Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "taam"

Nazm MATCHES FOR "taam"

Nazm

bhali si ek shakl thi

bhale dino.n kii baat hai
bhalii sii ek shakl thii
na ye ki husn-e-taam ho
na dekhne me.n aam sii

Ahmad Faraz
Nazm

Dasna station ka musafir

kaun saa station hai?
Daasna hai saahib-jii
aap ko utarnaa hai?
''jii nahii.n, nahii.n,'' lekin
Daasna to thaa hii vo
mere saath 'qiisar' thii
ye ba.Dii ba.Dii aa.nkhe.n
ik talaash me.n kho.ii
raat bhar nahii.n so.ii
jab mai.n us ko pahu.nchaane
is ujaa.D bastii me.n
saath le ke aayaa thaa
mai.n ne un se phir puuchhaa
aap mustaqil shaayad
Daasna me.n rahte hai.n?
''jii yahaa.n pe kuchh merii
suut kii dukaane.n hai.n
kuchh ta.aam-KHaane hai.n''
mai.n sunaa kiyaa baiThaa
boltaa rahaa vo shaKHs
''kuchh zamiin-daarii hai
mere baap daadaa ne
kuchh makaan chho.De the
un ko bech kar mai.n ne
kaarobaar kholaa hai
is haqiir bastii me.n
kaun aa ke rahtaa thaa
lekin ab yahii bastii
bamba.ii hai dillii hai
qiimate.n zamiino.n kii
itnii ba.Dh ga.ii.n saahib
ik zamiin hii kyaa hai
khaane piine kii chiize.n
aam jiine kii chiize.n
bhaa.o das-gune hai.n ab''
boltaa rahaa vo shaKHs
''is qadar giraanii hai
aag lag ga.ii jaise
aasmaan had hai bas''
mai.n ne chau.nk kar puuchhaa
aasmaa.n mahl thaa ik
sayyado.n kii bastii me.n
aasmaa.n nahii.n saahib
ab mahl kahaa.n hogaa?
ha.ns pa.Daa ye kah kar vo
mere zehn me.n us kii
baat pai-ba-pai guu.njii

Akhtarul Iman
Nazm

israfil ki maut

marg-e-israafiil par aa.nsuu bahaa.o
vo KHudaa.o.n kaa muqarrab vo KHudaavand-e-kalaam
saut-e-insaanii kii ruuh-e-jaavedaa.n
aasmaano.n kii nidaa-e-be-karaa.n
aaj saakit misl-e-harf-e-naa-tamaam
marg-e-israafiil par aa.nsuu bahaa.o
aa.o israafiil ke is KHvaab-e-be-ha.ngaam par aa.nsuu bahaa.e.n
aaramiida hai vo yuu.n qarnaa ke paas
jaise tuufaa.n ne kinaare par ugal Daalaa use
reg-e-saahil par chamaktii dhuup me.n chup chaap
apne suur ke pahluu me.n vo KHvaabiida hai
us kii dastaar us ke gesuu us kii riish
kaise KHaak-aaluuda hai.n
the kabhii jin kii tahe.n buud-o-nabuud
kaise is kaa suur is ke lab se duur
apnii chiiKHo.n apnii fariyaado.n me.n gum
jhilmilaa uThte the jis se dair-o-zuud
marg-e-israafiil par aa.nsuu bahaa.o
vo mujassam hamhama thaa vo mujassam zamzama
vo azal se taa abad phailii hu.ii Gaibii sadaa.o.n kaa nishaa.n
marg-e-israafiil se
halqa dar halqa farishte nauha gar
ibn-e-aadam zulf-dar-KHaak-o-nazaar
hazrat-e-yazdaa.n kii aa.nkhe.n Gam se taar
aasmaano.n kii safiir aatii nahii.n
aalam-e-laahuut se ko.ii nafiir aatii nahii.n
marg-e-israafiil se
is jahaa.n par band aavaazo.n kaa rizq
mutribo.n kaa rizq aur saazo.n kaa rizq
ab muGannii kis tarah gaa.egaa aur gaa.egaa kyaa
sun.ne vaalo.n ke dilo.n ke taar chup
ab ko.ii raqqaas kyaa thirkegaa lahraa.egaa kyaa
bazm ke farsh-o-dar-o-diivaar chup
ab KHatiib-e-shahr farmaa.egaa kyaa
masjido.n ke aastaan-o-gumbad-o-miinaar chup
fikr kaa sayyaad apnaa daam phailaa.egaa kyaa
taa.iraan-e-manzil-o-kohsaar chup
marg-e-israafiil hai
gosh-e-shanvaa kii lab-e-goyaa kii maut
chashm-e-biinaa kii dil-e-daanaa kii maut
thii isii ke dam se durvesho.n kii saarii haav-huu
ahl-e-dil kii ahl-e-dil se guftuguu
ahl-e-dil jo aaj gosha-giir-o-surma-dar-guluu
ab tanaa taa-huu bhii Gaa.eb aur yaa-rab haa bhii gum
ab galii kuucho.n kii har aavaa bhii gum
ye hamaaraa aaKHirii maljaa bhii gum
marg-e-israafiil se
is jahaa.n kaa vaqt jaise so gayaa pathraa gayaa
jaise ko.ii saarii aavaazo.n ko yaksar khaa gayaa
aisii tanhaa.ii ki husn-e-taam yaad aataa nahii.n
aisaa sannaaTaa ki apnaa naam yaad aataa nahii.n
marg-e-israafiil se
dekhte rah jaa.e.nge duniyaa ke aamir bhii
zabaa.n-bandii ke KHvaab
jis me.n majbuuro.n kii sargoshii to ho
us KHudaavandii ke KHvaab

