Search result for "ridaa" | Category - Nazm, Page

Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "ridaa"

Nazm MATCHES FOR "ridaa"

Nazm

zulmat ko ziya sarsar ko saba bande ko KHuda kya likhna

har shaam yahaa.n shaam-e-viiraa.n aaseb-zada raste galiyaa.n
jis shahr kii dhun me.n nikle the vo shahr dil-e-barbaad kahaa.n
sahraa ko chaman ban ko gulshan baadal ko ridaa kyaa likhnaa
zulmat ko ziyaa sarsar ko sabaa bande ko KHudaa kyaa likhnaa

Habib Jalib

Nazm

ai mere sare logo

phir vahii KHauf kii diivaar tazabzub kii fazaa
phir vahii aam hu.ii.n ahl-e-riyaa kii baate.n
na.ara-e-hubb-e-vatan maal-e-tijaarat kii tarah
jins-e-arzaa.n kii tarah diin-e-KHudaa kii baate.n

Ahmad Faraz

Nazm

abhi hum KHub-surat hain

abhii ham KHuub-suurat hai.n
hamaare jism auraaq-e-KHizaanii ho ga.e hai.n
aur ridaa-e-zaKHm se aaraasta hai.n
phir bhii dekho to
hamaarii KHush-numaa.ii par ko.ii harf
aur kashiida-qaamtii me.n KHam nahii.n aayaa
hamaare ho.nT zahriilii ruto.n se kaasnii hai.n
aur chehre ratjago.n kii sho.alagii se
aabnuusii ho chuke hai.n
aur zaKHmii KHvaab
naadiida jaziiro.n kii zamii.n par
is tarah bikhre pa.De hai.n
jis tarah tuufaa.n-zada kashtii ke Tuk.Do.n ko
samundar saahilo.n par phe.nk detaa hai
lahuu kii baarishe.n
yaa KHud-kushii kii KHvaahishe.n thii.n
is aziyyat ke safar me.n
kaun saa mausam nahii.n aayaa
magar aa.nkho.n me.n nam
lahje me.n sam
ho.nTo.n pe ko.ii naGma-e-maatam nahii.n aayaa
abhii tak dil hamaare
KHanda-e-tiflaa.n kii suurat be-kuduurat hai.n
abhii ham KHuub-suurat hai.n
zamaane ho ga.e
ham kuu-e-jaanaa.n chho.D aa.e the
magar ab bhii
bahut se aashnaa naa-aashnaa hamdam
aur un kii yaad ke maanuus qaasid
aur un kii chaahato.n ke hijr-naame
duur deso.n se hamaarii or aate hai.n
gulaabii mausamo.n kii dhuup
jab naurasta sabze par qadam rakhtii hu.ii
ma.muura-e-tan me.n dar aatii hai
tuu barfaanii badan me.n
juu-e-KHuu.n aahistagii se gungunaatii hai
udaasii kaa parinda
chup ke jangal me.n
sar-e-shaaKH-e-nihaal-e-Gam chahaktaa hai
ko.ii bhuulaa hu.aa bisraa hu.aa dukh
aabla bin kar Tapaktaa hai
to yuu.n lagtaa hai
jaise harf apne
zinda aavaazo.n kii suurat hai.n
abhii ham KHuub-suurat hai.n
hamaarii KHush-numaa.ii harf-e-haq kii ruu-numaa.ii hai
usii KHaatir to ham aashufta-jaa.n
ushshaaq kii yaado.n me.n rahte hai.n
ki jo un par guzartii hai vo kahte hai.n
hamaarii harf-saazii
ab bhii mahbuub-e-jahaa.n hai
shaa.erii shoriid-gaan-e-ishq ke vird-e-zabaa.n hai
aur gulaabo.n kii tarah shaadaa.n chehre
la.al o marjaa.n kii tarah lab
sandalii.n haatho.n se
chaahat aur aqiidat kii bayaazo.n par
hamaare naam likhte hai.n
sabhii dard-aashnaa
iisaar mashrab
ham-nafas ahl-e-qafas
jab maqtalo.n kii samt jaate hai.n
hamaare bait gaate hai.n
abhii tak naaz karte hai.n sab ahl-e-qaafila
apne hudii-KHvaano.n par aashufta-kalaamo.n par
abhii ham dastaKHat karte hai.n apne qatl-naamo.n par
abhii ham aasmaano.n kii amaanat
aur zamiino.n kii zaruurat hai.n
abhii ham KHuub-suurat hai.n

