Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "shumaalii"

Nazm MATCHES FOR "shumaalii"

Nazm

mrs-sala-manka

KHudaa hashr me.n ho madad-gaar meraa
ki dekhii hai.n mai.n ne mrs.-saalaa-maa.nkaa kii aa.nkhe.n
mrs.-saalaa-maa.nkaa kii aa.nkhe.n
ki jin ke ufuq hai.n junuubii samundar kii niilii rasaa.ii se aage
junuubii samundar kii niilii rasaa.ii
ki jis ke jaziire hujuum-e-sahar se daraKHshaa.n
daraKHshaa.n jaziiro.n me.n zartaab o unnaab o qurmuz parindo.n kii jaulaa.n-gahe.n
aise phailii hu.ii jaise jannat ke daamaa.n
parinde azal aur abad ke mah o saal me.n baal-afshaa.n!
KHudaa hashr me.n ho madad-gaar meraa
ki mai.n ne liye hai.n mrs.-saalaa-ma.nkaa ke ho.nTo.n ke bose
vo bose ki jin kii halaavat ke chashme
shumaalii zamiino.n ke zartaab o unnaab o qurmuz daraKHto.n
ke mad.hosh baaGo.n se aage
jahaa.n zindagii ke rasiida shaguufo.n ke siino.n
se KHvaabo.n ke ram-diida zambuur lete hai.n ras aur piite hai.n vo
ki jis ke nashe kii jilaa se
zamaano.n kii naadiida mehraab ke do kinaaro.n ke niiche
hai.n yak-baargii guu.nj uThte KHalaa o malaa ke jalaajil
jalaajil ke naGme baham aise paivast hote hai.n jaise
mrs.-saalaa-ma.nikaa ke lab mere lab se!

Noon Meem Rashid
Nazm

qissa gul-baadshah ka

baap kaa naam zar-taaj-gul
umar battiis baras
vo mujaahid shahaadat kaa taalib raah-e-haq kaa musaafir hu.aa
aur jaam-e-shahaadat bhii us ne
apne bhaa.ii ke haatho.n piyaa
jo shumaalii mujaahid thaa
aur panj-vaqta namaazii bhii thaa
mas.ala is shahaadat kaa pechiida hai
is ko behtar yahii hai yahii.n chho.D de.n
ab bahar-haal baabaa to jannat me.n hai
us ke haatho.n me.n jaam-e-tuhuur
us kii baa.nho.n me.n huur o qusuur
merii taqdiir me.n bam-dhamaake dhu.aa.n
pighaltii hu.ii ye zamiin
bikhartaa hu.aa aasmaa.n
baad-az-marg vo zinda hai
zindagii mujh se sharminda hai

Zehra Nigaah
Nazm

ek desi hasina se mulaqat

aa.ii thii yahaa.n zulf-e-girah-giir kaTaa kar
mashriq kii havaa baad-e-shumaalii kii tarah thii

Khalid Irfan
Nazm

ye tamasha-e-gah-e-alam kya hai

nuur-e-mahtaab kii chaadar le kar
ghaas sotii hii rahii
phuul lab band rahe
pe.D rahe mahv-e-sukuut
tund-rau baad-e-shumaalii kaa tarii.Daa aayaa
phuul teyoraa se ga.e
pe.D hu.e sar-ba-sujuud
ghaas ne chaadar-e-mahtaab me.n karvaT badlii
ye tamaashaa-gah-e-aalam kyaa hai

