bas ik jhijak hai yahī hāl-e-dil sunāne meñ

ki terā zikr bhī aa.egā is fasāne meñ

bas ek jhijak hai yahi haal-e-dil sunane mein

ki tera zikr bhi aaega is fasane mein

insāñ kī ḳhvāhishoñ kī koī intihā nahīñ

do gaz zamīñ bhī chāhiye do gaz kafan ke baad

insan ki KHwahishon ki koi intiha nahin

do gaz zamin bhi chahiye do gaz kafan ke baad

rahne ko sadā dahr meñ aatā nahīñ koī

tum jaise ga.e aise bhī jaatā nahīñ koī

rahne ko sada dahr mein aata nahin koi

tum jaise gae aise bhi jata nahin koi

jhukī jhukī sī nazar be-qarār hai ki nahīñ

dabā dabā sā sahī dil meñ pyaar hai ki nahīñ

jhuki jhuki si nazar be-qarar hai ki nahin

daba daba sa sahi dil mein pyar hai ki nahin

bastī meñ apnī hindū musalmāñ jo bas ga.e

insāñ kī shakl dekhne ko ham taras ga.e

basti mein apni hindu musalman jo bas gae

insan ki shakl dekhne ko hum taras gae

tum itnā jo muskurā rahe ho

kyā ġham hai jis ko chhupā rahe ho

tum itna jo muskura rahe ho

kya gham hai jis ko chhupa rahe ho

ab jis taraf se chāhe guzar jaa.e kārvāñ

vīrāniyāñ to sab mire dil meñ utar ga.iiñ

ab jis taraf se chahe guzar jae karwan

viraniyan to sab mere dil mein utar gain

muddat ke ba.ad us ne jo kī lutf kī nigāh

jī ḳhush to ho gayā magar aañsū nikal paḌe

muddat ke baad us ne jo ki lutf ki nigah

ji KHush to ho gaya magar aansu nikal paDe

koī to suud chukā.e koī to zimma le

us inqalāb kā jo aaj tak udhār sā hai

koi to sud chukae koi to zimma le

us inqalab ka jo aaj tak udhaar sa hai

merā bachpan bhī saath le aayā

gaañv se jab bhī aa gayā koī

mera bachpan bhi sath le aaya

ganw se jab bhi aa gaya koi

peḌ ke kāTne vāloñ ko ye mālūm to thā

jism jal jā.eñge jab sar pe na saaya hogā

peD ke kaTne walon ko ye malum to tha

jism jal jaenge jab sar pe na saya hoga

gar Dūbnā hī apnā muqaddar hai to suno

Dūbeñge ham zarūr magar nāḳhudā ke saath

gar Dubna hi apna muqaddar hai to suno

Dubenge hum zarur magar naKHuda ke sath

jis tarah hañs rahā huuñ maiñ pī pī ke garm ashk

yuuñ dūsrā hañse to kaleja nikal paḌe

jis tarah hans raha hun main pi pi ke garm ashk

yun dusra hanse to kaleja nikal paDe

belche laao kholo zamīñ kī taheñ

maiñ kahāñ dafn huuñ kuchh patā to chale

belche lao kholo zamin ki tahen

main kahan dafn hun kuchh pata to chale

koī kahtā thā samundar huuñ maiñ

aur mirī jeb meñ qatra bhī nahīñ

koi kahta tha samundar hun main

aur meri jeb mein qatra bhi nahin

roz baḌhtā huuñ jahāñ se aage

phir vahīñ lauT ke aa jaatā huuñ

roz baDhta hun jahan se aage

phir wahin lauT ke aa jata hun

bahār aa.e to merā salām kah denā

mujhe to aaj talab kar liyā hai sahrā ne

bahaar aae to mera salam kah dena

mujhe to aaj talab kar liya hai sahra ne

ġhurbat kī ThanDī chhāñv meñ yaad aa.ī us kī dhuup

qadr-e-vatan huī hameñ tark-e-vatan ke baad

ghurbat ki ThanDi chhanw mein yaad aai us ki dhup

qadr-e-watan hui hamein tark-e-watan ke baad

itnā to zindagī meñ kisī ke ḳhalal paḌe

hañsne se ho sukūn na rone se kal paḌe

itna to zindagi mein kisi ke KHalal paDe

hansne se ho sukun na rone se kal paDe

jo ik ḳhudā nahīñ miltā to itnā mātam kyuuñ

yahāñ to koī mirā ham-zabāñ nahīñ miltā

jo ek KHuda nahin milta to itna matam kyun

yahan to koi mera ham-zaban nahin milta

kī hai koī hasīn ḳhatā har ḳhatā ke saath