Ahmad Faraz

Nazm

kisan

sochtaa jaataa hai kin aa.nkho.n se dekhaa jaa.egaa
be-ridaa biivii kaa sar bachcho.n kaa mu.nh utraa hu.aa

Josh Malihabadi

Nazm

haqiqat

titlii jugnuu rang-o-KHushbuu
gul-o-bulbul jaise
isti'aare nahii.n hai.n paas mire
kyuu.nke mai.n ne
sisaktii sulagtii ta.Daptii hu.ii
zindagii ko dekhaa hai
khulii aa.nkh se
mai.n ne dekhii hai
lahuu se tar sa.Dke.n
mai.n ne dekhe hai.n general ward me.n
bebasii se e.Diyaa.n raga.Dte hu.e
bachche buu.Dhe laachaar
mai.n ne dekhii hai.n
roTii ke badle
ridaa hotii hu.ii
taar-taar
mire shu'uur me.n
aaj bhii taaza hai
'saara-shagufta’ ke binaa kafan ke
phuul jaise bachche kii laash
mai.n ne dekhii hai
masjid kii TuuTtii hu.ii mehraab
ab mirii be-nuur aa.nkhe.n
kaise dekhe ko.ii hasiin KHvaab

Fauzia Mughal

Nazm

tazad

yaziid naqsha-e-jaur-o-jafaa banaataa hai
husain us me.n KHat-e-karbalaa banaataa hai
yaziid mausam-e-isyaa.n kaa laa-'ilaaj maraz
husain KHaak se KHaak-e-shifaa banaataa hai
yaziid kaaKH-e-kasaafat kii Doltii buniyaad
husain husn kii hairat-saraa banaataa hai
yaziid tez havaa.o.n se jo.D to.D me.n gum
husain sar pe bahan ke ridaa banaataa hai
yaziid likhtaa hai taariikiyo.n ko KHat din bhar
husain shaam se pahle diyaa banaataa hai
yaziid aaj bhii bante hai.n log koshish se
husain KHud nahii.n bantaa KHudaa banaataa hai

Ghulam Mohammad Qasir

Nazm

bus-satand par

KHudaayaa ab ke ye kaisii bahaar aa.ii''
KHudaa se kyaa gila bhaa.ii
KHudaa to KHair kis ne us kaa aks-e-naqsh-e-paa dekhaa
na dekhaa to bhii dekhaa aur dekhaa bhii to kyaa dekhaa
magar tauba mirii tauba ye insaa.n bhii to aaKHir ik tamaashaa hai
ye jis ne pichhlii Taa.ngo.n par kha.Daa honaa ba.De jatano.n se siikhaa hai
abhii kal tak jab us ke abruu.o.n tak muu-e-pechaa.n the
abhii kal tak jab us ke ho.nT mahruum-e-zanaKHdaa.n the
ridaa-e-sad-zamaa.n o.Dhe laraztaa kaa.nptaa baiThaa
zamiir-e-sa.ng se bas ek chi.ngaarii kaa taalib thaa
magar ab to ye uu.nchii mamTiyo.n vaale jilau-KHaano.n me.n basta hai
hamaare hii labo.n se muskuraahaT chhiin kar ab ham pe ha.nstaa hai
KHudaa us kaa KHudaa.ii us kii har shai us kii ham kyaa hai.n
chamaktii motoro.n se u.Dne vaalii dhuul kaa naachiiz zarra hai.n
hamaarii hii tarah jo paa.emaal-e-satvat-e-amiirii-o-shaahii me.n
likhokhaa aabdiida paa-piyaada dil-zada vaamaa.nda raahii hai.n
jinhe.n nazro.n se gum hote hu.e rasto.n kii gum-paimaa lakiiro.n me.n
dikhaa.ii de rahii hai.n aane vaalii manzilo.n kii dhundlii tasviire.n
zaruur ik roz badlegaa nizaam-e-qismat-e-aadam
basegii ik na.ii duniyaa sajegaa ik nayaa aalam
shabistaa.n me.n na.ii sham.e.n gulistaa.n me.n nayaa mausam
''vo rut ai ham-nafas jaane kab aa.egii
vo fasl-e-der-ras jaane kab aa.egii
ye nau number kii bas jaane kab aa.egii