Tasadduq Husain Khalid
Nazm

apotheosis

hame.n bataayaa gayaa hai
sard qahqaho.n ke aahanii jumuud se
shumaalii mirriiKH par na.e saahil banaa.e jaa.e.nge
nsibatan kam sanjiida la.Dkiyaa.n
hamaarii mahbuubaa.e.n nahii.n ban saktii.n
alberta ke landscape me.n
windmills ke chakraate saa.e
tulips kii aa.nkho.n se barf haTaa.e.nge
ibaadat-gaah kii diivaaro.n par kanda
KHudaa ke farmaan par phuul rakhne ke evaz
vo ham se bad-zan nahii.n hogaa
daffodils ke haath accordion bajaa.e.nge
jin se phuuTtii thakii haarii mausiiqiyat
street light kii buu.Dhii raushnii taan kar so jaa.egii
washington d-c me.n cherii ke daraKHto.n par
na.e saal ke KHvaab ugaa.e jaa.e.nge
saagaano ke sabz baa.nso.n se
vailen ke taar banaa.e jaa.e.nge jin par
red indian maa.o.n ke siino.n se pighaltii
niilii bad-du.aa.e.n bajaa.ii jaa.e.ngii
javaa.n-marg hasiinaa.o.n kii gol siskiyaa.n
shikasta piano kii daraa.Do.n se
murda giito.n ke fingerprints udhe.D le.ngii
za.ng-aaluud khi.Dkii ke maile shiisho.n se
kaa.nptii u.ngliyo.n kii nuqra.ii uljhane.n
adhuurii nazmo.n ke laashe khurach le.ngii
is se pahle ki ham KHauf-zada ho.n
ham se pahle taKHliiq kii jaane vaalii
hamaarii mahbuubaa.o.n ke jismaanii irtiqaa se
jism ho.nTo.n par taqsiim kiye jaa.e.nge
barf-zada parinde hame.n dekh paa.e.nge
hamaare gunaah muqaddas hai.n
anjaan doshiiza kii farmaa.ish par likhe ga.e novel kii tarah

Hasan Alvi
Nazm

ek manzar

ser-eleven ke smugglers
hiiro.n kii smuggling par baate.n kar rahe hai.n
shumaalii bulgaria ke ilaaqo.n se
umda qism kaa tambaakuu aane vaalaa hai
light-tower kii sii.Dhiyo.n ke niiche
jeans kii nekar me.n kokiin kii thailiyaa.n chhupaa kar
maiDonaa vaapas jaa chukii hai
buu.Dhaa lenos baiThaa hai
fog light kii piilii raushnii me.n
lamha daa.Dhii khuja rahaa hai
saahil kii hathelii par
ret kii u.ngliyo.n me.n lipTii
barahna saa.nso.n kii uljhan par
raat kaa KHuun saraktaa hai
niDhaal jismo.n kii ruumaaniyat me.n
lams kaa siilan-zada shor girtaa hai
samundar barf kii jhiil me.n
tabdiil ho saktaa hai
cigarette jalaane kaa aalaa
giilaa pa.D gayaa hai
bithos
lighter milegaa
oh shukriya

Hasan Alvi
Nazm

dard ka nam pata mat puchho

dard kaa naam pata mat puuchho
dard ik KHema-e-aflaak
is iqliim pe hai saaya kunaa.n
tum ise qutub shumaalii kah lo
tum jidhar aa.nkh uThaa kar dekho
barf hii barf hai
aur raat hii raat
ham vo maujuud ki jin me.n shaayad
zindagii ban.ne ke aasaar abhii baaqii the
hashraat aise ki jin ko shaayad
raushnii aur haraarat kii zaruurat thii abhii
is andhere me.n kaho barf pe re.nge.n kaise
ko.ii batlaa.o ki is raat ke aazaar se nikle.n kaise
raat aisii ki jo Dhaltii hii nahii.n
barf aisii ki pighaltii hii nahii.n

Mushaf Iqbal Tausifi
Nazm

shahr ki galiyan charaghon se bhar gain

vo papers ke ja.ngalo.n ke shumaalii kinaare pe baiThii
niil ke paaniyo.n ko kaat rahii thii
us ne mere KHaak-aaluud chehre ko
niil kaa aa.iina dikhaayaa
ham mutabarrik tel ke namkiin charaaG hatheliyo.n pe rakhe
shahr-e-panaah kii taraf chal diye
jahaa.n devtaa
baaryaabii ke muntazir the
hamaare qadmo.n kii aahaT paa kar
muqaddas phaaTak ke sunahre kivaa.D
zamiin ke aaKHirii kinaaro.n tak khul ga.e
aur shahar kii itr-bez galiyaa.n
hamaare talve chuumne lagii.n

