کچھ غزلیں ان زلفوں پر ہیں کچھ غزلیں ان آنکھوں پر

جانے والے دوست کی اب اک یہی نشانی باقی ہے

اوڑھ لیا ہے میں نے لبادا شیشے کا

اب مجھ کو کسی پتھر سے ٹکرانے دو

کوئی تو ڈھونڈ کے مجھ کو کہیں سے لے آئے

کہ خود کو دیکھا نہیں ہے بہت زمانوں سے

تیری یاد کا ہر منظر پس منظر لکھتا رہتا ہوں

دل کو ورق بناتا ہوں اور شب بھر لکھتا رہتا ہوں

کبھی دکھا دے وہ منظر جو میں نے دیکھے نہیں

کبھی تو نیند میں اے خواب کے فرشتے آ

کیوں لوگوں سے مہر و وفا کی آس لگائے بیٹھے ہو

جھوٹ کے اس مکروہ نگر میں لوگوں کا کردار کہاں

دشت جنوں کی خاک اڑانے والوں کی ہمت دیکھو

ٹوٹ چکے ہیں اندر سے لیکن من مانی باقی ہے

آیا بسنت پھول بھی شعلوں میں ڈھل گئے

میں چومنے لگا تو مرے ہونٹ جل گئے

ہوئی ہیں دیر و حرم میں یہ سازشیں کیسی

دھواں سا اٹھنے لگا شہر کے مکانوں سے

مری دہلیز پر چپکے سے پاشیؔ

یہ کس نے رکھ دی میری لاش لا کر

دن چڑھ آیا کیوں نہیں آئے جائیں ان سے پوچھ آئیں

لیکن ان کے پاس تو اے دل کوئی بہانہ ہوگا ہی

ہیں سارے انکشاف اپنے ہیں سارے ممکنات اپنے

ہم اس دنیا کا سارا علم لے جائیں گے ساتھ اپنے

اپنے گرد و پیش کا بھی کچھ پتا رکھ

دل کی دنیا تو مگر سب سے جدا رکھ

نئی نئی آوازیں ابھریں پاشیؔ اور پھر ڈوب گئیں

شہر سخن میں لیکن اک آواز پرانی باقی ہے

اے رنگون میں چلتی ہوا میرا سندیسہ لیتی جا

تیرا تو ان کی گلیوں میں آنا جانا ہوگا ہی