Majeed Amjad

Nazm

adl-e-faruqi ka ek namuna

ek din hazrat-e-faaruuq ne mimbar pe kahaa
kyaa tumhe.n hukm jo kuchh duu.n to karoge manzuur
ek ne uTh ke kahaa ye ki na maane.nge kabhii
ki tire adl me.n ham ko nazar aataa hai futuur
chaadare.n maal-e-Ganiimat me.n jo ab ke aa.ii.n
sehan-e-masjid me.n vo taqsiim hu.ii.n sab ke huzuur
un me.n har ek ke hisse me.n faqat ik aa.ii
thaa tumhaaraa bhii vahii haq ki yahii hai dastuur
ab jo ye jism pe tere nazar aataa hai libaas
ye usii luuT kii chaadar se banaa hogaa zaruur
muKHtasar thii vo ridaa aur tiraa qad hai daraaz
ek chaadar me.n tiraa jism na hogaa mastuur
apne hisse se ziyaada jo liyaa tuu ne to ab
tuu KHilaafat ke na qaabil hai na ham hai.n maamuur
garche vo had-e-manaasib se ba.Dhaa jaataa thaa
sab ke sab mohr-ba-lab the che inaas o che zakuur
rok de ko.ii kisii ko ye na rakhtaa thaa majaal
nashsha-e-adl-o-masaavaat se sab the maKHmuur
apne farzand se faaruuq-e-mo.azzam ne kahaa
tum ko hai haalat-e-aslii kii haqiiqat pe ubuur
tumhii.n de sakte ho is kaa mirii jaanib se javaab
ki na pak.De mujhe mahshar me.n miraa rabb-e-Gafuur
bole ye ibn-e-umar sab se muKHaatib ho kar
is me.n kuchh vaalid-e-maajid kaa nahii.n jurm o qusuur
ek chaadar me.n jo puuraa na hu.aa un kaa libaas
kar sakii is ko gavaaraa na mirii tab-e-Gayuur
apne hisse kii bhii mai.n ne unhe.n chaadar de dii
vaaqi.a kii ye haqiiqat hai ki jo thii mastuur
nukta-chii.n ne ye kahaa uTh ke ki haa.n ai faaruuq
hukm de ham ko ki ab ham use maane.nge zaruur

