عشق میں تہذیب کے ہیں اور ہی کچھ فلسفے

تجھ سے ہو کر ہم خفا خود سے خفا رہنے لگے

پوچھ رہے ہیں مجھ سے پیڑوں کے سوداگر

آب و ہوا کیسے زہریلی ہو جاتی ہے

بہت سکون سے رہتے تھے ہم اندھیرے میں

فساد پیدا ہوا روشنی کے آنے سے

رات گئے اکثر دل کے ویرانوں میں

اک سائے کا آنا جانا ہوتا ہے

میں نے بچپن میں ادھورا خواب دیکھا تھا کوئی

آج تک مصروف ہوں اس خواب کی تکمیل میں

ہاتھ پکڑ لے اب بھی تیرا ہو سکتا ہوں میں

بھیڑ بہت ہے اس میلے میں کھو سکتا ہوں میں

کچھ رستے مشکل ہی اچھے لگتے ہیں

کچھ رستوں کو ہم آسان نہیں کرتے

لکیر کھینچ کے بیٹھی ہے تشنگی مری

بس ایک ضد ہے کہ دریا یہیں پہ آئے گا

کبھی کبھی کتنا نقصان اٹھانا پڑتا ہے

ایروں غیروں کا احسان اٹھانا پڑتا ہے

دل روتا ہے چہرا ہنستا رہتا ہے

کیسا کیسا فرض نبھانا ہوتا ہے

چاروں طرف ہیں شعلے ہمسائے جل رہے ہیں

میں گھر میں بیٹھا بیٹھا بس ہاتھ مل رہا ہوں

پیچھے چھوٹے ساتھی مجھ کو یاد آ جاتے ہیں

ورنہ دوڑ میں سب سے آگے ہو سکتا ہوں میں

کسی کے رستے پہ کیسے نظریں جمائے رکھوں

ابھی تو کرنا مجھے ہے خود انتظار میرا

مانگتی ہے اب محبت اپنے ہونے کا ثبوت

اور میں جاتا نہیں اظہار کی تفصیل میں

آئے ہو نمائش میں ذرا دھیان بھی رکھنا

ہر شے جو چمکتی ہے چمک دار نہیں ہے

اپنی کہانی دل میں چھپا کر رکھتے ہیں

دنیا والوں کو حیران نہیں کرتے

تمام رنگ ادھورے لگے ترے آگے

سو تجھ کو لفظ میں تصویر کرتا رہتا ہوں

کوئی صورت بھی نہیں ملتی کسی صورت میں

کوزہ گر کیسا کرشمہ ترے اس چاک میں ہے

تبدیلیوں کا نشہ مجھ پر چڑھا ہوا ہے

کپڑے بدل رہا ہوں چہرہ بدل رہا ہوں

اس فیصلے سے خوش ہیں افراد گھر کے سارے

اپنی خوشی سے کب میں گھر سے نکل رہا ہوں

کسی کو ڈھونڈتے ہیں ہم کسی کے پیکر میں

کسی کا چہرہ کسی سے ملاتے رہتے ہیں

تہذیب کی زنجیر سے الجھا رہا میں بھی

تو بھی نہ بڑھا جسم کے آداب سے آگے

اہل ہنر کی آنکھوں میں کیوں چبھتا رہتا ہوں

میں تو اپنی بے ہنری پر ناز نہیں کرتا

گزشتہ رت کا امیں ہوں نئے مکان میں بھی

پرانی اینٹ سے تعمیر کرتا رہتا ہوں

محبتوں کے کئی رنگ روپ ہوتے ہیں

فریب یار سے کوئی گلہ نہیں کرتے

اب کتنی کار آمد جنگل میں لگ رہی ہے

وہ روشنی جو گھر میں بے کار لگ رہی تھی