ek jhoñkā havā kā aayā 'zeb'

aur phir maiñ ġhubār bhī na rahā

ek jhonka hawa ka aaya 'zeb'

aur phir main ghubar bhi na raha

dhund hai aur surma.ī kohsār kī choTī hai 'zeb'

zard shahpar dhuup uḌne ke liye tayyār hai

dhund hai aur surmai kohsar ki choTi hai 'zeb'

zard shahpar dhup uDne ke liye tayyar hai

tūfāñ meñ naav aa.ī to kyā samt kyā nishāñ

kuchh der meñ rahā na havā kā shumār bhī

tufan mein naw aai to kya samt kya nishan

kuchh der mein raha na hawa ka shumar bhi

ḳhākistar-e-jāñ ko mirī mahkā.e thā lekin

juuhī kā vo paudhā mire āñgan meñ nahīñ thā

KHakistar-e-jaan ko meri mahkae tha lekin

juhi ka wo paudha mere aangan mein nahin tha

'zeb' mujhe Dar lagne lagā hai apne ḳhvāboñ se

jāgte jāgte dard rahā kartā hai mire sar meñ

'zeb' mujhe Dar lagne laga hai apne KHwabon se

jagte jagte dard raha karta hai mere sar mein

chamak rahā hai ḳhema-e-raushan duur sitāre sā

dil kī kashtī tair rahī hai khule samundar meñ

chamak raha hai KHema-e-raushan dur sitare sa

dil ki kashti tair rahi hai khule samundar mein

kam raushan ik ḳhvāb ā.īna ik piilā murjhāyā phuul

pas-manzar ke sannāTe meñ ek nadī pathrīlī sī

kam raushan ek KHwab aaina ek pila murjhaya phul

pas-manzar ke sannaTe mein ek nadi pathrili si

phir ek naqsh kā nairañg 'zeb' bikhregā

mire ġhubār ko phir us ne pech-o-tāb diyā

phir ek naqsh ka nairang 'zeb' bikhrega

mere ghubar ko phir us ne pech-o-tab diya

maiñ tishna thā mujhe sar-chashma-e-sarāb diyā

thake badan ko mire pattharoñ meñ daab diyā

main tishna tha mujhe sar-chashma-e-sarab diya

thake badan ko mere pattharon mein dab diya

ajab karishma dikhāyā ba-yak qalam us ne

havā chalā.ī samundar ko naqsh-e-āb diyā

ajab karishma dikhaya ba-yak qalam us ne

hawa chalai samundar ko naqsh-e-ab diya

us kī rāhoñ meñ paḌā maiñ bhī huuñ kab se lekin

bhuul jaatā huuñ use yaad dilāne ke liye

us ki rahon mein paDa main bhi hun kab se lekin

bhul jata hun use yaad dilane ke liye

kahīñ pata na lagā phir vajūd kā mere

uThā ke le ga.ī duniyā shikār kis kā thā

kahin pata na laga phir wajud ka mere

uTha ke le gai duniya shikar kis ka tha

guhar lage the ḳhunuk uñgliyoñ ke zaḳhm mujhe

ab is athāh samundar ko phir khañgāle kaun

guhar lage the KHunuk ungliyon ke zaKHm mujhe

ab is athah samundar ko phir khangale kaun

lahū meñ tairtā phirtā hai merā ḳhasta badan

maiñ Duub jā.ūñ to zaḳhmoñ ko dekhe-bhāle kaun

lahu mein tairta phirta hai mera KHasta badan

main Dub jaun to zaKHmon ko dekhe-bhaale kaun

dil hai ki tirī yaad se ḳhālī nahīñ rahtā

shāyad hī kabhī maiñ ne tujhe yaad kiyā ho

dil hai ki teri yaad se KHali nahin rahta

shayad hi kabhi main ne tujhe yaad kiya ho

zaḳhm lagā kar us kā bhī kuchh haath khulā

maiñ bhī dhokā khā kar kuchh chālāk huā

zaKHm laga kar us ka bhi kuchh hath khula

main bhi dhoka kha kar kuchh chaalak hua

mahaktī zulfoñ se ḳhoshe guloñ ke chhūT gire

kuchh aur jaise ki gunjā.ish-e-bahār na thī

mahakti zulfon se KHoshe gulon ke chhuT gire

kuchh aur jaise ki gunjaish-e-bahaar na thi

talāsh ek bahāna thā ḳhaak uḌāne kā

pata chalā ki hameñ justujū-e-yār na thī

talash ek bahana tha KHak uDane ka

pata chala ki hamein justuju-e-yar na thi

khulī chhatoñ se chāñdnī rāteñ katrā jā.eñgī

kuchh ham bhī tanhā.ī ke aadī ho jā.eñge

khuli chhaton se chandni raaten katra jaengi

kuchh hum bhi tanhai ke aadi ho jaenge

sūraj ne ik nazar mire zaḳhmoñ pe Daal ke

dekhā hai mujh ko khiḌkī se phir sar nikāl ke

suraj ne ek nazar mere zaKHmon pe Dal ke

dekha hai mujh ko khiDki se phir sar nikal ke

uḌā ke ḳhaak bahut maiñ ne dekh lī ai 'zeb'

vahāñ talak to koī rāsta nahīñ jaatā

uDa ke KHak bahut main ne dekh li ai 'zeb'

