Font by Mehr Nastaliq Web

aaj ik aur baras biit gayā us ke baġhair

jis ke hote hue hote the zamāne mere

CANCEL DOWNLOAD SHER

SEARCH RESULTS

Showing search results for "tuk"

Nazm MATCHES FOR "tuk"

Nazm

banjara-nama

Tuk hirs-o-havaa ko chho.D miyaa.n mat des bides phire maaraa
qazzaaq ajal kaa luuTe hai din raat bajaa kar naqqaaraa
kyaa badhiyaa bhai.nsaa bail shutur kyaa gaune.n pallaa sar-bhaaraa
kyaa gehuu.n chaa.nval moTh maTar kyaa aag dhu.aa.n aur a.ngaaraa
sab ThaaTh pa.Daa rah jaavegaa jab laad chalegaa banjaaraa

Nazeer Akbarabadi
Nazm

barsat ki bahaaren

bolii.n ba.e baTere.n qumrii pukaare kuu-kuu
pii pii kare papiihaa bagule pukaare.n tuu-tuu
kyaa hudhudo.n kii haq haq kyaa faaKHato.n kii huu-huu
sab raT rahe hai.n tujh ko kyaa pa.nkh kyaa pakheruu
kyaa kyaa machii hai.n yaaro barsaat kii maare.n

Nazeer Akbarabadi
Nazm

rakhi

ayaa.n hai ab to raakhii bhii chaman bhii gul bhii shabnam bhii
jhamak jaataa hai motii aur jhalak jaataa hai resham bhii
tamaashaa hai ahaa haa-haa Ganiimat hai ye aalam bhii
uThaanaa haath pyaare vaah-vaa Tuk dekh le.n ham bhii
tumhaarii motiyo.n kii aur zarii ke taar kii raakhii

Nazeer Akbarabadi
Nazm

holi

milne kaa tire rakhte hai.n ham dhyaan idhar dekh
bhaatii hai bahut ham ko tirii aan idhar dekh
ham chaahne vaale hai.n tire jaan idhar dekh
holii hai sanam hans ke tuu ik aan idhar dekh
ai ra.ng-bhare nau-gul-e-KHandaa.n idhar dekh

Nazeer Akbarabadi
Nazm

holi

ye ruup dikhaa kar holii ke jab man rasiile Tuk maTke
ma.ngvaa.e thaal gulaalo.n ke bhar Daale ra.ngo.n se maTke
phir saa.ng bahut tayyaar hu.e aur ThaaTh KHushii ke jhur maTke
Gul shor hu.e KHush-haalii ke aur naachne gaane ke khaTke
mirda.nge.n baaje.n taal baje kuchh khanak khanak kuchh dhanak dhanak

Nazeer Akbarabadi
Nazm

main nashe mein hun

is qaum kii falaah hai jaam-o-subuu ke bech
tum intiKHaab jaa ke la.Do haav-huu ke biich
dushnaam aur balvo.n ke aur duu-ba-duu ke biich
jaise ki ko.ii baiThaa ho bazm-e-aduu ke biich
''mastii se darhamii hai mirii guftuguu ke biich''
''jo chaaho tum bhii mujh ko kaho mai.n nashe me.n huu.n''

