii
taskii.n ko zahr-e-qaatil aab-o-havaa-e-aalam
raahat kaa dushman-e-jaa.n har inqalaab-e-hastii
ai tishna-e-haqiiqat dhoke me.n tuu na aanaa
ik daam-e-pur-KHatar hai mauj-e-saraab-e-hastii
chaahe agar rihaa.ii pesh-az-fanaa fanaa ho
paadaash-e-jurm-e-hastii hai ye azaab-e-hastii

Ghulam Bhik Nairang
Nazm

unT

laqq-o-daq sahraa me.n yaa maidaan me.n
yaa arab ke garm registaan me.n
saya-afgan hai na vaa.n ko.ii chaTaan
sard paanii kaa na dariyaa kaa nishaan
chilchilaatii dhuup hai aur chup havaa
vaa.n parinda bhii nahii.n par maartaa
tuu vahaa.n ke marhale kartaa hai tai
din-ba-din aur hafta hafta pai-ba-pai
qiimtii ashyaa hai.n terii pusht par
taajiro.n kaa resham aur shaaho.n kaa zar
toda toda tere uupar lad rahaa
hai bharaa goyaa jahaaz-e-pur-bahaa
chand hafte jab ki jaate hai.n guzar
aur thakaa detaa hai raakib ko safar
uu.nT! ghabraataa nahii.n tuu baar se
dekhtaa hai us kii jaanib pyaar se
goyaa kahtaa hai ki ai mere savaar
ek din tuu aur bhii himmat na haar
haa.n na be-dil ho na raste me.n ThiThak
saaf sar-chashma hai aage dhar lapak
mujh ko aatii hai havaa se buu-e-aab
naa-umiidii se na kar tuu iztiraab
uu.nT tuu kartaa hai us kii rahbarii
yuu.n banaa detaa hai raakib ko jarii
aaKHirash manzil pe pahu.nchaataa hai tuu
aur suukhe KHaar-o-KHas khaataa hai tuu
sabr se kartaa hai tai raah-e-daraaz
sach kahaa hai tuu hai KHushkii kaa jahaaz
al-Garaz tuu hai haliim o KHush-KHisaal
tarbiyat me.n chhoTe bachcho.n kii misaal

Ismail Merathi
Nazm

sahir-ludhiyanwi ke liye

sahar thaa jis kii baato.n me.n
naKHl-e-samar thaa
jis ke haatho.n me.n
jaaduu-bayaa.n aisaa
jo baa.njh zamiino.n se fasle.n ugaa gayaa
vajuud kii be-ma.anii kitaabo.n me.n
hame.n dars-e-ibrat de gayaa
maut aur ziist ke darmiyaa.n
kitne faasle masduud kar gayaa
tajrabaat kaa bas apne pyaalo.n me.n ghol kar
shaaKHo.n me.n aa.nsuu khilaa gayaa
le aayaa vo sauGaat
jo zaKHm-e-dil kaa mudaavaa bhii banii
qudrat ne us ko baKHshii
dayaar-e-shauq kii rahbarii
har lamha jis ne kii apnii zaat kii nigahbaanii
taraqqii-pasando.n me.n 'saahir'
ek niraalaa shaa.ir thaa

Noor Parkar
Nazm

dil-e-mayus

dil-e-maayuus bataa ai dil-e-naakaam bataa
mubtalaa-e-sitam-e-gardish-e-ayyaam bataa
jii ke mai.n kyaa karuu.n duniyaa me.n miraa kaam hai kyaa
KHuun ummiid kaa hotaa hai sar-e-bazm-e-tarab
ban gayaa hausla Gam hii musiibat kaa sabab
jii ke mai.n kyaa karuu.n duniyaa me.n miraa kaam hai kyaa
dard ba.Dh jaa.e agar chaaragarii kaun kare
hai kaThin raah-e-vafaa raahbarii kaun kare
jii ke mai.n kyaa karuu.n duniyaa me.n miraa kaam hai kyaa
gulshan-e-shauq me.n kaa.nTo.n ke sivaa kuchh na milaa
haa.e duniyaa me.n vafaa.o.n kaa sila kuchh na milaa
jii ke mai.n kyaa karuu.n duniyaa me.n miraa kaam hai kyaa
justujuu kis kii hai 'naashaad' ko.ii kyaa jaane
kyo.n dil-e-zaar hai barbaad ko.ii kyaa jaane
jii ke mai.n kyaa karuu.n duniyaa me.n miraa kaam hai kyaa

