dhuāñ detā hai dāmān-e-mohabbat

in āñkhoñ se koī aañsū girā hai

dhuan deta hai daman-e-mohabbat

in aankhon se koi aansu gira hai

māl-o-zar ahl-e-duval sāmne yuuñ ginte haiñ

ham faqīroñ ne na kuchh sarf kiyā ho jaise

mal-o-zar ahl-e-duwal samne yun ginte hain

hum faqiron ne na kuchh sarf kiya ho jaise

nigāh-e-shauq se lākhoñ banā Daale haiñ dar ham ne

qafas meñ bhī nahīñ maanī shikaste-bāl-o-par ham ne

nigah-e-shauq se lakhon bana Dale hain dar hum ne

qafas mein bhi nahin mani shikaste-baal-o-par hum ne

sitāre kī tarah siine meñ dil Duubā kiyā lekin

shab-e-ġham ke añdhere se nahīñ māñgī sahar ham ne

sitare ki tarah sine mein dil Duba kiya lekin

shab-e-gham ke andhere se nahin mangi sahar hum ne

yūñhī insānoñ ke shahroñ meñ milā apnā vajūd

kisī vīrāne meñ ik phuul khilā ho jaise

yunhi insanon ke shahron mein mila apna wajud

kisi virane mein ek phul khila ho jaise