wahan talak to koi rasta nahin jata

ye kam hai kyā ki mire paas baiThā rahtā hai

vo jab talak mire dil ko dukhā nahīñ jaatā

ye kam hai kya ki mere pas baiTha rahta hai

wo jab talak mere dil ko dukha nahin jata

baḌe azaab meñ huuñ mujh ko jaan bhī hai aziiz

sitam ko dekh ke chup bhī rahā nahīñ jaatā

baDe azab mein hun mujh ko jaan bhi hai aziz

sitam ko dekh ke chup bhi raha nahin jata

chheḌ kar jaise guzar jaatī hai doshīza havā

der se ḳhāmosh hai gahrā samundar aur maiñ

chheD kar jaise guzar jati hai doshiza hawa

der se KHamosh hai gahra samundar aur main

ghasīTte hue ḳhud ko phiroge 'zeb' kahāñ

chalo ki ḳhaak ko de aa.eñ ye badan us kā

ghasiTte hue KHud ko phiroge 'zeb' kahan

chalo ki KHak ko de aaen ye badan us ka

na jaane kyā hai ki jab bhī maiñ us ko dekhtā huuñ

to koī aur mire rū-ba-rū nikaltā hai

na jaane kya hai ki jab bhi main us ko dekhta hun

to koi aur mere ru-ba-ru nikalta hai

maiñ payambar tirā nahīñ lekin

mujh se bhī baat kar ḳhudā mere

main payambar tera nahin lekin

mujh se bhi baat kar KHuda mere

maiñ ne betābāna baḌh kar dasht meñ āvāz dī

jab ġhubār uTThā kisī dīvāne kā dhokā huā

main ne betabana baDh kar dasht mein aawaz di

jab ghubar uTTha kisi diwane ka dhoka hua

'zeb' savāl ab ye hai tujhe pahchāne kaun

kis kī nazar is gahrā.ī kī hāmil ho

'zeb' sawal ab ye hai tujhe pahchane kaun

kis ki nazar is gahrai ki hamil ho

dekh kabhī aa kar ye lā-mahdūd fazā

tū bhī merī tanhā.ī meñ shāmil ho

dekh kabhi aa kar ye la-mahdud faza

tu bhi meri tanhai mein shamil ho

andar andar khokhle ho jaate haiñ ghar

jab dīvāroñ meñ paanī bhar jaatā hai

andar andar khokhle ho jate hain ghar

jab diwaron mein pani bhar jata hai

koī ḳhabar hī na thī marg-e-justujū kī mujhe

zamīñ phalāñg gayā apne shauq-e-behad meñ

koi KHabar hi na thi marg-e-justuju ki mujhe

zamin phalang gaya apne shauq-e-behad mein

maiñ to chaak pe kūza-gar ke haath kī miTTī huuñ

ab ye miTTī dekh khilaunā kaise bantī hai

main to chaak pe kuza-gar ke hath ki miTTi hun

ab ye miTTi dekh khilauna kaise banti hai

ab mujh se ye duniyā mirā sar maañg rahī hai

kambaḳht mire aage savālī hī rahegī

ab mujh se ye duniya mera sar mang rahi hai

kambaKHt mere aage sawali hi rahegi

ab tak to kisī ġhair kā ehsāñ nahīñ mujh par

qātil bhī koī chāhne vaalī hī rahegī

ab tak to kisi ghair ka ehsan nahin mujh par

qatil bhi koi chahne wali hi rahegi

maiñ laakh ise taaza rakhūñ dil ke lahū se

lekin tirī tasvīr ḳhayālī hī rahegī

main lakh ise taza rakhun dil ke lahu se