Syed Mohammad Jafri
Nazm

ab aur tab

na puuchh ai ham-nashii.n college me.n aa kar ham ne kyaa dekhaa
zamii.n badlii hu.ii dekhii falak badlaa hu.aa dekhaa
na vo pahlii sii mahfil hai na miinaa hai na saaqii hai
kutub-KHaane me.n lekin ab talak talvaar baaqii hai
vahii talvaar jo baabar ke vaqto.n kii nishaanii hai
vahii marhuum baabar yaad jis kii Gair faanii hai
zamii.n par lecturer kuchh tairte phirte nazar aa.e
aur un kii ''gaun'' se kandho.n pe do shahpar nazar aa.e
magar in me.n mire ustaad-e-deriina bahut kam the
jo do ik the bhii vo masruuf-e-sad-afkaar-e-paiham the
vo ziine hii me.n Takraane kii hasrat rah ga.ii dil me.n
sunaa one-way traffic ho ga.ii uupar kii manzil me.n
agarche aaj-kal college me.n vaaqif hai.n hamaare kam
hame.n diivaar-o-dar pahchaante hai.n aur un ko ham
bulandii par alag sab se kha.Daa ''tower'' ye kahtaa hai
badaltaa hai zamaana meraa andaaz ek rahtaa hai
fanaa ta.aliim dars-e-be-KHudii huu.n is zamaane se
ki majnuu.n laam alif likhtaa thaa diivaar-e-dabistaa.n par
magar ''tower'' kii saa.at ke bhii baazuu KHuub chalte hai.n
kabuutar baiTh kar suu.iyo.n pe vaqt us kaa badalte hai.n
usii maalik ko phir halve kii daavat par bulaate hai.n
vo halva KHuub khaate hai.n use bhii kuchh khilaate hai.n
agar vo ye kahe is me.n to zahriilii davaa.ii hai
miraa dil jaantaa hai is me.n anDe kii miThaa.ii hai
phir is ke baa'd bahr-e-KHud-kushii tayyaar hote hai.n
vo halva biich me.n aur gard us ke yaar hote hai.n
vo puuchhe gar kahaa.n se kis tarah aayaa hai ye halva
to Dabbaa pesh kar ke kah diyaa is kaa hai sab jalva
kisii kanjuus ke kamre me.n jaa kar baiTh jaate hai.n
aur us ke naam par Tuk shaap se chiize.n ma.ngaate hai.n
bichaara 'ja.afarii' muddat ke baa'd aayaa hai college me.n
izaafa chaahtaa hai apnii a.ngrezii kii knowledge me.n
tire siine pe jab yaaraa-n-KHush aa.e.n kii mahfil ho
to ai 'oval' use mat bhuul jaanaa vo bhii shaamil ho

Syed Mohammad Jafri
Nazm

wahi laDki

bhuurii aa.nkho.n vaalii la.Dkii
tujh se pahle mere paas bhii aatii thii
apne ghar kii ik ik baat sunaatii thii
meh.ndii aur vismay se aarii kaale baalo.n vaalii ammii
jalte charaaGo.n jaise aa.nkho.n vaalii bahno.n
un ke sa.ngtaro.n kii phaa.nko.n jaise ho.nTo.n
duudh ke pyaalo.n jaise ujle gaalo.n
raushan jismo.n
sarv-qado.n ke qisse sunaayaa kartii thii
mere ghar me.n vo KHurshiid kii suurat roz ubhartii thii
mujh se merii nazme.n giit aur Gazle.n suntii rahtii thii
sweater buntii rahtii thii
akasr merii Gazle.n gaa kar mujhe sunaayaa kartii thii
chhaayaa kii rasiyaa thii vo aur chhaayaa rachaayaa kartii thii
Tuk Tuk dekhaa kartii thii
ThanDii aa.he.n bhartii thii
aisaa zaahir kartii thii
jaise mujh par martii thii