Noon Meem Rashid
Nazm

pand-nama

ai majaaz ai taraana-baar majaaz
zinda paiGambar-e-bahaar majaaz
ai baruu-e-saman-vishaa.n gul-posh
ai ba kuu-e-muGaa.n tamaam KHarosh
ai parastaar-e-mah-ruKHaan-e-jahaa.n
ai kamaa.n-daar-e-shaa.iraan-e-javaa.n
tujh se taabaa.n jabiin-e-mustaqbil
ai mire siina-e-umiid ke dil
ai majaaz ai mubassir-e-KHad-o-KHaal
ai shu.uur-e-jamaal o sham-e-KHayaal
ai surayyaa-fareb o zohra-navaaz
shaa.ir-e-mast o rind-e-shaahid-baaz
naaqid-e-ishva-e-shabaab hai tuu
sub.h-e-fardaa kaa aaftaab hai tuu
tujh ko aayaa huu.n aaj samjhaane
haif hai tuu agar buraa maane
KHud ko Garq-e-sharaab-e-naab na kar
dekh apne ko yuu.n KHaraab na kar
shaa.irii ko tirii zaruurat hai
daur-e-fardaa kii tuu amaanat hai
sirf terii bhalaa.ii ko ai jaa.n
ban ke aayaa huu.n naaseh-e-naadaa.n
ek Thahraav ik takaan hai tuu
dekh kis darja dhaan-paan hai tuu
na.ng hai mahz ustuKHaa.n honaa
saKHt ihaanat hai naa-tavaa.n honaa
ustuKHvaanii badan duKHaanii post
ek sa.ngiin jurm hai ai dost
sharm kii baat hai vajuud-e-saqiim
naa-tavaanii hai ik gunaah-e-aziim
jism aur ilm turfa taaqat hai
yahii insaan kii nubuvvat hai
jo za.iif-o-aliil hotaa hai
ishq me.n bhii zaliil hotaa hai
har hunar ko jo ek daulat hai
ilm aur jism kii zaruurat hai
kasrat-e-baada rang laatii hai
aadmii ko lahuu rulaatii hai
KHush-dilo.n ko rulaa ke ha.nstii hai
sham-e-aKHtar bujhaa ke ha.nstii hai
aur jab aafat jigar pe laatii hai
ri.nd ko maulvii banaatii hai
mai se hotaa hai maqsad-e-dil faut
mai hai buniyaad-e-maulviyyat-o-maut
kaan me.n sun ye baat hai nashtar
maulviyyat hai maut se bad-tar
is se hotaa hai kaar-e-umr tamaam
is se hotaa hai aql ko sarsaam
is me.n insaa.n kii jaan jaatii hai
is me.n shaa.ir kii aan jaatii hai
ye zamiin aasmaan kyaa shai hai
aan jaa.e to jaan kyaa shai hai
gauhar-e-shaah-vaar chun pyaare
mujh se ik gur kii baat sun pyaare
Gam to bantaa hai chaar din me.n nashaat
shaadmaanii se rah bahut mohtaat
Gam ke maare to jii rahe hai.n hazaar
nahii.n bachte hai.n aish ke biimaar
aan me.n dil ke paar hotii hai
pa.nkhu.Dii me.n vo dhaar hotii hai
juu-e-ishrat me.n Gam ke dhaare hai.n
yaKH-o-shabnam me.n bhii sharaare hai.n
haa.n sambhal kar lataafato.n ko barat
TuuT jaa.e kahii.n na ko.ii parat
dekh kar shiisha-e-nashaat uThaa
ye varaq hai varaq hai sone kaa
kaaGaz-e-baad ye nagiina hai
balki ai dost aabgiina hai
saaGar-e-shabnam-e-KHush-aab hai ye
aabgiina nahii.n habaab hai ye
rok le saa.ns jo qariib aa.e
Thes us ko kahii.n na lag jaa.e
teG-e-mastii ko ehtiyaat se chhuu
varna Tapkegaa u.ngliyo.n se lahuu
