Zeenat Shayari

gulshan kī faqat phūloñ se nahīñ kāñToñ se bhī zīnat hotī hai

jiine ke liye is duniyā meñ ġham kī bhī zarūrat hotī hai

gulshan ki faqat phulon se nahin kanTon se bhi zinat hoti hai

jine ke liye is duniya mein gham ki bhi zarurat hoti hai

hai dasahre meñ bhī yuuñ gar farhat-o-zīnat 'nazīr'

par divālī bhī ajab pākīza-tar tyauhār hai

hai dasahre mein bhi yun gar farhat-o-zinat 'nazir'

par diwali bhi ajab pakiza-tar tyauhaar hai

mirī zindagī kī zīnat huī āfat-o-balā se

maiñ vo zulf-e-ḳham-ba-ḳham huuñ jo sañvar ga.ī havā se

meri zindagi ki zinat hui aafat-o-bala se

main wo zulf-e-KHam-ba-KHam hun jo sanwar gai hawa se

merā karb mirī tanhā.ī kī zīnat

maiñ chehroñ ke jañgal kā sannāTā huuñ

mera karb meri tanhai ki zinat

main chehron ke jangal ka sannaTa hun

husn bāzār kī zīnat hai magar hai to sahī

ghar se niklā huuñ to us chauk se bhī ho aa.uuñ

husn bazar ki zinat hai magar hai to sahi

ghar se nikla hun to us chauk se bhi ho aaun

bane hue haiñ ajā.eb-gharoñ kī zīnat ham

par apne vāste apnā hī dar nahīñ khultā

bane hue hain ajaeb-gharon ki zinat hum

par apne waste apna hi dar nahin khulta

hazār rañg ke phūloñ se baaġh kī zīnat

bahār aa.ī to laa.ī hai itne hañgāme

hazar rang ke phulon se bagh ki zinat

bahaar aai to lai hai itne hangame

jalva-gar dil meñ ḳhayāl-e-āriz-e-jānāna thā

ghar kī zīnat thī ki zīnat-baḳhsh sāhab-ḳhāna thā

jalwa-gar dil mein KHayal-e-ariz-e-jaanana tha

ghar ki zinat thi ki zinat-baKHsh sahab-KHana tha

zīnat-e-aġhyār kaliyāñ ho ga.iiñ

ġhairat-e-ahl-e-chaman ko kyā huā

zinat-e-aghyar kaliyan ho gain

ghairat-e-ahl-e-chaman ko kya hua

adā-e-ḳhār se gulshan kī baḌh ga.ī zīnat

agarche phūloñ ke dāman haiñ taar taar abhī

ada-e-KHar se gulshan ki baDh gai zinat

agarche phulon ke daman hain tar tar abhi