Khatir Ghaznavi
Nazm

dastur sazi ki koshish

yuu.n to har shaa.ir kii fitrat me.n hai kuchh diivaangii
Gair zimmedaariyaa.n hai.n us kii juzv-e-zindagii
arz-e-sheristaan me.n ye shaa.iraana KHaasiyat
cancer kii tarah se jab phailne ba.Dhne lagii
muKHtalif school jab ja.ngii akhaa.De ban ga.e
fikr-o-fan me.n jab niraajii kaifiyat paidaa hu.ii
mumlikat me.n zaabta ko.ii na jab baaqii rahaa
har jagah qaanuun kii hone lagii be-hurmatii
ek ik tuk-band ustaado.n ke mu.nh aane lagaa
likh ke sub.h-o-shaam nazme.n be-tukii se be-tukii
kuu.De-karkaT kii tarah har suu nazar aane lage.n
Dheriyaa.n hii Dheriyaa.n diivaan-e-KHaas-o-aam kii
had to ye hai ahl-e-machhlii-shahr bhii karne lage
maahii-giirii chho.D kar din raat fikr-e-shaa.irii
jin se bohraan-e-Gizaa state me.n paidaa hu.aa
qaht-e-maahii se ba.Dhii har chaar jaanib bhuk-marii
chand qaumii dard rakhne vaale ahlurraa.e se
qaum kii naa-gufta-ba-haalat na jab dekhii ga.ii
ek dastuur-ul-amal tayyaar karne ke liye
ik kametii 'amn'-saahab kii sadaarat me.n banii
taaki is par chal ke nazm-o-zabt aa.e qaum me.n
taaki kuchh to mo.atadil ho shaa.iro.n kii zindagii
duusre kaamo.n me.n bhii qaumii energy sarf ho
tuk faroshii ke alaava bhii to maqsad ho ko.ii
daur-e-'aflaatuun'-o-'tulsii-das' se 'iqbaal' tak
history kal shaa.iro.n kii is kametii ne pa.Dhii
duusre mulko.n ke aa.iin-o-zavaabit me.n jahaa.n
jo munaasib baat thii vo chhaa.nT kar rakh lii ga.ii
raat din kii saKHt mehnat aur jaa.n-sozii ke ba.ad
is kametii ne report apnii bil-aaKHir pesh kii
KHaaka-e-dastuur-e-qaumii ya.anii vo she.rii report
'amn'-saahab ne raqam kii thii ba-sinf-e-masnavii
is pe raa.e-aamma ma.aluum karne ke liye
shaa.iro.n ko naql dastaavez kii bhejii ga.ii
muKHtalif ahl-e-suKHan ne apne apne taur par
raa.e dii dastuur me.n tarmiim yaa tansiiKH kii
masnavii me.n KHaamiyaa.n Dhuu.nDe.n zabaa.n kii jaa-ba-jaa
ek shaa.ir ne jo the shaagird-e-nuuh-naarvii
saik.Do.n misre badal kar rakh diye kuchh is tarah
nafs-e-mazmuu.n nazr ho kar rah gayaa islaah kii
un kaa kahnaa thaa ki bandish chust honii chaahiye
sher ke andar balaa se ho na fikrii taazgii
na.at-go hazraat kaa kahnaa thaa shaa.ir ke liye
shart avval hai ki ho jaa.e vo kaTTar maz.habii
aaqibat kii baat soche aur munaajaate.n likhe
us ke jan me.n kaar-aamad shaa.irii hai bas vahii
aise shaa.ir jo ki haamii the taraqqii-vaad ke
in kaa kahnaa thaa ki shaa.ir kaa suKHan ho maqsadii
ya.anii pahle se muqarrar-karda mauzuaat par
mumlikat me.n aam kii jaa.e shu.uurii shaa.irii
KHvaah sheristaan me.n is kaa na ho ko.ii vajuud
laaziman dikhlaa.ii jaa.e kashmakash tabqaat kii
ik qabiila jo muKHaalif thaa shu.uurii fikr kaa
thaa taraqqii-vaadiyo.n se jis ko buGz-e-lillaahii
is qabiile kaa ye kahnaa thaa ki shaa.ir kaa kalaam
laaziman ho ik mu.amma qaid-e-ma.anii se barii
jis ko shaa.ir KHud na samjhe nazm kar lene ke ba.ad
jis ko pa.Dh kar gum ho aql-e-maulvii-e-ma.anavii
dekh kar dastuur me.n nazm-o-nasq kaa tazkira
saKHt barham ho ga.e kul shaa.iraan-e-naksalii
in kaa nukta thaa ki shaa.ir fitratan aazaad hai
us pe lag saktii nahii.n paabandiyaa.n tanziim kii
zindagii me.n zaabta laane ke bilkul the KHilaaf
saath naksal-vaadiyo.n ke duusre hazraat bhii
muKHtasar ye hai ki sab ne rad kiyaa dastuur ko
saarii mehnat 'amn'-saahab kii akaarat ho ga.ii
dekh kar naa-aaqibat andeshii-e-ahl-e-suKHan
is tarah goyaa hu.ii un kii mohazzab KHaamushii
me.nDako.n ko taulnaa aasaa.n nahii.n hai jis tarah
shaa.iro.n ko bhii munazzam karnaa mushkil hai yuu.nhii

Raza Naqvi Vahi
Nazm

KHwahish

kabhii apne aap se baahar aa
Tuk baiTh hamaare saath
chal dukh dariyaa ke paar chale.n
laa haath me.n de de haath
ham apnaa honaa tyaag ke
tire hone par tayyaar
kabhii fursat se mil yaar