mastiyo.n me.n hai taab-e-jalva-e-maah
aur siyah mastiyaa.n KHudaa kii panaah
KHuub hai ek had pe qaa.em nasha
halkaa phulkaa subuk mulaa.em nasha
haa.n adab se uThaa adab se jaam
taaki aab-e-halaal ho na haraam
jaam par jaam jo cha.Dhaate hai.n
uu.nT kii tarah bilbilaate hai.n
zindagii kii havas me.n marte hai.n
mai ko rusvaa-e-dahr karte hai.n
yaad hai jab 'jigar' cha.Dhaate the
kyaa alif ho ke hin-hinaate the
merii gardan me.n bhar ke chand aahe.n
paa.nv se Daalte the vo baa.nhe.n
aql kii maut ilm kii pastii
al-amaa.n la.anat-e-siyah mastii
uf ghaTaa-Top nashshe kaa tuufaan
bhuut ifriit dev jin shaitaan
laat ghuu.nsa chha.Dii chhurii chaaquu
lib-libaahaT lu.aab kaf badbuu
tanz aavaaza barhamii ifsaad
ta.an tashnii.a maz.haka iiraad
shor huu-haq abe-tabe hai hai
aukhiyaa.n gaaliyaa.n dhamaake qai
mas-masaahaT Gashii tapish chakkar
soz sailaab sansanii sarsar
chal-chaKHe chiiKH chunaa.n-chunii.n chi.nghaa.D
chaKH-chaKHe chaa.uu.n chaa.uu.n chiil-chilhaa.D
lappaa-Dukki lataam laam la.Daa.ii
haul haijaan haa.nk haathaa-paa.ii
khalbalii kaa.o.n kaa.o.n khaT-manDal
hau.nk ha.ngaama hamhama halchal
uljhan aavaargii udham aiThan
bhau.nk bhau.n bhau.n bhinan bhinan bhan-bhan
dhaul-dhappaa dhaka.D-paka.D dhutkaar
tahlka tuu ta.Daaq tuf takraar
buu bhabhak bhay bikas barar bhau.nchaal
dabdabe dandanaahaTe.n dhammaal
gaah narmii o lutf o mehr o salaam
gaah talKHii o turshii o dushnaam
aql kii maut ilm kii pastii
al-amaa.n la.anat-e-siyah mastii
sirf nashshe kii bhiigne de mase.n
in ko ban.ne na de kabhii mo.nchhe.n
al-amaa.n KHaufnaak kaalaa nasha
oh riish-o-buruut vaalaa nasha
azhdar-e-marg o dev-e-KHuu.n-KHvaarii
al-amaa.n nashsha-e-''jaTaadhaarii''
nashshe kaa jhuT-puTaa hai nuur-e-hayaat
jhuTpuTe ko banaa na kaalii raat
nashshe kii tez raushnii bhii Galat
chaudhvii.n kii sii chaa.ndnii bhii Galat
zehn-e-insaa.n ko baKHshtaa hai jamaal
nashsha ho jab ye qadr-e-nuur-e-hilaal
Gurfa-e-aql bhe.D to akasr
par use kach-kachaa ke band na kar
raat ko lutf-e-jaam hai pyaare
din kaa piinaa haraam hai pyaare
din hai ifriit-e-aaz kii khankaar
raat paazeb naazukii jhankaar
din hai KHaashaak KHaak dhuul dhu.aa.n
raat aa.iina anjuman afshaa.n
din musallah davaa.n kamar basta
raat taaq-o-ravaaq-o-gul-dasta
din hai faulaad-e-sa.ng teG-e-alam
raat kam-KHvaab pa.nkhu.Dii shabnam
din hai shevan duhaa.iyaa.n dukh.De
raat mast a.nkh.Diyaa.n javaa.n mukh.De
din ka.Dii dhuup kii bad-aaha.ngii
raat pichhle pahar kii saara.ngii
din bahaadur kaa baan biir kii rath
raat champaa-kalii a.nguuThii nath
