dars-e-ilm-e-ishq se vāqif nahīñ mutlaq faqīh

nahv hī meñ mahv hai yā sarf hī meñ sarf hai

dars-e-ilm-e-ishq se waqif nahin mutlaq faqih

nahw hi mein mahw hai ya sarf hi mein sarf hai

ka.aba jaane kī havas shaiḳh hameñ bhī hai vale

kūcha-e-yār qayāmat hai havā-dār aziiz

kaba jaane ki hawas shaiKH hamein bhi hai wale

kucha-e-yar qayamat hai hawa-dar aziz

ashk-bārī se ġham-o-dard kī khetī-bāḌī

lahlahī sī nazar aatī hai harī rahtī hai

ashk-bari se gham-o-dard ki kheti-baDi

lahlahi si nazar aati hai hari rahti hai

dostī chhūTe chhuḌā.e se kisū ke kis tarah

band hotā hī nahīñ rasta diloñ kī raah kā

dosti chhuTe chhuDae se kisu ke kis tarah

band hota hi nahin rasta dilon ki rah ka

us ke kūche hī meñ aa niklūñ huuñ jā.ūñ jis taraf

maiñ to dīvāna huuñ apne is dil-e-gumrāh kā

us ke kuche hi mein aa niklun hun jaun jis taraf

main to diwana hun apne is dil-e-gumrah ka

ka.abe meñ vahī ḳhud hai vahī dair meñ hai aap

hindū kaho yā us ko musalmān vahī hai

kabe mein wahi KHud hai wahi dair mein hai aap

hindu kaho ya us ko musalman wahi hai

jaun se raste vo ho nikle udhar pahroñ talak

ho hujūm-e-ḳhalq se kūcha galī bāzār band

jaun se raste wo ho nikle udhar pahron talak

ho hujum-e-KHalq se kucha gali bazar band

is ḳhānumāñ-ḳharāb ko bhī de miyāñ batā

haiñ kaun kaun se tire rahne ke ghar ke vaqt

is KHanuman-KHarab ko bhi de miyan bata

hain kaun kaun se tere rahne ke ghar ke waqt

rahīm o raam kī sumran hai shaiḳh o hindū ko

dil us ke naam kī raTnā raTe hai kyā kiije

rahim o ram ki sumran hai shaiKH o hindu ko

dil us ke nam ki raTna raTe hai kya kije

naqqāsh-e-azal ne to sar-e-kāġhaz-e-bād aah

kyā ḳhaak likhā umr kī ta.amīr kā naqsha

naqqash-e-azal ne to sar-e-kaghaz-e-baad aah

kya KHak likha umr ki tamir ka naqsha

ka.aba o dair meñ jab vo but-e-kāfir na milā

ba-ḳhudā ham ne bahut nālā-e-nāqūs kiye

kaba o dair mein jab wo but-e-kafir na mila

ba-KHuda hum ne bahut nala-e-naqus kiye

dair meñ ka.abe meñ maiḳhāne meñ aur masjid meñ

jalva-gar sab meñ mirā yaar hai allāh allāh

dair mein kabe mein maiKHane mein aur masjid mein

jalwa-gar sab mein mera yar hai allah allah

be-ishq jitnī ḳhalq hai insāñ kī shakl meñ

nazroñ meñ ahl-e-dīd ke aadam ye sab nahīñ

be-ishq jitni KHalq hai insan ki shakl mein

nazron mein ahl-e-did ke aadam ye sab nahin

kāfir huuñ gar maiñ naam bhī ka.abe kā luuñ kabhī

vo sañg-dil sanam jo kabhū mujh se raam ho

kafir hun gar main nam bhi kabe ka lun kabhi

wo sang-dil sanam jo kabhu mujh se ram ho

ai dil tujhe karnī hai agar ishq se bai.at

zinhār kabhū chhoḌiyo mat silsila-e-dard

ai dil tujhe karni hai agar ishq se baiat

zinhaar kabhu chhoDiyo mat silsila-e-dard

raat āḳhir hai yahāñ aayā nazar āsār-e-sub.h

sham.a kī phīkī hai lau hoñToñ kī hai laalī hai udaas

raat aaKHir hai yahan aaya nazar aasar-e-subh

shama ki phiki hai lau honTon ki hai lali hai udas

ġhaur kar dekho to ye ik taar kā bistār hai