Shibli Nomani

Nazm

kohre ka khet

vo sard raat jabki safar kar rahaa thaa mai.n
ra.ngiiniyo.n se zarf-e-nazar bhar rahaa thaa mai.n
tezii se ja.ngalo.n me.n u.Dii jaa rahii thii rail
KHvaabiida kaa.enaat ko chau.nkaa rahii thii rail
mu.Dtii uchhaltii kaa.nptii chi.nghaa.Dtii hu.ii
kohre kii vo dabiiz ridaa phaa.Dtii hu.ii
pahiyo.n kii gardisho.n me.n machaltii thii raagnii
aahan se aag ban ke nikaltii thii raagnii
pahu.nchii jidhar zamii.n kaa kaleja hilaa diyaa
daaman me.n tiirgii ke garebaa.n banaa diyaa
jho.nke havaa ke barf bichhaate the raah me.n
jalve samaa rahe the laraz kar nigaah me.n
dhoke se chhuu ga.ii.n jo kahii.n sard u.ngliyaa.n
bichchhuu saa Da.nk maarne lagtii thii.n khi.Dkiyaa.n
pichhle pahar kaa narm dhu.ndlakaa thaa pur-fishaa.n
maayuusiyo.n me.n jaise umiido.n kaa kaarvaa.n
be-nuur ho ke Duubne vaalaa thaa maahtaab
kohre me.n khup ga.ii thii sitaaro.n kii aab-o-taab
qabze se tiirgii ke sahar chhuuTne ko thii
mashriq ke haashiye me.n kiran phuuTne ko thii
kohre me.n thaa Dhake hu.e baaGo.n kaa ye samaa.n
jis tarah zer-e-aab jhalaktii ho.n bastiyaa.n
bhiigii hu.ii zamii.n thii namii sii fazaa me.n thii
ik kisht-e-barf thii ki mu.allaq havaa me.n thii
jaaduu ke farsh sehr ke sab saqf-o-baam the
dosh-e-havaa pe pariyo.n ke siimii.n KHiyaam the
thii ThanDe ThanDe nuur me.n kho.ii hu.ii nigaah
Dhal kar fazaa me.n aa.ii thii huuro.n kii KHvaab-gaah
ban ban ke phen suu-e-falak dekhtaa hu.aa
dariyaa chalaa thaa chho.D ke daaman zamiin kaa
is shabnamii dhundalke me.n bagule the yuu.n ravaa.n
maujo.n pe mast ho ke chale.n jaise machhliyaa.n
Daalaa kabhii fazaa.o.n me.n KHat kho ga.e kabhii
jhalke kabhii ufuq me.n nihaa.n ho ga.e kabhii
engine se u.D ke kaa.nptaa phirtaa thaa yuu.n dhu.aa.n
letaa thaa lahr khet me.n kohre ke aasmaa.n
us vaqt kyaa thaa ruuh pe sadma na puuchhiye
yaad aa rahaa thaa kis se bichha.Dnaa na puuchhiye
dil me.n kuchh aise ghaav the tiir-e-malaal ke
ro ro diyaa thaa khi.Dkii se gardan nikaal ke

Kaifi Azmi

Nazm

guftugu jo hoti hai sal-e-nau se ambar ki

dahshato.n kii laasho.n par amn kii ridaa Daale.n
aur KHizaa.n ke mausam ko fasl-e-gul banaa Daale.n

Aleena Itrat

Nazm

elan nama

mai.n laakh buzdil sahii magar mai.n usii qabiile kaa aadmii huu.n ki jis ke beTo.n ne
jo kahaa us pe jaan de dii
mai.n jaantaa thaa mire qabiile kii KHema-gaahe.n jalaa.ii jaa.e.ngii aur tamaashaa.ii
raqs-e-sho.ala-fishaa.n par israar hii kare.nge
mai.n jaantaa thaa miraa qabiila buriida aur be-ridaa saro.n kii gavaahiyaa.n
le ke aa.egaa phir bhii log inkaar hii kare.nge
so mai.n kamii.n-gaah-e-aafiyat me.n chalaa gayaa thaa
so mai.n amaa.n-gaah-e-maslahat me.n chalaa gayaa thaa
aur ab mujhe mere shahsavaaro.n kaa KHuun aavaaz de rahaa hai
to nazr-e-sar le ke aa gayaa huu.n
tabaah hone ko ek ghar le ke aa gayaa huu.n
mai.n laakh buzdil sahii magar mai.n usii qabiile kaa aadmii huu.n!

Iftikhar Arif

Nazm

raftagan ka pata

unhe.n bataataa huu.n sard mausam me.n dhuup thii so
be-ruKHii kii ridaa ko o.Dhe kisii do-pahrii me.n so ga.e ho
tum ik paraa.e ke ho ga.e ho
kisii se kahtaa huu.n achchhe logo.n kii sohbato.n me.n sa.nvar ga.e ho
kisii se kahtaa huu.n mar ga.e ho