din hai tuufaan-e-jumbish-o-raftaar
raat miizaan-e-kaakul-o-ruKHsaar
aaftaab-o-sharaab hai.n bairii
botale.n din ko hai.n pachhal pairii
kar na paamaal hurmat-e-auqaat
raat ko din banaa na din ko raat
pii magar sirf shaam ke ha.ngaam
aur vo bhii ba-qadr-e-yak-do jaam
vahii insaa.n hai KHurram-o-KHursand
jo hai miqdaar o vaqt kaa paaband
mere piine hii par na jaa mirii jaa.n
mujh se jiinaa bhii siikh hai.n qurbaa.n
us ke piine me.n rang aataa hai
jis ko jiine kaa Dha.ng aataa hai
ye nasaa.eh bahut hai.n besh-bahaa
jald so jald jaag jald nahaa
baaG me.n jaa tuluu.a se pahle
taa nigaar-e-sahar se dil bahle
sarv-o-shamshaad ko gale se lagaa
har chaman-zaad ko gale se lagaa
mu.nh a.ndhere fazaa-e-gulshan dekh
saahil o sabza-zaar o sausan dekh
gaah aavaara abr-paare dekh
in kii raftaar me.n sitaare dekh
jaise kohre me.n taab-e-ruu-e-nikuu
jaise jangal me.n raat ko jugnuu
gul kaa mu.nh chuum ik tarannum se
nahr ko gudgudaa tabassum se
jism ko kar araq se nam-aaluud
taaki shabnam pa.Dhe lahak ke daruud
phe.nk sanjiidgii kaa sar se baar
naach uchhal dandanaa chhalaa.nge.n maar
dekh aab-e-ravaa.n kaa aa.iina
dau.D saahil pe taan kar siina
mast chi.Diyo.n kaa chahchahaanaa sun
mauj-e-nau-mashq kaa taraana sun
bostaa.n me.n sabaa kaa chalnaa dekh
sabza o sarv kaa machalnaa dekh
shabnam-aaluud kar suKHan kaa libaas
chakh dhundalke me.n buu-e-gul kii miThaas
shaa.irii ko khilaa havaa-e-sahar
is kaa nafqa hai terii gardan par
raqs kii lahr me.n ho gum lab-e-nahr
yuu.n adaa kar uruus-e-sher kaa mahr
jazb kar bostaa.n ke naqsh-o-nigaar
zehan me.n khol misr kaa baazaar
narm jho.nko.n kaa aab-e-haivaa.n pii
buu-e-gul ra.ng-e-shabnamistaa.n pii
gun-gunaa kar nazar uThaa kar pii
sub.h kaa shiir daGdaGa kar pii
taaki mujre ko aa.e.n kul barkaat
daulat jism o ilm o aql o hayaat
ye na ta.ana na ye ulahnaa hai
ek nukta bas aur kahnaa hai
Gaibat-e-nuur ho ki kasrat-e-nuur
zulmat-e-taam ho ki sho.ala-e-tuur
ek saa hai vabaal dono.n kaa
tiirgii hai ma.aal dono.n kaa
darKHur-e-saahab-e-ma.aal nahii.n
har vo shai jis me.n e'tidaal nahii.n
shaadmaanii se pii nahii.n saktaa
jis ko haukaa ho jii nahii.n saktaa
ai pisar ai baraadar ai hamraaz
ban na is tarah duur kii aavaaz
ko.ii biimaar tan nahii.n saktaa
KHaadim-e-KHalq ban nahii.n saktaa
KHidmat-e-KHalq farz hai tujh par
daur-e-maazii kaa qarz hai tujh par
asr-e-haazir ke shaa.ir-e-KHuddaar
qarz-daarii kii maut se hoshyaar
zehn-e-insaaniyat ubhaar ke jaa
zindagaanii kaa qarz utaar ke jaa
tujh pe hindostaan naaz kare
umr terii KHudaa daraaz kare