Jawaz Jafri
Nazm

nizam-e-shamsi

us ne apne safed papoTe jhapkaa.e
maTyaalii aa.nkho.n se puure aasmaan ko taakaa
aur suuraj ko god me.n bhar kar bolaa
ba.Dii aag hai tujh me.n
chal tujhe qutub-shumaalii me.n dafn karte hai.n
chhoTe chhoTe sayyaaro.n kii bhii apnii zindagii hotii hai
unhe.n apne apne kurre par ghuumne de
kis me.n paanii hai
kis me.n havaa
ye dekhnaa teraa kaam nahii.n
apne sayyaare pe zindagii kii alaamate.n Dhuu.nDhnaa
talaash kaa pahlaa nukta hai
terii duurii farhat-baKHsh hai
qurbat andoh-gii.n
tujhe god me.n le kar merii aaGosh me.n chhaale pa.D ga.e

Shahnaz Nabi
Nazm

lamha

zindagii kii nadii me.n nahaate hu.e
KHauf khaate ho tum
jab fanaa ke samundar me.n Gote lagaa.oge
tab kyaa karoge
so masnuu.ii ThanDak ke maare hu.e
murda-KHaana-numaa band da.Dbe se niklo
jiyo
aur saavan kii baarish me.n naacho
jiyo aur dekho
shumaalii pahaa.Do.n pe barfe.n pighalte hii
sabze kaa joban cha.Dhaa hai
papiihe ne aavaaz de kar
pukaaraa hai pii ko
so tum bhii pukaaro kisii ko
suno
jab tumhaare lahuu me.n jamii barf pighlegii
jharnaa bahegaa
to phir zindagii kii nadii aur fanaa kaa samundar
gale mil ke naache.nge
taaza ikaa.ii kii suurat
uTho aur is lamha-e-jaa.n-fazaa ko paka.D lo
mabaadaa ko.ii lamha-e-jaa.n-gusil tum ko paa le

Sultan Nasir
Nazm

kala samundar

saaf-o-shaffaaf paanii kaa dhaaraa
qutub-e-shumaalii se
qutub-e-junuubii tak
ek lakiir sii banaa.e hu.e hai
is saaf-o-shaffaaf dhaare ko
siyaah samundaro.n ne gher liyaa hai

Ali Zaheer Rizvi Lakhnavi
Nazm

bad-tamiz

kyaa tujhe ilm hai
barf-baarii hu.ii hai
shumaalii ilaaqo.n me.n darja-e-haraarat nafii kii ka.ii sii.Dhiyaa.n cha.Dh chukaa
kyaa tujhe ilm hai
gas kamyaab hai
aur bijlii kii qillat ne sarmaa ke din kitne yaKH kar diye
par tujhe kyaa
ki tuu apnii jhuggii ke dar par ba.Dii be-niyaazii se pasrii hu.ii
muft kaa kuu.Daa-karkaT jalaatii hu.ii
ik bha.Daktaa bhabhaktaa alaav banaa.e hu.e
zindagii-baKHsh hiddat kaa saamaa.n kiye
gande naale se uThtii hu.ii dhund kaa luuTtii hai maza
mai.n ne dekhaa abhii
qiimtii jacketo.n aur coato.n me.n malfuuf kuchh be-kaso.n ko ThiThurte hu.e
aur tujhe un pe ha.nste hu.e

Hamida Shaheen
Nazm

tabir

apne taabuut me.n KHud se haibat-zada jabr kii zindagaanii me.n jiitaa rahaa
yuu.n jamaal-e-sahar zard suuraj ke haatho.n me.n girvii rahaa
kasmasaate badan ke junuubii taraf taaziyaano.n kii barsaat jaarii rahii aur shumaalii taraf sa.ng-baarii se udh.Dii hu.ii khaal par
zindagii kii ye tamsiil likkhii ga.ii mai.n to bas vaqt kii jail me.n qaid thaa
aur tasavvur me.n thii lahlahaatii hu.ii KHushnumaa zindagii
ya.anii shanduur kii bhurnhurii ghaas pe baiTh ke match polo ke dekhaa karuu.n
aur qahva kii chuskii lagaate ho.ii sartre ko pa.Dhuu.n
qahqaho.n ke tamavvuj me.n raqsaa.n rahe.n nutq-e-taKHliiq ke be-karaa.n zamzame

