یہ سچ ہے رنگ بدلتا تھا وہ ہر اک لمحہ

مگر وہی تو بہت کامیاب چہرا تھا

میرا کرب مری تنہائی کی زینت

میں چہروں کے جنگل کا سناٹا ہوں

باہر سارے میداں جیت چکا تھا وہ

گھر لوٹا تو پل بھر میں ہی ٹوٹا تھا

جانے کیا سوچ کے پھر ان کو رہائی دے دی

ہم نے اب کے بھی پرندوں کو تہہ دام کیا

ہر اک ندی سے کڑی پیاس لے کے وہ گزرا

یہ اور بات کہ وہ خود بھی ایک دریا تھا

جانے کیا برسا تھا رات چراغوں سے

بھور سمے سورج بھی پانی پانی ہے

اک شفاف طبیعت والا صحرائی

شہر میں رہ کر کس درجہ چالاک ہوا

چہروں پہ زر پوش اندھیرے پھیلے ہیں

اب جینے کے ڈھنگ بڑے ہی مہنگے ہیں

جان دینے کا ہنر ہر شخص کو آتا نہیں

سوہنی کے ہاتھ میں کچا گھڑا تھا دیکھتے

آم کے پیڑوں کے سارے پھل سنہرے ہو گئے

اس برس بھی راستہ کیوں رو رہا تھا دیکھتے

ہر پھول پہ اس شخص کو پتھر تھے چلانے

اشکوں سے ہر اک برگ کو بھرنا تھا ہمیں بھی

ہم پی بھی گئے اور سلامت بھی ہیں عنبرؔ

پانی کی ہر اک بوند میں ہیرے کی کنی تھی

ایک سناٹا بچھا ہے اس جہاں میں ہر طرف

آسماں در آسماں در آسماں کیوں رت جگے ہیں

ایک ساحر کبھی گزرا تھا ادھر سے عنبرؔ

جائے حیرت کہ سبھی اس کے اثر میں ہیں ابھی

اس نے ہرذرے کو طلسم آباد کیا

ہاتھ ہمارے لگی فقط حیرانی ہے

روز ہم جلتی ہوئی ریت پہ چلتے ہی نہ تھے

ہم نے سائے میں کجھوروں کے بھی آرام کیا

سوپ کے دانے کبوتر چک رہا تھا اور وہ

صحن کو مہکا رہی تھی سنتیں پڑھتے ہوئے

گئے تھے ہم بھی بحر کی تہوں میں جھومتے ہوئے

ہر ایک سیپ کے لبوں میں صرف ریگزار تھا