Josh Malihabadi
Nazm

eid ke roz

kaisii nikhrii sii nazar aatii hai fazaa eid ke roz
shaadmaa.n phirte hai.n sab shaah-o-gadaa eid ke roz
kitnii be-fikrii se gaate hai.n gadaa raaho.n me.n
peT KHaalii ho to gaa.e.n bhii na kyaa eid ke roz
kyaa bhalii lagtii hai har piir-o-javaa.n ke mu.nh se
har taraf eid mubaarak kii sadaa eid ke roz
ammii KHush ho.ngii aur eidii bhii vahii paa.egaa
vaqt se pahle jo bedaar hu.aa eid ke roz
chaa.nd untiis ko kyaa niklaa ki aadhii shab se
tailoring shaap me.n ik taa.ntaa ba.ndhaa eid ke roz
kap.De bhii dhul na sake vaqt-e-namaaz aa pahuu.nchaa
laundry vaalo.n pe aafat hai bapaa eid ke roz
daadii ammaa.n ne musalle ko pare Daal diyaa
ghar me.n mehmaano.n kaa vo shor machaa eid ke roz
aa.nkh ojhal hu.ii aur TuuT savayyo.n pe pa.Daa
der se aslam isii taak me.n thaa eid ke roz
iid-gah shaan se Tam Tam pe chale hai.n babban
baap ke kaa.ndho.n pe nanhaa bhii cha.Dhaa eid ke roz
pak.De laaThii ko maTakte chale ramzaanii miyaa.n
piichhe se bachcho.n kaa ik gol chalaa eid ke roz
apne begaane jo ba.Dh ba.Dh ke gale milte ho.n
kyo.n na phir aa.e ibaadat me.n maza eid ke roz
roze ramzaan ke rakhnaa to sabhii bhuul ga.e
kaise bhuule.nge savayyo.n ko bhalaa eid ke roz
saal ke saal rahe yaad-e-KHudaa se Gaafil
ai 'zakii' un ko bhii yaad aayaa KHudaa eid ke roz

Zaki Ahmad
Nazm

maine bhi aam rakh diya

tum ne KHudaa ke ghar me.n bhii fitna-e-aam rakh diyaa
mere imaam kii jagah apnaa imaam rakh diyaa

Khalid Irfan
Nazm

dar-madh-am

mai.n tum ko lene vaqt pe pahu.nchuu.ngaa aur tum
milnaa sa.Dak pe jo ki tumhaaraa maqaam hai

Khalid Mahmood
Nazm

sasta bazar

foreign kaa har item dekho
gho.Daa-gaa.Dii Tam-Tam dekho

Rafi Yusufi Mahram
Nazm

alkubDe

un ke baap puraane ghaag
ba.De jalaalii bhik-mange the
saare kaasa-leso.n par
kuchh aisii dhaak....!
vo un kii aavaaz sune.n
to rasta chho.D de.n
aur gale me.n aisii taan.....!
jo pankaj kii kharaj bhulaa de

