Jigar Moradabadi: ek rumaani shayar

terī āñkhoñ kā kuchh qusūr nahīñ

haañ mujhī ko ḳharāb honā thā

teri aankhon ka kuchh qusur nahin

han mujhi ko KHarab hona tha

tire jamāl kī tasvīr khīñch duuñ lekin

zabāñ meñ aañkh nahīñ aañkh meñ zabān nahīñ

tere jamal ki taswir khinch dun lekin

zaban mein aankh nahin aankh mein zaban nahin

us ne apnā banā ke chhoḌ diyā

kyā asīrī hai kyā rihā.ī hai

us ne apna bana ke chhoD diya

kya asiri hai kya rihai hai

merī nigāh-e-shauq bhī kuchh kam nahīñ magar

phir bhī tirā shabāb tirā hī shabāb hai

meri nigah-e-shauq bhi kuchh kam nahin magar

phir bhi tera shabab tera hi shabab hai

ābād agar na dil ho to barbād kījiye

gulshan na ban sake to bayābāñ banā.iye

aabaad agar na dil ho to barbaad kijiye

gulshan na ban sake to bayaban banaiye

sunā hai hashr meñ har aañkh use be-parda dekhegī

mujhe Dar hai na tauhīn-e-jamāl-e-yār ho jaa.e

suna hai hashr mein har aankh use be-parda dekhegi

mujhe Dar hai na tauhin-e-jamal-e-yar ho jae

kabhī un mad-bharī āñkhoñ se piyā thā ik jaam

aaj tak hosh nahīñ hosh nahīñ hosh nahīñ

kabhi un mad-bhari aankhon se piya tha ek jam

aaj tak hosh nahin hosh nahin hosh nahin

vo chiiz kahte haiñ firdaus-e-gum-shuda jis ko

kabhī kabhī tirī āñkhoñ meñ paa.ī jaatī hai

wo chiz kahte hain firdaus-e-gum-shuda jis ko

kabhi kabhi teri aankhon mein pai jati hai

kuchh is adā se aaj vo pahlū-nashīñ rahe

jab tak hamāre paas rahe ham nahīñ rahe

kuchh is ada se aaj wo pahlu-nashin rahe

jab tak hamare pas rahe hum nahin rahe

mohabbat meñ ham to jiye haiñ jiyeñge

vo hoñge koī aur mar jaane vaale

mohabbat mein hum to jiye hain jiyenge

wo honge koi aur mar jaane wale

kūcha-e-ishq meñ nikal aayā

jis ko ḳhāna-ḳharāb honā thā

kucha-e-ishq mein nikal aaya

jis ko KHana-KHarab hona tha

maiñ jahāñ huuñ tire ḳhayāl meñ huuñ

tū jahāñ hai mirī nigāh meñ hai

main jahan hun tere KHayal mein hun

tu jahan hai meri nigah mein hai

lākhoñ meñ intiḳhāb ke qābil banā diyā

jis dil ko tum ne dekh liyā dil banā diyā

lakhon mein intiKHab ke qabil bana diya

jis dil ko tum ne dekh liya dil bana diya

vo the na mujh se duur na maiñ un se duur thā

aatā na thā nazar to nazar kā qusūr thā

wo the na mujh se dur na main un se dur tha

aata na tha nazar to nazar ka qusur tha

laboñ pe mauj-e-tabassum nigah meñ barq-e-ġhazab

koī batā.e ye andāz-e-barhamī kyā hai

labon pe mauj-e-tabassum nigah mein barq-e-ghazab

koi batae ye andaz-e-barhami kya hai

pī rahā huuñ āñkhoñ āñkhoñ meñ sharāb

ab na shīsha hai na koī jaam hai

pi raha hun aankhon aankhon mein sharab

ab na shisha hai na koi jam hai

āñkhoñ meñ nuur jism meñ ban kar vo jaañ rahe

ya.anī hamīñ meñ rah ke vo ham se nihāñ rahe

aankhon mein nur jism mein ban kar wo jaan rahe

yani hamin mein rah ke wo hum se nihan rahe

kyā ḳhabar thī ḳhalish-e-nāz na jiine degī

ye tirī pyaar kī āvāz na jiine degī

kya KHabar thi KHalish-e-naz na jine degi

ye teri pyar ki aawaz na jine degi

nigāh-e-yās mirī kaam kar ga.ī apnā

rulā ke uTThe the vo muskurā ke baiTh ga.e

nigah-e-yas meri kaam kar gai apna

rula ke uTThe the wo muskura ke baiTh gae

nashsha-e-husn ko is tarah utarte dekhā

aib par apne koī jaise pashemāñ ho jaa.e

nashsha-e-husn ko is tarah utarte dekha

aib par apne koi jaise pasheman ho jae