mohabbat, hijr, nafrat mil chukī hai

maiñ taqrīban mukammal ho chukā huuñ

mohabbat, hijr, nafrat mil chuki hai

main taqriban mukammal ho chuka hun

ham ġhulāmī ko muqaddar kī tarah jānte haiñ

ham tirī jiit tirī maat se nikle hue haiñ

hum ghulami ko muqaddar ki tarah jaante hain

hum teri jit teri mat se nikle hue hain

kuchh is liye bhī akelā sā ho gayā huuñ 'nadīm'

sabhī ko dost banāyā hai dushmanī nahīñ kī

kuchh is liye bhi akela sa ho gaya hun 'nadim'

sabhi ko dost banaya hai dushmani nahin ki

aur koī pahchān mirī bantī hī nahīñ

jānte haiñ sab log ki bas terā huuñ maiñ

aur koi pahchan meri banti hi nahin

jaante hain sab log ki bas tera hun main

mohabbat ne akelā kar diyā hai

maiñ apnī zaat meñ ik qāfila thā

mohabbat ne akela kar diya hai

main apni zat mein ek qafila tha

saare savāl āsān haiñ mushkil ek javāb

ham bhī ek javāb haiñ koī savāl kare

sare sawal aasan hain mushkil ek jawab

hum bhi ek jawab hain koi sawal kare

bad-nasībī ki ishq kar ke bhī

koī dhoka nahīñ huā mire saath

bad-nasibi ki ishq kar ke bhi

koi dhoka nahin hua mere sath

dil mubtalā-e-hijr rifāqat meñ rah gayā

lagtā hai koī farq mohabbat meñ rah gayā

dil mubtala-e-hijr rifaqat mein rah gaya

lagta hai koi farq mohabbat mein rah gaya

dil se ik yaad bhulā dī ga.ī hai

kisī ġhaflat kī sazā dī ga.ī hai

dil se ek yaad bhula di gai hai

kisi ghaflat ki saza di gai hai

maiñ lau meñ lau huuñ, alaav meñ huuñ alaav 'nadīm'

so har charāġh mirā e'tirāf kartā rahā

main lau mein lau hun, alaw mein hun alaw 'nadim'

so har charagh mera e'tiraf karta raha

parda-dāroñ ne ḳhud-kushī kar lī

sahn jhāñkā gayā kisī chhat se

parda-daron ne KHud-kushi kar li

sahn jhanka gaya kisi chhat se

aur ab khulā ki vo ka.aba nahīñ tirā ghar thā

tamām umr maiñ jis kā tavāf kartā rahā

aur ab khula ki wo kaba nahin tera ghar tha

tamam umr main jis ka tawaf karta raha

zarūr us kā koī pyaas se marā hogā

vo kitne pyaar se paanī pilā rahā thā hameñ

zarur us ka koi pyas se mara hoga

wo kitne pyar se pani pila raha tha hamein

ab mohabbat kā sabab hai vahshat

varna hasrat to miTā dī ga.ī hai

ab mohabbat ka sabab hai wahshat

warna hasrat to miTa di gai hai

ġhalat na jaan ki āñkheñ nahīñ rahīñ merī

so chhū rahā huuñ ki chehra samajh meñ aa jaa.e

ghalat na jaan ki aankhen nahin rahin meri

so chhu raha hun ki chehra samajh mein aa jae

maiñ ne manzil kī duā māñgī thī

merī raftār baḌhā dī ga.ī hai

main ne manzil ki dua mangi thi

meri raftar baDha di gai hai

ham kisī zo.am meñ nārāz hue haiñ tujh se

ham kisī baat pe auqāt se nikle hue haiñ

hum kisi zoam mein naraaz hue hain tujh se

hum kisi baat pe auqat se nikle hue hain

mujhe dariyā, kabhī sahrā ke havāle kar ke

vo kahānī ko nayā moḌ diyā kartā thā

mujhe dariya, kabhi sahra ke hawale kar ke

wo kahani ko naya moD diya karta tha

ek rūmāl āñsuoñ se bharā

aur ik ḳhat jalā huā mire paas

ek rumal aansuon se bhara

aur ek KHat jala hua mere pas

ḳhudā kare tujhe tahzīb-e-mai-kashī ho nasīb

ḳhudā kare tujhe nashsha samajh meñ aa jaa.e

KHuda kare tujhe tahzib-e-mai-kashi ho nasib

KHuda kare tujhe nashsha samajh mein aa jae

yaad abhī nahīñ hameñ zehn pe zor de chuke

tum hī se milne aa.e the tum se hī kaam thā zarūr

yaad abhi nahin hamein zehn pe zor de chuke

tum hi se milne aae the tum se hi kaam tha zarur

ḳhudā kī tarah koī aadmī bhī hai shāyad

nazar jo aatā nahīñ ās-pās ho kar bhī

KHuda ki tarah koi aadmi bhi hai shayad

nazar jo aata nahin aas-pas ho kar bhi

hamārī ruuh parindoñ ko sauñp dī jaa.e

ki ye badan to gunahgār ho ga.e sāhib

hamari ruh parindon ko saunp di jae

ki ye badan to gunahgar ho gae sahib

log kirdār banñā chāhte haiñ

jaise mumkin hai sab riyāzat se

log kirdar banna chahte hain

jaise mumkin hai sab riyazat se

baat peḌoñ kī nahīñ, ġham hai parindoñ kā 'nadīm'

