چاند کا حسن بھی زمین سے ہے

چاند پر چاندنی نہیں ہوتی

لکھنے کو لکھ رہے ہیں غضب کی کہانیاں

لکھی نہ جا سکی مگر اپنی ہی داستاں

حسن بنا جب بہتی گنگا

عشق ہوا کاغذ کی ناؤ

بالآخر تھک ہار کے یارو ہم نے بھی تسلیم کیا

اپنی ذات سے عشق ہے سچا باقی سب افسانے ہیں

زمین کی کوکھ ہی زخمی نہیں اندھیروں سے

ہے آسماں کے بھی سینے پہ آفتاب کا زخم

عجیب بات ہے کیچڑ میں لہلہائے کنول

پھٹے پرانے سے جسموں پہ سج کے ریشم آئے

دل سا کھلونا ہاتھ آیا ہے

کھیلو توڑو جی بہلاؤ

ڈوب جانے کی لذتیں مت پوچھ

کون ایسے میں پار اترا ہے

دیکھ کر میرا دشت تنہائی

رنگ روئے بہار اترا ہے

دن کے بھولے کو رات ڈستی ہے

شام کو واپسی نہیں ہوتی

بجھ گیا دل تو خرابی ہوئی ہے

پھر کسی شعلہ جبیں سے ملئے