ادب بنفسہ ایک نئے توازن کی تلاش ہے اور انقلاب کے تصور میں توازن کی جگہ ہی نہیں رکھی گئی۔ انقلاب کے تصور سے مؤثر ادب تو پیدا ہو سکتا ہے مگر بڑا ادب پیدا نہیں ہو سکتا۔

انقلاب کا اصلی مفہوم خونریزی اور تخریب نہیں، نہ محض کسی نہ کسی طرح کی تبدیلی کو در اصل انقلاب کہتے ہیں۔ یہ تو انقلاب کے سب سے سستے معنی ہیں۔ اصلی انقلاب تو بغیر خون بہائے بھی ہو سکتا ہے۔

مجھے حقیقت کی نسبت افسانوں سے زیادہ شغف ہے۔ کیونکہ جب تک حقیقت پر انسانوں کے تخیل کاعمل نہیں ہوتا وہ مردہ رہتی ہے۔

محاورے صرف خوب صورت فقرے نہیں، یہ تو اجتماعی تجربے کے ٹکڑے ہیں جن میں سماج کی پوری شخصیت بستی ہے۔

اگر ادب میں فحش موجود ہے تو اسے ہوا بنانے کی کوئی معقول وجہ نہیں۔ اگر آپ لوگوں کوفحش کی مضرتوں سے بچانا چاہتے ہیں توانہیں یہ سمجھنے کا موقع دیجئے کہ کیا چیز آرٹ ہے اور کیا نہیں ہے۔ جوشخض آرٹ کے مزے سے واقف ہوجائے گا اس کے لئے فحش اپنے آپ پھسپھسا ہوکر رہ جائے گا۔