Ashu Mishra

Nazm

chand

vo niile aasmaan par safed halqa
jise sab chaa.nd kahte hai.n
jise hind-o-paak ke bachche maamaa samajhte hai.n salaam karte hai.n
jise sho.araa
hasiin chehro.n se ta.abiir karte hai.n
vo niile aasmaan par safed halqa
chamaktaa hai jo ghaTtaa ba.Dhtaa bhii hai
KHalaa kii mu.nDero.n pe chaltaa bhii hai
KHayaal-e-mahbuub se
shab-e-tanhaa.ii ko jagmagaataa bhii hai aa.nsuu.o.n me.n jhilmilaataa bhii hai
vo niile aasmaan par safed halqa
ziyaa jis kii yaado.n kaa darpan dikhaatii rahii
javaa.n dil kii dha.Dkan jagaatii rahii
KHayaalo.n me.n
kisii ko bulaatii rahii jazbaat gudgudaatii rahii
vo niile aasmaan par safed halqa
talaash me.n jis kii ghire
buto.n kii tarah be-kahe be-sune
hayaat-o-maut se be-KHabar
hazaaro.n sciencedaa.n us pe jaane ko koshaa.n rahe
vo niile aasmaan par safed halqa
dikhaa.ii dene ke baavajuud bhii jo sab kaa
bas ik KHayaal thaa tasavvur thaa
achaanak ek din
usii insaa.n ke qadmo.n ke niiche aa gayaa
vo niile aasmaan par safed halqa
na jis par ko.ii zindagii hai
na husn-e-fitrat kii ridaa yaa o.Dhnii hai
jahaa.n sirf KHaamushii hai
vo niile aasmaan par safed halqa
haqiiqat jis kii sab samajh me.n aa ga.ii phir bhii
kisii shaa.ir ne kyo.n apne mahbuub kii us se misaal dii
nazar me.n us kii vo hasii.n bhii kyaa chaa.nd jaisaa hai jahaa.n kuchh bhii nahii.n
jahaa.n hai bas chand lamho.n kii chaa.ndnii

Javed Rasheed Amir

Nazm

ai subh-e-watan

gul-baar ridaa-e-aazaadii sarshaar javaanii kaa parcham
ye amn ke naGmo.n kaa mutrib KHaamosh baGaavat kaa ye alam

