wo KHwab hi sahi pesh-e-nazar to ab bhi hai

vo ḳhvāb hī sahī pesh-e-nazar to ab bhī hai

bichhaḌne vaalā sharīk-e-safar to ab bhī hai

zabāñ-burīda sahī maiñ ḳhizāñ-rasīda sahī

harā-bharā mirā zaḳhm-e-hunar to ab bhī hai

hamārī dar-ba-darī par na jā.iye ki hameñ

shu.ūr-e-sāya-e-dīvār-o-dar to ab bhī hai

kahāniyāñ haiñ agar mo'atabar to phir ik shaḳhs

kahāniyoñ kī tarah mo'atabar to ab bhī hai

magar ye kaun badaltī huī rutoñ se kahe

shajar meñ saaya nahīñ hai shajar to ab bhī hai

wo KHwab hi sahi pesh-e-nazar to ab bhi hai

bichhaDne wala sharik-e-safar to ab bhi hai

zaban-burida sahi main KHizan-rasida sahi

hara-bhara mera zaKHm-e-hunar to ab bhi hai

hamari dar-ba-dari par na jaiye ki hamein

shuur-e-saya-e-diwar-o-dar to ab bhi hai

kahaniyan hain agar mo'atabar to phir ek shaKHs

kahaniyon ki tarah mo'atabar to ab bhi hai

magar ye kaun badalti hui ruton se kahe

shajar mein saya nahin hai shajar to ab bhi hai