جرأت قلندر بخش کے 10 منتخب شعر

اس زلف پہ پھبتی شب دیجور کی سوجھی

اندھے کو اندھیرے میں بڑی دور کی سوجھی

الٰہی کیا علاقہ ہے وہ جب لیتا ہے انگڑائی

مرے سینے میں سب زخموں کے ٹانکے ٹوٹ جاتے ہیں

مل گئے تھے ایک بار اس کے جو میرے لب سے لب

عمر بھر ہونٹوں پہ اپنے میں زباں پھیرا کیا

کھائے سو پچھتائے اور پچھتائے وہ بھی جو نہ کھائے

یہ غم عشق بتاں لڈو ہے گویا بور کا

دل وحشی کو خواہش ہے تمہارے در پہ آنے کی

دوانا ہے ولیکن بات کرتا ہے ٹھکانے کی

خوبان جہاں کی ہے ترے حسن سے خوبی

تو خوب نہ ہوتا تو کوئی خوب نہ ہوتا

غم مجھے ناتوان رکھتا ہے

عشق بھی اک نشان رکھتا ہے

اس شخص نے کل ہاتوں ہی ہاتوں میں فلک پر

سو بار چڑھایا مجھے سو بار اتارا

کیا کیا کیا ہے کوچہ بہ کوچہ مجھے خراب

خانہ خراب ہو دل خانہ خراب کا

کہیے کیوں کر نہ اسے بادشہ کشور حسن

کہ جہاں جا کے وہ بیٹھا وہیں دربار لگا