Saqi Faruqi
Nazm

hamare shajre bikhar gae hain

gumaa.n kii be-ra.ng saa.ato.n me.n
navaah-e-karb-o-balaa se darbaar-e-shaam tak ham
lahuu kii ik ek buu.nd kaa sab KHiraaj de kar
tamaam qarze chukaate aa.e
shikasta dahliiz
lahuu kii mehraab
sinaa.n kaa mimbar
hamaarii izzat ba.Dhaate aa.e
vo ham hii the jo qayaam karte
rukuu.a me.n jhukte
zakaat de kar
KHud apne hisse kaa ta.aam de kar
daruud o salaat pa.Dhte aa.e
vo ham the jo gharo.n se nikle
to phir abad tak
palaT ke ghar kii taraf na dekhaa
sitaara-e-saharii gavaah hai
ki ham ne insaa.n ko
chhaa.nv dete
ghanere pe.Do.n pe KHuun chhi.Dkaa
jhulaste sahraa ko taazgii dii
dahaktii dhartii ko zindagii dii
magar vo taskii.n kaa pul kahaa.n hai
bha.nvar bha.nvar hai zamaana saaraa
vajuud apne kidhar ga.e hai.n
hamaare shajre bikhar ga.e hai.n

Faheem Shanas Kazmi
Nazm

nahin

la.Duu.n-bhi.Duu.n mai.n kisii se ye meraa kaam nahii.n
nikaaltaa mai.n zabaa.n se buraa kalaam nahii.n
KHudaa-e-paak ko raazii vo kar nahii.n saktaa
baGair jhuuT jise chain sub.h-o-shaam nahii.n
jo log nek hai.n un se hai merii yaad-allaah
bure jo log hai.n un se du.aa salaam nahii.n
KHudaa kaa banda huu.n mai.n haa.n KHudaa kaa banda huu.n
sivaa KHudaa ke kisii aur kaa Gulaam nahii.n
hamesha rahtaa huu.n maa.il mai.n saadgii ke saath
rahan-sahan me.n mire ko.ii Tiim-Taam nahii.n

Mayal Khairabadi
Nazm

bas tam ruThna nahin

tum hamesha
ek hii savaal
puuchhtii ho ki
mujhe tum se kitnii mohabbat hai
aur mai.n muskuraate hu.e
tumhaaraa haath thaam letaa huu.n
pata hai
pahle mai.n sochtaa thaa ki
log mar kyo.n jaate hai.n
phir kisii ne bataayaa ki
jab zindagii ruuTh jaatii hai
to log mar jaate hai.n
log zindagii se kitnii mohabbat karte hai.n na
KHair chho.Do na
bas tum ruuThnaa nahii.n

Hari Kumar
Nazm

katba(5)

ye katba fulaa.n san kaa hai
ye san is liye is par kanda kiyaa
ki sab vaariso.n par ye vaazeh rahe
ki is roz barsii hai marhuum kii
aziiz-o-aqaarib yataamaa masaakiin ko
ziyaafat se apnii navaaze.n sabhii ko bulaa.e.n
ki sab mil ke marhuum ke haq me.n dast-e-du.aa ko uThaa.e.n
zabaa.n se kahe.n apnii ''marhuum kii maGfirat ho''
buzurg-e-muqaddas ke naam-e-muqaddas pe bheje.n daruud-o-salaam
sabhii KHaas o aam
magar ye bhii malhuuz-e-KHaatir rahe
aziiz-o-aqaarib kaa shurb o ta.aam
aur us kaa nizaam
alag ho vahaa.n se
jahaa.n ho.n yataamaa masaakiin andhe bhikaarii
phaTe aur maile libaaso.n me.n sab aurte.n aur bachche
ka.ii luule la.ng.De mariiz aur gande
vahii jin ko kahte hai.n ham sab avaam
vahaa.n hogaa ik shor-o-Gul izhdihaam
ye kar de.nge ham sab kaa jiinaa haraam

Khalilur Rahman Azmi
Nazm

imkan

tuu sune to abr bhii naGma hai
tuu sune to mauj-e-havaa bhii raag kii taan hai
tuu sune to paat bhii phuul bhii kisii gupt giit ke bol hai.n
gul-o-yaasman ho.n ki mehr-o-maah
har ik apnii saut-o-sadaa me.n kaamil-o-taam hai
miraa lafz naaqis-o-KHaam hai
rahaa naa-tamaam jo kah sakaa
jo na kah sakaa vahii baat asl-e-kalaam hai