lekin teri taswir KHayali hi rahegi

kis ne sahrā meñ mire vāste rakkhī hai ye chhāñv

dhuup roke hai mirā chāhne vaalā kaisā

kis ne sahra mein mere waste rakkhi hai ye chhanw

dhup roke hai mera chahne wala kaisa

maiñ ne dekhā thā sahāre ke liye chāroñ taraf

ki mire paas hī ik haath bhañvar se niklā

main ne dekha tha sahaare ke liye chaaron taraf

ki mere pas hi ek hath bhanwar se nikla

sañg-e-behis se uThī mauj-e-siyah-tāb koī

sarsarātā huā ik saañp khañDar se niklā

sang-e-behis se uThi mauj-e-siyah-tab koi

sarsaraata hua ek sanp khanDar se nikla

kuchh duur tak to chamkī thī mere lahū kī dhaar

phir raat apne saath bahā le ga.ī mujhe

kuchh dur tak to chamki thi mere lahu ki dhaar

phir raat apne sath baha le gai mujhe

jagmagātā huā ḳhanjar mire siine meñ utaar

raushnī le ke kabhī ḳhāna-e-vīrān meñ aa

jagmagata hua KHanjar mere sine mein utar

raushni le ke kabhi KHana-e-viran mein aa

TūTtī rahtī hai kachche dhāge sī niiñd

āñkhoñ ko ThanDak ḳhvāboñ ko girānī de

TuTti rahti hai kachche dhage si nind

aankhon ko ThanDak KHwabon ko girani de

DhūñDhtī phirtī haiñ jaane mirī nazreñ kis ko

aisī bastī meñ jahāñ koī bhī ābād nahīñ

DhunDhti phirti hain jaane meri nazren kis ko

aisi basti mein jahan koi bhi aabaad nahin

be-hisī par mirī vo ḳhush thā ki patthar hī to hai

maiñ bhī chup thā ki chalo siine meñ ḳhanjar hī to hai

be-hisi par meri wo KHush tha ki patthar hi to hai

main bhi chup tha ki chalo sine mein KHanjar hi to hai

dho ke tū merā lahū apne hunar ko na chhupā

ki ye surḳhī tirī shamshīr kā jauhar hī to hai

dho ke tu mera lahu apne hunar ko na chhupa

ki ye surKHi teri shamshir ka jauhar hi to hai

tere sāmne aate hue ghabrātā huuñ

lab pe tirā iqrār hai dil meñ chor bahut

tere samne aate hue ghabraata hun

lab pe tera iqrar hai dil mein chor bahut

mujh se bichhaḌ kar hogā samundar bhī bechain

raat Dhale to kartā hogā shor bahut

mujh se bichhaD kar hoga samundar bhi bechain

raat Dhale to karta hoga shor bahut

aage chal ke to kaḌe kos haiñ tanhā.ī ke

aur kuchh duur talak lutf-e-safar hai ye bhī

aage chal ke to kaDe kos hain tanhai ke

aur kuchh dur talak lutf-e-safar hai ye bhi

dil ko sambhāle hañstā boltā rahtā huuñ lekin

sach pūchho to 'zeb' tabī.at Thiik nahīñ hotī

dil ko sambhaale hansta bolta rahta hun lekin

sach puchho to 'zeb' tabiat Thik nahin hoti

sher to mujh se terī āñkheñ kahlā letī haiñ

chup rahtā huuñ maiñ jab tak tahrīk nahīñ hotī

sher to mujh se teri aankhen kahla leti hain

chup rahta hun main jab tak tahrik nahin hoti