Salman Haider
Nazm

kash

us KHaamosh qil.e kii
saKHt lohe sii diivaare.n
har taraf safed Gamgiin parde
vo apnii aalii-shaan kursii par baiThii
ko.ii hisaab jo.D rahii hai
us kaa phiikaa sapaaT bojhal chehra
jaise bhiitar kaa ek ruup
us ke uuprii ruup rang ko khaa chukaa ho
achaanak darvaaze kii dastak
dabii hu.ii siskiyo.n kaa shor
uu.nche darvaaze ko kholte hii
us kii bhaav-vihiin aa.nkho.n me.n
sa.nvednaa.o.n kii halchal ho uThtii hai
sub.h kii os narm dhuup me.n
naazuk kopal saa ek bachcha
apnii chiiKH ko gale me.n Thuus kar
us kii taraf qil.e kii taraf
dau.Daa aa rahaa thaa
abhii gale lagaa kar ro pa.Degaa jaise
vo ek Tuk use dekhtii rahtii hai
magar gale nahii.n lagaa paatii vo
us kaa hirdai kahtaa hai ki bhej de use
vaapas us ke ghar jahaa.n
us kaa intizaar ho rahaa hogaa
is tivr ichhaa ke saath
barso.n se nirlap rahii us kii aa.nkho.n me.n
dabii hu.ii bhaavnaa.e.n gatii-maan ho kar bahne lagtii hai
he iishvar vo aa.nkhe.n muu.nd letii hai
mez par rakhii hisaabo.n vaalii kitaab dikhaa.ii detii hai
aur nau-pallavit paude kii
naazuk Daalii jaisii u.ngliyaa.n thaam kar
vo use qil.e ke bhiitar le aatii hai
totii.ng darvaaza karkash aavaaz ke saath
band ho jaataa hai
vo bilakhte hu.e bachche ko aaGosh me.n le letii hai
KHaamosh kamre me.n us ma.asuum kii
dha.Dakne saa.nse.n siskiyo.n kaa shor
tez ho uThtaa hai
vo kas ke us bachche ko
apne bhiitar sameT kar gahrii nii.nd sulaa detii hai
jab ko.ii shor baaqii nahii.n rahtaa tab
us ke bhiitar kaa ruudan baahar aane ko ta.Daptaa hai
magar us ke adh-mare man mastishk
use yaad dilaate hai ki
maut maatam nahii.n manaa saktii
kaash mujhe bhii haq hotaa
darvaaze pe aa.e ko vaapas bhejne kaa
kaash
bhaarii qadmo.n pe uTh kar vo
us kitaab me.n kuchh jo.D detii hai
din kaa ujaalaa surya kaa tej
lajjit ho kar sar jhukaa lete hai
havaa bhii chhobhit ho kar niilii pa.D jaatii hai
saarii sirishTii a.ndhkaar kii gart me.n Duubne lagtii hai

Darshika wasani
Nazm

ma-baad jadid

mai.n ne apne likhne pa.Dhne ke kamre me.n
qalam binaa ik nazm likhii hai
nazm ko mai.n ne
kuchh aise tartiib diyaa hai
sab se pahle Tuk Tuk kartii
ek gha.Dii hai
phir hai calendar
is ke baa'd hai
piital kii ik sham.a-daanii aish-tray
phir beijing shaam aur singapore kii
chiinii aur taa.nbe kii plaTe.n
phir tho.Dii sii jagah banaa ke
shiishe kaa gul-daan rakhaa hai
us se aage
musavvirii aur theTar par
do tiin kitaabe.n
vahii.n pe tirchhii kar ke rakhii
qulqul kartii ek suraahii
sab ke biich me.n nanhaa saa
ik joker bhii hai
ye merii vo pahlii nazm hai
jis me.n ko.ii lafz nahii.n hai
bas paikar hai.n
merii pahlii nazm hai
jo qaarii aur saame.a
dono.n se aazaad hu.ii hai
aa.nkho.n kii hamraaz hu.ii hai

Zubair Rizvi
Nazm

kya khelen kahan khelen

bolii.n Gussa ho kar baajii
ghar me.n kyaa tuk hai cricket kii
adnaan aiman samra faizii
baahar jaa kar khelo naa

