'ḳhār' ulfat kī baat jaane do

zindagī kis ko sāzgār aa.ī

'KHar' ulfat ki baat jaane do

zindagi kis ko sazgar aai

mohabbat zulf kā aaseb jaadū hai nigāhoñ kā

mohabbat fitna-e-mahshar balā-e-nā-gahānī hai

mohabbat zulf ka aaseb jadu hai nigahon ka

mohabbat fitna-e-mahshar bala-e-na-gahani hai

chupke se sah rahā huuñ sitam tere bevafā

merī ḳhatā to jab ho ki chuuñ kar rahā huuñ maiñ

chupke se sah raha hun sitam tere bewafa

meri KHata to jab ho ki chun kar raha hun main

sach to ye hai ki duā ne na davā ne rakkhā

ham ko zinda tire dāman kī havā ne rakkhā

sach to ye hai ki dua ne na dawa ne rakkha

hum ko zinda tere daman ki hawa ne rakkha

maiñ ne maanā ki adū bhī tirā shaidā.ī hai

farq hotā hai fidā hone meñ mar jaane meñ

main ne mana ki adu bhi tera shaidai hai

farq hota hai fida hone mein mar jaane mein