Saghar Nizami

Nazm

hawa ruki hai to raqs-e-sharar bhi KHatm hua

qalam udaas hai lafzo.n me.n hashr barpaa hai
havaa rukii hai to raqs-e-sharar bhii KHatm hu.aa
junuun-e-shauq junuun-e-safar bhii KHatm hu.aa
furaat-e-jaa.n
tirii maujo.n me.n ab ravaanii nahii.n
ko.ii fasaana nahii.n ab ko.ii kahaanii nahii.n
simaT ga.e hai.n kinaare vo be-karaanii nahii.n
to kyaa ye nabz kaa chalnaa hii zindagaanii hai
nahii.n nahii.n ye ko.ii ziist kii nishaanii nahii.n
ki saa.ns lenaa faqat ko.ii zindagaanii nahii.n
kuchh aur rang me.n aa.ii hai ye KHizaa.n ab ke
hai simTii simTii sii KHud me.n hii Gairat-e-naahiid
miyaan-e-ahl-e-tariiqat bhii be-ridaa hai Gazal
hujuum-e-ahl-e-zabaa.n aur be-navaa hai Gazal
safar ye kaise kare KHaarzaar rasto.n par
thakan savaar hai is par barahna-paa hai Gazal
tumhaaraa saath jo chhuuTaa to ab pareshaa.n hai
ki is taGaaful-e-be-jaa pe saKHt hairaa.n hai
ye kis maqaam pe tum ne akelaa chho.D diyaa
tumhe.n KHabar hai ki tum se bahut KHafaa hai Gazal
ye be-makaanii
ye tanhaa.ii aur ye dar-ba-darii
sataa rahaa hai bahut ab KHayaal-e-ham-safarii
saliib-o-daar-o-rasan se guzar rahii hai Gazal
chale bhii aa.o kahaa.n ho ki mar rahii hai Gazal
siyah libaas me.n nauhe udaas baiThe hai.n
saro.n ko thaame qasiide udaas baiThe hai.n
hai marsiye kii nigaaho.n me.n abr Thahraa hu.aa
badan dariida latiife udaas baiThe hai.n
ubhar rahii hai ye kaisii sadaa-e-vaavailaa
sirhaane dekho rubaa.ii kaa bain hotaa hai
vo dekho
nazm-e-garebaan chaak karte hu.e
duhaa.ii detii hai maqtal ke isti.aaro.n kii
alaamato.n kii kinaayo.n kii aur ishaaro.n kii
bahut maluul hai.n shahr-e-suKHan kii tahriire.n
shab-e-alam ke hai.n qisse junuu.n kii tafsiire.n
varaq varaq hai pareshaa.n Gubaar-e-KHaatir kaa
hu.aa hai nasr ko ehsaas phir yatiimii kaa
havaa-e-shahr-e-sitam kis adaa se guzrii hai
dahan KHamosh hai.n
chup chup se hai.n suKHan ke charaaG
bujhii bujhii sii hai qindiil-e-KHaanqaah-e-adab
dhu.aa.n dhu.aa.n hai.n
KHitaabat ke fikr-o-fan ke charaaG
hai aasmaan adab pe vo dhu.nd chhaa.ii hu.ii
dikhaa.ii detaa nahii.n ab ko.ii sitaara-e-nuur
kalaam kaa vo qariina
vo guftuguu kaa shu.uur
kahaa.n se ab ko.ii laa.egaa saanii-e-manzuur
ajiib vaqt pa.Daa hai fan-e-nizaamat par
ki dam-ba-KHud se kha.De hai.n ab 'anvar'-o-'manzuur'
vaqaar kaise ataa ho shikasta lahjo.n ko
rafuu kare ko.ii kaise dariida jumlo.n ko
hai muskuraanaa zaruurii vaqaar-e-Gam ke liye
taraashe kaun zabaa.n hurmate-qalam ke liye
tumhaare jaane se viiraan ho ga.ii mahfil
uja.D gayaa hai ye dekho jahaan-e-shahr-e-adab
samajh me.n kuchh nahii.n aataa ki ab kahaa.n jaa.e.n
bhaTakte phirte hai.n ab saakinaan-e-shahr-e-adab
ye mai-kade kii udaasii
ye jaam ulTe hu.e
ki jaise ro.e ho.n shab-bhar ye saaGar-o-miinaa
ka.ii dino.n se ha.nsii hii nahii.n hai collage-girl
tumhaare hijr ne patthar banaa diyaa hai use
bahut udaas ba.Dii be-qaraar chup chup sii
ki huzn-o-yaas kaa manzar banaa diyaa hai use
vo dekho mez pe jitnii kitaabe.n rakkhii hai.n
tumhaarii gard rifaaqat hai sab ke chehre par
pukaartii hai.n tumhe.n ye adhuurii tahriire.n
bikharte TuuTte KHvaabo.n kii tishna ta.abiire.n
ye uj.Daa uj.Daa dabistaan Dhuu.nDhtaa hai tumhe.n
chale bhii aa.o ki imkaan Dhuu.nDhtaa hai tumhe.n
jo ho sake to chale aa.o tum malik-zaada
magar ye KHvaahish-e-bejaa
use KHabar hii nahii.n
ki jaane vaale kabhii lauT kar nahii.n aate
mahakte rahte hai.n gul-daan un kii yaado.n ke
sulagte rahte hai.n lobaan un kii yaado.n ke