Muzaffar Hanfi
Nazm

kitni sundar titli hai

diide lak lak
karte Tuk Tuk
la.al javaahar titlii hai

Ataur Rahman Tariq
Nazm

kabutar aur kawwe ki hui laDai

duur kahii.n dariyaa ke kinaare
rahte the do dost pyaare
ek thaa kavvaa ek kabuutar
khaate piite the vo mil kar
ik din un kii shaamat aa.ii
dono.n me.n hu.ii KHuub la.Daa.ii
pahle apne mu.nh ko kholaa
phir Gusse se kabuutar bolaa
kavve hote hai.n kanjuus
kaale bhadde aur manhuus
kaa.n-kaa.n shor machaate hai.n
saaraa din sar khaate hai.n
shor se mai.n to Dartaa huu.n
aur bas guu.n-guu.n kartaa huu.n
mujh ko apne husn pe naaz
uu.nchii hai merii parvaaz
kaale ho kaluuTe ho
tum to bhai.ns ke kaTTe ho
baat ye sun kar kavvaa bolaa
tuu ne merii zaat ko tolaa
le ab merii baarii hai
jaantii duniyaa saarii hai
tuu buzdil hai aur Darpok
baat kahuu.ngaa mai.n do-Tuuk
jab ko.ii billii aatii hai
jaa.n terii tab jaatii hai
kaa.nptaa hai tharraataa hai
Dar kar hii mar jaataa hai
logo.n kaa ye kahnaa hai
kavvaa bahut syaanaa hai
itne me.n ik loma.D aaya
pe.D ke niiche aa kar bolaa
la.Dte ho kuchh sharm karo
lahje apne narm karo
allaah allaah kiyaa karo
us kaa naam hii liyaa karo
mai.n tum ko samjhaataa huu.n
phir se dost banaataa huu.n
jaldii se tum niiche aa.o
aa kar mujh se haath milaa.o
dono.n pe.D se niiche aa.e
la.Dne se par baaz na aa.e
maut thii un ke sar par aa.ii
loma.D ne ik jast lagaa.ii
gardan se dono.n ko pak.Daa
aur apne panjo.n me.n jak.Daa
daavat us ne KHuub u.Daa.ii
apne peT kii aag bujhaa.ii
baarii baarii un ko khaayaa
dono.n ko ik sabaq sikhaayaa
la.Dnaa bachcho kaam buraa hai
la.Dne kaa anjaam buraa hai

Ziyaullah Mohsin
Nazm

KHidmat-e-adab

jab tak adab-baraa-e-adab kaa rahaa KHayaal
adbaar-o-muflisii se rahe ham shikasta-haal
saa.e kii tarah saath nahuusat lagii rahii
ik rog ban ke jaan se usrat lagii rahii
go shaa.erii kaa rang nikhartaa chalaa gayaa
shiiraaza-e-ma.aash bikhartaa chalaa gayaa
lekin KHudaa bhalaa kare ik mehrbaan kaa
jin ko adab-baraa-e-shikam kaa hai tajraba
mausuuf ne bataa.ii hame.n vo pate kii baat
ab din hai roz-e-iid to shab hai shab-e-baraat
all india mushaa.era majlis ke naam se
kholaa hai ik idaara-e-nau dhuum-dhaam se
karte hai.n shaa.erii ke evaz ab mushaa.era
is rozgaar se hai hame.n KHuub faa.eda
har tiin chaar maah ke vaqfe pe be-KHalal
apne programme pe karte hai.n ham amal
ya.anii mushaa.ere kaa chalaate hai.n kaarobaar
chhapvaa ke roz-naamo.n me.n jhuuTaa ye ishtihaar
'josh'-o-'firaaq'-o-'saahir' o 'parvez' shaahidii
'faiz'-o-'KHaliil'-o-'jazbii' o 'maKHduum'-o-'ja.afarii'
kursii-o-arsh-o-lauh-o-qalam sab hii aa.e.nge
taaza kalaam apnii zabaa.n se sunaa.e.nge
is ishtihaar me.n vo kashish hai ki ahl-e-zauq
lete hai.n daaKHle kaa ticket dau.D kar ba-shauq
circus me.n jis tarah se ho KHilqat kaa izhdihaam
yuu.nhii mushaa.ere me.n pahu.nchte hai.n KHaas-o-aam
sab log baiTh jaate hai.n farsh-e-zamii.n pe jab
mic pe jaa ke karte hai.n elaan ham ye tab
afsos hai ki aa na sake 'josh' aur 'firaaq'
ye moscow ravaana hu.e vo ga.e iraq
'jazbii' ko iKHtilaaj hai 'parvez' hai.n aliil
gaa.Dii zaraa sii chuuk se miss kar ga.e 'KHaliil'
bhejii hai 'faiz'-o-'saahir'-o-'maKHduum' ne KHabar
seat un ko mil sakii na havaa.ii jahaaz par
go ye KHabar dilo.n ko guzartii hai naagavaar
honaa hai jalsa-gaah me.n tho.Daa saa intishaar
le kar magar zehaanat-e-fitrii se kaam ham
dam-bhar me.n saama.iin ko karte hai.n raam ham
Dais pe tuk-farosho.n kaa rahtaa hai ik hujuum
filmii dhuno.n me.n gaane kii jin ke ba.Dii hai dhuum
jo KHud ticket KHariid ke aate hai.n bazm me.n
ham un se apnaa kaam chalaate hai.n bazm me.n
le le ke gaTkarii jo sunaate hai.n vo kalaam
u.Dte hai.n vaah vaah ke na.aro.n se saqf-o-baam
bazm-e-nashaat bantaa hai saaraa mushaa.era
hotaa hai kaamyaab hamaaraa mushaa.era
KHush-KHush gharo.n ko jaate hai.n huzzaar ik taraf
noTo.n kaa ham lagaate hai.n ambaar ik taraf
ye KHidmat-e-adab kaa tariiqa hai laa-javaab
pesha ye vo hai jis me.n munaafa hai be-hisaab

