ham haiñ vo jins ki kahte haiñ jise ġham 'jur.at'

hai mohabbat ke sivā kaun ḳharīdār apnā

hum hain wo jins ki kahte hain jise gham 'jurat'

hai mohabbat ke siwa kaun KHaridar apna

dil-e-vahshī ko ḳhvāhish hai tumhāre dar pe aane kī

divānā hai va-lekin baat kartā hai Thikāne kī

dil-e-wahshi ko KHwahish hai tumhaare dar pe aane ki

diwana hai wa-lekin baat karta hai Thikane ki

qafas meñ ham-safīro kuchh to mujh se baat kar jaao

bhalā maiñ bhī kabhī to rahne vaalā thā gulistāñ kā

qafas mein ham-safiro kuchh to mujh se baat kar jao

bhala main bhi kabhi to rahne wala tha gulistan ka

rakhe hai lazzat-e-bosa se mujh ko gar mahrūm

to apne tū bhī na hoñToñ talak zabāñ pahuñchā

rakhe hai lazzat-e-bosa se mujh ko gar mahrum

to apne tu bhi na honTon talak zaban pahuncha

sīkhiye 'jur.at' kisī se koī baazī koī khel

is bahāne se koī vaañ ham ko le to jā.egā

sikhiye 'jurat' kisi se koi bazi koi khel

is bahane se koi wan hum ko le to jaega

ālam-e-mastī meñ mere muñh se kuchh niklā jo raat

bol uThā tevarī chaḌhā kar vo but-e-mai-ḳhvār chup

aalam-e-masti mein mere munh se kuchh nikla jo raat

bol uTha tewari chaDha kar wo but-e-mai-KHwar chup

dosto Tāñke na do ehsān Tuk itnā karo

le chalo mujh ko vahīñ tum maiñ jahāñ TukḌe huā

dosto Tanke na do ehsan Tuk itna karo

le chalo mujh ko wahin tum main jahan TukDe hua

dūrī-e-yār se hove to kisī shakl najāt

roz ham is liye ho aate haiñ do chaar ke paas

duri-e-yar se howe to kisi shakl najat

roz hum is liye ho aate hain do chaar ke pas

laash ko merī chhupā kar ik kueñ meñ Daal do

yaaro maiñ kushta huuñ ik parda-nashīñ kī chaah kā

lash ko meri chhupa kar ek kuen mein Dal do

yaro main kushta hun ek parda-nashin ki chah ka

zāhidā zohd-o-riyāzat ho mubārak tujh ko

kyuuñ ki taqvā se miyāñ merī to bahbūd nahīñ

zahida zohd-o-riyazat ho mubarak tujh ko

kyun ki taqwa se miyan meri to bahbud nahin

chhoḌ kar tasbīh lī zunnār us but ke liye

the to ahl-e-dīñ par is dil ne barahman kar diyā

chhoD kar tasbih li zunnar us but ke liye

the to ahl-e-din par is dil ne barahman kar diya

kī be-zarī falak ne havāle najīb ke

paajī har ek sāhab-e-zar aa.e hai nazar

ki be-zari falak ne hawale najib ke

paji har ek sahab-e-zar aae hai nazar

baal haiñ bikhre band haiñ TuuTe kaan meñ TeḌhā baalā hai

'jur.at' ham pahchān ga.e haiñ daal meñ kaalā kaalā hai

baal hain bikhre band hain TuTe kan mein TeDha baala hai

'jurat' hum pahchan gae hain dal mein kala kala hai

ahvāl kyā bayāñ maiñ karūñ haa.e ai tabīb

hai dard us jagah ki jahāñ kā nahīñ ilaaj

ahwal kya bayan main karun hae ai tabib

hai dard us jagah ki jahan ka nahin ilaj

tā-sub.h mirī āh-e-jahāñ-soz se kal raat

kyā gumbad-e-aflāk ye hammām sā thā garm

ta-subh meri aah-e-jahan-soz se kal raat

kya gumbad-e-aflak ye hammam sa tha garm

shab-e-hijr thī aur maiñ ro rahā thā

koī jāgtā thā koī so rahā thā

shab-e-hijr thi aur main ro raha tha

koi jagta tha koi so raha tha

yuuñ uThe vo bazm meñ ta.azīm ko ġhairoñ kī haa.e

ham-nashīñ tū baiTh yaañ ham se na baiThā jā.egā