Rabia Sultana Nashad
Nazm

aazmaish shart thi

zinda rahnaa siikh kar bhii mai.n ne shaayad
zindagii ko durd-e-tah tak
pii ke jiine kii kabhii koshish nahii.n kii!
pyaas thii paanii nahii.n thaa
sabr se shukr-o-razaa ke band hujro.n me.n ba.ndhaa
baiThaa rahaa aur halq me.n jab pyaas ke kaa.nTe chubhe to
sah gayaa mai.n!
mere ghar vaalo.n ne, mere biivii bachcho.n ne bhii
jalte ho.nT sii kar pyaas ke kaa.nTo.n ko sahne
sabr se shukr-o-razaa ke band hujro.n me.n
ta.Dapne kaa sabaq siikhaa mujhii se
ye saraasar buz-dilii thii, un se dhokaa thaa
ki mai.n ne KHud ko pahchaanaa nahii.n thaa!
mai.n bhii muusaa kii tarah
Gusse me.n apnii aastiino.n ko cha.Dhaataa
aur asaa kii ek kaarii choT se
chaTTaan ke Tuk.De agar kartaa
to shaayad baazyaabii ke amal me.n mujh pe khultaa
rahbarii kaa fan nubuvvat kaa karishma
pyaas se halkaan logo.n ke liye paanii kaa chashma
aazmaa.ish shart thii
mai.n ne kabhii puurii nahii.n kii

Satyapal Anand
Nazm

chacha nehru ki mohabbat

tum the amn-o-amaa.n ke payambar
saarii duniyaa ne maanaa hai rahbar

Syeda Farhat
Nazm

tanhai

apnii tanhaa.ii mujhe achchhii lagii
mai.n ne chaahaa hai use
aur paayaa bhii use
apne roz-o-shab me.n aksar hai basaayaa bhii use
usii ne dii hai.n mujh ko aisii KHalvate.n
jin me.n rah kar
mai.n kabhii tanhaa nahii.n
saath mere anginat aise ehsaasaat hai.n
jin se haasil hai
mirii tanhaa.iyo.n ko ik sukuu.n
ik rifaaqat
Gam-gusaarii
rahnumaa.ii
rahbarii
paa ke mai.n ehsaas ke is qurb ko
rah ke tanhaa bhii nahii.n tanhaa rahii
merii tanhaa.ii mirii hamdam mirii dam-saaz hai
us ke KHaal-o-KHat se mai.n achchhii tarah vaaqif nahii.n
naam bhii maKHsuus us ko
ko.ii de saktii nahii.n
phir bhii us se mai.n bahut maanuus huu.n
sai.nka.Do.n siino.n kii dha.Dkan
sai.nka.Do.n aavaaz ko
sun rahii huu.n is tarah
jaise ik naGma ko.ii
yaa ho bahte paanii kaa ik shor saa
jis ke shor-o-Gul me.n ab
kho ga.ii jaane kahaa.n
mujh ko tanhaa.ii mirii achchhii lagii
pyaarii lagii

Farzana Sabtain Farzi
Nazm

saqi

bataa.uu.n kyaa jo rang-e-gardish-e-ayyaam hai saaqii
jahaa.n kaa zarra-zarra kushta-e-aalaam hai saaqii
ma.aaz-allaah ab har har qadam par daam hai saaqii
gulistaa.n me.n ye aazaadii kaa faiz-e-aam hai saaqii
samajh saktaa hai kaun is raaz ko juz ahl-e-mai-KHaana
libaas-e-sub.h me.n kitnii bhayaanak shaam hai saaqii
qafas kaisaa nasheman kyaa ye sab kahne kii baate.n hai.n
na jab aaraam thaa saaqii na ab aaraam hai saaqii
ajam be-bahra-e-iimaa.n arab be-bahra-e-daanish
ba-ii.n-aaGaaz dono.n kaa buraa anjaam hai saaqii
sitam ye hai ko.ii shiisha-garo.n ko kuchh nahii.n kahtaa
mirii KHaaraa-shigaafii morid-e-ilzaam hai saaqii
hijaabaat-e-tasavvur me.n abhii hai millat-e-aadam
abhii insaa.n shikaar-e-la.anat-e-aqvaam hai saaqii
abhii marduud-e-dargaah-e-KHirad hai taabish-e-iimaa.n
abhii maqbuul-e-aalam zulmat-e-auhaam hai saaqii
abhii pyaaso.n ne paa.ii hii nahii.n hai raah-e-mai-KHaana
KHirad kii koshish-e-paiham abhii naakaam hai saaqii
ulajh kar rah ga.e hai.n mudda.iyaan-e-rubuubiyyat
KHayaal-e-KHaam bil-aaKHir KHayaal-e-KHaam hai saaqii
charaaG-e-raah ban kar rahbarii kii jis sahiife ne
vo juzdaano.n ke shiishe me.n charaaG-e-baam hai saaqii
tiraa ye rind-e-sar-gashta jise 'faaruuq' kahte hai.n
isii tanqiid ke chalte bahut badnaam hai saaqii
KHat-e-paimaana arq-e-mauj-e-sahbaa hotaa jaataa hai
ijaazat ho ki ab aage KHudaa kaa naam hai saaqii

Shameem Farooq Banspari
Nazm

afkar-e-pareshan

ye sitam-zariifii-e-ahd-e-nau bhii hai 'najmii' kitnii ajiib sii
ki jo gumrahii me.n hai mubtalaa hai usii ko da.avaa-e-rahbarii

Amjad Najmi
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now