علم میں جھینگر سے بڑھ کر کامراں کوئی نہیں

چاٹ جاتا ہے کتابیں امتحاں کوئی نہیں

چائے میں ڈال کر عشاق اسے پی جاتے

در حقیقت لب معشوق جو شکر ہوتا

وحشت میں ہر اک نقشہ الٹا نظر آتا ہے

مجنوں نظر آتی ہے لیلیٰ نظر آتا ہے

ہمیں بتلا نہ دیں عاشق جو ہیں روئے کتابی پر

سبق ہے کیا کوئی معشوق جس کو یاد کرتے ہیں

ظریفؔ اب فائدہ کیا شاعروں کو سردی کھانے سے

غزل ہم پڑھ چکے گھر جائیں کیوں بیکار بیٹھے ہیں

مے کو جو اصطلاح میں کہتے ہیں دخت رز

وہ مغبچہ ہے رندوں کا سالا کہیں جسے

باز آئے محبت سے اے عشق خدا حافظ

الفت میں جسے دیکھو اندھا نظر آتا ہے

زلف کے جال میں معشوق کا سر ہے خود بھی

قیدیوں مژدہ کہ صیاد تہ دام آیا

وہ بھی گونگے بنے رہے ہم بھی

گفتگو قصہ مختصر نہ ہوئی

بزم میں کچھ قدر داں اس قسم کے آ جائیں گے

چھانٹ کر اکثر نئے جوتے چرا لے جائیں گے

جو دکھاتے ہیں رہ عشق میں ثابت قدمی

ایسے عشاق کے پیروں میں ورم ہوتا ہے

ایسی جگہ پہ گر کہیں رہنے کو جا ملے

انساں کو زندگی میں لحد کا مزا ملے

ساکنان شہر اب ہشیار ہونا چاہیئے

ممبر اور ووٹر کا کچھ معیار ہونا چاہیئے