avval avval 'ilm faqat ik nuqta thā

āḳhir āḳhir jehl banā tāvīloñ se

awwal awwal 'ilm faqat ek nuqta tha

aaKHir aaKHir jehl bana tawilon se

chāñd tak uḌ kar pahuñchne kā nahīñ imkān jā

jā chakorī apne ghar vāloñ kā kahnā maan jā

chand tak uD kar pahunchne ka nahin imkan ja

ja chakori apne ghar walon ka kahna man ja

ek kueñ kī gahrā.ī se misr ke taḳht-e-shāhī tak

dekhne vaalī aañkh ko kitne nādīda bāzār mile

ek kuen ki gahrai se misr ke taKHt-e-shahi tak

dekhne wali aankh ko kitne nadida bazar mile

ghaTe to jehl-e-murakkab baḌhe to karb-e-hayāt

ye āgahī bhī musībat hai aadmī ke liye

ghaTe to jehl-e-murakkab baDhe to karb-e-hayat

ye aagahi bhi musibat hai aadmi ke liye

pahuñchī diloñ kī aag hamāre ḳhiyām tak

lekin dhuāñ to jā.egā darbār-e-shām tak

pahunchi dilon ki aag hamare KHiyam tak

lekin dhuan to jaega darbar-e-sham tak