kaun sī aisī ḳhushī hai jo milī ho ek baar

aur tā-umr hameñ jis ne aziyyat nahīñ dī

kaun si aisi KHushi hai jo mili ho ek bar

aur ta-umr hamein jis ne aziyyat nahin di

muazzin ne azaañ dī aur vo but niklā ḳhudā ho kar

ḳhudā kī sab namāzoñ ke qazā hone kā vaqt aayā

muazzin ne azan di aur wo but nikla KHuda ho kar

KHuda ki sab namazon ke qaza hone ka waqt aaya

hamārī āñkhoñ meñ bas gayā hai ajiib punjab āñsuoñ kā

idhar se raavī chalā udhar se chanāb tayyār ho rahā hai

hamari aankhon mein bas gaya hai ajib punjab aansuon ka

idhar se rawi chala udhar se chanab tayyar ho raha hai

ishq meñ piine kā paanī bas aañkh kā paanī

khāne meñ bas patthar khaa.e jā sakte the

ishq mein pine ka pani bas aankh ka pani

khane mein bas patthar khae ja sakte the

kabhī is raushnī kī qaid se bāhar bhī niklo tum

hujūm-e-husn ne saarā sarāpā gher rakkhā hai

kabhi is raushni ki qaid se bahar bhi niklo tum

hujum-e-husn ne sara sarapa gher rakkha hai

zindagī kā diyā huā chehrā ishq-dariyā meñ dho ke aa.e haiñ

'farhatūllāh'-ḳhāñ ga.e the vahāñ farhat-ehsās ho ke aa.e haiñ

zindagi ka diya hua chehra ishq-dariya mein dho ke aae hain

'farhatullah'-KHan gae the wahan farhat-ehsas ho ke aae hain

mujhe yaqīñ to bahut thā magar ġhalat niklā

ki aabla kabhī pā-posh meñ nahīñ aatā

mujhe yaqin to bahut tha magar ghalat nikla

ki aabla kabhi pa-posh mein nahin aata

saḳht taklīf uThā.ī hai tujhe jānñe meñ

is liye ab tujhe ārām se pahchānte haiñ

saKHt taklif uThai hai tujhe jaanne mein

is liye ab tujhe aaram se pahchante hain

qissa-e-ādam meñ ek aur hī vahdat paidā kar lī hai

maiñ ne apne andar apnī aurat paidā kar lī hai

qissa-e-adam mein ek aur hi wahdat paida kar li hai

main ne apne andar apni aurat paida kar li hai

andar ke hādsoñ pe kisī kī nazar nahīñ

ham mar chuke haiñ aur hameñ is kī ḳhabar nahīñ

andar ke hadson pe kisi ki nazar nahin

hum mar chuke hain aur hamein is ki KHabar nahin

hamārā zinda rahnā aur marnā ek jaisā hai

ham apne yaum-e-paidā.ish ko bhī barsī samajhte haiñ

hamara zinda rahna aur marna ek jaisa hai

hum apne yaum-e-paidaish ko bhi barsi samajhte hain

vo aql-mand kabhī josh meñ nahīñ aatā

gale to lagtā hai āġhosh meñ nahīñ aatā

wo aql-mand kabhi josh mein nahin aata

gale to lagta hai aaghosh mein nahin aata

jañgaloñ ko kaaT kar kaisā ġhazab ham ne kiyā

shahr jaisā ek ādam-ḳhor paidā kar liyā

jangalon ko kaT kar kaisa ghazab hum ne kiya

shahr jaisa ek aadam-KHor paida kar liya

ek bose ke bhī nasīb na hoñ

hoñTh itne bhī ab ġharīb na hoñ

ek bose ke bhi nasib na hon

honTh itne bhi ab gharib na hon

ban na paayā hiir, rāñjhā ab bhī rāñjhā hai bahut

dekh vāris-shāh terī hiir aadhī rah ga.ī

ban na paya hir, ranjha ab bhi ranjha hai bahut

dekh waris-shah teri hir aadhi rah gai

vo chāñd kah ke gayā thā ki aaj niklegā

to intizār meñ baiThā huā huuñ shaam se maiñ

wo chand kah ke gaya tha ki aaj niklega