Tariq Qamar

Nazm

shair-e-KHush-nawa

vahii kaar-e-duniyaa
vahii kaar-e-duniyaa ke apne jhamele
vahii dil kii haalat
vahii KHvaahisho.n aarzuu.o.n ke mele
vahii zindagii se bharii bhii.D me.n chalne vaale sabhii log
apnii jagah par akele
ka.ii gard-aaluud manzar nigaaho.n kii dahliiz par jam ga.e hai.n
mujhe yuu.n lagaa jaise chalte hu.e vaqt ke qaafile tham ga.e hai.n
zaraa sii.Dhiyo.n se udhar mai.n ne dekhaa
vahii shahr hai aur vahii shahr kii be-karaamat fazaa hai
vahii KHalq hai aur vahii KHalq ke bhuul jaane kii apnii adaa hai
vahii raaste hai.n vahii be-suhuulat safar kii sazaa hai
vahii saa.ns lene ko jiine ko be-mehr aab-o-havaa hai
vahii zindagii hai vahii us ke chaaro.n taraf be-tahaffuz ridaa hai
vahii sii.Dhiyo.n se udhar raahdaarii ke baa.e.n taraf KHaalii kamra
tirii guftuguu se bharaa KHaalii kamra
tire qahqaho.n ke samundar me.n Duubaa hu.aa aa.nsu.o.n kaa jaziira
jaziire me.n u.Dtaa hu.aa ik parinda
mu.nDero.n dariicho.n daraKHto.n kii tanhaa.iyo.n kaa mudaavaa parinda
tirii chaahato.n aur vafaa-daariyo.n ke ufuq par sitaara-numaa ik parinda
tire giit gaataa
tamannaa.o.n kii baarisho.n me.n nahaataa
kisii taaza imkaan ko jagmagaataa
kahii.n duur phailii hu.ii kahkashaa.o.n me.n gum ho gayaa hai
zaraa sii.Dhiyo.n se udhar mai.n ne dekhaa
ka.ii likhne vaale
KHushaamad kaa kaasa liye apne Giibat-kade me.n kha.De hai.n
siyaasii vaDere
musaavaat kaa naam le kar hamesha Gariib aadmii kii anaa se la.De hai.n
ka.ii ahl-e-daanish
jo mazluum kii aah-o-zaarii pe dikhte the
zaalim ke dar par pa.De hai.n
yahaa.n ko.ii chhoTaa nahii.n hai
sab ik duusre se ba.De hai.n
tirii shaa.irii kaa KHamiir apne jazbo.n kii sachchaa.iyo.n se uThaa thaa
tuu apne usuulo.n ke aatish-fishaa.n par kha.Daa
zindagii kii riyaa-kaariyo.n se nabard-aazmaa thaa
tuu apne ravayyo.n kii sab haalato.n me.n
mohabbat se likkhii hu.ii ik du.aa thaa
tuu ahl-e-vafaa kaa zamiir aashnaa thaa
abhii sii.Dhiyaa.n cha.Dhte cha.Dhte mai.n ruk saa gayaa huu.n
vahaa.n kaun hai
kaun hai ab jo dastak kii pahlii kiran kii hikaayat sunegaa
na.e ratjago.n kii masaafat me.n uljhe hu.e aane vaale dino.n kii
rivaayat sunegaa
charaaGo.n kii aavaaz me.n
aa.ino.n kii tilaavat sunegaa
mire shaa.ir-e-KHush-navaa
tuu ki dushman bhii achchhaa thaa
aur dostii me.n bhii teraa yahaa.n ko.ii saanii nahii.n hai
jise ahl-e-dil bhuul jaa.e.nge
tuu vo kahaanii nahii.n hai

Saleem Kausar

Nazm

barf-bari ki rut

yahii.n to kahii.n par
tumhaare labo.n ne
mire sard ho.nTo.n se barfiile zarre chune the
usii pe.D kii chhaal par haath rakh kar
ham ik din kha.De the
yahii.n barf-baarii me.n ham la.Dkha.Daate hu.e jaa rahe the
bahak taaza boso.n kii sar me.n samaa.e
ham-aaGoshii jism-o-jaa.n ke nashe me.n
ga.ii barf-baarii kii rut
aur pighaltii hu.ii barf bhii bah ga.ii sab
yahaa.n kuchh nahii.n ab
ki har shai na.ii hai
haTaa kar ridaa barf kii ghaas lahraa rahii hai
harii pattiyo.n kii ghanii Tahniyo.n me.n
havaa jab chale to
ga.e mausamo.n se guzartii
hamaarii ha.nsii guu.njtii hai

