سراج لکھنوی کے 10 منتخب شعر

آنکھیں کھلیں تو جاگ اٹھیں حسرتیں تمام

اس کو بھی کھو دیا جسے پایا تھا خواب میں

ہاں تم کو بھول جانے کی کوشش کریں گے ہم

تم سے بھی ہو سکے تو نہ آنا خیال میں

آپ کے پاؤں کے نیچے دل ہے

اک ذرا آپ کو زحمت ہوگی

کچھ اور مانگنا میرے مشرب میں کفر ہے

لا اپنا ہاتھ دے مرے دست سوال میں

اس سوچ میں بیٹھے ہیں جھکائے ہوئے سر ہم

اٹھے تری محفل سے تو جائیں گے کدھر ہم

آنکھوں پر اپنی رکھ کر ساحل کی آستیں کو

ہم دل کے ڈوبنے پر آنسو بہا رہے ہیں

اس دل میں تو خزاں کی ہوا تک نہیں لگی

اس پھول کو تباہ کیا ہے بہار نے

دیا ہے درد تو رنگ قبول دے ایسا

جو اشک آنکھ سے ٹپکے وہ داستاں ہو جائے

وہ بھیڑ ہے کہ ڈھونڈھنا تیرا تو درکنار

خود کھویا جا رہا ہوں ہجوم خیال میں

خوشا وہ دور کہ جب مرکز نگاہ تھے ہم

پڑا جو وقت تو اب کوئی روشناس نہیں