Irfan Shahood
Nazm

silin figers

colombia ke duur daraaz dehaato.n me.n
kokiin kii kaasht se paabandii uThaa dii ga.ii hai
shumaalii portugal kii surKH maa.o.n ke sapne
sunahre tambaakuu ke kheto.n me.n javaan hote hai.n
cherii ke ja.ngalo.n kii aqbii samt se
niile parinde ke sar jhaTakne se pahle
baa.ns kii paTrii par
havaa kii rail Gusse bharii siiTii bajaatii hai
bhe.Do.n ke muhaafiz kutte kii nii.nd KHaraab hotii hai
vaqt kii vaadii me.n so.ii hu.ii
sadii ke vahshii ho.nTo.n ko
mafruur lamha chuum saktaa hai
jackdaniels kaa masKH-shuda label
botal kii raakh suu.nghtaa hai
kaasnii mahbuuba kii barahna piiTh par
surma.ii novel kaa haath re.ngtaa hai
zabt kii diivaar me.n paivasta
shelf kii chhaatii par au.ndhe mu.nh pa.De
piile aur bosiida musavvado.n se
jism kii ruumaanviyat ko jaataa rasta
jis kii saakin aaGosh me.n
nazm ke cigarette-zada ho.nTo.n se girtii
nuqra.ii jhurriyo.n ke laashe uu.ngh rahe hai.n
saare manzar ko ek almaarii ghuur rahii hai
pa.nkhe kii bhunbhunaahat so rahii hai

Hasan Alvi
Nazm

wo rasta adam-abaad ki taraf jata tha

duniyaa kaa nasiib likhne vaale
us ke saa.nvle haatho.n me.n
shumaalii misr ke sarsabz baaGo.n ke
avvaliin phal the
jise vo
boTo shahar ke
sab se qadiim daarul-istiKHaara ko
bhe.nT karne aa.ii thii

Jawaz Jafri
Nazm

daraKHt-e-zard

magar aaha.ng meraa kho gayaa shaayad kahaa.n jaane
ko.ii mauj-e-... ko.ii mauj-e-shumaal-e-jaavedaa.n jaane
shumaal-e-jaavedaa.n ke apne hii qisse the jo guzre
vo ho guzre to phir KHud mai.n ne bhii jaanaa vo ho guzre
shumaal-e-jaavedaa.n apnaa shumaal-e-jaavedaan-e-jaa.n
hai ab bhii apnii puu.njii ik malaal-e-jaavedaan-e-jaa.n

Jaun Eliya
Nazm

chand roz aur meri jaan

ye tire husn se lipTii hu.ii aalaam kii gard
apnii do roza javaanii kii shikasto.n kaa shumaar
chaandnii raato.n kaa bekaar dahaktaa hu.aa dard

Faiz Ahmad Faiz
Nazm

dil-e-man musafir-e-man

mire dil, mire musaafir
hu.aa phir se hukm saadir
ki vatan-badar ho.n ham tum
de.n galii galii sadaa.e.n
kare.n ruKH nagar nagar, kaa
ki suraaG ko.ii paa.e.n
kisii yaar-e-naama-bar kaa
har ik ajnabii se puuchhe.n
jo pataa thaa apne ghar kaa
sar-e-kuu-e-naa-shanaayaa.n
hame.n din se raat karnaa
kabhii is se baat karnaa
kabhii us se baat karnaa
tumhe.n kyaa kahuu.n ki kyaa hai
shab-e-Gam burii balaa hai
hame.n ye bhii thaa Ganiimat
jo ko.ii shumaar hotaa
hame.n kyaa buraa thaa marnaa
agar ek baar hotaa!

Faiz Ahmad Faiz
Nazm

dosti ka hath

charaaG jin se mohabbat kii raushnii phaile
charaaG jin se dilo.n ke dayaar raushan ho.n
charaaG jin se ziyaa amn-o-aashtii kii mile
charaaG jin se diye be-shumaar raushan huu.n

