عزیز لکھنوی کے 10 منتخب شعر

اپنے مرکز کی طرف مائل پرواز تھا حسن

بھولتا ہی نہیں عالم تری انگڑائی کا

پیدا وہ بات کر کہ تجھے روئیں دوسرے

رونا خود اپنے حال پہ یہ زار زار کیا

زبان دل کی حقیقت کو کیا بیاں کرتی

کسی کا حال کسی سے کہا نہیں جاتا

لطف بہار کچھ نہیں گو ہے وہی بہار

دل ہی اجڑ گیا کہ زمانہ اجڑ گیا

ہجر کی رات کاٹنے والے

کیا کرے گا اگر سحر نہ ہوئی

تم نے چھیڑا تو کچھ کھلے ہم بھی

بات پر بات یاد آتی ہے

وہی حکایت دل تھی وہی شکایت دل

تھی ایک بات جہاں سے بھی ابتدا کرتے

تمہیں ہنستے ہوئے دیکھا ہے جب سے

مجھے رونے کی عادت ہو گئی ہے

مصیبت تھی ہمارے ہی لئے کیوں

یہ مانا ہم جئے لیکن جئے کیوں

دل کی آلودگیٔ زخم بڑھی جاتی ہے

سانس لیتا ہوں تو اب خون کی بو آتی ہے