vo harf-e-rāz ki mujh ko sikhā gayā hai junūñ

ḳhudā mujhe nafas-e-jabra.īl de to kahūñ

wo harf-e-raaz ki mujh ko sikha gaya hai junun

KHuda mujhe nafas-e-jabrail de to kahun

nigah buland suḳhan dil-navāz jaañ pur-soz

yahī hai raḳht-e-safar mīr-e-kārvāñ ke liye

nigah buland suKHan dil-nawaz jaan pur-soz

yahi hai raKHt-e-safar mir-e-karwan ke liye

kabhī ham se kabhī ġhairoñ se shanāsā.ī hai

baat kahne kī nahīñ tū bhī to harjā.ī hai

kabhi hum se kabhi ghairon se shanasai hai

baat kahne ki nahin tu bhi to harjai hai

tū ne ye kyā ġhazab kiyā mujh ko bhī faash kar diyā

maiñ hī to ek raaz thā sīna-e-kā.enāt meñ

tu ne ye kya ghazab kiya mujh ko bhi fash kar diya

main hi to ek raaz tha sina-e-kaenat mein

milegā manzil-e-maqsūd kā usī ko surāġh

añdherī shab meñ hai chīte kī aañkh jis kā charāġh

milega manzil-e-maqsud ka usi ko suragh

andheri shab mein hai chite ki aankh jis ka charagh

haañ dikhā de ai tasavvur phir vo sub.h o shaam tū

dauḌ pīchhe kī taraf ai gardish-e-ayyām tū

han dikha de ai tasawwur phir wo subh o sham tu

dauD pichhe ki taraf ai gardish-e-ayyam tu

bātil se dabne vaale ai āsmāñ nahīñ ham

sau baar kar chukā hai tū imtihāñ hamārā

baatil se dabne wale ai aasman nahin hum

sau bar kar chuka hai tu imtihan hamara

jannat kī zindagī hai jis kī fazā meñ jiinā

merā vatan vahī hai merā vatan vahī hai

jannat ki zindagi hai jis ki faza mein jina

mera watan wahi hai mera watan wahi hai

hayā nahīñ hai zamāne kī aañkh meñ baaqī

ḳhudā kare ki javānī tirī rahe be-dāġh

haya nahin hai zamane ki aankh mein baqi

KHuda kare ki jawani teri rahe be-dagh

nahīñ terā nasheman qasr-e-sultānī ke gumbad par

tū shāhīñ hai baserā kar pahāḌoñ kī chaTānoñ meñ

nahin tera nasheman qasr-e-sultani ke gumbad par

tu shahin hai basera kar pahaDon ki chaTanon mein

amal se zindagī bantī hai jannat bhī jahannam bhī

ye ḳhākī apnī fitrat meñ na nuurī hai na naarī hai

amal se zindagi banti hai jannat bhi jahannam bhi

ye KHaki apni fitrat mein na nuri hai na nari hai

mai-ḳhāna-e-europe ke dastūr nirāle haiñ

laate haiñ surūr avval dete haiñ sharāb āḳhir

mai-KHana-e-europe ke dastur nirale hain

late hain surur awwal dete hain sharab aaKHir

ḳhird-mandoñ se kyā pūchhūñ ki merī ibtidā kyā hai

ki maiñ is fikr meñ rahtā huuñ merī intihā kyā hai

KHird-mandon se kya puchhun ki meri ibtida kya hai

ki main is fikr mein rahta hun meri intiha kya hai

tamannā dard-e-dil kī ho to kar ḳhidmat faqīroñ kī

nahīñ miltā ye gauhar bādshāhoñ ke ḳhazīnoñ meñ

tamanna dard-e-dil ki ho to kar KHidmat faqiron ki

nahin milta ye gauhar baadshahon ke KHazinon mein

zamīr-e-lāla mai-e-lāl se huā labrez

ishāra paate hī suufī ne toḌ dī parhez

zamir-e-lala mai-e-lal se hua labrez

ishaara pate hi sufi ne toD di parhez

dil se jo baat nikaltī hai asar rakhtī hai

par nahīñ tāqat-e-parvāz magar rakhtī hai

dil se jo baat nikalti hai asar rakhti hai

par nahin taqat-e-parwaz magar rakhti hai

jis khet se dahqāñ ko mayassar nahīñ rozī