Ahmad Faraz
Nazm

masjid-e-qurtuba

silsila-e-roz-o-shab naqsh-gar-e-haadsaat
silsila-e-roz-o-shab asl-e-hayaat-o-mamaat
silsila-e-roz-o-shab taar-e-hariir-e-do-ra.ng
jis se banaatii hai zaat apnii qabaa-e-sifaat
silsila-e-roz-o-shab saaz-e-azal kii fuGaa.n
jis se dikhaatii hai zaat zer-o-bam-e-mumkinaat
tujh ko parakhtaa hai ye mujh ko parakhtaa hai ye
silsila-e-roz-o-shab sairafi-e-kaa.enaat
tuu ho agar kam ayaar mai.n huu.n agar kam ayaar
maut hai terii baraat maut hai merii baraat
tere shab-o-roz kii aur haqiiqat hai kyaa
ek zamaane kii rau jis me.n na din hai na raat
aani-o-faanii tamaam mojaza-haa-e-hunar
kaar-e-jahaa.n be-sabaat kaar-e-jahaa.n be-sabaat
avval o aaKHir fanaa baatin o zaahir fanaa
naqsh-e-kuhan ho ki nau manzil-e-aaKHir fanaa
hai magar is naqsh me.n ra.ng-e-sabaat-e-davaam
jis ko kiyaa ho kisii mard-e-KHudaa ne tamaam
mard-e-KHudaa kaa amal ishq se saahab faroG
ishq hai asl-e-hayaat maut hai us par haraam
tund o subuk-sair hai garche zamaane kii rau
ishq KHud ik sail hai sail ko letaa hai thaam
ishq kii taqviim me.n asr-e-ravaa.n ke sivaa
aur zamaane bhii hai.n jin kaa nahii.n ko.ii naam
ishq dam-e-jibra.iil ishq dil-e-mustafaa
ishq KHudaa kaa rasuul ishq KHudaa kaa kalaam
ishq kii mastii se hai paikar-e-gil taabnaak
ishq hai sahbaa-e-KHaam ishq hai kaas-ul-karaam
ishq faqiih-e-haram ishq amiir-e-junuuud
ishq hai ibnus-sabiil is ke hazaaro.n maqaam
ishq ke mizraab se naGma-e-taar-e-hayaat
ishq se nuur-e-hayaat ishq se naar-e-hayaat
ai haram-e-qurtuba ishq se teraa vajuud
ishq saraapaa davaam jis me.n nahii.n raft o buud
ra.ng ho yaa KHisht o sang cha.ng ho yaa harf o saut
mojaza-e-fan kii hai KHuun-e-jigar se numuud
qatra-e-KHuun-e-jigar sil ko banaataa hai dil
KHuun-e-jigar se sadaa soz o suruur o suruud
terii fazaa dil-faroz merii navaa siina-soz
tujh se dilo.n kaa huzuur mujh se dilo.n kii kushuud
arsh-e-mo.allaa se kam siina-e-aadam nahii.n
garche kaf-e-KHaak kii had hai sip.har-e-kabuud
paikar-e-nuurii ko hai sajda mayassar to kyaa
us ko mayassar nahii.n soz-o-gudaaz-e-sajuud
kaafir-e-hindi huu.n mai.n dekh miraa zauq o shauq
dil me.n salaat o duruud lab pe salaat o duruud
shauq mirii lai me.n hai shauq mirii nai me.n hai
naGma-e-allaah-huu mere rag-o-pai me.n hai
teraa jalaal o jamaal mard-e-KHudaa kii daliil
vo bhii jaliil o jamiil tuu bhii jaliil o jamiil
terii binaa paa.edaar tere sutuu.n be-shumaar
shaam ke sahraa me.n ho jaise hujuum-e-nuKHiil
tere dar-o-baam par vaadii-e-aiman kaa nuur
teraa minaar-e-buland jalva-gah-e-jibra.iil
miT nahii.n saktaa kabhii mard-e-musalmaa.n ki hai
us kii azaano.n se faash sirr-e-kaliim-o-KHaliil
us kii zamii.n be-huduud us kaa ufuq be-saGuur
us ke samundar kii mauj dajla o danyuub o niil
us ke zamaane ajiib us ke fasaane Gariib
ahd-e-kuhan ko diyaa us ne payaam-e-rahiil
saaqi-e-rabaab-e-zauq faaras-e-maidaan-e-shauq
baada hai us kaa rahiiq teG hai us kii asiil
mard-e-sipaahii hai vo us kii zirah laa-ilaah
saaya-e-shamshiir me.n us kii panah laa-ilaah
tujh se hu.aa aashkaar banda-e-momin kaa raaz