Fahmida Riaz

Nazm

actress ka contract

miraa vajuud zindagii kaa bhed hai dekh
ye ek ho.nT ke sho.ale pe barg-e-gul se KHaraash
ye ek jism ke kundan me.n gudgudii se gudaaz
ye ek ruuh bhi.nche baazu.o.n me.n kheltii lahr!
zaraa qariib to aa dekh tere saamne hai.n
ye surKH ras bhare lab jin kii ik jhalak ke liye
kabhii qabiilo.n ke dil joshano.n me.n dha.Dke the
jo tuu kahe to yahii ho.nT surKH ras bhare ho.nT
tire lahuu me.n shaguufe khilaa bhii sakte hai.n!
qariib aa ye badan merii zindagii kaa tilism
tirii nigaah kii chi.ngaariyo.n kaa pyaasaa hai
jo tuu kahe to yahii narm lahariyaa aa.nchal
yahii naqaab mirii chuTkiyo.n me.n aTkii hu.ii
yahii ridaa mirii a.ng.Daa.iyo.n se maskii hu.ii
ye aabshaar Dhalaano.n se gir bhii saktii hai
bas ek shart... ye gauhar sutuur-e-dastaavez
zaraa ko.ii ye vasiiqa raqam kare to sahii
ikaa.iiyo.n ke udhar jitne daa.ere ho.nge!
idhar bhii utne hii aks un barahna sho.alo.n ke

Majeed Amjad

Nazm

ye hum kaun hain

ye ham kaun hai.n
vaqt kii shaah-raaho.n pe na.nge qadam
tez tez dhuup me.n
be-ridaa be-amaa.n
raaste me.n ko.ii miil patthar nahii.n
aur havaa-e-masaafat guzarte hu.e
ruk ke kahtii hai ye
ko.ii manzil tumhaaraa muqaddar nahii.n

Shaheen Mufti

Nazm

main jina chahta hun magar

mai.n jiinaa chaahtaa huu.n
magar kii.De-mako.Do.n aur be-maaya maKHluuqaat kii tarah
re.ng re.ng kar nahii.n!
mai.n jiinaa chaahtaa huu.n
magar apne baatin me.n
kulbulaate shar par
zaahirii aKHlaaq kii ridaa
Daal kar nahii.n
mai.n jiinaa chaahtaa huu.n
magar aise nahii.n
ki mere vajuud ke andar
buGz havas aur riyaa-kaarii kii baaruudii sura.nge.n
bichhii ho.n
aur har lahza har pal
ye KHauf
ki kab ko.ii
remote control se
anaa aur Gairat ehsaas aur jazbe
kii KHuub-suurat imaarato.n ko
Dhaa de
mai.n jiinaa chaahtaa huu.n
apne puure vajuud kii saarii ikaa.iiyo.n ke saath
aur mujhe ye ehsaas na sataa.e
ki ye zindagii
kisii kii bhiik me.n dii hu.ii saa.nso.n kaa hissa hai
mai.n jiinaa chaahtaa huu.n
ek aisii duniyaa me.n
jahaa.n mulk-giirii ke junuun
itne shadiid na ho.n ki
itemi tavaanaa.ii se mumayyaz aalaat fazaa ko masmuum kar de.n
insaan us kii hazaaro.n barso.n kii puraanii qadre.n
aisii paamaal ho jaa.e.n jaise haqiir zarre
magar mai.n jaantaa huu.n
ye sab mumkin nahii.n
to mai.n marnaa chaahuu.ngaa
par aisii maut nahii.n
ki merii laash ko
qabristaan tak pahu.nchaane me.n
takalluf majbuurii aur zabardastii kaa shaa.iba ho
yaa du.aa me.n hilte hu.e lab
aur uThaa.e hu.e haath
majbuuraan o rasman ho.n
haa.n aisii maut jo kisii kii aa.nkho.n me.n
Thahre hu.e chand qatre
KHaamoshii se mere kafan me.n
jazb ho jaa.e.n
aur bas!!

Yusuf Taqi

Load More

Search

ENG

Notification

Rekhta Foundation

Devoted to the preservation & promotion of Urdu

Rekhta Dictionary

A Trilingual Treasure of Urdu Words

Sufinama

Online Treasure of Sufi and Sant Poetry

Hindwi

World of Hindi language and literature

Rekhta Learning

The best way to learn Urdu online

Rekhta Books

Best of Urdu & Hindi Books

Donate

Speak Now