us khet ke har ḳhosha-e-gandum ko jalā do

jis khet se dahqan ko mayassar nahin rozi

us khet ke har KHosha-e-gandum ko jala do

na samjhoge to miT jāoge ai hindostāñ vaalo

tumhārī dāstāñ tak bhī na hogī dāstānoñ meñ

na samjhoge to miT jaoge ai hindostan walo

tumhaari dastan tak bhi na hogi dastanon mein

zāhir kī aañkh se na tamāshā kare koī

ho dekhnā to dīda-e-dil vā kare koī

zahir ki aankh se na tamasha kare koi

ho dekhna to dida-e-dil wa kare koi

apne man meñ Duub kar pā jā surāġh-e-zindagī

tū agar merā nahīñ bantā na ban apnā to ban

apne man mein Dub kar pa ja suragh-e-zindagi

tu agar mera nahin banta na ban apna to ban

roz-e-hisāb jab mirā pesh ho daftar-e-amal

aap bhī sharmsār ho mujh ko bhī sharmsār kar

roz-e-hisab jab mera pesh ho daftar-e-amal

aap bhi sharmsar ho mujh ko bhi sharmsar kar

mujhe rokegā tū ai nāḳhudā kyā ġharq hone se

ki jin ko Dūbnā hai Duub jaate haiñ safīnoñ meñ

mujhe rokega tu ai naKHuda kya gharq hone se

ki jin ko Dubna hai Dub jate hain safinon mein

ḳhudī ko kar buland itnā ki har taqdīr se pahle

ḳhudā bande se ḳhud pūchhe batā terī razā kyā hai

KHudi ko kar buland itna ki har taqdir se pahle

KHuda bande se KHud puchhe bata teri raza kya hai

hakīm o aarif o suufī tamām mast-e-zahūr

kise ḳhabar ki tajallī hai ain-e-mastūrī

hakim o aarif o sufi tamam mast-e-zahur

kise KHabar ki tajalli hai ain-e-masturi

tire āzād bandoñ kī na ye duniyā na vo duniyā

yahāñ marne kī pābandī vahāñ jiine kī pābandī

tere aazad bandon ki na ye duniya na wo duniya

yahan marne ki pabandi wahan jine ki pabandi

bāġh-e-bahisht se mujhe hukm-e-safar diyā thā kyuuñ

kār-e-jahāñ darāz hai ab mirā intizār kar

bagh-e-bahisht se mujhe hukm-e-safar diya tha kyun

kar-e-jahan daraaz hai ab mera intizar kar

uqābī ruuh jab bedār hotī hai javānoñ meñ

nazar aatī hai un ko apnī manzil āsmānoñ meñ

uqabi ruh jab bedar hoti hai jawanon mein

nazar aati hai un ko apni manzil aasmanon mein

terā imaam be-huzūr terī namāz be-surūr

aisī namāz se guzar aise imaam se guzar

tera imam be-huzur teri namaz be-surur

aisi namaz se guzar aise imam se guzar

aañkh jo kuchh dekhtī hai lab pe aa saktā nahīñ

mahv-e-hairat huuñ ki duniyā kyā se kyā ho jā.egī

aankh jo kuchh dekhti hai lab pe aa sakta nahin

mahw-e-hairat hun ki duniya kya se kya ho jaegi

hue madfūn-e-dariyā zer-e-dariyā tairne vaale

tamāñche mauj ke khāte the jo ban kar guhar nikle

hue madfun-e-dariya zer-e-dariya tairne wale

tamanche mauj ke khate the jo ban kar guhar nikle

be-ḳhatar kuud paḌā ātish-e-namrūd meñ ishq

aql hai mahv-e-tamāshā-e-lab-e-bām abhī

be-KHatar kud paDa aatish-e-namrud mein ishq

aql hai mahw-e-tamasha-e-lab-e-baam abhi

turkoñ kā jis ne dāman hīroñ se bhar diyā thā

merā vatan vahī hai merā vatan vahī hai

turkon ka jis ne daman hiron se bhar diya tha

mera watan wahi hai mera watan wahi hai

andāz-e-bayāñ garche bahut shoḳh nahīñ hai

shāyad ki utar jaa.e tire dil meñ mirī baat

andaz-e-bayan garche bahut shoKH nahin hai