us ke dino.n kii tapish us kii shabo.n kaa gudaaz
us kaa maqaam-e-buland us kaa KHayaal-e-aziim
us kaa suruur us kaa shauq us kaa niyaaz us kaa naaz
haath hai allaah kaa banda-e-momin kaa haath
Gaalib o kaar-aafrii.n kaar-kushaa kaarsaaz
KHaakii o nuurii-nihaad banda-e-maulaa-sifaat
har do-jahaa.n se Ganii us kaa dil-e-be-niyaaz
us kii umiide.n qaliil us ke maqaasid jaliil
us kii adaa dil-fareb us kii nigah dil-navaaz
aaj bhii is des me.n aam hai chashm-e-Gazaal
aur nigaaho.n ke tiir aaj bhii hai.n dil-nashii.n
buu-e-yaman aaj bhii us kii havaa.o.n me.n hai
ra.ng-e-hijaaz aaj bhii us kii navaa.o.n me.n hai
diida-e-anjum me.n hai terii zamii.n aasmaa.n
aah ki sadiyo.n se hai terii fazaa be-azaa.n
kaun sii vaadii me.n hai kaun sii manzil me.n hai
ishq-e-balaa-KHez kaa qaafla-e-saKHt-jaa.n
dekh chukaa almanii shorish-e-islaah-e-dii.n
jis ne na chho.De kahii.n naqsh-e-kuhan ke nishaa.n
harf-e-Galat ban ga.ii ismat-e-piir-e-kunisht
aur hu.ii fikr kii kashti-e-naazuk ravaa.n
chashm-e-faraansiis bhii dekh chukii inqalaab
jis se digar-guu.n hu.aa maGrabiyo.n kaa jahaa.n
millat-e-ruumii-nizhaad kohna-parastii se piir
lazzat-e-tajdiida se vo bhii hu.ii phir javaa.n
ruuh-e-musalmaa.n me.n hai aaj vahii iztiraab
raaz-e-KHudaa.ii hai ye kah nahii.n saktii zabaa.n
narm dam-e-guftuguu garm dam-e-justujuu
razm ho yaa bazm ho paak-dil o paak-baaz
nuqta-e-parkaar-e-haq mard-e-KHudaa kaa yaqii.n
aur ye aalam tamaam vahm o tilism o majaaz
aql kii manzil hai vo ishq kaa haasil hai vo
halqa-e-aafaaq me.n garmi-e-mahfil hai vo
kaaba-e-arbaab-e-fan satvat-e-diin-e-mubii.n
tujh se haram martabat undulusiyo.n kii zamii.n
hai tah-e-garduu.n agar husn me.n terii naziir
qalb-e-musalmaa.n me.n hai aur nahii.n hai kahii.n
aah vo mardaan-e-haq vo arabii shahsavaar
haamil-e-KHalq-e-aziim saahab-e-sidq-o-yaqii.n
jin kii hukuumat se hai faash ye ramz-e-Gariib
saltanat-e-ahl-e-dil faqr hai shaahii nahii.n
jin kii nigaaho.n ne kii tarbiyat-e-sharq-o-Garb
zulmat-e-europe me.n thii jin kii KHirad-raah-bii.n
jin ke lahuu ke tufail aaj bhii hai.n undulusii
KHush-dil o garam-iKHtilaat saada o raushan-jabii.n
dekhiye is bahr kii tah se uchhaltaa hai kyaa
gumbad-e-niilofarii rang badaltaa hai kyaa
vaadi-e-koh-saar me.n Garq-e-shafaq hai sahaab
laal-e-badaKHshaa.n ke Dher chho.D gayaa aaftaab
saada o pur-soz hai duKHtar-e-dahqaa.n kaa giit
kashtii-e-dil ke liye sail hai ahd-e-shabaab
aab-e-ravaan-e-kabiir tere kinaare ko.ii
dekh rahaa hai kisii aur zamaane kaa KHvaab
aalam-e-nau hai abhii parda-e-taqdiir me.n
merii nigaaho.n me.n hai us kii sahar be-hijaab
parda uThaa duu.n agar chehra-e-afkaar se
laa na sakegaa fara.ng merii navaa.o.n kii taab
jis me.n na ho inqalaab maut hai vo zindagii
ruuh-e-umam kii hayaat kashmakash-e-inqilaab
suurat-e-shamshiir hai dast-e-qazaa me.n vo qaum
kartii hai jo har zamaa.n apne amal kaa hisaab
naqsh hai.n sab naa-tamaam KHuun-e-jigar ke baGair
naGma hai saudaa-e-KHaam KHuun-e-jigar ke baGair

Allama Iqbal
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now