rishta-e-tasbīh aur sar-rishta-e-zunnār band

ghaur kar dekho to ye ek tar ka bistar hai

rishta-e-tasbih aur sar-rishta-e-zunnar band

in do ke sivā koī falak se na huā paar

yā tiir mirī aah kā yā us kī nazar kā

in do ke siwa koi falak se na hua par

ya tir meri aah ka ya us ki nazar ka

diloñ kā farsh hai vaañ paañv rakhne kī kahāñ jāgah

guzartā hai tire kūche se pahle hī qadam sar se

dilon ka farsh hai wan panw rakhne ki kahan jagah

guzarta hai tere kuche se pahle hi qadam sar se

fasl ḳhizāñ meñ bāġh-e-mazāhib kī kī jo sair

hai har taraf bahār gul-e-ja.afrī se aaj

fasl KHizan mein bagh-e-mazahib ki ki jo sair

hai har taraf bahaar gul-e-jafri se aaj

ḳhat kā ye javāb aayā ki qāsid gayā jī se

sar ek taraf loTe hai aur ek taraf dhaḌ

KHat ka ye jawab aaya ki qasid gaya ji se

sar ek taraf loTe hai aur ek taraf dhaD

tire kalām ne kaisā asar kiyā vaa.iz

ki dil ziyāda-tar āvāra ho gayā vaa.iz

tere kalam ne kaisa asar kiya waiz

ki dil ziyaada-tar aawara ho gaya waiz

dīvāngī ke silsila kā ho.e jo murīd

us gesū-e-darāz sivā piir hī nahīñ

diwangi ke silsila ka hoe jo murid

us gesu-e-daraaz siwa pir hi nahin

kaash ham nākām bhī kaam aa.eñ tere ishq meñ

mutlaqan nākāra haiñ duniyā-o-dīñ ke kaam se

kash hum nakaam bhi kaam aaen tere ishq mein

mutlaqan nakara hain duniya-o-din ke kaam se

islām meñ ye kaisā inkār kufr se hai

tasbīh meñ piro.e zunnār hai ta.ajjub

islam mein ye kaisa inkar kufr se hai

tasbih mein piroe zunnar hai tajjub

suḳhan jin ke ki sūrat juuñ guhar hai bahr-e-ma.anī meñ

abas ġhaltāñ rakhe hai fikr un ke āb-o-dāne kā

suKHan jin ke ki surat jun guhar hai bahr-e-mani mein

abas ghaltan rakhe hai fikr un ke aab-o-dane ka

ba-ma.anī kufr se islām kab ḳhālī hai ai zāhid

nikal sub.he se rishta sūrat-e-zunnār ho paidā

ba-mani kufr se islam kab KHali hai ai zahid

nikal subhe se rishta surat-e-zunnar ho paida

na tai ek raka.at kī manzil huī

safar shaiḳh-jī ke vuzū ne kiyā

na tai ek rakat ki manzil hui

safar shaiKH-ji ke wuzu ne kiya

jaltā hai ki ḳhurshīd kī ik roTī ho tayyār

le shaam se tā-sub.h tanūr-e-shab-e-mahtāb

jalta hai ki KHurshid ki ek roTi ho tayyar

le sham se ta-subh tanur-e-shab-e-mahtab

ye banda ho yā tum ho vaañ ġhair na ho koī

is Dhab ke hai milne kā armān mirā sāhab

ye banda ho ya tum ho wan ghair na ho koi

is Dhab ke hai milne ka arman mera sahab

hai mire pahlū meñ aur mujh ko nazar aatā nahīñ

us parī kā sehr yaaro kuchh kahā jaatā nahīñ

hai mere pahlu mein aur mujh ko nazar aata nahin

us pari ka sehr yaro kuchh kaha jata nahin

charāġh-e-ka.aba-o-dair ek sā hai chashm-e-haq-bīñ meñ

'muhib' jhagḌā hai korī ke sabab shaiḳh o barhaman kā

charagh-e-kaba-o-dair ek sa hai chashm-e-haq-bin mein

'muhib' jhagDa hai kori ke sabab shaiKH o barhaman ka

ishq jab daḳhl kare hai dil-e-insāñ meñ 'muhib'

vāhime sab bashariyyat ke kare hai iḳhrāj

ishq jab daKHl kare hai dil-e-insan mein 'muhib'