to intizar mein baiTha hua hun sham se main

maiñ bichhḌoñ ko milāne jā rahā huuñ

chalo dīvār Dhāne jā rahā huuñ

main bichhDon ko milane ja raha hun

chalo diwar Dhane ja raha hun

bachā ke laa.eñ kisī bhī yatīm bachche ko

aur us ke haath se taḳhlīq-e-kā.ināt kareñ

bacha ke laen kisi bhi yatim bachche ko

aur us ke hath se taKHliq-e-kainat karen

phir soch ke ye sabr kiyā ahl-e-havas ne

bas ek mahīna hī to ramzān rahegā

phir soch ke ye sabr kiya ahl-e-hawas ne

bas ek mahina hi to ramzan rahega

ye dhaḌaktā huā dil us ke havāle kar duuñ

ek bhī shaḳhs agar shahar meñ zinda mil jaa.e

ye dhaDakta hua dil us ke hawale kar dun

ek bhi shaKHs agar shahar mein zinda mil jae

shusta zabāñ shagufta bayāñ hoñTh gul-fishāñ

saarī haiñ tujh meñ ḳhūbiyāñ urdu zabān kī

shusta zaban shagufta bayan honTh gul-fishan

sari hain tujh mein KHubiyan urdu zaban ki

duniyā se kaho jo use karnā hai vo kar le

ab dil meñ mire vo alal-elān rahegā

duniya se kaho jo use karna hai wo kar le

ab dil mein mere wo alal-elan rahega

tamām paikar-e-badsūrtī hai mard kī zaat

mujhe yaqīñ hai ḳhudā mard ho nahīñ saktā

tamam paikar-e-badsurti hai mard ki zat

mujhe yaqin hai KHuda mard ho nahin sakta

mohabbat phuul banñe par lagī thī

palaT kar phir kalī kar lī hai maiñ ne

mohabbat phul banne par lagi thi

palaT kar phir kali kar li hai main ne

kisī kalī kisī gul meñ kisī chaman meñ nahīñ

vo rañg hai hī nahīñ jo tire badan meñ nahīñ

kisi kali kisi gul mein kisi chaman mein nahin

wo rang hai hi nahin jo tere badan mein nahin

chāñd bhī hairān dariyā bhī pareshānī meñ hai

aks kis kā hai ki itnī raushnī paanī meñ hai

chand bhi hairan dariya bhi pareshani mein hai

aks kis ka hai ki itni raushni pani mein hai

ik raat vo gayā thā jahāñ baat rok ke

ab tak rukā huā huuñ vahīñ raat rok ke

ek raat wo gaya tha jahan baat rok ke

ab tak ruka hua hun wahin raat rok ke

maiñ bhī yahāñ huuñ is kī shahādat meñ kis ko lā.ūñ

mushkil ye hai ki aap huuñ apnī nazīr maiñ

main bhi yahan hun is ki shahadat mein kis ko laun

mushkil ye hai ki aap hun apni nazir main

dar-asl is jahāñ ko zarūrat nahīñ mirī

har-chand is jahāñ ke liye nā-guzīr maiñ

dar-asl is jahan ko zarurat nahin meri

har-chand is jahan ke liye na-guzir main

be-badan ruuh bane phirte rahoge kab tak

jaao chupke se kisī jism meñ dāḳhil ho jaao

be-badan ruh bane phirte rahoge kab tak

jao chupke se kisi jism mein daKHil ho jao

ahl-e-dil ne kabhī maḳhlūt hukūmat na banā.ī

aql vāloñ ne bhī be-shart himāyat nahīñ dī

ahl-e-dil ne kabhi maKHlut hukumat na banai

aql walon ne bhi be-shart himayat nahin di

dhuup bolī ki maiñ ābā.ī vatan huuñ terā

maiñ ne phir sāya-e-dīvār ko zahmat nahīñ dī

dhup boli ki main aabai watan hun tera

main ne phir saya-e-diwar ko zahmat nahin di

sar salāmat liye lauT aa.e galī se us kī

yaar ne ham ko koī Dhañg kī ḳhidmat nahīñ dī

sar salamat liye lauT aae gali se us ki

yar ne hum ko koi Dhang ki KHidmat nahin di