Raza Naqvi Vahi
Nazm

chandi ki tashtari

rishta zamiin se bhii rahtaa hai aasmaa.n par
ko.ii use bulaa.e aa.e na vo utar kar
bas duur hii se Tuk-Tuk ham ko vo tak rahaa hai
chaa.ndii kii tashtarii saa cham-cham chamak rahaa hai

Amanul Haque Balapuri
Nazm

kal phir kaam pe jaana hoga

raat ke do bajne vaale hai.n
nii.nd kii devii ruuTh ga.ii hai
laakh bulaa.uu.n laakh manaa.uu.n
ik ziddii bachchii sii ruuThii
duur kahii.n kone me.n kha.Dii hai
paas mire aatii hii nahii.n hai
der se takiye par sar rakkhe
ik Tuk chhat ko ghuur rahaa huu.n
chhat hai jaise mere maazii kaa ik darpan
jis par biit ga.e saalo.n kii dhuul aTii hai
dhuul ke parde se rah rah kar
kitne chehre jhaa.nk rahe hai.n
har chehre ke gird hai.n raqsaa.n
kitnii yaade.n
bhuulii-bisrii aadhii puurii ka.Dvii miiThii
takte takte thak saa gayaa huu.n
soch rahaa huu.n
kaash
ye darpan TuuT hii jaa.e
man kaa sotaa suukh hii jaa.e

Dr. Abdullah
Nazm

mujhse pahli si mohabbat meri mahbub na mang

mujh se pahlii sii mohabbat mirii mahbuub na maa.ng
mai.n ne samjhaa thaa ki tuu hai to daraKHshaa.n hai hayaat
teraa Gam hai to Gam-e-dahr kaa jhag.Daa kyaa hai
terii suurat se hai aalam me.n bahaaro.n ko sabaat
terii aa.nkho.n ke sivaa duniyaa me.n rakkhaa kyaa hai
tuu jo mil jaa.e to taqdiir niguu.n ho jaa.e
yuu.n na thaa mai.n ne faqat chaahaa thaa yuu.n ho jaa.e
aur bhii dukh hai.n zamaane me.n mohabbat ke sivaa
raahate.n aur bhii hai.n vasl kii raahat ke sivaa

Faiz Ahmad Faiz
Nazm

ramz

tum jab aa.ogii to khoyaa hu.aa paa.ogii mujhe
merii tanhaa.ii me.n KHvaabo.n ke sivaa kuchh bhii nahii.n
mere kamre ko sajaane kii tamannaa hai tumhe.n
mere kamre me.n kitaabo.n ke sivaa kuchh bhii nahii.n

Jaun Eliya
Load More
Best poetry resource in urdu
Search
Get App
ENG
Notification
Rekhta Foundation

Devoted to the preservation & promotion of Urdu
Rekhta Dictionary

A Trilingual Treasure of Urdu Words
Sufinama

Online Treasure of Sufi and Sant Poetry
Hindwi

World of Hindi language and literature
Rekhta Learning

The best way to learn Urdu online
Rekhta Books

Best of Urdu & Hindi Books
Donate
Get App
Donate
Speak Now