بیسٹ معشوق شاعری

ہے عاشق و معشوق میں یہ فرق کہ محبوب

تصویر تفرج ہے وہ پتلا ہے الم کا

خلوت ہو اور شراب ہو معشوق سامنے

زاہد تجھے قسم ہے جو تو ہو تو کیا کرے

عشق معشوق عشق عاشق ہے

یعنی اپنا ہی مبتلا ہے عشق

نہ عاشق ہیں زمانے میں نہ معشوق

ادھر ہم رہ گئے ہیں اور ادھر آپ

اک ہم ہیں کہ ہم نے تمہیں معشوق بنایا

اک تم ہو کہ تم نے ہمیں رکھا نہ کہیں کا

رعایت بوجھ تو معشوق کا جور

کہ تجھ کو عشق میں کامل کرے ہے

معشوق کون سا ہے نہ ہو دل میں جس کی یاد

اس مختصر سے باغ میں کس گل کی بو نہیں

مل گیا تھا باغ میں معشوق اک نک دار سا

رنگ و رو میں پھول کی مانند سج میں خار سا

سمجھ لے عاشق و معشوق کی ہم آغوشی

عذاب اور تو کیا قبر کے فشار میں تھا

مرتبہ معشوق کا عاشق سے بالا دست ہے

خار کی جا زیر پا گل کا مکاں دستار پر