yun uThe wo bazm mein tazim ko ghairon ki hae

ham-nashin tu baiTh yan hum se na baiTha jaega

aañkh uThā kar use dekhūñ huuñ to nazroñ meñ mujhe

yuuñ jatātā hai ki kyā tujh ko nahīñ Dar merā

aankh uTha kar use dekhun hun to nazron mein mujhe

yun jatata hai ki kya tujh ko nahin Dar mera

aañkh lagtī nahīñ 'jur.at' mirī ab saarī raat

aañkh lagte hī ye kaisā mujhe āzār lagā

aankh lagti nahin 'jurat' meri ab sari raat

aankh lagte hi ye kaisa mujhe aazar laga

mujh mast ko kyuuñ bhaa.e na vo sāñvlī sūrat

jī dauḌe hai mai-kash kā ġhizā-e-namakīñ par

mujh mast ko kyun bhae na wo sanwli surat

ji dauDe hai mai-kash ka ghiza-e-namakin par

ġham mujhe nā-tavān rakhtā hai

ishq bhī ik nishān rakhtā hai

gham mujhe na-tawan rakhta hai

ishq bhi ek nishan rakhta hai

us shaḳhs ne kal hātoñ hī hātoñ meñ falak par

sau baar chaḌhāyā mujhe sau baar utārā

us shaKHs ne kal haton hi haton mein falak par

sau bar chaDhaya mujhe sau bar utara

chaah kī chitvan merī aañkh us kī sharmā.ī huī

taaḌ lī majlis meñ sab ne saḳht rusvā.ī huī

chah ki chitwan meri aankh us ki sharmai hui

taD li majlis mein sab ne saKHt ruswai hui

ye savād-e-shahr aur aisā kahāñ husn-e-malīh

shash-jihat meñ mulk dekhā hī nahīñ punjab sā

ye sawad-e-shahr aur aisa kahan husn-e-malih

shash-jihat mein mulk dekha hi nahin punjab sa

haath malte hue aaj aate haiñ sab rah-guzare

jā-e-hairat hai ki maiñ kyuuñ sar-e-bāzār na thā

hath malte hue aaj aate hain sab rah-guzare

ja-e-hairat hai ki main kyun sar-e-bazar na tha

lāzim hai ki āġhāz ho anjām se pahle

le lene do bosa mujhe dushnām se pahle

lazim hai ki aaghaz ho anjam se pahle

le lene do bosa mujhe dushnam se pahle

qahr thiiñ dar-parda shab majlis meñ us kī shoḳhiyāñ

le gayā dil sab ke vo aur sab se sharmātā rahā

qahr thin dar-parda shab majlis mein us ki shoKHiyan

le gaya dil sab ke wo aur sab se sharmata raha

ālūda-ba-ḳhūñ chashm se Tapke hai jo aañsū

sab kahte haiñ hairat se ye motī hai ki mūñgā

aaluda-ba-KHun chashm se Tapke hai jo aansu

sab kahte hain hairat se ye moti hai ki munga

nāseh bahut ba-fikr-e-rafū thā pe juuñ hubāb

mutlaq na us ke haath mirā pairahan lagā

naseh bahut ba-fikr-e-rafu tha pe jun hubab

mutlaq na us ke hath mera pairahan laga

hijr meñ muztarib sā ho ho ke

chār-sū dekhtā huuñ ro ro ke

hijr mein muztarib sa ho ho ke

chaar-su dekhta hun ro ro ke

jo ki sajda na kare but ko mire mashrab meñ

āqibat us kī kisī taur se mahmūd nahīñ

jo ki sajda na kare but ko mere mashrab mein

aaqibat us ki kisi taur se mahmud nahin

is sho.ala-ḳhū ko dekh huā shaiḳh kā ye haal

jubbe ko aag lag uThī ammāma jal gayā

is shoala-KHu ko dekh hua shaiKH ka ye haal

jubbe ko aag lag uThi ammama jal gaya

hashmat-e-duniyā kī kuchh dil meñ havas baaqī nahīñ

ishq kī daulat se haiñ aise hī ālī-jāh ham

hashmat-e-duniya ki kuchh dil mein hawas baqi nahin

ishq ki daulat se hain aise hi aali-jah hum

jis nuur ke bakke ko mah-o-ḳhur ne na dekhā

kam-baḳht ye dil loTe hai us parda-nashīñ par