shayad ki utar jae tere dil mein meri baat

ḳhudāvandā ye tere sāda-dil bande kidhar jaa.eñ

ki darveshī bhī ayyārī hai sultānī bhī ayyārī

KHudawanda ye tere sada-dil bande kidhar jaen

ki darweshi bhi ayyari hai sultani bhi ayyari

vajūd-e-zan se hai tasvīr-e-kā.enāt meñ rañg

isī ke saaz se hai zindagī kā soz-e-darūñ

wajud-e-zan se hai taswir-e-kaenat mein rang

isi ke saz se hai zindagi ka soz-e-darun

kamāl-e-josh-e-junūñ meñ rahā maiñ garm-e-tavāf

ḳhudā kā shukr salāmat rahā haram kā ġhilāf

kamal-e-josh-e-junun mein raha main garm-e-tawaf

KHuda ka shukr salamat raha haram ka ghilaf

urūj-e-ādam-e-ḳhākī se anjum sahme jaate haiñ

ki ye TuuTā huā taarā mah-e-kāmil na ban jaa.e

uruj-e-adam-e-KHaki se anjum sahme jate hain

ki ye TuTa hua tara mah-e-kaamil na ban jae

isī ḳhatā se itāb-e-mulūk hai mujh par

ki jāntā huuñ ma.āl-e-sikandarī kyā hai

isi KHata se itab-e-muluk hai mujh par

ki jaanta hun maal-e-sikandari kya hai

saudā-garī nahīñ ye ibādat ḳhudā kī hai

ai be-ḳhabar jazā kī tamannā bhī chhoḌ de

sauda-gari nahin ye ibaadat KHuda ki hai

ai be-KHabar jaza ki tamanna bhi chhoD de

bharī bazm meñ raaz kī baat kah dī

baḌā be-adab huuñ sazā chāhtā huuñ

bhari bazm mein raaz ki baat kah di

baDa be-adab hun saza chahta hun

tire ishq kī intihā chāhtā huuñ

mirī sādgī dekh kyā chāhtā huuñ

tere ishq ki intiha chahta hun

meri sadgi dekh kya chahta hun

tū qādir o aadil hai magar tere jahāñ meñ

haiñ talḳh bahut banda-e-mazdūr ke auqāt

tu qadir o aadil hai magar tere jahan mein

hain talKH bahut banda-e-mazdur ke auqat

nahīñ is khulī fazā meñ koī gosha-e-farāġhat

ye jahāñ ajab jahāñ hai na qafas na āshiyāna

nahin is khuli faza mein koi gosha-e-faraghat

ye jahan ajab jahan hai na qafas na aashiyana

jalāl-e-pādshāhī ho ki jamhūrī tamāshā ho

judā ho diiñ siyāsat se to rah jaatī hai chañgezī

jalal-e-padshahi ho ki jamhuri tamasha ho

juda ho din siyasat se to rah jati hai changezi

sitāra kyā mirī taqdīr kī ḳhabar degā

vo ḳhud farāḳhi-e-aflāk meñ hai ḳhvār o zubūñ

sitara kya meri taqdir ki KHabar dega

wo KHud faraKHi-e-aflak mein hai KHwar o zubun

agar hañgāma-hā-e-shauq se hai lā-makāñ ḳhālī

ḳhatā kis kī hai yā rab lā-makāñ terā hai yā merā

agar hangama-ha-e-shauq se hai la-makan KHali

KHata kis ki hai ya rab la-makan tera hai ya mera

sulatānī-e-jamhūr kā aatā hai zamāna

jo naqsh-e-kuhan tum ko nazar aa.e miTā do

sulatani-e-jamhur ka aata hai zamana

jo naqsh-e-kuhan tum ko nazar aae miTa do

ye kā.enāt abhī nā-tamām hai shāyad

ki aa rahī hai damādam sadā-e-kun-fayakūñ

ye kaenat abhi na-tamam hai shayad

ki aa rahi hai damadam sada-e-kun-fayakun

zamām-e-kār agar mazdūr ke hāthoñ meñ ho phir kyā

tarīq-e-koh-kan meñ bhī vahī hiile haiñ parvezī

zamam-e-kar agar mazdur ke hathon mein ho phir kya

tariq-e-koh-kan mein bhi wahi hile hain parwezi

rishī ke fāqoñ se TuuTā na barhaman kā tilism

asā na ho to kalīmī hai kār-e-be-buniyād

rishi ke faqon se TuTa na barhaman ka tilism

asa na ho to kalimi hai kar-e-be-buniyaad