kyā ḳhabar kab qaid-e-bām-o-dar se uktā jaa.e dil

bastiyoñ ke darmiyāñ sahrā bhī honā chāhiye

kya KHabar kab qaid-e-baam-o-dar se ukta jae dil

bastiyon ke darmiyan sahra bhi hona chahiye

us ko dhuñdlā na sakegā kabhī lamhoñ kā ġhubār

merī hastī kā varaq yūñhī khulā rahne de

us ko dhundla na sakega kabhi lamhon ka ghubar

meri hasti ka waraq yunhi khula rahne de

jo sāya-dār shajar the vo sarf-e-dār hue

dikhā.ī dete nahīñ duur duur tak saa.e

jo saya-dar shajar the wo sarf-e-dar hue

dikhai dete nahin dur dur tak sae

muddat guzrī Duub chukā huuñ dard kī pyāsī lahroñ meñ

zinda huuñ ye koī na jaane saañs ke aane jaane se

muddat guzri Dub chuka hun dard ki pyasi lahron mein

zinda hun ye koi na jaane sans ke aane jaane se

bol kis moḌ pe huuñ kashmakash-e-marg-o-hayāt

aise aalam meñ kahāñ chhoḌ diyā hai mujh ko

bol kis moD pe hun kashmakash-e-marg-o-hayat

aise aalam mein kahan chhoD diya hai mujh ko

kyā tamāsha hai ki ab har shaḳhs ko ye vahm hai

sab se maiñ ūñchā huuñ mujh se koī bhī ūñchā nahīñ

kya tamasha hai ki ab har shaKHs ko ye wahm hai

sab se main uncha hun mujh se koi bhi uncha nahin

har ik patthar ko hiirā kyoñ samajh leñ

har ik patthar agarche dīdanī hai

har ek patthar ko hira kyon samajh len

har ek patthar agarche didani hai

huā kyā ai nasīm-e-sub.h-gāhī

jo murjhāyā huā dil kā kañval hai

hua kya ai nasim-e-subh-gahi

jo murjhaya hua dil ka kanwal hai

nazar aatī nahīñ haiñ kam-nazar ko

sarāboñ ke jigar meñ naddiyāñ haiñ

nazar aati nahin hain kam-nazar ko

sarabon ke jigar mein naddiyan hain

dīda-e-be-nūr ik aalam hai kyā ye jhuuT hai

har taraf phailā huā hai tīrgī kā silsila

dida-e-be-nur ek aalam hai kya ye jhuT hai

har taraf phaila hua hai tirgi ka silsila

tumhārī yaad ke saa.e bhī kuchh simaT se ga.e

ġhamoñ kī dhuup to bāhar thī aks andar thā

tumhaari yaad ke sae bhi kuchh simaT se gae

ghamon ki dhup to bahar thi aks andar tha

jī yahī kahtā hai ab chal ke vahīñ jā Thahro

ham ne vīrānoñ meñ dekhe haiñ vo āsār ki bas

ji yahi kahta hai ab chal ke wahin ja Thahro

hum ne viranon mein dekhe hain wo aasar ki bas