ek baar us ne bulāyā thā to masrūf thā maiñ

jīte-jī phir kabhī baarī hī nahīñ aa.ī mirī

ek bar us ne bulaya tha to masruf tha main

jite-ji phir kabhi bari hi nahin aai meri

jism kā kuuza hai apnā aur na ye dariyā-e-jāñ

jo lagā legā laboñ se us meñ bhar jā.eñge ham

jism ka kuza hai apna aur na ye dariya-e-jaan

jo laga lega labon se us mein bhar jaenge hum

jise bhī pyaas bujhānī ho mere paas rahe

kabhī bhī apne laboñ se chhalakne lagtā huuñ

jise bhi pyas bujhani ho mere pas rahe

kabhi bhi apne labon se chhalakne lagta hun

jab us ko dekhte rahne se thakne lagtā huuñ

to apne ḳhvāb kī palkeñ jhapakne lagtā huuñ

jab us ko dekhte rahne se thakne lagta hun

to apne KHwab ki palken jhapakne lagta hun

rāsta paanī māñgtā hai

apne paañv kā chhālā maar

rasta pani mangta hai

apne panw ka chhaala mar

aurteñ kaam pe niklī thiiñ badan ghar rakh kar

jism ḳhālī jo nazar aa.e to mard aa baiThe

aurten kaam pe nikli thin badan ghar rakh kar

jism KHali jo nazar aae to mard aa baiThe

log yuuñ jaate nazar aate haiñ maqtal kī taraf

mas.ale jaise ravāna hoñ kisī hal kī taraf

log yun jate nazar aate hain maqtal ki taraf

masale jaise rawana hon kisi hal ki taraf

mere har misre pe us ne vasl kā misra lagāyā

sab adhūre sher shab bhar meñ mukammal ho ga.e the

mere har misre pe us ne wasl ka misra lagaya

sab adhure sher shab bhar mein mukammal ho gae the

tū mujh ko jo is shahr meñ laayā nahīñ hotā

maiñ be-sar-o-sāmāñ kabhī rusvā nahīñ hotā

tu mujh ko jo is shahr mein laya nahin hota

main be-sar-o-saman kabhi ruswa nahin hota

kis kī hai ye tasvīr jo bantī nahīñ mujh se

maiñ kis kā taqāzā huuñ ki puurā nahīñ hotā

kis ki hai ye taswir jo banti nahin mujh se

main kis ka taqaza hun ki pura nahin hota

jaan ye sarkashī-e-jism tire bas kī nahīñ

merī āġhosh meñ aa lā ye musībat mujhe de

jaan ye sarkashi-e-jism tere bas ki nahin

meri aaghosh mein aa la ye musibat mujhe de

tū farāham na ho mujh ko ye hai marzī terī

tujh ko jab chāhūñ bulā luuñ ye ijāzat mujhe de

tu faraham na ho mujh ko ye hai marzi teri

tujh ko jab chahun bula lun ye ijazat mujhe de

bas mohabbat bas mohabbat bas mohabbat jān-e-man

baaqī sab jazbāt kā iz.hār kam kar dījiye

bas mohabbat bas mohabbat bas mohabbat jaan-e-man

baqi sab jazbaat ka izhaar kam kar dijiye

us se milne ke liye jaa.e to kyā jaa.e koī

us ne darvāze pe ā.īna lagā rakkhā hai

us se milne ke liye jae to kya jae koi

us ne darwaze pe aaina laga rakkha hai

ishq aḳhbār kab kā band huā

dil mirā āḳhirī shumāra hai

ishq aKHbar kab ka band hua

dil mera aaKHiri shumara hai

aañkh bhar dekh lo ye vīrāna

aaj kal meñ ye shahr hotā hai

aankh bhar dekh lo ye virana

aaj kal mein ye shahr hota hai

hijr o visāl charāġh haiñ donoñ tanhā.ī ke tāqoñ meñ

akasr donoñ gul rahte haiñ aur jalā kartā huuñ maiñ

hijr o visal charagh hain donon tanhai ke taqon mein

akasr donon gul rahte hain aur jala karta hun main