thoḌā sā pyaar bhī mujhe de do sazā ke saath

ki hai koi hasin KHata har KHata ke sath

thoDa sa pyar bhi mujhe de do saza ke sath

roz baste haiñ ka.ī shahr na.e

roz dhartī meñ samā jaate haiñ

roz baste hain kai shahr nae

roz dharti mein sama jate hain

rah ga.ī zindagī dard ban ke

dard dil meñ chhupā.e chhupā.e

rah gai zindagi dard ban ke

dard dil mein chhupae chhupae

dil kī nāzuk rageñ TūTtī haiñ

yaad itnā bhī koī na aa.e

dil ki nazuk ragen TuTti hain

yaad itna bhi koi na aae

jab us ne haar ke ḳhanjar zamīñ pe pheñk diyā

tamām zaḳhm-e-jigar muskurā.e haiñ kyā kyā

jab us ne haar ke KHanjar zamin pe phenk diya

tamam zaKHm-e-jigar muskurae hain kya kya

nazar milī bhī na thī aur un ko dekh layyā

zabāñ khulī bhī na thī aur baat bhī kar lī

nazar mili bhi na thi aur un ko dekh layya

zaban khuli bhi na thi aur baat bhi kar li

nasheb-e-hastī se afsos ham ubhar na sake

farāz-e-dār se paiġhām aa.e haiñ kyā kyā

nasheb-e-hasti se afsos hum ubhar na sake

faraaz-e-dar se paigham aae hain kya kya

jo kahī ga.ī na mujh se vo zamāna kah rahā hai

ki fasāna ban ga.ī hai mirī baat Talte Talte

jo kahi gai na mujh se wo zamana kah raha hai

ki fasana ban gai hai meri baat Talte Talte

jo vo mire na rahe maiñ bhī kab kisī kā rahā

bichhaḌ ke un se salīqa na zindagī kā rahā

jo wo mere na rahe main bhi kab kisi ka raha

bichhaD ke un se saliqa na zindagi ka raha

uThā ke sar mujhe itnā to dekh lene de

ki qatl-gāh meñ dīvāne aa.e haiñ kyā kyā

uTha ke sar mujhe itna to dekh lene de

ki qatl-gah mein diwane aae hain kya kya

shab-e-intizār āḳhir kabhī hogī muḳhtasar bhī

ye charāġh bujh rahe haiñ mire saath jalte jalte

shab-e-intizar aaKHir kabhi hogi muKHtasar bhi

ye charagh bujh rahe hain mere sath jalte jalte

na jaane kis kā saaya dil se guzrā

zarā āvāz denā rāzdāro

na jaane kis ka saya dil se guzra

zara aawaz dena raazdaro

shah-nāme likkhe haiñ khañDarāt kī har iiñT par

har jagah hai dafn ik afsāna tere shahr meñ

shah-name likkhe hain khanDaraat ki har inT par

har jagah hai dafn ek afsana tere shahr mein

dīvāreñ to har taraf khaḌī haiñ

kyā ho ga.e mehrbān saa.e

diwaren to har taraf khaDi hain

kya ho gae mehrban sae

aaj phir TūTeñgī tere ghar kī nāzuk khiḌkiyāñ

aaj phir dekhā gayā dīvāna tere shahr meñ

aaj phir TuTengi tere ghar ki nazuk khiDkiyan

aaj phir dekha gaya diwana tere shahr mein

kyā dard kisī kā legā koī itnā to kisī meñ dard nahīñ

bahte hue aañsū aur baheñ ab aisī tasallī rahne do

kya dard kisi ka lega koi itna to kisi mein dard nahin

bahte hue aansu aur bahen ab aisi tasalli rahne do

laboñ se uḌ gayā jugnū kī tarah naam us kā

sahārā ab mire ghar meñ na raushnī kā rahā

labon se uD gaya jugnu ki tarah nam us ka

sahaara ab mere ghar mein na raushni ka raha

ab aage jo bhī ho anjām dekhā jā.egā

ḳhudā talāsh liyā aur bandagī kar lī

ab aage jo bhi ho anjam dekha jaega

KHuda talash liya aur bandagi kar li

ik ḳhvāb ḳhushī kā dekhā nahīñ dekhā jo kabhī to bhuul ga.e

māñgā huā tum kuchh de na sake jo tum ne diyā vo sahne do

ek KHwab KHushi ka dekha nahin dekha jo kabhi to bhul gae

manga hua tum kuchh de na sake jo tum ne diya wo sahne do

jañgal kī havā.eñ aa rahī haiñ

kāġhaz kā ye shahr uḌ na jaa.e

jangal ki hawaen aa rahi hain

kaghaz ka ye shahr uD na jae