چھلک اٹھا جو کبھی خون آرزو میرا

مژہ مژہ تری رعنائیوں کی بات گئی

وہ عرض غم پہ مری ان کا اہتمام سکوت

تمام شورش تفصیل واقعات گئی

تھی نظر کے سامنے کچھ تو تلافی کی امید

کھیت سوکھا تھا مگر دریا میں طغیانی تو تھی

کبھی کبھی سفر زندگی سے روٹھ کے ہم

ترے خیال کے سائے میں بیٹھ جاتے ہیں

اپنے غم کی فکر نہ کی اس دنیا کی غم خواری میں

برسوں ہم نے دست جنوں سے کام لیا دانائی کا

غم نیرنگ دکھاتا ہے ہستی کی جلوہ نمائی کا

کتنے زمانوں کا حاصل ہے اک لمحہ تنہائی کا

خواب دیکھا تھا کہاں چمکی ہے تعبیر کہاں

حشر کا دن مری فطرت کا اجالا نکلا

تخلیق کے پردے میں ستم ٹوٹ رہے ہیں

آزر ہی کے ہاتھوں سے صنم ٹوٹ رہے ہیں

آؤ ہم ہنستے اٹھیں بزم دل آزاراں سے

کون احساس کو بیمار بنا کر اٹھے

یہ آرزو کے ستارے یہ انتظار کے پھول

چمک رہی ہیں خطائیں مہک رہے ہیں گناہ