wahime sab bashariyyat ke kare hai iKHraj

ye dāḌhī mohtasib ne duḳht-e-raz ke phaaḌ khāne ko

liyā hai muñh par apne Daal burqā be-hayā.ī kā

ye daDhi mohtasib ne duKHt-e-raz ke phaD khane ko

liya hai munh par apne Dal burqa be-hayai ka

ai banda-parvar itnā lāzim hai kyā takalluf

uThiye ġharīb-ḳhāne chaliye bilā-takalluf

ai banda-parwar itna lazim hai kya takalluf

uThiye gharib-KHane chaliye bila-takalluf

raqīb jam ke ye baiThā ki ham uThe nā-chār

ye patthar ab na haTā.e haTe hai kyā kiije

raqib jam ke ye baiTha ki hum uThe na-chaar

ye patthar ab na haTae haTe hai kya kije

'muhib' tum but-parastī ko na chhoḌo

tumhārā yaañ huvaidā ho.egā rab

'muhib' tum but-parasti ko na chhoDo

tumhaara yan huwaida hoega rab

ham havā-e-vasl meñ yaañ tak phire

jo havas ke paañv meñ chhāle paḌe

hum hawa-e-wasl mein yan tak phire

jo hawas ke panw mein chhaale paDe

jab nashe meñ ham ne kuchh mīThe kī ḳhvāhish us se kī

tursh ho bolā ki kyuuñ be tū bhī is laa.eq huā

jab nashe mein hum ne kuchh miThe ki KHwahish us se ki

tursh ho bola ki kyun be tu bhi is laeq hua

ba-tasḳhīr-e-butāñ tasbīh kyuuñ zāhid phirāte haiñ

ye lohe ke chane vallāh āshiq hī chabāte haiñ

ba-tasKHir-e-butan tasbih kyun zahid phiraate hain

ye lohe ke chane wallah aashiq hi chabaate hain

raag apnā gā hamārā zikr mat kar ai raqīb

jab satāvegā hameñ tab leñge ham ik dhol thaap

rag apna ga hamara zikr mat kar ai raqib

jab satawega hamein tab lenge hum ek dhol thap

jo az-ḳhud-rafta hai gumrāh hai vo rahnumā merā

jo ik aalam se hai begāna hai vo āshnā merā

jo az-KHud-rafta hai gumrah hai wo rahnuma mera

jo ek aalam se hai begana hai wo aashna mera

tum gaao apne raag ko us paas vā.izo

mushtāq jo gadhā ho tumhāre alaap kā

tum gao apne rag ko us pas waizo

mushtaq jo gadha ho tumhaare alap ka

dariyā-e-mohabbat se 'muhib' le hī ke chhoḌī

mujh ashk ne āḳhir dur-e-nāyāb kī mīrās

dariya-e-mohabbat se 'muhib' le hi ke chhoDi

mujh ashk ne aaKHir dur-e-nayab ki miras

shaiḳh hai tujh ko hī inkār sanam mere se

varna har shaḳhs ko iqrār hai allāh allāh

shaiKH hai tujh ko hi inkar sanam mere se

warna har shaKHs ko iqrar hai allah allah

ho gad.he par savār jā ka.aba

shaiḳh ye kuuch hai salāmat kā

ho gadhe par sawar ja kaba

shaiKH ye kuch hai salamat ka

nikālūñ dil se maiñ naale kī kis tarah āvāz

terī nigah ne ajab surma-dān khol diye

nikalun dil se main nale ki kis tarah aawaz

teri nigah ne ajab surma-dan khol diye

vo jo lailā hai mire dil meñ sune us kā jo shor

qais nikle gor se bāhar kafan ko chīr-phāḌ

wo jo laila hai mere dil mein sune us ka jo shor

qais nikle gor se bahar kafan ko chir-phaD

na kiije vo ki miyāñ jis se dil koī ho malūl

sivā.e is ke jo jī chāhe so kiyā kiije

na kije wo ki miyan jis se dil koi ho malul

siwae is ke jo ji chahe so kiya kije

are o ḳhāna-ābād itnī ḳhūñ-rezī ye qattālī

ki ik āshiq nahīñ kūcha tirā vīrān suunā hai

are o KHana-abaad itni KHun-rezi ye qattali

ki ek aashiq nahin kucha tera viran suna hai