خارؔ الفت کی بات جانے دو

زندگی کس کو سازگار آئی

چشم گریاں کی آبیاری سے

دل کے داغوں پہ پھر بہار آئی

سچ تو یہ ہے کہ دعا نے نہ دوا نے رکھا

ہم کو زندہ ترے دامن کی ہوا نے رکھا

چپکے سے سہہ رہا ہوں ستم تیرے بے وفا

میری خطا تو جب ہو کہ چوں کر رہا ہوں میں

میں نے مانا کہ عدو بھی ترا شیدائی ہے

فرق ہوتا ہے فدا ہونے میں مر جانے میں

اٹھے نہ بیٹھ کر کبھی کوئے حبیب سے

اس در پے کیا گئے کہ اسی در کے ہو گئے

محبت زلف کا آسیب جادو ہے نگاہوں کا

محبت فتنۂ محشر بلائے ناگہانی ہے

یہ نگری حسن والوں کی عجب نگری ہے اے ہم دم

کہ اس نگری میں آہوں کی بھی تاثیریں بدلتی ہیں

برہمی حسن کو کچھ اور جلا دیتی ہے

وہ جمالی تیرا چہرہ وہ جلالی آنکھیں