jis nur ke bakke ko mah-o-KHur ne na dekha

kam-baKHt ye dil loTe hai us parda-nashin par

aayā thā shab ko chhup ke vo rashk-e-chaman so aah

phailī ye ghar meñ bū ki mohalla mahak gayā

aaya tha shab ko chhup ke wo rashk-e-chaman so aah

phaili ye ghar mein bu ki mohalla mahak gaya

chupke chupke rote haiñ muñh par dupaTTa taan kar

ghar jo yaad aayā kisī kā apne ghar meñ aan kar

chupke chupke rote hain munh par dupaTTa tan kar

ghar jo yaad aaya kisi ka apne ghar mein aan kar

ḳhalal ik paḌ gayā nāhaq gul o bulbul kī sohbat meñ

abas kholā thā tū ne baaġh meñ ai gul badan apnā

KHalal ek paD gaya nahaq gul o bulbul ki sohbat mein

abas khola tha tu ne bagh mein ai gul badan apna

ilāhī kyā ilāqa hai vo jab letā hai añgḌā.ī

mire siine meñ sab zaḳhmoñ ke Tāñke TuuT jaate haiñ

ilahi kya ilaqa hai wo jab leta hai angDai

mere sine mein sab zaKHmon ke Tanke TuT jate hain

gar kahīñ pā.ūñ akelā to balā.eñ le kar

kis maze se tujhe luuñ chhātī se dil-dār lagā

gar kahin paun akela to balaen le kar

kis maze se tujhe lun chhati se dil-dar laga

vaañ se aayā hai javāb-e-ḳhat koī suniyo to zarā

maiñ nahīñ huuñ aap maiñ mujh se na samjhā jā.egā

wan se aaya hai jawab-e-KHat koi suniyo to zara

main nahin hun aap main mujh se na samjha jaega

ek to marzī na thī jaane ko merī us taraf

tis pe dil āñkhoñ se bārāñ ḳhuuñ kā barsātā rahā

ek to marzi na thi jaane ko meri us taraf

tis pe dil aankhon se baran KHun ka barsata raha

hairāñ na ho sar dekh mirā apnī zamīñ par

dekho to likhā kyā hai mirī lauh-e-jabīñ par

hairan na ho sar dekh mera apni zamin par

dekho to likha kya hai meri lauh-e-jabin par

tujh sā jo koī tujh ko mil jā.egā to bāteñ

merī tarah se tū bhī chupkā sunā karegā

tujh sa jo koi tujh ko mil jaega to baaten

meri tarah se tu bhi chupka suna karega

daur meñ kyā us ke koī naubat-e-ishrat bajā.e

jab ki ḳhud gardūñ ho ik auñdhā sā naqqārā paḌā

daur mein kya us ke koi naubat-e-ishrat bajae

jab ki KHud gardun ho ek aundha sa naqqara paDa

jaldī talab-e-bosa pe kiije to kahe vaah

aisā ise kyā samjhe ho tum muñh kā nivālā

jaldi talab-e-bosa pe kije to kahe wah

aisa ise kya samjhe ho tum munh ka niwala

āstīn-e-mauj dariyā se judā hotī nahīñ

rabt terā chashm se kyuuñ āstīñ jaatā rahā

aastin-e-mauj dariya se juda hoti nahin

rabt tera chashm se kyun aastin jata raha

lab-e-ḳhayāl se us lab kā jo liyā bosa

to muñh hī muñh meñ ajab tarah kā mazā aayā

lab-e-KHayal se us lab ka jo liya bosa

to munh hi munh mein ajab tarah ka maza aaya

dekho duzdīda nigah se to nikal kar ik raat

chor sā kaun khaḌā hai pas-e-dīvār lagā

dekho duzdida nigah se to nikal kar ek raat

chor sa kaun khaDa hai pas-e-diwar laga

jo aaj chaḌhāte haiñ hameñ arsh-e-barīñ par

do din ko utāreñge vahī log zamīñ par

jo aaj chaDhate hain hamein arsh-e-barin par

do din ko utarenge wahi log zamin par

jahāñ ke baaġh meñ ham bhī bahār dikhlāte

ye rañg-e-ġhuncha jo apnī girah meñ zar hotā

jahan ke bagh mein hum bhi bahaar dikhlate

ye rang-e-ghuncha jo apni girah mein zar hota