Zia Jalandhari
Nazm

ye chunnu KHan ka qissa hai

ye chunnuu KHaa.n kaa qissa hai
jo munnuu KHaa.n ke the ham-dam
thii umr un kii bahut kaafii
magar thii aql un me.n kam
vo kahte khaane ko happaa
vo kahte paanii ko mam mam
vo pag.Dii baa.ndhte aisii
chamaktii KHuub vo jham jham
bajaate har gha.Dii baajaa
kabhii puu.n puu.n kabhii pam pam
miyaa.n chunnuu kahii.n jaate
to kahte laa.o ik Tam Tam
ghaTaa ghir kar agar aatii
barastaa me.nh agar chham chham
galii me.n vo nikal jaate
vo girte KHuub hii dham dham
vo kiicha.D me.n lutha.D jaate
tamaashaa dekhte ye ham
kabhii bak-bak kiyaa karte
kabhii vo bolte kam-kam
vo kahte mai.n ko me.n me.n me.n
vo kahte ham ko ham ham ham

Mohammad Shafiuddin Nayyar
Nazm

lal bag uD gaya

ta.aam-gaaho.n kii
bachii-khuchii Gizaa pe pal rahaa thaa
nam-zada shagaafo.n
ghun lage daraazo.n me.n
chhupaa hu.aa
vo mutma.in thaa
Gair-mar.ii naaliyo.n se
main hol tak
Galaazate.n bahaa ke laane vaalii
sust o tez
saarii lino.n me.n ghuumtaa thaa
ek roz
hast kii girah me.n
us kii laa.nbii Taa.ng
ik anokhe pech me.n ulajh ga.ii
to Tiis dard kii uThii
vajuud pha.Dpha.Daa gayaa

Rafiq Sandelvi
Nazm

raushni se bhara shahr

raushnii ke tale un a.ndhero.n me.n gum
sahte hu.e laakh zulm-o-sitam
sahii log bhii hai.n vale hai.n ye kam
jo koshish me.n hai.n ki miTaa de.n ye tam
ummiide.n sabhii un se hai.n lagaa.e hu.e
raushnii se bharaa ik shahr

Qaleel Jhansvi
Nazm

la-yaKHul

1
mirii KHalvat ke haale me.n tumhaaraa ye tilsmaatii badan
ik nuur me.n Duubaa hu.aa bahtaa hu.aa dhaaraa
ye madh-maataa ye KHud ko sar-ba-sar bhuulaa hu.aa
behad niraalaa an-chhu.aa saayaa
havaa ke narm so.e so.e lahje kii tarah mas ho ke
merii ruuh me.n aatish kaa bha.Dkaataa hu.aa saayaa
ye saayaa raushnii hii raushnii hai sar se paa.nv tak
ye saayaa zindagii hii zindagii hai sar se paa.nv tak
ye vasl-e-taam kaa lamha vo lamha hai
ki jab KHud vaqt ruk jaataa hai
jaise shaam ko dariyaa bhii ruk kar KHud faraamoshii ke gahre saa.ns lete hai.n

Tahseen Firaqi
Nazm

pasban-e-haram-e-gul ki tarah

ye fitrat kii tajallii hai
ki kirdaar kii shafaq
ki ravish-ravish sahraa-ba-sahraa
ek saaya saa siyaah saa
benaam-o-nishaa.n saa
surKH-ruu.ii kii KHvaahish-e-siyaah ke baGair
zar-pairahanii kii garmii-e-tam’ ke baGair
apne siine me.n chhupaa.e
dard kii aag
ta.Dap kii raushnii
zaahid-nafas masiihaa-sifat
raahib-e-shab-zinda-daar kii tarah
chuntaa rahtaa hai raat-bhar
muskuraatii kaliyaa.n mahakte phuul
ujaalo.n kii u.ngliyo.n se

Abul Faiz Sahar
Nazm

ramz

tum jab aa.ogii to khoyaa hu.aa paa.ogii mujhe
merii tanhaa.ii me.n KHvaabo.n ke sivaa kuchh bhii nahii.n
mere kamre ko sajaane kii tamannaa hai tumhe.n
mere kamre me.n kitaabo.n ke sivaa kuchh bhii nahii.n

Jaun Eliya
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now