koi sipahi nahin bach saka nishanon se

koī sipāhī nahīñ bach sakā nishānoñ se

galī meñ tiir baraste rahe makānoñ se

ye burdbārī achānak se thoḌī aa.ī hai

kalām karnā paḌā mujh ko bad-zabānoñ se

tumhāre haath salāmat raheñ to shahzāde

ye shaal yūñhī saraktī rahegī shānoñ se

hamārī raah meñ dīvār ban ga.e vo log

jinheñ sunā.ī nahīñ de rahā thā kānoñ se

tamāshe yūñhī nahīñ kāmyāb ho jaate

makīn khīñch ke laa.e ga.e makānoñ se

bahut se sher sunā.e haiñ gungunā ke magar

ye jañg jiitī nahīñ jā rahī tarānoñ se

koi sipahi nahin bach saka nishanon se

gali mein tir baraste rahe makanon se

ye burdbari achanak se thoDi aai hai

kalam karna paDa mujh ko bad-zabanon se

tumhaare hath salamat rahen to shahzade

ye shaal yunhi sarakti rahegi shanon se

hamari rah mein diwar ban gae wo log

jinhen sunai nahin de raha tha kanon se

tamashe yunhi nahin kaamyab ho jate

makin khinch ke lae gae makanon se

bahut se sher sunae hain gunguna ke magar

ye jang jiti nahin ja rahi taranon se