ghoñsle jin ke koī toḌ diyā kartā thā

baat peDon ki nahin, gham hai parindon ka 'nadim'

ghonsle jin ke koi toD diya karta tha

ishq itnā bhī kyā zarūrī hai

koī be-ishq mar nahīñ jaatā

ishq itna bhi kya zaruri hai

koi be-ishq mar nahin jata

tum ne jab us kī baat kī tum pe bhī pyaar aa gayā

chūmā nahīñ tumheñ miyāñ garche maqām thā zarūr

tum ne jab us ki baat ki tum pe bhi pyar aa gaya

chuma nahin tumhein miyan garche maqam tha zarur

tum inheñ bārisheñ samajhte ho

ham ne rone kā tajraba kiyā hai

tum inhen barishen samajhte ho

hum ne rone ka tajraba kiya hai

mujh ko miTTī ke piyāle meñ pilā taaza sharāb

jism hone lagā be-kār koī mastī ho

mujh ko miTTi ke piyale mein pila taza sharab

jism hone laga be-kar koi masti ho

apnī gardan jhukā ke baat karo

tum nikāle ga.e ho jannat se

apni gardan jhuka ke baat karo

tum nikale gae ho jannat se

ab tū hī merī ḳhālī hathelī kī laaj rakh

mujh se to koī farq ibādat meñ rah gayā

ab tu hi meri KHali hatheli ki laj rakh

mujh se to koi farq ibaadat mein rah gaya

uñgliyāñ pher mere bāloñ meñ

ye mirā dard-e-sar nahīñ jaatā

ungliyan pher mere baalon mein

ye mera dard-e-sar nahin jata

jaane kis ko raazī karnā hai mujh ko

jaane kis kī ḳhātir naach rahā huuñ maiñ

jaane kis ko raazi karna hai mujh ko

jaane kis ki KHatir nach raha hun main

maiñ aise moḌ par apnī kahānī chhoḌ aayā huuñ

kisī kī aañkh meñ paanī hī paanī chhoḌ aayā huuñ

main aise moD par apni kahani chhoD aaya hun

kisi ki aankh mein pani hi pani chhoD aaya hun

hamāre paañv meñ kīleñ aur ā.ankhoñ se lahū Tapke

hamārī jo bhī hālat ho tumhāre saath rahnā hai

hamare panw mein kilen aur aaankhon se lahu Tapke

hamari jo bhi haalat ho tumhaare sath rahna hai

charāġh dafn kiye the 'nadīm' qabroñ meñ

zamīñ se chāñd numūdār ho ga.e sāhib

charagh dafn kiye the 'nadim' qabron mein

zamin se chand numudar ho gae sahib

kuchh phūloñ kī ḳhātir bhī kuchh phūloñ kā

sab se achchhā rang churānā paḌtā hai

kuchh phulon ki KHatir bhi kuchh phulon ka

sab se achchha rang churana paDta hai

is duniyā ko chhoḌ ke jis meñ tum bhī ho

jaatā kaun hai lekin jaanā paḌtā hai

is duniya ko chhoD ke jis mein tum bhi ho

jata kaun hai lekin jaana paDta hai

ye tirī guftugū kā lamha hai

is ghaḌī hai mirā ḳhudā mire paas

ye teri guftugu ka lamha hai

is ghaDi hai mera KHuda mere pas

ham se khelā gayā hai sach-much meñ

yā khilaune kā tajraba kiyā hai

hum se khela gaya hai sach-much mein

ya khilaune ka tajraba kiya hai

gale lagā ke use ḳhvāb meñ bahut ro.e

aur itnā ro.e ki bedār ho ga.e sāhib

gale laga ke use KHwab mein bahut roe

aur itna roe ki bedar ho gae sahib

phir mujhe ḳhud bhī ḳhabar ho na sakī maiñ huuñ kahāñ

āḳhirī baar tire gaañv meñ dekhā gayā huuñ

phir mujhe KHud bhi KHabar ho na saki main hun kahan

aaKHiri bar tere ganw mein dekha gaya hun

ai mujhe ḳhvāb dikhāte hue logo sun lo

merā dukh ye hai koī ḳhvāb nahīñ bhūltā maiñ

ai mujhe KHwab dikhate hue logo sun lo

mera dukh ye hai koi KHwab nahin bhulta main

tujhe kuchh vaqt chāhiye mirī jaan

vaqt hī to nahīñ bachā mire paas

tujhe kuchh waqt chahiye meri jaan

waqt hi to nahin bacha mere pas

bas itnā soch kar hī mujh ko apne paas tum rakh lo

tumhāre vāste maiñ hukmarānī chhoḌ aayā huuñ

bas itna soch kar hi mujh ko apne pas tum rakh lo

tumhaare waste main hukmarani chhoD aaya hun